བཙན་པོའི་བང་སོ་རྩིག་སྟངས་དང་དེའི་ནང་གི་གྲུབ་ཆའི་སྐོར།

བཙན་པོའི་བང་སོ་རྩིག་སྟངས་དང་དེའི་ནང་གི་གྲུབ་ཆའི་སྐོར།

རྩོམ་པ་པོ། ཤར་མཚམས་སྤྲིན།

 

བོད་རྒྱལ་བཙན་པོའི་བང་སོ་རྩིག་སྟངས་ཀྱི་སྐོར་ནི་སྲོང་བཙན་ཡན་ལ་རྨུ་ལུགས་སམ་བོན་ལུགས་སུ་བརྩིགས་པ་ཡིན་པར་བཤད་ཅིང་། དེ་ནས་ཟུར་བཞི་ཅན་ནང་བའི་ལུགས་སུ་བརྩིགས་པར་བཤད། རྨུ་ལུགས་ཀྱི་བང་སོ་རྩིག་སྟངས་ཇི་འདྲ་ཡིན་གསལ་བོ་མ་ངེས་ཀྱང་སྲོང་བཙན་ཡན་གྱི་རྒྱལ་པོ་འགའི་བང་སོ་ནི་འཕུལ་མེད་ས་ཕུང་འདྲ་བ་ཡོད་པར་བཤད་པ་ལྟར་ས་ཕུང་གི་རྣམ་པ་ལྟ་བུ་རྒྱས་སྤྲོས་ཆེར་མེད་པ་ཞིག་ཡིན་ནམ་སྙམ། བོན་གཞུང་དུ། ཕོ་ཡི་དུར་དང་མཁར་གྱི་ས།། མཐོ་ལ་རྔམ་པ་བཟང་བ་ནི།། ཞེས་འབྱུང་བ་དང་སྟེང་གཉིས་བང་སོ་གཡའ་དང་རྫ་ལ་བཏབ་ཅེས་པ་སོགས་ལ་བསམ་གཞིག་བྱ་རྒྱུ་ཡོད། འཇིགས་མེད་གླིང་པའི་གཏམ་ཚོགས་ལས་བྱུང་བའི་མགར་གྱིས་བཀོད་པའི་བང་སོའི་དཀར་ཆག་ལས་སྲོང་བཙན་བང་སོའི་རྩིག་སྟངས་དང་ནང་དུ་ཅི་ཡོད་ཀྱི་སྐོར་ནི། སྲོང་བཙན་བང་སོ་ཆུ་བོའི་མདའ་རུ་ཆགས། །ཆེ་ཆུང་ཚད་ནི་དཔའ་ཆེན་མདའ་རྒྱང་གང༌། །སྟེང་གི་ཞེང་ནི་ཉག་གི་རྡོ་རྒྱང་གང༌། །ནང་དུ་ལྷ་ཁང་ལྔ་ཡི་བཞུགས་སུ་གསོལ། །བང་སོ་ནང་རྒྱན་ཅན་དུ་གྲགས་པ་ཡིན། །གསང་བའི་མཚན་ནི་མུ་རི་སྨུག་པོ་ཞེས། །འཛམ་བུ་གླིང་གི་ནོར་ཕུད་ལན་གསུམ་བསྡུས། །ལྷ་ཀླུ་མི་ཡི་སྐྱེ་འགྲོའི་བདེ་སྐྱིད་བསྐྲུན། །ལྷ་ཡི་རིན་ཆེན་སྣ་ལྔ་དང་།། ཀླུ་ཡི་རིན་ཆེན་སྣ་ལྔདང་།། མི་ཡི་རིན་ཆེན་སྣ་ལྔ་སོགས།། ས་བཅུང་གསོ་ཞིང་སྐྱེ་འགྲོའི་བདེ་ཐབས་བསྐྲུན།།

ཞེས་སོགས་ཞིབ་པར་འབྱུང་བ་བཞིན་སྟེ་འཛམ་གླིང་ནོར་ཕུད་ལན་གསུམ་བསྡུས་ཞེས་པ་ནི་མཐའ་བཞིའི་རྒྱལ་པོ་སོགས་ཀྱིས་སྐྱེས་སུ་ཕུལ་བའི་དཀོར་ནོར་རྩ་ཆེན་དག་གི་མིང་ཡིན་ཞིང་། དཔེར་ན། རྒྱ་གར་རྒྱལ་པོའི་ནོར་གྱི་སྙིང་ཐོབ་པ།། ཨུ་ཊ་ཡ་ནའི་ཁྲབ་ཀྱི་རྒྱལ་པོ་གཅིག ། བྱང་བུ་རེ་ལ་གསེར་སྲང་བྱེ་བ་རི།། དེ་ནི་ནུབ་ཀྱི་ཕྱོགས་ན་ཆེས་བཟང་བ།། རིན་ཆེན་ཟངས་ཀྱིས་བསྒྲིལ་ཏེ་སྦས་ནས་ཡོད།། རི་རྒྱལ་ལྷུན་པོའི་ཕྱོགས་ནས་རྙེད་པ་ཡིན།། རྒྱ་ནག་རྒྱལ་པོའི་ནོར་གྱི་སྙིང་ཐོབ་པ།། རིན་ཆེན་བྱུ་རུའི་རྒྱལ་མོ་ལག་གཡས་པ།། ཁྲུ་བརྒྱད་ཡོད་པའི་འོད་ཟེར་འབར་བ་ཞིག། མར་མེའི་ཚུལ་བྱས་བྱང་གི་ཕྱོགས་ན་ཡོད།། རྒྱལ་པོ་རང་གི་ནོང་གྱི་སྙིང་ཐོབ་པའི།། ནོར་བུ་འཕྱིང་བུའི་ཕུང་པོ་ཁྲུ་གང་བ།། དེ་ནི་དབུས་ཀྱི་ཕྱོགས་སུ་ཆེས་བཟང་བ།། ཟ་འོག་དག་གིས་བསྒྲིལ་ཏེ་སྦས་ནས་ཡོད།།ཧོར་གྱི་རྒྱལ་པོའི་ནོར་གྱི་སྙིང་ཐོབ་པའི།། གསེར་གྱི་མི་རྟ་གཟུགས་སུ་བྱས་པ་དག། ལེ་བརྒན་འབར་བའི་དར་སྣའི་གྲིལ་ཏེ་ཡོད།།མི་རྟའི་གཟུགས་དང་མཉམ་པའི་འཕྲུལ་འཁོར་ཅན།། དེ་ནི་ཤར་གྱི་ཕྱོགས་ན་སྦས་ནས་ཡོད།། ཞེས་སོགས་བྱུང་བ་ལྟར་རོ།། ལྷ་ཁང་ལྔ་བཞེངས་ཡོད་ཚུལ་ཡང་དབུས་སུ་དམ་སྲི་མནན་ཏེ་དེའི་སྟེང་ཐུགས་རྗེ་ཆེན་པོའི་སྐུ་དང་། ཤར་ན་སྒྲོལ་མ། ལྷོ་ན་སྨན་བླ། ནུབ་ན་སངས་རྒྱས་དགའ་བའི་དཔལ། བྱང་ན་ཛམ་བྷ་ལ་བཅས་རང་རང་གི་འཁོར་གྱིས་བསྐོར་ཅིང་རྒྱན་ཆ་ལུགས་རྫོགས་པར་བཞུགས་ཤིང་གོང་དུ་སོང་བའི་རིན་ཆེན་རིགས་རྣམས་སོགས་ནོར་བུ་རྣམས་སོ་སོར་བཞག་སྟེ་དེ་དུས་འདི་ཡི་སྟེང་ཁ་གཅོད་པའི་ཚེ། སྒོ་ཡི་ཐད་དུ་འཕྲུལ་གྱི་མི་སྟོབས་པོ་ཆེ་བཞི་དང་། དེ་ཡི་གཡས་གཡོན་འཕྲུལ་འཁོར་དཔག་ཆེན་བཞི་དང་གཞན་ཡང་འཇིགས་པའི་རྣམ་གྲངས་དུ་མ་ཡོད་པ་སྟེ་གཏམ་ཚོགས་སུ་བྱུང་བའི་རླུང་སྤུ་གྲི་རེག་གཅོད་འཕྲུལ་གྱི་འཁོར་ལོ་ཞེས་པ་ཡང་འདི་ལ་ཟེར་བ་ཡིན་པར་འདོད།

བང་སོའི་ནང་དུ་རྒྱལ་པོ་དང་བཙུན་མོ་སོགས་ཀྱི་བང་སོ་ཞུགས་ཚུལ་ནི། རྒྱལ་བོ་བཀའི་ཐང་ཡིག་ལས། བང་སོ་བརྩིགས་ནས་ཡབ་ཡུམ་གསུམ་གྱི་པུར། །གསེར་གྱིས་བྱུགས་ནས་དངུལ་གྱི་གའུར་བཅུག །བང་སོའི་རེའུ་མིག་དབུས་མར་ཁྲི་ལ་བཞུགས། །གསེར་དངུལ་གཡུ་སོགས་བྲེ་ཡི་ཁལ་རེ་དང་།། རྒྱལ་པོའི་དཀོར་ནོར་གང་ཡིན་སྤྱན་སྔར་སྤུངས།། ཞེས་དང་། འཇིགས་མེད་གླིང་པའི་གཏམ་ཚོགས་སུ། ཕྱོགས་བཅུའི་སངས་རྒྱས་རྣམས་དང་ཉན་ཐོས་དང་།། བྱང་ཆུབ་སེམས་དཔའ་དམ་ཅན་ཆོས་སྐྱོང་རྣམས།། གནས་དེར་ལྷགས་ནས་བང་སོ་དེ་ལ་ནི།། བཀྲ་ཤིས་རབ་ཏུ་གནས་པའི་ཕྲིན་ལས་མཛད།། དབོན་སྲས་མང་སྲོང་བཙན་དེ་ལ་སོགས་པའི།། བློན་པོ་བོད་འབངས་འཁོར་དང་བཅས་པ་རྣམས།། མཆོད་པའི་ཡོ་བྱད་བསམ་གྱིས་མི་ཁྱབ་པ།། གནས་དེར་ཁྱེར་ནས་ཕྱག་དང་མཆོད་པ་ཕུལ།། དེ་ལྟར་འགྲན་མེད་རྒྱལ་པོའི་བང་སོ་དེ།། ཡུལ་དེའི་ལྷ་སྲུང་རྣམས་ལ་བཅོལ་དམ་མཛད།། གསོལ་བ་བཏབ་ནས་སླར་ཡང་ཡུལ་དུ་བྱོན།། ཞེས་པ་དང་། ད་དུང་དུར་སྲུང་འགོ་བ་ལ་ནང་བློན་གྱི་གོ་གནས་འཛིན་པའི་བློན་པོ་ཞིག་བསྐོ་དགོས་པར་བཀའ་ཐང་སྡེ་ལྔ་ལས་གསུངས། དེ་ཡང་རྒྱལ་པོ་ལ་བློ་སེམས་ཤིན་ཏུ་དཀར་བ་ཉིན་དེ་ནས་བཟུང་ཁྱིམ་མི་གཉེན་འབྲེལ་སོགས་གསོན་གཤིན་ལྟར་འབྲེལ་བ་གཅོད་ཐུབ་མཁན་ཞིག་སྟེ། གཤིན་པོའི་ཚུལ་བཟུང་པུར་གྱི་འབངས་སུ་བསྔོས།། གཤིན་གསོན་བྱེ་བྱས་མི་ཡི་ཁྱུ་ནས་བུད།། ཅེས་པ་ལྟ་བུ་ཞིག་དགོས་ལ། འཚོ་བའི་ཕྱོགས་ནས་དུར་སྲུང་བ་རང་ལ་དབང་བའི་ས་ཞིང་དང་འབྲོག་ཐང་སོགས་གནང་སྲོལ་ཡོད་དོ།། འདི་ནི་མཚོན་པ་ཙམ་སྟེ་བང་སོ་གཞན་རྣམས་ལ་ཡང་སྤྱིའི་ཆ་ནས་འདིས་མ་ཁྱབ་པ་མེད་པར་འདོད་པས་རིགས་འདྲེ་བར་བྱའོ།། 

 

ཞེས་བདག་གིས་བྲིས་གྲུབ་མ་ཐག་པའི་འཕྱོངས་རྒྱས་བཙན་པོའི་བང་སོའི་སྐོར་གྱི་རྩོམ་ཡིག་ལས་ཁོལ་དུ་ཕྱུང་ནས་སྤེལ་བའོ།།

༢༠༡༩/༢/༡༩

བརྒྱུད་སྐུལ།

མཆན་སྤེལ།