༄༅། །ཆོས་རྗེའི་རྣམ་ཐར་ཆོས་རྒྱལ་མ།

༄༅། །ཆོས་རྗེའི་རྣམ་ཐར་ཆོས་རྒྱལ་མ།

ཆོས་ཀྱི་རྒྱལ་པོ་འགྲོ་བ་དུ་མའི་མགོན། །

གདུལ་བྱའི་དོན་དུ་དཔལ་ལྡན་ས་སྐྱ་རུ། །

ཆུ་ཕོ་དགེ་བྱེད་དཔྱིད་ཟླ་ར་བ་ཡི། །

ཉི་ཤུ་དྲུག་ལ་བལྟམས་པ་ནས་བཟུང་སྟེ། །

 

སྤྲུལ་པའི་གནས་སུ་ལྕགས་ཕག་སྨལ་པོ་ཡི། །

བཅུ་བཞིའི་ཐོ་རངས་ཞི་བར་གཤེགས་ཀྱི་བར། །

རབ་ཏུ་ངོ་མཚར་རྣམ་ཐར་དཔག་མེད་རྣམས། །

མདོར་བསྡུས་འཆད་ལ་གུས་པས་མཉན་པར་གྱིས། །

 

བྱང་ཆུབ་སེམས་ཀྱི་ཀླུ་དབང་སྤྱི་བོའི་སྟེང་། །

ཡོན་ཏན་དཔག་མེད་རིན་ཆེན་རྒྱན་གྱིས་མཛེས། །

ཤེས་རབ་ཟག་མེད་ཡུམ་གྱི་རྒྱ་མཚོར་ཞུགས། །

དབང་འབྱོར་ཁྱོད་ལ་སྤྱི་བོས་ཕྱག་འཚལ་ལོ། །

 

བལྟམས་པའི་དུས་ན་འོད་ཀྱིས་འཇིག་རྟེན་ཁྱབ། །

ཡུམ་ལ་མ་གནོད་བདེ་བའི་རྣམ་པར་རྒྱས། །

མཁའ་འགྲོའི་དབང་པོ་དཔག་ཡས་མཁའ་ལ་འདུས། །

མི་མཆོག་ཁྱོད་ལ་སྤྱི་བོས་ཕྱག་འཚལ་ལོ། །

 

ཆོས་ཀྱི་མ་མོ་མ་བསླབས་ཐུགས་སུ་ཆུད། །

གཞོན་ནུའི་དུས་ནས་ཡོན་ཏན་ཐམས་ཅད་རྫོགས། །

མཁས་པ་དུ་མས་ཚོགས་ཀྱི་དབུས་སུ་བསྟོད། །

བློ་ལྡན་ཁྱོད་ལ་སྤྱི་བོས་ཕྱག་འཚལ་ལོ། །

 

མི་ནས་མིར་གྱུར་སྐྱེ་བ་ཉི་ཤུ་ལྔར། །

འཇམ་པའི་དབྱངས་ཀྱིས་རྗེས་སུ་བཟུང་གྱུར་པས། །

བཟོ་དང་གསོ་བ་སྒྲ་ཚད་ནང་དོན་རིག །

མཚུངས་བྲལ་ཁྱོད་ལ་སྤྱི་བོས་ཕྱག་འཚལ་ལོ། །

 

སྲིད་པ་ཀུན་ཏུ་ལེགས་པར་སྦྱངས་པས་ན། །

རྨི་ལམ་ན་ཡང་ཆོས་ཀྱི་སྒོ་རྣམས་ཀུན། །

དགེ་བའི་བཤེས་ཀྱིས་དངོས་སུ་གདམས་པ་མཛད། །

རྣམ་དག་ཁྱོད་ལ་སྤྱི་བོས་ཕྱག་འཚལ་ལོ། །

 

ཟབ་མོའི་ལམ་གྱིས་བྱིན་གྱིས་བརླབས་པའི་ཚེ། །

རྗེ་བཙུན་བླ་མ་འཇམ་པའི་དབྱངས་སུ་གཟིགས། །

སྐད་ཅིག་གཅིག་ལ་ཆོས་རྣམས་ཐུགས་སུ་ཆུད། །

ཐུགས་གྲོལ་ཁྱོད་ལ་སྤྱི་བོས་ཕྱག་འཚལ་ལོ། །

 

ཐབས་ཀྱི་ལམ་གྱིས་འབྱུང་བཞི་རབ་ཏུ་སྦྱངས། །

ངག་གི་བཟླས་པས་ཁྲོ་རྒྱལ་དངོས་སུ་གཟིགས། །

བླ་མའི་དྲིན་གྱིས་རྟོགས་པ་མཆོག་ཏུ་གྱུར། །

སྐྱོན་བྲལ་ཁྱོད་ལ་སྤྱི་བོས་ཕྱག་འཚལ་ལོ། །

 

རྟོག་གེ་ངན་པའི་རྒོལ་བ་ཐམས་ཅད་བཟློག །

རློམས་པས་ཁེངས་པའི་རྟོག་གེ་ཟིལ་གྱིས་མནན། །

མཁས་པའི་གྲགས་པས་ས་སྟེང་ཐམས་ཅད་ཁྱབ། །

འཇིགས་བྲལ་ཁྱོད་ལ་སྤྱི་བོས་ཕྱག་འཚལ་ལོ། །

 

ཡོངས་སུ་འཛིན་པའི་རྟོག་པ་ཀུན་ཏུ་སྤོང་། །

ཆོས་ཀྱི་སྦྱིན་པ་རྟག་ཏུ་ལྷུག་པར་གཏོང་། །

གཞན་གྱི་དོན་ལ་བསྙེལ་བ་མི་མངའ་བའི། །

བརྩེ་ལྡན་ཁྱོད་ལ་སྤྱི་བོས་ཕྱག་འཚལ་ལོ། །

 

གདུལ་བྱའི་དོན་དུ་སྙུང་བའི་ཚུལ་བསྟན་ཚེ། །

འཇམ་པའི་དབྱངས་དང་བྱམས་མགོན་བློ་ལྡན་དང་། །

ཞི་བ་ལྷ་དང་འཕགས་པ་ཀླུ་སྒྲུབ་ཀྱིས། །

བསྙུང་གསོལ་ཁྱོད་ལ་སྤྱི་བོས་ཕྱག་འཚལ་ལོ། །

 

བསམ་པ་དག་པའི་གདུལ་བྱ་འགའ་ཞིག་གིས། །

འཇམ་པའི་དབྱངས་སུ་མིག་གིས་མཐོང་གྱུར་ཅིང་། །

འཕགས་པའི་ཡུལ་ནའང་གཏམ་དུ་དེ་ལྟར་གྲགས། །

ལྷུན་གྲུབ་ཁྱོད་ལ་སྤྱི་བོས་ཕྱག་འཚལ་ལོ། །

 

ཤིང་མོ་སྦྲུལ་གྱི་དབྱར་ཟླ་འབྲིང་པོ་དང་། །

ལྕགས་ཕོ་ཁྱི་ཡི་སྟོན་ཟླ་ཐ་ཆུང་ཚེ། །

ལྕགས་མོ་ཕག་ལ་གཞན་དོན་འགྲོ་ཞེས་གསུངས། །

དུས་མཁྱེན་ཁྱོད་ལ་སྤྱི་བོས་ཕྱག་འཚལ་ལོ། །

 

མིག་འཕྲུལ་ལྟ་བུའི་ཏིང་འཛིན་ལ་གནས་ནས། །

བསྙུང་མི་མངའ་ཡང་གདུལ་བྱ་ཐམས་ཅད་ཀྱི། །

སྒྲིབ་པ་སྦྱངས་ཕྱིར་བསྙུང་བའི་ཚུལ་བསྟན་པའི། །

བསམ་ཡས་ཁྱོད་ལ་སྤྱི་བོས་ཕྱག་འཚལ་ལོ། །

 

ལེ་ལོ་ཅན་རྣམས་བརྩོན་པ་བསྐྱེད་པ་དང་། །

སྐལ་དམན་རྣམས་ལ་དགེ་བ་སྤེལ་བའི་ཕྱིར། །

སྐུ་ཚེའི་འདུ་བྱེད་ཡང་ཡང་བྱིན་གྱིས་བརླབས། །

མངའ་བརྙེས་ཁྱོད་ལ་སྤྱི་བོས་ཕྱག་འཚལ་ལོ། །

 

གཞན་དོན་གཤེགས་པ་ཐུགས་ལ་འཁྲུངས་པའི་ཚེ། །

སེམས་མེད་ས་ཡང་རྣམ་པ་དྲུག་ཏུ་གཡོས། །

བྱ་རྣམས་ཀུན་ཀྱང་ཅ་ཅོ་དུ་མ་སྒྲོགས། །

བྱམས་ཆེན་ཁྱོད་ལ་སྤྱི་བོས་ཕྱག་འཚལ་ལོ། །

 

དཀྱིལ་འཁོར་སྒྲུབ་པའི་ཆོ་ག་མཛད་པའི་ཚེ། །

བླ་མ་རྣམས་དང་ཀྱཻ་ཡི་རྡོ་རྗེ་ཡི། །

དཀྱིལ་འཁོར་ལྷ་རྣམས་མངོན་སུམ་གཟིགས་པར་གྱུར། །

དབང་ལྡན་ཁྱོད་ལ་སྤྱི་བོས་ཕྱག་འཚལ་ལོ། །

 

སྤྱན་རས་གཟིགས་ཀྱི་ཕྱག་གིས་དབུ་ལ་བྱུགས། །

རྗེ་བཙུན་སྒྲོལ་མ་ནམ་མཁའི་མཐོངས་སུ་བྱོན། །

འཇམ་དབྱངས་མགོན་པོ་ཡང་དང་ཡང་དུ་གཟིགས། །

ཁྱུ་མཆོག་ཁྱོད་ལ་སྤྱི་བོས་ཕྱག་འཚལ་ལོ། །

 

སྒྲ་དབྱངས་མི་ཟད་སྒྲོགས་པའི་རྒྱལ་པོ་དང་། །

ཤཱཀྱ་སེང་གེ་སློབ་མར་བཅས་པ་སོགས། །

སྤྲུལ་པའི་དཀྱིལ་འཁོར་དུ་མ་ཡང་ཡང་གཟིགས། །

མི་ཕུལ་ཁྱོད་ལ་སྤྱི་བོས་ཕྱག་འཚལ་ལོ། །

 

རྗེ་བཙུན་མཐུ་སྟོབས་ནག་པོའི་ཞལ་སྔ་ནས། །

ཁྱོད་ནི་ཉི་མ་རྒྱལ་པོའི་བུར་གྱུར་ཚེ། །

དྲི་མ་མེད་དཔལ་སངས་རྒྱས་ཉིད་འགྱུར་ཞེས། །

ལུང་བསྟན་ཁྱོད་ལ་སྤྱི་བོས་ཕྱག་འཚལ་ལོ། །

 

གསང་བའི་གནས་ནི་ལྟ་བས་མི་མངོན་ཞིང་། །

དབུ་ཡི་གཙུག་ཏོར་མཆོག་ཏུ་གསལ་པོར་འཕགས། །

སྨིན་མཚམས་མཛོད་སྤུ་ཁ་བ་དུང་ལྟར་འཁྱིལ། །

མཚན་ལྡན་ཁྱོད་ལ་སྤྱི་བོས་ཕྱག་འཚལ་ལོ། །

 

རོལ་མོའི་སྒྲ་རྣམས་མཁའ་ལས་ཡང་ཡང་གྲག །

འཇའ་འོད་རྣམ་པའི་གདུགས་དང་བ་དན་ཕྱར། །

ལྷ་རྣམས་ཤུགས་ཀྱིས་ས་ཡང་རབ་ཏུ་གཡོས། །

ཉེར་ཞི་ཁྱོད་ལ་སྤྱི་བོས་ཕྱག་འཚལ་ལོ། །

 

བྱམས་པའི་སྟོབས་ཀྱིས་སྐྱེ་བོ་དཔག་མེད་འདུས། །

ལྷ་མིའི་མཆོད་པ་ཕུལ་དུ་བྱུང་བ་བརྙེས། །

སྐུ་གདུང་རིང་བསྲེལ་དད་ལྡན་རྟེན་དུ་བཞག །

ཕན་དགོངས་ཁྱོད་ལ་སྤྱི་བོས་ཕྱག་འཚལ་ལོ། །

སངས་རྒྱས་འཐོབ་ཕྱིར་རྣམ་ཐར་མདོར་བསྡུས་ནས། །ཡན་ལག་བདུན་པ་ལེགས་པར་བསྡེབས་པ་འདི། །ལྕགས་ཕག་རྒྱལ་ཟླར་ལིང་ཆུ་རྩེར་ཁབ་ཏུ། །རིགས་པར་སྨྲ་བ་ཡར་ཀླུངས་པ་ཡིས་སྦྱར། །བླ་མ་ཆོས་ཀྱི་རྗེ་དཔལ་ལྡན་ས་སྐྱ་པཎྜི་ཏ་ཆེན་པོའི་རྣམ་པར་ཐར་བ་མདོར་བསྡུས་པ་སྟེ། རྒྱས་པ་རྣམ་ཐར་གྱི་ཡི་གེ་ཆེན་མོར་བལྟ་བར་བྱའོ།། །།

བརྒྱུད་སྐུལ།

མཆན་སྤེལ།