གཙང་གི་གཞས་པ་ནོར་བུ་ལགས་ཀྱི་སྒྱུ་རྩལ་གྱི་ལམ་བུ།

གཙང་གི་གཞས་པ་ནོར་བུ་ལགས་ཀྱི་སྒྱུ་རྩལ་གྱི་ལམ་བུ།

གཙང་གི་གཞས་པ་ནོར་བུ་ལགས་ནི་སྤྱི་ལོ་1979ལོར་གཞིས་རྩེ་གྲོང་ཁྱེར་བཞད་མཐོང་སྨོན་རྫོང་ཁོངས་རྟ་ནག་མདའ་ཤང་གི་ཞིང་པ་དཀྱུས་མའི་ཁྱིམ་ཚང་ཞིག་ཏུ་སྐྱེས་ཤིང་། ནོར་བུ་ལགས་ལོ་ན་ལྔ་དྲུག་ཙམ་ལ་སོན་དུས་ནས་ཁོང་གི་པཱ་ལགས་ཀྱིས་གླིང་བུ་གཏོང་བ་དང་ཨ་མ་ལགས་ཀྱིས་ཞབས་བྲོ་བསྐྱོན་ཏེ་གྲོང་ཚོའི་ནང་དང་གྲོང་མི་ཁྱིམ་མཚེས་ཚོར་གཟིགས་མོ་འབུལ་གྱི་ཡོད་པས། མི་ཚང་མས་ཁོང་བཟའ་ཚོ་གཉིས་ནི་སྒྱུ་རྩལ་ལ་མཁས་ཤིང་སྣང་བ་སྤྲོ་པོ་ཡོད་པ་ཞིག་ཏུ་བརྩི་གི་ཡོད་ལ། ཁྱད་པར་དུ་དགུན་དུས་ལོ་གསར་དང་། དབྱར་དུས་འོང་སྐོར་སོགས་དུས་སྟོན་ཆེ་གྲས་ཀྱི་སྐབས། ནོར་བུ་ལགས་ཀྱི་ཕ་མ་གཉིས་ཀྱིས་རྒྱ་ཁྱོན་སྤྱི་ཁྲེ་ངོས་གྲུ་ཉིས་བརྒྱ་ལྷག་ཙམ་གྱི་སྒོ་རའི་གཡབ་འོག་ཏུ་ཞབས་གཞས་འཁྲབ་སྟོན་བྱེད་ཀྱི་ཡོད་སྟབས། གྲོང་ཚོའི་མི་ཚོགས་དེ་གར་འཛོམས་ས་ཞིག་ཏུ་གྱུར་མྱོང་། འདི་དག་གིས་ཁོང་གི་སེམས་ལ་སྒྱུ་རྩལ་གྱི་ཤུགས་རྐྱེན་བཟང་པོ་ཐེབས།

སྤྱི་ལོ་2001ལོར་གཞས་པ་ནོར་བུ་ལགས་སློབ་འབྲིང་ཐོན་རྗེས། ཁོང་གི་ཕ་མ་གཉིས་ལ་ཕྲུ་གུ་གསུམ་ཡོད་ཀྱང་རྒན་མགོ་ནི་ནོར་བུ་ལགས་ཡིན་པས། ཕ་མའི་རྗེས་འཛིན་པ་ནི་ཁོང་ཉིད་ལ་བབས་ཡོད་པ་མ་ཟད། སྐབས་དེ་དུས་ཁྱིམ་ཚང་གི་འབྱོར་འཁོས་ཀྱང་ཅུང་ཞན་པའི་དབང་གིས། ཁོང་ཉིད་ཀྱི་ཚེ་འདིའི་སློབ་གྲྭར་བསྐྱོད་རྒྱུའི་བསམ་འདུན་མཇུག་འགྲིལ་བར་གྱུར། སློབ་འབྲིང་སློབ་མ་ཁོང་ནི་སྒྱུ་རྩལ་དང་ལས་དབང་དམ་པོར་འབྲེལ་བ་ཞིག་ཡིན་པས། མུ་མཐུད་གྲོང་ཚོའི་ནང་སྡོད་རིང་གྲོང་ཚོའི་ལྷ་མོ་རུ་ཁག་གི་སྒྲ་སྙན་གཏོང་མཁན་དང་། རྔ་རྡུང་མཁན། འབྲས་དཀར་འཁྲབ་མཁན་སོགས་ག་བཏང་གོ་ཆོད་ཀྱི་འཁྲབ་སྟོན་པ་ཞིག་ཏུ་གྱུར། དེ་རྗེས་ལྷ་སར་ཡོད་པའི་ཁོང་གི་ཨ་ཞང་གིས“ཁྱོད་ལ་སྒྱུ་རྩལ་ལམ་བུར་ཞུགས་པའི་རྨང་གཞི་འདུག་པས། ངས་ལམ་སྣེ་སྟོན་ཆོག”ཅེས་བོད་ཀྱི་སྲོལ་རྒྱུན་ཞབས་གཞས་དང་དར་སོ་ཆེ་བའི་གཞས་སྣ་ཚོགས་གཏོང་ཡུལ་ལྷ་སའི་ནང་མ་ཁང་ཞིག་ལ་འོས་སྦྱོར་བྱས།དེ་གར་སླེབས་རྗེས་གཞས་པ་ནོར་བུ་ལགས་ཀྱིས། ནང་མ་ཁང་གི་བཀོད་སྒྲིག་ལྟར་རང་ཉིད་ཀྱི་བྱང་ཆ་ལྡན་པའི་སྒྲ་སྙན་དཀྲོལ་གཏོང་དང་དེ་བཞིན་བྱིས་པའི་དུས་ནས་གཏོང་མྱོང་བའི་དམངས་གཞས་བཏང་བས། ནང་མ་ཁང་གི་སྦྱིན་བདག་བློ་མགུ་པོ་བྱུང་བ་དང་གཟིགས་མོ་བའི་དགའ་བསུ་ཆེན་པོ་ཐོབ། “གཙང་པ་ནོར་བུ”ཞེས་པའི་མིང་ཡང་དེ་ནས་ཐོབ།

སྤྱི་ལོ་2011ལོར་ཁོང་གིས་ལྷ་སའི་ནང་མ་ཁང་དུ་གླ་པ་བྱེད་པ་ནས་དམངས་སྲོལ་གླུ་གར་གྱི་གཞས་པའི་སྦྱིན་བདག་ཅིག་བྱ་རྒྱུར་ཁ་ཕྱོགས་ཏེ། གཞིས་རྩེར་ལོག་ཅིང་མ་དངུལ་དང་། མི་སྣ། སྒྲིག་ཆས་སོགས་ཕྱོགས་ཡོངས་ནས་གྲ་སྒྲིག་འཐུས་ཚང་བྱས་ཐོག་གཞིས་རྩེ་གྲོང་ཁྱེར་དུ“དགའ་སྐྱིད་གླིང་དམངས་ཁྲོད་སྒྱུ་རྩལ་འཁྲབ་སྟོན་ལྟེ་གནས”ཞེས་པ་ཞིག་གཉེར་ནས་གྲོང་ཁྱེར་དེའི་དམངས་ཁྲོད་གླུ་གར་ཁང་གི་འགྲན་རྩོད་ནང་ཞུགས་པ་རེད།

མིག་སྔར་ཁོང་གི་དམངས་སྲོལ་གླུ་གར་ཁང་དེར་ཁྱོན་བསྡོམས་ལས་བཟོ་མི་གྲངས་50ལྷག་ཙམ་ཡོད་པའི་ནང་། ཁོང་རང་ཉིད་ཀྱི་སྐྱེ་ཡུལ་རྟ་ནག་མདའ་ཤང་གི་ཞིང་འབྲོག་པ་ཁོ་ནའི་བུ་ཕྲུག་20ཡོད་ཅིང་། ཁོང་གིས་ན་གཞོན་དེ་ག་ཙམ་ལས་ཞུགས་ཐུབ་ཐབས་དང་། ཁོང་ཚོའི་ལུས་ཐོག་གི་སྒྱུ་རྩལ་ཐད་ཀྱི་དམིགས་བསལ་ཁྱད་ཆོས་འདོན་སྤེལ་བྱེད་དུ་བཅུག་པ་མ་ཟད། ཟླ་རེའི་ཆ་སྙོམས་ཡོང་འབབ་སྒོར་3000ལས་མི་དམའ་ཡོང་བ་བྱས་པར་བརྟེན། ཕ་ཡུལ་མང་ཚོགས་ཀྱི་སེམས་ནང་རང་ཡུལ་ནས་འཚར་ལོངས་བྱུང་བའི་སྒྱུ་རྩལ་པ་ཁོང་གི་བྱ་གཞག་ལ་དགའ་མགུ་ཡི་རངས་བྱེད་བཞིན་ཡོད་པ་རེད།

ན་གཞོན་གཞས་པ་ནོར་བུ་ལགས་ཀྱིས་ཕ་ཡུལ་གྱི་ཆེད་དུ་བྱ་བཟང་ཞིག་སྒྲུབ་སྙམ་པའི་བསམ་བློ་དེ་སྐད་ཅིག་ཙམ་དོར་མེད་སྟབས། སྤྱི་ལོ་2016ལོར་ཁོང་གིས་རང་གྲོན་བཏང་སྟེ་པར་རྒྱག་ཆེད་ལས་མི་སྣ་གདན་ཞུ་བྱས་ཐོག་སྐྱེ་ཡུལ་རྟ་ནག་མདའ་ཤང་དུ་བསྐྱོད་དེ། དེ་གའི་དམངས་ཁྲོད་ལྷ་མོ་རུ་ཁག་གིས་འཁྲབ་སྟོན་བྱས་པའི་བོད་ཀྱི་ལྷ་མོ《སྣང་ས་འོད་འབུམ》དང་། 《ཆོས་རྒྱལ་ནོར་བཟང》གཉིས་ཆ་ཚང་གི་འོད་སྡེར་བཏོན་པ་དང་། ཕྱོགས་མཚུངས་འོད་སྡེར་ཁག་གཉིས་པོ་དེ་རིན་མེད་དུ་གྲོང་ཚོའི་མང་ཚོགས་ལ་སྤྲད་དེ་ཁོང་ཚོས་བོད་ཀྱི་ལྷ་མོར་བཅངས་པའི་འདུ་ཤེས་དེ་བས་ཟབ་ཏུ་གཏོང་ཐབས་བྱས་ཡོད། ད་དུང་ཁོང་གིས་སྔ་རྗེས་སུ་ཕ་ཡུལ་གྱི་ཞིང་འབྲོག་པའི་བུ་ཕྲུག་ལྔ་ལ་དུས་ཡུན་ལོ་ལྔའི་རིང་སློབ་ཆེན་དུ་བསྐྱོད་པའི་རོགས་དངུལ་སྒོར་ཁྲི་8ལྷག་ཙམ་བཏང་ཡོད་པ་རེད།

གཞས་པ་ནོར་བུ་ལགས་ཀྱིས་གཞན་ཕན་བྱ་གཞག་སྒྲུབ་པ་དང་ཕྱོགས་མཚུངས་དེ་བས་ལྷག་པའི་གཞན་ཕན་སྒྲུབ་པར་རང་ཉིད་ཀྱི་བྱ་གཞག་གཞི་ཁྱོན་དེ་བས་ཆེ་རུ་གཏོང་རྒྱུར་ཐོག་མཐའ་བར་གསུམ་དུ་དོ་སྣང་ཆེན་པོ་བྱེད་ཀྱི་ཡོད་ལ། ཁྱད་པར་དུ་བོད་ཀྱི་དམངས་ཁྲོད་སྒྱུ་རྩལ་གྱི་ཉིང་བཅུད་ཉམས་པ་སླར་གསོ་དང་མི་ཉམས་གོང་འཕེལ་གཏོང་རྒྱུ་དེ་རང་ཉིད་གཞས་པ་ཞིག་གི་བསྐྱུར་ཐབས་ཡེ་ནས་མེད་པའི་འགན་འཁྲི་ཞིག་ལ་ངོས་འཛིན་བྱས་ཏེ། སྤྱི་ལོ་2016ལོའི་ཟླ་བདུན་པར། གཞིས་རྩེ་གྲོང་ཁྱེར་དུ“གཙང་པ་ནོར་བུ་རིག་གནས་འཕེལ་རྒྱས་འགན་འཁྲི་ཚད་ཡོད་ཀུང་སི”དངོས་སུ་བཙུགས་ཤིང་། ཀུང་སི་དེ་འཛུགས་པའི་དམིགས་ཡུལ་ནི་སྔར་ལས་ལྷག་པའི་སྒོ་ནས་བོད་ཀྱི་དམངས་ཁྲོད་གླུ་གར་རྒྱུན་འཛིན་དར་རྒྱས་གཏོང་རྒྱུ་དེ་ཡིན། མིག་སྔར་ཁོང་གིས་གླུ་གར་ཁང་དུ་གླུ་གཞས་གཏོང་བ་དང་སྦྲགས་དམངས་གཞས་འབོར་ཆེན་འཚོལ་བསྡུ་བྱེད་བཞིན་ཡོད་པ་རེད། 2017ལོའི་ཟླ་གཉིས་པར་ཁོང་གི་ཆེད་སྒྲིག་འོད་སྡེར་བཞི་པ《ངའི་དམ་བཅའ》ཞེས་པ་དེ་དངོས་སུ་ཁྲོམ་རའི་ཐོག་འགྲེམས་ཚོང་བྱས་ཡོད་ཅིང་། ཁོང་གི་གླུ་གཞས་ནི་གསན་མཁན་ཧ་ཅང་མང་པོས་རྒྱུས་མངའ་ཡོད་པ་ཞིག་ཡིན་སྟབས། བོད་མེ་བྱ་ལོའི་ལོ་གསར་སྔ་ནུབ་ཏུ་ལྷ་སའི་ཁྲོམ་གཞུང་དུ་ཉིན་ཤས་ནང་འོད་སྡེར་ཁྲི་གཅིག་ལྷག་ཙམ་བྲིན་ཡོད་པ་རེད། འོད་སྡེར་དེའི་ནང་གི་གླུ་གཞས་ཁག་གཅིག་གི་ཚིག་དང་གདངས་གཉིས་ཀ་ཁོང་རང་ཉིད་ཀྱིས་གསར་རྩོམ་བྱས་ཡོད་སྟབས་འཚོ་བའི་ཉམས་སྣང་ཤིན་ཏུ་དོད་ལ། ཕ་ཡུལ་ལ་བཅངས་པའི་བརྩེ་སེམས་རང་དགར་མངོན་གྱི་ཡོད་པ་རེད།

བརྒྱུད་སྐུལ།

མཆན་སྤེལ།