འགྲོ་བ་བཟང་མོའི་རྣམ་ཐར།

འགྲོ་བ་བཟང་མོའི་རྣམ་ཐར།

འགྲོ་བ་བཟང་མོའི་རྣམ་ཐར།

 

ན་མ་ཤྲཱི་ཀ་ལཱ་ཙཀྲཱ་ཨཱ། མཁའ་འགྲོ་མ་འགྲོ་བ་བཟང་མོའི་རྣམ་ཐར་འདི། ནམ་ལངས་ཉི་མ་ཤར་བ་བྱས་པ་ལ་དམ་ཚིག་རྣམ་པ་གསུམ་དང་ལྡན་པ་སྟེ། དང་པོར་གུས་པའི་ཞུ་བ་དང་། བར་དུ་མ་ཡེངས་པར་ཉན་པ་དང་། མཐའ་མར་འཆལ་དུ་མི་གཏོང་བ་དང་གསུམ་ཡིན་པས། དེ་ཡང་ཆོས་མ་འཆད་པར་སེམས་ཀྱིས་ཆོས་མ་ཤེས་ན་ཆོས་གཞན་རྣམས་དོན་མེད་དུ་འགྲོ་ཞིང་། ཉན་པ་པོ་རྣམས་གྱིས་བྱས་ན་ཉན་མཁན་རྣམས་ཀྱིས་ཀྱང་དོན་བདེ་བ་རུ་འགྲོ་བས་བསོད་ནམས་ཆེ་བ་རྣམས་ཀྱིས་ཀྱང་བྲག་སྟེང་ནས་ཆུ་འཕོ་བ་ལྟར་འཕྲལ་འཕྲལའཆད་དགོས་པ་ཞིག་གདའ་བ་ལགས། བཀའ་བཞིན་གསུངས་པ་བཞིན་གདའ་བ། ཞུ་བཞིན་གསན་དགོས་པ་ཞིག་གདའ་ལགས། མཁའ་འགྲོ་མ་འགྲོ་བ་བཟང་མོའི་ཚོགས་ན། ཏཾ་ཡིག་ལྗང་ཁུ་ལས་འཁྲུངས་ཤིང་། ཏཾ་ཡིག་འོད་ཀྱི་འགྲོ་བ་སྒྲོལ། སྒྲོལ་མའི་ཡུམ་ལ་ཕྱག་འཚལ་ལོ། །

སྙིགས་དུས་ཀྱི་མི་རྣམས་ཚེ་ཐུང་བའི་དུས་དང་། སྔ་དུས་ཀྱི་མི་རྣམས་ཚེ་ལོ་བརྒྱ་པའི་དུས། ཐུབ་པ་མྱ་ངན་ལས་འདས་ནས་ལོ་ནི་ཕྱེད་སྟོང་འདས། མུ་སྟེགས་ཀྱི་བསྟན་པ་རྣམས་ནུབ་པ་ལས། དེའི་ཚེ་ཡེ་ཤེས་ཀྱི་མཁའ་འགྲོ་མ་ལས། འཇའ་འོད་དང་སྤྲིན་དཀར་གྱི་གུར་ཕུབ་པའི་ནང་ནས་སེམས་ཅན་རྣམས་ལ་སྤྱན་གྱིས་གཟིགས་པས། འཇིག་རྟེན་གྱི་ཁམས་སུ་ཐུབ་པའི་བསྟན་པ་རིན་པོ་ཆེ་དར་ཞིང་རྒྱས་པའི་གནས་དུས་བཟང་པོར་འདུག་ཀྱང་། ཡུལ་མཎྜལ་སྒང་ཞེས་བྱ་བ་དེར། ཆོས་ཀྱི་སྒྲ་མ་དར། དགེ་འདུན་གྱི་སྡེ་མ་ཚུགས། ལྷ་ཐུགས་རྗེ་ཆེན་པོ་སྒོམ་མི་ཤེས། གཟུངས་སྔགས་ཡི་གེ་དྲུག་མ་འདྲེན་མི་ཤེས་ཤིང་སེམས་ཅན་རྣམས་ང་བདག་དང་། ང་རྩོད་བྱེད་ཅིང་། ཞེ་སྡང་དང་ཁོང་ཁྲོ་དང་ང་རྒྱལ་གྱི་དབང་དུ་སོང་བ་རྣམས། ངན་སོང་གི་སྡུག་བསྔལ་གཟོད་གླགས་མེད་པ་མྱོང་དགོས་མང་པོ་གཟིགས་ནས། དེ་མ་ཐག་ཐུགས་ཁྲལ་དཔག་ཏུ་མེད་པའི་ཚུལ་མཛད། སླར་ཐུགས་དྲན་བསོས་ཏེ། སྐྱེ་འགྲོ་སེམས་ཅན་ཀུན་འཁོར་བ་དང་ངན་སོང་དུ་མི་འགྲོ་བའི་མཆོད་རྟེན་ལྟ་བུར་གྱུར་པའི་སྨོན་ལམ་བཟང་པོ་བྱུང་བ་དང་། ཡུམ་བྲམ་ཟེ་མཛེས་མས་ནུབ་མོ་ཉལ་བའི་རྨི་ལམ་ཤིན་ཏུ་བཟང་ནས། ཡབ་བྲམ་ཟེ་བློ་བོའི་དྲུང་དུ་ཕྱིན་ཏེ། འདི་སྐད་ཅེས་ཞུས་སོ། །ཡབ་གཅིག་གསོན་དང་བྲམ་ཟེ་བློ་བོ་ལགས། །བདག་ལུས་སྔར་ལས་ཡང་ཞིང་དགའ་སྤྲོ་ཆེ། །ཁྱད་པར་རྨི་ལམ་བཟང་པོ་འདི་ལྟར་བྱུང་། །བདག་གི་སྙིང་ནས་ཉི་ཟླ་གཉིས་ཤར་ནས། །གླིང་བཞི་གླིང་ཕྲན་ཐམས་ཅད་མཐོང་བ་དང་། །དབུས་ཀྱི་རི་བོ་མཆོག་རབ་རྩེ་མོ་ནས། །དམ་པའི་ཆོས་ཀྱི་སྒྲ་ཆེན་བསྒྲགས་པ་དང་། །ལྷ་ཡི་བུ་དང་བུ་མོ་རྣམས་ཀྱིས་ཀྱང་། །བདག་ལ་ཁྲུས་ཆབ་གསོལ་མཁན་མི་གཅིག་བྱུང་། །བརྟག་པ་རྨི་ལམ་དེ་ཡི་བཟང་ལུགས་ཀྱིས། །བདག་ལ་བློ་འཁྲིད་བྱིས་པ་གཅིག་བྱུང་བ་འདྲ། །ཞེས་ཞུས་པས། ཡབ་བྲམ་ཟེ་བློ་བོ་ཐུགས་མཉེས་ནས། ཡུམ་བྲམ་ཟེ་ལ་འདི་སྐད་ཅེས་གསུངས་སོ། །ཡུམ་གཅིག་གསོན་དང་བྲམ་ཟེ་མཛེས་མ་ལགས། །རྒན་རྒོན་གཉིས་ཀྱི་འདོང་བའི་དོན་འགྲུབ་བྱུང་། །ད་ནི་ར་་ཟས་བཟོ་ལ་རང་གོས་གྱོན། །ཟས་ངན་སྤངས་ནས་མཚམས་ལ་ནན་ཏེ་གྱིས། །བྱང་ཆུབ་སེམས་དཔའི་སྤྲུལ་པ་བྱོན་ལས་ཆེ། །ཞེས་གསུངས་པས་ཡུམ་བྲམ་ཟེ་མས་ཀྱང་། ཡབ་ཀྱི་བཀའ་བཞིན་སྐུ་མཚམས་དམ་པོའི་ངང་ལ་བཞུགས་སོ། །དེ་ནས་ཟླ་གསུམ་སོང་ནས་ཡུམ་གྱི་སོ་ལྷུམས་ནསབྱིས་པས་འདི་སྐད་ཅེས་སྨྲས་སོ། །ༀ་མ་ཎི་པདྨེ་ཧཱུྃ། འགྲོ་བ་སེམས་ཅན་ཐམས་ཅད་ངན་འགྲོའི་སྡུག་བསྔལ་དང་བྲལ་ནས། བདེ་བ་དང་ལྡན་པར་གྱུར་ཅིག  ཅེས་སྨྲས་པས། ཡུམ་བྲམ་ཟེ་མཛེས་མ་ཤིན་ཏུ་འཇིགས་ཏེ་ཡབ་བྲམ་ཟེ་བློ་བོའི་དྲུང་དུ་ཕྱིན་ནས། འདི་སྐད་ཅེས་ཞུས་སོ། །ཡབ་གཅིག་གསོན་དང་བྲམ་ཟེ་བློ་བོ་ལགས། །བདག་གི་མངལ་དུ་བཞུགས་པའི་བྱིས་པ་འདིས། །ཟླ་གསུམ་སོང་ནས་འདི་སྐད་སྨྲས་ནས་བྱུང་། །ༀ་མ་ཎི་པདྨེ་ཧཱུྃ། །འགྲོ་བ་སེམས་ཅན་ཐམས་ཅད་ངན་འགྲོའི་སྡུག་བསྔལ་དང་བྲལ་ནས། བདེ་བ་དང་ལྡན་པར་གྱུར་ཅིག ཅེས་སྨྲས་བྱུང་བས། གཞོན་སོ་དཀར་ལ་བྱིས་པ་མ་བྱུང་བར། །རྒན་སྐྲ་དཀར་ལ་བྱིས་པ་ཡོང་བ་འདི། །བྱང་ཆུབ་སེམས་དཔའི་སྤྲུལ་པ་ག་ལ་ཡིན། །པེ་ཧར་རྒྱལ་པོའི་ཆོ་འཕྲུལ་ཡིན་ཉེན་འདུག །རྒྱ་གར་རྒྱལ་པོ་ཁྲིམས་གནས་སྐུ་དབང་ཆེ། །ད་ནི་བདག་ལ་ལྟས་ངན་ཡོང་བ་འདུག །བདག་ལ་རྒྱ་ཁྲིམས་གཅིག་དང་བོད་ཁྲིམས་གཅིག ཧོར་ཁྲིམས་གཅིག་སྟེ་གསུམ་ཙམ་ཡོང་བ་འདྲ། །བྲག་རི་མཐོན་པོའི་རྩེ་ནས་མཆོང་དགོས་བསམ། །ཆུ་བོ་ཆེན་པོའི་གཏིང་ལ་ལྕེབ་དགོས་་སམ། །རང་མཚོན་རང་ལ་བརྒྱབ་ནས་ཤི་དགོས་བསམ། །སྡུག་བསྔལ་ཅན་མ་བདག་ལ་སློབ་སྟོན་ཞུ། །ཞེས་ཞུས་པས། ཡབ་ཀྱིས་འདི་སྐད་ཅེས་གསུངས་སོ། །ཡུམ་གཅིག་གསོན་དང་བྲམ་ཟེ་མཛེས་མ་ལགས། །ༀ་མ་ཎི་པདྨེ་ཧཱུྃ། ཞེས་པ་འདི། བོད་ཁ་བ་ཅན་གྱི་བྱང་ཕྱོགས་ན། །ཡི་དམ་ཐུགས་རྗེ་ཆེན་པོ་བཞུགས་ནས་ཡོད། །སྐུ་མདོག་དཀར་ལ་རི་དྭགས་པགས་པ་བསྣམས། །ཞལ་ནས་ཡི་གེ་དྲུག་མའི་ཆོས་སྒྲ་སྒྲོག །བུ་རུ་སྐྱེས་ན་ཐུགས་རྗེ་ཆེན་པོའི་སྤྲུལ་པ་ཡིན། །བུ་མོ་སྐྱེས་ན་ཡེ་ཤེས་མཁའ་འགྲོའི་རྣམ་འཕྲུལ་ཡིན། །ད་ནི་རང་ཟས་བཟོ་ལ་རང་གོས་གྱོན། །ཟས་ངན་སྤངས་ནས་མཚམས་ལ་ནན་ཏེ་གྱིས། །བློ་ཕུག་བསམ་པའི་དོན་ཆེན་འགྲུབ་ནས་ཡོང་། །ཞེས་གསུངས་པས། ཡང་ཡབ་ཀྱི་བཀའ་བཞིན་སྐུ་མཚམས་ལ་བཞུགས་སོ། །ༀ་མ་ཎི་པདྨེ་ཧཱུྃ། དེ་ནས་ཟླ་བ་དགུ་རྫོགས་པའི་བཅུའི་ངོ་མཐོང་བའི་ཚེ། །ས་ཕོ་སྤྲེའུའི་ལོ། །དུས་བཟང་པོའི་ཚེས་བཅུའི་ཉིན། ཡུམ་གྱི་སྐུ་ལུས་ལ་སྙུང་ཟུག་མེད་པའི་ངང་ནས་མཆན་ཁུང་གཡས་པའི་རྩིབ་ལོགས་ནས་སྲས་མོ་གཅིག་སྐུ་བལྟམས་སོ། །དེ་མ་ཐག་ཏུ་ༀ་མ་ཎི་པདྨེ་ཧཱུྃ། ཞེས་གསུངས་སོ། །བར་སྣང་ཁམས་སུ་འཇའ་འོད་སྤྲིན་དཀར་གྱི་གུར་ཁང་ཕུབ་པ་དང། མ་ཡེ་ཤེས་མཁའ་འགྲོ་སྡེ་ལྔ་མགྲིན་གཅིག་ཏུ་འདུས་ནས་མཚན་ཡང་མཁའ་འགྲོ་མ་འགྲོ་བ་བཟང་མོ་ཞེས་གསོལ། མཆོད་པའི་བྱེ་བྲག་མང་དུ་ཕུལ། ལུང་བསྟན་ཡང་འདི་ལྟར་གནང་ངོ་། །བྲམ་ཟེའི་བུ་མོ་འགྲོ་བ་བཟང་མོ་ཁྱོད་ལ་བསྟན་པ་སྔ་དར་དང་བར་དར་ཕྱི་དར་གསུམ་ཡོང་། བསྟན་པ་སྔ་དར་གྱི་དུས་སུ་ཡུལ་མཎྜལ་སྒང་དུ་རྒྱལ་པོ་ཀཱ་ལ་དབང་པོ་དང་། བཙུན་མོ་ཧ་ཅང་བཅས་དུས་མཚུངས། བར་དར་དུས་སུ་སྲས་མིང་སྲིང་གཉིས་ཡོད། བསྟན་པ་ཕྱི་དར་དུས་སུ་བདུད་ཀྱི་བར་ཆད་ཆེན་པོ་ཡོད་པས། དྲིན་ཆེ་བའི་ཕ་མ་དང་གདོང་བལྟས་པའི་བཟའ་ཟླ། ཤ་ནས་མཆེད་པའི་བུ་ཚའི་ཚོགས་གང་ལ་ཡང་མ་ཆགས་པར། བར་སྣང་མཐོངས་སུ་འཕུར་ཤོག་ཅིག གང་དུ་འཕུར་སྙམ་ན་ནུབ་ཕྱོགས་མཁའ་འགྲོའི་གླིང་དུ་མ་ཡེ་ཤེས་མཁའ་འགྲོ་སྡེ་ལྔ་བསྒོམས་ནས་འཕུར་ཤོག་ཅེས་གསུངས་ཏེ་འཇའ་ལྟར་ཡལ་ནས་སོང་ངོ་། །སྲས་མོ་སྐུ་འཁྲུངས་མ་ཐག་ཡབ་ཡུམ་གཉིས་ལ་གཏམ་གཞན་ཅི་ཡང་མི་སྨྲ་བར། ཐོག་མ་རུ་ཡབ་ཡུམ་གཉིས་ལ་ཆོས་འདི་ལྟར་གསུངས་སོ། །ཡབ་གཅིག་གསོན་དང་བྲམ་ཟེ་བློ་བོ་ལགས། །ཚེ་འདི་མི་བཏག་ནམ་མཁའི་གློག་དང་འདྲ། །ཡུན་རིང་མི་སྡོད་འཆི་བ་མྱུར་དུ་ཡོང་། །སྤྱི་བོར་ཡི་དམ་ཐུགས་རྗེ་ཆེན་པོ་སྒོམས། །ཆོས་ཀྱི་སྙིང་པོ་ཡི་གི་དྲུག་མ་དྲོངས། །རྟག་ཏུ་རང་གི་སེམས་ལ་ཡང་ཡང་ལྟོས། །རྒྱུན་དུ་བྱམས་དང་སྙིང་རྗེ་མ་བྲལ་བར། །སེམས་ཉིད་སྙིང་རྗེའི་ངང་ལ་ཆེར་གཏོད་ཅིག །ཅེས་གསུངས་པ་དང་། ཡང་ཡུམ་ལ་འདི་སྐད་ཅེས་གསུངས་སོ། །ཡུམ་གཅིག་གསོན་དང་བྲམ་ཟེ་མཛེས་མ་ལགས། །ཚེ་འདི་མི་ཏོག་ལྡུམ་རྭའི་མེ་ཏོག་འདྲ། །ཡུན་རིང་མི་སྡོད་མྱུར་དུ་འཆི་དགོས་འདུག །ཉིན་གྱི་དུས་སུ་སྣང་སྟོང་དབྱེར་མེད་སྒོམས། །མཚན་གྱི་དུས་སུ་གསལ་སྟོང་འཛིན་མེད་སྒོམས། །འགྲོ་བ་ཀུན་ལ་བྱམས་དང་སྙིང་རྗེ་སྒོམས། །ནོར་ལ་སྙིང་པོ་མི་འདུག་སྦྱིན་པ་ཐོངས། །རྒྱུན་དུ་ཡི་དམ་ཐུགས་རྗེ་ཆེན་པོ་སྒོམས། །ཆོས་ཀྱི་སྙིང་པོ་ཡི་གེ་དྲུག་མ་དྲོངས། །ཞེས་གསུངས་པས། ཡབ་ཡུམ་གཉིས་ཀྱང་ཐུགས་ཤིན་ཏུ་མཉེས། དེ་ནས་སྐྱེད་སྲིང་ནུ་ཞོ་སྟེར་དགོས་པས། ཀ་ཤི་ཀའི་རས་བཟང་པོའི་ན་བཟའ་གསོལ་ནས། གཟིམ་ཆུང་དུ་སྐུ་མཚམས་དམ་པོའི་ངང་ལ་བཞུགས་སོ། །དེ་ནས་དུས་ནམ་ཞིག་གི་ཚེ། ཡུལ་མཎྜལ་སྒང་གི་རྒྱལ་པོ་ཀཱ་ལ་དབང་པོས། དར་པོ་ཆེ་དགུང་སྔོན་མཐོངས་ལ་ཕྱར། དུང་མོ་ཆེ་བར་སྣང་མཐོངས་ལ་བུས། རྔ་བོ་ཆེ་ཕོ་བྲང་རྩེ་ནས་བརྡུངས་པས། ཡུལ་མཎྜལ་སྒང་གི་མངའ་འོག་བློན་འབངས་ཐམས་ཅད་འདུས་བྱུང་བས། རྒྱལ་པོས་བློན་འབངས་རྣམས་ལ་འདི་སྐད་ཅེས་གསུངས་སོ། །ཀྭ་ཡེ་གསོན་དང་འདིར་ཚོགས་བློན་འབངས་རྣམས། ཉི་མ་སང་དང་གཅིག་བྱས་གནངས་དང་གཉིས། གཞེས་ཀྱི་ལྷ་ཉིན་དཀསཔོ་ཤར་བའི་ཚེ། རི་བོ་ཆེན་པོའི་རྩེ་ལ་རི་སྐད་གདའ་བ་དང་མཉམ་ཤར་གྱི་རི་ལ་ཁྱི་ར་བྱེད་དུ་འགྲོ་དགོས་འདུག མེ་མདེ་མདའ་གཞུ་རང་རང་སོ་སོའི་ཁྱིམ་ནས་འཁུར་རྒྱུ་ཡོད་ན་ཁུར་ཤོག་ཅིག མེད་ན་རྒྱལ་པོའི་མཛོད་ནས་འདོན་པ་ཡིན། ཁྱེད་བློན་འབངས་རྣམས་ཀྱིས་འགྲོ་བའི་གྲབས་གྱིས་ཤིག ཅེས་གསུངས་པས། བློན་འབངས་རྣམས་ཀུན་འདུས་བྱུང་བས། དེའི་ཁྲོད་ན་བློན་པོ་ཏྲི་ན་འཛིན་ཞེས་བྱ་བ་ཞིག་ཡོད་པ་དེས་སྤུས་མོའི་ལྷ་ང་ས་ལ་བཙུགས། ལག་གཉིས་ཐལ་མོ་སྦྱར་ཏེ་འདི་སྐད་ཅེས་ཞུས་སོ། །ཀྱཻ་གསོན་དང་རྒྱལ་པོ་རིན་པོ་ཆེ། །ཀཱ་ལ་དབང་པོ་བདག་ལ་སྙན་གསོན་དང་། །རྒྱལ་པོས་ཁྱི་ར་མ་བསྐྱོན་ཅིས་ཀྱང་ཞོག །རྒྱལ་པོ་ཁྱེད་ཀྱིས་ཁྱི་ར་བསྐྱོན་ཟེར་ན། །མཐའ་བཞིའི་རྒྱལ་ཁག་རྣམས་ཀྱིས་སྨད་ནས་ཡོང་། །གྲོང་པ་ཕལ་པས་ཁྱི་ར་བརྒྱབ་ཟེར་ན། །སྐྱེ་བོ་ཀུན་གྱིས་སྐྱུག་བྲོ་ཁྱད་གསོད་བྱེད། །རྒྱལ་པོས་ཁྱི་ར་ཅིས་ནས་ཞོག་པར་ཞུ། །ཞེས་ཞུས་པས། རྒྱལ་པོ་ཤིན་ཏུ་མ་མཉེས་པར། འདི་སྐད་ཅེས་གསུངས་སོ། །ཀྭ་ཡེ་ཉོན་དང་འདིར་ཚོགས་བློན་འབངས་རྣམས། །ང་ཅག་རྒྱལ་པོས་སྨྲ་བ་ལན་གཅིག་ཡིན། །རྒྱལ་པོའི་བཀའ་དང་རི་གཟར་རྦབ་རྡོ་འདྲ། །རྦབ་རྡོ་གྱེན་དུ་ལྡོག་པའི་དཔེ་མི་སྲིད། །རྒྱལ་པོའི་བཀའ་དང་ཆུ་བོ་ཆེན་པོ་འདྲ། །ཆུ་བོ་གྱེན་དུ་ལྡོག་པའི་དཔེ་མི་སྲིད། །བློན་འབངས་ཀུན་གྱི་གཏམ་དེ་བདེན་ན་ཡང་། །མཐའ་བཞིའི་རྒྱལ་ཁག་རྣམས་ལ་ཕར་ལྟོས་དང་། །ནོར་བུ་དོན་ལྡན་རེ་རེ་ཀུན་ལ་འདུག །ང་ལ་ནོར་བུའི་རིགས་ནི་གང་ཡང་མེད། །ཁྱི་མོ་ལྕགས་ཕྲ་འབ་ཤེས་འདི་ལས་མེད། །ང་ཡིས་སྡིག་གཅོད་ཁྱི་ར་མ་བྱས་ན། །ང་ལ་ཁྱི་མོའི་དགོས་བྱེད་མི་འདུག་པས། །དེ་བས་ཁ་རོག་སྡོད་ལས་འགྲོ་གྲབས་གྱིས། །ཞེས་གསུངས་ནས། རྒྱལ་པོས་མ་གསན་པར། དེའི་གཞེས་ཉིན་རྒྱལ་བློན་འཁོར་འབངས་རྣམས་དང་ཅས། མེ་མདའ་མདའ་གཞུ་ཁྲོབ་ཆི་ལི་བའི་ངང་ནས། ཁྱི་མོ་ལྕགས་ཕྲ་འབ་ཤེས་དེ་ཁྲིད་དེ་ཁྱི་ར་ལ་བྱོན། རྒྱ་གར་གྱི་རི་ཐམས་ཅད་ལ་རི་དྭགས་བཙལ་ཀྱང་མ་རྙེད། རྒྱ་དང་མོན་གྱི་མཚམས་ཤིག་ན། རི་ཆེན་པོ་ཞིག་འདུག་པ་དེར། རི་དྭགས་ཁ་ཤ་མང་པོ་འདུག་པས། ཁྱི་མོ་དེ་བཏང་བས། དེའི་ཉིན་ཁ་ཤ་སུམ་ཅུ་སོ་བདུན་ཟིན། ཉི་མ་དགོང་མོའི་གྲིབ་སོ་ནག་ཚོམ་ལ། ཁྱི་མོ་ནམ་མཁའི་འཇའ་བཞིན་ཡལ་ནས་གར་སོང་མེད་པར། རྒྱལ་པོ་ཐུགས་ཁྲལ་ཆེ་བར་གྱུར་ནས་འདི་སྐད་ཅེས་གསུངས་སོ། །ཀྱཻ་བློན་འབངས་ཚོགས་རྣམས་ཚུར་ཉོན་དང་། །དེ་རིང་ཉི་མའི་འཁོར་ལོ་ལ། །ལྕགས་ཕྲ་འབ་ཤེས་བྲལ་ནས་སོང་། །མེད་ཐབས་མེད་པའི་ནོར་བུ་ཡིན། །ལྕགས་ཕྲ་འབ་ཤེས་མ་རྙེད་བར། །ཁོ་བོ་ཡུལ་དུ་འགྲོ་རེ་ཤི །དོ་ནུབ་རི་རྩེ་འདི་རུ་ཉལ། །སང་ཉིན་ནམ་ལངས་ཉི་ཤར་ལ། །ལྕགས་ཕྲ་འབ་ཤེས་འཚོལ་དུ་འགྲོ། །ཞེས་གསུངས་ནས་དེའི་དགོང་མོ་རྒྱལ་བློན་འབངས་རྣམས་ཀྱིས། རང་རང་གི་མདའ་གཞུ་སྔས་ལ་བཅུག་ནས་གཟིམས། དེའི་སང་ཉིན་ནམ་ལངས་བའི་ཚེ། རྒྱལ་པོས་བློན་པོ་ཏྲི་ན་འཛིན་ལ་འདི་སྐད་ཅེས་གསུངས་སོ། །ཀྭ་ཡེ་ཉོན་དང་བློན་པོ་ཏྲི་ན་འཛིན། །བློན་པོས་ཡར་ལ་ལོངས་ལས་སོ་གཅིག་ལྟོས། །མི་སྐད་ཁྱི་སྐད་ཅི་འདྲ་ཨེ་འདུག་ལྟོས། །ཁྱི་མོའི་རྐང་རྗེས་འདྲ་ཡང་ཨེ་འདུག་ཚོལ། །ཅེས་གསུངས་པས། ཏྲི་ན་འཛིན་གྱིས་རྒྱལ་པོའི་བཀའ་བཞིན་གུས་པས་བླངས་ཏེ། ཕྱོགས་ཐམས་ཅད་ལ་བལྟས་ཀྱང་། མི་སྐད་ཁྱི་སྐད་ནི་མ་ཐོས། ཁྱི་མོའི་རྐང་རྗེས་འདྲ་ནི་མ་རྙེད་པས། སླར་ཡང་ཏྲི་ན་འཛིན་གྱིས་རི་མཐོན་པོའི་རྩེ་ལ་འཛེགས་ནས་ཕྱོགས་ཀུན་ལ་ནན་ཆེ་བར་བལྟས་པས། དེར་ཤར་ཕྱོགས་ཀྱི་ནགས་གསེབ་སྟུག་པོ་ཞིག་ན། ས་གཞི་ཁོད་དུ་སྙོམས་པ་ལ། ཁང་ཆུང་བཀོད་པ་ལེགས་པ་ཞིག་ཏུ་དུ་བའི་གཡང་ཆགས་པ་ཞིག་མཐོང་། བློན་པོའི་བསམ་པ་ལ་དེ་ན་ཁྱི་མོ་ཡོད་པ་འདྲ་བསམས་ནས། རྒྱལ་པོའི་དྲུང་དུ་ཕྱིན་ཏེ། འདི་སྐད་ཅེས་ཞུས་སོ། །ཀྱཻ་གསོན་དང་རྒྱལ་པོ་རིན་པོ་ཆེ། །མངའ་བདག་མི་དབང་ཆེན་པོ་བདག་ལ་གསོན། །མི་སྐད་ཁྱི་སྐད་གང་ཡང་མི་གདའ་ལ། །ཁྱི་མོའི་རྐང་རྗེས་འདྲ་ཡང་མི་འདུག་པས། །ཁྱི་མོ་འཚོལ་ཆེད་རི་བོ་མཐོན་པོར་འཛེགས། །རི་བོ་མཐོན་པོའི་རྩེ་ནས་ཕར་བལྟས་པས། །ཤར་ཕྱོགས་ནགས་གསེབ་སྟུག་ཕོ་ཞིག་གི་ཁྲོད། །ས་ཁོད་སྙོམས་ལ་ཁང་ཁྱིམ་བཀོད་པ་ལེགས། །ནམ་མཐོངས་དུ་ཞག་སྔོ་མོ་འཁྱིལ་ལེ་འཇུག །དེ་ན་ཁྱི་མོ་ཡོད་པ་འདྲ་བཟོ་འདུག །ཅེས་ཞུས་པས། རྒྱལ་པོ་ཐུགས་ཤིན་ཏུ་མཉེས་ནས། རྒྱལ་པོས་ཏྲི་ན་འཛིན་ལ་འདི་སྐད་ཅེས་གསུངས་སོ། །ང་ཡི་སྙིང་གི་ཟེའུ་འབྲུ་བློན་པོ་ཁྱོད་རིག་པའི་གནས་ལྔ་ལ་ཤིན་ཏུ་མཁས་པས་ཁྱོདཀྱིས་ཟེར་བ་ལྟར་ཁྱི་མོ་དེ་ན་ཡོད་པ་སྲིད་གསུངས་ནས། རྒྱལ་བློན་འབངས་འཁོར་རྣམས་ཀྱིས། རྒྱ་གར་ཙན་དན་ཧེ་རུ་ཀ་བྱ་བའི་ནགས་ཁྲོད་ལ་ཞལ་གཟིགས་ཏེ་བྱོན་པས། བྲམ་ཟེའི་སྒོ་རུ་ཕེབས་སྐབས། དེ་ན་ཁྱི་མོའི་རྐང་རྗེས་འདྲ་ཡོད་པ་རིག་སྟེ་བློན་པོ་ཏྲི་ན་འཛིན་གྱིས་ཁང་པའི་སྒོ་བརྡུངས་པས། ཡུད་ཙམ་ཞིག་ནས་ཁང་པའི་ཨོ་ཀར་ནས། བྲམ་ཟེ་རྒད་པོ་མགོ་བོ་དུང་ལྟར་དཀར་བ། མིག་གཡུ་ལྟར་སྔོ་བ། ཁ་ན་སོ་མུ་ཏིག་ཙམ་མེད་པ། ལུས་འཁར་བ་ལ་བརྟེན་ནས་ལངས་དགོས་པ་ཞིག་ན་རེ། དེ་ན་སུ་གདའ་ཟེར་བ་ལ། རྒྱལ་པོས་མགུལ་གའི་ནང་ན་བཀྲ་ཤིས་ཁ་བཏགས་ཁྱད་དུ་འཕགས་པ་གཅིག་ཡོད་པས། དེ་ཨོད་མའི་རྩེ་ལ་བཏགས་ནས། འདི་སྐད་ཅེས་གསུངས་སོ། །ཀྱཻ་བྲམ་ཟེ་རྒད་པོ་ཚུར་ཉོན་དང་། །ང་ནི་ཡུལ་ཕྱོགས་མཎྜལ་སྒང་ནས་ཡིན། །ང་ཡི་མིང་ལ་ཀཱ་ལ་དབང་པོ་ཟེར། །ཁ་སང་ཉི་མོའི་སྔ་དྲོ་ལ། །དགོས་མེད་ལས་ངན་ཁྱི་ར་བྱས། །ཁ་ཤ་སུམ་ཅུ་སོ་བདུན་བསད། །ཉི་མ་དགོང་མོར་སོང་བའི་དུས། །ཁྱི་མོ་བོར་ནས་མ་རྙེད་པས། །དེ་རིང་ཉི་མའི་སྔ་དྲོ་ལ། །ཁྱི་མོ་ལྕགས་ཕྲ་འབ་ཤེས་འཚོལ་དུ་ཡོང་། །ཁྱི་མོའི་རྐང་རྗེས་བྲམ་ཟེའི་སྒོ་དྲུང་གསལ། །ང་ཡི་ཁྱི་མོ་འཕྲལ་མར་སྤྲོད་རོགས་མཛོད། །ཅེས་གསུངས་པས། བྲམ་ཟེ་རྒད་པོ་ཤིན་ཏུ་འཇིགས་ཤིང་འཚབས་ནས། རྒྱལ་པོ་ཀཱ་ལ་དབང་པོ་ཁོང་ཁྲིམས་ལ་གནས་ཤིང་སྐུ་དབང་ཆེ་བ་མེ་ལས་དབལ་ཚ། ཆུ་ལས་རྦ་དྲག རྟ་རྔ་ལས་ཉག་ཕྲ། ཉུང་དཀར་ལས་བྱུ་རིལ་བ། བག་ཕྱེ་ལས་རྩི་ཞིབ་ཟེར་བ་སྔར་རྣ་བས་ཐོས་པ་མ་གཏོགས། མིག་གིས་ཀྱང་མ་མཐོང་། ད་ལན་སྒོ་དྲུང་དུ་བྱོན་དོན་མེད་བསམས་ཏེ་ལུས་འདར་བའི་ངང་ནས་སྒོ་ཕྱེ་སྟེ་ཕྱིར་ཡོང་ནས། པུས་མོའི་ལྷ་ང་ས་ལ་བཙུགས། ལག་གཉིས་ཐལ་མོ་སྦྱར་ཏེ། རྒྱལ་པོ་ལ་འདི་སྐད་ཅེས་ཞུས་སོ། །ཀྱཻ་རྒྱལ་པོ་རིན་པོ་ཆེ། །ཀཱ་ལ་དབང་པོ་སྙན་གསོན་དང་། །བདག་ཅག་རྒས་ཤིང་གོག་པའི་བཟའ་མི་གཉིས། །གཞོན་གྱི་དུས་ནས་ཕེར་ཡོད་ཅན་ཞིག་མིན། །ད་ནི་རྒན་འཁོགས་འཆི་ལ་ཐུག་པའི་ཚེ། །རྒྱལ་པོའི་ཁྱི་མོ་ལྕགས་ཕྲ་འབ་ཤེས་དེ། །མཐོང་ཡང་མ་མཐོང་ཤེས་ཀྱང་མ་ཤེས་ལགས། །མཐོང་ན་ཁྱི་མོའི་དགོས་བྱེད་མེད་ལགས་ཏེ། །རྒྱལ་པོ་ཆེན་པོ་ཐུགས་ཡིད་མ་ཆེས་ན། །བདག་གི་ཁྱིམ་ལ་གཟིགས་པ་ཞུ། །ཞེས་ཞུས་ནས་ཁང་པའི་སྒོ་དེ་ཕྱེ་བས། རྒྱལ་པོ་དཔོན་གཡོག་རྣམས་ཀྱིས་ཁང་པའི་ནང་དུ་བྱོན་ནས། ཁྱིམ་ཁུག་གང་སར་ཁྱི་མོ་བཙལ་བས་མ་རྙེད་པས། སྒོ་གསུམ་འདུག་པའི་བར་གཅིག་ན། བྲམ་ཟེ་རྒན་མོ་མགོ་བོ་དུང་ལྟར་དཀར་བ། མིག་གཡུ་ལྟར་སྔོ་བ། ཁ་ན་སོ་མུ་ཏིག་ཙམ་ཡང་མེད་པ། ལུས་འཁར་བ་ལ་བརྟེན་ནས་ལངས་དགོས་པ་གཅིག་མ་ཎི་འདྲེན་བཞིན་འདུག་པས། རྒྱལ་པོའི་ཐུགས་དགོངས་ལ། བྲམ་ཟེ་རྒན་རྒོན་གཉིས་ཚེ་རིང་ཞིང་། ནོར་ལོངས་སྤྱོད་ཕུན་སུམ་ཚོགས་པ་ནི། ཡི་དམ་ཐུགས་རྗེ་ཆེན་པོའི་བྱིན་རླབས་ཡིན་པ་འདུག་པས། རྒྱལ་པོ་ཡང་དད་པ་ཤིན་ཏུ་སྐྱེས་མོད། འོན་ཀྱང་རྒྱལ་པོ་རང་གི་ཁྱི་མོ་མ་རྙེད་པའི་ཐུགས་ཁྲལ་ངང་ལ་ཡོད་པ་ན། སྒོ་གཅིག་སྒོ་ལྕགས་བརྒྱབ་ནས་འདུག་པས། སྒོ་དེ་རྒྱལ་པོས་གཟིགས་པ་དང་། སྒོ་དེ་ལ་ཞབས་རྡོ་བཞུས་ནས། བྲམ་ཟེ་རྒན་མོ་སྒོ་འདི་ཕྱེ་དང་། ངའི་ཁྱི་མོ་འདི་ན་ཡོད་པ་འདུག་ཅེས་གསུངས་པས། བྲམ་ཟེ་རྒན་མོས་རྒྱལ་པོ་ལ་ཕྱག་འཚལ། པུས་མོའི་ལྷ་ང་ས་ལ་བཙུགས། ལག་གཉིས་ཐལ་མོ་སྦྱར་ནས། འདི་སྐད་ཅེས་ཞུས་སོ། །ཀྱཻ་རྒྱལ་པོ་རིན་པོ་ཆེ། །ཀཱ་ལ་དབང་པོ་བདག་ལ་སྙན་གསོན་དང་། །བདག་ཅག་རྒས་ཤིང་གོག་པའི་བཟའ་མི་གཉིས། །གཞོན་དུས་ཕེར་ཡོད་ཅན་ཞིག་མ་ཡིན་ལགས། །ད་ནི་རྒན་འཁོགས་འཆི་ལ་ཐུག་པའི་དུས། །རྒྱལ་པོའི་ཁྱི་མོ་ལྕགས་ཕྲ་འབ་ཤེས་དེ། །མཐོང་ཡང་མ་མཐོང་ཤེས་ཀྱང་མ་ཤེས་ལགས། །མཐོང་ན་ཁྱི་མོའི་དགོས་བྱེད་ཅི་ཡང་མེད། །རྒྱལ་པོ་ཆེན་པོ་ཐུགས་ཡིད་མ་ཆེས་ན། །སྒོ་འདི་ཕྱེ་དང་གསུངས་ན་ཕྱེ་བས་ཆོག །རྒྱལ་པོས་གཞན་གྱི་བཀའ་བཀྱོན་མ་གནང་ཞིག །ཅེས་ཞུས་པས། གཟིམ་ཆུང་དེའི་སྒོ་ཕྱེ་བྱུང་བས། །རྒྱལ་པོས་དེའི་ནང་དུ་བྱོན་པས། གཡུ་ཁྲིའི་སྟེང་ན། མིའི་བུ་མོ་མི་འདྲ་བ། ལྷའི་སྲས་མོ་འདྲ་བ། ཀ་ཤི་ཀའི་རས་དྲི་མ་མེད་པའི་ན་གཟའ་གསོལ་བ། མདོག་དཀར་ལ་དྲི་བཟང་ཞིང་ཐུགས་བཙུན་པ། །བལྟས་ན་གཟུགས་མཛེས་པ། ཉན་ན་གསུང་སྙན་པ། བསྣམས་ན་དྲི་ཞིམ་པ། མཐོང་བ་ཙམ་གྱིས་ཡིད་ཕྲོགས་པ། ཡེ་ཤེས་ཀྱི་མཁའ་འགྲོའི་མཚན་རྟགས་དང་ལྡན་པ་ཞིག་འདུག་པས། རྒྱལ་པོའི་ཐུགས་དགོངས་ལ། ང་ཡི་ཁྱི་མོ་ལྕགས་ཕྲ་འབ་ཤེས་དེ་གློ་བུར་ཉིད་དུ་དགུང་ལ་ཡལ་ལུགས་དང་། བྲམ་ཟེའི་སྒོ་དྲུང་རྐང་རྗེས་འདྲ་ཡོད་ལུགས་ཀྱིས། ང་ལ་མཁའ་འགྲོ་སྡེ་ལྔས་ལུང་བསྟན་པ་འདྲ་སྙམ་ནས་མགུལ་གའི་ནང་ན་གཡུ་མོ་ཚ་འོད་དང་ལྡན་པ་གཅིག་ཡོད་པ་དེ་འགྲོ་བ་བཟང་མོའི་སྤྱི་གཙུག་ཏུ་བཏགས་ནས། བྲམ་ཟེ་རྒན་རྒོན་གཉིས་ལ་རྒྱལ་པོས་འདི་སྐད་ཅེས་གསུངས་སོ། །ཁྱེད་བྲམ་ཟེ་རྒན་རྒོན་གཉིས་ཀྱི་བུ་མོ་འདི། །ང་རྒྱལ་པོའི་བཙུན་མོར་སྟེར་དགོས་པས། །དེ་རིང་ཉིན་མའི་འཁོར་ལོ་འདི་ནས་བཟུང་། །མཐོ་བ་གནམ་ལ་འཕུར་སོང་མ་ཟེར་ཅིག །དམའ་བ་ས་ལ་འཛུལ་སོང་མ་ཟེར་ཅིག །དབང་པོ་ཆེ་ཡིས་ཕྲོགས་སོང་མ་ཟེར་ཅིག །ནོར་ཆེན་རྣམས་ཀྱིས་བསླུས་སོང་མ་ཟེར་ཅིག །ཧམ་པ་ཆེ་ཡིས་བརྐུས་སོང་མ་ཟེར་ཅིག །སྙོམས་ཆུང་ཞིག་གིས་སློང་སོང་མ་ཟེར་ཅིག །བུ་མོ་གང་དུ་མ་སོང་བ་གྱིས་ཤིག །བུ་མོ་འདི་ཉིད་གཞན་ལ་སོང་ཟེར་ན། །རྒན་རྒོན་གཉིས་ཀྱི་སྲོག་དང་བྲལ་ཡོང་ངོ་། །ཉི་མ་སང་དང་གཅིག་དང་གནངས་དང་གཉིས། །གཞེས་ཀྱི་ལྷ་ཉིན་དཀར་པོ་ཤར་བའི་ཚེ། །རྒན་རྒོན་གཉིས་ལ་བུ་མོའི་ནུ་རིན་སྤྲོད། །གཡོག་བྱེད་མེད་ན་གཡོག་འཁོར་གང་དགོས་སྟེར། །བུ་མོ་ང་ཡི་བཙུན་མོར་བསུ་བ་ཡིན། །གཏོང་བའི་གྲབས་མཛོད་བྲམ་ཟེ་རྒན་རྒོན་གཉིས། །ཞེས་གསུངས་ནས། རྒྱལ་པོ་དཔོན་གཡོག་རྣམས་རང་གི་ཡུལ་ལ་བྱོན་སོང་ངོ་། །དེའི་དུས་སུ་འགྲོ་བ་བཟང་མོའི་ཐུགས་དགོངས་ལ། ང་སྡིག་སྤྱོད་རྒྱལ་པོའི་བཙུན་མོ་བྱེད་པ་ལས་ཤི་བ་དགའ་སྙམ་པའི་ངང་ལ་གནས་བཞིན་དུ་སྔར་མཁའ་འགྲོ་སྡེ་ལྔས་འཕུར་ཤོག་ཅེས་ལུང་བསྟན་པ་དང་བཅས་བྱིན་གྱིས་བརླབས་པ་ཐུགས་ལ་དྲན་པས། ང་ལ་བདུད་ཀྱི་བར་ཆད་ཡོང་གསུངས་པ་འདི་ག་ཡིན་པར་འདུག་དགོངས་ནས། གཟིམ་ཆུང་དེའི་ནང་ནས་ཧར་ཐོན་མཛད་དེ་རས་གོས་ཀྱིས་གཤོག་པ་མཛད་ནས་ནམ་མཁའ་ལ་འཕུར་ནས་འགྲོ་དགོས་དགོངས་པ་ལ། ཡབ་ཡུམ་གཉིས་ཀྱིས་མཁྱེན་ནས། ཡབ་བྲམ་ཟེ་བློ་བོས་བུ་མོའི་དྲུང་དུ་བྱོན་ཏེ། རས་གོས་ཀྱི་ཐུ་བ་གཡས་ནས་འཇུས་ཏེ། འདི་སྐད་ཅེས་གསུངས་སོ། །ཕ་རྒན་བྲམ་ཟེའི་བུ་མོ་ཚུར་ཉོན་དང་། །འགྲོ་བ་བཟང་མོ་དར་གཅིག་ང་ལ་གསོན། །བུ་མོ་འཕུར་བ་ངོ་མཚར་ཆེ་ལགས་ཏེ། །བུ་མོས་ཆོད་པ་རིང་ཡང་ཤམ་ཤུལ་ལུས། །བུ་མོ་ཕེབས་ཀྱང་ཕ་མ་རྒན་རྒོན་ལུས། །ཡུལ་ཕྱོགས་མཎྜལ་སྒང་གི་རྒྱལ་པོ་ཁོང་། །ཁྲིམས་ལ་གནས་ཤིང་སྐུ་དབང་ཤིན་ཏུ་ཆེ། །ད་ལན་རྒྱལ་པོས་བཀའ་ནན་དེ་ཙམ་གནང་། །ད་ནི་འགྲོ་བ་བཟང་མོ་མ་བཞུགས་ན། །རྒན་རྒོན་གཉིས་ནི་སྲོག་དང་བྲལ་ངེས་གདའ། །བསམ་བློ་ཐོངས་དང་འགྲོ་བ་བཟང་མོ་ལགས། །ད་ལན་ཕ་མའི་དྲིན་ལན་འཇལ་ཕྱིར་དུ། །བུ་མོ་དགུང་ལ་མ་ཡལ་ཅིས་ཀྱང་བཞུགས། །ཞེས་གསུངས་ནས། སྤྱན་ཆབ་མང་དུ་བསིལ་ཏེ་ཞུ་བ་ནན་གྱིས་ཕུལ་ལོ། །དེ་ནས་ཡུམ་གྱིས་བུ་མོའི་རས་གོས་ཀྱི་ཐུ་བ་གཡོན་ནས་འཇུས་ཏེ་འདི་སྐད་ཅེས་གསུངས་སོ། །ཨ་མའི་བུ་མོ་ང་ལ་ཚུར་ཉོན་དང་། །བུ་མོ་འཕུར་བ་ཡ་མཚན་ཆེ་ལགས་ཏེ། །བུ་མོ་ཁྱོད་ནི་ཐོག་མར་སྐྱེས་པའི་དུས། །མཁའ་འགྲོ་སྡེ་ལྔའི་ལུང་བསྟན་བྱུང་བ་ལ། །བསྟན་པ་སྔ་དར་བར་དར་ཕྱི་དར་གསུམ། །སྔ་དར་དུས་སུ་འཕུར་ཤོག་མི་གསུངས་འདུག །ཕྱི་དར་དུས་སུ་འཕུར་ཤོག་གསུངས་ཀྱི་འདུག །ད་ལྟ་བུ་མོའི་བསྟན་པ་སྔ་དར་ཡིན། །ད་ལྟ་འཕུར་བའི་དུས་ལ་མ་བབས་སོ། །བསམ་བློ་ཐོངས་དང་འགྲོ་བ་བཟང་མོ་ལགས། །ད་ལན་ཕ་མའི་དྲིན་ལན་འཇལ་ཕྱིར་དུ། །བུ་མོ་ཅིས་ཀྱང་མ་བྱོན་བཞུགས་པར་མཛོད། །ཅེས་གསུངས་ནས། སྤྱན་ཆབ་མང་དུ་བསིལ་བཞིན་ཞུ་བ་ནན་གྱིས་ཕུལ་ལོ། །བུ་མོའི་ཐུགས་ལ་རང་གི་ཕ་མ་ཡབ་ཡུམ་གཉིས་ལ་ཡང་སྙིང་རྗེ་དགོངས་ནས། སྤྱན་ཆབ་མང་དུ་བསིལ་བཞིན། ཡབ་ཡུམ་གཉིས་ཀྱི་བཀའ་བཞིན་ཁྱིམ་ལ་བྱོན་པ་ཞལ་གྱིས་བཞེས་སོ། །དེར་ཡབ་ཡུམ་གཉིས་ཀྱང་ཐུགས་ཤིན་ཏུ་མཉེས་སོ། །དེ་ནས་གཞེས་ལྷ་ཉིན་དཀར་པོའི་དུས་སུ། ཡུལ་མཎྜལ་སྒང་ནས། རྒྱལ་པོ་དཔོན་གཡོག་རྣམས་ཀྱིས། རྟ་དང་གླང་པོ་ཆེ་སོགས་པ་ལ་ནོར་བུ་བསམ་འཕེལ་དང་། ནོར་བུའི་ཕྲེང་བ་དང་། གསེར་དངུལ་གོས་དར་ལ་སོགས་པ་ནོར་ལོངས་སྤྱོད་བསམ་གྱིས་མི་ཁྱབ་པ་བཀལ་ཏེ། འཁོར་གཡོག་དང་བཅས་པ་རྣམས་བུ་མོའི་ནུ་རིན་དུ་གནང་ངོ་། །བུ་མོའི་ཡབ་གཡུམ་གཉིས་ཀྱང་ཐུགས་ཤིན་ཏུ་མཉེས་པའི་ངང་ནས། འགྲོ་བ་བཟང་མོ་ལ་དར་གོས་ཀྱི་ན་བཟའ་གསོལ། རིན་པོ་ཆེའི་རྒྱན་བསམ་གྱིས་མི་ཁྱབ་པ་བསྒྲོན་ཏེ། རྟ་ཕོ་རྟ་ནག་རྟིང་དཀར་ལ་ཆིབས། རྟ་ཕོ་ངང་པ་གསེར་ལྡན་ལ་རྒྱལ་པོ་ཀཱ་ལ་དབང་པོ་ཆིབས། རྟ་ཕོ་ཡིད་འཛིན་ལ་བློན་པོ་ཏྲི་ན་འཛིན་བཞོན། རྒྱལ་པོ་དང་བཙུན་མོ་བཅས་པ་ལ་བསུ་བ་བྱེད་དོ། །གླུ་གར་དང་རྩེད་འཇོ་དང་བཅས། བསུ་བ་སེར་ཕྲེང་དཔག་ཚད་བརྒྱད་ཀྱི་སར་མཛད། ཡུལ་མཎྜལ་སྒང་དུ་གདན་དྲངས་ནས། ཕོ་བྲང་ནང་དུ་བྱོན་པ་དང་། དེར་རྒྱལ་པོ་གསེར་ཁྲི་ལ་བཞུགས། བཙུན་མོ་གཡུ་ཁྲི་ལ་བཞུགས། གསེར་ཁྲིའི་མདངས་གཡུ་ཁྲི་ལ་ཕོག དེ་གཉིས་ཀྱི་མདངསཕོ་བྲང་ལ་ཕོག་པས། ཕོ་བྲང་དེ་ཡང་ཕྱི་ནས་བལྟས་ན་ནང་གསལ་བ། ནང་ནས་བལྟས་ན་ཕྱི་གསལ་བ་ལྟ་བུའི་ཕྱི་ནང་མེད་པ་འོདཀྱིས་ཁེངས་ནས། གསལ་བའི་གཞལ་ཡས་ཁང་དུ་གྱུར་ཏོ། །དགའ་སྟོན་ཡང་རྒྱས་པར་མཛད་དོ། །དེའི་དུས་སུ་རྒྱལ་པོ་དང་བཙུན་མོ་གཉིས། དགའ་བདེའི་དཔལ་ལ་འདོད་དགུའི་ལོངས་སྤྱོད་ཀྱིས་བཞུགས་སོ། །དེ་ནས་འགྲོ་བ་བཟང་མོའི་ཐུགས་དགོངས་ལ། ང་འདིར་སླེབས་པའི་དགོས་དོན་ལ། སྡིག་སྤྱོད་ཀྱི་རྒྱལ་བློན་འབངས་རྣམས། དམ་པའི་ཆོས་ལ་བཅུག་ན་ཅི་མ་རུང་དགོངས་ནས། རྒྱལ་པོ་ལ་འདི་སྐད་ཅེས་ཞུས་སོ། །ཀྱཻ་རྒྱལ་པོ་རིན་པོ་ཆེ། ཀཱ་ལ་དབང་པོ་སྙན་གསོན་དང་། །འཇིག་རྟེན་ཉམས་སུ་དགའ་ཡང་རྨི་ལམ་ཙམ། །འདོད་ཡོན་ལོངས་སྤྱོད་ཆེ་ཡང་སྡིག་པའི་རྒྱུ། །འདུས་བྱས་བྱ་བ་ཐམས་ཅད་མི་རྟག་པས། །ད་ནི་ཕྱི་མའི་དོན་ཆེན་སྒྲུབ་རེ་རན། །ནམ་འཆི་ཆ་མེད་ཚེ་ལ་ཡུན་མེད་པས། །སྤྱེ་བོར་ཡི་དམ་ཐུགས་རྗེ་ཆེན་པོ་སྒོམས། །ཆོས་ཀྱི་སྙིང་པོ་ཡི་གེ་དྲུག་མ་དྲོངས། །མི་དགེ་བཅུ་སྤོངས་དགེ་བཅུ་དང་དུ་ལོངས། །རྟག་ཏུ་བྱམས་དང་སྙིང་རྗེ་མ་བྲལ་བར། །སྟོང་ཉིད་སྙིང་རྗེའི་ངང་ལ་ལྷོད་པར་བཞུགས། །ཞེས་ཞུས་པས། རྒྱལ་པོ་ཤིན་ཏུ་མཉེས་ནས་འགྲོ་བ་བཟང་མོ་ལ་དི་སྐད་ཅེས་གསུངས་སོ། །ཁྱེད་ཀྱིས་སྨྲས་པའི་གཏམ་དེ་ཤིན་ཏུ་བདེན། །དེ་བཞིན་ང་ཡི་དང་དུ་ལེན་པས་ཆོག །ཅེས་གསུངས་ཏེ། རྒྱལ་པོས་ཕོ་བྲང་རྩེ་ནས་དར་ཆེ་པོ་དགུང་སྔོན་མཐོངས་ལ་ཕྱར། དུང་མོ་ཆེ་བར་སྣང་མཐོངས་ལ་བུས། རྔ་བོ་ཆེ་ཕོ་བྲང་རྩེ་ནས་བརྡུངས་སྟབས། ཡུལ་མཎྜལ་སྒང་གི་མངའ་འོག་བློན་འབངས་ཐམས་ཅད་འདུས་བྱུང་བས། རྒྱལ་པོས་འདི་སྐད་ཅེས་གསུངས་སོ། །ཀཱ་ཡེ་ཉོན་དང་འདིར་ཚོགས་བློན་འབངས་རྣམས། །ང་ཡིཁྱི་མོ་ལྕགས་ཕྲ་འབ་ཤེས་དེ། །སྐད་ཅིག་ཙམ་ལ་དགུང་དུ་ཡལ་ལུགས་དང་། །བྲམ་ཟེའི་སྒོ་དྲུང་རྐང་རྗེས་ཡོད་ལུགས་འདི། འགྲོ་བ་བཟང་མོའི་སྤྲུལ་པ་ཡིན་ལས་ཆེ། །འགྲོ་བ་བཟང་མོ་དམ་པའི་ཆོས་ལ་དཀར། །ང་ཡང་དེ་བཞིན་དམ་པའི་ཆོས་ལ་དཀར། །བློན་འབངས་རྣམས་ཀྱང་དམ་པའི་ཆོས་ལ་འབུངས། །མི་དགེ་བཅུ་སྤོངས་དགེ་བཅུ་དང་དུ་ལོངས། །སྤྱེ་བོར་ཡི་དམ་ཐུགས་རྗེ་ཆེན་པོ་སྒོམས། །ཆོས་ཀྱི་སྙིང་པོ་ཡི་གེ་དྲུག་མ་དྲོངས། །བྱམས་དང་སྙིང་རྗེ་རྟག་ཏུ་མ་བྲལ་བར། །སྟོང་ཉིད་སྙིང་རྗེའི་ངང་ལ་ཆེ་རེ་ཞོག །གནག་སེམས་སྡིག་པའི་ལས་ལ་སྤྱད་བྱུང་ན། །ལུས་སྲོག་སྟེང་ལ་ཆད་པ་སྤྱོད་པར་བྱེད། །དེ་ལྟར་གོ་བར་གྱིས་ཤིག་བློན་འབངས་རྣམས། །ཞེས་གསུངས་སོ། །དེ་ནས་ཡུལ་མཎྜལ་སྒང་གི་རྒྱལ་བློན་འཁོར་འབངས་རྣམས་ཀྱང་དགེ་བ་བཅུ་ལ་ལོངས་སུ་སྤྱོད་པར་གྱུར་རོ། །དེའི་དུས་སུ་འདོད་ཡོན་ལོངས་སྤྱོད་སྔར་ལས་དར་ཞིང་རྒྱས་པར་བྱུང་ངོ་། །དེ་ནས་འགྲོ་བ་བཟང་མོས་འཇིགས་པ་བརྒྱད་ལས་སྐྱོབ་ཕྱིར་། གཟིམ་ཆུང་སྒྲོལ་མ་ལྷ་ཁང་དུ་སྐུ་མཚམས་དམ་པོའི་ངང་ལ་བཞུགས་པའི་དུས། སྲས་མོ་གཅིག་སྐུ་འཁྲུངས་སོ། །མཚན་ལ་ཡང་ལྷ་གཅིག་ཀུན་ཏུ་བཟང་མོ་གསོལ་ལོ། །དེ་དགུང་ལོ་གསུམ་དུ་བཞེས་པ་དང་། །ཡུམ་ལ་སྲས་རྒྱལ་བུ་གཅིག་འཁྲུངས་སོ། །མཚན་ལ་ཡང་ལྷ་སྲས་རྒྱལ་བུ་ཀུན་ཏུ་ལེགས་པ་གསོལ་ལོ། །ལྷ་སྲས་དེ་སྐུ་འཁྲུངས་ནས་ཡབ་ཡུམ་སྲས་བཅས་འདོད་དགུའི་ལོངས་སྤྱོད་ཀྱི་དགའ་བདེའི་དཔལ་ལ་རོལ་ནས་བཞུགས་པའི་ཚེ། རྒྱལ་པོས་འགྲོ་བ་བཟང་མོ་ལ་ཀ་བཤད་ཀྱི་མགུར་འདི་གསུངས་སོ། །ཀ་མ་ལྷ་ཡི་མེ་ཏོག་ཡིད་འོང་མ། །ཁ་དོག་ལྡན་པའི་རྒྱལ་པོ་བདག་ལ་གསོན། །ག་ནས་བལྟས་ཀྱང་སྙིང་པོ་མི་འདུག་པས། །ང་ནི་དམ་པའི་ལྷ་ཆོས་ཤིན་ཏུ་མོས། །ཅ་ཅོ་དབེན་པ་བསྟེན་པའི་ལྷ་ཁང་དུ། །ཆ་ལུགས་སྒོམ་ཆེན་ལྟ་བུའི་མཚམས་ཤིག་བྱེད། །ཇ་ཆང་འདོད་དགུ་འཛོམས་པའི་གཟིམ་ཆུང་དུ། །ཉ་ཆུང་ནད་མེད་བཅོམ་པའི་མིང་སྲིང་གཉིས། །ཏ་ར་དཀར་མོའི་འགྲོ་བ་བཟང་མོ་ཁྱོད། །ཐ་དད་མེད་པའི་མ་བུ་འཕྲད་དུ་ཡོང་། །ད་ནི་ལྷ་ཆོས་མཚམས་སུ་བཞུགས་པར་མཛོད། །ན་ཆུང་མཛེས་མའི་ཐུགས་ལ་དེ་ལྟར་ཞོག །ཅེས་གསུངས་པ་དང་། །ཡང་འགྲོ་བ་བཟང་མོས་འདི་སྐད་ཅེས་ཞུས་སོ། །པ་འུ་ལྟ་བུའི་རྒྱལ་པོ་བདག་ལ་གསོན། །ཕ་མའི་དྲུང་དུ་བུ་མོ་སྡོད་དབང་མེད། །བ་མོ་བཞིན་དུ་མགོ་ཐག་ཟུང་འབྲེལ་བྱེད། །མ་མོ་ལུ་གུའི་ཁྱུ་ནས་གཅིག་པོར་བཏོན། །ཙ་རི་འདྲ་བའི་ཚ་གྲང་འཇིགས་པ་བརྒྱད། །ཚ་ཟེར་བདུད་མོའི་ས་སྟེང་འདི་རུ་སླེབས། །ཛ་འགྲོགས་བཞག་ནས་རྒྱལ་པོས་ཆོས་མཛད་ན། །ཝ་སྐྱེས་རྒྱལ་པོའི་ཐར་ལམ་དེ་ཡིས་བགྲོད། །ཞ་ཞུམ་སྤྱེ་བོར་མཁས་ཀྱང་སྙིང་པོ་མེད། །ཟ་བཏུང་ལོངས་སྤྱོད་འདོད་ཡོན་ཆེ་ན་ཡང་། །འ་འུར་ངང་ནས་ལྷ་ཆོས་མ་བྱས་ན། །ཡ་མེད་ཅན་ནི་གཤིན་རྗེའི་ཁྲིམས་རར་སླེབས། །ར་མ་དཀར་མོ་ལུག་གིས་མཐའ་ནས་བསྐོར། །ལ་ལུང་བརྒལ་ཞིང་བདུད་ཀྱི་བཤས་རར་སླེབས། །ཤ་ཚ་ཅན་གྱི་གཏན་གྲོགས་ཡོད་ན་ཡང་། །ས་སྟེང་འདི་རུ་མ་བུ་སྐྱོ་བ་སྐྱེས། །ཧ་ཅང་བཙུན་མོས་མ་བུ་ཟ་བའི་ཚེ། །ཨ་མ་མི་སྡོད་མཁའ་འགྲོའི་གླིང་དུ་འགྲོ། །ཞེས་གསུངས་ནས། གཟིམ་ཆུང་སྐྱིད་པའི་སྒྲོལ་མ་ལྷ་ཁང་དུ། ཡུམ་སྲས་གསུམ་པོ་སྐུ་མཚམས་དམ་པོའི་ངང་ལ་བཞུགས་སོ། །དེ་ནས་རེ་ཞིག་སོང་བའི་དུས། སྔོན་རྒྱལ་པོ་ཀཱ་ལ་དབང་པོ་ལ། བཙུན་མོ་ཧ་ཅང་ཟེར་བ་གཅིག་ཡོད་པ་དེ་ལ་བྲན་གཡོག་གཟེ་མ་ར་མགོ་ཟེར་བ་ཞིག་ཡོད་པ་དེས་ཕོ་བྲང་གི་ཡང་ཐོག་ལ་ཕྱིན་པས། འགྲོ་བ་བཟང་མོ་ཡུམ་སྲས་གསུམ་པོ་མཐོང་ནས། ཨ་ཁ་ཁ་ང་ཡི་ཧ་ཅང་བཙུན་མོའི་ཞབས་འདྲེན་དུ་འགྲོ་བ་འདུག རྒྱལ་པོ་ཀཱ་ལ་དབང་པོས། བཙུན་མོ་བཞེས་ནས། རྒྱལ་རྒྱུད་འཛིན་པའི་རྒྱལ་སྲས་འདུག གཉེན་ཚན་སྤེལ་བའི་སྲས་མོ་འདུག་སྙམ་ནས། མྱུར་དུ་བཙུན་མོའི་དྲུང་དུ་ཕྱིན་ཏེ། འདི་སྐད་ཅེས་ཞུས་སོ། །ཀྱེ་བཙུན་མོ་དམ་པ་བདག་ལ་སྙན་གསོན་དང་། རྒྱལ་པོ་ཀཱ་ལ་དབང་པོ་ཡིས། བཙུན་མོ་ཆུང་མ་བཞེས་ནས་འདུག རྒྱལ་རྒྱུད་འཛིན་པའི་རྒྱལ་སྲས་འདུག གཉེན་ཚན་སྤེལ་བའི་སྲས་མོ་འདུག། བཙུན་མོ་དམ་པ་ཁྱེད་རང་ལ། སྲས་སྲོས་མེད་པའི་ཐུགས་ཁྲལ་མཛད་དགོས་མི་འདུག ཅེས་ཞུས་པས། བདུད་མོའི་བསམ་པ་ལ། ཐག་རིང་གཏམ་ནི་ཕྱེད་བདེན་ཕྱེད་མི་བདེན། ད་ལན་ཐག་ཉེ་བའི་གཏམ་ཡིན་པས། གཟེ་མ་ར་མགོས་ཟེར་བ་ཤིན་ཏུ་བདེན། ཞེས་ཟེར་ནས། ཕོ་བྲང་ཡང་ཐོག་ལ་ཡར་ཕྱིན་ཏེ། གཟིམ་ཆུང་སྒྲོལ་མ་ལྟ་ཁང་གི་སྟེང་དུ་བལྟས་པས། འགྲོ་བ་བཟང་མོ་ཡུམ་སྲས་གསུམ་མཐོང་ནས། བདུད་མོ་ཞེ་སྡང་ལངས་ཏེ་འདི་སྐད་ཟེར། གཟེ་མ་ར་མགོས་ཟེར་བ་བདེན་པ་འདུག ང་ཧ་ཅང་ཟེར་བའི་མིང་ཆེན་ལ། ཁྱོད་འགྲོ་བ་བཟང་མོ་དགྲ་རུ་བྱུང་། དེ་རིང་ཉི་མའི་འཁོར་ལོ་ལ། ཁྱོད་མ་བུ་གསུམ་པོ་ཟ་མ་ཐུབ་ན། ང་ཡུལ་འདིའི་ཆོས་སྐྱོང་སྲུང་མ་རྣམས་ཀྱིས་བཞེས་ཤིག་ཟེར་ནས། བདུད་མོས་མཆེ་བ་ཉེར་ཉེར་ལན་གསུམ་བྱས་ཏེ། མོ་རང་གི་གཟིམ་ཆུང་དུ་ལོག་སོང་ངོ་། །དེ་ནས་འགྲོ་བ་བཟང་མོའི་ཐུགས་དགོངས་ལ། ང་ལ་མཁའ་འགྲོ་སྡེ་ལྔའི་རས་གོས་འཕུར་གཤོག་ལུང་བསྟན་དང་བཅས་པ་བྱིན་གྱིས་རློབས་པའི་དུས་སུ། བདུད་ཀྱི་བར་ཆད་ཡོང་གསུངས་པ་དེ་བདུད་མོ་འདི་རང་ཡིན་པར་འདུག་དགོངས་ཏེ་དེ་ནས་ལྷ་སྲས་སྙིང་དང་འདྲ་བ་དེ། ཡབ་ཀྱི་དྲུང་དུ་བཏང་། ལྷ་ཅིག་མེ་ཏོག་པདྨ་ཁ་ཕྱེ་བ་དེ། སྐུ་པང་དུ་བཞེས་ནས། སྤྱན་ཆབ་བསིལ་ཞིང་འདི་སྐད་ཅེས་གསུངས་སོ། །ཨ་མའི་བུ་མོ་ཚུར་ཉོན་དང་། །ཨ་མ་ང་ནི་སྐྱེས་པའི་དུས། །མཁའ་འགྲོ་སྡེ་ལྔའི་ལུང་བསྟན་ལ། །བདུད་ཀྱི་བར་ཆད་ཡོང་གསུངས་བྱུང་། །བདུད་མོ་འདི་རང་ཡིན་པ་འདུག འདི་རུ་བསྡད་ན་མ་བུ་གསུམ་ཀ་བདུད་མོས་ཟ་བ་འདུག །ཨ་མའི་རྒྱན་གོས་བུ་མོ་ཁྱོད་རང་གྱིས་ལ། ཁྱེད་མིང་སྲིང་གཉིས་ཀྱི་སྐྱིད་སྡུག་ཡབ་ཆེན་རྒྱལ་པོ་ཁོང་ལ་རེ་ཞིག་གསུངས། ཨ་མ་མི་སྡོད་མཁའ་འགྲོའི་གླིང་ལ་འགྲོ་གསུངས་ཏེ་སྤྱན་ཆབ་མང་དུ་བསིལ་བའི་ངང་ནས། ཡུམ་གྱི་སྐུ་རྒྱན་རྣམས་བཀྲོལ་ཏེ་བཞག དར་གོས་ཀྱི་ན་བཟའ་རྣམས་ཀྱང་ཕུད་དེ། སྐུ་གཅེར་བུར་འཕུར་གཤོག་གིས་བར་སྣང་མཐོངས་ལ་འཕུར་ནས། ནུབ་ཕྱོགས་མཁའ་འགྲོའི་གླིང་ལ་བྱོན་སོང་ངོ་། །དེ་ནས་ལྷ་ཅིག་ཀུན་ཏུ་བཟང་མོས་ཡུམ་གྱི་ཕྱག་ཕྱིར་འགྲོ་དགོས་དགོངས་ཏེ།འཕུར་བས་འདོམ་གང་ཙམ་ལས་འཕུར་མི་ཐུབ་པར་སྤྱན་ཆབ་བསིལ་བའི་ངང་ཡུམ་གྱི་གཟིམ་ཆུང་དེར་བྱོན་པས། བྱ་ཚང་ནས་བྱ་འཕུར་བ་ལྟར། སྟོང་སངས་ངེར་སོང་འདུག རྒྱན་གོས་རྣམས་ཀྱང་ཁྲ་ཕུང་ངེ་འདུག་པ་དང་། ལྷ་ཅིག་ཀུན་ཏུ་བཟང་མོ་དེ་སྤྱན་ཆབ་བསིལ་ཞིང་གྲོངས་ཚད་ཚད་ཡོད་པ་ལ། དེ་ནས་ལྷ་སྲས་རྒྱལ་བུ་ཀུན་ཏུ་ལེགས་པ་དེ། ཡུམ་གྱི་གཟིམ་ཆུང་དུ་བྱོན་པས། ཡུམ་ཡང་མི་བཞུགས་པར། ཨ་ལྕེ་ཡང་གྲོངས་ཚད་ཚད་ཡོད་པ་ལ་གཟིགས་ནས། ལྷ་སྲས་ཀྱིས་ཨ་ཅེ་ལ་འདི་སྐད་ཅེས་གསུངས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །ཡུམ་མཆོག་འགྲོ་བ་བཟང་མོ་གང་དུ་བྱོན། ཨ་ཅེ་ཐུགས་ཁྲལ་མཛད་པ་ཅི་ལ་མཛད། །ཅེས་ཞུས་པས། ལྷ་ཅིག་ཀུན་ཏུ་བཟང་མོས་ལྷ་སྲས་ལ་འདི་སྐད་ཅེས་ཞུས་སོ། །ལྷ་སྲས་རྒྱལ་བུ་བདག་ལ་ཚུར་གསོན་དང་། །འོ་ཅག་ཡུམ་སྲས་གསུམ་པོ་ནི། །གཟིམ་ཆུང་སྒྲོལ་མ་ལྷ་ཁང་དུ། །དགའ་བདེའི་དཔལ་ལ་ལོངས་སྤྱོད་དུས། །ཧ་ཅང་ཟེར་བའི་བཙུན་མོ་དེའི། །བྲན་གཡོག་གཟེ་མ་ར་མགོ་དེས། །འོ་ཅག་མ་བུ་གསུམ་པོ་མཐོང་། །གཡོག་མོས་བཙུན་མོའི་དྲུང་དུ་ཞུས། །བདེན་རྫུན་བདུད་མོས་ལྟ་རུ་ཡོང་། །བདུད་མོས་མ་བུ་གསུམ་པོ་མཐོང་། །ཞེ་སྡང་ལངས་ནས་འདི་སྐད་ཟེར། །ང་ཧ་ཅང་ཟེར་བའི་མིང་ཆེན་ལ། །ཁྱོད་འགྲོ་བ་བཟང་མོ་དགྲ་རུ་བྱུང་། །དེ་རིང་ཉི་མའི་འཁོར་ལོ་ལ། །ཁྱོད་མ་བུ་གསུམ་པོ་ཟ་མ་ཐུབ་ན། །ང་ཡུལ་འདིའི་ཆོས་སྐྱོང་སྲུང་མ་རྣམས་ཀྱིས་བཞེས་ཤིག་ཟེར། །བདུད་མོས་སོ་ཐམ་མཆེ་ཉེར་ལན་གསུམ་བྱས། །འཇིགས་པའི་མཆེ་ཉེར་འདུས་པའི་དུས། །ཡུམ་གྱིས་བདུད་མོའི་ཚིག་རྐྱེན་མ་ཐེག་པར། ཞལ་ཏ་སློབ་སྟོན་འདི་ལྟར་གསུང་གིན་འདུག །ཨ་མ་ང་ལ་བདུད་ཀྱི་བར་ཆད་ཡོང་ངོ་གསུངས། །བདུད་མོ་ཧ་ཅང་འདི་རང་ཡིན་པར་འདུག །འདི་རུ་བསྡད་ན་མ་བུ་གསུམ་ཀ་ཟ་མི་ཟ་ཐེ་ཚོམ་མི་འདུག་པས། །ཨ་མ་མི་སྡོད་མཁའ་འགྲོའི་གླིང་དུ་འགྲོ། །མ་ངའི་རྒྱན་གོས་བུ་མོ་ཁྱོད་རང་གྱིས། ཁྱེད་མིང་སྲིང་གཉིས་ཀྱི་སྐྱིད་སྡུག་ཡབ་ཆེན་རྒྱལ་པོ་ཁོང་ཉིད་ལ་རེ་ཞིག་གསུངས་ནས། །ཡུམ་གྱི་མཆོག་གྱུར་འགྲོ་བ་བཟང་མོ་དེ། །གློ་བུར་དགུང་སྔོན་མཐོངས་ལ་ཡལ་ནས་སོང་། མིང་སྲིང་གཉིས་པོ་ཇི་ལྟར་བྱས་ན་དྲག། །ཅེས་ཞུས་ཏེ་སྤྱན་ཆབ་མང་དུ་བསིལ་བས། ལྷ་སྲས་རྒྱལ་བུས་འདི་སྐད་ཅེས་གསུངས་སོ། །ཨ་ཅེ་དེ་ལྟར་ཡིན་ན་འདི་རུག་ལ་སྡོད། བདུད་མོ་ཡོང་ན་མིང་སྲིང་གཉིས་ཀ་ཟ། འདི་རུ་མི་སྡོད་ཡབ་ཀྱི་དྲུང་དུ་འགྲོ་གསུངས་ནས། མིང་སྲིང་གཉིས་ཡབ་ཀྱི་དྲུང་དུ་བྱོན་ཏེ། ལྷ་སྲས་རྒྱལ་བུ་ཀུན་ཏུ་ལེགས་པས། ཡབ་ལ་ཕྱག་ཕུལ་ནས་པུས་མོའི་ལྷ་ང་ས་ལ་བཙུགས་ཏེ། སྤྱན་ཆབ་མང་དུ་བསིལ་བཞིན་འདི་སྐད་ཅེས་ཞུས་སོ། །ཡབ་ཅིག་གསོན་དང་ཀཱ་ལ་དབང་པོ་ལགས། བདག་ཅག་ཡུམ་སྲས་གསུམ་པོ་ནི། །གཟིམ་ཆུང་སྒྲོལ་མ་ལྷ་ཁང་དུ། །དགའ་བདེའི་དཔལ་ལ་ལོངས་སྤྱོད་དུས། །ཧ་ཅང་ཟེར་བའི་བཙུན་མོ་དེའི། །བྲན་གཡོག་གཟེ་མ་ར་མགོ་དེས། །བདག་ཅག་མ་བུ་གསུམ་པོ་མཐོང་། །གཡོག་མོས་བཙུན་མོའི་དྲུང་དུ་ཞུས། །བདེན་རྫུན་བདུད་མོས་ལྟ་རུ་ཡོང་། །བདུད་མོས་ཡུམ་སྲས་གསུམ་པོ་མཐོང་། །ཞེ་སྡང་ལངས་ནས་འདི་སྐད་ཟེར། །ང་ཧ་ཅང་ཟེར་བའི་མིང་ཆེན་ལ། །ཁྱོད་འགྲོ་བ་བཟང་མོ་དགྲ་རུ་བྱུང་། །དེ་རིང་ཉི་མའི་འཁོར་ལོ་ལ། །ཁྱོད་མ་བུ་གསུམ་པོ་ཟ་མ་ཐུབ་ན། །ང་ཡུལ་འདིའི་ཆོས་སྐྱོང་སྲུང་མ་རྣམས་ཀྱིས་བཞེས་ཤིག་ཟེར། །བདུད་མོས་མཆེ་ཉེར་ལན་གསུམ་བྱས། །འཇིགས་པའི་མཆེ་ཉེར་འདུས་པའི་ཚེ། །ཡུམ་གྱིས་བདུད་མོའི་ཚིག་རྐྱེན་མ་ཐེག་པར། །ཞལ་ཏ་སློབ་སྟོན་འདི་ལྟར་གསུངས། །ཨ་མ་སྐྱེས་པའི་དུས་ཙ་ན། །མཁའ་འགྲོའི་ལུང་བསྟན་ལ་། །གློ་བུར་བདུད་ཀྱི་བར་ཆད་ཡོང་ངོ་གསུངས། བདུད་མོ་ཧ་ཅང་འདི་རང་ཡིན་པར་འདུག འདི་རུ་བསྡད་ན་མ་བུ་གསུམ་པོ་བདུད་མོས་ཟ་མི་ཟ་ཐེ་ཚོམ་མི་འདུག་པས། ཨ་མའི་རྒྱན་གོས་བུ་མོ་ཁྱེད་རང་གྱིས་ཤིག མ་ང་མི་སྡོད་མཁའ་འགྲོའི་གླིང་དུ་འགྲོ ཁྱོད་མིང་སྲིང་གཉིས་ཀྱི་སྐྱིད་སྡུག་ཡབ་ཆེན་རྒྱལ་པོ་ཁོང་ཉིད་ལ་རེ་ཞིག་གསུངས་ནས། ཡུམ་གྱི་མཆོག་གྱུར་འགྲོ་བ་བཟང་མོ་དེ། གློ་བུར་དགུང་སྔོན་མཐོངས་ལ་འཕུར་ནས་ཡལ། བདག་མིང་སྲིང་གཉིས་ཀྱི་སྐྱིད་སྡུག་དེ། ཡབ་ཆེན་རྒྱལ་པོ་ཉིད་ཀྱིས་ཐུགས་རྗེས་གཟིགས། ཞེས་ཞུས་ནས། མིང་སྲིང་གཉིས་ཀྱིས་ཕྱག་མཉམ་དུ་བཙལ་ཏེ་སྤྱན་ཆབ་མང་དུ་བསིལ། ཡབ་རྒྱལ་པོའི་སྙན་དུ། ཡུམ་འགྲོ་བ་བཟང་མོ་མ་བཞུགས་པའི་ལོ་རྒྱུས་རྣམས་གསན་པ་དང་། ཡབ་རྒྱལ་པོ་ཐུགས་དྲན་མེད་དུ་བརྒྱལ་ལོ། །དེར་འཁོར་འབངས་རྣམས་ཀྱིས་ཙན་དན་གྱི་ཐང་ཆུ་དྲངས་ནས། ཞལ་རས་ལ་གཏོར་བས། རྒྱལ་པོ་ཐུགས་དྲན་གསོས་ཏེ་སྤྱན་ཆབ་བསིལ་ཞིང་འདི་སྐད་ཅེས་གསུངས་སོ། །ཐག་རིང་གཏམ་དེ་ཕྱེད་བདེན་ཕྱེད་མི་བདེན། ད་ལན་ཐག་ཉེ་བའི་གཏམ་ཡིན་པས། ལྟ་རུ་འགྲོ་དགོས་དགོངས་ནས་མགྱོགས་པར་བྱོན་ཏེ། གཟིམ་ཆུང་སྒྲོལ་མ་ལྷ་ཁང་གི་སྒོ་དེ་ཕྱེ་ནས་བྱོན་པས། །ཡུམ་གྱི་གཟིམ་ཆུང་དེ་ནི་བྱ་ཚང་ནས་སྒོ་ང་བཏོན་པ་ལྟར་སྟོང་སངས་ངེར་སོང་འངུག  རྒྱན་གཡུ་གོས་རྣམས་ཀྱང་ཁྲ་ཕུང་ངེར་འདུག་པ་ལས། ཡབ་རྒྱལ་པོ་ཐུགས་དོན་འགྲོ་བ་ལྟ་བུའི་ངང་ནས་སྤྱན་ཆབ་བསིལ་ཞིང་གཟིམ་ཆུང་སྒྲོལ་མ་ལྷ་ཁང་གི་སྟེང་དུ་ན་བཟས་དབུ་བཏུམས་ནས་ཐུགས་ཁྲལ་ཆེན་པོའི་ངང་ལ་བཞུགས་སོ། །དེ་ནས་ལྷ་སྲས་རྒྱལ་བུས་ཡབ་ཀྱི་སྐུ་པང་དུ་བྱོན་ནས་ཞལ་ལ་ཞལ་སྦྱར་ཐུགས་ལ་ཐུགས་སྦྱར་ཏེ། ཡབ་ཀྱི་ཐུགས་སེམས་གསོ་བའི་ཕྱིར། འདི་སྐད་ཅེས་ཞུས་སོ། །ཀྱཻ་ཡབ་གཅིག་གསོན་དང་ཀཱ་ལ་དབང་པོ་ལགས། །བདག་གི་ཨ་མ་དགུང་ལ་ཡལ་བ་དེ། །སྐུ་ཚེའི་དུས་ལ་བབ་པ་མིན་ལས་ཆེ། །འགྲོ་བའི་དོན་དུ་འཕུར་བ་ཡིན་པར་སྲིད། །དེ་ན་ཐུགས་ཁྲལ་མཛད་དགོས་མི་འདུག་པས། །ཐུགས་ཁྲལ་ཞོག་ལས་གསོལ་འདེབས་སྨོན་ལམ་མཛོད། །ཡུམ་ཆེན་ཨ་མ་མྱུར་དུ་བྱོན་ལས་ཆེ། །ཞེས་ཞུས་པས། ཡབ་ཀྱི་ཐུགས་དགོངས་ལ་ང་ཡི་བུ་འདི་ཐུགས་རྗེ་ཆེན་པོའི་སྤྲུལ་པ་དངོས་ཡིན་པས། ལོ་ངོ་གསུམ་ལོན་ཙམ་ལ་སེམས་གསོ་འདི་ཙམ་གཏོང་ཤེས་པ་འདུག་དགོངས་ནས། ཡབ་ཀྱིས་ལྷ་སྲས་རྒྱལ་བུ་ཕྱག་གཡས་སུ་ཁྲིད། ལྷ་ཅིག་ཀུན་ཏུ་བཟང་མོ་ཕྱག་གཡོན་དུ་ཁྲིད་དེ། གཟིམ་ཆུང་སྒྲོལ་མ་ལྷ་ཁང་གི་སྟེང་ནས། བར་སྣང་ལ་སྤྱན་གཟིགས་ཏེ་གསོལ་འདེབས་ཀྱི་མགུར་འདི་གསུངས་སོ། །བསླུ་མེད་དཀོན་མཆོག་གསུམ་ལ་གསོལ་བ་འདེབས། །བདག་གི་སྨོན་ལམ་འགྲུབ་པར་བྱིན་གྱིས་རློབས། །འགྲོ་བ་བཟང་མོ་ང་ལ་ཚུར་ཉོན་དང་། །གློ་བུར་དགུང་སྔོན་མཐོངས་ལ་མ་ཡལ་བར། །ད་དུང་གཟིམ་ཆུང་འདི་རུ་བྱོན་པ་ཞུ། །ཞེ་སྡང་ཁོང་ཁྲོ་བདུད་མོའི་ང་རྒྱལ་ལ། །བདེན་པར་འཛིན་པའི་འགྲོ་བ་བཟང་མོ་ཁྱེད། །གློ་བུར་དགུང་སྔོན་མཐོངས་ལ་མ་ཡོལ་བར། །གཟིམ་ཆུང་འདི་རུ་ད་དུང་བྱོན་པ་ཞུ། །ལྷ་སྲས་རྒྱལ་བུ་སྐྱུར་བའི་སྙིང་ཕོད་མ། །ལྷ་ཅིག་ཀུན་བཟང་སྐྱུར་བའི་ཕོད་མཚན་མ། །ཀཱ་ལ་དབང་པོ་སྐྱུར་བའི་སྙིང་རིང་མ། །རྒྱན་གོས་ལོངས་སྤྱོད་སྐྱུར་བའི་མན་ལོག་མ། །སེམས་ཅན་ཀུན་ལ་ཐུགས་རྗེ་སྙིང་རྗེས་གཟིགས། །ཀཱ་ལ་དབང་པོའི་ཞུ་དོན་སྨིན་པར་མཛོད། །ཅེས་གསུངས་པས། ཡུམ་གྱི་སྐུ་གཟུགས་མཐོངརྐྱུ་ལྟར་བཞག་གསུང་ལན་ཙམ་ཡང་མ་བྱུང་ངོ་། །དེར་ཡབ་སྲས་གསུམ་པོ་ཕོ་བྲང་གི་ཟུར་ཞིག་ཏུ་ན་བཟས་དབུ་བཏུམས་ནས་ཐུགས་ཁྲལ་ཆེན་པོའི་ངང་ལ་བཞུགས་སོ། །དེའི་དུས་སུ་བདུས་མོ་ཧ་ཅང་གིས་བློན་པོ་རྣམས་ལ་འདིསྐིད་ཅེས་སྨྲས་སོ། །ཀྭ་ཡེ་ཉོན་དང་འདིར་ཚོགས་བློན་འབངས་རྣམས། །སྔོན་དུས་རྒྱལ་པོ་ཀཱ་ལ་དབང་པོ་ཡིས། །བཙུན་མོ་ང་ལས་གཞན་པ་མི་ལེན་པའི། །ཁ་དན་ཚིག་གི་དམ་བཅའ་བཞག་ནས་ཡོད། །ཁོ་བོས་སྔར་བྱས་གཏམ་ལ་མ་གནས་པར། །ལྐོག་ཏུ་འགྲོ་བ་བཟང་མོ་ཆུང་མར་བླངས། །བཙུན་མོ་ང་ལ་ལོ་དྲུག་མིག་མི་ལྟ། །འདི་འདྲའི་ལས་ལ་ཁོ་མོ་ཅི་ལ་བཟོད། །རྒྱ་གར་རྒྱལ་པོ་རྣམས་ལ་ཕར་ལྟོས་དང་། །བཙུན་མོ་མང་པོ་ཀུན་གྱིས་བཞེས་འདུག་ཀྱང་། །མཉམ་དུ་བསྐྱངས་ན་འགྱོད་པ་སྐྱེརྐྱུ་མེད། །ཉེ་རིང་འདི་འདྲ་རྒྱལ་པོས་བྱས་ཟེར་ན། །ཁོ་མོ་བདག་གི་སེམས་ཀྱིས་ཅི་ལ་བཟོད། །འགྲོ་བ་བཟང་མོ་དགུང་ལ་ཡལ་ན་ཡང་། །མོ་ནི་ཆོད་པ་རིང་ཡང་ཤམ་ཤུལ་ལུས། །རྒྱལ་པོ་ཀཱ་ལ་དབང་པོར་སྨྱོ་ཆུ་ཞུས། །རྒྱལ་པོ་སྨྱོ་བའི་སྨྱོ་ཚུལ་བསྟན་གྱུར་ན། །ལོ་དྲུག་བར་དུ་ཆད་པ་གཅོད་ལས་ཞོག །ཁྱོད་ཚོ་བློན་འབངས་རྣམས་ཀྱི་རྔན་པ་ལ། །འདོད་ཡོན་ལོངས་སྤྱོད་གང་ལ་གང་དགོས་སྟེར། །མངའ་འབངས་རྣམས་ལ་བགོ་བཤའ་གང་ཁྱབ་བྱེད། །བློན་པོའི་ཚོགས་རྣམས་ནན་ཏན་གོ་བར་གྱིས། །ཞེས་སྨྲས་པས། བློན་པོ་ཐམས་ཅད་བདུད་མོའི་དབང་དུ་སོང་ནས། གྲོས་གཅིག་ཏུ་མཐུན་ཏེ། རྒྱལ་པོ་བསླུ་བར་ཁ་འཆམས་སོ། །དེ་ནས་བློན་པོ་རྣམས་ཀྱིས་སྨྱོ་ཆུ་ཁྱེར་ཏེ་རྒྱལ་པོའི་དྲུང་དུ་ཕྱིན་ནས། འདི་སྐད་ཅེས་ཞུས་སོ། །ཀྱཻ་གསོན་དང་རྒྱལ་པོ་རིན་པོ་ཆེ། །ཀཱ་ལ་དབང་པོ་ཚུར་ལ་སྙན་གསོན་དང་། །འགྲོ་བ་བཟང་མོ་དགུང་ལ་ཡལ་ན་ཡང་། །ཐུགས་ཡིད་མཐུན་པའི་བཙུན་མོ་ད་དུང་ཡོད། །རྒྱལ་རྒྱུད་འཛིན་པའི་ལྷ་སྲས་རྒྱལ་བུ་ཡོད། །གཉེན་འཁོར་སྤེལ་བའི་ལྷ་ཅིག་སྲས་མོ་ཡོད། །རྒྱལ་པོའི་སྐུ་ལ་འབྱུང་བཞིའི་གནོད་པ་མེད། །བདག་ཅག་བློན་འབངས་རྣམས་ནི་དར་ཞིང་རྒྱས། །དེས་ན་ཐུགས་ཁྲལ་མཛད་དགོས་མི་འདུག་པས། །ཐུགས་ཁྲལ་ཞོག་ལས་ཨ་རག་རྒུན་འབྲུམ་བཞེས། །ཨ་རག་བཞེས་ལ་ཆོས་ཀྱི་གླེང་མོ་མཛོད། །ཅེས་ཞུས་ནས་རྒྱལ་པོ་ལ་སྨྱོ་ཆུ་ཡང་ནས་ཡང་དུ་ཞུས། རྒྱལ་པོས་སྨྱོ་ཆུ་ཡིན་པ་མ་མཁྱེན་པར། བློན་པོ་རྣམས་ཀྱིས་ཨ་རག་རྒུན་འབྲུམ་ཁྱེར་ནས། ང་ཡི་སེམས་གསོ་རུ་ཡོང་བར་ཡིན་པར་དགོངས་ཏེ། ཐུགས་ཤིན་ཏུ་མཉེས་ནས་སྨྱོ་ཆུ་མང་དུ་བཞེས་པས། སྐད་ཅིག་ཉིད་དུ་རྒྱལ་པོ་སྨྱོ་ནས། རེ་ག་ནི་བཞེངས། རེ་ག་ནི་བཞུགས། རེ་ག་ནི་ང་ཡི་འགྲོ་བ་བཟང་མོ་ཟེར་ཏེ་བར་སྣང་ལ་སྤྱན་གཟིགས། རེ་ག་ནི་གླུ་ལེན། རེ་ག་ནི་གར་བྱེད། གཞན་ཡང་སྨྱོ་བའི་རྣམ་འགྱུར་མང་དུ་མཛད་བྱུང་བས། བདུད་མོ་ན་རེ། ཁྱོད་བློན་པོ་རྣམས་ཀྱིས་ཀཱ་ལ་དབང་པོ་བཙོན་ལ་ཆུག་ཅིག  བཙོན་གཉེར་གཟེ་མ་ར་མགོས་གྱིས་ཤིག བཙོན་ལྟོ་ཞུར་ཐག་ལ་སྤྲོད་ཅིག ཅེས་སྨྲས་སོ། །དེ་ནས་དུས་ནམ་ཞིག་གི་ཚེ། བདུད་མོའི་བསམ་པ་ལ། མེ་སྟག་ཆུང་ངུའི་དུས་སུ་མ་བསད་ན། རྩྭ་ཕུང་རི་རབ་ཙམ་དུ་ཚིག་པ་འདུག ཆུ་ནི་ཆུང་ངུའི་དུས་མ་བཀག་ན། ལུང་པ་ཆུ་ཡིས་གང་བའི་ཉེན་ཁ་ཡོང་། ལྕམ་སྲིང་འདི་གཉིས་ཆུང་དུས་མ་བསད་ན། ན་སོ་དར་ལ་ལོན་དུས་ངས་མི་ཐུབ། དེ་བས་གསོད་པའི་ཐབས་ཤིག་བྱེད་པ་ལ། བློན་པོ་རྣམས་ལ་སྲས་ལྕམ་སྲིང་འདི་གཉིས་བཀྲོང་ཤོག་ཟེར་ན་བཀྲོང་མི་ཡོང་། འདི་གཉིས་མེད་པར་བྱེད་པའི་ཐབས་ཤིག་བྱེད་པ་ལ། ད་ནི་ན་བརྫུ་ཆེན་པོ་ཞིག་འདེབས་དགོས་སྙམ་ནས། མལ་ས་ཆེན་པོ་ཞིག་བཅས། གདན་ལ་ཀོ་རུལ་བཏིངས། ལུས་ལ་ཀླད་པ་རུལ་པ་བྱུགས། འགྲམ་སྦུག་གཡས་སུ་བཙག་བཅུག  གཡོན་དུ་རམ་བཅུག ལུད་པ་སྔོ་དམར་ཁྱུག་ཁྱུག་བྱས་ནས། འཆི་བ་ལྟར་ཉལ་ཏེ་བསྡད་པས། བློན་པོའི་ཚོགས་རྣམས་ཀུན་འདུས་ནས། བདུད་མོའི་སྔས་མགོར་ཕྱིན་ཏེ། འདི་སྐད་ཅེས་ཞུས་སོ། །ཀྱཻ་བཙུན་མོ་རིན་པོ་ཆེ། སྐུ་སྙུང་བའི་སྙུང་ཟུག་གང་འདྲ་འདུག ཚ་པའི་ཚ་གཟེར་ཅི་འདྲ་འདུག ཟློག་སྒྱུར་གསོལ་འདེབས་བྱས་ན་ཨེ་ཕན་ནམ། སྨན་དཔྱད་རིམ་གྲོ་བྱས་ན་ཨེ་ཕན་ནམ། ཐབས་ཤེས་ཇི་ལྟར་བྱས་ན་ཕན་པ་གདའ། ཞེས་ཞུས་པས། བདུད་མོ་ན་རེ། ང་ཡི་སྒྱུ་ལུས་ན་ཚའི་ཟུག་གཟེར་ལ། ཟློག་སྒྱུར་གསོལ་འདེབས་བྱས་པས་ཕན་མི་ཡོང་། སྨན་དཔྱད་རིམ་གྲོ་བྱས་པས་ཅི་ལ་ཕན། ང་ལ་ཕན་ཐབས་ཁྱེད་ཚོས་བྱེད་མདོག་མེད། ཅེས་སྨུས་པས། བློན་པོའི་ཚོགས་རྣམས་ཀྱིས་འདི་སྐད་ཅེས་ཞུས་སོ། །ཀྱཻ་བཙུན་མོ་དམ་པ་སྙན་གསོན་དང་། སྐུ་སྙུང་བའི་སྙུང་གཟེར་ལ། ཐབས་ཇི་ལྟར་བྱས་ན་ཕན་པ་གདའ། སྲས་ལྕམ་སྲིང་གཉིས་ནི་སྐུ་ན་གཞོན། བདག་ཅག་བློན་པོའི་ཚོགས་རྣམས་ལ། ལྟ་རྒྱུ་བསམ་རྒྱུ་བཙུན་མོ་ཁྱེད་ལས་མེད། ཅེས་ཞུས་པས། ཡང་བདུད་མོས་འདི་སྐད་ཅེས་སྨྲས་སོ། །བློན་པོའི་ཚོགས་རྣམས་ང་ལ་ཚུར་ཉོན་དང་། ང་ཡི་སྒྱུ་ལུས་ན་ཚའི་ཟུག་གཟེར་ལ། ཐབས་ཇི་ལྟར་བྱས་ཀྱང་མི་ཕན་འདུག ཐབས་ནི་ཡོད་ཀྱང་ཁྱོད་ཚོས་བྱེད་མི་སྲིད། ང་ལ་ཕན་པའི་སྨན་ནི་འདི་འདྲ་འདུག ལྕམ་སྲིང་གཉིས་དང་ང་ཡི་ལོ་ཁམས་མི་མཐུན་པས། མིང་སྲིང་གཉིས་ཀྱི་སྙིང་བཏོན་ནས། ང་ལ་སྦྱིན་ན་ནད་ལ་ཕན་པ་འདུག ཅེས་སྨྲས་པས། དེར་བློན་པོའི་ཚོགས་རྣམས་ན་རེ། སྲས་ལྕམ་སྲིང་བཀྲོང་བ་ལས་འོས་མེད། ཅེས་ཞུས་པས། བདུད་མོས་འདི་སྐད་ཅེས་སྨྲས་སོ། །ཁྱོད་བློན་པོའི་ཚོགས་རྣམས་ཀྱིས་བཀྲོང་པའི་འོས་མིན་པས། ཡུལ་མཎྜལ་སྒང་གི་མངའ་འོག་ན་དགེ་སྡིག་སྤང་བླང་མི་ཤེས་པའི་ཤན་པ་སྤུན་གཉིས་བོས་ཤོག ཅེས་སྨྲས་པས། དེ་ནས་བླུན་པོ་རྣམས་ཀྱིས། བཙུན་མོའི་བཀའ་བཞིན་ཤན་པ་སྤུན་གཉིས་བོས་ནས། བདུད་མོའི་སྔས་མགོར་ཕྱིན་ཏེ་ཤན་པ་སྤུན་གཉིས་ལ་བཀའ་བསྩལ་དུ་གསོལ།ཞེས་ཞུས་པས། བདུད་མོས་འདི་སྐད་ཅེས་སྨྲས་སོ། །ང་ཡི་བཀའ་བཞིན་ཤན་པ་རྒན་གཞོན་གཉིས། །ལྕམ་སྲིང་མདུན་དུ་ད་ལྟ་མགྱོགས་པར་སོང་། །ཤན་པ་རྒན་པ་ཁྱོད་ཀྱི་བཤན་གྲི་ཡིས། །ལྷ་ཅིག་ཀུན་ཏུ་བཟང་མོའི་སྙིང་ཐོན་ཅིག །ཤན་པ་གཞོན་པ་ཁྱོད་ཀྱི་བཤན་གྲི་ཡིས། །ལྷ་སྲས་ཀུན་ཏུ་ལེགས་པའི་སྙིང་ཐོན་ཅིག །ཁོ་མོའི་ནད་ལ་ཕན་པའི་སྨན་ཡིན་པས། །ཚ་དྲོད་མ་ཡལ་སྔོན་ནས་ཚུར་ཁྱེར་ཤོག །རྔན་པར་འདོད་ཡོན་ལོངས་སྤྱོད་གང་དགོས་སྟེར། །མངའ་འབངས་རྣམས་ལ་ཚང་མ་བགོ་བཤའ་གྱིས། །མིང་སྲིང་གསོད་པར་ཁྱེད་གཉིས་མྱུར་དུ་སོང་། །ཞེས་སྨྲས་པས། ཤན་པ་གཉིས་ཀྱིས་བདུད་མོའི་བཀའ་བཞིན་མགྱོགས་པར་ཕྱིན་ནས། སྲས་མིང་སྲིང་བཞུགས་པའི་གཟིམ་ཆུང་གི་སྒོ་དེ་ཧར་ཏེ་ཕྱེ་ནས་བལྟས་པས། མིང་སྲིང་སྐུ་ན་གཞོན་པའི་སྟབས་ཀྱིས། སྐུ་རྩེད་ཀྱི་རྣམ་པ་ལ་བཞུགས་འདུག་པས་ལྷ་སྲས་ཀྱིས་ཤན་པ་གཟིགས་པ་ཙམ་གྱིས་ཤིན་ཏུ་འཇིགས་ཏེ། འདི་སྐད་གསུངས་སོ། །ཀྭ་ཡེ་གསོན་དང་ཤན་པ་རྒན་གཞོན་གཉིས། །སྔར་ཕན་ཁྱོད་གཉིས་ང་ཡི་རྩར་ཡོང་དུས། །སེམས་ལ་དགའ་སྤྲོ་ཆེན་པོ་ཡོང་གི་ཡོད། །ད་ལན་ཁྱོད་གཉིས་ང་ཡི་རྩར་ཡོང་དུས། །སེམས་ལ་འཇིགས་སྐྲག་ཆེན་པོ་བྱུང་ལགས་པས། །ཁྱོད་གཉིས་འདི་རུ་སྐུ་དོན་གང་ལ་བྱོན། །བློན་པོ་ཐམས་ཅད་བདུད་མོའི་དབང་དུ་སོང་། །བཙུན་མོ་བློན་པོའི་ཚོགས་རྣམས་བཀའ་གྲོས་མཛད། །ལྕམ་སྲིང་གཉིས་པོ་གསོད་པར་ཡོང་ལགས་སམ། །མིང་སྲིང་གཉིས་ལ་ཉེས་པ་གང་ཡང་མེད། །བསད་རང་བསད་ན་སྙིང་ཡང་མ་རྗེ་འམ། །ལས་ཀྱི་རྣམ་སྨིན་སྡིག་གྲིབ་མ་ཆེ་འམ། །བསམ་བློ་ཐོངས་དང་ཤན་པ་སྤུན་གཉིས་པོ། །ཞེས་གསུངས་ནས། སྤྱན་ཆབ་མང་དུ་བསིལ་བས། ཤན་པ་གཞོན་པ་དད་པ་སྐྱེས་ཏེ། ཁོང་རང་ཡང་མཆི་མ་ལྷུག་པར་བཏང་ནས། འདི་སྐད་ཅེས་ཟེར་རོ། །ཨ་ཇོ་གསོན་དང་ཤན་པ་རྒན་པ་ལགས། །སྐྱེས་པའི་ལོ་གྲངས་རྒན་ནས་རྒན་རྒྱུ་མེད། །རྣམ་རིག་ཤེས་པ་རྒན་ན་རྒན་པ་ཡིན། །མིང་སྲིང་གཉིས་ཀྱི་ཡབ་ཡུམ་བཞུགས་པའི་དུས། །སྐུ་ལུས་གྲིབ་མ་ལ་ཡང་འགོམ་མི་ནུས། །ད་ནི་སྐུ་ལ་བསྡོ་བ་ག་ལ་ཕོད། །དེ་བས་མིང་སྲིང་གཉིས་པོ་ཚེ་མཐར་ཐོངས། །ཕོ་བྲང་རྒྱ་སྒོའི་འོག་གྱི་ཁྱིའུ་མིང་སྲིང་གཉིས་ཀྱི་སྙིང་བཏོན་ནས། བདུད་མོ་ལ་བྱིན་ན་ཡོང་འདྲ་བྱས་པས། ཤན་པ་རྒན་པ་དགའ་སྟེ་གྲོས་གཅིག་ཏུ་མཐུན་ནས། མིང་སྲིང་གཉིས་ལ་འདི་སྐད་ཅེས་ཞུས་སོ། །ལེགས་པར་གསོན་དང་ལྷ་སྲས་ལྕམ་སྲིང་གཉིས། །བདུད་མོ་བློན་པོའི་ཚོགས་རྣམས་བཀའ་གྲོས་མཛད། །བདག་ཅག་སྡིག་ལ་བཀོད་པའི་ཤན་པ་གཉིས། །ལྷ་སྲས་ལྕམ་སྲིང་གཉིས་པོ་བཀྲོང་དུ་བཏང་། །ཡུམ་ཆེན་འགྲོ་བ་བཟང་མོ་བཞུགས་པའི་དུས། །སྐུ་ལུས་གྲིབ་མ་ལ་ཡང་འགོམ་མི་ནུས། །ད་ནི་སྐུ་ལ་བསྡོ་བ་ག་ལ་ཕོད། །སྲས་ཀྱི་མཆོག་གྱུར་མིང་སྲིང་རྣམ་པ་གཉིས། །མེ་ཏོག་ལྡུམ་རྭར་རྩེད་མོར་མ་བྱོན་ཅིག །གལ་ཏེ་ཧ་ཅང་བདུད་མོས་མཐོང་གྱུར་ན། །བཀྲོང་དང་མི་བཀྲོང་ཐེ་ཚོམ་མི་འདུག་པས། །ཕ་མ་ཡིན་ཀྱང་དེ་ལས་སློབ་རྒྱུ་མེད། །མིང་སྲིང་གཉིས་ཀྱི་ཐུགས་ལ་དེ་ལྟར་ཞོག །བདག་ཅག་ཤན་པ་གཉིས་ཀྱིས་བློན་པོ་ཚོར། །བསད་པ་སྔར་ལྟར་ཕག་ཏུ་ཁྱེར་ནས་ཞུ། །ཞེས་ཞུས་ནས། སྲས་ལྕམ་སྲིང་གཉིས་པོ་ཚེ་ཐར་བཏང་། དེ་ནས་ཕོ་བྲང་རྒྱ་སྒོའི་འོག་གི་ཁྱིའུ་གཉིས་བསད་དེ་སྙིང་བཏོན་ནས་བདུད་མོའི་སྔས་མགོར་ཁྱེར་ཏེ། འདི་སྐད་ཅེས་ཞུས་སོ། །ཀྱཻ་བཙུན་མོ་དམ་པ་སྙན་གསོན་དང་། བདག་ཅག་ཤན་པ་གཉིས་ཀྱིས་སྙིང་རྗེ་མེད་པར་ལྷ་སྲས་ལྕམ་སྲིང་བཀྲོངས། སྙིང་ཆེ་བ་དེ་ལྷ་ཅིག་ཀུན་ཏུ་བཟང་མོའི་སྙིང་ཡིན། སྙིང་ཆུང་བ་དེ་ལྷ་སྲས་རྒྱལ་བུ་ཀུན་ཏུ་ལེགས་པའི་སྙིང་ཡིན། བཙུན་མོ་དམ་པ་མཉེས་ཕྱིར་འབུལ་ལགས་སོ། །རྔན་པ་མངའ་རིག་ཕྱེད་ཀྱང་མི་ཞུ་ལགས། སྔར་རྒྱུན་ལྟར་བརྩི་བ་ཞུ་ཞུས་པས། བདུད་མོས་སྙིང་གཉིས་ཚྭ་ལ་འདྲེས་ནས་བཟས་ཏེ། འགྲམ་སྦུག་གི་བཙག་དང་རམ་གཉིས་བཏོན་ནས། རྒྱན་གཡུ་གོས་ལེགས་པར་བསྒྲོན་ཏེ། ཤན་པ་སྤུན་གཉིས་ལ་ཟས་ནོར་བསམ་གྱིས་མི་ཁྱབ་པ་གནང་ནས་སྐུ་དྭངས་བའི་ཚུལ་བསྟན། ཉིན་རེ་བཞིན་དུ་ཕོ་བྲང་རྩེ་ལ་ཞབས་བསྐོར་གནང་བ་ལས། སྲས་ལྕམ་སྲིང་གཉིས་སྐུ་ན་གཞོན་པའི་སྟབས་ཀྱིས། ཉིན་གཅིག་མེ་ཏོག་ལྡུམ་རྭར་སྐུ་རྩེད་ལ་བྱོན་པ་དང་དུས་མཚུངས་ནས། ཧ་ཅང་བདུད་མོས་མཐོང་སྟེ། མོའི་བསམ་པ་ལ། ཨ་ཁ་ཁ་དགེ་སྡིག་སྤང་བླང་མི་ཤེས་པའི་ཤན་པ་སྤུན་གཉིས་ཀྱིས། ལྷ་སྲས་མིང་སྲིང་གཉིས་མ་བཀྲོངས་པར་མེ་ཏོག་ལྡུམ་རྭར་སྐུ་རྩེད་ལ་ཕེབས་འདུག བློན་པོ་ཐམས་ཅད་ལྕམ་སྲིང་གཉིས་ལ་བརྩེ་དུང་ཆེ་བར་འདུག་པས། ཡང་སྔར་ལྟར་ན་བརྫུ་འདེབས་སྙམ་ནས་མལ་ས་ཆེན་པོ་ཞིག་བཅས། རྒྱན་གོས་རྣམས་སྔས་མགོར་ཁྲ་ཕུང་ངེ་བཞག་ནས། ཨ་ར་དང་ཨུ་རུའི་ཟུག་བཟོད་གླགས་མེད་པར་བྱས་ནས་ཉལ་བསྡད་པས། ཡང་བློན་པོ་རྣམས་བདུད་མོའི་སྔས་མགོར་ཕྱིན་ནས། འདི་སྐད་ཅེས་ཞུས་སོ། །ཀྱཻ་བཙུན་པོ་དམ་པ་སྙན་གསོན་དང་། །སྐུ་སྙུང་བའི་སྙུང་གཟེར་གང་འདྲ་འདུག ཚ་བའི་ཚ་གཟེར་ཅི་འདྲ་འདུག ཐབས་ཇི་ལྟར་བྱས་ན་དྲག་པ་འདུག ཅེས་ཞུས་པས། བདུད་མོ་ཁྲོས་ནས་གཏམ་ལན་ཚིག་གཅིག་ཀྱང་མི་སྨྲ་བར། མགོ་བོ་གཡོན་དུ་གཡོས་ནས་ཉལ་སོང་ངོ་། །ཡང་བློན་པོ་རྣམས་ཀྱིས་གཡོན་དུ་ཕྱིན་ཏེ། འདི་སྐད་ཅེས་ཞུས་སོ། །ཀྱཻ་བཙུན་མོ་དམ་པ་སྙན་གསོན་དང་། །ཁྱེད་བཙུན་མོ་སྙུང་བའི་སྙུང་གཞི་ལ། །ཐབས་ཇི་ལྟར་བྱས་ན་དྲག་པ་འདུག །ཡུམ་འགྲོ་བ་བཟང་མོ་དགུང་ལ་ཡལ་ནས་མེད། །ཡབ་རྒྱལ་པོ་ཁོང་ནི་ཁྱེད་ཀྱིས་བཙོན་ལ་བཅུག་ནས་མེད། །སྲས་ལྕམ་སྲིང་གཉིས་ནི་བཀྲོངས་ནས་མེད། །བདག་ཅག་བློན་པོའི་ཚོགས་རྣམས་ལ། །ལྟ་རྒྱུ་བསམ་རྒྱུ་བཙུན་མོ་ཁྱེད་ལས་མེད། །ཅེས་ཞུས་སོ། །དེ་ནས་གཟེ་མ་ར་མགོས་སྐུ་ལུས་བསྐྱོར་ནས་བཞེངས་ཏེ། བདུད་མོས་འདི་སྐད་ཅེས་སྨྲས་སོ། །ཀྭ་ཡེ་ཉོན་དང་འདིར་ཚོགས་བློན་པོ་རྣམས། །ང་ལ་ཕན་ཐབས་ཁྱེད་ཚོས་བྱེད་མདོག་མེད། །ལྕམ་སྲིང་གཉིས་ཀྱི་སྙིང་ཡིན་ཟེར་ནས་ནི། །ཁྱིའུ་མིང་སྲིང་གཉིས་ཀྱི་སྙིང་དེ་བྱིན། །བཙུན་མོ་ང་ནི་ཟུག་གཟེར་ཤིན་ཏུ་ཆེ། །ཕལ་ཆེར་མི་གཙང་གྲིབ་ཅིག་ཡིན་པ་འདྲ། །ད་ནི་ང་རང་ན་བ་ན་རུ་ཆུག །ཁོ་མོ་འཆི་ཉེན་འདུག་པས་འཆི་རུ་ཆུག །ཟེར་ནས་འགྱེལ་སོང་ངོ་། །དེ་ནས་བློན་པོ་རྣམས་ཀྱིས་འདི་སྐད་ཅེས་ཞུས་སོ། །ཀྱཻ་བཙུན་མོ་དམ་པ་སྙན་གསོན་དང་། །རྒྱལ་རྒྱུད་འཛིན་པར་ལྷ་སྲས་མེད་ཐབས་མེད། །གཉེན་མཚན་སྤེལ་བར་ལྷ་ཅིག་མེད་ཐབས་མེད། །འོན་ཀྱང་ད་ནི་ཅིས་ཀྱང་བཀྲོང་གསུངས་ན། །དེ་ལྟར་བཀྲོང་བ་ལས་ཀྱང་འོས་མེད་དོ། །ཞེས་ཞུས་པས། ཡང་བདུད་མོས་འདི་སྐད་ཅེས་སྨྲས་སོ། །ཁྱོད་བློན་འབངས་རྣམས་ཀྱིས་བཀྲོང་པའི་འོས་མིན་པས། ཡུལ་མཎྜལ་སྒང་གི་མངའ་འོག་ན། དགེ་སྡིག་སྤང་བླང་མི་ཤེས་པའི་ཉ་པ་གཉིས་ཡོད་པས། ཁོང་གཉིས་ད་ལྟ་མྱུར་དུ་བོས་ཤོག་ཅིག་ཅེས་སྨྲས་པས། དེ་ནས་བློན་པོ་རྣམས་ཀྱིས་ཉ་པ་གཉིས་བོས་པས། ཉ་པ་གཉིས་ཀྱིས་བདུད་མོའི་སྔས་མགོར་ཕྱིན་ནས་བདག་ཉ་པ་གཉིས་ལ་བཀའ་བསྩལ་དུ་གསོལ། ཞེས་ཞུས་པས། བདུད་མོས་འདི་སྐད་ཅེས་སྨྲས་སོ། །ཉ་པ་རྒན་པས་ལྷ་ཅིག་ཀུན་ཏུ་བཟང་མོ་རྒྱ་མཚོ་ལ་སྐྱུར་ཅིག ཉ་པ་གཞོན་པས་ལྷ་སྲས་རྒྱལ་བུ་ཀུན་ཏུ་བཟང་པོ་རྒྱ་མཚོ་ལ་སྐྱུར་ཅིག རྔན་པ་ལ་འདོད་ཡོན་ལོངས་སྤྱོད་གང་དགོས་སྟེར། མྱུར་དུ་གསོད་ཅིག  ཅེས་སྨྲས་པས། ཉ་པ་གཉིས་ཀྱིས་བདུད་མོའི་བཀའ་བཞིན་མྱུར་དུ་ཕྱིན་ནས། སྲས་ལྕམ་སྲིང་གཉིས་བཞུགས་པའི་གཟིམ་ཆུང་གི་སྒོ་དེ་ཧར་གྱིས་ཕྱེ་ནས་ཕྱིན་པས། སྲས་ལྕམ་སྲིང་གཉིས་ཡབ་ཡུམ་མེད་པའི་ཐུགས་ཁྲལ་ཆེན་པོའི་ངང་ལ་བཞུགས་འདུག་པ། དེ་ནས་ལྷ་སྲས་ཀྱིས་ཉ་པ་གཉིས་ལ་འདི་སྐད་ཅེས་གསུངས་སོ། །ཉ་པ་སྤུན་གཉིས་ང་ལ་ཚུར་ཉོན་དང་། །སྔར་ཕན་ཁྱོད་གཉིས་ང་ཡི་རྩར་ཡོང་དུས། །སེམས་ལ་དགའ་སྤྲོ་ཆེན་པོ་ཡོང་གི་ཡོད། །ད་ལན་ཁྱོད་གཉིས་འདི་རུ་ཡོང་བ་ལ། །སེམས་ལ་འཇིག་སྐྲགས་ཆེན་པོ་བྱུང་ལགས་པས། །ཁྱོད་གཉིས་འདི་རུ་སྐུ་དོན་གང་ལ་ཡོང་། །མ་གསང་དྲང་པོའི་གཏམ་གཅིག་བདག་ལ་སྨོས། །བློན་པོ་ཐམས་ཅད་བདུད་མོའི་དབང་དུ་སོང་། །བདུད་མོ་བློན་པོའི་ཚོགས་རྣམས་བཀའ་གྲོས་མཛད། །ངེད་མིང་སྲིང་གཉིས་གསོད་པར་ཡོང་ལགས་སམ། །ཉེས་ཆད་མེད་པར་གསོད་པ་ཕོད་ལགས་སམ། །བསད་རང་བསད་ན་སྙིང་ཡང་མི་རྫེའམ། །སྡིག་པའི་ལས་ཀྱི་རྣམ་སྨིན་མི་ཡོང་ངམ། །ཐུགས་བསམ་བཞེས་དང་ཉ་པ་སྤུན་གཉིས་པོ། །ཞེས་གསུངས་ནས། སྤྱན་ཆབ་མང་དུ་བསིལ་བས། ཉ་པ་གཉིས་ཀྱིས་འདི་སྐད་ཞུས་སོ། །ལེགས་པར་གསོན་དང་ལྟ་སྲས་ལྕམ་སྲིང་གཉིས། །བདུད་མོ་བློན་པོའི་ཚོགས་རྣམས་བཀའ་གྲོས་མཛད། །བདག་ཅག་སྡིག་ལ་བཀོད་པའི་ཉ་པ་གཉིས། །ཁྱེད་ཅག་ལྕམ་སྲིང་གཉིས་པོ་བཀྲོང་དུ་བཏང་། །ཡུན་རིང་མ་ཞོག་རྒྱ་མཚོར་སྐྱུར་ཞེས་ཟེར། །ཞེས་ཞུས་པས། ལྷ་སྲས་རྒྱལ་བུས་འདི་སྐད་ཅེས་གསུངས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །ཚོགས་ནས་བསགས་པས་མི་ལུས་རིན་ཆེན་ཐོབ། །དེ་ཡི་ནང་ནས་རྒྱལ་པོའི་སྲས་སུ་སྐྱེས། །ཚོགས་ནི་མ་བསགས་ཉ་པའི་ལག་ཏུ་སྤྲད། །འོག་གི་ཤིང་སྡོང་མ་ལ་སྤྱན་གཟིགས་དང་། །སྐྱ་ཁྲ་སྐུ་དབང་ཆེ་ནས་སྟེང་ན་འདུག །བྱེའུ་ཆུང་སྐྱོ་བའི་ཚུལ་གྱིས་འོག་ན་འདུག འདབ་ཆགས་ཡིན་ཀྱང་དཔོན་གཡོག་དེ་བཞིན་འདུག །ད་ནི་འདི་འདྲ་རྒྱལ་པོའི་སྲས་སྲོས་ལས། །ཁྲ་ཚང་འོག་གི་བྱེའུ་ཆུང་ཡིན་ན་དགའ། །མིང་སྲིང་གཉིས་ལ་ཨ་མ་མེད་པའི་ལན། །མིང་སྲིང་གཉིས་ཀྱི་ཨ་མ་དྲན་པ་ལ། །རྨི་ལམ་ནང་དུ་བྱུང་བའི་ཨ་མ་དེ། །ད་ལྟ་དངོས་སུ་ཡོད་ན་དགའ་བ་ལ། །ཡུམ་གྱི་མཆོག་གྱུར་འགྲོ་བ་བཟང་མོ་ལགས། །མིང་སྲིང་གཉིས་ལ་ཐུགས་རྗེས་གཟིགས་མཛོད་དང་། །ཞེས་གསུངས་ནས། སྤྱན་ཆབ་མང་དུ་བསིལ། ཉ་པ་གཉིས་ན་རེ། ཁྱེད་མིང་སྲིང་གཉིས་ཀྱིས་ཁ་བདེ་དང་ལྕེ་བདེ་བྱས་པས། སྔར་ཡང་ཤན་པ་སྤུན་གཉིས་ཀྱིས་ཚེ་ཐར་བཏང་ནས་འདུག ངེད་གཉིས་ཀྱི་རྩར་དེ་བཞིན་བྱས་ཀྱང་ཚེ་ཐར་ལ་མི་གཏོང་ཟེར་ནས། ལྕམ་སྲིང་གཉིས་ཀྱི་ཕྱག་གཉིས་རྒྱབ་ཏུ་དམ་པར་བཀྱིགས། དགྲ་མི་ཤ་ཟིན་པ་ལྟར་སྔ་ཐག་ཕྱི་ཐག་བྱས་ཏེ། ཉ་པ་གཉིས་ཀྱིས་མར་ཁྲིད་ནས། སྐས་སུ་འདྲུད་མ་བཤལ་དུ་སོང་ངོ་། །གྲོང་ཁྱེར་གྱི་འགག་དེར་ཕེབས་པ་དང་། གྲོང་མི་རྒན་གཞོན་ཀུན་ཚོགས་ནས། མྱ་ངན་གྱི་སྨྲེ་ངག་འདི་སྐད་ཟེར་རོ། །ལྷ་སྲས་ཉི་ཟླ་ལྟ་བུའི་ལྕམ་སྲིང་གཉིས། །མེ་ཏོག་ཞལ་ཕྱེ་མཆོད་ཁང་མ་འགྲིམས་པར། །མེ་ཏོག་སད་ཀྱིས་ཁྱེར་བ་ཤིན་ཏུ་ཕངས། །ཟེར་ནས་མཆི་མ་མང་དུ་བཏང་སྟེ། །སྡུག་བསྔལ་བཟོད་གླགས་མེད་པ་བྱུང་ན་ཡང་། བདུད་མོ་དབང་ཆེ་བས་བླུ་ཐབས་དང་བྱ་ཐབས་ནི་མེད། མི་ཀུན་ཁ་གདངས་ནས་ལུས་སོང་ངོ་། །དེ་ནས་ཉ་པ་གཉིས་ཀྱི་སྲས་ལྕམ་སྲིང་གཉིས་ཁྲིད་ནས་ཕྱིན་པས། རྒྱ་མཚོ་ཆེན་པོའི་འགྲམ་དུ་ཐག་ཉེ་བར་ཕེབས་པ་ལས། ལྷ་སྲས་རྒྱལ་བུས་ཨ་ཅེ་ལ་འདི་སྐད་ཞུས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །རྒྱ་མཚོཆེན་པོ་མ་ལ་སྤྱན་གཟིགས་དང་། །ངང་པ་ཨ་ཕ་ཡིན་པས་སྔོན་ལ་འགྲོ། །ངང་མོ་ཨ་མ་ཡིན་པས་རྗེས་ལ་འགྲོ། །ངང་ཕྲུག་ཚོགས་བསགས་ཕ་མའི་བར་ན་འདུག །འདབ་བྱ་ཡིན་ཀྱང་མ་བུའི་འདུ་ཤེས་འདུག །ད་ནི་འདི་འདྲའི་རྒྱལ་པོའི་སྲས་སྲོས་ལས། །ངང་པ་ཕོ་མོའི་ངང་ཕྲུག་ཡིན་ན་དགའ། །མ་བུ་མཉམ་དུ་སྡོད་རྒྱུ་བྱུང་ན་དགའ། །མིང་སྲིང་གཉིས་ལ་ཨ་མ་མེད་པས་ལན། །ཡུམ་གྱི་མཆོག་གྱུར་འགྲོ་བ་བཟང་མོ་ལགས། །ལྕམ་སྲིང་གཉིས་ལ་ཐུགས་རྗེའི་སྤྱན་གཟིགས་དང་། །ཞེས་གསུངས་ནས། སྤྱན་ཆབ་མང་དུ་བསིལ་བས། དེ་ནས་ཉ་པ་གཉིས་ཀྱིས་ལྕམ་སྲིང་གཉིས་ཀྱི་མཛེས་པའི་རྒྱན་རྣམས་བཀྲོལ། འཇམ་པའི་ན་བཟའ་རྣམས་བཤུས་ཏེ། དེ་ནས་ཉ་པ་གཞོན་པས། ལྟ་སྲས་སྙིང་དང་འདྲ་བ་དེ་སྤང་དུ་འུབ་སྟེ། བསྡུས་ནས་རྒྱ་མཚོ་ལ་སྐྱུར་གྲབ་བྱས་པས། ལྷ་སྲས་ཀྱིས་འདི་སྐད་ཅེས་གསུངས་སོ། །ཨ་ཇོ་གསོན་དང་ཉ་པ་གཞོན་པ་ལགས། །རྒྱ་མཚོ་འདི་ལ་སྐྱུར་ལོང་ཡོང་བ་འདུག །འཆི་ཁར་སྨོན་ལམ་ཚིག་གསུམ་འདེབས་སུ་ཆུག །སྨོན་ལམ་ཐེབས་ན་བསམ་པ་དེ་གས་རྫོགས། །ཞེས་གསུངས་པས། ཉ་པ་ན་རེ། སྨོན་ལམ་བཟང་པོ་ཞིག་ཡིན་ན་ཐོབས། །ངན་པ་གཅིག་ཡིན་ན་འདེབས་སུ་མི་འཇུག་ཟེར་བས། །ལྷ་སྲས་ཀྱི་ཞལ་ནས། །ཉ་པ་གཞོན་པ་ལགས། སྨོན་ལམ་ངན་པ་ག་ལ་འདེབས། །ཚེ་སྔོན་ཡང་སྨོན་ལམ་མ་ཐེབས་པའི་རྐྱེན། །ད་ལན་ཚེ་ལ་བར་ཆད་བྱུང་བ་ཡིན། །ངས་མཁའ་འགྲོ་སྡེ་ལྔ་ལ་དབྱངས་ཤིག་འབུལ་གྱི་ཡིན། །ཞེས་གསུངས་ནས། གསོལ་འདེབས་ཀྱི་མགུར་འདི་བཞེས་སོ། །ཤར་རྡོ་རྗེ་རིགས་ཀྱི་མཁའ་འགྲོ་ལགས། །ཤར་གྱི་དར་ཐག་ཤར་ནས་ཐོངས། །ལྷོ་རིན་ཆེན་རིགས་ཀྱི་མཁའ་འགྲོ་ལགས། །ལྷོ་ཡི་དར་ཐག་ལྷོ་ནས་ཐོངས། །ནུབ་པདྨ་རིགས་ཀྱི་མཁའ་འགྲོ་ལགས། །ནུབཀྱི་དར་ཐག་ནུབ་ནས་ཐོངས། །བྱང་ལས་ཆེན་རིགས་ཀྱི་མཁའ་འགྲོ་ལགས། །བྱང་གི་དར་ཐག་བྱང་ནས་ཐོངས། །དབུས་སྣང་མཛད་རིགས་གྱི་མཁའ་འགྲོ་ལགས། །དབུས་ཀྱི་དར་ཐག་དབུས་ནས་ཐོངས། །ལྕམ་སྲིང་མཁའ་འགྲོའི་གླིང་དུ་དྲོངས། །མིང་སྲིང་གཉིས་ལ་ཨ་མ་མེད་པས་ལན། །ཡུམ་གྱི་མཆོག་གྱུར་འགྲོ་བ་བཟང་མོ་ལགས། །མིང་སྲིང་གཉིས་ལ་ཐུགས་རྗེའི་སྤྱན་གྱིས་གཟིགས། །ཞེས་གསུངས་ནས། སྤྱན་ཆབ་མང་དུ་བསིལ་བས། ཉ་པ་གཞོན་པས་ཀྱང་མཆི་མ་མང་དུ་བཏང་ནས། ཉ་པ་གཞོན་པས་འདི་སྐད་སྨྲས་སོ། །ཨ་ཇོ་གསོན་དང་ཉ་པ་རྒན་པ་ལགས། །ལྕམ་སྲིང་གཉིས་ཀྱི་ཡབ་ཡུམ་བཞུགས་པའི་དུས། །སྐུ་ལུས་གྲིབ་མ་ལ་ཡང་བགོམ་མི་ནུས། །ད་ནི་ཡབ་ཡུམ་བྲལ་བའི་དུས་འདི་རུ། །ལྷ་སྲས་ལྕམ་སྲིང་བཀྲོང་བ་ག་ལ་ཕོད། །ལྕམ་སྲིང་གཉིས་པོ་ཚེ་ཐར་གཏོང་ལ་ཞོག །འབྲུ་སྣ་འཛོམས་པ་འདི་མིན་གཞན་ན་ཡོད། །བཟའ་མི་བསྡོངས་ནས་རྒྱལ་ཁམས་གཞན་ན་འགྲོ། །ག་ནས་བལྟས་ཀྱང་ལྕམ་སྲིང་བཀྲོང་མི་ཕོད། །ཅེས་སྨྲས་པས། ཉ་པ་རྒན་པས་ཡང་མཆི་མ་ལྷུག་པར་བཏང་ནས། ལྷ་སྲས་གཉིས་ལ་མཛེས་པའི་རྒྱན་བསྒྲོན། འཇམ་པའི་ན་བཟའ་ཕུལ་ནས། །འདི་སྐད་ཅེས་སྨྲས་སོ། །ལེགས་པར་གསོན་དང་ལྷ་སྲས་ལྕམ་སྲིང་གཉིས། །བདུད་མོ་བློན་པོའི་ཚོགས་རྣམས་བཀའ་གྲོས་མཛད། །བདག་ཅག་སྡིག་ལ་སྤྱོད་པའི་ཉ་པ་གཉིས། །ལྷ་སྲས་ལྕམ་སྲིང་གཉིས་པོ་བཀྲོང་སུ་བཏང་། །ངེད་སྤུན་གཉིས་ཀྱིས་བཀྲོང་དུ་མི་ནུས་པས། །ད་ནི་ལྷ་སྲས་ལྕམ་སྲིང་གཉིས་པོ་རང་། །ཡུལ་ཕྱོགས་མཎྜལ་སྒང་དུ་མ་བྱོན་ཅིག །བདུད་མོ་བློན་པོའི་ཚོགས་རྣམས་ཐམས་ཅད་ཀྱིས། །བཀྲོང་དང་མི་བཀྲོང་ཐེ་ཚོམ་མི་འདུག་པས། །འདི་རུ་མི་བཞུགས་རྒྱ་གར་ཤར་ལ་བྱོན། །རྒྱ་གར་ཤར་ཕྱོགས་དམ་པའི་ཆོས་ལ་དཀར། །མི་རྣམས་ཆོས་སེམས་ཆེ་བས་སྦྱིན་པར་འབུངས། །ཇི་ལྟར་བྱས་ཀྱང་རྒྱ་གར་ཤར་ཕྱོགས་དྲག །རྒྱ་གར་ཤར་ལ་ཟས་སྐོམ་སློང་དུ་བྱོན། །ཕ་མ་ཡིན་ཀྱང་འདི་ལས་སློབ་རྒྱུ་མེད། །ཅེས་ཞུས་ནས། སྐྱེལ་མ་ཐག་རིང་པོའི་སར་བྱས་ནས། སེམས་སྐྱོ་བའི་ངང་ནས་ཕྱིར་ལོག་གོ །དེ་ནས་ཉ་པ་གཉིས་ཀྱང་ཡུལ་མཎྜལ་སྒང་ནས་བཟའ་ཟླ་བླངས་ནས་ཡུལ་ཕྱོགས་གཞན་དུ་སོང་ངོ་། །དེ་ནས་ལྕམ་སྲིང་གཉིས་ལུག་རྒྱ་ཡན་ལ་བཏང་བ་བཞིན། གར་ཡང་འགྲོ་ངོ་མ་ཤེས་པར། ཞལ་གདངས་གདངས་དར་ཅིག་ལུས། རྒྱལ་པོའི་སྲས་སུ་སོང་བས་གང་ལ་ཡང་བྱོན་ནི་མ་མྱོང་། ལམ་སྣ་ས་རྒྱུས་ནི་མེད་དགོངས་ནས། ལྷ་ཅིག་ཀུན་ཏུ་བཟང་མོས། ལྷ་སྲས་ལ་འདི་སྐད་ཅེས་ཞུས་སོ། །ལྷ་སྲས་རྒྱལ་བུ་བདག་ལ་ཚུར་གསོན་དང་། །འདི་རུ་བསྡད་ན་ཟས་དང་གོས་ནི་མེད། །ཉ་པ་གཉིས་ཀྱིས་ལུང་བསྟན་བྱས་པ་བཞིན། །འདི་རུ་མི་སྡོད་རྒྱ་གར་ཤར་ལ་འགྲོ། །རྒྱ་གར་ཤར་ལ་ཟས་སྐོམ་སློང་དུ་འགྲོ། །གསུངས་པས། ལྷ་སྲས་རྒྱལ་པོས་ཨ་ཅེ་དེ་ལྟར་ལེགས་ན་ལམ་སྣ་མཛོད་ཅེས་གསུངས། དེ་ནས་ལྷ་ཅིག་ཀུན་ཏུ་བཟང་མོ་དགུང་ལོ་ལྔ་ལ་བཞེས་པ་དེས་ལམ་སྣེ་མཛད། ལྷ་སྲས་རྒྱལ་བུ་དགུང་ལོ་གསུམ་ལ་བཞེས་པ་དེས་མཇུག་ཏུ་བྱོན་ནས། རྒྱ་གར་གྱི་ཕྱོགས་ལ་ཞལ་གཟིགས་ནས་བྱོན་པས། ནགས་གསེབ་སྟུག་པོ་ཞིག་ཏུ་ཕེབས་པ་དང་། དེའི་དུས་ལྷ་སྲས་རྒྱལ་བུ་ཐུགས་སྐྱོ་བ་དང་། ཞལ་སྐྱེམས་པ། ཡབ་ཡུམ་གཉིས་དྲན་པ་བཅས་བྱུང་ནས། ལྷ་སྲས་ཀྱིས་ཞུས་པ། ཨ་ཅེ་གསོན་དང་ལྷ་ཅིག་ཀུན་བཟང་ལགས། །དེ་རིང་འགྲོ་བའི་ལམ་བུའི་རིང་བ་ལ། །སང་ཉིན་འགྲོ་བའི་ལམ་ནི་རིང་ཐུང་ཡོད། །དེ་རིང་ཉི་མའི་བཟའ་བཏུང་དཀོན་པ་ལ། །སང་ཉིན་བཟའ་འཐུང་འབེལ་དཀོན་གང་འདྲ་ཡོད། །དེ་རིང་ཉིན་དེར་ཨ་མའི་དྲན་པ་ལ། །སང་ཉིན་ཕྱིན་ན་ཨ་མ་ཨེ་འཕྲད་དམ། །མིང་སྲིང་གཉིས་ལ་ཨ་མ་མེད་པའི་ལན། །ཞེས་གསུངས་ནས་སྤྱན་ཆབ་མང་དུ་བསིལ་བས། དེ་ནས་ཨ་ཅེ་ལྷ་ཅིག་ཀུན་ཏུ་བཟང་མོས། ལམ་རྒྱུས་མེད་ཀྱང་ཡོད་པ་ལྟར་བྱས་ཏེ། ལྷ་སྲས་ཐུགས་སེམས་གསོ་བའི་ཕྱིར། འདི་སྐད་ཅེས་ཞུས་སོ། །ལྷ་སྲས་རྒྱལ་བུ་ཚུར་གསོན་དང་། །དེ་རིང་འགྲོ་བའི་ལམ་ཐག་རིང་བ་ཡོད། །སང་ཉིན་འགྲོ་བའི་ལམ་ཐག་ཐུང་བ་ཡོད། །དེ་རིང་ཉི་མོའི་ཟས་སྐོམ་དཀོན་པ་ཡོད། །སང་ཉིན་ཉི་མོའི་ཟ་འཐུང་འབེལ་བ་ཡོད། །རོ་མཆོག་ལྡན་པའི་ཤིང་ཏོག་མང་པོ་ཡོད། །དེ་རིང་ཉིན་དེར་ཨ་མ་ལོས་ཀྱང་དྲན། །སང་ཉིན་ཕྱིན་ན་ཨ་མ་འཕྲད་ལས་ཆེ། །མིང་སྲིང་གཉིས་ལ་ཨ་མའི་སྐལ་བ་མེད། །ཡུམ་གྱི་མཆོག་གྱུར་འགྲོ་བ་བཟང་མོ་ལགས། །མིང་སྲིང་གཉིས་ལ་ཐུགས་རྗེའི་སྤྱན་གཟིགས་དང་། །ཞེས་གསུངས་ནས་ཐུགས་ཁྲལ་ཆེན་པོས་སྤྱན་ཆབ་མང་དུ་བསིལ་བཞིན་ལྷ་སྲས་སྙིང་དང་འདྲ་བ་དེ་ཁྲིད་ནས་རྒྱ་གར་གྱི་ཤར་ཕྱོགས་ཀྱི་ནགས་གསེབ་ལ་ཞལ་གཟིགས་ནས་བྱོན་པས། ནགས་གསེབ་སྟུག་པོ་མིག་གིས་མི་མཐོང་བ་ཞིག་ཏུ་ཕེབས་སོ། །དེར་བྱ་བྱིའུ་ལ་སོགས་པའི་འདབ་བྱའི་རིགས་མང་པོས་སྐད་སྣ་ཚོགས་སྒྲོག་པ། སྤྲ་དང་སྤྲེའུ་གཅན་གཟན་ལ་སོགས་པ་མང་པོ་ཡོད་པ། དུག་སྦྲུལ་གདུག་པ་ཅན་ཡོད་པའི་ས་དེར་བྱོན་པས། དེའི་དུས་སུ་ལྷ་སྲས་དེ། བཀྲེས་པ་དང་། ཞལ་སྐྱེམས་པ། ཐུགས་སྐྱོ་བ་བཅས་བྱུང་ནས། སྤྱན་ཆབ་བསིལ་ཞིང་། འདི་སྐད་ཅེས་གསུངས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །བདག་ལ་བསམ་རྒྱུ་ཨ་ཅེ་ཁྱེད་ལས་མེད། །བཟའ་བཏུང་སྟེར་རྒྱུ་མེད་པས་ཐབས་དང་བྲལ། །སྔོ་མོའི་ཆུ་གཅིག་ལུང་པ་གང་ན་ཡོད། །བདག་ལ་སྲོག་འཛིན་ཆུ་ཞིག་གནང་དང་གསུངས། །ཨ་ཅེས་ཀྱང་སྤྱན་ཆབ་བསིལ་ཞིང་ལྷ་སྲས་ལ་འདི་སྐད་ཅེས་གསུངས་སོ། །ལྷ་སྲས་རྒྱལ་བུ་བདག་ལ་ཚུར་གསོན་དང་། །འདི་རུ་མི་བཞུགས་རི་རྩེ་ཡ་ལ་འགྲོ། །རི་རྩེ་ཡ་ལ་ཆུ་ཞིག་འཚོལ་དུ་འགྲོ། །དེ་ནས་རྒྱ་གར་ཤར་གྱི་ཕྱོགས་ལ་འགྲོ། །ཞེས་གསུངས་ནས།ལྕམ་སྲིང་གཉིས་ཀྱིས་རི་རྩེ་དེ་ན་གཟིགས་ནས་བྱོན་པས། རི་རྩེ་དེ་ལ་ཆུ་ནི་མི་འདུག་པས། ཨ་ཅེས་ཆུ་ཞིག་འཚོལ་དུ་འགྲོ་བས། དེའི་བར་དུ་ལྷ་སྲས་རང་ཅུང་ཟད་འདིར་བཞུགས་ཤིག་ཅེས་གསུངས་ཏེ་བྱོན་པས། དུས་དེར་ཡུམ་གྱིས་བྱ་རོག་གཅིག་ཏུ་སྤྲུལ་ནས་རི་རྩེ་དེར་བབས་པས། ལྷ་ཅིག་ནི་བྱ་རོག་བབས་པའི་ས་དེར་ཆུ་ཞིག་ཡོད་པ་འདྲ་ཐུགས་ལ་དགོངས་ནས་དེར་བྱོན་པས། ཆུ་ནི་མི་འདུག  ཆུ་དང་འདམ་འདྲེས་པ་ཅུང་ཟད་ཅིག་འདུག་པས། ཐོག་མར་ཨ་ཅེ་རང་གིས་བཞེས། ད་ཆུ་འཁུར་བའི་སྣོད་ནི་མེད་དགོངས་ཏེ། སྐུ་སྐེད་ལ་ཕྱག་གིས་བཅག་པས། ཡུམ་འགྲོ་བ་བཟང་མོས་གནང་བའི་སྐུ་རགས་རྒྱ་དམར་གཅིག་ཡོད་པས། དེའི་ཁུག་ཏུ་ཆུ་དང་འདམ་འདྲེས་མ་ཅུང་ཟད་ཁྱེར་ནས། རི་ལོགས་དེར་ཡར་བྱོན་པས། རི་རྩེ་དེ་མཐོ་ནས་མྱུར་དུ་བྱོན་མི་ཐུབ་པར། དེའི་བར་ལ་ནི་ལྷ་སྲས་ལ། ཡོང་ངོ་སྙམ་པའི་ཨ་ཅེའི་ཆུ་ནི་མ་བྱུང་ལ། མི་ཡོང་སྙམ་པའི་དུག་སྦྲུལ་ནག་པོ་བྱུང་། ལྷ་སྲས་ལ་དུག་སྦྲུལ་གྱི་ཁ་རླངས་ཕོག་ནས། ཤིང་སྡོང་འགྱེལ་བ་ལྟར་གྲོངས་སོང་བས། དེ་ནས་ལྷ་ཅིག་རི་རྩེ་དེར་བྱོན་པ་དང་། ལྷ་སྲས་རྒྱལ་བུ་གྲོངས་པ་དང་ཐུག་པས། ལྷ་ཅིག་གིས་སྐུ་ལུས་ལ་དྲོད་ཨེ་འདུག་གཟིགས་པས་དྲོད་ནི་མི་འདུག་པས། ལྷ་སྲས་ཀྱི་ཕུང་པོ་དེ་སྤང་དུ་བཞེས་ཏེ། ཞལ་ལ་ཞལ་སྦྱར་ཐུགས་ལ་ཐུགས་སྦྱར་ནས་མྱ་ངན་གྱི་སྨྲེ་ངག་འདི་ལྟར་འདོན་ནོ། ཀྱེ་མ་ཀྱེ་མ་བཟང་མོ་བདག་གི་སྡུག་བསྔལ་ལ། །ཀྱེ་ཧུད་ཀྱེ་ཧུད་ཇི་ལྟར་བྱས་པ་དྲག །ད་ནི་ལྷ་ཅིག་ཀུན་བཟང་ང་ཡི་སྡུག་བསྔལ་ལ། །ཡུམ་འགྲོ་བ་བཟང་མོ་དགུང་ལ་ཡལ་བའི་དུས། །བསོད་ནམས་མེད་པའི་མིང་སྲིང་གཉིས་པོ་ལུས། །ཡབ་ཆེན་རྒྱལ་པོ་བཙོན་ལ་བཅུག་པའི་དུས། །སྐྱེ་ཕྲན་ནུས་མེད་མིང་སྲིང་གཉིས་པོ་ལུས། །ལྷ་སྲས་རྒྱལ་བུ་ལམ་གྲོགས་གཤེགས་པའི་ཚེ། །འཆི་འབྲེལ་མེད་པའི་སྡུག་བསྔལ་ཅན་མ་ལུས། །ཀྱེ་མ་ཀྱེ་མ་བདག་གི་སྡུག་བསྔལ་ལ། །ད་ནི་འདི་འདྲའི་སྡུག་བསྔལ་མྱོང་བ་ལས། །ཁ་སང་སྡིག་སྤྱོད་ཉ་པ་སྤུན་གཉིས་ཀྱིས། །རྒྱ་མཚོ་ཆེན་པོ་དེ་ལ་མི་སྐྱུར་བ། །ཞེས་གསུངས་ནས། སྲས་ཀྱི་པུར་ལ་བཅངས་ནས་གྲོངས་ཚད་ཚད་ཡོད་པ་ལ། དེའི་དུས་སུ། ཡུམ་འགྲོ་བ་བཟང་མོ་ནུབ་ཕྱོགས་མཁའ་འགྲོའི་གླིང་ན། མཁའ་འགྲོ་མ་རྣམས་ལ་ཆོས་འཆད་བཞིན་ཡོད་པས། སྤྱན་ཆབ་ཁྲ་བསིལ་ལེ་བྱུང་བས། མཁའ་འགྲོ་མ་རྣམས་ཀྱིས་ཞུས་པ། འགྲོ་བ་བཟང་མོ་སྤྱན་ཆབ་བསིལ་བ་ཇི་ལྟར་ལགས་ཞུས་པས། འགྲོ་བ་བཟང་མོའི་ཞལ་ནས་ཀྱང་། མཁའ་འགྲོ་ཐམས་ཅད་སྙན་གསོན་དང་། །མཁའ་འགྲོ་སྡེ་ལྔས་ལུང་བསྟན་མཛད་པ་བཞིན། །ཁོ་མོ་བདག་གིས་མཐའ་འཁོབ་མོན་ཡུལ་དུ། །བྱ་སྙམ་མེད་པའི་རྒྱལ་པོའི་བཙུན་མོ་བྱས། །སྨོན་ལམ་དབང་གིས་མིང་སྲིང་གཉིས་བྱུང་བའི། །བདག་ལ་གློ་བུར་བདུད་ཀྱི་བར་ཆད་བྱུང་། །ཧ་ཅང་ཟེར་བའི་བདུད་མོ་དེའི། །བྲན་གཡོག་གཟེ་མ་ར་མགོ་དེས། །བདག་ཅག་མ་བུ་གསུམ་པོ་མཐོང་། །གཡོག་མོས་བདུད་མོའི་དྲུང་དུ་ཞུས། །བདེན་རྫུན་བདུད་མོས་བལྟ་རུ་ཡོང་། །བདག་ཅག་མ་བུ་གསུམ་པོ་མཐོང་། །ཞེ་སྡང་ལངས་ནས་འདི་སྐད་ཟེར། །ང་ཧ་ཅང་ཟེར་བའི་མིང་ཅན་ལ། །ཁྱོད་འགྲོ་བ་བཟང་མོ་དགྲ་རུ་བྱུང་། །དེ་རིང་ཉི་མའི་འཁོར་ལོ་ལ། །ཁྱོད་མ་བུ་གསུམ་པོ་མ་ཐུབ་ན། །ང་ཆོས་སྐྱོང་སྲུང་མ་རྣམས་ཀྱིས་བཞེས་ཤིག་ཟེར། །བདུད་མོས་སོ་ཐམ་མཆེ་ཉེར་ལན་གསུམ་བྱས། །འཇིགས་པའི་མཆེ་ཉེར་འདུས་པའི་དུས། །བདག་གི་བློ་ལ་འདི་ལྟར་ཤར། །མ་མཁའ་འགྲོའི་ལུང་བསྟན་མཛད་པ་བཞིན། །བདག་གིས་འགྲོ་བའི་དོན་དུ་འཕུར་ནས་ཡོང་། །སྙིང་ནས་བརྩེ་བའི་མིང་སྲིང་གཉིས་པོ་ལུས། །མིང་སྲིང་གཉིས་ལ་བདུད་མོའི་བར་ཆད་བྱུང་། །ཕོ་བྲང་ནང་ནས་ཕྱིར་སྤྱུགས་ཁྱི་ལྟར་འཁྱམས། །སྲས་ལ་དུག་སྦྲུལ་ནག་པོའི་ཁ་རླངས་ཕོག །གློ་བུར་སྐད་ཅིག་ཉིད་ལ་གྲོངས་ཚར་འདུག །སྲས་མོ་སྨྲེ་ངག་འདོན་ཞིང་གྲོངས་ལ་ཁད། །དམ་ཆོས་འཆད་འཕྲོ་དེ་རིང་འཆད་དགོས་འདུག །དེ་རིང་སྤྲུལ་པ་སྣ་གཅིག་སྟོན་དགོས་འདུག །ཅེས་གསུངས་ནས། ཐོག་མར་སྨན་སྦྲུལ་དཀར་པོ་གཅིག་ཏུ་སྤྲུལ་ཏེ། ལྷ་སྲས་ཀྱི་ཞབས་མཐིལ་ནས་འཇིབས་པས། ལྟ་སྲས་རྒྱལ་བུ་ཐུགས་དྲན་གསོས་ཏེ། ཨ་ཅེ་ལ་སྤྱན་གཟིགས་ནས། མིང་སྲིང་གཉིས་པོ་མཇལ། དེ་ནས་སྨན་སྦྲུལ་དེ་ཤིང་སྡོང་གཅིག་གི་རྩེ་ནས་ནམ་མཁའ་ལ་འཕུར་སོང་ངོ་། །དེ་ནས་ལྷ་སྲས་ཀྱིས་ཨ་ཅེ་ལ་འདི་སྐད་ཅེས་ཞུས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །སྙམ་པའི་ཨ་ཅེའི་ཆུ་ནི་མ་བྱུང་ལགས། །མི་ཡོང་སྙམ་པའི་དུག་སྦྲུལ་ནག་པོ་བྱུང་། །ཁ་རླངས་ཕོག་ནས་དར་གཅིག་ཤི་བ་འདྲ། །གློ་བུར་བར་ཆད་ཆེན་པོ་བྱུང་ལགས་ཏེ། །བདག་ལ་བཤོལ་བྱའི་ཐབས་ནི་གང་ཡང་མེད། །བདག་གི་རྐང་མཐིལ་འཇིབས་པའི་སྨན་སྦྲུལ་དེ། །ཤིང་གི་རྩེ་ནས་བར་སྣང་མཐོང་ལ་འཕུར། །སྨན་སྦྲུལ་དེ་ལྟར་ཨ་ཅེས་གཟིགས་ལགས་སམ། །ཡུམ་ཆེན་མཆོག་གི་སྤྲུལ་པ་ཡིན་ལས་ཆེ། །ཡུམ་སྲས་མཉམ་དུ་སྡོད་རྒྱུ་ཡོང་ལགས་ཏེ། སྨན་སྦྲུལ་དེ་ནི་དགུང་སྔོན་མཐོངས་ལ་ཡལ། །བྱ་ཐབས་མེད་པ་ཇི་ལྟར་བྱས་ཀྱང་སྡུག །ཨ་ཅེས་བདག་ལ་ཆུ་ཞིག་གནང་མཛོད་དང་། །ཞེས་གསུངས་པས། ཨ་ཅེས་འདི་སྐད་ཅེས་ཞུས་སོ། །ལྷ་སྲས་རྒྱལ་བུ་བདག་ལ་ཚུར་གསོན་དང་། །ཉེ་ལོགས་འདི་ན་ཆུ་ནི་མི་འདུག་པས། རི་རྩ་མ་ན་འདམ་ཆུ་ཅུང་ཟད་འདུག །ཆུ་སྣོད་མ་འབྱོར་སྐེ་རགས་ཁུག་ཏུ་ཁྱེར། །རི་རྩེ་མཐོ་བས་དུས་ལ་མ་འབྱོར་བས། །སླེབས་གདོང་ལྷ་སྲས་ཁྱེད་ཉིད་གྲོངས་དང་ཐུག །ཁྱེད་ཀྱི་སྐུ་པུར་བཅངས་ནས་སྨྲེ་ངག་འདོན། །གློ་བུར་སྨན་སྦྲུལ་གཅིག་གིས་ཞབས་མཐིལ་འཇིབས། །ལྷ་སྲས་རྒྱལ་བུ་སྐུ་གསོས་དགའ་དྲག་ནས། །སྨན་སྦྲུལ་འཛིན་པ་ཨ་ཅེས་མ་བྱུང་ངོ་། །ད་ནི་ཆུ་ཡང་འབོར་ནས་མི་འདུག་ལགས། །ཞེས་ཞུས་པས། ལྷ་སྲས་ཀྱི་ཞལ་ནས་ཆུ་ཁུར་བའི་སྣོད་དེ་སྟོན་དང་གསུངས་པས། ལྷ་ཅིག་གིས་སྐེ་རགས་དེ་ཕུལ་བས། ལྷ་སྲས་རྒྱལ་བུས་སྐེ་རགས་རློན་པ་དེ་ཞལ་དུ་འཇིབས་པས་མེ་ཏོག་ལ་ཆར་བབས་པ་བཞིན་བྱུང་བས། ལྷ་སྲས་ཀྱིས་འདི་སྐད་ཅེས་གསུང་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །འདི་རུ་བསྡད་ན་དུག་སྦྲུལ་ནག་པོ་ཡོང་། །དུག་སྦྲུལ་བྱུང་ན་མིང་སྲིང་གཉིས་ཀ་ཟ། །འདི་རུ་མི་སྡོད་རྒྱ་གར་ཤར་ལ་འགྲོ། །རྒྱ་གར་ཤར་ལ་ཟས་སྐོམ་སློང་དུ་འགྲོ། །ཞེས་གསུངས་བྱོན་པས། ནགས་གསེབ་སྟུག་པོ་ཞིག་ཏུ་ཕེབས་པ་ལས། ཡུམ་གྱིས་སྤྲེའུ་ཞིག་ཏུ་སྤྲུལ་ནས་བྱོན་ཏེ། སྤྲེའུ་དེས་བྱམས་པའི་སྤྱན་གྱིས་གཟིགས་ནས་མིང་སྲིང་གཉིས་ཡིད་དུ་འོང་བ་ལ་གསུངས་པས། ལྷ་སྲས་ཀྱི་ཐུགས་ལ་ནགས་ཀྱི་བདག་པོ་སྤྲེའུ་ཡིན་པ་འདུག་དགོངས་ནས། སྤྲེའུ་ལ་འདི་སྐད་ཅེས་གསུངས་སོ། །སྤྲེའུ་ཁྱོད་ཀྱིས་ངེད་མིང་སྲིང་གཉིས་ལ། ཤིང་ཏོག་འབྲས་བུའི་ལུང་བསྟན་ཞིག་གནང་དང་གསུངས་པས། སྤྲེའུ་ན་རེ། ཁྱེད་མིང་སྲིང་གཉིས་ཤིང་དཔག་བསམ་སྡོང་པོའི་བསིལ་གྲིབ་ལ་བཞུགས་ཤིག་ཟེར་ནས། སྤྲེའུ་དེས་ཨ་མྲའི་སྡོང་པོའི་རྩེ་ལ་འཛེགས་ཏེ། བཅུད་ལྡན་ཤིང་ཏོག་མང་པོ་ཕབ་པས། མིང་སྲིང་གཉིས་ཤིང་ཏོག་གིས་ཡིད་ཚིམ་པར་གྱུར་ནས། ཤིང་ཏོག་ལ་ལོངས་སྤྱོད་ཀྱིས་བཞུགས་སོ། །གནས་དེར་ཤིང་ཏོག་རིགས་མི་འདྲ་བ་མང་དུ་འདུག་པར། རོ་བརྒྱ་དང་ལྡན་པའི་བཅུད་ཀྱིས་ངོམས་ནས་སྐྱིད་པའི་སྐལ་པ་དང་ལྡན་པའི་དུས་གཅིག་བྱུང་ངོ་། །དེ་ནས་རེ་ཞིག་སོང་བའི་ཚེ། ཧ་ཅང་བཙུན་མོས་ཕོ་བྲང་ཡང་ཐོག་རྩེ་ལ་ཞབས་བསྐོར་ལ་བྱོན་པས། རྒྱ་གར་ཤར་གྱི་ནགས།གསེབ་ན་མིང་སྲིང་གཉིས་ཡོད་པ་མཐོང་སྟེ། ཕོ་བྲང་རྩེ་ནས་དར་པོ་ཆེ་དགུང་སྔོན་མཐོངས་ལ་ཕྱར། དུང་མོ་ཆེ་བར་སྣང་མཐོངས་ལ་བུས། རྔ་བོ་ཆེ་ཕོ་བྲང་རྩེ་ནས་བརྡུངས་པས། བློན་འབངས་ཐམས་ཅད་འདུས་བྱུང་བས། བདུད་མོས་འདི་སྐད་སྨྲས་སོ། །ཀྱེ་མ་བློན་པོའི་ཚོགས་རྣམས་ཚུར་ཉོན་དང་། །སྡིག་གཅོད་མི་ངན་ཉ་པ་སྤུན་གཉིས་ཀྱིས། །སྲས་མཆོག་ལྕམ་སྲིང་རྒྱ་མཚོར་ག་ལ་སྐྱུར། །རྒྱ་གར་ཤར་གྱི་ནགས་གསེབ་སྟུག་པོའི་ཁྲོད། །ཤིང་ཏོག་ཟ་བཞིན་བསྡད་པ་ང་ཡིས་མཐོང་། །སྡིག་གཅོད་ཉ་པ་འཁོར་བཅས་ཡུལ་གྱར་འདུག །ད་ནི་ཁྱེད་རང་བློན་པོའི་ཚོགས་རྣམས་ཀྱིས། །ལག་ཏུ་མཚོན་ཆ་མང་དུ་ཁྱེར་ནས་ནི། །མིང་སྲིང་གཉིས་པོ་ད་ལྟ་འཁྲིད་ལ་ཤོག །བྱུང་ན་ན་བཟའ་ཕུད་ལ་ལག་གཉིས་བསྡམས། །སྔ་ཐག་ཕྱི་ཐག་བྱས་ཏེ་འདིར་འཁྲིད་ཤོག ཅེས་ཟེར། དེར་བློན་པོའི་ཚོགས་རྣམས་ཀྱིས་དེ་ལྟར་ཞུ་ཟེར་ནས། ལག་ཏུ་མཚོན་ཆ་རིགས་མི་འདྲ་བ་འཁྱེར་ཏེ། རྒྱ་མཚོའི་གྲམ་ལ་བྱོན་པའི་ཞབས་རྗེས་འཚོལ་གྱིན་དུ་ཕྱིན་པས། རྒྱ་གར་ཤར་གྱི་ནགས་གསེབ་དེར་སླེབས། དེ་ནས་ལྷ་སྲས་ཀུན་ཏུ་ལེགས་པས། བློན་པོ་རྣམས་གཟིགས་ནས། ཨ་ཅེ་ལ་འདི་སྐད་ཅེས་སྨྲས་སོ། །ཅ་ཨེ་གསོན་དང་ལྷ་ཅིག་ཀུན་བཟང་ལགས། །བདུད་མོའི་བློན་པོ་ཐམས་ཅད་སླེབས་བྱུང་བས། །མི་སྲིང་གཉིས་པོ་གསོད་པར་ཡོང་བ་འདྲ། །ཞེས་གསུངས་པས། དེ་ནས་བློན་པོ་རྣམས་ཀྱིས་རྒྱང་ཙམ་ཞིག་ནས། མིང་སྲིང་གཉིས་བསླུ་བའི་གླུ་འདི་ལྟར་བླངས་སོ། །ཀྱེ་མ་གསོན་དང་ལྷ་སྲས་ལྕམ་སྲིང་གཉིས། །ཡབ་ཆེན་རྒྱལ་པོ་མུན་པའི་བཙོན་ནས་བཏོན། །འགྲོ་བ་བཟང་མོ་མཁའ་འགྲོའི་གླིང་ནས་བྱོན། །ཡབ་ཡུམ་གཉིས་ཀྱིས་མིང་སྲིང་གར་སོང་གསུངས། །སྙིང་དང་འདྲ་བའི་མིང་སྲིང་གཉིས་པོ་ལ། །བདུད་མོས་ཚེ་ལ་བར་ཆད་བཏང་བ་འདྲ། །ཚེ་འདིར་ལྕམ་སྲིང་གཉིས་དང་འཕྲད་ལས་ཆེ། །མ་ཕྲད་རང་སྲོག་རང་གིས་གཅོད་པར་བྱེད། །ཅེས་གསུངས་ཤིང་ཡབ་ཡུམ་གཉིས་ཐུགས་ཁྲལ་ཆེ་བར་འདུག བདག་ཅག་བློན་པོ་རྣམས་ཀྱིས། སེམས་ཀྱི་མ་གཟོད་པར་ལྕམ་སྲིང་གཉིས་གདན་འདྲེན་ལ་ཡོང། ཞེས་ཞུས་པས། ལྷ་སྲས་ཀྱི་ཐུགས་དགོངས་ལ། དེ་ལྟར་བདེན་པ་སྲིད་དགོངས་ནས་དགྱེས་པའི་རྣམ་འགྱུར་མང་དུ་མཛད། དེ་ནས་བློན་པོ་རྣམས་ཀྱིས་མིང་སྲིང་གཉིས་ཚུར་བཟུང་ཐོག་ན་བཟའ་གྱོན་པ་རྣམས་ཕུད་ནས་ཡུལ་མཎྜལ་སྒང་དུ་ཁྲིད། དེ་ལྟར་བློན་པོ་རྣམས་ཀྱིས་མིང་སྲིང་གཉིས་ཀྱི་ཕྱག་རྒྱབ་ཏུ་དམ་པར་བཀྱིགས་ནས་སྔ་ཐག་ཕྱི་ཐག་བྱས་ཏེ་ཡུལ་མཎྜལ་སྒང་དུ་ཁྲིད་པའི་ཚེ། ལྷ་སྲས་ཀྱིས་འདི་སྐད་ཅེས་གསུངས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །ཡུན་རིང་མི་སྡོད་མྱུར་དུ་འཆི་དགོས་འདུག །དཀོན་མཆོག་གསུམ་པོ་སྤྱེ་བོའི་གཙུག་ཏུ་སྒོམས། །སྤྱན་རས་གཟིགས་ལ་གསོལ་བ་མྱུར་དུ་ཐོབས། །མིང་སྲིང་གཉིས་ལ་ཨ་མ་མེད་པས་ལན། །ཡུམ་གྱི་མཆོག་གྱུར་འགྲོ་བ་བཟང་མོ་ལགས། །མིང་སྲིང་གཉིས་ལ་ཐུགས་རྗེའི་སྤྱན་གྱིས་གཟིགས། །ཞེས་གསུངས་ནས། སྤྱན་ཆབ་མང་དུ་བསིལ་བས། དེ་ནས་ལྷ་ཅིག་ཀུན་ཏུ་བཟང་མོས་བློན་པོ་རྣམས་ལ་འདི་སྐད་ཅེས་གསུངས་སོ། །བློན་པོའི་ཚོགས་རྣམས་བདག་ལ་ཚུར་གཟིགས་དང་། །མིང་སྲིང་ཡབ་ཡུམ་གཉིས་པོ་བཞུགས་པའི་དུས། །ཁྱེད་ཚོ་བློན་པོའི་ཚོགས་རྣམས་ཐམས་ཅད་ཀྱིས། །མིང་སྲིང་གཉིས་ལ་བརྩེ་དུང་ཆེ་ལགས་ཏེ། །ད་ནི་ཡབ་ཡུམ་གཉིས་དང་བྲལ་བའི་དུས། །འདི་འདྲ་ཕོད་དམ་བློན་པོའི་ཚོགས་རྣམས་ཀུན། །ཁོ་མོ་བསད་ཀྱང་ལྷ་སྲས་གཏོང་རོགས་མཛོད། །མིང་སྲིང་གཉིས་ཀྱི་ཨ་མ་དྲན་པ་ལ། །རྨི་ལམ་ནང་དུ་བྱུང་བའི་ཨ་མ་དེ། །ད་ལྟ་དངོས་སུ་ཡོད་ན་དགའ་བ་ལ། །ཞེས་གསུངས་ནས། སྤྱན་ཆབ་མང་དུ་བསིལ་ཀྱང་དེར་བློན་པོ་རྣམས་ཀྱིས་མ་ཉན་པར་ཡུལ་མཎྜལ་སྒང་གི་ཕོ་བྲང་རྒྱ་སྒོའི་འགག་ཏུ་ཁྲིད་པའི་དུས། དེར་གྲོང་ཁྱེར་གྱི་མི་རྣམས་ཀྱིས་སྨྲེ་སྔགས་འདི་ལྟར་འདོན་ནོ། ལྷ་སྲས་ཉི་ཟླ་ལྟ་བུའི་མིང་སྲིང་གཉིས། །མེ་ཏོག་ཞལ་ཕྱེ་མཆོད་ཁང་མ་འགྲིམས་པར། །མེ་ཏོག་སད་ཀྱིས་ཁྱེར་བ་ཤིན་ཏུ་ཕངས། །ཟེར་ནས་ཐམས་ཅད་མྱ་ངན་གྱིས་མནན་ཀྱང་བདུད་མོ་དབང་ཆེ་བའི་སྟབས་ཀྱིས་བླུ་ཐབས་ནི་མེད། དེའི་དུས་བདུད་མོ་ཧ་ཅང་མས་སྲས་ལྕམ་སྲིང་གཉིས་ཀྱི་མདུན་དུ་ཡོང་ནས་འདི་སྐད་སྨྲས་སོ། །ཀྭ་ཡེ་ཉོན་དང་དྭ་ཕྲུག་མིང་སྲིང་གཉིས། །རྩེ་མོ་རྩེ་རུ་མ་སླེབས་རྒྱན་མཚན་འདྲ། །གཡག་ཏུ་མ་སླེབས་རྩིད་པའི་ཞོལ་ཞོལ་བྱས། །ཕ་མ་མེད་པའི་དྭ་ཕྲུག་མིང་སྲིང་གཉིས། །དོ་ནུབ་ཁྱོད་གཉིས་དམྱལ་བའི་ངལ་གསོ་གྱིས། །སང་ཉིན་ཉི་མ་ཤར་བའི་དང་པོ་ལ། །སྡིག་ལ་རྔམ་པའི་གདོལ་པ་གཉིས་ལ་བསྐུར། །རྒྱ་གར་ཤར་རིའི་རྩེ་ནས་སྐྱུར་དུ་གཏོང་། རྒྱ་གར་ཤར་རིའི་རྩེ་དེ་ནི། དཀར་ས་ན་དཀར་བ་གངས་རི་ཐུགས་རྗེ་ཆེན་པོའི་སྐུ་འདྲ་བ། དམར་ས་ན་དམར་བ་གུ་རུ་བྲག་དམར་གྱི་ཞལ་འདྲ་བ། མཐོ་ས་ན་མཐོ་བ་རྩེ་མོ་དགུང་སྔོན་གྱི་མཐོངས་ལ་སླེབས་པ། དམའ་ས་ན་དམའ་བ་རྩ་བ་ཕྱིའི་རྒྱ་མཚོ་ལ་ཟུག་པ། བྱ་དང་གཅན་གཟན་གྱི་འཇིགས་པའི་སྐད་སྣ་ཚོགས་སྒྲོག་པ། ནག་ཆེན་གཡང་ལ་བསྐྱུར་ས་ཡིན་པས། སང་སྔ་ས་རེ་བ་གཅིག་ལ་སྐྱུར་གྱི་ཨང་། ཞེས་སྨྲས་ནས། དེའི་ནུབ་མོ་བདུད་མོས་སྲས་ལྕམ་སྲིང་བཙོན་དུ་བཅུག བཙོན་གཉེར་གཟེ་མ་ར་མགོས་བྱས། དེའི་དུས་མིང་སྲིང་གཉིས་ལ་གྱོན་རྒྱུ་དང་གསོལ་བ་བཞེས་རྒྱུ་མེད་པའི་སྟབས་ཀྱིས། གཅིག་གིས་གཅིག་ལ་འཇུས་ནས་གྲོངས་ཚད་ཚད་ཡོད་པ་ལ། ཡུམ་འགྲོ་བ་བཟང་མོ་དེ་སྤྱན་སྔར་ཡུད་ཙམ་ཞིག་བྱུང་བ་སྐུ་གསོས་སོ། །དེ་ནས་ནམ་ལངས་པའི་ཚེ། གདོལ་པ་སྤུན་གཉིས་ཀྱིས་བདུད་མོའི་དྲུང་དུ་ཡོང་ནས། བདག་གཉིས་ལ་བཀའ་བསྩལ་དུ་གསོལ་ཞེས་ཞུས་པས། བདུད་མོས་འདི་སྐད་སྨྲས་སོ། །ཁྱོད་གདོལ་པ་སྤུན་གཉིས་ཀྱིས་མིང་སྲིང་སྤུན་གཉིས་པོ་རྒྱ་གར་ཤར་རིའི་གཡང་ལ་སྐྱུར་ཤོག་ཅིག རྔན་པ་ལ་འདོད་ཡོན་ལོངས་སྤྱོད་གང་དགོས་སྟེར། མངའ་འབངས་རྣམས་ལ་བགོ་བཤའ་བྱེད། མྱུར་དུ་གསོད་ཅིག་ཅེས་སྨྲས་པས། གདོལ་པ་གཉིས་ཀྱིས་བདུད་མོའི་བཀའ་བཞིན། སྲས་ལྕམ་སྲིང་གཉིས་ཀྱི་ཕྱག་གཉིས་རྒྱབ་ཏུ་དམ་པར་བཀྱིགས་ནས། སྔ་ཐག་ཕྱི་ཐག་བྱས་ཏེ་གྲི་ལྕག་གིས་རྡུང་གིན་དུ་རྒྱ་གར་ཤར་རིའི་རྩེ་ལ་ཁྲིད་ནས་སོང་ངོ་། །དེའི་དུས་ཙ་ན། རྒྱ་གར་ཤར་རིའི་རི་རྒྱུད་ཅིག་གི་སྤང་གཤོངས་ཤིག་ན། ཤྭ་བ་ཕོ་མོ་ཤྭ་ཕྲུག་དང་བཅས་པ་འགྲོ་བཞིན་འདུག་པས། ལྷ་སྲས་རྒྱལ་བུས་ཨ་ཅེ་ལ་འདི་སྐད་ཅེས་གསུངས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །སྤང་ཐོད་མཐོན་པོའི་ཕྱོགས་ལ་སྤྱན་གཟིགས་དང་། །ཤྭ་བ་ཨ་ཕ་ཡིན་ཟེར་སྔོན་ལ་འགྲོ། །ཤྭ་བ་ཨ་མ་ཡིན་པས་རྗེས་ལ་འགྲོ། །ཤྭ་ཕྲུག་ཚོགས་བསགས་ཕ་མའི་བར་ན་འདུག །འབྱོལ་སོང་ཡིན་ཀྱང་མ་བུའི་འདུ་ཤེས་འདུག །ད་ནི་འདི་འདྲའི་རྒྱལ་པོའི་སྲས་སྲོས་ལས། །ཤྭ་བ་ཕོ་མོའི་ཤྭ་ཕྲུག་ཡིན་ན་དགའ། །མིང་སྲིང་གཉིས་ལ་ཨ་མ་མེད་པའི་ལན། །ལྕམ་སྲིངགཉིས་ཀྱི་ཨ་མའི་དྲན་པ་ལ། །ཞེས་གསུངས་ནས་སྤྱན་ཆབ་བསིལ་བའི་ངང་ནས་རྒྱ་གར་ཤར་རིའི་རྩེ་རུ་ཕེབས་སོ། །དེ་ནས་གདོལ་པ་གཞོན་པས་ལྷ་སྲས་སྙིང་དང་འདྲ་བ་དེ་པང་དུ་འུབ་སྟེ་བསྡུས་ནས་གཡང་ལ་སྐྱུར་གྲབས་བྱས་པས། ལྷ་སྲས་ཀྱིས་འདི་སྐད་ཅེས་གསུངས་སོ། །ཨ་ཇོ་གསོན་དང་གདོལ་པ་གཞོན་པ་ལགས། །རི་རྩེ་འདི་ནས་སྐྱུར་ལོང་ཡོང་བ་འདུག །འཆི་ཁར་སྨོན་ལམ་ཚིག་གསུམ་འདེབས་སུ་ཆུག །སྨོན་ལམ་ཐེབས་ན་ང་རང་བསམ་པ་རྫོགས། །ཞེས་གསུངས་པས། ཁོ་ན་རེ། འོ་ན་སྨོན་ལམ་ཐོབས་ཤིག་ཟེར་བ་ལ། ལྷ་སྲས་རྒྱལ་བུས་སྨོན་ལམ་གྱི་མགུར་འདི་གསུངས་སོ། །ཆོས་སྐུ་ཀུན་ཏུ་བཟང་པོ་ལ་གསོལ་བ་འདེབས། ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། སྤྲུལ་སྐུ་པདྨ་མ་བྱུང་གནས་ལ་གསོལ་བ་འདེབས། །བདག་གི་སྨོན་ལམ་འགྲུབ་པར་བྱིན་གྱིས་རློབས། །ཁྱད་པར་མཁའ་འགྲོ་སྡེ་ལྔ་དགོངས་སུ་གསོལ། །ཤར་རྡོ་རྗེ་རིགས་ཀྱི་མཁའ་འགྲོ་མ། །སྐུ་མདོག་དཀར་མོའི་མདངས་དང་ལྡན། །དར་གྱི་ཅོད་པན་ཐིབས་སེ་ཐིབ། །ཕྱག་གཡས་ཌ་རུ་ཁྲོ་ལོ་ལོ། །ཕྱག་གཡོན་དྲིལ་བུ་སི་ལི་ལི། །ཞབས་གཉིས་བྲོ་རྡུང་ཆེམས་སེ་ཆེམས། །ཤར་ནས་དར་ཐག་དཀར་པོ་རྐྱོངས། །ལྷ་སྲས་རྒྱལ་བུའི་ལམ་སྣ་ཆོས་ལ་དྲོངས། །ལྷ་ཅིག་ཀུན་བཟང་མ་ལ་ཐུགས་རྗེས་གཟིགས། །མིང་སྲིང་གཉིས་ལ་ཨ་མ་མེད་པས་ལན། །ཡུམ་གྱི་མཆོག་གྱུར་འགྲོ་བ་བཟང་མོ་ལགས། །མིང་སྲིང་གཉིས་ལ་ཐུགས་རྗེའི་སྤྱན་གྱིས་གཟིགས། །ཞེས་གསུངས་ནས། སྤྱན་ཆབ་མང་དུ་བསིལ་བས། གདོལ་པ་རྒན་པ་སེམས་ཤིན་ཏུ་སྐྱོ་ནས། མཆི་མ་ལྷུག་པར་བཏང་སྟེ། གདོལ་པ་གཞོན་པ་ལ་འདི་སྐད་ཅེས་སྨྲས་སོ། །གདོལ་པ་གཞོན་པ་ང་ལ་ཚུར་ཉོན་དང་། །སྔར་གཤན་པ་རྒན་གཞོན་གཉིས་ཀྱིས་ཀྱང་། །སྲས་ལྕམ་སྲིང་ཚེ་ཐར་བཏང་ནས་འདུག །དེ་བཞིན་ཉ་པ་གཉིས་ཀྱིས་ཀྱང་། །ཁོ་ཉིས་ཚེ་ཐར་བཏང་ནས་འདུག །ལྕམ་སྲིང་གཉིས་ཀྱི་ཡབ་ཡུམ་བཞུགས་པའི་དུས། །སྐུ་གཟུགས་གྲིབ་མ་ལ་ཡང་འགོམ་མི་ནུས། །ད་ནི་གསོད་པ་སེམས་ཀྱིས་ག་ལ་ཕོད། །མིང་སྲིང་འདི་གཉིས་ཚེ་ཐར་བཏང་ན་དགའ། །བྱས་པས། གདོལ་པ་གཞོན་པ་ཁོ་རེ། ཨ་ཇོ་རང་ཉོན་དང་། ང་འཁོར་བ་ལ་བཅད་པ་རང་སྲོག་ཡིན་པས། ཨ་ཇོ་རང་གིས་སྐྱུར་མི་ནུས་ན་ངས་སྐྱུར་བས་ཆོག་ཟེར་བས། གདོལ་པ་རྒན་པ་ན་རེ། ཁྱོད་རང་གི་སྐལ་སྟོ་ལྷ་སྲས་རྒྱལ་བུ་ཡིན། ང་ནི་འཆི་བའི་སྲོག་ལ་བབས་ཀྱང་། ལྷ་ཅིག་ཚེ་ཐར་ལ་གཏོང་བ་ཡིན་ཟེར་ནས་བཏང་ངོ་། །དེ་ནས་ལྷ་ཅིག་གིས་གདོལ་པ་གཞོན་པའི་མདུན་དུ་ཕྱིན་ནས། ཕྱག་བཙལ་ཏེ་འདི་སྐད་ཅེས་གསུངས་སོ། །ཨ་ཇོ་གསོན་དང་གདོལ་པ་གཞོན་པ་ལགས། །ད་ལམ་ལྷ་སྲས་མ་སྐྱུར་གཏོང་རོགས་མཛོད། །མིང་སྲིང་གཉིས་པོ་མ་ཤི་ཚེ་རིང་ན། །གདོལ་པ་ཁྱེད་ལ་རྔན་པ་མང་པོ་སྟེར། །ཞེས་གསུངས་ནས་སྤྱན་ཆབ་མང་དུ་བསིལ་ཀྱང་། ཁོས་མ་བཏང་ངོ་། །དེ་ནས་ལྷ་སྲས་ཀྱིས་ཨ་ཅེ་ལ་འདི་སྐད་ཅེས་གསུངས་སོ། །ཨ་ཅེ་གསོན་དང་ལྷ་ཅིག་ཀུན་བཟང་ལགས། །མིང་སྲིང་ཚེའདིར་མཇལ་བའི་རྟིང་མ་ཡིན། །ཨ་ཅེ་མ་ཤི་མི་ཡུལ་མུན་པ་དཀར། །ང་ནི་གཏོང་བའི་སྐལ་བ་མ་བྱུང་བས། །ཚེ་འདིར་མིང་སྲིང་མཇལ་བའི་རྟིང་མ་ཡིན། །ཕྱི་མ་འོག་མིན་གནས་སུ་མཇལ་བར་སྨོན། །ཞེས་གསུངས་ནས་སྤྱན་ཆབ་བསིལ་བའི་ངང་ནས། ད་ནི་ཤི་རུང་ཁོ་བོ་འགྱོད་པ་མེད། སྐྱུར་བ་གནང་གསུངས་པས་གདོལ་པ་གཞོན་པས། ལྷ་སྲས་སྙིང་དང་འདྲ་བ་དེ། པང་དུ་འུབ་སྟེ་བསྡུས་ནས་ཤར་རིའི་གཡང་ལ་བསྐྱུར་བས། བར་སྣང་མཐོངས་ལ་བྱ་ལྟར་ལྡིང་སོང་ངོ་། །དེ་ནས་ཡུམ་འགྲོ་བ་བཟང་མོས་མཁའ་འགྲོའི་གླིང་ནས། སྤྱན་ཆབ་བསིལ་བའི་ངང་ནས་སྤྲུལ་པ་སྣ་གཅིག་བསྐྱེད་ནས། ཐོག་མར་བྱ་རྒོད་ཕོ་མོ་གཉིས་སུ་སྤྲུལ་ཏེ། ལྷ་སྲས་རྒོད་ཕོའི་གཤོག་སྟེང་དུ་བླངས་ནས། བྲག་ལ་མ་བརྡབས་པ་ཙམ་བྱུང་བས། རྒོད་པོ་ན་རེ། ལྷ་ཅིག་ཀུན་བཟང་མེད་པ་འདྲ་ཟེར་ནས་ཡལ་སོང་ངོ་། །དེ་ནས་ལས་ཀྱི་དབང་གིས་རྒྱ་མཚོ་དེ་ལ་ལྷུང་བའི་དུས། ཡུམ་གྱིས་ཉ་ཆེན་ཕོ་མོ་གཉིས་སུ་སྤྲུལ་ཏེ་ལྷ་སྲས་ཉ་ཕོའི་གཤོག་སྟེང་དུ་བླངས་ནས་ཆུ་འགྲོས་ཀྱིས་སྐམ་ལ་བཏོན་ཏེ་སྲོག་ལ་སྐྱོན་མ་བྱུང་བས། ཉ་མོ་དེ་ན་རེ། ལྷ་ཅིག་ཀུན་བཟང་མེད་པ་འདྲ་ཟེར་ནས་ཡལ་སོང་ངོ་། །དེ་ནས་ལྷ་སྲས་ནི་མཚོ་དེའི་འགྲམ་དུ་ལུས་འདར་ཞིང་གར་ཡང་འགྲོ་ངོ་མ་ཤེས་པར། སྤྱན་ཆབ་བསིལ་ཞིང་ལམ་རྒྱུས་ནི་མེད་དགོངས་ནས་བཞུགས་ཡོད་པ་ལ། ཡུལ་པདྨ་ཅན་ནས་ཡུམ་གྱིས་ནེ་ཙོ་སྨྲ་མཁན་ཞིག་ཏུ་སྤྲུལ་ཏེ། གཤོག་འགྲོས་ཤིག་གིས་ངང་ནས་ཡོང་སྟེ། འདི་སྐད་ཅེས་ཞུས་སོ། །འདི་ན་བཞུགས་པའི་ཡིད་འོང་བྱིས་པ་ལགས། །ཁྱེད་རང་ཡོང་བ་དང་པོ་གང་ནས་ཡོང་། །དོ་ནུབ་བཞུགས་པའི་གནས་ནི་གང་དུ་བཞུགས། །ཡབ་ཡུམ་གཉིས་ཀྱི་མཚན་ལ་ཇི་སྐད་ཟེར། །མིང་སྲིང་ཚེ་ཟླ་ཅི་འདྲ་ཡོད། །ཅེས་ཞུས་པས། ལྷ་སྲས་ཀྱིས་འདི་སྐད་ཅེས་གསུངས་སོ། །ནེ་ཙོ་ཁྱོད་ཀྱིས་ང་ལ་སྙིང་ཚིམས་བྱ་རྒྱུ་ཨེ་ཡིན། ང་ནི་གཅིག་ཏུ་དལ་འབྱོར་གྱི་མི་ལུས་ཐོབ། །གཉིས་སུ་རྒྱལ་པོའི་སྲས་སུ་འཁྲུངས། །གསུམ་ནས་བདུད་ཀྱི་བར་ཆད་བྱུང་། །ཡུམ་འགྲོ་བ་བཟང་མོ་དགུང་སྔོན་མཐོངས་སུ་ཡལ། །ཡབ་ཀཱ་ལ་དབང་པོ་བདུད་མོས་བཙོན་དུ་བཅུག །ཨ་ཅེའི་མིང་ལ་ལྷ་ཅིག་ཀུན་བཟང་ཟེར། །ང་ཡི་མིང་ལ་ཀུན་ཏུ་ལེགས་པ་ཟེར། །བདུད་མོས་ཤན་པ་སྤུན་གཉིས་གསོད་དུ་བཏང་། །ཤན་པས་མ་བསད་ཚེ་ཐར་བཏང་ནས་བྱུང་། །ན་སོ་གཞོན་པས་ལྡུམ་རྭར་རྩེད་མོར་ཕྱིན། །བདུད་མོས་མཐོང་ནས་ཉ་པའི་ལག་ཏུ་སྤྲད། །ཉ་པ་གཉིས་ཀྱི་རྒྱ་མཚོའི་གྲམ་དུ་ཁྲིད། །སྨོན་ལམ་བཏབ་པས་ཉ་པ་སྐྱོ་བ་སྐྱེས། །མིང་སྲིང་གཉིས་པོ་ཚེ་ཐར་བཏང་ནས་བྱུང་། །རྒྱ་གར་ཤར་གྱི་ནགས་ཁྲོད་སྟུག་པོར་ཕྱིན། །ནགས་ཀྱི་དཀྱིལ་ནས་བདུད་མོའི་བློན་པོས་བཟུང་། །སྡིག་ཅན་གདོལ་པ་གཉིས་ཀྱི་ལག་ཏུ་བསྐུར། །གདོལ་པ་གཞོན་པས་ཤར་རིའི་གཡང་ལ་བསྐྱུར། །བར་སྣང་མཐོངས་ནས་རྒོད་པོས་གཤོག་སྟེང་བླངས། །བྲག་ལ་མ་བརྡབ་ཙམ་ལ་རྒྱ་མཚོར་ལྷུང་། །རྒྱ་མཚོའི་ནང་ནས་ཉ་མོའི་སྒལ་སྟེང་བླངས། །སྐམ་ལ་ཐོན་ནས་སྲོག་སྐྱོན་མ་བྱུང་ཙམ། །དང་པོ་ཡོང་བ་མཎྜལ་སྒང་ནས་ཡོང་། དོ་ནུབ་སྡོད་པ་རྒྱ་མཚོའི་འགྲམ་དུ་སྡོད། །ཁ་ལ་ཟས་དང་ལུས་ལ་གོས་ནི་མེད། །ལམ་སྣ་ས་རྒྱུས་བྱ་བ་གཅིག་ཀྱང་མེད། །ནེ་ཙོ་ཁྱོད་ཀྱིས་གྲོགས་ཤིག་གྱིས་དང་གསུངས་པས། ངའི་ཕྱི་ལ་བྱོན་ཅིག་ཟེར་ནས་གཤོག་འགྲོས་ཤིག་གིའི་ངང་ནས་སོང་ངོ་། །ལྷ་སྲས་རྒྱལ་བུས་ཀྱང་ནེ་ཙོའི་ཕྱི་ལ་བྱོན་པས། ཡང་ནེ་ཙོས་ཕྱི་བལྟས་ཤིག་བྱས་ནས། ལྷ་སྲས་ལ་འདི་སྐད་ཅེས་ཞུས་སོ། །ངེད་ཡུལ་པདྨ་ཅན་པ་རྣམས། ལྷ་ཐུགས་རྗེ་ཆེན་པོ་ལ་མོས། སྙིང་པོ་ཡི་གེ་དྲུག་པ་ནི་འདྲེན། དེའི་སྟོབས་ཀྱིས་འཁོར་བ་སྟོང་ནས་རྒྱལ་རྒྱུད་རྫོགས་ནས་མེད། ད་ཁྱེད་རང་པདྨ་ཅན་གྱི་རྒྱལ་པོ་མཛད་ན་མི་ལེགས་སམ་ཞུས་པས། ལྷ་སྲས་ཀྱིས་འདི་སྐད་ཅེས་གསུངས་སོ།ངས་རྒྱལ་པོ་ཡོང་བ་འདུག་གམ་གསུངས་པས། ཡང་ནེ་ཙོས་ཕྱོགས་བཞི་ལ་ཕྱག་འཚལ་བའི་ཚུལ་མགོ་སྒུར་སྒུར་ལན་རེ་བྱས་པ་དང་། ལྷ་སྲས་རྒྱལ་བུས་ཀྱང་དེ་བཞིན་ཕྱག་འཚལ་བའི་ཚུལ་མཛད་པས། དེ་ནས་བར་སྣང་ནས་ན་བཟའ་ངུར་སྨྲིག་གཅིག་དང་། སྐུ་སྐེད་རྒྱ་དམར་གཅིག་དང་། ཞབས་ཕྱགས་ཀོ་དཀར་གཅིག་དང་། དབུ་རས་ཁ་གང་དང་བཅས་པ་བབས་བྱུང་བས། ནེ་ཙོས་དབུ་རས་ཁ་གང་པོ་དེ་དབུ་ལ་གསོལ། ན་བཟའ་ངུར་སྨྲེག་དེ་སྲས་ཀྱི་སྐུ་ལ་གསོལ། སྐུ་སྐེད་དེ་སྐེད་ལ་བཅིངས། ཞབས་ཕྱགས་ཀོ་དཀར་དེ་ཞབས་ལ་གསོལ་བས། ལྷ་སྲས་ཀྱིས་ནེ་ཙོ་ལ་འདི་སྐད་ཅེས་གསུངས་སོ། །ང་པདྨ་མ་ཅན་གྱི་རྒྱལ་པོར་ཡོང་བ་འདུག་གམ་གསུངས་པས། ནེ་ཙོས་དེ་ལྟར་ཡོང་བ་འདུག་ལགས་ཞུས་པས། དེ་ནས་ནེ་ཙོས་གཤོག་འགྲོས་མགྱོགས་པའི་ངང་ནས། བྲམ་ཟེ་སྒོམ་ཆེན་པ་གཅིག་ཡོད་པ་དེའི་སར་ཕྱིན་ཏེ། འདི་སྐད་ཅེས་ཞུས་སོ། །རང་རེའི་པདྨ་ཅན་གྱི་རྒྱལ་རྒྱུད་རྫོགས་ནས་མེད་པ་ལ། ལྷ་ཐུགས་རྗེ་ཆེན་པོའི་སྤྲུལ་པ་དགུང་ལོ་གསུམ་དུ་བཞེས་པ་ཞིག ཤིང་ཙན་དན་སྡོང་པོའི་བསིལ་གྲིབ་ལ་བཞུགས་འདུག་པས། དེ་སྤྱན་དྲངས་ནས་པདྨ་ཅན་གྱི་རྒྱལ་པོ་ལ་མངའ་གསོལ་ན་མི་ལེགས་སམ། ཞེས་ཞུས་པས། བྲམ་ཟེ་སྒོམ་ཆེན་དེ་དགའ་དྲགས་ནས། ལག་གི་འཁར་བ་བཞག་ནས་ཡུལ་པདྨ་ཅན་དུ་ཕྱིན་ཏེ། གྲོང་ཁྱེར་ལ་སྐོར་བ་ལན་གསུམ་བྱས་ནས་འདི་སྐད་ཅེས་སྨྲས་སོ། །རང་ཅག་ཡུལ་པདྨ་ཅན་པ་རྣམས་ལྷ་ཐུགས་རྗེ་ཆེན་པོ་ལ་མོས་པས། ཐུགས་རྗེ་ཆེན་པོའི་སྤྲུལ་པ་དགུང་ལོ་གསུམ་དུ་བཞེས་པ་ཞིག་ཤིང་ཙན་དན་སྡོང་པོའི་བསིལ་གྲིབ་ལ་བཞུགས་འདུག་ཟེར་བ། ང་ལ་སྨྲ་མཁན་ནེ་ཙོས་ལུང་བསྟན་བྱུང་། དེ་པདྨ་ཅན་གྱི་རྒྱལ་པོ་ལ་གདན་དྲངས་ན། མངའ་ཐལ་ལོངས་སྤྱོད་རྒྱས་པར་འགྱུར་རོ། །ཞེས་སྨྲས་པས། པདྨ་ཅན་གྱི་གྲོང་ཁྱེར་གྱི་མི་རྣམས་ཀུན་འདུས་ནས། རྒྱལ་རྒྱུད་རྫོགས་པ་ལ་སྙིང་ཚེམས་བྱེད་མཁན་བྲམ་ཟེ་ཁྱོད་མིན་པ་མ་བྱུང་། ཁྱོད་གསོད་པ་ཡིན་ཟེར་ཏེ་རྟབ་རྟོབ་བྱེད་དུ་བྱུང་བ་ལ། མི་ལ་ལ་ན་རེ། དེ་འདྲ་མ་བྱེད་ཅིག །མི་རྒན་གྱིས་ཟེར་བ་ལ་ཉོན། བྱ་གཤོག་གྲོས་ལ་ལྟོས་བྱ་བ་ཡིན། སྨྲ་མཁན་ནེ་ཙོའི་ལུང་བསྟན་བྱུང་འདུག་ཟེར་བ་ལ། མི་ཀུན་ལྟ་རུ་ཕྱིན་པས། ཤིང་ཙན་དན་སྡོང་པོའི་བསིལ་གྲིབ་ལ་ལྷ་སྲས་རྒྱལ་བུ་བཞུགས་པ་མཐོང་ནས། ཐམས་ཅད་དགའ་མགུ་ཡིད་རངས་ཏེ། ཡུལ་པདྨ་ཅན་ནས། ཆིབས་རྟ་ངང་པ་གསེར་ལྡན་ལ། སྒ་ཆ་ལེགས་པར་བསྒྲོན་ཏེ་གདུགས་དང་རྒྱལ་མཚན་དང་། བ་དན་དང་། རོལ་མོའི་བྱེ་བྲག་དང་། སྤོས་བཅས་བསུ་བ་སེར་ཕྲེང་བསམ་གྱིས་མི་ཁྱབ་པ་བྱས་ནས། ཡུལ་པདྨ་ཅན་དུ་གདན་དྲངས་ཏེ་གསེར་ཁྲི་ལ་མངའ་གསོལ་བས། སྔར་ལས་ཀྱང་དར་ཞིང་རྒྱས་པར་བྱུང་ངོ་། །དེ་ནས་ལྷ་ཅིག་གི་ཐུགས་དགོངས་ལ། ཁོ་མོ་ང་ཡི་སྙིང་དང་འདྲ་བའི་ལྷ་སྲས་རྒྱལ་བུ་ནི། རྒྱ་གར་ཤར་རིའི་གཡང་ལ་བསྐྱུར་ནས་མེད། ང་རང་ཡང་ལྕེབ་དགོས་དགོངས་ནས། ལྕེབ་པའི་གྲབས་བྱས་པས། ཁོང་རང་ཚེ་ཐར་ལ་གཏོང་བའི་གདོལ་པ་རྒན་པ་ཁོས་ལྕེབ་ཏུ་མ་བཅུག་པར། ཁོས་ལྷ་ཅིག་ཀུན་ཏུ་བཟང་མོ་རྒྱབ་ཏུ་ཁུར་ནས། རི་རྩེ་དེ་ནས་མར་ལ་ཡོང་བའི་དུས་སུ། ཁོའི་བསམ་པ་ལ། ངས་ཚེ་སྔོན་ལས་ངན་བསགས་པའི་རྣམ་སྨིན་གྱིས། ད་ལྟ་སྡིག་ཅན་གདོལ་པའི་ལུས་སུ་སྐྱེས། ཚེ་འདི་ལ་ཡང་སྡིག་པ་མང་པོ་བསགས་པའི་ཁར། མིང་སྲིང་གཉིས་ལ་འོ་བརྒྱལ་འདི་ཙམ་བཟོས། ང་ཤི་ན་རྡོ་རྗེ་དམྱལ་བ་མ་གཏོགས་འགྲོ་ས་མེད་པས། དེ་བས་ང་རང་ཤི་བ་དྲག་བསམས་ནས། ལྷ་ཅིག་ཀུན་ཏུ་བཟང་མོ་དེ་ས་ལ་བཞག་སྟེ། ཁོ་རང་ལ་གྲི་གུ་ཐོ་གང་བ་ཞིག་ཡོད་པ་དེ་ཁོ་རང་གི་ལུས་ལ་བརྒྱབ་ནས་འཆི་བ་ལ་ཐུག་པས། ལྷ་ཅིག་གི་ཐུགས་ལ། ང་བུ་མོ་སྤྲང་པོ་འདྲ་བ་ཞིག་གི་དོན་ལ། ཁོ་སྐྱེས་པ་ཁྱོ་གའི་སྲོག་བཅད་པས་མི་ཡོང་དགོངས་ཏེ། ལྷ་ཅིག་གི་ཕྱག་དར་ལས་འཇམ་པ་དེས། གདོལ་པའི་ལག་པ་བྱ་སྡེར་ལས་རྩུབ་པ་དེ་ལ་འཇུས་ནས། སྦྲང་མ་མེ་ལ་ལྕེབས་པ་ལྟར་བྱས་ཏེ། ངའི་སྲོག་ལ་མི་བབས་པ་ཁྱོད་ཀྱིས་བྱས་པ་ཡིན། ཁྱོད་ཀྱི་སྲོག་ལ་མི་བབས་པ་ཁོ་མོ་བདག་གིས་བྱེད། རང་སྲོག་རང་གིས་བཅད་གྱུར་ན། ཚེ་ལོ་ལྔ་བརྒྱའི་བར་ལ་འདི་ལྟར་བྱེད་དགོས་པས། ཁྱོད་ཀྱིས་ཤི་བའི་བསམ་བློ་བོར་ཅིག་ཅེས་གསུངས་སོ། །དེ་ནས་ཁོ་ཧར་ཏེ་ལངས་ནས་མཆི་མ་ལྷུག་པར་བཏང་སྟེ། འདི་སྐད་ཅེས་ཞུས་སོ། །ཀྱེ་མ་གསོན་དང་ལྷ་ཅིག་ཀུན་བཟང་ལགས། །འདི་རུ་མ་བཞུགས་པདྨ་ཅན་ལ་བྱོན། །འདི་ནས་ལ་གཅིག་བརྒྱབ་པའི་ཕར་རྒྱབ་ན། །པདྨ་ཅན་གྱི་འབྲོག་སྡེ་ཆེན་པོ་ཡོད། །དེ་ལ་ཟས་སྐོམ་སློང་དུ་བྱོན་པ་ཞུ། །ཞེས་ཞུས་ནས། ཁོ་རང་སེམས་སྐྱོ་བའེ་ངང་ནས་ཡུལ་དུ་ལོག་སོང་ངོ་། །དེ་ནས་ལྷ་ཅིག་གིས་རིའི་ལོགས་དེ་ནས་མར་ལ་བབས་ནས་བྱོན་པས། སྔར་ཉ་པ་སྤུན་གཉིས་ཀྱིས་ཀྱང་ལ་ཀླུང་མང་པོ་ཁྲིད། བདུད་མའི་བློན་པོ་རྣམས་ཀྱིས་ཀྱང་ལ་ཀླུང་མང་པོ་ཁྲིད། གདོལ་པ་སྤུན་གཉིས་ཀྱིས་ཀྱང་ལ་ཀླུང་མང་པོ་ཁྲིད་པ་དང་། དེའི་སྟབས་ཀྱིས་ཞབས་སྙུང་ནས་བྱོན་མ་ཐུབ་པར་རི་ལོགས་དེ་རུ་ལུས་པས། དེ་ནས་ལྷའི་བུ་མོ་གཅིག་གིས་པུས་མོ་ནས་འཇིབས་བྱུང་བས། ཞབས་སྙུང་པ་གསོས་པས། དེ་ན་ལྷ་ཅིག་གི་ཐུགས་ལ། སྙིང་དང་འདྲ་བའི་ལྷ་སྲས་དེ་ཤར་རིའི་གཡང་ལ་བསྐྱུར་བའི་རི་དེའི་འགྲམ་ན། རབ་ཏུ་སྐུ་པུར་དངོས་དང་མཇལ་བ་ཨེ་ཡོང་། དེ་ལྟར་མ་བྱུང་ན་ཡང་དབུ་སྐྲ་དང་སྐུ་རུས་ཀྱི་དུམ་བུ་འདྲ་ཡོད་དམ་སྙམ་ནས། རི་ལོགས་དེ་ནས་མར་བྱོན་ཏེ། མཚོ་དེའི་འགྲམ་དུ་ཕེབས་པས། དེ་ནས་ལྷ་སྲས་རྒྱལ་བུའི་སྐུ་པུར་ནི་མི་འདུག  གཞན་ཡང་མི་ནག་ཆེན་ཐམས་ཅད་གཡང་ལ་བསྐྱུར་བའི་རུས་པ་དཀར་ནག་ཁྲ་གསུམ་མང་དུ་འདུག་པས། དེ་ན་སྲས་ཀྱི་དབུ་སྐྲ་དང་སྐུ་རུས་རེད་བསམ་པ་ནི་མི་འདུག སྐྲ་ཐུང་བ་དང་རུས་པ་ཆུང་བ་རྣམས་ཁུར་ནས། བྲམ་ཟེ་སྒོམ་ཆེན་གཅིག་འདུག་པ་དེའི་དྲུང་དུ་ཕྱིན་ཏེ། ལྷ་སྲས་རྒྱལ་བུའི་དོན་དུ་ཚ་ཚ་ལོ་གྲངས་གཅིག་བཏབ་ནས། ཚ་ཚ་དེ་རྣམས་མཆོད་རྟེན་གྱི་ནང་དུ་གདན་དྲངས་ཏེ། ཕྱག་དང་སྐོར་བ་མང་དུ་མཛད། དེ་ནས་པདྨ་ཅན་གྱི་འབྲོག་སྡེ་ཆེན་པོ་གཅིག་འདུག་པས། དེ་ལ་ཞལ་གཟིགས་ནས་ཟས་སྐོམ་སློང་དུ་བྱོན་ནས། སྤྲང་མོ་ལས་ངན་ཅན་མ་བདག་ལ་འཚོ་བ་ཞིག་གནང་བ་ཞུ་གསུངས་པས། འབྲོག་གཅིག་གིས་བཟའ་འཐུང་བྱིན། སློང་མོ་བྱེད་ཡུན་ལ་རྒྱབ་ནས་ཞབས་ལ་ཁྱིས་འཇུས་ཏེ་ཟླ་གསུམ་བར་དེ་རུ་ལུས། དེ་ནས་དྲག་མགོ་ཐོན་ནས། འབྲོག་མོ་རྣམས་ཀྱིས་ལྷན་པ་དཀར་ནག་ཁྲ་གསུམ་འདུས་པའི་བེམ་པོ་གཅིག་བྱིན། གཞན་ཡང་ཁྱི་སྲུང་བའི་ཁར་བ་གཅིག་དང་། ཕོར་ཐང་གཅིག་བཅས་བྱིན་ནས། ད་བུ་མོ་ཁྱེད་རང་འདི་ནས་ལ་གཅིག་བརྒྱབ་ནས་ཕྱིན་པའི་སར། པདྨ་ཅན་གྱི་རྒྱལ་པོའི་ཕོ་བྲང་ཡོད། པདྨ་ཅན་པ་དགེ་བའི་ལས་ལ་དཀར། བུ་མོ་ཁྱོད་རང་དེ་རུ་སློང་དུ་བྱོན། ཟེར་ནས་ལམ་ཡང་བསྟན་ནོ། །ལྷ་ཅིག་གིས་སྤྱན་ཆབ་བསིལ་བའི་ངང་ནས། པདྨ་ཅན་གྱི་ཕོ་བྲང་གི་སྒོ་དྲུང་དུ་བྱོན་ཏེ། རྒྱལ་པོའི་ཕོ་བྲང་ལ་ཁ་གཏད་ནས་སྐད་ཕྲ་ལ་རིང་བ་ཞིག་བརྒྱབ་སྟེ། འདི་སྐད་ཅེས་གསུངས་སོ། །ཀྱེ་མ་མངའ་བདག་རྒྱལ་པོ་བདག་ལ་དགོངས། སྤྲང་མོ་ལས་ངན་ཅན་མ་བདག་ལ་ཟས་ནོར་རྒྱན་གོས་ལ་སོགས་པ་གནང་བ་ཞུ་ཞུས་པས། ལྷ་སྲས་རྒྱལ་བུ་ཕོ་བྲང་ཡང་ཐོག་རྩེ་ལ་ཞབས་བསྐོར་མཛད་ཅིང་ཡོད་པས། ཨ་ཅེ་ལྷ་ཅིག་གི་གསུང་དེ་དཔའ་ཆེན་གྱིས་མདའ་འཕངས་པ་ལྟ་བུ་སྙན་དུ་ཐོས་ནས། ང་ཡི་ཨ་ཅེའི་གསུང་གི་འདྲ་བ་ཐུགས་ལ་འཁྲུངས་ཏེ། བློན་པོ་ཟླ་བ་བཟང་པོ་ལ་འདི་སྐད་ཅེས་གསུངས་སོ། །བློན་པོ་སོང་ལ་ཕོ་བྲང་གི་སྒོདྲུང་གི་སྤྲང་མོ་མ་གིར་ཡུལ་གང་ནས་ཡིན། ཕ་མ་སྤུན་ཟླ་སོགས་ཇི་ལྟར་ཡོད་དྲིས་ཤོག་གསུངས་པས། དེ་ན་བློན་པོས་ཕོ་བྲང་གི་སྒོ་དྲུང་དུ་བྱོན་ནས། སྤྲང་མོ་ལ་འདི་སྐད་ཅེས་གསུངས་སོ། །སྤྲང་མོ་ཡོང་ཡོང་གང་ནས་ཡོང་། །བར་དུ་ཕྱིན་ཕྱིན་གང་དུ་ཕྱིན། །མཐའ་མ་འགྲོ་འགྲོ་བ་གང་དུ་འགྲོ། །ཕ་མ་སྤུན་ཟླ་ལ་སོགས་པ། །གཉེན་འཁོར་ཅི་དང་ཅི་འདྲ་ཡོད། །ང་ལ་མ་གསང་དྲང་པོ་ཤོད། །མངའ་བདག་རྒྱལ་པོར་ཞུ་དགོས་ཡོད། །ཅེས་གསུངས་པས། ཨ་ཅེ་ལྷ་ཅིག་གིས་འདི་སྐད་ཅེས་ཞུས་སོ། །ཀྱེ་མ་གསོན་དང་བློན་པོ་ཆེན་པོ་ལགས། །བདག་གི་ཡུལ་ནི་མཎྜལ་སྒང་ནས་ཡིན། །ཡབ་ཀྱི་མཚན་ལ་ཀཱ་ལ་དབང་པོ་ཞུ། །དེ་ནི་བདུད་མོས་བཙོན་དུ་བཅུག་ནས་མེད། །ཡུམ་གྱི་མཚན་ལ་འགྲོ་བ་བཟང་མོ་ཞུ། །དེ་ནི་དགུང་སྔོན་མཐོངས་ལ་འཕུར་ནས་མེད། །མིང་པོའི་མཚན་ལ་ལྷ་སྲས་རྒྱལ་བུ་ཟེར། །དེ་ནི་ཤར་རིའི་གཡང་ལ་བསྐྱུར་ནས་མེད། །བདག་གི་མིང་ལ་ལྷ་ཅིག་ཀུན་བཟང་ཟེར། །ཁ་ལ་ཟས་དང་ལུས་ལ་གོས་ནི་མེད། །བློན་པོ་ཆེན་པོ་ཐུགས་ཀྱིས་དགོངས་མཛོད་དང་། །རྒྱལ་པོ་ཆེན་པོར་གསོལ་རས་ཞུ་རོགས་མཛོད། །ཅེས་གསུངས་ནས་སྤྱན་ཆབ་མང་དུ་བསིལ་ཞིང་ཕྱག་མང་དུ་ཕུལ་བས། དེ་ནས་བློན་པོས་ཕོ་བྲང་ནང་དུ་ཕྱིན་ཏེ། ལྷ་སྲས་ལ་ཨ་ཅེ་ལྷ་ཅིག་གི་ལོ་རྒྱུས་རྣམས་ཞིབ་ཏུ་ཞུས་པས། ལྷ་སྲས་རྒྱལ་བུ་སྤྱན་ཆབ་བསིལ་བའི་ངང་ནས། ང་ཡང་དང་པོ་མཎྜལ་སྒང་ནས་ཡིན། ང་ཡི་ཨ་ཅེ་དེ་ཡིན་པ་འདུག་གསུངས་ཏེ། སྐས་རིང་རྣམས་ལ་བབས། སྐས་ཐུང་བ་རྣམས་ལ་མཆོངས། ཕོ་བྲང་གི་སྒོ་དྲུང་དུ་བྱོན་པས། ཨ་ཅེ་ཡིན་པ་གཟིགས་པ་དང་། ལྕམ་སྲིང་གཉིས་གཅིག་གིས་གཅིག་ལ་འཐམས་ཏེ་དྲན་མེད་དུ་བརྒྱལ་སོང་བས། དེ་ནས་བློན་པོ་རྣམས་ཀྱིས་ཙན་དན་གྱི་ཐང་ཆུ་གཏོར་བས། སྐུ་དྲན་པ་གསོས་སོ། །དེ་ནས་ལྷ་ཅིག་ཀུན་ཏུ་བཟང་མོ་དེ་ལ་ཁྲུས་ཀྱི་རྫིང་བུ་རུ་སྐུ་ཁྲུས་ལེགས་པར་གསོལ་ནས། དར་དང་རིན་པོ་ཆེའི་རྒྱན་དང་། པན་ཙ་ལིའི་ན་བཟའ་ལ་སོགས་པ་རིན་པོ་ཆེའི་རྒྱན་བསྒྲོན་ཏེ། ཕོ་བྲང་ནང་དུ་གདན་དྲངས། ལྷ་སྲས་རྒྱལ་པོ་ཀུན་ཏུ་ལེགས་པ་གསེར་ཁྲི་ལ་བཞུགས། ལྷ་ཅིག་ཀུན་ཏུ་བཟང་མོ་གཡུ་ཁྲི་ལ་བཞུགས། གསེར་ཁྲི་དང་གཡུ་ཁྲིའི་སྟེང་དུ་བཞུགས་ནས་པདྨ་ཅན་གྱི་རྒྱལ་སྲིད་ཆོས་བཞིན་དུ་བསྐྱངས། འདོད་ཡོན་ལོངས་སྤྱོད་སྔར་ལས་ཀྱང་དར་ཞིང་རྒྱས་པ་བསམ་གྱིས་མི་ཁྱབ་པ་བྱུང་ངོ་། །དེ་ནས་ཡུན་རིང་མ་ལོན་པར། ཡུལ་མཎྜལ་སྒང་དུ་བདུད་མོ་ཧ་ཅང་གིས། དར་པོ་ཆེ་དགུང་སྔོན་མཐོངས་ལ་ཕྱར། དུང་མོ་ཆེ་བར་སྣང་མཐོངས་ལ་བུས། རྔ་བོ་ཆེ་ཕོ་བྲང་རྩེ་ནས་བརྡུངས་པས། ཡུལ་མཎྜལ་སྒང་གི་འཁོར་འབངས་བློན་པོའི་ཚོགས་རྣམས་ཀུན་འདུས་བྱུང་བས། དེ་ནས་བློན་འབངས་རྣམས་ཀྱིས་འདི་སྐད་ཅེས་ཞུས་སོ། །ཀྱེ་མ་གསོན་དང་བཙུན་མོ་དམ་པ་ལགས། །སྔར་མི་ཕྱར་བའི་དར་པོ་ཆེ་དེ་ཕྱར། །སྔར་མི་རྡུང་བའི་རྔ་བོ་ཆེ་དེ་བརྡུངས། །སྔར་མི་འབུད་པའི་དུང་མོ་ཆེ་བུས། །ད་རྒྱལ་ཁྲིམས་འཆལ་བའི་ལས་ནི་གང་འདྲ་འདུག ཕ་རོལ་དགྲ་བོའི་དམག་དཔུང་གང་ལ་ཡོད། །བདག་ཅག་འཁོར་འབངས་རྣམས་ནི་དབུལ་ཞིང་ཕོངས། ད་ནི་ཅི་འདྲ་ཞིག་འདུག་ཅེས་ཞུས་པས། བདུད་མོ་ཧ་ཅང་མས་འདི་སྐད་ཅེས་སྨྲས་སོ། །ཀྱེ་མ་བློན་པོའི་ཚོགས་རྣམས་ཚུར་ཉོན་དང་། །སྡིག་ལ་བཀོད་པའི་གདོལ་པ་སྤུན་གཉིས་ཀྱིས། །ལྷ་སྲས་རྒྱལ་བུ་ལྕམ་སྲིང་གཉིས་པོ་དེ། །རྒྱ་གར་ཤར་རིའི་རྩེ་ནས་མ་བསྐྱུར་བར། ད་ནི་པེདྨ་ཅན་གྱི་རྒྱལ་པོར་གྱུར། །དེ་ལྟར་ཡིན་ན་མི་སྲིད་ཙམ་ཡིན་པས། །མེ་ནི་ཆུང་དུས་ཙམ་མ་བསད་ན། །རྩྭ་ཕུང་རི་རབ་ཙམ་ཞིག་འཇིག་ཉེན་ཡོད། །ཆུ་ནི་ཆུང་དུས་ཙམ་ནས་མ་བཀག་ན། །རྒྱ་མཚོ་ལུད་ན་ལུང་པ་གང་ཉེན་ཡོད། །ཉི་མ་སང་དང་གཅིག་བྱས་གནངས་དང་གཉིས། །གཞེས་ཀྱི་ལྷ་ཉིན་དཀར་པོ་ཤར་བའི་ཚེ། །མཎྜལ་སྒང་གི་དམག་ཆེན་འབུམ་མཚོ་དེ། །པདྨ་ཅན་གྱི་ཕྱོགས་སུ་རྒྱག་ངེས་ཡིན། །དེ་ཡི་དམག་དཔོན་བདུད་མོ་ང་ཡིས་བྱེད། །དེ་རྩིས་བློན་འབངས་ཚོགས་རྣམས་གྲབས་གྱིས་ཤིག །ཅེས་སྨྲས་ཏེ་བདུད་མོ་རང་གི་གཟིམ་ཆུང་དུ་བྱོན་ནས་སོང་ངོ་། །དེ་ནས་གཞེས་ཀྱི་ལྷ་ཉིན་དཀར་པོ་ཤར་བའི་ཚེ་ན། །ཡུལ་མཎྜལ་སྒང་གི་དམག་ཆེན་འབུམ་ཚོ་དེ། །ཕོ་བྲང་མདུན་དུ་སྐད་ཅིག་ཙམ་དུ་འདུས་བྱུང་བས། ཧ་ཅང་བདུད་མོས་བདུད་རྟ་ནག་པོ་ལ་སྒ་ཆ་ལེགས་པར་བསྒྲོན། གོ་ཁྲབ་རྣམས་ལུས་ལ་གྱོན། ལྕགས་མདའ་ལྕགས་གཞུ་ལག་ཏུ་ཁྱེར་ནས། །བདུད་རྟ་ནག་པོ་ལ་བཞོན་ཏེ། རྟ་སྟེང་ནས་མཆེ་བ་ཉེར་ཉེར་ལན་གསུམ་བྱས་པས་བདུད་བློན་རྣམས་དགའ་དྲགས། །ཆོས་བློན་རྣམས་སེམས་སྐྱོ་སྐྱོ་ཡང་བདུད་མོ་དབང་ཆེ་བས་ཐབས་ནི་མེད། །དེ་ནས་བདུད་མོས་རུ་སྣ་ཁྲིད་ནས་པདྨ་ཅན་གྱི་ལུང་པའི་མདའ་དེར་སླེབས་པ་དང་། པདྨ་ཅན་པ་རྣམས་ཀྱིས་ཚོར་ཏེ། རྒྱལ་བློན་འབངས་འཁོར་དང་བཅས་པ་མྱ་ངན་གྱིས་ནོན་སོང་བ་ལ། དེར་བློན་པོ་ཟླ་བ་བཟང་པོས་འདི་སྐད་ཅེས་སྨྲས་སོ། །ཀྱེ་མ་གསོན་དང་རྒྱལ་པོ་ཆེན་པོ་ལགས། །འདི་འདྲའི་ཐུགས་ཁྲལ་གང་ལ་མ་གནང་འཚལ། །རྒྱལ་པོས་ཐུགས་ཁྲལ་གཏན་ནས་གནང་མི་དགོས། །བདུད་དམག་ནག་པོའི་གདོང་ལེན་ལ། །བློན་པོ་བདག་གིས་དམག་དཔོན་བྱེད། །དམག་ཁྲི་ཚོ་གསུམ་གྱི་དཔུང་དང་བཅས། །བློན་པོ་བདག་གིས་འགྲོ་བར་ཞུ། །ཞེས་ཞུས་པས། དེ་ནས་ལྷ་སྲས་ཀྱིས་འདི་སྐད་ཅེས་གསུངས་སོ། །ཡབ་ཆེན་རྒྱལ་པོ་བདག་ལ་སྙན་གསོན་དང་། ཡུམ་ཆེན་དགེ་བའི་པད་མོ་བདག་ལ་དགོངས། ཤི་རུང་གསོན་རུང་དམག་ལ་བདག་རང་འགྲོ། རྒྱལ་པོའི་གོ་མཛོད་ནང་ནས་གསེར་གྱི་ཁྲབ་ལ་པདྨ་ར་གའི་ཕྲ་བརྒྱབ་པ་དེ་བདག་ལ་གནང་བ་ཞུ། གསེར་གྱི་མདའ་ལ་གཡུ་ཡི་མདའ་སྒྲོ་ཅན། ལྕགས་ཀྱི་མདའ་ལ་འུག་པའི་རྩེ་སྒྲོ་ཅན། དེ་ལ་ཟངས་ཀྱི་མདེའུ་ཅན། ལྟས་ངན་བྱུང་ན་རྒྱག་དགོས་འདུག  དེ་རྣམས་ཐམས་ཅད་བདག་ལ་གནང་བར་ཞུ། སྟེང་ལྷ་ཡི་ལྷ་མོའི་ཚོགས་རྣམས་ཀྱིས། ལྷ་རྟ་ངང་པ་འཕུར་ཤེས་དེ། དུས་དེ་རིང་བདག་ལ་གནང་བར་ཞུ། དམག་ཁྲི་ཚོ་གསུམ་གྱི་དམག་དཔོན་བྱེད། དེ་རིང་རྒྱལ་བུ་བདག་གི་དམག་རོགས་བྱེད། བློན་པོ་ཁྱེད་ཀྱིས་འདུལ་ཐབས་མེད། བདུད་མོས་གཙོ་བྱས་བདུད་རིགས་རྣམས། སྙིང་རྩ་གཅོད་པའི་དུས་ལ་བབ། བདག་གིས་དེ་རིང་བདུད་མོ་མ་བཏུལ་ན། འཛམ་གླིང་ཡུལ་ཁམས་བདུད་མོས་འཇིག་ཉེན་ཡོད་གསུངས་པས། དེ་ནས་ཡབ་ཀྱི་ཞལ་ནས་བུ་ན་སོ་གཞོན་དུས་བློ་ཁོག་ཡངས་གསུངས་ནས་ཐུགས་ཤིན་ཏུ་མཉེས་སོ། །དེ་ནས་ལྷ་སྲས་ཀྱིས་སྐུ་ལུས་ལ་གོ་ཁྲབ་རྣམས་གྱོན། ལྕགས་མདའ་ལྕགས་གཞུ་ཕྱག་ཏུ་བསྣམས་ནས། ལྷ་རྟ་ངང་པ་འཕུར་ཤེས་ཅན་ལ་ཆིབས་ཏེ། དམག་ཁྲི་ཚོ་གསུམ་གི་དམག་དཔོན་མཛད་དེ། རུ་སྣ་ཁྲིད་ནས་པདྨ་ཅན་གྱི་མདའ་དེར་བྱོན་པ་དང་། བདུད་མོ་ཧ་ཅང་མས་ལྷ་སྲས་རྒྱལ་པོ་མཐོང་བ་ཙམ་གྱིས། ཞེ་སྡང་མེ་ལྟར་འབར་ཏེ། རྟ་སྟེང་ནས་མདའ་མོ་ལྟོང་ཁ་སྤྲད་དེ་འདི་སྐད་ཅེས་སྨྲས་སོ། །མི་ངན་ལྟ་སྲས་རྒྱལ་པོ་ཚུར་ཉོན་དང་། །མི་ནི་ཚེ་ཟད་སྲིན་པོའི་སྒོ་རུ་སླེབས། །འབུ་ནི་ཚེ་ཟད་གྲོག་མའི་སྒོ་རུ་སླེབས། །དེ་རིང་ཉི་མའི་གདུགས་གང་ལ། །ཁྱོད་ཀྱི་སྙིང་ཁྲག་དྲོ་མོ་དེ། །ང་ཡིས་ཟ་གཅིག་མ་ཐུབ་ན། །ཡུལ་དེའི་ཆོས་སྐྱོང་སྲུང་མས་བཞེས་ཤིག །ཟེར་ནས། ཡས་ཀྱི་མཆེ་བ་མས་ལ་ཕྱེད་ཙམ་བཏོན། མས་ཀྱི་ཕྱེ་བ་ཡས་ལ་མདའ་ཙམ་ཟིང་ནས། སྐད་ཅིག་ལརྐྱུགས་བྱུང་བས། ལྷ་སྲས་ཅུང་ཟད་འཇིགས་པའི་ངང་ནས། སྨོན་ལམ་གྱི་མགུར་འདི་གསུངས་སོ། །ཕྱོགས་བཅུར་བཞུགས་པའི་རྒྱལ་བའི་སྲས་བཅས་དང་། །ཁྱད་པར་མཁའ་འགྲོ་སྡེ་ལྔ་དགོངས་སུ་གསོལ། །དེ་རིང་བདག་གི་མགོན་སྐྱབས་དཔུང་གཉེན་མཛོད། །བདག་གིས་དེ་རིང་བདུད་མོ་ཐུལ་བར་ཤོག །གཞུ་སྟོད་སྟེང་ཕྱོགས་ལྷ་ལ་ཆོལ། །གཞུ་སྨད་འོག་ཕྱོགས་ཀླུ་ལ་ཆོལ། །གཞུ་སྐེད་བར་ཕྱོགས་བཙན་ལ་ཆོལ། །གཞུ་རྒྱུན་དཀོན་མཆོག་གསུམ་པོས་འཐེན། །ང་ཡི་ལག་ཏུ་ཁྱེར་བའི་མདའ་མོ་འདི། །སྟེང་ལྷ་ལ་མི་རྒྱག་ལྷ་ཞལ་མཐོངས་ལ་བཞུགས། །འོག་ཀླུ་ལ་མི་རྒྱག་ཀླུ་ཞལ་རྒྱ་མཚོར་བཞུགས། །བར་བཙན་ལ་མི་རྒྱག་བཙན་གྲལ་ལོགས་ལ་བཞུགས། །སྟེང་ལྷ་ཡི་ལྷ་དམག་དེ་རིང་དཔུང་ལ་བྱོན། །བར་བཙན་གྱི་བཙན་དམག་དེ་རིང་དཔུང་ལ་བྱོན། །འོག་ཀླུ་ཡི་ཀླུ་དམག་དེ་རིང་དཔུང་ལ་བྱོན། །མདའ་སྣ་དཀོན་མཆོགགསུམ་གྱིས་ཁྲིད། །ཅེས་གསུངས་ནས། ལྷ་སྲས་ཀྱིས་མདའ་གཅིག་འཕངས་པས། ལྕགས་མདའ་དེ་བདུད་མོའི་སྙིང་ཁར་ཕོག་ནས། རྟ་སྟེང་ནས་ཁ་བུབ་ཏུ་འགྲིལ་བྱུང་བས། དེ་ནས་མཎྜལ་སྒང་གི་དམག་མི་རྣམས་ཀྱིས། ལྷ་སྲས་རྒྱལ་བུ་ཡིན་པ་ཤེས་ནས། ཀུན་གྱི་ལྷ་སྲས་ལ་ཕྱག་མང་དུ་ཕུལ་ཏེ། ཀུན་གྱིས་ཕྱག་རྟེན་ལ་ལྕགས་མདའ་ལྕགས་གཞུ་རྣམས་ཕུལ། དེ་ནས་ལྷ་སྲས་རྒྱལ་བུས་ལྷ་རྟ་ངང་པ་འཕུར་ཤེས་ཅན་གྱི་སྟེང་ནས་ཆིབས་གཞོལ་ཏེ་བདུད་མོའི་སྙིང་ཁར་ལྕགས་གཞུ་དེ་བཙུགས་ནས། འདི་སྐད་ཅེས་གསུངས་སོ། །ཀྱེ་མ་ཉོན་དང་བདུད་མོ་ཧ་ཅང་མ། །མི་ཕོ་ང་ཡི་ང་ངོ་མ་ཤེས་སམ། །ང་ངོ་ཤེས་ན་ལྷ་སྲས་རྒྱལ་བུ་ཡིན། །ཁྱོད་ཀྱིས་ང་ངོ་མ་ཤེས་ན། །ཡུལ་པདྨ་ཅན་གྱི་རྒྱལ་པོ་ཡིན། །ཞེས་གསུངས་པས། མོས་ཁ་ནས་མཛེས་མཛེས་ལྟར་བྱས་ཏེ་འདི་སྐད་ཅེས་ཞུས་སོ། །ཀྱེ་མ་ལྷ་སྲས་རྒྱལ་བུ་བདག་ལ་དགོངས། །ཁྱེད་ནི་སངས་རྒྱས་ཡིན་པ་ངས་མ་ཤེས། །ཁྱེད་ནི་སངས་རྒྱས་དངོས་གཅིག་ཡིན་འདུག་པས། །ལན་གཅིག་ཁྱེད་ཀྱིས་ཚེ་ཐར་གཏོང་བར་ཞུ། །ང་ཡིས་ཁྱེད་ཀྱི་ཨ་མའི་ཚུལ་དུ་བྱེད། །ཁྱེད་ཀྱིས་ང་ཡི་བུ་ཡི་ཚུལ་དུ་བྱེད། །འོ་ཅག་གཉིས་ཀྱིས་མ་བུའི་ཚུལ་བཟུང་ནས། །མཎྜལ་སྒང་གི་རྒྱལ་ས་བསྐྱངས་པས་ཆོག །ཨ་ཅེ་ལྷ་ཅིག་ཀུན་ཏུ་བཟང་མོ་ཡིས། །པཎྜ་ཅན་གྱི་རྒྱལ་ས་བཟུང་བས་ཆོག །རྒྱལ་གཞིས་དབྱེར་མེད་བཞིན་དུ་བསྐྱངས་པས་ཆོག །བདག་ཀྱང་དེ་རིང་ཚེ་ཐར་གཏོང་རོགས་མཛོད། །ཅེས་ཞུས་པས། ལྷ་སྲས་ཀྱིས་འདི་སྐད་ཅེས་གསུངས་སོ། །ཀྱེ་མ་ཉོན་དང་བདུད་མོ་ཧ་ཅང་མ། །ང་ཡི་ཡུམ་ཆེན་འགྲོ་བ་བཟང་མོ་དེ། །གློ་བུར་དགུང་སྔོན་མཐོངས་ལ་འཕུར་ནས་སོང་། །ནུ་ཞོ་འཐུང་བའི་མིང་སྲིང་གཉིས་པོ་ལུས། །ང་ཡི་ཡབ་ཆེན་ཀཱ་ལ་དབང་པོ་ལ། །ཁྱོད་ཀྱིས་སྨྱོ་ཟས་སྨྱོ་ཆུ་ཞུས་པའི་ཐོག །ཁྱོད་ཀྱིས་ཉེས་མེད་མུན་པའི་བཙོན་ལ་བཅུག །དེ་འདྲ་བསམས་ན་ཚེ་ཐར་ག་ལ་གཏོང་། །དང་པོ་མིང་སྲིང་ཤན་པའི་ལག་ཏུ་སྤྲད། །གཉིས་པ་མིང་སྲིང་ཉ་པའི་ལག་ཏུ་སྤྲད། །གསུམ་པ་མིང་སྲིང་གདོལ་པའི་ལག་ཏུ་སྤྲད། །གདོལ་པ་གཞོན་པས་ཤར་རིའི་གཡང་ལ་བསྐྱུར། །དེ་གསུམ་དྲན་པས་ཚེ་ཐར་ག་ལ་གཏོང་། །ད་ནི་དགྲ་བོ་ལག་ཏུ་ཚུད་པས་ན། །ཚེ་ཐར་གཏོང་བ་ག་ལ་སྲིད། །ཅེས་གསུངས་ནས། དེ་ནས་བདུད་མོ་ཤི་མ་རོ་ལ་མདའ་གྲི་མདུང་གསུམ་ཕྱོགས་བཞི་ནས་ཆར་བབས་པ་བཞིན་བརྒྱབ་སྟེ་བདུད་མོ་བསད། བདུད་མོའི་ཕུང་པོ་དེ་དོང་རིམ་པ་དགུའི་འོག་ཏུ་སྦས་ཏེ། དེའི་ཁར་མཆོད་རྟེན་ནག་པོ་གཅིག་བརྒྱབ་ནས། འདི་སྐད་ཅེས་གསུངས་སོ། །སྟོན་པའི་བསྟན་པ་མ་རྫོགས་བར། །བདུད་ནག་གི་བསྟན་པ་མི་དར་བ། །བདུད་རིགས་ཐམས་ཅད་འདིར་མནན་པས། །སེམས་ཅན་ཐམས་ཅད་བདེ་ལ་འཁོད། །བྱང་ཕྱོགས་ཁ་བ་ཅན་གྱི་ཞིང་ཁམས་སུ། །ང་ནི་རྒྱལ་བའི་བྱུང་གནས་བྱེད་པའི་དུས། །སངས་རྒྱས་བསྟན་པ་དར་ཞིང་རྒྱས་པ་ཤོག །ཅེས་གསུངས་ནས། ཡུལ་མཎྜལ་སྒང་གི་དམག་མི་རྣམས་ལ་དམག་སྟོན་རྒྱ་ཆེ་བར་མཛད་དོ། །དེ་ནས་པདྨ་ཅན་དུ་བདུད་མོ་བསད་པའི་གཏམ་ཐོས་པས། རྒྱལ་བློན་འབངས་འཁོར་རྣམས་ཤིན་ཏུ་མཉེས་ནས། དགའ་སྟོན་ཡང་རྒྱ་ཆེ་མཛད་དོ། །དེ་ནས་ལྷ་སྲས་ཀྱིས་འདི་སྐད་ཅེས་གསུངས་སོ། །འདི་རུ་མི་སྡོད་མཎྜལ་སྒང་དུ་འགྲོ། །བདག་གི་ཡབ་ཆེན་ཀཱ་ལ་དབང་པོ་དེ། །ཧ་ཅང་བཙུན་མོས་མུན་པའི་བཙོན་ལ་བཅུག །དེ་འདྲ་བསམས་ནས་མཎྜལ་སྒང་དུ་འགྲོ། །ད་ལྟ་ཉིད་དུ་ཟླ་བཟང་བློན་པོ་ཁྱོད། ལྷ་རྟ་ངང་པ་འཕུར་ཤེས་ལ་སྒ་ཆ་རྒྱོབས་ཤིག  བློན་པོ་ཟླ་བ་བཟང་པོས་གཙོ་བྱས་པའི་འཁོར་གཡོག་སྟོང་དང་ལྔ་བརྒྱ་མཎྜལ་སྒང་ལ་འགྲོ་བེའི་གྲབས་གྱིས་ཤིག་གསུངས་ཏེ། ཤི་གསོས་ཀྱི་སྨན་ཁུག་གསུམ་དང་བཅས་ཁྱེར་ནས། ཡུལ་མཎྜལ་སྒང་དུ་བྱོན་ཏེ། ཕོ་བྲང་སྒོ་དྲུང་དུ་ཕེབས་པ་དང་། བྲན་གཡོག་གཟེ་མ་ར་མགོ་བཟུང་ནས། མི་མེད་གྲོང་གཅིག་ལ་བརྫངས། དེ་ནས་ཕོ་བྲང་ནང་དུ་བྱོན་ནས། གཏིང་བཙོན་སྒོ་ཕྱེ་བའི་ནང་ན། ཡབ་ཆེན་རྒྱལ་པོ་སྐུ་ལུས་རུས་པ་ཁྲོམ་མེ་མ་ཤི་ཙམ་ལ་བཞུགས་འདུག་པས། ཡབ་ཀྱི་ཞལ་རས་གཟིགས་པ་ཙམ་གྱིས། ལྷ་སྲས་དྲན་མེད་དུ་བརྒྱལ། དེ་ནས་ཐུགས་དྲན་གསོས་ཏེ། ཡབ་ཀྱི་སྐུ་ལུས་ལ་བཅངས་ནས། སྨྲེ་སྔགས་འདི་ལྟར་བརྗོད་དོ། ཡབ་ཆེན་རྒྱལ་པོ་ཁྱེད་ལ་འོ་བརྒྱལ་འདི་འདྲ་བྱུང་བ་དེ། ངན་པ་ཧ་ཅང་བཙུན་མོས་ལན་པ་ཡིན། འདི་འདྲའི་ཁྲིམས་གཅོད་གཏོང་བ་ཕོད་ལགས་སམ། ཡབ་ཀྱི་ཞལ་ཡང་མ་མཇལ་ལོ་ངོ་དེ་ཙམ་སོང་། ཡབ་ཀྱིས་བདག་ལ་གསུང་གནང་སྩལ་དུ་གསོལ། ཞེས་ཞུས་པས། ཡབ་ཀྱིས་མི་ཚོ་བར་སྤྱན་གཉིས་རུས་པའི་སྟིང་ནས་ཧྲིག་ཧྲིག་གཟིགས་ཏེ། གསུང་ཡང་སྨྲ་མི་ཐུབ་པ་དང་། དེ་ནས་ལྷ་སྲས་རྒྱལ་པོས་བང་མཛོད་དུ་བྱོན་ནས། མཛོ་མོ་དཀར་མོའི་འོ་མ་བཞེས་ཏེ། དེ་ལ་ཤི་གསོས་ཀྱི་སྨན་ཐུན་གཅིག་བཏབ་ནས། ཡབ་ཀྱི་ཞལ་དུ་གསོལ། ཐུན་གཅིག་སྐུ་ལུས་ལ་བྱུགས་པས། ཡབ་ཀྱི་སྐུ་ལ་དྲོད་རྙེད་བྱུང་། ཡང་ཐུན་གཅིག་ཞལ་དུ་གསོལ། ཐུན་གཅིག་སྐུ་ལུས་ལ་བྱུག་པས། ཡབ་ཀྱང་གསུང་སྨྲ་ཐུབ་པ་ཙམ་བྱུང་ནས། ཡབ་ཀྱིས་འདི་སྐད་ཅེས་གསུངས་སོ། །དེ་རིང་ང་ཡི་རྩ་ན་ཡོད་པའི་མི་ཕོ་དེ། །སྙིང་དང་འདྲ་བའི་ཀུན་ཏུ་ལེགས་པ་མ་ཡིན་ནམ། །འོ་ཅག་ཕ་བུ་གསུམ་གྱི་འོ་བརྒྱལ་ལ། །ངན་པ་བདུད་མོ་མོ་ཡིས་ལན་པ་ཡིན། །ཁ་སང་ཁ་ཡི་ཉི་མོ་ལ། །བདུད་མོ་བློན་འབངས་ཐམས་ཅད་དམག་ལ་སོང་། །ད་ནི་བདུད་མོ་སླེབས་ལ་ཁད་ཙམ་ཡོད། །འདི་རུ་མ་སྡོད་པདྨ་ཅན་ལ་བྲོས། །འདི་རུ་བསྡད་ན་བདུད་མོས་ཟ་ཉེན་ཡོད། །ཅེས་གསུངས་པས། ཡང་ལྷ་སྲས་ཀྱིས་ཞུས་པ། ཡབ་ཆེན་རྒྱལ་པོ་བདག་ལ་ཚུར་གསོན་དང་། །བདུད་མོའི་དམག་དེ་པདྨ་ཅན་དུ་བྱུང་། །པདྨ་ཅན་གྱི་རྒྱལ་པོའི་དམག་དཔུང་གིས། །བདུད་མོའི་དགྲ་སྲོག་དགྲ་སྙིང་བཅད་ནས་ཚར། །དེས་ན་བདག་ཀྱང་འདི་རུ་ཡོང་བ་ཡིན། །ཡབ་ཆེན་རྒྱལ་པོ་གཟིམས་ཆུང་ནང་དུ་ཕེབས། ཞེས་གསུངས་ནས་ཡབ་སྲས་གཉིས་གསེར་ཁྲི་ལ་འཁོད་ནས་ཟླ་བ་གསུམ་ཙམ་བཞུགས་སོ། །དེ་ནས་བློན་པོ་མཛེས་ལྡན་དང་བློན་པོ་ཏྲི་ན་འཛིན་དང་། བློན་པོའི་ཚོགས་རྣམས་ཀུན་འདུས་ཏེ། ལྷ་སྲས་ལ་ཕྱག་ཕུལ་ནས། འདི་སྐད་ཅེས་ཞུས་སོ། །ཀྱེ་མ་ཡབ་སྲས་གསུམ་པོ་ཐུགས་ཀྱིས་དགོངས། །བདག་ཅག་བློན་འབངས་བདུད་མོའི་དབང་དུ་ཤོར། །ཡབ་སྲས་གསུམ་ལ་སྐུ་ངལ་དེ་ཙམ་བཟོས། །ཡབ་ཆེན་རྒྱལ་པོ་དབང་མེད་བཙོན་དུ་བཅུག །ལྕམ་སྲིང་གཉིས་པོ་གསོད་ལུགས་མང་བྱས་ཀྱང་། །ད་ནི་མ་ཉེས་ནམ་དེ་མཐའ་ནས་ལངས། །དང་པོ་ལྕམ་སྲིང་ནགས་ཁྲོད་ཡོད་པའི་དུས། །བདག་ཅག་བློན་པོ་རྣམས་ཀྱིས་བསླུས་ནས་བཟུང་། །ད་ནི་རྒྱལ་པོ་གཏེར་ནས་སྐྱེས་བྱུང་བས། །ནོར་དང་ལོངས་སྤྱོད་གང་ཡོད་ཁྱེད་ལ་འབུལ། །ཞེས་ཞུས་ནས། བློན་པོ་རྣམས་ཀྱིས་གསེར་གྱི་དོང་ཙེ་དང་། ལ་ལས་དངུལ་གྱི་དོང་ཙེ་དང་གླང་པོ་ཆེ་དང་། རྟ་དང་མ་ཧེ་ལ་སོགས་པ་བསམ་གྱིས་མི་ཁྱབ་པ་ཕུལ། དེ་ནས་རྒྱལ་པོས་འདི་སྐད་ཅེས་གསུངས་སོ། །ཀྭ་ཡེ་བློན་པོའི་ཚོགས་རྣམས་ཚུར་ཉོན་དང་། །སྔོན་ནས་དེ་འདྲ་བྱེད་བསམ་མེད་ན་ཡང་། །སྡིག་ཅན་བདུད་མོའི་གྲོས་དབང་ཤོར་བའི་ལན། །དེ་རྣམས་ད་ནས་སེམས་ལ་ལྷད་མི་བྱེད། །ཁྱེད་རྣམས་ད་ནི་སྡིག་པའི་ལས་མི་བྱ། །མི་དགེ་བཅུ་སྤོངས་དགེ་བཅུ་དང་དུ་ལོངས། །སྤྱི་བོར་ཡི་དམ་ཐུགས་རྗེ་ཆེན་པོ་སྒོམས། །ཆོས་ཀྱི་སྙིང་པོ་ཡི་གེ་དྲུག་མ་དྲོངས། །ཞེས་གསུངས་པ་དང་། ཡང་རྒྱལ་པོས་འདི་སྐད་ཅེས་གསུངས་སོ། །ང་ཡི་དྲིན་ཆེན་ཤན་པ་རྒན་བཞོན་དང་། །ཉ་པ་རྒན་བཞོན་གཉིས་དང་བཅས་པ་རྣམས། །ད་ལྟ་ཉིད་དུ་འདི་རུ་ཁྲིད་ནས་ཤོག །ཅེས་གསུངས་པས། བློན་པོ་གཅིག་གིས་མྱུར་དུ་ཕྱིན་ནས། ཁོང་ཐམས་ཅད་དེ་མ་ཐག་ཏུ་བོས་ཏེ་རྒྱལ་པོའི་མདུན་དུ་འཁོད་པ་དང་། བློན་པོ་རྣམས་ཀྱིས་ཕུལ་བའི་གསེར་དངུལ་སོགས་དང་། གཞན་ཡང་འབུལ་བ་བྱུང་བ་རྣམས་དང་། རྒྱལ་པོའི་བང་མཛོད་ནས་ཀྱང་གསེར་དངུལ་རིན་པོ་ཆེ་བསམ་གྱིས་མི་ཁྱབ་པ་དང་འབྲུ་མཛོད་ནས་འབྲུ་སྣ་བསམ་གྱིས་མི་ཁྱབ་པ་གནང་ནས། འདི་སྐད་ཅེས་གསུངས་སོ། །ང་ཡི་དྲིན་ཆེན་ཤན་པ་རྒན་བཞོན་དང་། །ཉ་པ་རྒན་གཞོན་གཉིས་པོ་ཚུར་ཉོན་དང་། །ཁྱེད་ཅག་ཤན་པ་རྒན་གཞོན་གཉིས་པོ་ཡིས། །མཎྜལ་སྒང་གི་བློན་པོ་ནང་བློན་གྱིས། །ཁྱེད་ཅག་ཉ་པ་རྒན་གཞོན་གཉིས་པོ་ཡིས། །པདྨ་ཅན་གྱི་བློན་པོ་ནང་བློན་གྱིས། །ཞེས་གསུངས་ནས་བཀའ་བཀོད་གནང་། དེ་ནས་ལྷ་སྲས་ཀྱིས་པདྨ་ཅན་ལ་འགྲོ་གསུངས་ཏེ། ཡབ་སྲས་གཉིས་དང་འཁོར་འབངས་ལྔ་བརྒྱ་དང་བཅས་བྱོན་ཏེ། ཡུལ་པདྨ་ཅན་དུ་ཕེབས་ནས། ཟླ་བ་གསུམ་གྱི་བར་དགའ་སྟོན་རྒྱས་པར་མཛད། དེ་ནས་རྒྱལ་བློན་འཁོར་འབངས་ཐམས་ཅད་བདེ་ཞིང་དགའ་སྤྲོའི་དཔལ་ལ་འདོད་དགུའི་ལོངས་སྤྱོད་དུ་བཞུགས་སོ། །བཀྲ་ཤིས།།  །།

བརྒྱུད་སྐུལ།

མཆན་སྤེལ།