དགའ་ལྡན་ཁྲི་པའི་བྱུང་རབས་དང་། དགའ་ལྡན་ཁྲི་པ་རིམ་བྱོན་གྱི་མཚན་བྱང་།

དགའ་ལྡན་ཁྲི་པའི་བྱུང་རབས་དང་། དགའ་ལྡན་ཁྲི་པ་རིམ་བྱོན་གྱི་མཚན་བྱང་།
དགའ་ལྡན་ཁྲི་པ།

 

དགའ་ལྡན་ཁྲི་པ་ནི་རི་བོ་དགེ་ལུགས་པའི་བསྟན་འཛིན་ཀུན་གྱི་གཙོ་བོ་ཡིན་ཞིང༌། སྐྱབས་ཞུ་སོགས་ཀྱི་འགོ་བརྗོད་དུ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཞེས་འགོད་སྲོལ་ཡོད་ལ། ཏཱ་ལའི་བླ་མས་དགའ་ལྡན་གསེར་ཁྲིའི་སྟེང་བཞུགས་ནས་མཛད་སྒོ་གནང་དགོས་ཚེ་མགྲོན་གཉེར་ཆེ་མོ་བས་དགའ་ལྡན་ཁྲི་པར་གནང་བ་ཞུ་དགོས་པ་ཡིན། ཏཱ་ལའི་བླ་མའི་མཛད་སྒོ་ཆེ་ཁག་ལ་དགའ་ལྡན་ཁྲི་པས་མཎྜལ་བཤད་པ་གནང་ཚེ་ཁྲི་སྟེང་དུ་བཞུགས་ནས་གསུངས་པ་ལས་བཞེངས་སྲོལ་མེད་ཐོག ལྷ་སར་ཡང་དགའ་ལྡན་ཁྲི་པའི་མཛད་སྒོ་ཁག་དང༌། ཆིབས་ཧྲག་དང་བཅས་ཕེབས་ཐོན་སྐབས་དབུ་གདུགས་ཕུབ་ནས་ཕེབས་ཀྱི་ཡོད། དགའ་ལྡན་ཁྲི་པ་ཞེས་ཐོག་མར་འབྱུང་སྟངས་ནི་རྗེ་ཙོང་ཁ་པས་དགའ་ལྡན་དགོན་པ་ཕྱག་བཏབ་སྟེ་གསེར་ཁྲིར་བཞུགས་པ་ནས་བཟུང་ཁྲི་སྟེང་དེར་བཞུགས་ནས་རྗེ་ཙོང་ཁ་པའི་རྒྱལ་ཚབ་གནང་མཁན་རིམ་པར་དགའ་ལྡན་ཁྲི་པ་ཞེས་འབོད། རྗེ་ཙོང་ཁ་པ་ནས་ཁྲི་ཆེན་ཐུབ་བསྟན་ཀུན་དགའ་བར་ཁྲི་ཐོག་དགུ་བཅུ་གོ་དྲུག་བྱུང་འདུག ཁྲི་ཐོག་ཏུ་བཞུགས་རིང་ལྷ་ལྡན་སྨོན་ལམ་ཆེན་མོ་དང༌། ཚོགས་མཆོད་སྨོན་ལམ་གྱི་ཚོགས་དབུ་མཛད་རྒྱུ་དང༌། གཙོ་ཆེར་དགའ་ལྡན་དུ་བཞུགས་ནས་མདོ་སྔགས་ཀྱི་ཆོས་འཆད་ཉན་མཛད་རྒྱུ་དེ་ཡིན་ལ། ཁྲི་ཐོག་ཁང་གི་མཆོད་གཞིས་ཐོག་ནས་དགའ་ལྡན་དུ་གཏོང་སྒོ་གནང་དགོས་པ་ཡིན།

Image may contain: sky and outdoor

༢༽ དགའ་ལྡན་དགོན། ༡༩༤༨ པར་པ་སུ་ཡིན་མི་གསལ།
2) Gaden monastery in Tibet. 1948.

དེ་ཡང་རབ་བྱུང་བདུན་པའི་ས་ཕག(༡༤༡༩)ལོར་རྗེ་ཙོང་ཁ་པ་སྐུ་གཤེགས་ནས་ཞག་ཞེ་དགུའི་རིང་འདས་མཆོད་ཞུས་རྗེས་སློབ་དཔོན་འདུལ་བ་འཛིན་པ་གྲགས་པ་རྒྱལ་མཚན་གྱིས་གཙོ་མཛད་དེ་ཡོངས་ཀྱི་དགེ་བའི་བཤེས་གཉེན་རྣམས་ནས་སློབ་དཔོན་དཀའ་བཅུ་བ་དར་མ་རིན་ཆེན་རྗེ་རིན་པོ་ཆེའི་ཆོས་ཁྲིར་བཞུགས་ཏེ་གཟིམ་ཁང(ཁྲི་ཐོག་ཁང)དུ་ཕེབས་ནས་རྗེས་འཇུག་ཡོངས་ཀྱི་གཙུག་རྒྱན་དུ་བཞུགས་པར་གསོལ་འདེབས་མཛད་པ་བཞིན་དཀའ་བཅུ་བ་དར་མ་རིན་ཆེན་དགའ་ལྡན་གསེར་ཁྲིར་བཞུགས་ཤིང༌། སྐབས་དེར་མཁས་གྲུབ་དགེ་ལེགས་དཔལ་བཟང་པོས། དཔལ་ལྡན་ཡོན་ཏན་ཚོགས་ཀྱི་བྱེད་པོ་ཡིས། །མི་འཇིགས་སེང་གེའི་ཁྲི་ལ་དབང་བསྐུར་བ། །རྒྱལ་བ་གཉིས་པའི་རྒྱལ་ཚབ་ཆོས་ཀྱི་རྗེ། །མི་ཕམ་བླ་མ་གཉིས་པ་རྒྱལ་གྱུར་ཅིག ། ཅེས་སོགས་ཀྱི་བསྟོད་ཚིག་གི་མེ་ཏོག་འཐོར་བར་མཛད་པ་ནས་འཇམ་མགོན་རྒྱལ་བའི་རྒྱལ་ཚབ་ཅེས་པའི་ཆེ་བསྟོད་ཀྱང་དུས་དེ་ནས་བྱུང་བར་སྣང༌། དགའ་ལྡན་ཁྲི་པ་ནི་བླ་སྤྲུལ་གཞན་ལྟར་སྐྱེ་སྤྲུལ་ངོས་འཛིན་ཞུས་ཏེ་བསྐོས་པ་ཞིག་མིན་ཞིང༌། ཁོང་རྣམས་མང་ཆེ་བ་ནི་གྲྭ་རྐྱང་གི་ཐོག་ནས་དཀའ་སྤྱད་དུ་མས་སྦྱངས་བརྩོན་མཛད་དེ་མདོ་སྔགས་གཞུང་ལུགས་ཀུན་ལ་མཁྱེན་པ་ཕུལ་དུ་ཕྱིན་ནས་ཁྲི་པར་ཕེབས་པ་མ་ཟད། ཁྲི་པ་ནི་ཞྭ་སེར་བསྟན་པ་འཛིན་ཅིང་སྤེལ་བར་མཛད་མཁན་ཡིན། མཚན་གནས་དེར་ཕེབས་པར་ཁྱིམ་ཚང་གི་འཁོས་འབྱོར་དང༌། དབང་སྟོབས་ཆེ་ཆུང་སོགས་རིས་སུ་མ་མཆིས་པ་ནི་བོད་ཀྱི་གཏམ་དཔེ་ལའང་ཨ་མའི་བུ་ལ་ཡོན་ཏན་ཡོད་ན་དགའ་ལྡན་གསེར་ཁྲིར་བདག་པོ་མེད་ཅེས་བཤད་སྲོལ་ཡོད་པ་ལྟར་ཡིན། ཁོང་རྣམ་པ་ནི་གཞོན་ནུའི་དུས་ནས་རབ་ཏུ་བྱུང་ཞིང༌། གདན་ས་ཆེན་པོ་གསུམ་གང་རུང་ཞིག་ལ་ཆོས་གྲྭར་ཞུགས་ཏེ་མང་ཆེ་བ་ནི་མི་ལོ་ཉི་ཤུ་ཡས་མས་ཙམ་གྱི་རིང་བཤེས་གཉེན་དམ་པ་བསྟེན་ཅིང༌། གྲོགས་བློ་གསལ་རིག་པ་སྨྲ་བ་བརྒྱ་ཕྲག་དུ་མ་དང་ལྷན་ཅིག་ཏུ་འཛམ་གླིང་རྒྱན་དྲུག་མཆོག་གཉིས་རྗེས་འབྲངས་དང་བཅས་པའི་གཞུང་ལུགས་རྣམས་ཚིག་སྤྱི་དང༌། འོལ་སྤྱི་ཙམ་མ་ཡིན་པར་དྲི་མ་མེད་པའི་ལུང་དང་དངོས་སྟོབས་ཀྱི་རིགས་པའི་ལམ་ནས་དྲངས་ཏེ་རྣམ་པར་དཔྱོད་པའི་ཚུལ་ལ་གུས་སྦྱོར་དང༌། རྟག་སྦྱོར་བརྩོན་འགྲུས་ཆུ་བོའི་རྒྱུན་བཞིན་བསྟེན་ནས་སློབ་གཉེར་མཐར་ཕྱིན་པ་བྱས་པའི་འབྲས་རྟགས་སུ་སྨོན་ལམ་ཆེན་མོར་གདན་ས་གསུམ་གྱི་མཁས་པའི་དབུས་སུ་གཞུང་ཆེན་བཀའ་པོད་ལྔའི་གྲྭ་སྐོར་དམ་བཅའ་བཞག་སྟེ་དགེ་བཤེས་ལྷ་རམས་པའི་མཚན་བཞེས་དགོས་པ་དང༌། མཚན་བཞེས་དམ་བཅའི་སྐབས་མཁས་པ་མང་པོས་གཞུང་ཆེན་རྣམས་ཀྱི་གོང་འོག་ཚིག་དོན་ལས་བརྩམས་པའི་བརྒལ་བརྟག་དང་དྲི་བ་ཇི་བྱུང་ལ་གཞུང་དོན་དང་མི་འགལ་བའི་ལན་འདེབས་ཀྱི་རྣམ་དཔྱོད་བཟང་ཞན་ཇི་བྱུང་མཚན་ཞབས་རྣམས་དང༌། མཁན་པོ་གཞུང་ལས་པ་བཅས་ནས་བརྟག་ཞིབ་དང་འབྲེལ་བློ་གྲོས་ཀྱི་སྦྱངས་རྩལ་གཟེངས་སུ་ཐོན་པ་རྣམས་ཨང་རིམ་བཀོད་དེ་ཏཱ་ལའི་བླ་མར་སྙན་འབུལ་དང་འབྲེལ་གཞུང་ས་ནས་ཨང་རིམ་ལྟར་ལེགས་སྐྱེས་གཟེངས་བསྟོད་ཐོབ་རྗེས་གཞི་ནས་སོ་སོའི་ཐོབ་ཁུངས་ལྟར་རྒྱུད་གྲྭ་སྟོད་སྨད་གང་རིགས་སུ་ཞུགས་ཏེ་ལོ་ཤས་རིང་རྒྱུད་གྲྭར་གསང་སྔགས་རྡོ་རྗེ་ཐེག་པའི་བསྐྱེད་རྫོགས་ཀྱི་ཉམས་ལེན་གསན་འཇོག་དང་འབྲེལ་རྒྱུད་གྲྭའི་གསང་སྔགས་ཀྱི་རྩོད་རྒྱུགས་དང༌། དམ་བཅའི་ཨང་རིམ་དང་གཉིས་ཐོབ་པའི་རྗེས་རྒྱུད་གྲྭའི་དགེ་བསྐོས་ཟླ་བ་བཞི་དང༌། དེ་ནས་ལོ་ཤས་རྗེས་བསྐོ་གཞག་བྱུང་མཚམས་བླ་མ་དབུ་མ་དབུ་མཛད་ལོ་གསུམ། མཁན་པོ་ལོ་གསུམ་བཅས་གནང་ནས་མཁན་ཟུར་ལོ་གང་ཙམ་བཞུགས་མཐར་མཁན་ཟུར་བགྲེས་པ་དེ་རྒྱུད་སྨད་ཡིན་ན་བྱང་རྩེ་ཆོས་རྗེ་དང༌། རྒྱུད་སྟོད་ཡིན་ན་ཤར་རྩེ་ཆོས་རྗེའི་ཁྲིར་ཕེབས་ཏེ་ལོ་བཅུ་བཞི་སོང་རྗེས་དགའ་ལྡན་གསེར་ཁྲིར་ཕེབས་དགོས། འོན་ཀྱང་རང་ཉིད་ཀྱི་གོང་དུ་ཡོད་པའི་ཁྲི་པའམ། ཤར་བྱང་ཆོས་རྗེ་ལས་ཐོག་ཏུ་སྐུ་གཤེགས་པ་ཡིན་ན་ལོ་ཚད་གོང་གསལ་ལྟར་འགོར་གྱི་མེད། དགའ་ལྡན་ཁྲི་པ་ཕལ་ཆེར་གསེར་ཁྲིར་ཕེབས་སྐབས་དགུང་ལོ་དྲུག་ཅུ་བདུན་ཅུར་ཕེབས་ཀྱི་ཡོད་ལ། ཆོས་ཕྱོགས་ཀྱི་ཡོན་ཏན་ནི་མདོ་སྔགས་ཀྱི་གཞུང་ལུགས་དང༌། ལག་ལེན་ཀུན་ལ་མཁས་པའི་མཐར་སོན་པ་ཤ་སྟག་ཡིན། ཁྲི་ཐོག་སོ་ལྔ་པ་འཇམ་དབྱངས་དཀོན་མཆོག་ཆོས་འཕེལ་བར་ཁྲི་བཞུགས་ལོ་ཚད་གཏན་འཁེལ་མེད་ཀྱང༌། ཁྲི་ཐོག་སོ་དྲུག་པ་ཀོང་པོ་བསྟན་འཛིན་ལེགས་བཤད་ཀྱི་རྗེས་སུ་དགའ་ལྡན་ཁྲི་འཛིན་ལོ་བདུན་རེ་ཡིན་པར་སྡེ་པ་གཙང་པས་གཏན་ལ་ཕབ། དགའ་ལྡན་ཕོ་བྲང་པའི་དབང་བསྒྱུར་སྐབས་ཀྱང་དེ་དོན་སོར་གནས་ཐོག་དགའ་ལྡན་ཁྲི་པར་ཆེ་བསྟོད་དང༌། བདག་རྐྱེན་སྔར་ལས་ལྷག་པ་ཞུས་ཏེ་ཁྲི་པའི་ཐོབ་ཐང་འགན་དབང་གཏན་འཁེལ་གྱི་ཡིག་ལམ་དུ་འཁོད་པ་བྱུང༌། དགའ་ལྡན་ཁྲི་པ་དང༌། ཤར་བྱང་ཆོས་རྗེ་རྣམ་གཉིས་དབྱར་ཆོས་སོགས་ཀྱི་སྐབས་མ་གཏོགས་རྒྱུན་གཏན་ལྷ་སར་བཞུགས་ཤིང༌། ཁྲི་པ་གོང་མ་དེ་ཁྲི་ལོ་གཙང་ནས་དགོངས་ཞུ་མཛད་པའམ། ཡང་ན་ཁྲི་པ་ལས་ཐོག་ཏུ་སྐུ་གཤེགས་པ་བྱུང་ཚེ་ཤར་རྩེ་དང༌། བྱང་རྩེའི་ཆོས་རྗེ་ཁྲི་པར་ཕེབས་རེས་སུ་འཁེལ་བ་དེར་ཁྲི་པའི་འགན་བཞེས་དགོས་པའི་ཏཱ་ལའི་བླ་མའི་བཀའ་ཡིག་དེ་རྩེ་འགག་ནས་དགའ་ལྡན་ཁྲི་ཐོག་ཁང་གི་མཛོད་པར་གཏོང་བ་དང༌། ཚེས་ཆ་བཟང་བ་ཞིག་ལ་ཁྲི་ཐོག་ཁང་གི་མཛོད་པ་དང༌། དགའ་ལྡན་བླ་སྤྱིའི་འཐུས་མི་བཅས་ཁྲི་པ་གསར་པའི་སར་བཅར་ནས་ཏཱ་ལའི་བླ་མའི་བཀའ་དེ་བརྒྱུད་ཞུ་དང་སྦྲགས་མཎྜལ་རྟེན་གསུམ་འདེགས་འབུལ་གྱིས་གང་མགྱོགས་གསེར་ཁྲིར་ཞབས་སོར་འཁོད་པ་དང༌། སྐུ་ཚེ་མཛད་འཕྲིན་རྒྱས་པ་སོགས་ཀྱི་ཞུ་བསྐུལ་བྱས་པ་བཞིན་ཁྲི་པ་གསར་པ་དེས་ཚེས་ཆ་སྟབས་བསྟུན་གྱིས་ལྷ་ས་ནས་ཕེབས་ཐོན་དང༌། གསེར་ཁྲིར་བཞུགས་རྒྱུའི་དུས་ཚོད་གཏན་འཁེལ་གནང་བ་ལྟར་ཁྲི་པའི་སྣེ་ཤན(རྒྱུས་མངའ་བྱེད་མཁན)རྩེ་དྲུང་དཀྱུས་མ་ཞིག་ཡོད་པ་དེས་རྩེ་འགག་ཏུ་ཁྲི་པ་ལྷ་ས་ནས་ཕེབས་ཐོན་དང༌། ཁྲི་བཞུགས་དུས་ཚོད་སྙན་སེང་དང་འབྲེལ་རྩེའི་སྐུ་ཚབ(ཏཱ་ལའི་བླ་མའི་སྐུ་ཚབ)དང་ཆིབས་ཞབས་དྲུང་རིགས་སེར་སྐྱར་བརྡ་ཐོ་ཡོང་བ་ཞེས་ཞུས་རྗེས་རྩེ་གསོལ་ཐབ་ཏུ་གསོལ་ཇ་དང༌། དཀར་སྤྲོ་སོགས་ཀྱི་སྙན་སེང་ཞུ་དགོས། རྩེ་འགག་ནས་རྩེའི་སྐུ་ཚབ་རྩེ་མགྲོན(རིམ་པ་ལྔ་པའི་དཔོན་རིགས་སེར་མོ་བ)ཞིག་དང་ཆིབས་ཞབས་རྩེ་དྲུང་དཀྱུས་མ་བཅུ་དང༌། བཀའ་ཤག་ནས་ཤོད་དྲུང་དཀྱུས་མ་བཅུར་བརྡ་ཐོ་བཏང་བ་ལྟར་ཁྲི་པ་ལྷ་ས་ནས་ཕེབས་ཁར་དེ་རྣམས་ཁྲི་པའི་བཞུགས་གནས་སུ་འབྱོར་བ་བྱས་ཏེ་རྩེ་དྲུང་རྣམས་ནས་འཕྱ་གྲུ་འཕྱ་སྟོད་གྱོན་པ་དང༌། དབྱར་ཁ་ཞྭ་དཀར་དང༌། དགུན་ཁ་སྒར་སྤུག་གྱོན་པ། ཤོད་དྲུང་རྣམས་རྒྱ་ལུ་ཆས་གྱོན༌། ཁྲི་པ་དེ་གྲྭ་ས་གང་ནས་ཡིན་ཡང་དེའི་གྲྭ་ཚང་དང༌། ཁང་ཚན་གྱི་ལས་སྣེ། དགའ་ལྡན་བླ་སྤྱིའི་འཐུས་མི། ཁྲི་ཐོག་ཁང་གི་མཛོད་པ། དགའ་ལྡན་གྱི་ཐོབ་ཁུངས་གྲྭ་ཚང་ཁང་ཚན་གྱི་ལས་སྣེ། ཁྲི་པ་སྒེར་གྱི་ཕྱག་མཛོད་དང༌། གསོལ་གཟིམ་བཅས་གཟབ་མཆོར་གང་ལེགས་ཐོག་དབུ་གདུགས་པས་དབུ་གདུགས་འཛིན་པ(གསོལ་ཐབ་པ་དང་དབུ་གདུགས་པ་རྨེ་རུ་དགོན་ནས་འཛུགས་དགོས)སོགས་ཆིབས་ཧྲག་གཟབ་རྒྱས་དང་བཅས་དགའ་ལྡན་དུ་ཕེབས་ཐོན་གྱིས་ལྷ་སའི་ཤར་ངོས་ཆབ་རྫིང་གླིང་ཀའི་བྱང་དུ་ཡོད་པའི་ཐང་སྡེར(དེང་སང་ཝ་པ་གླིང་སྣེ་འཛོམས་ཐོག་བརྩེགས་ཚོང་ཁང་ངམ་ཕྲེང་རིང་ཚོང་ཁང་ཡོད་ས)དེར་གཞུང་གི་ཐབ་སྐྱེལ་དབུ་གུར་དུ་ཕེབས་ནས་རྩེ་གསོལ་ཐབ་ནས་གསོལ་ཇ་ཇ་ཞུ་དང་དཀར་སྤྲོ་ཕེབས། དེ་ནས་ཕེབས་སྐྱེལ་ཆིབས་ཞབས་རྣམས་ལ་མཇལ་ཁ་གནང་རྗེས་ཁོང་རྣམས་རང་གནས་སུ་ཕྱིར་ཕེབས། ཁྲི་པ་སྐུ་འཁོར་དང༌། རྩེའི་སྐུ་ཚབ། སྣེ་ཤན་རྩེ་དྲུང༌། དགའ་ལྡན་གྱི་ལས་སྣེ་བཅས་ལྷ་གདོང་ཤན་ཁའི་ཀོ་གྲུ་དོན་ཏེ་དོ་ནུབ་བདེ་ཆེན་གསང་སྔགས་མཁར་དུ་ཕེབས་སྐབས་དེ་གའི་བླ་མ་ལས་སྣེ་དང༌། གྲྭ་དམངས་ནས་འཚམས་ཞུ་དང་སེར་སྦྲེངས་ཞུས་ཏེ་དོ་ནུབ་དེ་གར་བཞུགས་ཞག་མཛད། ཕྱི་ཉིན་སྔ་དྲོ་ཕེབས་ཐོན་གྱིས་གཙང་རྟོགས་གཞིས་ཀར་བཞུགས་ཞག་མཛད་པ་དང་སྣེ་ཤན་རྩེ་དྲུང་དང༌། ཁྲི་ཕྱག་སོགས་ནས་སྤོས་སྣེ་ཞུས་ཏེ་ཁྲི་པའི་བཞུགས་གདིང་དེ་སྤོམ་འབོར་ཚང་དུ་ཡོད་པའི་རྗེ་རིན་པོ་ཆེའི་བཞུགས་ཁྲིའི་སྟེང་དུ་སྒྲོན་པའི་མཛད་སྒོའི་སར་རྩེའི་སྐུ་ཚབ་ཀྱང་ཕེབས་ཀྱི་ཡོད། དེའི་སང་ཉིན་ཁྲི་པ་སྐུ་འཁོར་ཆིབས་ཧྲག་དང་བཅས་སྤོམ་འབོར་ཚང་དུ་ཕེབས་ནས་དེ་གར་རྗེ་ཙོང་ཁ་པས་གསོལ་ཞིབ་འཐག་པར་མཛད་པའི་རང་འཐག་ཆུང་ངུ་ཞིག་ཡོད་པ་དེར་ཁྲི་པ་རིམ་བྱུང་གིས་སྒྲིལ་རྫས་གོས་འབོག་རེ་ཕུལ་བ་དང༌། ཕྱི་སྒྲིལ་ཐོག་དམ་ཕྲུག་ཡོད་པར་རྩེའི་སྐུ་ཚབ་དང༌། དགའ་ལྡན་ཁྲི་པ། བླ་སྤྱི་བཅས་ཀྱིས་དམ་ཕྲུག་ལ་གཟིགས་ཞིབ་གནང་རྗེས་སྒྲིལ་རྫས་བཤིག་སྟེ་སྔོན་ནས་གྲ་སྒྲིག་ཟིན་པའི་གོས་ཆེན་གྱི་ཚོགས་ཁུག་གཅིག་གི་ནང་ཡོས་སྤུས་ལེགས་གང་ཡོད་པ་དེ་ཁྲི་པ་རང་གིས་འཐག་པར་མཛད། གསོལ་ཞིབ་ཞིབ་རྩིང་ལ་ཁྲི་པའི་སྐུ་ཚེ་མཛད་པ་ལེགས་ཉེས་བརྟག་དཔྱད་བྱེད་སྲོལ་ལྟར་རྩེའི་སྐུ་ཚབ་ནས་གསོལ་ཞིབ་ཚོགས་ཁུག་དེ་སྙན་ཞུ་དང་བཅས་ཏཱ་ལའི་བླ་མར་འབུལ་དགོས། མཛད་སྒོ་དེ་གྲུབ་མཚམས་རང་འཐག་ལ་སྒྲིལ་རྫས་གསར་འབུལ་ཐོག་དམ་ཕྲུག་བརྒྱབ་ནས་ཁྲི་པ་སྐུ་འཁོར་ཆིབས་ཧྲག་དང་བཅས་དགའ་ལྡན་དུ་ཕེབས་པའི་ལམ་ཤོམ་ལྤགས་ཐང་དུ་དགའ་ལྡན་བླ་སྤྱིའི་ཐབ་བསུའི་དབུ་གུར་དུ་ཕེབས་ནས་གསོལ་ཇ་བཞེས་འབྲས་བཏེགས་འབུལ་རྗེས་བླ་སྤྲུལ་ལས་སྣེའི་ཆིབས་ཧྲག་རྒྱས་གཤོམ་གྱི་ངང་དགའ་ལྡན་དགོན་པར་ཆིབས་བསྒྱུར་གནང་སྐབས་སེར་སྦྲེངས་དང་དུང་རྒྱའི་སྤྱན་འདྲེན་གཟབ་རྒྱས་ངང་དགོན་པའི་མདུན་གྱི་ཁྲོམ་ཁར་ཕེབས་མཚམས་ཆིབས་ལས་བཤོལ་ཏེ་ཏཱ་ལའི་བླ་མ་དང་དགའ་ལྡན་ཁྲི་པ་སོ་སོས་སྐུ་ཕྱག་གནང་ས་ཕྱག་སྟེགས་གཉིས་ཡོད་པ་ལས་ཁྲི་པའི་ཕྱག་སྟེགས་སྟེང་ནས་དགོན་པར་སྐུ་ཕྱག་གསུམ་གནང་རྗེས་སྤོས་སྣེ་ཕེབས་བསུ་དང་བཅས་ཐོབ་ཁུངས་ཁང་ཚན་དེར་བཞུགས་གནས་མཛད། གསེར་ཁྲིར་དངོས་སུ་ཕེབས་རྒྱུའི་སྔ་ཉིན་དུ་སྣེ་ཤན་རྩེ་དྲུང་དང༌། ཁྲི་ཐོག་ཁང་གི་མཛོད་པ། བླ་སྤྱི། གྲྭ་ཚང༌། ཁང་ཚན་གྱི་ལས་སྣེ་བཅས་ནས་སྤོས་སྣེ་དང་སྦྲགས་ཁྲི་པའི་བཞུགས་གདིང་གསེར་ཁྲི་ཁང་དུ་གདན་ཞུས་ཐོག་གསེར་ཁྲིའི་སྟེང་སྒྲོན་ནས་ཕྱི་ཉིན་ཞོགས་པ་སྔ་པོ་རྩེའི་སྐུ་ཚབ་སོགས་ནས་བཞུགས་གདིང་ལྷུང་བ་དང༌། སྒྲིལ་བ་སོགས་ཡོད་མེད་བརྟག་དཔྱད་ཀྱིས་ཏཱ་ལའི་བླ་མར་སྙན་ཞུ་འབུལ་དགོས(བཞུགས་གདིང་ཁྲི་ཐོག་ནས་ལྷུང་བ་དང༌། སྒྲིལ་བ་སོགས་བྱུང་ན་ཁྲི་པ་དེའི་སྐུ་ཚེའི་མཛད་པ་མཐའ་མི་འཁྱོལ་བའི་ངན་རྟགས་སུ་གྲགས)དེ་ཉིན་ཁྲི་པ་སྐུ་སྒེར་ནས་ཚོགས་ཆེན་དུ་མང་ཇ་དང༌། སྐུ་འགྱེད་གཟབ་རྒྱས་ཐོག་ཉི་མ་རི་རྩེར་ཤར་བ་དང་བསྟུན་སྣེ་ཤན་རྩེ་དྲུང་དང༌། བླ་སྤྱི། ཁྲི་ཕྱག དེ་མིན་བླ་སྤྲུལ་ལས་སྣེ་བཅས་ནས་སྤོས་སྣེ་དང༌། སེར་སྦྲེངས་བཅས་གསེར་ཁྲི་ཁང་དུ་ཕེབས་ཏེ་གསེར་ཁྲིར་ཞབས་སོར་འཁོད། རྩེའི་སྐུ་ཚབ་ཀྱང་མཛད་སྒོར་ཞུགས་ཐོག་ཚོགས་ཆེན་དབུ་མཛད་ཀྱིས་དབུ་སྐུལ་བཞིན་མཎྜལ་རྒྱས་པ་འབུལ་བ་དང༌། མཁན་པོ་བགྲེས་པ་དེས་མཎྜལ་བཤད་པ་ཕུལ། རྩེའི་སྐུ་ཚབ་ཀྱིས་ཕྱག་སྲུང་དང༌། མཇལ་དར་གནང་ཆ་རྣམས་ཕུལ་རྗེས་བླ་སྤྱིས་མཎྜལ་རྟེན་གསུམ་ཕུལ། ཁྲི་ཕེབས་མཛད་སྒོ་གྲུབ་རྗེས་ཁྲི་པའི་བཞུགས་གནས་ཁྲི་ཐོག་ཁང་དུ་ཕེབས་ནས་གཏན་བཞུགས་མཛད། དེ་ཉིན་ད་དུང་ཐོབ་ཁུངས་གྲྭ་ཚང་དང༌། ཁང་ཚན་ལ་ཡང་གསོལ་ཇ་དང་སྐུ་འགྱེད་གནང་སྲོལ་ཡོད། ཤར་བྱང་ཆོས་རྗེ་སུ་ཁྲི་པར་ཕེབས་རྗེས་རྒྱུད་གྲྭ་སྟོད་སྨད་ཀྱི་མཁན་ཟུར་བགྲེས་པ་དེར་རྩེ་འགག་ནས་ཆོས་རྗེ་གསར་པའི་བཀའ་བསྒྱུར་ཐོག་ཚེས་ཆ་སྟབས་བསྟུན་གྱིས་ཏཱ་ལའི་བླ་མར་བཀའ་བསྒྱུར་མཇལ་དར་ཕུལ་རྗེས་དགའ་ལྡན་དུ་ཕེབས་ཐོན་གྱིས་ཆོས་རྗེའི་ཁྲིར་ཕེབས་ཀྱི་མཛད་སྒོ་གནང་སྐབས་ཤར་བྱང་གྲྭ་ཚང་གང་ཡིན་དེར་གཏོང་སྒོ་གནང་སྲོལ་བཅས་ཡོད། དགའ་ལྡན་ཁྲི་པ་ལྷ་སར་བཞུགས་སྐབས་ཀྱི་མཛད་སྒོ་གཙོ་བོ་ནི། དུས་རབས་བཅུ་དྲུག་པའི་སྨད་ཆར་ཁྲི་ཐོག་ཉེར་གསུམ་པ་ཆོས་རྗེ་ཚེ་བརྟན་རྒྱ་མཚོ་ནས་བཟུང་ཁྲི་པ་རིམ་བྱོན་ལོ་ལྟར་ལྷ་ལྡན་སྨོན་ལམ་ཆེན་མོའི་ཚོགས་དབུར་ཕེབས་སྲོལ་བྱུང་བ་དང༌། ལྷ་སའི་སྨོན་ལམ་སྐབས་སྔ་དྲོ་གསུང་ཆོས་ར་བར་གསུང་ཆོས་དང༌། ཉིན་དགུང་སྐམ་ཚོགས་སུ་བསྔོ་སྨོན། གཏོར་རྒྱག་སྐབས་གཏོར་བརྒྱབ། བྱམས་པ་གདན་འདྲེན་ཉིན་ཁྲུས་གསོལ། ཇོ་བོ་རགས་རྒྱག་སྐབས་རབ་གནས་སོགས་ལ་དགའ་ལྡན་ཚོགས་ཆེན་ཞལ་ངོ་གཉིས་ནས་གསེར་ཟངས་ཀྱི་སྤོས་ཕོར་འཁྱེར་བ(སྤོས་འཛིན)དང་ཚོགས་ཆེན་དབུ་མཛད། ཇ་ཚུལ་སྡེ་པས་འབོག་ལྕག་འཁྱེར་བ(གཟིམ་འགག)ཁྲི་ཐོག་ཁང་གི་མཛོད་པ་དང༌། བླ་མ་སྨན་སྦྱིན་པ(སྨན་པ)སོགས་ནས་གོས་སྟོད་གྱོན་པ་བཅས་ཀྱི་ཐོག་འབྲས་སྤུངས་ཀྱི་དགེ་གཡོག་གཅིག་གིས་སྔོན་དུ་ལམ་བཤངས་རྗེས་གདུགས་དང༌། རྒྱལ་མཚན། རྔ་རོལ་སོགས་སེར་སྦྲེངས་དང༌། ཁྲི་པ་སྐུ་འཁོར་རྣམས་གྲལ་བསྟར་བསྒྲིགས་ཏེ་ཁྲི་པའི་སྐུ་རྒྱབ་ཏུ་དབུ་གདུགས་པས་དབུ་གདུགས་འཛིན་པ། ལོ་དེའི་དགེ་བཤེས་ལྷ་རམས་པ་ཚོས་དབུ་ཞྭ་སྒྲོ་ལྷུག་དང༌། ཆོས་གོས་གསོལ་ཞིང་སྐུ་རྒྱབ་ཏུ་ཕེབས། ཁྲི་པ་རང་ཡང་དབུ་ལ་པཎ་ཞྭ་སེར་པོ་དང༌། ཞབས་ལ་འཇའ་ཆེན་སེར་པོ་བཞེས་པ། གཏོར་རྒྱག་སྐབས་དབུ་ཞྭའི་མདུན་དུ་སྟོང་སྐུད་ནག་པོའི་དོམ་ར་གསོལ་བ་སོགས་མཛད། ལོ་ལྟར་བོད་ཟླ༡ཚེས༡༥ཉིན་གསུང་ཆོས་ར་བར་གསུང་ཆོས་དང༌། སྐམ་ཚོགས་ལ་བསྔོ་སྨོན་སོགས་ཏཱ་ལའི་བླ་མས་མཛད་སྲོལ་ཡང་ཏཱ་ལའི་བླ་མ་ལྷ་སར་མ་བཞུགས་པའམ། ཕེབས་མ་ཐུབ་ཚེ་དགའ་ལྡན་ཁྲི་པས་གནང་དགོས། དགའ་ལྡན་པའི་ལྗོངས་རྒྱུའི་མཛད་སྒོའི་ཉིན་ཁྲི་པས་ཆིབས་ཧྲག་དང་བཅས་ཏཱ་ལའི་བླ་མའི་མཇལ་ཁར་ཕེབས། རྒྱུན་གཏན་གཞུང་གི་ཞབས་བརྟན་གལ་ཆེ་དང་གཙུག་ལག་ཁང་དུ་སྟོང་མཆོད་འབུལ་མིའི་སྦྱིན་བདག་འགའ་ཞིག་གིས་དབུ་བཞུགས་སུ་གདན་དྲངས་ན་ཁྲི་པ་དང༌། ཤར་བྱང་ཆོས་རྗེ་རྣམས་ཕེབས་སྲོལ་ཡོད། སྨོན་ལམ་གྲོལ་རྗེས་དུས་རབས་བཅོ་བརྒྱད་པའི་ནང་དར་བའི་རྨེ་རུ་དཔྱིད་ཆོས་ཞེས་རྨེ་རུ་དགོན་པར་གསུང་ཆོས་ཉིན་བཅུ་གྲངས་ཤིག ཚོགས་མཆོད་སྐབས་སྨོན་ལམ་དང་འདྲ་མཚུངས་ཀྱི་གནང་སྒོ་ཁག སྨོན་ལམ་འཕར་མ་ཚུགས་པ་དང༌། ལྷ་སའི་གཙུག་ལག་ཁང་དུ་རབ་གནས་འཕར་མ་ཚུགས་ཚེ་དབུ་བཞུགས། བོད་ཟླ༤ཚེས༡༥ཉིན་ནོར་གླིང་གྲུ་འཛིན་ཕོ་བྲང་དུ་རྩེ་རྣམ་རྒྱལ་གྲྭ་ཚང་གི་དགེ་འདུན་པ་ཁག་གཅིག་གིས་སྤྱན་རས་གཟིགས་ཀྱི་ཆོ་ག་གནང་སར་དབུ་བཞུགས་སོགས་ལ་ཕེབས་དགོས། དགའ་ལྡན་དུ་དབྱར་གནས་སྐབས་ཁྲི་ཐོག་ཁང་གི་ཆོས་རར་ཁྲི་པ་དང༌། ཤར་བྱང་སོ་སོའི་ཆོས་རར་ཆོས་རྗེ་སོ་སོས་གསུང་ཆོས་གནང་དགོས། ཁྲི་པ་དགའ་ལྡན་ནས་ལྷ་ས་དང༌། ལྷ་ས་ནས་དགའ་ལྡན་སོགས་ལ་ཡར་མར་ཕེབས་སྐབས་གཞུང་ཞབས་སེར་སྐྱ་ཉི་ཤུས་ཆིབས་ཞབས་སུ་བཅར་ནས་ཆབ་རྫིང་གླིང་ཁའི་བྱང་ངོས་ཐང་སྡེར་དུ་ཕེབས་སྒྲིག་གི་དབུ་གུར་ཡོད་ས་བར་ཕེབས་བསུའི་ཆིབས་ཧྲག་ཏུ་བཅར་དགོས་པ་བཅས་ཡིན། དགའ་ལྡན་ཁྲི་པ་གནང་མཁན་རྣམས་སྐུ་གཤེགས་ཚེ་དགའ་ལྡན་དགོན་པར་གདུང་རྟེན་དངུལ་གདུང་རེ་བཞེངས་སྲོལ་ཡོད་ལ་གྲྭ་ས་སེ་འབྲས་ནས་ཡིན་པའི་ཁྲི་པ་རེ་འགའི་གདུང་རྟེན་དགའ་ལྡན་དུ་ཡོད་པ་མ་ཟད། སེ་འབྲས་ཀྱི་ཐོབ་ཁུངས་གྲྭ་ཚང་ངམ་ཚོགས་ཆེན་དུའང་དངུལ་གདུང་བཞེངས་པ་ཡོད། གདན་ས་གསུམ་གང་དུ་དགའ་ལྡན་ཁྲི་པ་རེ་བྱུང་ཚེ་དེའི་ཁང་ཚན་གྱི་ཡང་སྟེང་རྒྱལ་མཚན་རེ་འཛུགས་སྲོལ་དང༌། དགའ་ལྡན་དུ་ཁྲི་པ་བྱུང་བའི་ཁང་ཚན་དེ་ཚོས་ཚོམས་ཇ་ཚོགས་སྐབས་ཚོགས་བརྡ་ཡང་སྟེང་ནས་རོལ་མོ་དཀྲོལ་སྲོལ་འདུག ཏཱ་ལའི་བླ་མ་དང༌། པཎ་ཆེན་རིན་པོ་ཆེ་རྣམ་གཉིས་རབ་བྱུང་སྡོམ་བཞེས་དང༌། བསྙེན་རྫོགས་བཞེས་ཚེ་ཁྲི་པ་གདན(ལས་ཐོག)ཟུར་དང༌། ཆོས་རྗེ་གཉིས་ལས་གྲལ་དུ་ཕེབས་དགོས་ཐོག་ཁྲི་པ་རེ་འགས་ཡོངས་འཛིན་དང་མཁན་སློབ་གནང་བ་མ་ཟད། སྲིད་སྐྱོང་ཡང་གནང་མཁན་བྱུང་ཡོད། ཁྲི་ཐོག་དང་པོ་ནས་ཁྲི་ཐོག་བདུན་པ་བློ་གྲོས་བརྟན་པ་ཡན{{དེབ་ཐེར་སྔོན་པོ}}ལེ་ཚན་ལྔ་བཅུ་པའི་ཤོག་གྲངས༨པར་དང༌། ཁྲི་ཐོག་བཅུ་པ་ཡེ་ཤེས་བཟང་པོ་ཡན{{ཆོས་འབྱུང་གསལ་བའི་སྒྲོན་མེ}}ནང་གསལ། ཁྲི་ཐོག་ཞེ་དྲུག་པ་བཀའ་འགྱུར་བ་སྦྱིན་པ་རྒྱ་མཚོ་ཡན{{བཻཌཱུརྱ་སེར་པོ}}ཤོག་གྲངས༦༠ནས༧༨པར་གསལ། གཞན་ཡང་ཁྲི་ཐོག་ཉེར་དགུ་པའི་བར་གྱི་ལོ་རྒྱུས{{བསྟན་རྩིས་གསལ་བའི་སྒྲོན་མེའི}}ནང་གསལ། དེ་ནས་ཁྲི་ཐོག་དྲུག་བཅུ་རེ་ལྔ་པ་བར་ནི་མཁན་པོ་གྲགས་པ་མཁས་གྲུབ་ཀྱིས་བརྩམས་པའི་ཁྲི་པ་རིམ་བྱོན་གྱི་རྣམ་ཐར་རྒྱས་པོ་ཡོད་ལ། འགའ་ཞིག་བསྡུས་ཙམ། འགའ་ཞིག་ལ་གཏན་ནས་མི་སྣང༌། ཚིག་མཛོད་འདིའི་ནང་གོང་གསལ་དཔྱད་གཞི་ཁག་ནས་ཕྱོགས་བསྡུས་ཀྱིས་ཁྲི་ཐོག་དང་པོ་ནས་གསུམ་པ་བར་ཏེ་རྗེ་ཡབ་སྲས་གསུམ་གྱི་མཛད་རྣམ་མདོར་བསྡུས་ཀ་མད་གོ་རིམ་གྱི་སྡེ་ཚན་ཁུངས་སོ་སོའི་ནང་བཀོད་ཡོད་ལ་དགའ་ལྡན་ཁྲི་ཐོག་བཞི་པ་ནས་གོ་དྲུག་བར་གྱི་མཚན་བྱང་དང་མཛད་རྣམ་མདོར་བསྡུས་གོང་གསལ་ཁ་སྡེའི་ཁྲི་ཆེན་ཞེས་པའི་ནང་གཟིགས།
དུང་དཀར་ཚིག་མཛོད་ལས་བཏུས་པའོ།།
དགའ་ལྡན་ཁྲི་བ་རིམ་བྱོན་གྱི་མཚན་བྱང་།
1 རྗེ་ཙོང་ཁ་པ། 2 རྒྱལ་ཚབ་དར་མ་རིན་ཆེན། 3 མཁས་གྲུབ་དགེ་ལེགས་དཔལ་བཟང་། 4 ཞྭ་ལུ་བ་ལེགས་པའི་རྒྱལ་མཚན། 5 རྗེ་བློ་གྲོས་ཆོས་སྐྱོང་། 6 བ་སོ་ཆོས་ཀྱི་རྒྱལ་མཚན། 7 དྭགས་པོ་བློ་གྲོས་བརྟན་པ། 8 རྗེ་སྨོན་ལམ་དཔལ་བ། 9 རྗེ་དབོན་བློ་བཟང་ཉི་མ། 10 ཤར་རྗེ་ཡེ་ཤེས་བཟང་པོ། 11 ཤར་རྩེ་བློ་བཟང་གྲགས་པ། 12 བྱང་རྩེ་འཇམ་དབྱངས་ལེགས་པའི་བློ་གྲོས། 13 ཤར་རྩེ་ཆོས་ཀྱི་བཤེས་གཉེན། 14 བྱང་རྩེ་རིན་ཆེན་འོད་ཟེར། 15 པཎ་ཆེན་བསོད་ནམས་གྲགས་པ། 16 བྱང་རྩེ་རྒྱ་ར་ཆོས་སྐྱོང་རྒྱ་མཚོ། 17 ཤར་རྩེ་མི་ཉག་རྡོ་རྗེ་བཟང་པོ། 18 བྱང་རྩེ་ཆོས་རྗེ་རྒྱལ་མཚན་བཟང་པོ། 19 ཤར་རྩེ་ཆོས་རྗེ་ངག་དབང་ཆོས་གྲགས། 20 བྱང་རྩེ་སྟག་ཕུ་ཆོས་གྲགས་བཟང་པོ།  21 བྱང་རྩེ་ཆོས་རྗེ་དགེ་ལེགས་དཔལ་བཟང་། 22 བྱང་རྩེ་དགེ་འདུན་བསྟན་པ་དར་རྒྱས། 23 ཤར་རྩེ་ཆོས་རྗེ་ཚེ་བརྟན་རྒྱ་མཚོ། 24 བྱང་རྩེ་ཆོས་རྗེ་བྱམས་པ་རྒྱ་མཚོ། 25 ཤར་རྩེ་རྒྱལ་ཁང་རྩེ་དཔལ་འབྱོར་རྒྱ་མཚོ། 26 བྱང་རྩེ་ཆོས་རྗེ་དམ་ཆོས་དཔལ་བ། 27 ཤར་རྩེ་ཆོས་རྗེ་སངས་རྒྱས་རིན་ཆེན། 28 བྱང་རྩེ་ཆོས་རྗེ་དགེ་འདུན་རྒྱལ་མཚན། 29 ཤར་རྩེ་ཆོས་རྗེ་བཤེས་གཉེན་གྲགས་པ། 30 བྱང་རྩེ་སྟག་ལུང་བྲག་པ་བློ་གྲོས་རྒྱ་མཚོ།  31 ཤར་རྩེ་དམ་ཆོས་དཔལ་བཟང། 32 བྱང་རྩེ་ཚུལ་ཁྲིམས་ཆོས་འཕེལ། 33 ཤར་རྩེ་གྲགས་པ་རྒྱ་མཚོ། 34 བྱང་རྩེ་གསལ་ཁང་སྐུ་སྐྱེ། 35 ཤར་རྩེ་འཇམ་དབྱངས་དཀོན་མཆོག་ཆོས་འཕེལ། 36 བྱང་རྩེ་ཆོས་རྗེ་བསྟན་འཛིན་ལེགས་བཤད།  37 ཤར་རྩེ་དགེ་འདུན་རིན་ཆེན། 38 བྱང་རྩེ་དྭགས་པོ་ཆོས་ཀྱི་རྒྱལ་མཚན། 39 ཤར་རྩེ་དཀོན་མཆོག་ཆོས་བཟང་། 40 བྱང་རྩེ་བསྟན་པ་རྒྱལ་མཚན། 41 ཤར་རྩེ་བློ་བཟང་རྒྱལ་མཚན། 42 བྱང་རྩེ་བློ་བཟང་དོན་ཡོད། 43 ཤར་རྩེ་བྱམས་པ་བཀྲ་ཤིས། 44 བྱང་རྩེ་རྒྱ་ནག་པ་བློ་གྲོས་རྒྱ་མཚོ། 45 ཤར་རྩེ་ཚུལ་ཁྲིམས་དར་རྒྱས། 46 བྱང་རྩེ་བསམ་བློ་སྦྱིན་པ་རྒྱ་མཚོ། 47 ཤར་རྩེ་ཚུལ་ཁྲིམས་དར་རྒྱས། 47 ཤར་རྩེ་ཡང་སྟེང་པ་བློ་བཟང་ཆོས་འཕེལ། 48 བྱང་རྩེ་དོན་ཡོད་རྒྱ་མཚོ། 49 ཤར་རྩེ་བློ་བཟང་དར་རྒྱས། 50 བྱང་རྩེ་དགེ་འདུན་ཕུན་ཚོགས། 51 ཤར་རྩེ་དཔལ་ལྡན་གྲགས་པ། 52 བྱང་རྩེ་དྭགས་པོ་ཚེ་འཕེལ། 53 ཤར་རྩེ་རྒྱལ་མཚན་སེང་གེ 54 བྱང་རྩེ་ངག་དབང་མཆོག་ལྡན། 55 ཤར་རྩེ་ནམ་མཁའ་བཟང་པོ། 56 བྱང་རྩེ་བློ་བཟང་དྲི་མེད། 57 ཤར་རྩེ་བསམ་གཏན་ཕུན་ཚོགས། 58 བྱང་རྩེ་ངག་དབང་ཆོས་གྲགས། 59 ཤར་རྩེ་ངག་དབང་ཆོས་གྲགས། 60 བྱང་རྩེ་བློ་བཟང་བསྟན་པ། 61 ཤར་རྩེ་ངག་དབང་ཚུལ་ཁྲིམས། 62 བྱང་རྩེ་བློ་བཟང་སྨོན་ལམ། 63 ཤར་རྩེ་བློ་བཟང་མཁས་མཆོག 64 བྱང་རྩེ་བློ་བཟང་བཀྲ་ཤིས། 65 ཤར་རྩེ་དགེ་འདུན་ཚུལ་ཁྲིམས། 66 བྱང་རྩེ་ངག་དབང་སྙན་གྲགས། 67 ཤར་རྩེ་འཇམ་དབྱངས་སྨོན་ལམ། 68 བྱང་རྩེ་བློ་བཟང་དགེ་ལེགས། 69 ཤར་རྩེ་བྱང་ཆུབ་ཆོས་འཕེལ། 70 བྱང་རྩེ་ངག་དབང་ཆོས་འཕེལ། 71 ཤར་རྩེ་ཡེ་ཤེས་ཐར་འདོད། 72 བྱང་རྩེ་འཇམ་དཔལ་ཚུལ་ཁྲིམས། 73 ཤར་རྩེ་འཇམ་དཔལ་ཚུལ་ཁྲིམས། 74 བྱང་རྩེ་བློ་བཟང་ལྷུན་གྲུབ། 75 ཤར་རྩེ་གླིང་སྤྲུལ་ངག་དབང་ལུང་རྟོགས། 76 བྱང་རྩེ་མཁྱེན་རབ་དབང་ཕྱུག 77 ཤར་རྩེ་ཚུལ་ཁྲིམས་དར་རྒྱས། 78 བྱང་རྩེ་འཇམ་དབྱངས་དམ་ཆོས། 79 ཤར་རྩེ་བློ་བཟང་སྦྱིན་པ། 80 བྱང་རྩེ་གྲགས་པ་དོན་གྲུབ། 81 ཤར་རྩེ་ངག་དབང་ནོར་བུ། 82 བྱང་རྩེ་ཡེ་ཤེས་ཆོས་འཕེལ། 83 ཤར་རྩེ་བྱང་ཆུབ་ནམ་མཁའ། 84 བྱང་རྩེ་བློ་བཟང་ཚུལ་ཁྲིམས། 85 ཤར་རྩེ་བློ་བཟང་ཚུལ་ཁྲིམས་དཔལ་ལྡན། 86 བྱང་རྩེ་བློ་བཟང་རྒྱལ་མཚན། 87 ཤར་རྩེ་བསྟན་པའི་རྒྱལ་མཚན། 88 བྱང་རྩེ་མཁྱེན་རབ་ཡོན་ཏན་རྒྱ་མཚོ། 89 ཤར་རྩེ་སྙན་གྲགས་རྒྱ་མཚོ། 90 བྱང་རྩེ་བྱམས་པ་ཆོས་གྲགས། 91 ཤར་རྩེ་བློ་བཟང་རྒྱལ་མཚན། 92 བྱང་རྩེ་ཐུབ་བསྟན་ཉིན་བྱེད། 93 ཤར་རྩེ་ཡེ་ཤེས་དབང་ལྡན། 94 བྱང་རྩེ་ལྷུན་གྲུབ་བརྩོན་འགྲུས། 95 ཤར་རྩེ་བཀྲ་ཤིས་སྟོང་འདུས། 96 བྱང་རྩེ་ཐུབ་བསྟན་ཀུན་དགའ། 97 ཤར་རྩེ་ཐུབ་བསྟན་ལུང་རྟོགས། 98 བྱང་རྩེ་འཇམ་དཔལ་གཞན་ཕན། 99 ཤར་རྩེ་ཡེ་ཤེས་དོན་གྲུབ། 100 བྱང་རྩེ་བློ་བཟང་ཉི་མ། 101 ཤར་རྩེ་ལུང་རིགས་རྣམ་རྒྱལ། 102 བྱང་རྩེ་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ། 103 ཤར་རྩེ་བློ་བཟང་བསྟན་འཛིན། 104 བྱང་རྩེ་བློ་བཟང་བསྟན་འཛིན་བཅས་སོ།།

བརྒྱུད་སྐུལ།

མཆན་སྤེལ།