དམངས་སྲོལ་དོ་ར། དུས་བཞིའི་གལ་ཆེའི་སྲོལ་རྒྱུན་གྱི་སོ་ནམ་བྱེད་སྒོ། 61-65 བར།

དམངས་སྲོལ་དོ་ར། དུས་བཞིའི་གལ་ཆེའི་སྲོལ་རྒྱུན་གྱི་སོ་ནམ་བྱེད་སྒོ། 61-65 བར།

ས་བཅད་བཞི་པ། དུས་བཞིའི་གལ་ཆེའི་སྲོལ་རྒྱུན་གྱི་སོ་ནམ་བྱེད་སྒོ། ༼༦༡༽

ལེའུ་དྲུག་པ། དགུན་དུས་ཞིང་ལ་གཡོག་གཅེས་བྱེད་སྟངས།

ས་ཞིང་བརྔས་ཚར་རྗེས་ས་སློག་ཐེངས་གཅིག་བྱེད་པ་དང་། མཐའ་བརྟན་ཞེས་ཆུ་ཐེངས་གཅིག་གཏོང་དགོས་ཤིང་། དེ་རྗེས་དགུ་ཚུགས་དུས་ཀྱི་གནམ་གཤིས་གྲང་བའི་སྒང་ལ་ཡང་བསྐྱར་ཐ་ཆུ་(འཁྱགས་ཆུ་)ཐེངས་གཅིག་གཏོང་གི་ཡོད། དེ་ཡང་མཐའ་བརྟན་ཆུ་གཏོང་དགོས་པའི་རྒྱུ་མཚན་ནི། ཆུ་མ་བཏང་གོང་ས་སློག་ཚར་ཙམ་ཡིན་པས་ཆུ་དེ་གཏིང་རིང་པོར་ས་འོག་ཏུ་ཚོས་ཐུབ་པས་རེད། མ་ཟད་གནའ་བོའི་གཏམ་དཔེར་ཡང་། མི་འཇམ་པོས་བཏུལ། ཞིང་མཐའ་ཆུས་བཏུལ། ཞེས་ཟེར་སྲོལ་ཡོད། འཁྱགས་ཆུ་ནི་དགུན་གྲང་ངར་ཆེ་དུས་གཏོང་བ་ཞིག་ཡིན་པས་འཁྱགས་པ་བརྒྱབ་པའི་ས་དེ་དཔྱིད་ཀ་ས་སློག་བྱེད་སྐབས་ས་རྒྱུ་སོབ་སོབ་ཆགས་ཤིང་། ལྷག་པར་དུ་སྦྱག་སློག་བརྒྱབ་པའི་ས་ཞིང་ཡིན་ཕྱིན་དཔྱིད་ཀ་སྨོན་ཐེངས་གཅིག་དང་ཆུ་ཐེངས་གཅིག་ལས་གཏོང་མི་དགོས་པའི་དགེ་མཚན་ལྟན་ཡོད།
ཞིང་ནང་དུ་ས་རྒྱག་རྒྱུ་དེ་ཡང་གལ་འགངས་ཀྱི་ལས་ཀ་ཞིག་སྟེ། སས་ས་བཟའ་བ་དང་། ཤས་ཤ་བཟའ་བ་ཞེས་ཞིང་ས་བྱེ་ས་ཅནལ་གད་ས་རྒྱག་དགོས་པ་དང་། ཞིང་ས་གད་ས་ཅན་བྱེ་ས་བརྒྱབ་ནས་ས་རྒྱུ་གཤིན་དུ་འགྲོ་ཐུབ།ལུད་ལ་དབྱེ་ན་ཚ་ལུད་དང་གྲང་ལུད་ཅེས་ཁག་གཉིས་ལ་དབྱེ་བ་ལས་ཚ་ལུད་ཀྱི་རིགས་ལ་རྟ་བོང་གི་ལུད་དང་། དམར་ལུད་(མིའི་ལུད་)ར་ལུག་གི་ལུད་བཅས་དང་། གྲང་ལུད་གཙོ་བོ་ནི་བ་ལུད་ཡིན། ཞིང་ས་གད་ས་ཅན་ལ་ཚ་ལུད་རྒྱག་དགོས་པ་དང་། ཞིང་ས་བྱེ་ས་ཅན་ལ་གྲང་ལུད་རྒྱག་དགོས་ཀྱི་ཡོད།

 

ས་བཅད་བཞི་པ། དུས་བཞིའི་གལ་ཆེའི་སྲོལ་རྒྱུན་གྱི་སོ་ནམ་བྱེད་སྒོ། ༼༦༢༽

ལེའུ་བདུན་པ། སོན་འབྲུའི་གོ་རིམ་བརྗེ་སྟངས།

སྤྱིར་བོད་དབུས་ཁུལ་དུ་འདེབས་ལས་བྱེད་པའི་སོན་འབྲུ་གཙོ་བོ་ནི་གྲོ་ནས་སྲན་གསུམ་དང་། པད་ཁ་བཅས་ཡིན་ཞིང་། དེའི་ཞར་བྱུང་དུ་བྲ་བོ་དང་ཞོག་ཁོག ལ་ཕུག་སོ་མ་ར་ཛྰ་སོགས་འདེབས་ཀྱི་ཡོད།  སྤྱིར་ན་ཞིང་ཁ་གཅིག་ལ་ལོ་ལྟར་ནས་སམ་པད་ཁ། གྲོ་དང་སྲན་མ་སོགས་འདེབས་སྲོལ་མེད་ཅིང་། དེ་ཡང་ལོ་རེའི་སོན་འབྲུའི་འབབ་ཆེ་ཆུང་དང་། ཁྱད་ཆོས་ལ་གཞིགས་ནས་སོན་འབྲུ་བརྗེ་བ་དཔེར་ན། ད་ལོ་ཞིང་ཁ་ཞིག་ལ་སྲན་མ་བཏབ་ཡོད་ན་ཕྱི་ལོ་ཞིང་ཁ་དེར་ནས་ཀྱི་སོན་འབྲུའི་ནང་ནས་ཆེས་ཡག་ཤོས་དང་ལྗིད་ཤོས་ཤིག་རྒྱག་གི་ཡོད་ཅིང་། སད་སེར་དང་མུ་གེ་ཤུགས་ཆེན་མ་བྱུང་ན་ཕྱི་ལོ་ཞིང་དེར་གྲོ་འདེབས་པ་དང་། གྲོ་དེ་ས་རྒྱུར་གནོད་པ་ཆེ་བས་ཞིང་ས་དེ་འཐུལ་བའམ་གཤིན་ཏུ་འགྲོ་ཆེད་སླར་ཡང་སྲན་མའམ་ཞོག་ཁོག་འདེབས་ཀྱི་ཡོད་པ་ལྟ་བུ་ནི་ལོ་རེའི་སོན་རྒྱུ་མ་གཅིག་པར་གཞིགས་ནས་ཞིང་ས་ལེགས་བཅོས་དང་ཐོན་འབབ་སྙོམ་སྒྲིག་བྱེད་པ་ཡིན་ནོ། དེ་ཡང་ཕུ་ལ་སོན་རྒྱུ་བརྗེས་ནས་ཐོན་འབབ་སྙོམ་སྒྲིག་བྱེད་པ་དང་མདའ་ལ་སྦྱར་བཟོ་བརྒྱབ་ནས་ས་རྒྱུ་ལེགས་བཅོས་དང་ཐོན་འབབ་སྙོམ་སྒྲིག་བྱེད་པ་གཉིས་དོན་གཅིག་གོ།

 

ས་བཅད་ལྔ་པ། འབྲོག་ལས་ཀྱི་སྲོལ་རྒྱུན་བྱེད་སྒོའི་སྐོར། ༼༦༣༽

 

འབྲོག་ལས་ཀྱིས་བོད་མི་རིགས་ཀྱི་སྲོལ་རྒྱུན་ཐོན་སྐྱེད་ལས་རིགས་ཁྲོད་གནས་བབ་ངེས་ཅན་བཟུང་ཡོད་ལ། བོད་མིའི་དུས་རྒྱུན་གྱི་འབྲོག་ལས་ཐོན་སྐྱེད་ནང་སྲོལ་རྒྱུན་གྱི་བྱེད་སྒོ་འདྲ་མིན་སྤེལ་གྱི་ཡོད་ཅིང་། དེ་དག་གིས་འབྲོག་ལས་འཕེལ་རྒྱས་དང་ནོར་གནག་ལུག་ཁྱུ་སོགས་ལ་གཅན་གཟན་དང་དགྲ་ཇག་གི་གནོད་པ་མི་ཡོང་རྒྱུར་རྟགས་དང་རྟེན་འབྲེལ་རྫོགས་པར་བརྩེ་སྲོལ་ཡོད། ལེའུ་དང་པོ། ལུག་ཁྱུའི་ཕ་སྦྱོར་གྱི་དུས་ཚོད་དང་རྟགས་རྟེན་འབྲེལ་སྐོར། ལུག་ཁྱུར་ཕ་སྦྱོར་གྱི་དུས་ཚོད་ནི་སྤྱིར་བོད་ཟླ་བརྒྱད་པའམ་བོད་ཟླ་དགུ་པའི་ཡས་མས་ལ་གཏོང་བ་དང་། དེ་ཡང་ཕ་སྦྱོར་བྱེད་པའི་ཕོ་ལུག་གི་སྤུ་དཔྱད་ལ་ཆ་རྐྱེན་ངེས་ཅན་ཡོད་པ་ནི། བལ་འཇམ་པ་དང་གདོང་རིས་ལེགས་པ་སོགས་དགོས་ཏེ། ཕོ་ལུག་ནག་པོ་ཡིན་ན་ལུས་ཡོངས་ནག་པོ་དང་མགོ་བོ་དཀར་པོ་ཡིན་པ་གང་ཞིག མིག་གི་མཐའ་འཁོར་སྐྱ་ཙམ་ཡིན་དགོས་པ་བཅས་ནི་ནག་པོའི་ནང་གི་རྩེ་གྲར་བརྩི་བ་དང་། དེར་ནག་སྐྱ་རྒོད་མགོ་ཟེར་བ་རེད། དཀར་པོའི་ཆ་རྐྱེན་ནི་སྐྱ་བ་མང་ལ་སུག་གཙང་དཀར་ཞེས་མ་དཀར་པོ་ཡིན་པ་ལ་སུག་ལག་བཞི་པོ་དེ་བས་དཀར་ཞིང་མཇིང་པ་ནག་པོ་ཡིན་པ། མིག་ལ་གྲ་མིག་ཅེས་མིག་མཐའ་དཀར་པོ་བཅས་ཡིན་དགོས། སྤྱིར་ཕ་ལུགས་འདེམས་སྐབས་ཕོ་ལུག་འབའ་ར་(གདོང་ལ་འབའ་ར་ཡོད་པ་)དང་། ལྷག་ལུག་ག་མོ་(མགོ་ལུས་རྐང་གསུམ་དཀར་པོ་ཡིན་པ་)སྐྱ་བོ་སུག་གཙང་། ནག་སྐྱ་རྒོད་མགོ་སོགས་བདམས་ནས་ཕ་ལུག་ལ་འཇོག་གི་ཡོད། ཉིན་དེར་ཚེས་ཆ་བཟང་བ་དང་གང་རུང་ཞིག་བདམས་ནས་ཕོ་ལུག་ལ་གཡང་བཙག་ཅེས་ས་འོག་ནས་བཏོན་པའི་ས་དམར་པོ་བྱུགས་པ་དང་ཕོ་ལུག་གི་རྭ་ཅོར་མར་རྒྱན་བསྒྲོན་པ་དང་། ཆང་དང་ཕྱེ་མར་སྟེར་བ་བཅས་བྱས་ནས་ཞལ་ཕྱོགས་གཙང་ལ་སློག་སྟེ་ལུག་ཁྱུའི་ཁྲོད་དུ་གློད་ཀྱི་ཡོད། མཚོ་སྨད་རྫོང་གྲི་གུ་ཁུལ་དུ་ཕ་སྦྱོར་གྱི་ཉིན་མོ་མ་མོ་འཚོ་འཁན་གྱི་ལུག་རྫིའི་བླ་གཟའ་འཁེལ་བའི་ཉིན་མོའམ་ཡང་ན་རེས་གཟའ་མིག་དམར་ལ་གཏོང་བ་སྟེ། མིག་དམར་ཕྱུགས་ཀྱི་གཡང་ཞེས་དུས་ཚོད་དེ་ལྟར་འདེམས་པར་བྱེད། ཕ་སྦྱོར་གྱི་ཉིན་དེར་ལུག་བདག་ཚང་མ་རང་རང་ལུག་ཁག་གཞིར་བཟུངའཛོམས་ནས་རང་དགར་ཇ་ཆང་གི་སྟོན་མོར་རོལ་ནས་ཉིན་གང་པོར་སྡོད་སྲོལ་ཡོད།

 

ས་བཅད་ལྔ་པ། འབྲོག་ལས་ཀྱི་སྲོལ་རྒྱུན་བྱེད་སྒོའི་སྐོར། ༼༦༥༽

ལེའུ་གསུམ་པ། འབྲོག་ཁུལ་གྱི་སྤུ་ནག་འཚོ་སྐྱོང་གི་སྲོལ་རྒྱུན་བྱེད་སྒོའི་སྐོར།

འབྲོག་ཁུལ་དུ་སྤྱིར་བོད་ཟླ་ལྔ་པའི་ཟླ་མཇུག་དང་དྲུག་པའི་ཚེས་ཤར་ནས་མདོང་གྲལ་སྒྲིག་ཞེས་རྟེན་འབྲེལ་བྱེད་སྲོལ་ཡོད་ཅིང་། དེ་ནས་བཟུང་བེའུ་རྣམས་ཉིན་མོ་ཁ་ལ་ཤིང་གི་ཁ་རུ་གཡོགས་པ་དང་མཚན་མོ་བེའུ་འདོགས་སར་བཏགས་ནས་འཇོག་ལ། འོ་གསར་དངོས་སུ་བཞོ་བ་དང་དཀྲོག་པའི་འགོ་ཡང་ཚུགས་པ་དང་། དབྱར་ཟླ་བཞིའི་བྲེལ་འཚུབ་ཀྱི་ལས་འགོ་དངོས་སུ་ཟིན་པར་བརྩི། མཚོ་སྨད་སོགས་ཀྱི་ཁུལ་དུ་འཁོར་བཞོས་ཀྱང་ཟེར་སྲོལ་ཡོད་ཅིང་། ཐོག་བཞོས་དང་ཐོག་ཆུང་། བཅད་དང་བཅད་ཆུང་ཞེས་ཡུལ་འགའ་རེར་ནམ་ཕྱེད་ཆུ་ཚོད་གསུམ་པ་ནས་འགོ་བཙུགས་ཏེ་འོ་མ་ཐེངས་བཞི་ཙམ་འཇོ་སྲོལ་ཡོད། ཡིན་ནའང་ས་ཆ་མང་ཆེ་བར་སྔ་བཞོས་དང་དགོང་བཞོས་མ་གཏོགས་འཇོ་སྲོལ་མེད་པ་རེད། སྤྱིར་འབྲོག་ཁུལ་དུ་དབྱར་ཟླ་བཞིའི་རིང་ལྒང་བུ་དང་ཉུང་མ་སོགས་འཁྱེར་མི་རུང་བ་དང་འཁྱེར་ན་དཀར་ཆག་འགྲོ་བར་བརྩི་བ་རེད། དེ་བཞིན་འབྲོག་པ་རྣམས་གནས་གཅིག་ནས་གནས་གཞན་དུ་སྐྱས་སྤོས་འགྲོ་སྐབས་ཐབ་སྟོང་པར་འཇོག་སྲོལ་མེད་ལ། ཐབ་ཤུལ་དུ་རྡོ་གཡམ་བཀབ་པ་དང་བསུར་གཏོང་དགོས་ཤིང་། གནས་གཞན་དེར་སླེབས་མ་ཐག་བསང་དང་བསུར་དང་བསུར་བཏང་གནས་དེར་ཁ་དྲོ་བཀྲ་ཤིས་ཡོང་བའི་སྨོན་ལམ་འདེབས་པར་བྱེད། ད་དུང་སྦྲ་ཕུབ་པའི་དུས་སུ་ཚེས་གསར་ཡིན་པས་ཁ་དྲོ། ཚེས་རྙིང་ཡོན་པས་གཡང་ཁུག ཅེས་ཟེར་བ་དང་ཕུར་བུ་འདེབས་སྐབས་ཀྱང་། ས་གཟུར། རྡོ་གཟུར། ཨ་འབྲོག་དགའ་བའི་དགའ་ཕུར་འཛུགས། ཞེས་ཟེར་སྲོལ་ཡོད། ཁྱབ་ཆེ་ས་ནས་བཤད་ན་འབྲོག་ཁུལ་གྱི་གཏན་དགྲ་གཙོ་བོ་ནི་སྤྱང་ཀི་ཡིན་པས། འབྲོག་ཁྱིམ་དུ་སྤྱང་ལབ་བརྒྱབ་ན་སྤྱང་ཀི་ཡོང་ཞེས་སྡུག་པར་བརྩི་བས་སྤྱང་ཀིར་མིང་ཐད་ཀར་མི་འབོད་པར། འགའ་རེས་དགྲ་ཆགས་དང་འགའ་རེས་གད་རོ་སོགས་འབོད་པ་དང་། མངའ་རིས་ས་ཁུལ་དུ་ཀིར་ཡོག་པ་དང་འཁྱམ་པོ་སོགས་འབོད་ཀྱི་ཡོད།ཡོང་ཁུངས། ཡར་ཀླུང་སྤྲིན་ཆར།

 

 

བརྒྱུད་སྐུལ།

མཆན་སྤེལ།