ར་ཚག་རི་ཁྲོད།

ར་ཚག་རི་ཁྲོད།

ར་ཚག་རི་ཁྲོད།

 

ར་ཚག་རི་ཁྲོད་ནི། སྟོད་ལུང་བདེ་ཆེན་རྫོང་ནས་སྣུམ་ནག་འཁོར་ལམ་བརྒྱུད་ཡབ་མདའ་བར་སྤྱི་ལེ་བཞི་ལྔ་ཙམ་དང་། དེ་ནས་སྤྱིར་བཏང་འགོར་ལམ་བརྒྱུད་སྤྱི་ལེ་བཞི་ལྔ་ཙམ་ཡབ་ཕུའི་འགྲོ་ལམ་དེད་སོང་ན་ལམ་སྟེང་དུ་ར་ཚག་རི་ཁྲོད་དེ་མཇལ་རྒྱུ་ཡོད། དགོན་དེ་ནི་ར་ལོ་ཙཱ་བས་དགོན་བརྒྱ་དང་བརྒྱད་ཕྱག་བཏབ་གནང་བའི་མཐའ་མཇུག་གི་དགོན་དེ་ཡིན་སྟབས་ཚགས་སུ་ཚུད་པར་བྱས་སྟབས་ར་ཚག་ཅེས་པའི་མཚན་དེ་ལྟར་བྱུང་གསུང། ར་ལོ་ཙཱ་བ་ཐོག་མར་གནས་དེར་ཕེབས་ནས་ད་ལྟའི་མགོན་ཁང་གི་ཤུལ་དུ་སྐུ་མཚམས་སུ་བཞུགས། ས་མཐེབ་སྐྱུ་རེར་ཡ་མ་ར་ཛཱ་འབུམ་རེ་གསུངས་ཏེ་འཇིགས་བྱེད་དཔའ་བོ་གཅིག་པའི་སྐུ་བརྙན་བཞེངས་གནང་མཛད། པཎ་ཆེན་ནཱ་རོ་པའི་ཐུགས་དམ་གྱི་རྟེན་མཁའ་སྤྱོད་མའི་སྐུ་བརྙན་ཞིག་ཡོད་པ་དེ་ནི། ཐོག་མར་སངས་རྒྱས་བཅོམ་ལྡན་འདས་ཞལ་བཞུགས་སྐབས་ནས་ཡོད་སྐད་ལ། དེ་རྗེས་མཁའ་འགྲོའི་རྣམ་སྤྲུལ་ཞིག་གིས་པཎ་ཆེན་ནཱ་རོ་པ་ལ་ཕུལ་བས་ནཱ་རོ་པའི་ཐུགས་དམ་གྱི་རྟེན་དུ་གྱུར།

མི་དང་གསུང་མོལ་གནང་བ་བཞིན་མཛད། ནཱ་རོ་པ་མཁའ་སྤྱོད་དུ་གཤེགས་རྗེས་ཐུགས་ངལ་གྱི་ཚུལ་དུ་གྲི་གུག་ཐུར་དུ་གཏད་པས་ཟུག་ངུ་ཐམས་ཅད་གཅོད་པ་དང། ཐོད་ཕྲག་ནམ་མཁར་འཕྱར་བས་ཟག་མེད་ཀྱི་རོས་ཚིམས་པར་མཛད་པ་སྤྱན་གསུམ་དག་པ་མཁའ་སྤྱོད་དུ་ནཱ་རོ་པའི་རྗེས་སུ་གཟིགས་པ་བཅས་ཀྱི་ཚུལ་འདི་དེ་ནས་བྱུང་བ་ནས་བཟུང་ནཱ་རོ་མཁའ་སྤྱོད་དུ་གྲགས། དེ་ནས་རྗེས་བཙུན་མས་ཡུལ་དེར་དཔལ་འཁོར་ལོ་སྡོམ་པའི་དཀྱིལ་འཁོར་དངོས་སུ་གཟིགས་ཏེ་མཁའ་འགྲོའི་སྤྲུལ་པ་གསུམ་དུ་སྤྲུལ་ནས་བོད་ཡུལ་གང་སར་བཙལ་བས་མཐར་མདོ་སྨད་ནས་ལས་ཅན་གྱི་སྐྱེས་བུ་རྒྱལ་མཚན་བཟང་བྱ་བ་ལོ་བཅུ་ལོན་པ་ཞིག་ལ། དཔལ་ནཱ་རོ་པའི་ཐུགས་དམ་གྱི་རྟེན་རྗེ་བཙུན་རྡོ་རྗེ་རྣལ་འབྱོར་མ་བོད་ཡུལ་དུ་གདན་འདྲེན་དགོས་པའི་ལུང་བསྟན་གནང་བར། ཁྱིའུ་དེས་ཡབ་ཡུམ་ལ་གསུངས་པར་ཐོག་མར་ཁས་མ་བླངས། དེ་ནསདགུང་ལོ་བཅོ་ལྔར་ལོན་མཚམས་སླར་ཡང་ཡབ་ཡུམ་ལ་ནན་སྐྱེད་པས་གསེར་ཕྱེ་བྲེ་གང་བཅས་རྒྱ་གར་དུ་ཕེབས་ཆོག་པའི་བཀའ་འཁྲོལ་བ་བཞིན་རྒྱ་གར་དུ་ཕེབས་ནས་ཐབས་སྣ་ཚོགས་ཀྱི་སྒོ་ནས་མཁའ་སྤྱོད་མའི་སྐུ་བརྙན་གདན་དྲངས། ལམ་བར་དུ་གསུང་ཐེངས་མང་བྱོན། དེ་ནས་རྒྱལ་མཚན་བཟང་གིས་ས་རིར་དཔྱད་པ་བཟང་བའི་གནས་དེར་སྤྱན་དྲངས། རྗེ་ཙོང་ཁ་པས་དབུ་རྒྱན་དང་སྙན་རྒྱན་འབུལ་གནང་མཛད་ནས་ཐུགས་སྨོན་བཟང་པོའི་མཚམས་སྦྱོར་གནང། དེ་རྗེས་རྒྱལ་དབང་ལྔ་པས་འབྲས་སྤུངས་ཀུན་དགའ་རྭ་བར་སྤྱན་དྲངས་པས་ཉིན་ཉེར་གཅིག་སོང་མཚམས་ཁོ་མོ་འདིར་མི་སྡོད་ར་ཚག་ཏུ་འགྲོ་ཞེས་གསུང་བྱོན་པས་རང་ལོག་ཏུ་གདན་དྲངས། ཡང་རྩ་ཕོ་བྲང་གདན་དྲངས་པས་འདིར་མི་སྡོད་ཡབ་ཏུ་འགྲོ་ཞེས་གསུངས་པས་སླར་ཡང་རང་ལོག་ཏུ་གདན་དྲངས་པ་སོགས་ཀྱི་ལོ་རྒྱུས་ཡོད། སྔོན་འདུ་ཁང་ཀ་བཞིའི་ནང་རྟེན་གཙོ་རྒྱལ་བ་བྱམས་པ་ཐོག་སོ་ཉིས་ལྡན་དང། ཡང་སྟེང་དུ་མཁའ་སྤྱོད་ལྷ་ཁང་། ར་ལོ་ཙཱ་བའི་སྒྲུབ་ཕུག་ནང་འཇིགས་བྱེད་དཔའ་པོ་གཅིག་པ་ཐོག་སོ་གཅིག་ལྡན་དང། དམ་ཅན་ཆོས་རྒྱལ་སོགས་མཇལ་རྒྱུ་ཡོད། རྒྱུན་དུ་དགེ་སློང་བརྒྱད་དང་དགེ་ཚུལ་གཉིས་བཞུགས་དགོས་པ་དང་དེའི་གསོལ་ཕོགས་སྒེར་པ་གཡུ་ཐོག་ནས་འབུལ་དགོས། དགོན་དེའི་ལྟག་ཏུ་ལས་ནད་འབུམ་པ་ཞེས་པ་ཞིག་ཡོད་པ་དེ་ནི་ར་ལོ་ཙཱ་བས་མ་འོངས་སེམས་ཅན་ནད་ལས་སྒྲོལ་ཆེད་དུ་མཁའ་འགྲོ་བྱེ་བའི་དབུ་སྐྲ་བཞུགས་སུ་གསོལ་ནས་ཐུགས་སྨོན་གནང། སྨན་བཅོས་ཀྱིས་དྲག་སྐྱེད་མ་བྱུང་བའི་ནད་པ་འབུམ་པ་དེར་སྐོར་བ་བསགས་ན་ནད་ལས་སྒྲོལ་ཞེས་ཟེར། འོན་ཀྱང་ཕྱི་དྲོ་མཁའ་འགྲོ་ཕེབས་པའི་སྐབས་འཁེལ་བས་སྐོར་བར་འགྲོ་མི་རུང་ཞེས་གསུང་སྲོལ་ཡོད།

ད་ལྟ་སྔོན་གྱི་འདུ་ཁང་ལ་ཉམས་གསོ་གནང་བའི་ནང་སྔོན་གྱི་བྱམས་པའི་སྐུ་བརྙན་དང་མགོན་ཁང་ནང་འཇིགས་བྱེད། མཁའ་སྤྱོད་ལྷ་ཁང་ནང་མཁའ་སྤྱོད་མའི་སྐུ་བརྙན་སོགས་གསར་བཞེངས་དང། ལས་ནད་འབུམ་པ་ཉམས་གསོ་གནང་བ་སོགས་མཇལ་རྒྱུ་ཡོད།

 

 

བརྒྱུད་སྐུལ།

མཆན་སྤེལ།