བཀའ་བརྒྱུད་པའི་གདན་ས་སྤར་ཕུ་རིན་ཆེན་གླིང་།

བཀའ་བརྒྱུད་པའི་གདན་ས་སྤར་ཕུ་རིན་ཆེན་གླིང་།

བཀའ་བརྒྱུད་པའི་གདན་ས་སྤར་ཕུ་རིན་ཆེན་གླིང་ནི། སྟོད་ལུང་བདེ་ཆེན་རྫོང་ནས་ནུབ་ངོས་སྣུམ་ནག་འཁོར་ལམ་བརྒྱུད་དེ་སྤྱི་ལེ་བཞི་ཙམ་བསྐྱོད་ན་འཁོར་ལམ་དང་ཅུང་ཉེ་བའི་ལྷོ་ངོས་ན་༸རྒྱལ་དབང་སྐུ་ཕྲེང་གསུམ་པ་བསོད་ནམས་རྒྱ་མཚོ་མཆོག་འཁྲུངས་ཁང་ཆོས་ཁང་དམར་པོ་ཞེས་པ་དང་། དེ་ནས་མུ་མཐུད་སྤྱི་ལེ་བཅུ་གཅིག་ཙམ་སོང་ན་སྣང་རྩེ་སྐུ་འབུམ་མམ་དབུ་མགུལ་མཆོད་རྟེན་ཞེས་མི་དབང་སྡེ་སྲིད་སངས་རྒྱས་རྒྱ་མཚོ་མཆོག་གི་དབུ་ཤོར་སའི་མཆོད་རྟེན་གསར་བཞེངས་གནང་བ་དང་། དེ་དང་ཉེ་བའི་ནུབ་ངོས་སུ་སྣང་རྩེ་རྒྱལ་ཁང་ཞེས་པའང་ཡོད་པ་དེ་ནས་མུ་མཐུད་སྤྱི་ལེ་ལྔ་ཙམ་སོང་ན་ལུམ་པ་ཟམ་པར་འབྱོར།

ལུམ་པ་ཟམ་པ་ཞེས་པ་ནི། སྔོན་ཁྱུང་པོ་སྤོ་རིང་པོས་ཧོར་གྱི་དམག་དཔོན་བྱས་པའི་སྡིག་སྦྱོངས་སུ་སྟོད་ལུང་ལུམ་པའི་ལྷ་ཁང་བཞེངས་ཞེས་ཟམ་པ་དེའི་ཤར་ངོས་བྲག་ཟུར་གྱི་སྟེང་དུ་རྩིག་ཤུལ་ཞིག་ཡོད་པས་རྗེས་སུ་ལྷ་ཁང་གི་མིང་ཡང་ཟམ་པར་ཐོགས། ཟམ་པ་དེ་ནས་སྤྱི་ལེ་གསུམ་ལྷག་ཙམ་སོང་ན་སྤ་ར་གྲོང་ཚོའི་ལྟག་ཏུ་དགོན་དེ་མཇལ་རྒྱུ་ཡོད།

དགོན་དེ་ནི་ཐོག་མར་རྗེ་ཕག་མོ་གྲུ་པའི་སྲས་ཀྱི་ཐུ་བོ་སྤར་ཕུ་བ་བློ་གྲོས་སེང་གེ་ཞུ་བས་སྤྱི་ལོའི་དུས་རབས་བཅུ་གཉིས་པའི་དུས་མཇུག་ཏུ་ཕྱག་བཏབ། བཀའ་བརྒྱུད་ཀྱི་གྲུབ་མཐའ་འཛིན་པ་ལ་རྗེས་སུ་ས་ལུགས་ཀྱང་ཡུན་རིང་དར། དེ་རྗེས་སྡིངས་ཁ་སྤྱི་ལུང་བ་ཡོན་ཏན་བཟང་པོ་བླ་མར་འཁོད་པ་ནས་བཟུང་དགོན་དེ་ནི་རི་བོ་དགེ་ལྡན་པར་གྱུར། མཚོ་སྣ་བ་ངག་དབང་བསམ་གཏན་སོགས་ཀྱིས་ཀྱང་གདན་ས་བསྐྱངས། 


དུས་རབས་བཅུ་བདུན་པར་སྡེ་སྲིད་སངས་རྒྱས་རྒྱ་མཚོས་བོད་ཀྱི་དགེ་ལྡན་ཡོངས་རྫོགས་ལ་ཞིབ་བཤེར་དང་འབྲེལ་བེེཌཱུརྱ་སེར་པོ་ལྗགས་རྩོམ་གནང་བའི་སྐབས་སྤར་ཕུའི་གདན་ས་དགའ་ལྡན་ཞོལ་པ་དགེ་འདུན་བསོད་ནམས་ཀྱིས་འཛིན་སྤེལ་གནང་བའི་དུས་སུ་དགོན་དེར་དགེ་འདུན་ཞལ་གྲངས་ལྔ་བརྒྱ་ལྷག་ཙམ་གྱིས་འདོན་གཅོད་རྒྱུད་སྨད་གྲྭ་ཚང་དང་བཞེད་པ་མཚུངས། ལྷག་ཏུ་དགོན་དེར་ཟླ་རེའི་ཚེས་ ༨ ལ་སྨན་བླའི་ཆོ་ག་གཏོང་གནང་གིས་སྨན་རྩིས་ཁང་ནས་འཚོ་བྱེད་ཕེབས་ཏེ་སྨན་སྒྲུབ་གནང་སྲོལ་དང་། སྨན་སྒྲུབ་སྐབས་ཀྱི་བུམ་པ་དང་། གསོལ་སྨན་གྱི་ཁ་ཡིག་དཔར་ཤིང་། འདུ་ཁང་ཀ་བ་ཉེར་བཞིའི་ནང་རྟེན་གཙོ་སྨན་འདམ་གྱི་རྒྱལ་བ་བྱམས་པ་ཐོག་སོ་གཉིས་ལྡན་དང་། སྨན་བླ་བདེ་གཤེགས་བརྒྱད་མི་ཚད་མ། ཕག་གྲུའི་སྐུ་བརྙན། སྤར་ཕུ་སྒྲུབ་ཐོབ་ཀྱི་སྐུ་བརྙན། བསྟན་མ་ཁང་ནང་འཇིམ་གྱི་ཐུབ་དབང་གི་སྐུ་བརྙན་དང་། མགོན་པོ་ཕྱག་དྲུག བསྟན་མ་བྲག་རྒྱལ་མའི་སྐུ་བརྙན། གཞན་ཡང་སྤར་ཕུ་སྒྲུབ་ཐོབ་ཀྱི་སྒྲུབ་རྟགས་རླུང་གིས་བསྐོར་བའི་རང་འཐག་དང་། རྡོའི་རྟ། ཆུ་སྣོད་ཁ་བཅིངས་པ་སོགས་མཇལ་རྒྱུ་ཡོད་གསུངས།

 

ད་ལྟ་སྔོན་གྱི་བསྟན་མ་ཁང་གསར་བཞེངས་གནང་བའི་ནང་། འཇིམ་གྱི་ཐུབ་དབང་གི་སྐུ་བརྙན་མི་ཚད་མ་དང་། གུ་རུའི་སྐུ་བརྙན། རྗེ་ཡབ་སྲས་གསུམ། ཚེ་དཔག་མེད། མགོན་ཆོས་ལྷ་གསུམ། བསྟན་སྲུང་བསེ་ཁྲབ་སོགས་བརྐྱང་ཁྲུ་གང་ལྷག་གསར་བཞེངས་གནང་བ་དང་། བཀའ་འགྱུར་དང་འབུམ་གསར་བླུ་གནང་བ་སོགས་མཇལ་རྒྱུ་ཡོད།

 

ཆོས་འཕེལ་གནས་ཡིག་ལས་དྲངས། པར་པ། གསོན་མིག་གིས་དེ་རིང་བླངས་པའི་པར་ཡིན།

བརྒྱུད་སྐུལ།

མཆན་སྤེལ།