གཏམ་བཟང་། གཙང་གི་སྲོལ་རྒྱུན་ཞིབ་འཇུག་དང་ལོ་རྒྱུས་ཀྱི་སྟོང་ཆ་ཁ་སྐོང་། གསར་ཐོན།

གཏམ་བཟང་། གཙང་གི་སྲོལ་རྒྱུན་ཞིབ་འཇུག་དང་ལོ་རྒྱུས་ཀྱི་སྟོང་ཆ་ཁ་སྐོང་། གསར་ཐོན།

དཔེ་དེབ་གསར་ཐོན་གྱི་གཏམ་བཟང་།

དེང་རབས་བོད་ཀྱི་ན་གཞོན་བསམ་བློ་བ་དང་རྩོམ་པ་པོ་ཨ་མའི་བུ་བསྟན་འཛིན་ཚེ་རིང་གིས་ཁ་སང་བཞུད་ཟིན་པའི་མི་ལོ་བཞི་ཙམ་གྱི་ནང་མཐོ་སློབ་ཀྱི་སྦྱོང་གཞིའི་སློབ་ཞོར་དུ་བྲིས་པའི་ <<གཙང་གི་སྲོལ་རྒྱུན་ཞིབ་འཇུག་དང་ལོ་རྒྱུས་ཀྱི་སྟོང་ཆ་ཁ་སྐོང་།>> ཞེས་པའི་དཔེ་དེབ་དེ། དེ་རིང་སྤྱི་ལོ་ ༢༠༡༩ ཟླ་བ་ ༡༡ ཚེས་ ༡༠ ཉིན་མཧཱ་པཎྜི་ཏ་ཟམ་གདོང་བླ་མ་བློ་བཟང་བསྟན་འཛིན་མཆོག་གིས་དབུ་འབྱེད་གནང་བ་ནི་དགའ་བ་སྒོམ་དགོས་པའི་གཏམ་བཟང་ཞིག་ཡིན་པ་མ་ཟད། རྩོམ་པ་པོ་རང་ཉིད་ལ་ཆ་མཚོན་ན། བཀྲ་ཤིས་གཉིས་བརྩེགས་སྒང་ལ་བཀྲ་ཤིས་གསུམ་བརྩེགས་ཞེས་པའི་དཔེ་ལྟར། རྟེན་འབྲེལ་བཟང་པའི་ཉིན་མོ་ཞིག་ཡིན་པར་སྨོས་ཅི་དགོས་ཨང་།

དཔེ་དེབ་དེ་ནི་གཙང་གཞིས་རྩེ་རྫོང་ཁག་བཅོ་བརྒྱད་ཀྱི་ཕྱིའི་སྣོད་ཀྱི་འཇིག་རྟེན་དང་དེ་བཞིན་ནང་བཅུད་ཀྱི་འགྲོ་བ་མིའི་སྲོལ་རྒྱུན་རིག་གནས་སྣ་ཚོགས་པ་ཞིག་གི་ཐོག་ཞིབ་འཇུག་གང་ལྕོགས་ཤིག་བྱས་ཏེ། འདས་པའི་ལོ་རྒྱུས་དང་། ཐ་སྙད་སྒྲུབ་ཚུལ། རིག་གནས་ཀྱི་བྱུང་བ། ནང་བསྟན་གྱི་དགོན་རྙིང་། མི་གཞིའི་སློབ་གསོ། གནས་རྙིང་ཞིབ་འཇུག གནའ་བོའི་ཤུལ་བཞག གནའ་རྫས་རྟོག་ཞིབ། རླབས་ཆེན་གྱི་མི་སྣ། རིགས་རུས་ཀྱི་གནས་བབས། ཞིང་འབྲོག་གི་ཐོན་སྐྱེད། རྒྱན་གོས་ཀྱི་སྒྱུ་རྩལ། རོལ་མོའི་འཕེལ་རིམ། སྲོལ་རྒྱུན་གྱི་རྩེད་རིགས་ལ་སོགས་གཙང་གི་སྲོལ་རྒྱུན་དང་འབྲེལ་བའི་བརྗོད་བྱ་དྲུག་ཅུ་ལྷག་ཙམ་གྱི་ཐོག་ཞིབ་འཇུག་གི་དཔྱད་རྩོམ་ཤ་སྟག་བྲིས་ཡོད།

རྩོམ་པ་པོའི་ཐོག་མའི་ཀུན་སློང་ནི། ཕྱི་ཡུལ་དུ་འཚར་ལོངས་བྱུང་བའི་བོད་མིའི་གཞོན་སྐྱེས་ཚོས་རང་གི་རིགས་གཞུང་ལ་རྒྱུས་ལོན་བྱེད་སའི་མ་དེབ་ཅིག དེ་ནི་འབྱུང་འགྱུར་གྱི་མི་རབས་ལ་བཞག་པའི་ཕྱོགས་སྟོན་འཁོར་ལོ་བཞིན་ལོ་རྒྱུས་ལ་ཆ་རྒྱུས་སླེབས་ས་ཞིག དེ་ནི་གཙང་ལ་ཕུལ་བའི་ལེགས་སྐྱེས་ཤིག་ཡིན། དེ་ནི་བདག་གི་ཨ་མའི་ནུ་རིན་ཡིན་པ་མ་ཟད། རྒྱལ་སྤྱིའི་མི་མང་ལ་རང་ཉིད་ཀྱི་ཕ་ཡུལ་ངོ་སྤྲོད་དང་འགྲེལ་བཤད་ཀྱི་མེ་ལོང་ཡིན། མདོར་ན། དེ་ནི་བོད་མི་རིགས་ཀྱི་སྣོད་བཅུད་ཀྱི་དཀའ་གནད་སེལ་ཐབས་དང་ལོ་རྒྱུས་ཀྱི་གསལ་ཁ་སྟོན་ཐུབ་པའང་ལྟ་ཅི་སྨོས། བཏབ་ས་རུ་ལོ་ཏོག་སྨིན་པ་དང་། བརྩམས་པ་དེ་ཕན་པའི་རེ་སྨོན་ཞུ།

གལ་སྲིད། རིགས་མཐུན་གྱི་བོད་རིགས་སྤུན་ཟླ་སུ་ཞིག་ལ་དགོས་འདོད་ཡོད་པ་དང་ཉམས་ཞིབ་པ་སུ་ཞིག་ལ་དཔྱད་གཞིའི་ཡིག་ཚགས་ཀྱི་ཚུལ་དུ་དགོས་མཁོ་ཡོད་ཚེ་ཐད་ཀར་རྩོམ་པ་པོ་དོ་དག་ལ་སྒེར་འབྲེལ་གནང་རོགས།

བརྗོད་དོན་དཀར་ཆག་གཤམ་གསལ།

 

 

བརྒྱུད་སྐུལ།

མཆན་སྤེལ།