༄༅། །རྡོ་རྗེ་ཕག་མོ་སྐུ་ཕྲེང་དང་པོ་རྗེ་བཙུན་ཆོས་ཀྱི་སྒྲོན་མེའི་མཛད་རྣམ་མདོར་བསྡུས།

༄༅། །རྡོ་རྗེ་ཕག་མོ་སྐུ་ཕྲེང་དང་པོ་རྗེ་བཙུན་ཆོས་ཀྱི་སྒྲོན་མེའི་མཛད་རྣམ་མདོར་བསྡུས།
༄༅། །རྡོ་རྗེ་ཕག་མོ་སྐུ་ཕྲེང་དང་པོ་རྗེ་བཙུན་ཆོས་ཀྱི་སྒྲོན་མེའི་མཛད་རྣམ་མདོར་བསྡུས།
༈ རྡོ་རྗེ་ཕག་མོ་སྐུ་ཕྲེང་དང་པོ་ཆོས་ཀྱི་སྒྲོན་མེ་ནི། བོད་ཀྱི་བཙན་པོའི་གདུང་རྒྱུད་སྐྱེད་ལྡེ་ཉི་མ་མགོན་མངའ་རིས་སུ་ཕེབས་པ་དེ་དག་ལས་མཆེད་པ་ནོར་འཛིན་སྐྱོང་བའི་བདག་པོ་མངའ་རིས་གུང་ཐང་དུ་ཁྲི་རྒྱལ་བསོད་ནམས་ལྡེའུ་སྲས་ཁྲི་བསོད་ནམས་རྒྱལ་མཚན་དང་། ཁྲི་ལྷ་དབང་རྒྱལ་མཚན་གཉིས་བྱུང་བ་ལས་ཁྲི་ལྷ་དབང་རྒྱལ་མཚན་དང་།
བཙུན་མོ་མཁའ་འགྲོའི་མཚན་རྟགས་དང་ལྡན་པ། བྱམས་སྙིང་རྗེའི་བདག་ཉིད་ཅན་ཕལ་པའི་གནས་ལས་རིང་དུ་གྱུར་པ་ཡུམ་མདོ་སྡེ་རྒྱལ་མོ་གཉིས་ལ་རབ་བྱུང་བདུན་པའི་ཆུ་སྟག་ ༡༤༢༢ ལོར་མང་ཡུལ་རྫོང་མཁར་ངོ་མཚར་གྱི་ལྟས་དུ་མ་དང་བཅས་སྐུ་འཁྲུངས། ཁྲི་རྣམ་རྒྱལ་ལྡེ་དང་། ནམ་མཁའ་ནོར་བུ། ལྕམ་སྲིང་ཨ་གྲོལ་ཆོས་ཀྱི་སྒྲོན་མེ་བཅས་གསུམ་བྱུང་བ་ལས་ཐ་ཆུང་འདི་ཉིད་སྐུ་གཞོན་དུ་ཉིད་ནས་བསྐལ་པ་མང་པོར་བྱང་ཆུབ་མཆོག་ཏུ་སྤྱོད་པ་རླབས་ཆེན་མཛད་པའི་སྔོན་གོམས་བཟང་པོའི་མཐུ་ལས། འཁོར་བའི་ཆོས་དང་། སྲིད་པའི་དཔལ་ལ་ཆགས་པ་ནི། འཁོར་བར་འཆིང་བའི་རྒྱུ་ཉིད་དུ་དགོངས་ནས་འཇིག་རྟེན་གྱི་བྱ་བ་ལས་རིང་དུ་འདས་ཏེ་ཀློག་པ་ལ་སོགས་ཐོས་བསམ་གྱི་རྩལ་རྫོགས་ཤིང་ཚེགས་མེད་དུ་མཁྱེན། དེ་ཡང་མཚོ་རྒྱལ་གསུང་རྣམ་ནང་དུའང་། འཕྲིན་ལས་གསུང་སྤྲུལ་མངའ་རིས་སྤྲུལ་པ་སྟོན། ཞེས་ལུང་བསྟན་པ་དང་། མཆོད་བརྗོད་ནང་དུ་ཡང་། གུང་ཐང་རྒྱལ་པོའི་རིགས་སུ་པད་འབྱུང་གི། །ལུང་བསྟན་མངོན་འགྱུར་ཆོས་ཀྱི་སྒྲོན་མེ་ཞེས། །འཇིགས་བྲལ་ཞབས་དང་གྲུབ་ཆེན་ཐང་རྒྱལ་བས། །རྗེས་བཟུངས་གྲུབ་མཆོག་བརྙེས་ལ་གསོལ་བ་འདེབས། །ཞེས་གསུངས་པ་ལྟར་རོ། ཆོས་རྗེ་བོ་དོང་པ་ཕྱོགས་ལས་རྣམ་རྒྱལ་གྱིས་རྗེས་སུ་བཟུང་སྟེ་རབ་ཏུ་བྱུང་བའི་མཚན་དཀོན་མཆོག་རྒྱལ་མོར་མངའ་གསོལ་མཛད། སྡེ་སྣོད་ཀྱི་ཆོས་མཐའ་ཡས་རྣམས་དང་། སྨིན་བྱེད་དབང་། གྲོལ་བྱེད་ཁྲིད་མན་ངག་ལུང་དང་བཅས་པ་མཐའ་དག་བུམ་པ་གང་བྱོའི་ཚུལ་དུ་གནང་། དབུས་གཙང་ཀུན་ལ་ཕྱག་ཕྱིར་བྱོན་པར་མཛད་པར་གྲུབ་ཐོབ་ཐང་སྟོང་རྒྱལ་པོ་དང་མཇལ་ནས་གསང་སྔགས་གསར་རྙིང་གི་ཟབ་རྒྱས་ཀྱི་ཆོས་དང་གདམས་པ་ཡོངས་སུ་རྫོགས་པར་གནང་ཞིང་། གྲུབ་ཐོབ་ཆེན་པོའི་གསུང་ལས། མཁའ་འགྲོ་མ་བསོད་ནམས་འདྲེན་མའི་སྐྱེ་བ་གསུམ་པ། བོད་རྗེའི་སྲས་དུ་སྐུ་འཁྲུངས་པ། རྗེ་བཙུན་ཆོས་ཀྱི་སྒྲོན་མེ་བྱ་བའི་མཚན་གསོལ། སློབ་དཔོན་མ་ཆོས་སྒྲོན། སྟོད་ཕྱོགས་ལ་བསྡད་ན་ཚེ་རིང་། གདུལ་བྱ་ལ་ངེས་པ་མེད། སྨད་ཕྱོགས་ལ་ཐེགས་ན་གདུལ་བྱ་ཆེ། ཚེ་ལ་ངེས་པ་མེད་གསུངས་པར། སེམས་ཅན་ལ་ཕན་ཐོག་པ་དགོས་ཞུས་པས། འོ་ན་ཤར་ཀོང་པོའི་ཡུལ་ན་ངེད་ཀྱི་དགོན་པ་ཙ་གོང་དཔལ་གྱི་གནས་གསར་ཞེས་བྱ་བ། མ་དང་མཁའ་འགྲོའི་ཚོགས་སྤྲིན་དང་ན་བུན་ལྟར་འདུ་བ་ཡོད་པས་དེར་འགྲོ་དོན་གྱིས་ལ། བླ་མ་རིགས་གསུམ་མགོན་པོའི་ཡང་བསུ་བ་ཡོད། ཅེས་ལུང་བསྟན་སྩལ། ཉེ་གནས་བདེ་ལེགས་ཆོས་སྒྲོན་དང་བཅས་དབུས་ཕྱོགས་ལ་འགྲོ་དོན་ལ་བྱོན། རྗེ་བཙུན་དབུས་ཕྱོགས་སུ་ཕེབས་ཉེར། ཀོང་པོར་བླ་མ་རིགས་གསུམ་མགོན་པོའི་ཞུ་བ་དེའི་སར་མི་ནག་པོ་རལ་པའི་ཐོད་བཅིངས་པ་དུང་གི་སྣ་ཆ་ཅན་ཞིག་བྱུང་བ་ལ། ཁྱེད་ག་ནས་བྱོན། དོན་གང་ཡོད་བྱས་པས། དེ་ན་རེ། དཔལ་རི་བོ་ཆེ་ནས་ཡོང་། གྲུབ་ཐོབ་ཆེན་པོས་ཁྱེད་འབོད་པར་བརྫང་པ་ཡིན་ཟེར། ང་འབོད་ནས་ཅི་བྱེད་བྱས་པས་གནས་འདིར་འོད་གསལ་ལྷའི་བརྒྱུད་པ་ཡོང་བ་ཡོད་པས། དེ་བསུ་བ་ལ་ང་དང་བསྡེབས་ནས་དབུས་སུ་ཤོག་གསུངས་པས། མགྱོགས་པར་འགྲོ་ཟེར། སྤྲུལ་པ་ཞིག་འདུག་བསམ། དེའི་རྗེས་ལ་ཡོང་པས་དབུས་སུ་སླེབས་ཉེར་སྔར་གྱི་མི་དེ་གར་སོང་མ་བྱུང་། རྗེ་བཙུན་མ་དང་མཇལ་ནས་སྔར་གྱི་ལོ་རྒྱུས་རྣམས་ཞུས། བསུ་བ་བྱས་ནས་ཙ་གོང་གནས་གསར་དུ་ཕེབས། དཔལ་འཁོར་ལོ་སྡོམ་པའི་གཞལ་ཡས་ཁང་དག་པ་མཁའ་སྤྱོད་དང་མཚུངས་པ། རྩ་ཀླུ་བདུད་རྡོ་རྗེ་སྐྱེ་བའི་ས་རྩ་དེ་སྐྱེ་འགྲོ་སེམས་ཅན་ཀུན་གྱི་ཁར་སོང་ན་ནད་ཀུན་སེལ་ཞིང་། རྣལ་འབྱོར་པ་ཉམས་རྟོགས་ཡོན་ཏན་སྐྱེ་བའི་ས་གཞི། དངོས་གྲུབ་རྣམ་གཉིས་སྩོལ་བ་དང་། ལམ་གྱི་ཡོན་ཏན་རྣམས་ཅིག་ཏུ་རྫོགས་པའི་ཅིག་ཅར་དུ་སྒྲུབ་པ་མཛད། དཔའ་བོ་དང་མཁའ་འགྲོ་མ་ལ་སོགས་པ་དང་། ཁྱད་པར་སེང་གེ་གདོང་ཅན་ཡབ་ཡུམ་གཉིས་ཀྱིས་ཕྲིན་ལས་དང་སྡོང་གྲོགས་དངོས་སུ་མཛད། ཡར་ལམ་དབུས་ཕྱོགས་ཕེབས་སྐབས་སེང་གེ་གདོང་ཅན་ཡབ་ཡུམ་གཉིས་བྲོ་པ་ཕོ་མོའི་ཚུལ་དུ་སྐབས་འགར་སྔོན་ལ་བསུ་བ་དང་། སྐབས་འགར་རྗེས་ནས་སྐྱེལ་བ། སྐབས་འགར་ཅི་ཡང་མེད་པའི་ཚུལ་བསྟན། སྣེ་མདོང་དུ་མི་དབང་གྲགས་པ་རྒྱལ་གྱིས་བསུ་བའི་བཀོད་པ་དང་བཅས་བཀུར་སྟི་བླ་ལྷག་ཏུ་མཛད། ཆོས་རྒྱལ་འདི་ཉིད་ཀྱིས་དཀོར་མཛོད་ནས། སློབ་དཔོན་པད་མ་འབྱུང་གནས་ཀྱི་ཟབ་གཏེར་ཀུན་གྱི་གཙོ་བོ་མཁའ་འགྲོ་ཡེ་ཤེས་མཚོ་རྒྱལ་གྱི་དབུ་ལོ་ཆ་ཚང་། སྙན་གཡུ། སྐུ་རྒྱན་རྣམས་ནོར་བདག་པོར་འབུལ་བ་ཡིན། བསྟན་འགྲོའི་དཔལ་ཡོན་དམ་པ་བསོད་ནམས་ཀྱི་ཞིང་དུ་བདག་གིར་མཛད་དུ་གསོལ་ཞེས་གསོལ་བ་བཏབ། དེ་ནས་ཡར་འབྲོག་ལ་བྱོན། འབྲོག་ཁྲི་དཔོན་ནམ་མཁའ་རྒྱལ་མཚན་གྱིས་བཀུར་སྟི་དང་བཅས་གསོལ་བ་བཏབ་བཞིན་ཟབ་རྒྱས་ཀྱི་ཆོས་མང་པོ་དུ་གསུངས་ནས་འགྲོ་དོན་བསྐྱངས། སྔར་ཙཱ་རི་ནས་ཡར་ལམ་ཕེབས་སྐབས་བྲོ་པ་ཕོ་མོ་གཉིས་དངོས་དང་ཉམས་སྣང་དུ་བྲོ་འཁྲབ་བཞིན་དུ་དེ་སྐད་བརྗོད། དེ་ཝི་ཀོ་ཊིའི་ཡ་གྱལ་གནས། །མ་དང་མཁའ་འགྲོས་བྱིན་བརླབས་པའི། ། ཞིང་སྐྱོང་ཌཀྐིའི་ཚོགས་དཔོན་མ། །གནས་འདི་ཟུངས་ཤིག་ཕྲིན་ལས་སྒྲུབས། ། ཞེས་སྐུལ་བ་ལ་བརྟེན། ས་ཕྱོགས་འདི་ཉིད་དུ་ཞབས་བཅགས། ས་གཞི་བྱིན་གྱིས་བརླབས་ནས་གཟིགས་སྣང་ལ་ཡང་། མ་དང་མཁའ་འགྲོ་སྤྲིན་དང་ན་བུན་བཞིན་དུ་འདུས་ནས་བྲོ་པ་དེ་གཉིས་དང་བཅས་ཕ་བོང་རང་རོང་ལ་ཐིམས་སོ། །འབྲོག་ཁྲི་དཔོན་གྱིས་མཐུན་རྐྱེན་བསྐྲུན་ནས་སྒྲུབ་སྡེ་ཆུང་ངུ་ཞིག་རབ་བྱུང་བདུན་པའི་ལྕགས་སྤྲེལ་༡༤༤༠ལོར་ཕྱག་བཏབ་པར་གྲགས། ཡིན་ནའང་དེའི་སྐོར་གྱི་ཡིག་ཆ་རྙིང་པ་ཁ་གསལ་མ་རྙེད། དེར་དཔལ་མཁའ་འགྲོ་འདུ་བའི་བསྟི་གནས་བསམ་གྲུབ་ཆོས་ཀྱི་སྡིངས་ཞེས་པའམ་བསམ་གཏན་མཁའ་སྤྱོད་ལྡིང་ཆོས་འཁོར་རྣམ་རྒྱལ་གླིང་ཞེས་འབོད་སྲོལ་གཉིས་ཡོད་ཀྱང་ཡོངས་གྲགས་ལ་སྔ་མ་བཞིན་བརྗོད་པ་ལགས། སྦབས་དེར་བླ་མ་གཅིག་དང་གྲྭ་པ་དྲུག་ལས་གྲུབ་པ་ཞིག་ཡིན། རྟེན་གྱི་གཙོ་བོ་ཁྲི་དཔོན་ནས་བཞེངས་པ། རྗེ་ཕྱོགས་ལས་རྣམ་རྒྱལ་གྱི་འདྲ་སྐུ་དང་། ཐང་སྟོང་རྒྱལ་པོས་གནང་བའི་ཙན་དན་སྦྲུལ་སྙིང་གི་རྣལ་འབྱོར་མ་བཅས་བྱིན་བརླབས་ཀྱི་མཚན་ཁ་འབར་བ་བཞུགས། བརྩམས་ཆོས་ཀྱང་སམ་འགྲོད་ཚུལ་དད་པའི་མེ་ཏོག་དང་། རྒྱུད་ལྷ་ཚོགས་ཀྱི་བསྟོད་པ། སྨོན་ལམ་དོན་གཉིས་ལྷུན་གྲུབ་སོགས་མཛད། རྗེ་ཕྱོགས་ལས་རྣམ་རྒྱལ་གྱིས་རང་གི་རྒྱལ་ཚབ་དུ་དབང་སྐུར། གསང་བའི་རྣམ་ཐར་སོགས་རིམ་པར་སྩལ་བིའ་གསུང་ལས། ཁྱེད་རང་སྐྱེ་བ་གསུམ་དུ་དབུས་ཀྱི་སྨད། །ཙཱ་རིའི་ཕྱོགས་སུ་སྐྱེ་བ་བཞེས་མཛོད་ལ། །རིན་ཆེན་གསེར་དངུལ་ལས་གྲུབ་གླེགས་བམ་བཞེངས། །འགྲོ་བའི་དོན་མཛད་མཁའ་སྤྱོད་གཤེགས་པར་མཛོད། །ཅེས་ལུང་བསྟན་ཀྱང་གནང་། དེ་ནས་མི་རིང་བར་ཙ་གོང་སྨན་མོ་སྒང་དུ་སྒྲུབ་པ་ལ་བཞུགས་ནས། ཕྱི་ཉན་ཐོས་ཀྱི་སྤྱོད་པ་ལྷུར་བཞེས་ཤིང་། ནང་བྱང་ཆུབ་ཀྱི་སེམས་ལས་མི་གཡོ་བ། གསང་བ་སྔགས་ཀྱི་སྒྲུབ་པ་ཉམས་སུ་བཞེས་ནས་གནས་དེར་གྲུབ་རྟགས་བྲག་ལ་ཞབས་རྗེས་སོགས་འཇོག་པར་མཛད། དགུང་གྲངས་སུམ་ཅུ་སོ་བཞིར་བཞེས་པ་རབ་བྱུང་བརྒྱད་པའི་ཤིང་ཕག་༡༤༥༥ལོར་གནས་འདི་རུ་གདུལ་བྱ་རྟག་འཛིན་རྣམས་ཆོས་ལ་སྐུལ་ཕྱིར་རེ་ཞིག་གཟུགས་སྐུའི་བཀོད་པ་བསྡུས་ཏེ། རྗེས་འཇུག་རྣམས་ཀྱི་བགོ་སྐལ་དུ་མཚན་ལྡན་དབུ་ཐོད་དཔལ་གསང་བ་འདུས་པའི་རང་བྱོན་དང་བཅས་ཡོད་པ་ཙ་གོང་དུ་བཞུགས། གྲུབ་ཐོབ་ཐང་སྟོང་ཆེན་པོས། སྨན་མོ་སྒང་དུ་སྒྲུབ་སྡེ་འཛུགས་པའི་སྨོན་ལམ་དང་། རྟེན་འབྲེལ་མཛད་སྒོའི་དུས་དེར་གནས་འདིར་ཐོད་པ་མཚན་ལྡན་དང་། མངའ་རིས་པ་ཡི་རི་པ་ཡོད། གསུངས་པ་བཞིན་ལུང་བསྟན་དུས་ཐོག་ཏུ་མངོན་དུ་གྱུར་ནས། རྗེས་འཇུག་རྣམས་མི་ཕྱེད་པའི་དད་པ་ཤིན་ཏུ་འཕེལ་ལོ།། །།
༡.ཡོང་ཁུངས། བོད།
༢. ཡར་འབྲོག་བསམ་སྡིངས་དགོན།
༣. ཕྱོགས་སྒྲིག་པ།
༤. སྐུ་ཞབས་ཚེ་རིང་།
༥. དྲྭ་རྒྱར་སྤེལ་མཁན།
༦. འཇིགས་ཆོས།

 

བརྒྱུད་སྐུལ།

མཆན་སྤེལ།