འོ་བརྒྱལ་ཐང་ཞེས་པའི་ས་མིང་དང་ཇོ་བོ་འོ་བརྒྱལ་བྱུང་ཚུལ་ལ་དཔྱད་པ།

འོ་བརྒྱལ་ཐང་ཞེས་པའི་ས་མིང་དང་ཇོ་བོ་འོ་བརྒྱལ་བྱུང་ཚུལ་ལ་དཔྱད་པ།

  སྐྱུ་རའི་རླུང་བུས།

           སྔར་འོ་མའི་ཐང་ཞེས་བརྗོད་ལ་ད་ལྟ་འོ་བརྒྱལ་ཐང་ཞེས་བརྗོད་པའི་ས་ཡུལ་དེ་ནི།  སྔར་མེས་སྲོང་བཙན་སྐབས་ནས་འགྲུལ་བཞུད་ཀྱི་གདོང་ཁ་གཏོད་སའི་ལྟེ་བའི་གནས་གཞིས་ཤིག་ཡིན་པ་མ་ཟད་རྒྱལ་རབས་ཆོས་འབྱུང་ཁག་ལས་ཀྱང་ལྟེ་བའི་ས་གནས་ཤིག་ལ་ངོས་བཟུང་ཡོད།     གནས་དེར་འོ་བརྒྱལ་ཐང་ཞེས་ཐོགས་ཚུལ་ལའང་།  ཆོས་འབྱུང་འགའ་ཞིག་ལས་རྒྱལ་པོ་སྲོང་བཙན་འདས་ཤིང་མང་སྲོང་མང་བཙན་སྐབས་བོད་ལ་རྒྱའི་དམག་དྲངས་ནས་ཡུལ་གཞིས་ཅི་དྲག་བཅོམ་སྟེ་སྟོན་པ་དགུང་ལོ་བཅུ་གཉིས་པའི་ཚད་ཇོ་བོ་ཤཱཀྱ་མུ་ནི་དེ་ཉིད་རྒྱ་ནག་ཏུ་གདན་དྲངས་པའི་སྐབས་སུ་དང་པོ་རྟ་པ་མི་གཅིག་གིས་པང་དུ་ཐེག་པ་དང་རྗེས་སུ་མ་ཐེག་པར་དྲ་བར་བཅུག་སྟེ་མི་སུམ་བརྒྱས་སྒོར་ཕྱུང་བ་དང་།   དེ་ནས་མི་སྟོང་གིས་མ་ཐེག་པར་ད་ལྟའི་འོ་བརྒྱལ་ཐང་འདིར་བྱེ་མའི་གཏིང་རུམ་དུ་སྦས་པས་ཇོ་བོ་འོ་བརྒྱལ་བྱུང་ནས་འོ་བརྒྱལ་ཐང་ཞེས་གྲགས་པ་རེད་ཟེར་བ་དང་།  ཡང་ཇོ་བོ་གདན་དྲངས་པའི་སྐབས་སུ་དོ་མོའི་ཐང་ལ་ཟླ་ཤས་འོ་བརྒྱལ་བྱུང་ནས་འོ་བརྒྱལ་ཐང་ཞེས་གྲགས་པ་རེད་ཟེར་བ།  གཞན་ཡང་།  ཇོ་བོ་རྣམ་གཉིས་ཀྱི་རྟེན་ཁང་བརྗེ་སྲོོལ་བྱུང་བའི་ཆ་གཞི་ཐོག་མ་ཡང་དེ་སྐབས་ནས་བྱུང་བ་སོགས་བཞེད་ཚུལ་མང་མོད།  ཅིའི་ཆ་ནས་དཔྱད་གཞི་ལས་ཐག་གཅོད་མི་རུང་ཡང་།   དེ་དག་ཁུངས་དག་པར་མི་སྣང་སྙམ་སྟེ།  ཆོས་འབྱུང་མཁས་དགའ་གཞིར་བཞག་ནས་ཅུང་ཟད་སྤྲོས་ན།

            སྔར་ཆོས་རྒྱལ་སྲོང་བཙན་སྒམ་པོའི་སྐབས་ལ་བོད་འདི་ཆབ་དཔལ་རིག་གསུམ་གྱི་ངང་ཚུལ་ཐོག་གཞན་ལས་བླ་ན་མཐོ་བ་ཞིག་ཡོང་ཆེད་རྒྱ་བལ་གཉིས་ནས་བཙུན་མོ་གདན་དྲངས་ཤིང་།    རྒྱའི་རྒྱལ་པོ་ཐང་ཐའི་ཛུང་གི་སྲས་མོ་འུན་ཤིང་ཀོང་ཇོ་གདན་འདྲེན་ཞུ་སྐབས་རྒྱལ་ཕྲན་མང་པོ་ཞིག་ལས་བོད་འདི་རིགས་སྟོབས་ཀྱིས་དབང་ཐང་རྔམས་ཤིང་ཡང་ཡང་འགྲན་ཀྱང་བོད་ལ་ཐོབ་ནས་སྟེར་འདོད་མེད་པར་དམའ་འབེབ་དང་བརྙས་ཆུང་ཚད་མེད་བྱས་པའི་འཁོན་ལན་དུ་མཐར་མགར་གྱིས་རྒྱའི་ཡུལ་ནས་ལུག་ནག་པོའི་མཚེར་ཁྲག་བྲེ་གང་དང་།  དར་ཟབ་ཀྱི་ཐལ་བ་བྲེ་གང་།  བཙན་དན་གྱི་སོལ་བའི་མདུང་ཤིང་འདོམ་གང་སོགས་བོད་ལ་ཀོང་ཇོའི་རྫོངས་བ་ལ་དགོས་ལུགས་བཤད་ནས་རྒྱ་ཡུལ་ཕུང་བར་བཟོས།     དེ་མ་ཐག་ལན་སློག་པའི་བསམ་བློ་ཡོད་ཀྱང་མེས་སྲོང་བཙན་གྱི་དབང་ཐང་དང་གཟི་བརྗིད་མ་བཟོད་པར་རྗེས་ཕྱོགས་ཀྱི་བྱ་བ་ཞིག་ཏུ་བཞག་པ་དང་།  ཕྱིས་སྲོང་བཙན་གཤེགས་ནས་མང་སྲོང་མང་བཙན་སྐབས་ཐང་དམག་བོད་དུ་འོང་ཞེས་གཏམ་གསན་པས་སྔར་གྱི་ཞལ་ཆེམས་ལྟར་ཇོ་བོ་ཤཱཀྱ་མུ་ནི་ར་ས་འཕྲུལ་སྣང་གི་ལྷོ་སྒོ་མེ་ལོང་ཅན་དུ་སྦས།  སྒོ་ལ་འདག་ཞལ་བྱས་ཏེ་འཇམ་དབྱངས་ཀྱི་སྐུ་བྲིས་ནས་བཞག་པ་ཡིན་མོད།  དེང་སང་སྐུ་རྟེན་བརྗེ་ཚུལ་གྱི་ཆ་གཞི་དེ་དག་མང་སྲོང་རང་གི་དགོངས་པ་ཡིན་ཚུལ་སྨྲ་བཞིན་འདུག་ཀྱང་།   ཐོག་མ་ནས་འུན་ཤུང་ཀོང་ཇོ་རང་ཉིད་ཀྱི་དགོངས་པ་ཡིན་ཏེ།   ཀོང་ཇོ་སྐུ་གཤེགས་པའི་ཚེ་ཞལ་ཆེམས་སུ། << ཡང་ཀོང་ཇོ་ཞལ་ཕྱིར་ལོག་མཛད་ནས་རྒྱ་དམག་གིས་སྤྱན་མི་འདྲེན་པའི་ཕྱིར་ལྷ་གཉིས་བརྗེས་ལ་ཇོ་བོ་ཤཱཀྱ་ལྷོ་སྒོ་མེ་ལོང་ཅན་དུ་བཞུགས་སྒོ་བརྩིགས་ཞལ་བ་གྱིས་ལ་འཇམ་དབྱངས་ཀྱི་སྐུ་བྲིས་ཤིག >>  ཅེས་གསུངས་ཡོད་པ་དགའ་སྟོན་ལས་གསལ་ལོ།།

དེ་ནས་མང་སྲོང་ཉིད་དགུང་ལོ་ཉེར་བདུན་ལ་གཙང་གི་བར་སྣང་སྒང་དུ་འདས་རྗེས་ཐང་དམག་འབུམ་ལྔ་བོད་དུ་ལྷགས།  ཕོ་བྲང་ཁྲི་རྩེ་དམར་པོ་བསྲེགས།  ཇོ་བོ་ཤཱཀྱ་ལྷོ་སྒོ་མེ་ལོང་ཅན་དུ་བཞུགས་ཡོད་པ་ཤེས་ཀྱང་འཇམ་དབྱངས་ཀྱི་སྐུ་བྲིས་པར་འཇིག་མ་ནུས། ལ་ལས་དེ་སྐབས་ཇོ་བོ་ཤཱཀྱ་རྩ་བ་ནས་མི་རྙེད་པ་དང་སྔར་ཇོ་བོ་ཤཱཀྱ་བཞུགས་སར་གདན་དྲངས་པའི་ཇོ་བོ་མི་བསྐྱོད་པ་དང་འཁྲུལ་ནས་གདན་དྲངས་ཚུལ་སྨྲ་མཁན་འདུག་ཀྱང་དག་པར་མ་མཐོང་སྟེ།  དེ་ཉིད་ར་ས་འཕྲུལ་སྣང་གཙུག་ལག་ཁང་དུ་ཡོད་པ་ཤེས་ཀྱང་འཇམ་དབྱངས་ཀྱི་སྐུ་བྲིས་པས་འཇིག་མ་ནུས་པར་དེའི་ཚབ་ཏུ་ཇོ་བོ་མི་བསྐྱོད་རྡོ་རྗེ་གདན་དྲངས་པ་ཡིན།    དེའི་ཚེ་ར་ས་འཕྲུལ་སྣང་ལ་བཞུགས་པའི་ཁྲོ་བོ་རྨེ་བརྩེགས་ཕྱག་གཉིས་ཁུ་ཚུར་བསྣོལ་བ་གྲིབ་སེལ་གྱི་ཕྱག་རྒྱར་བཞུགས་པ་ཞིག་ཡོད་པ་དང་།  དེས་ཁུ་ཚུར་གྱིས་ཐུགས་ཀ་ཁ་ཕྱེ་བས་སྤྲུལ་པའི་དམག་དཔུང་འཐོན་ཏེ།  ཐང་དམག་རྣམས་ཤིན་ཏུ་སྐྲག་ནས་འཐོར་བ་དང་། ཇོ་བོ་མི་བསྐྱོད་རྡོ་རྗེ་ཤར་ཕྱོགས་འོ་མའི་ཐང་དུ་ཞག་བདུན་ལུས་པས་ཇོ་བོ་འོ་བརྒྱལ་བྱུང་ནས་འོ་བརྒྱལ་ཐང་ཞེས་དངོས་སུ་གྲགས་པ་ཡིན་ནོ། །   གོང་གི་ཇོ་བོ་ཤཱཀྱ་མུ་ནི་མི་སྟོང་གིས་མ་ཐེག་པར་བྱེ་མའི་འོག་ཏུ་ལུས་ཟེར་བ་ནི།   ཤར་ཕྱོགས་འོ་མའི་ཐང་ངམ་འོ་བརྒྱལ་ཐང་འདི་མ་ཡིན་པར་དོ་མོའི་ཐང་ལ་གོ་རྒྱུ་ཡིན།   རྗེས་སུ་ཁྲི་ལྡི་གཙུག་བརྟན་མེས་ཨག་ཚོམ་དགུང་ལོ་དྲུག་ཅུ་རེ་གསུམ་ལ་ཡར་འབྲོག་སྦ་ཚལ་མཁར་གཤེགས་རྗེས།   སྲས་ཁྲི་སྲོང་ལྡེའུ་བཙན་ཆབ་སྲིད་བཞེས་མ་ཐག་སྐུ་ནར་མ་སོན་པས། སྡིག་བློན་གྲོམ་པ་སྐྱེས་ལ་སོགས་པའི་ངན་བློན་འགས་རྒྱལ་པོ་སྐུ་ཚེ་ཐུང་བ་ཆོས་བྱས་པས་ལན།  ཚེ་ཕྱི་མ་ཟེར་བ་རྫུན་རེད་ཟེར་ནས་ཆོས་བློན་རྣམས་ཕམ་པར་བཟོས་ནས་བོད་ནག་པོར་བཏང་།  རྒྱ་སྟག་ར་མོ་ཆེ་ན་བཞུགས་པའི་ཇོ་བོ་ཤཱཀྱ་མུ་ནི་རྒྱའི་ལྷ་ཡིན་པས་སླར་རྒྱ་ཡུལ་དུ་བསྐྱལ་བར་བྱ་ཟེར་ནས་དང་པོ་རྟ་པ་མི་གཅིག་གིས་པང་དུ་ཐེག་ཀྱང་དེ་ནས་མི་སྟོང་གིས་མི་ཐེག་པར་བྱེ་མའི་དོང་དུ་སྦས་ཞེས་པ་ནི་ཇོ་བོ་ཤཱཀྱ་མུ་ནི་འདི་རང་ལས་ཇོ་བོ་མི་བསྐྱོད་རྡོ་རྗེ་འདི་ལ་གོ་རྒྱུ་རྩ་བ་ནས་མ་ཡིན་ནོ། །

༢༠༢༠ ༢ ༤དགོང་མོར།

 

བརྒྱུད་སྐུལ།

མཆན་སྤེལ།