༄༅།།ཐང་ག་ཇི་ལྟར་བྱུང་བ་དང་རིགས་འདྲ་མིན་དུ་ཡོད།

ཐང་ག (བོད་ཀྱི་ལྷ་རིས་སྒྱུ་རྩལ་རི་མོ།)

༿རྨི་ལམ་ཡག་པོ གཡང་དཀར་སྒྲོལ་མ།༾

    བོད་ཀྱི་ལོ་རྒྱུས་ཁག་ལས། རྒྱལ་བོ་སྲོང་བཙན་གྱི་དུས་སུ་རྒྱ་བཟའ་བོད་དུ་སྤྱན་འདྲེན་པ་དང་ལྷན་དུ་ཇོ་བོ་ཤཱཀྱ་མུ་ནེ་དང་བཟོ་སྣ་བཅོ་བརྒྱད་སོགས་བོད་དུ་དྲངས། ཕན་ཚུན་སློབ་མ་དང་བཟོ་རྩལ་པ་མངགས་པར་གསུངས། ཁྲི་སྲོང་ལྡེ་བཙན་གྱིས་བསམ་ཡས་བཞེངས་སྐབས་དར་ཐང་ཆེན་མོ་གསུམ་བཞེངས་པ་ལས་བོད་ལ་རྒྱལ་བོ་ཁྲི་སྲོང་ལྡེ་བཙན་གོང་དུ་ཐང་ག་བཞེངས་སྲོལ་དར་བ་ཤིན་ཏུ་གསལ། བོད་ཀྱི་ཐང་གའི་བྲིས་ལུགས་ལ་སྨན་ཐང་ལུགས་དང་ཀརྨ་སྒར་ལུགས། བལ་བོའི་ལུགས། བྱིའུ་སྒང་ལུགས། མཁྱེན་བརྩེ་ལུགས་བཅས་ལྔ་ཡོད་པ་དང་། ཐང་ག་ལ་རིགས་དགར་ན་སྐྱ་ཐང་དང་། ཚོན་རྫོགས། ཐང་ནག མཚལ་ཐང་། གསེར་ཐང་། གོས་སྐུ། གོས་སྐུ་འབུར་མ། འཚེམ་ཐང་། འཐག་ཐང་། མུ་ཏིག་གི་ཐང་ཀ ཕྱིས་སུ་དར་བའི་ཆུ་རིས་མ། ཕྱི་གླིང་ལུགས་ཀྱི་འབུར་ཚུགས་ཅན་སོགས་ཡོད་པ་རེད།

 

ངོ་སྤྲོད།

    ཐང་ག་དངོས་བཤད་པའི་ཐོག་མར། ཐ་སྙད་དེ་ཇི་ལྟར་བྱུང་བ་དང་། དུས་ནམ་དང་ཚུལ་ཇི་ལྟ་བུས་བོད་དུ་ཐང་ག་བཟོ་སྲོལ་དར་བར་རགས་ཙམ་དཔྱད་པར་བྱ་བ་ལ།ལོ་རྒྱུས་སྨྲ་བ་འགའ་ཞིག་གིས། ཐ་སྙད་དེ་རྒྱ་ནག་གི་སྐད་ཀྱི་སྒྲ་ཐད་འགྱུར་ཡིན་ལ། དེའི་སྲོལ་ཡང་རྒྱ་ནག་ནས་བྱུང་བར་བཤད་མོད།ཁོ་བོས་དེ་སྔོན་ཡིད་རྟེན་དུ་རུང་བའི་ལོ་རྒྱུས་ཁུངས་བཙན་མ་མཐོང་བས་འདི་ནི་འདི་འོ་ཞེས་སྨྲ་བའི་སྤོབས་པ་ཞུམ་མོད།འོན་ཀྱང་དེ་ལ་བསམ་དགོས་པ་ཞིག་ཀྱང་སྣང་སྟེ། བོད་ཀྱི་ལོ་རྒྱུས་ཆེན་མོ་ཁག་ལས། རྒྱལ་པོ་སྲོང་བཙན་ཀྱི་དུས།བློན་པོ་མགར་གྱིས་རྒྱ་བཟའ་ཀོང་ཇོ་བོད་དུ་སྤྱན་འདྲེན་པ་དང་ལྷན་དུ། ཇོ་བོ་ཤཱཀྱ་མུ་ནེ་དང་བཟོ་སྣ་བཅོ་བརྒྱད་ཀྱི་དཔེ།སྨན་དཔྱད་ཆེན་མོ་དང་། རྩིས་ཀྱི་པོར་ཐང་བརྒྱད་ཅུ་རྣམས་ཀྱང་བོད་དུ་དྲངས། ཕན་ཚུན་སློབ་མ་དང་བཟོ་རྩལ་པ་མངགས་སོ་ཞེས་བྱུང་བ་དང་།ཁྲི་སྲོང་ལྡེ་བཙན་གྱིས་བསམ་ཡས་བཞེངས་སྐབས་དར་ཐང་ཆེན་མོ་གསུམ་བཞེངས་ཚུལ་བཤད་ལ། དེ་ལ་ལོ་རྒྱུས་འགའ་ཞིག་ཏུ་སི་ཐང་ཞེས་ཀྱང་པྲི་སྣང་མོད་སྒྲ་འགྱུར་ལ་སི་ཐང་དང་།དོན་འགྱུར་ལ་དར་ཐང་ཞེས་བརྗོད་པ་ཡིན་ནམ་སྙམ་དུ་དཔྱད་དོ། ། གང་ལྟར་ཡང་རྒྱལ་པོ་ཁྲི་སྲོང་ལྡེ་བཙན་གོང་དུ་བོད་ལ་ཐང་ག་བཞེངས་སྲོལ་དར་བ་ཤིན་ཏུ་གསལ་ལོ།།

 

རིགས་དབྱེ།

    ཐང་ག་ལ། སྐྱ་ཐང་དང་། ཚོན་རྫོགས། ཐང་ནག མཚལ་ཐང་། གསེར་ཐང་། གོས་སྐུ། གོས་སྐུ་འབུར་མ། འཚེམ་ཐང་། འཐག་ཐང་། མུ་ཏིག་གི་ཐང་ག ཕྱིས་སུ་དར་བའི་ཆུ་རིས་མ། ཕྱི་གླིང་ལུགས་ཀྱི་འབུར་ཚུགས་ཅན་སོགས་ཡོད།

 

བྲིས་ལུགས།

སྨན་ཐང་ལུགས་ཀྱི་ཐང་ག།

༡ སྨན་ཐང་ལུགས།

    སྨན་ཐང་པའི་བྲིས་རྒྱུན་ནི་བོད་ཁུལ་དུ་དུས་རབས15པའི་འཇུག་དུས་སུ་དར་ཁྱབས་ཆེ་བའི་རི་མོའི་བྲིས་རྒྱུན་ཞིག་ཡིན་ལ། ལུགས་འདིའི་སྲོལ་འབྱེད་པ་སྨན་ལྷ་དོན་འགྲུབ་ནི་ལྷོ་བྲག་སྨན་ཐང་དུ་སྐུ་འཁྲུང་པས་སྨན་ཐང་ལུགས་ཞེས་ཀུན་ལ་གྲགས་ཤིང་།སྨན་ལྷ་དོན་འགྲུབ་ནི་རི་མོའི་སྒྱུ་རྩལ་ལ་བྱང་ཆུབ་པ་མ་ཟད་་་སྐུ་གཟུགས་ཀྱི་ཆ་ཚད་ཡིད་བཞིན་ནོར་བུ་ཞེས་པ་བརྩམས་ནས་རིག་པའི་གཞུང་ལུགས་དང་ལག་ལེན་གཉིས་ཟུང་དུ་འབྲེལ་བའི་ལུགས་སྲོལ་བསྐྱངས།བྲིས་རྒྱུན་འདིའི་ཁྱད་ཆོས་གཙོ་བོ་ནི་སྐུ་གཟུགས་ཀྱི་ཐིག་ཚད་ནན་ལ་ཐིག་རིས་ཞིབ་ཅིང་ཉམས་འགྱུར་དོད་པ་དང་།ཚན་སྣ་ཕུན་སུམ་ཚོགས་ཤིང་གསལ་ཆ་ཆེ་ལ་ཡིད་གར་འོང་བ་ཞིག་ཡིན། དུས་རབས17པའི་ནང་གཙང་ཁུལ་གྱི་ལྷ་བཟོ་གྲགས་ཅན་ཆོས་དབྱིངས་རྒྱ་མཚོས་སྨན་ཐང་བྲིས་རྒྱུན་རྙིང་པ་ཤུལ་འཛིན་དང་ལེན་ཆ་སོར་བཞག་ཐོག་ཁྱད་ཆོས་མི་འདྲ་བའི་སྨན་ལུགས་བྲིས་རྒྱུན་གསར་པ་སྲོལ་གཏོད་མཛད་ཡོད།


ཀརྨ་སྒར་བྲིས་ལུགས་ཀྱི་ཐང་ག།

༢ ཀརྨ་སྒར་བྲིས་ལུགས།

   ཀརྨ་སྒར་བྲིས་ལུགས་ཀྱི་བྲིས་རྒྱུན་འདི་ནི་དུས་རབས16པའི་སྨད་ཆར་བྱུང་ཞིང་དུས་རབས17པའི་རྗེས་ནས་དར་རྒྱས་བྱུང་བ་དང་།ཆབ་མདོ་སོགས་ཁམས་ཁུལ་གཙོ་བྱས་ནས་དར་བ་ཡིན། སྲོལ་འབྱེད་མཁན་ནམས་མཁའ་བཀྲིས་ཀྱིས་སྨན་ལུགས་ཀྱི་ལྷ་ཚུགས་གཞི་རྩའི་ཐོག་རྒྱ་གར་ཤར་ལིའི་སྐུ་བརྙན་གྱི་ཁྱད་ཆོས་འགའ་ཞིག་གིས་ཟུར་བརྒྱན་སོགས་ཀྱིན་ཐབས་རྩལ་ལ་བརྟེན་ནས་གསར་དུ་བཏོན་པའི་རི་མོའི་བྲིས་རྒྱུན་ཞིག་དང་།རྗེས་སུ་ཆོས་བཀྲ་ཤིས་དང་། ཀར་ཤོད་ཀརྨ་བཀྲིས། ཀརྨ་ཆོས་དབྱིངས་རྡོ་རྗེ་སོགས་ཀྱིས་རྒྱ་ཆེར་སྤེལ་བ་ཡིན།སྒར་བྲིས་ཀྱི་ཁྱད་ཆོས་གཙོ་བོ་ནི་སྐུ་ཉམས་མཚར་ཞིང་ན་བཟའི་ལྷུག་ཆ་མཛེས་ལ་བཅད་མདངས་ཟུང་དུ་འབྲེལ་བ།རྒྱབ་ལྗོངས་སུ་རྒྱལ་སྲོལ་ཞིབ་བྲིས་རི་མོའི་ཡུལ་ལྗོངས་འབྲི་ཐབས་ལ་སོ་སོའི་ཁྱད་ཆོས་ལྡན་པའི་ཚོན་མདངས་སྤེལ་བ།ཚོན་མདངས་སྲབ་ཅིང་འཇམ་ལ་བཅད་དང་གསེར་རིས་ཀྱི་བཅད་ཁ་ཕྲ་བ་བཅས་ཀྱིས་མི་རྣམས་ལ་མཚར་སྣང་དང་མཛེས་ཉམས་ཕུན་སུམ་ཚོགས་པ་ཞིག་སྟེར།


བལ་བོ་ལུགས་ཀྱི་ཐང་ག

༣ བལ་བོའི་ལུགས།

   སྤྱི་ལོ་དུས་རབས7པའི་སྔ་གཞུག་ཏུ་ནང་བསྟན་དར་འགོ་ཚུགས་པ་དང་ཆབས་ཅིག་བོད་ཁུལ་དུ་གཙུག་ལག་ཁང་དང་དགོན་སྡེ་ཁག་བཞེངས་ལ།སྐབས་དེར་དགོན་སྡེའི་ནང་གི་སྡེབས་རིས་དང་འཇིམ་བཟོ་བརྐོས་དཀྲོལ་སོགས་ཕལ་ཆེར་བལ་པོ་དང་རྒྱལ་ནང་གི་བཟོ་བས་བཟོས་པ་དང་།ཕྱིས་སུ་དེ་ལ་ལད་མོ་བྱས་ནས་བྱུང་བའི་བྲིས་རྒྱུན་བཅས་ལ་བལ་པོའི་བྲིས་རྒྱུན་ཞེས་གྲགས།བལ་པོའི་བྲིས་རྒྱུན་གྱི་ཉམས་འགྱུར་དང་ཁྱད་ཆོས་གཙི་བོ་ནི་དབུས་ཀྱི་དྲ་མིག་ཆེན་པོའི་ནང་གཙོ་ལྷ་དང་མཐའ་འཁོར་རྣམས་སུ་དྲ་མིག་ཆུང་ངུ་མང་པོའི་ལྷ་མགྲོན་རྣམས་འཁོད་ཡོད།ཐིག་རིས་སྟབས་བདེ་ཞིང་བྲིས་ཚུགས་ཐད་འགྱིང་ཉམས་མཉེན་ཆ་དེ་ཙམ་མེད་པ། གོས་གཡོག་སྲབ་ཅིང་སྟབས་བདེ་ཅན།རྒྱན་ཆན་རྣམས་ལེབ་རྫོབ་ལྗིད་ཆ་ཅན་གྱི་ཚོར་སྣང་ཡོད་ལ་གཞི་ཚོན་མཐིང་ངམ་མཚལ་གྱི་ཐོག་རི་མོ་གསལ་ལ་མི་གསལ་བ་མང་པོ་བྲིས་ཡོད་པ་ཞིག་ཡིན།


བྱིའུ་སྒང་ལུགས་ཀྱི་ཐང་ག

༤ བྱིའུ་སྒང་པའི་ལུགས།

བྱིའུ་སྒང་པའི་བྲིས་རྒྱུན་ནི་དུས་རབས13པའི་ནང་གི་ལྷ་བྲིས་སྐད་གྲགས་ཅན་ཡར་སྟོད་བྱིའུ་སྒང་པས་གསར་གཏོད་གནང་བའི་རང་ལུགས་བྲིས་རྒྱུན་རི་མོ་ཞིག་ཡིན་ལ་གཙོ་བོ་དབུས་གཙང་ཁུལ་དུ་དར་ཁྱབ་ཆེ།བྲིས་རྒྱུན་འདིའི་ཁྱད་ཆོས་གཙོ་བོ་ནི་བལ་པོའི་བྲིས་རྒྱུན་གྱི་ལེགས་ཆ་སོར་བཞག་ཐོག་ཁྲོ་བོ་སྐུ་རྣམས་སྦོམ་ཞིང་ཐུང་བ་དང་།ལྟོ་བ་འབུར་བ། མི་སྣ་རྣམས་རང་བཞིན་གྱི་ཉམས་འགྱུར་ལྡན་ལ་རྒྱན་རིས་ཞིབ་ཅིང་ཕྲ་བ་དང་།རྒྱན་གོས་ཕུན་སུམ་ཚོགས་པར་བྲིས་ཡོད་པའོ། འདི་ལས་རང་མི་རིགས་ཀྱི་སྒྱུ་རྩལ་རྣམ་དཔྱོད་དང་བསམ་པའི་འཚོ་བ་མཚོན་པའི་ཉམས་འགྱུར་བསྟན་ཡོད།།


མཁྱེན་བརྩེ་ལུགས་ཀྱི་ཐང་ག

༥ མཁྱེན་བརྩེ་ལུགས།

   མཁྱེན་བརྩེ་ལུགས་ཀྱི་བྲིས་རྒྱུན་ནི་དུས་རབས15བའི་དུས་འགོར་གོང་དཀར་སྒང་སྟོད་པ་མཁྱེན་བརྩེ་ཆེན་མོས་གསར་གཏོད་གནང་བའི་རི་མོའི་ལུགས་ཞིག་ཡིན་ལ།གཙོ་བོ་ལྷོ་ཁ་དང་གཙང་ཁུལ་དུ་དར་ཁྱབ་ཆེ་ལ། གོང་དཀར་རྡོ་རྗེ་གདན་གྱི་ལྡེབས་རིས་ཁག་ཅིག་ཁོང་གི་ཕྱག་བཟོ་ཡིན་པར་གྲགས།བྲིས་རྒྱུན་འདིའི་ཁྱད་ཆོས་གཙོ་བོ་ནི་བྱིའུ་སྒང་པའི་ལུགས་ཀྱི་ལྷ་སྐུའི་བཀོད་སྟངས་སོར་བཞག་ཐོག་ལྷ་སྐུའི་བྲིས་ཚུགས་དང་བཞིན་གྱི་རྣམ་འགྱུར་རང་གི་དམིགས་བསལ་ཁྱད་ཆོས་གསར་དུ་བསྣན་ཏེ་བཟོ་རྒྱུན་མི་འདྲ་བ་ཞིག་མཛད་ལ།ཁྲོ་བོ་དང་དཀྱིལ་འཁོར་སོགས་བྲིས་པར་ཉམས་རྩལ་གཞན་ལས་ཁྱད་དུ་ཐོན་ཞིང་། བརྗོད་བྱའི་ཉམས་གསལ་དོད་ཅིང་བརྗིད་ཆགས་ཡིད་གར་འོང་བ།སྐུའི་འགྱིང་སྟབས་དང་རྣམ་འགྱུར་མཛེས་ཤིང་སྟངས་སྟབས་བདེ་ཞིང་འཁྱུག་པ། ཚོན་མདངས་གསལ་ཁ་ཐོན་ཞིང་ཚགས་ཞིབ་པ། རྒྱན་རིས་འདྲ་མིན་སྣ་ཚོགས་ཤིང་མཇལ་བ་ཙམ་གྱིས་ངོ་མཚར་བའི་སྣང་བ་སྟེར།།


གོས་སྐུའི་རིགས།

    གོས་སྐུ་ལ་རིགས་བཞི་སྟེ། དྲས་དྲུབ་ཀྱི་གོས་སྐུ་དང་། གོས་སྐུ་འབུར་མ་དང་། འཚེམ་ཐང་། འཐག་ཐང་བཞི།

དྲས་དྲུབ།

    དྲས་དྲུབ་ཐང་ག་ནི་བོད་མི་རིགས་ཀྱི་ཁྱད་དུ་འཕགས་པའི་དམངས་ཁྲོད་ལག་ཤེས་བཟོ་རྩལ་དང་རི་མོའི་འབྲི་རྩལ་ཟུང་དུ་འབྲེལ་བའི་སྒྱུ་རྩལ་ཞིག་ཡིན་ལ་ད་བར་ལོ་ངོ་བརྒྱ་ཕྲག་ཁ་ཤས་ཀྱི་ལོ་རྒྱུས་ལྡན་ཡོད།དྲས་དྲུབ་ཐང་ག་བཞེངས་སྐབས་བརྒྱུད་རིམ་ཚང་མ་ལག་གཉིས་ལ་བརྟེན་ནས་འཚེམ་དགོས་པ་དང་དྲས་དྲུབ་ཐང་ག་ཞིག་བཞེངས་པར་དུས་ཚོད་ཧ་ཅང་རིང་པོ་འགོར་གྱི་ཡོད།སྤྱིར་དྲས་དྲུབ་ཐང་ག་ཆེ་གྲས་ཤིག་བཞེངས་པར་ཉུང་ཤོས་སུ་ཟླ་བ་འགའ་ཤས་འགོར་བ་དང་མང་ཤོས་སུ་ལོ་འགའ་ཤས་འགོར་གྱི་ཡོད།དྲས་དྲུབ་ཐང་ག་ནི་ཐང་ག་གཞན་དང་མི་འདྲ་བས་བཞེངས་པའི་བརྒྱུད་རིམ་ནང་ངང་རྒྱུད་རིང་པོ་མེད་ཚེ་དྲས་དྲུབ་ཐང་ག་ཞིག་བཞེངས་ཐུབ་ཐབས་མེད།

བཞེངས་རིམ།

    ཐོག་མར་དྲས་དྲུབ་ཞལ་ཐང་མ་བཞེངས་གོང་རི་མོ་མཁས་ཅན་ཚོས་དཔེ་འབྲི་དགོས་ཀྱི་ཡོད་པ་དང་། དེ་རྗེས་མ་དཔེ་གཞིར་བཟུང་རྒྱུ་ཆ་གྲ་སྒྲིག་བྱས་ནས་རི་མོའི་རྒྱབ་ཏུ་རས་བཏིངས་ཏེ་ཁབ་བཙག་བརྒྱབ་ནས་ཆ་ཤས་སོ་སོའི་དབྱིབས་འདོན་དགོས་ཀྱི་ཡོད།རྒྱུ་ཆ་གཙོ་བོ་ནི་དར་དང་གོས་ཆེན། དར་ཚོན། བལ། བལ་སྐུད། ནོར་བུའི་རིགས་སོགས་རྒྱུ་ཆ་རྩེ་གྲས་བཏང་ནས་བཟོ་དབྱིབས་སྣ་ཚོགས་བཟོ་དགོས་པ་དཔེར་ན།ལྷ་སྐུ་དང་མེ་ཏོག མི་སྣ། བྱ་བྱིའུ། གཅན་གཟན་སོགས་བྲེག་དགོས་ཀྱི་ཡོད། དེ་རྗེས་ཚོས་གཞི་གོ་རིམ་བཞིན་སྒྲིག་སྟེ་སྦྱར་ནས་འཚེམ་དགོས་པ་དང་ཚོས་གཞི་སྣུམ་པོ་དང་སྐྱ་བོའི་བར་གོ་རིམ་བཞིན་སྦྱོར་དགོས་པ་སོགས་ཀྱི་ལས་ཀའི་རྒྱུད་རིམ་ནང་ངང་རྒྱུད་རིང་པོ་དགོས་ལ་སེམས་ནུས་ཀྱང་འབོར་ཆེན་འདོན་དགོས་ཀྱི་ཡོད།དྲས་དྲུབ་ཐང་ག་བཞེངས་པའི་བརྒྱུད་རིམ་ནང་རྟ་རྔར་དར་སྐུད་བསྲེས་ནས་འཚེམ་དགོས་ པ་དང་འགའ་ཞིག་ཐོག་ད་དུང་ནོར་བུའི་རིགས་སྦྱོར་གྱི་ཡོད།རྒྱུ་ཆ་འགའ་ཞིག་རྒྱ་གར་དང་བལ་ཡུལ་ནས་ཉོ་དགོས་པ་དང་རྒྱུ་ཆ་འདེམས་སྐབས་སྤུས་ཚད་ལ་དོ་སྣང་ཆེན་པོ་བྱེད་དགོས་ཀྱི་ཡོད།དྲས་དྲུབ་ཐང་ག་བཞེངས་སྐབས་དང་ཐོག་ཤོག་བུའི་སྟེང་ཆེ་ཆུང་གང་འདོད་པའི་སྐུ་བྲིས་ནས་ཆུ་ཚོན་གྱིས་ཚོན་མདོག་དབྱེ་ཐུབ་ཙམ་བྱུགས།ཚོན་གྱི་ཁ་མདོག་གིས་དབྱེ་མཚམས་ནས་དྲས་པ་དང་ཕྲལ་ཏེ། རང་རང་གི་ཁ་དོག་དང་མཚུངས་པའི་རས་དང་གོས་ཆེན་གྱིས་དེའི་སྟེང་དུ་གླན་ནས་དྲུབ་མཚམས་ཀྱི་ཚད་ཙམ་ཆེ་རུ་བཅུག་སྟེ་ཇི་ལྟ་བ་བཞིན་དུ་དྲས་དགོས་པ་དང་ལེགས་པར་བརྒྱང་བའི་རས་གཞིའི་སྟེང་དུ་མི་ཡོ་བའི་ཐབས་སུ་ཐིག་གདབ།མི་འཆུག་པའི་ཐབས་སུ་གོང་གི་ཤོག་བུའི་རི་མོ་དང་མཚུངས་པའི་སྐྱ་རིས་ཆེ་ཚུགས་ཙམ་བྲིས་པའི་སྟེང་དུ་མི་འགུལ་བར་སྦྱར།བཅད་ཀྱི་ཚབ་ཏུ་སྟོང་སྐུད་དང་གསེར་སྐུད་སོགས་ཀྱིས་ཚོན་གྱི་ཟུར་ནོན་པར་དྲུབ། མདངས་ཀྱི་ཚབ་ཏུ་ཁ་དོག་ཅིག་ལ་གར་སླ་མི་གཅིག་པའི་གོས་སྣ་མང་ཙམ་མཐུད།གསེར་རིས་ཀྱི་ཚབ་ཏུ་གསེར་སྐུད་སྦོམ་ཕྲ་སྣ་ཚོགས་ཀྱིས་དྲུབ། གོས་ཆེན་གྱི་རི་མོའི་ཚབ་ཏུ་གོས་ཆེན་གསེར་རིས་ཅན་གྱིས་བྱེད།དྲས་དྲུབ་ཀྱི་ཐང་གར་རི་མོ་མང་པོ་ཡོད་པས་མཚམས་རེ་གོས་ཆེན་རི་མོ་ཅན་གྱིས་ཚབ་བྱེད་ཀྱི་ཡོད་པས་སྒྲིག་སྦྱོར་མཁས་མིན་གྱིས་ཁྱད་པར་ཡང་ཤིན་ཏུ་ཆེ་བར་ལྡན་ཡོད།
བཙན་པོའི་རིག་གནས།

བརྒྱུད་སྐུལ།

མཆན་སྤེལ།