སྣང་ས་འོད་འབུམ་གྱི་རྣམ་ཐར།

སྣང་ས་འོད་འབུམ་གྱི་རྣམ་ཐར།

རིགས་བཟང་གི་མཁའ་འགྲོ་མ་སྣང་ས་འོད་འབུམ་གྱི་རྣམ་ཐར་བཞུགས་སོ།།
༄༅། །ན་མོ་གུ་རུ་དེ་ཝ་ཌཱ་ཀི་ནི།
ཐབས་མཁས་ཐུགས་རྗེ་ཤཱཀྱའི་རིགས་འཁྲུངས་ཤིང་། །
གཞན་གྱིས་མི་ཐུབ་བདུད་ཀྱི་དཔུང་བཅོམ་པ། །
གསེར་གྱི་ལྷུན་པོ་ལྟ་བུར་བརྗིད་པའི་སྐུ། །
ཤཱཀྱའི་རྒྱལ་པོ་དེ་ལ་ཕྱག་འཚལ་ལོ། །
པོ་ཏཱ་ལ་ཡི་གནས་མཆོག་ནས། །
ཏཱམ་ཡིག་ལྗང་གུ་ལས་འཁྲུངས་ཤིང་། །
ཏཱམ་ཡིག་འོད་ཀྱིས་འགྲོ་བ་སྒྲོལ། །
སྒྲོལ་མ་ཡུམ་ལ་ཕྱག་འཚལ་ལོ། །
ལྷ་ཡི་སྐད་དང་ཀླུ་དང་གནོད་སྦྱིན་སྐད། །
དྲི་ཟ་དག་དང་མི་ཡི་སྐད་རྣམས་དང་། །
འགྲོ་བ་ཀུན་གྱི་སྒྲ་རྣམས་ཇི་ཙམ་པར། །
ཐམས་ཅད་སྐད་དུ་བདག་གིས་ཆོས་སྟོནད་ཏོ། །

དེ་ཡང་བདག་ཅག་གི་སྟོན་པ་ཐབས་ལ་མཁས་ཤིང་ཐུགས་རྗེ་དང་ལྡན་པ། ཀུན་ལ་ཉེ་རིང་མེད་པ་རྗེས་སུ་བརྩེ་བ་དེས་གདུལ་བྱ་རྣམས་ཀྱི་སོ་སོའི་བློ་དང་འཚམ་པར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་དེ་དག་མདོར་བསྡུས་ན་ཆོས་ཀྱི་འཁོར་ལོ་རིམ་པ་གསུམ་དུ་འདུས་ཤིང་། དེ་ཡང་བདག་དང་བདག་འདྲ་བ་ལྷ་ཆོས་ཀྱི་བརྗོད་དོན་མི་རྟོགས་པ་རྣམས་ལ་ནི་འཇིག་རྟེན་ཆོས་དང་བསྟུན་ཏེ་སྒྲུང་དང་གཏམ་རྒྱུད་གཉིས་སུ་མཛད་པའི་ནང་གི་བྱ་སྒྲུང་དང་། རོ་སྒྲུང་དང་། སྤྲེའུ་ཧ་ལོད་ཀྱི་སྒྲུང་། གླིང་རྗེ་གེ་སར་རྒྱལ་པོའི་སྒྲུང་སོགས་དང་། གཞན་ཡང་རྒྱལ་པོ་ར་མ་ཎའི་གཏམ་རྒྱུད་དང་།  ལྷ་མོ་ཡིད་འཕྲོག་མའི་གཏམ་རྒྱུད། ཆོས་རྒྱལ་དྲི་མེད་ཀུན་ལྡན་གྱི་གཏམ་རྒྱུད་སོགས་འདུལ་བ་ལུང་ལས་བསྟན་བཅོས་ཇི་སྙེད་ཅིག་གསུངས་པ་རྣམས་ཀྱི་ནང་ནས། ཉི་མ་དེ་རིང་གི་དུས་སུ་གཙོ་བོར་མགོ་འདྲེན་གྱི་དཔོན་པོ་དང་།  ཡང་དགོས་རྒྱལ་སྡེ་ཁྲོམ་པ་རྣམས་ལ་གཟིགས་ཕུད་འབུལ་རྒྱུའི་ལེའུ་འདི་ནི། འདོད་སྲེད་ཅན་རྣམས་འཁོར་བ་ལ་ངེས་འབྱུང་སྐྱེས་ནས་བློ་ཁ་ཆོས་ལ་བསྒྱུར་ཐབས་སུ་སྣང་ས་འོད་དེ་འབུམ་པའི་རྣམ་ཐར་ནས་འབུལ་རྒྱུ་ཡིན་ཅིང་། སྣང་སའི་རྣམ་ཐར་དེ་ལ་ཡང་།  སྣང་ས་ལྷ་ཡུལ་མ་དང་། སྣང་ས་ཤ་ལུས་སོགས་མི་འདྲ་བ་ཁ་ཤས་ཡོད་ཀྱང་། ད་ལམ་སྐབས་སུ་བབ་པ་ནི་རིགས་བཟང་གི་མཁའ་འགྲོ་མ་གཟུགས་མཛེས་སྣང་ས་འོད་འབུམ་འདི་ཉིད་མིར་སྐུའི་སྐྱེ་བ་བཞེས་པའི་སྔོན་གྱི་བྱུང་བ་བརྗོད་པའི་ཆོས་མཚམས་ནས་འབུལ་བ་ལགས་པས་ཚང་མས་སྙན་གྱི་དབང་པོ་མ་གཡེངས་པར་གསན་པར་ཞུ།

དེ་ཡང་བོད་འདིར་སྟོད་མངའ་རིས་བསྐོར་གསུམ། སྨད་མདོ་ཁམས་སྒང་དྲུག བར་དབུས་གཙང་རུ་བཞིར་དབྱེ་བའི་ནང་ཚན་ནས་གཡས་རུ་གཙང་གི་ཡ་གྱལ་མྱང་སྟོད་རྒྱལ་རྩེ་ཡུལ་ལྗོངས་ཞེས་བྱ་བ་ན་ལྗང་ཕད་ཁུད་ནང་པ་ཞེས་པ་མི་ཁྱིམ་ཕལ་བ་ཞིག་ཡོད་པ་ལས།དེ་ལ་ཡབ་ཀུན་བཟང་བདེ་ཆེན་དང་། ཡུམ་མྱང་ཚ་གསལ་སྒྲོན་བྱ་བ་གཉིས་ཡོད་པ་ལས། ཡབ་ཡུམ་གཉིས་པོ་རྒྱུན་དུ་སེང་ལྡེང་ནགས་ཀྱི་སྒྲོལ་མའི་བསྟོད་པ་ཉིན་མཚན་ཀུན་ཏུ་ཆག་མེད་མཛད་ཅིང་བཞུགས་པ་ལས་དེའི་མཐུ་ལ་བརྟེན་ནས་སྒྲོལ་མ་འབུམ་ཕྲག་སོང་མཚམས་སུ་ནུབ་གཅིག་ཡུམ་ལ་རྨི་ལམ་ངོ་མཚར་ཤིན་ཏུ་ཆེ་བ་འགའ་ཞིག་བྱུང་འདུག་པ་རྣམས་ཡབ་ལ་འདི་སྐད་ཞུས་པ།

རྒྱལ་ཀུན་འཕྲིན་ལས་ལྷ་མོའི་སྐུར་བསྟན་མ། །
སེང་ལྡེང་ནགས་ཀྱི་སྒྲོལ་མར་ཕྱག་འཚལ། །
ལས་ཀྱིས་བཀོད་པའི་ཚེ་གང་གཏན་གྱི་གྲོགས། །
ཡབ་ཆེན་ཀུན་བཟང་བདེ་ཆེན་བདག་ལ་གསོན། །
ཁོ་མོས་མདང་སུམ་ཉལ་བའི་རྨི་ལམ་ལ། །
ངོ་མཚར་ཆེ་བའི་ཁྱད་ཆོས་འདི་ལྟར་བྱུང་། །

གཡུ་ལོ་བཀོད་པའི་ཞིང་ཁམས་དམ་པ་ན། །
དུང་ལོ་འབར་བའི་རིན་ཆེན་ཁྲི་སྟེང་ནས། །
འཇིགས་པ་ཀུན་སྐྱོབས་དུས་གསུམ་སངས་རྒྱས་མ། །
རྒྱལ་ཡུམ་སྒྲོལ་མའི་ཐུགས་ཀའི་ཏཱམ་ཡིག་ནས། །
འོད་འཕྲོས་བདག་གི་སྤྱི་བོའི་ཚངས་བུག་ལ། །
དབུ་མའི་ལམ་བརྒྱུད་སྙིང་དབུས་ཐིམ་པ་རྨིས། །
བདག་གི་ལུས་ལ་མེ་ཏོག་པད་མ་སྐྱེས། །
པད་སྡོང་དེ་ལ་མཁའ་འགྲོས་མཆོད་པ་རྨིས། །
ཕྱོགས་མཚམས་ཀུན་ནས་བུང་བའི་ཚོགས་འདུས་ཏེ། །
པད་མའི་ཟེའུ་འབྲུའི་བཅུད་ཀྱིས་ཚིམས་པ་རྨིས། །
རྨི་ལམ་དེ་འདྲ་བཟང་བ་ལོས་ཀྱང་ཡིན། །

རྨི་ལམ་དོན་འབྲས་ཡབ་ཀྱིས་གསུང་དུ་གསོལ། །

ཞེས་ཞུས་པས། ཡབ་ཤིན་ཏུ་དགྱེས་ཏེ་ལན་འདི་ལྟར་གསུངས་སོ། །
ཚེ་རབས་ཀུན་གྱི་གཏན་གྲོགས་བཞིན་བཟང་མ། །
ཡུམ་ཆེན་མྱང་ཚ་གསལ་སྒྲོན་བདག་ལ་གསོན། །
རྨི་ལམ་མི་བདེན་འཁྲུལ་བ་ཡིན་མོད་ཀྱང་། །
ད་རེས་འདི་ནི་མ་འོངས་ལུང་བསྟན་ཡིན། །
རྗེ་བཙུན་སྒྲོལ་མའི་ཐུགས་ཀྱི་ཏཱམ་ཡིག་ལས། །
འོད་ཟེར་ཁྱེད་ཀྱི་སྙིང་དབུས་ཐིམ་པ་དེ། །
དུས་གསུམ་སངས་རྒྱས་ཀུན་གྱི་འཕྲིན་ལས་མ། །
སྒྲོལ་མའི་བྱིན་རླབས་སྙིང་ལ་ཞུགས་པའི་རྟགས། །
ཁྱོད་ལུས་མེ་ཏོག་པད་མ་སྐྱེས་པ་དེ། །
མཁའ་འགྲོ་ཀུན་གྱི་གཙོ་མོ་ཡིན་པའི་རྟགས། །
ཕྱོགས་མཚམས་ཀུན་ནས་བུང་བའི་ཚོགས་འདུས་པར། །
སྨྲ་བའི་ཟེའུ་འབྲུར་རོ་བཅུད་སྟེར་བ་དེ། །
དག་དང་མ་དག་གདུལ་བྱའི་ཚོགས་རྣམས་ལ། །
ལུས་ངག་ཡིད་གསུམ་འགྲོ་དོན་མཛད་པའི་རྟགས། །
ན་གཞོན་སོ་དཀར་དུས་སུ་བུ་མེད་ཀྱང་། །
ན་རྒས་སྐྲ་དཀར་དུས་སུ་བུ་མོ་ཞིག །
འཁྲུངས་ནས་བུ་ལས་ལྷག་པ་ཡོད་ངེས་པས། །
ཕྱོགས་རྣམས་ཀུན་ཏུ་རིམ་གྲོ་སྒྲུབ་པར་མཛོད། །
རྨི་ལམ་བཟང་ངོ་མྱང་ཚ་གསལ་སྒྲོན་མ། །
བློ་སེམས་བདེའོ་ཀུན་བཟང་བདེ་ཆེན་པ། །

ཞེས་གསུངས་ཏེ་ཡར་དཀོན་མཆོག་ལ་མཆོད་པ། མར་ངན་སློང་ལ་སྦྱིན་པ། བར་དགེ་འདུན་ལ་བསྙེན་བཀུར་བཅས་རྒྱ་ཆེར་མཛད་པའི་མཐུ་ལས་ས་ཕོ་རྟ་ཡི་ལོ་སྤྲེལ་གྱི་ཟླ་བའི་ཡར་ངོ་མཁའ་འགྲོ་འདུ་བའི་དུས་ཆེན་ཚེས་བཅུ་རེས་གཟའ་ཕུར་བུ་དང་། རྒྱུ་སྐར་རྒྱལ་གཉིས་འགྲོགས་པའི་སྒྲུབ་སྦྱོར་ཉིན་སྐུ་བལྟམས་སོ། །

འཁྲུངས་མ་ཐག་ཡུམ་གྱི་ནུ་ཞོའི་ཕུད་ནས་ནམ་མཁའ་ལ་གཏོར་བཞིན་དུ་ཕྱག་ཐལ་མོ་སྦྱར་ཏེ་འདི་སྐད་ཅེས་གསུངས་སོ། །
དུས་གསུམ་རྒྱལ་བ་སྐྱེས་པའི་ཡུམ་མཆོག་མ། །
རྗེ་བཙུན་སྒྲོལ་མར་མཆོད་ཅིང་ཕྱག་ཀྱང་འཚལ། །
ང་ནི་འགྲོ་བའི་དོན་དུ་གནང་བ་ཡིན། །
ས་སྟེང་འདི་ན་བཀྲ་ཤིས་བདེ་ལེགས་ཤོག །
འཕྲིན་ལས་འོད་ཟེར་ཕྱོགས་ཀུན་སྤྲོས་ནས་ཀྱང་། །
འགྲོ་བ་འབུམ་ཕྲག་ཆོས་ལ་འགོད་པར་ཤོག །

ཅེས་གསུངས་པས་སྲས་མོ་དེའི་མཚན་ལ་ཡང་གོང་གི་ཚིགས་བཅད་དེ་རྣམས་བསྡུས་ཏེ་བུ་མོ་སྣང་ས་འོད་འབུམ་ཞེས་ཡུལ་མི་ཀུན་གྱིས་མགྲིན་གཅིག་ཏུ་མཚན་གསོལ་ཞིང་། བྱིས་པ་གཞན་གྱི་ལོ་བསྐྱེད་ལས་དེའི་ཟླ་བསྐྱེད་ཆེ། གཞན་གྱི་ཟླ་བསྐྱེད་ལས་དེའི་ཞག་བསྐྱེད་ཆེ་ཞིང་། སྐུ་འབྲས་མཛེས་པ། ཐུགས་རྒྱུད་དལ་བ་སོགས་མིའི་བུ་མོ་མི་འདྲ་བ་ལྷའི་སྲས་མོ་འདྲ་བ་ཞིག་བྱུང་བ་ལ་བརྟེན་ནས་ཡབ་ཡུམ་ཤིན་ཏུ་མཉེས་ཏེ་སྲས་མོ་དེའི་སྐུ་གསུང་ཐུགས་ལ་བསྟོད་པ་འདི་ལྟར་ཕུལ་ལོ། །

ཕ་བཟང་གི་བུ་མོ་རིགས་བཟང་མ། །
མ་བཟང་གི་བུ་མོ་བཞིན་བཟང་མ། །
ཁྲོམ་ལྷ་མི་ཚོགས་པའི་རྒྱན་གཅིག་མ། །
བུ་མོ་སྣང་ས་འོད་འབུམ་ཚུར་ལ་གསོན། །
འཇིག་རྟེན་འདི་ཡི་མཛེས་པའི་དངོས་པོ་ཀུན། །
གཅིག་ཏུ་བསྡུས་ནས་ཁྱོད་ལ་རྒྱན་དུ་སྟེར། །
མཐོང་བ་ཙམ་གྱིས་མིག་ལ་དགའ་སྟེར་བས། །
གཟུགས་མཛེས་ལྷ་མོའི་སྐུ་ལ་བདག་བསྟོད་དོ། །
ཀ་ལ་པིང་ཀ་འཇོལ་མོ་ཁུ་བྱུག་སོགས། །
ཀུན་གྱིས་འགྲན་ཟླ་མི་ནུས་ཚངས་པའི་དབྱངས། །
ཐོས་པ་ཙམ་གྱིས་རྣ་བར་དགའ་སྟེར་བས། །

རབ་སྙན་སྣང་སའི་གསུང་ལ་བདག་བསྟོད་དོ། །
བུ་མོ་དཀོན་མཆོག་སྐྱབས་ཡུལ་རྣམས་ལ་གུས། །
རྣམ་དག་འགྲོ་བ་ཀུན་ལ་ལྷག་པར་བྱམས། །
དྲན་པ་ཙམ་གྱིས་ཡིད་ལ་དགའ་སྟེར་བ། །
བུ་མོ་སྣང་སའི་ཐུགས་ལ་བདག་བསྟོད་དོ། །
མགྲིན་བཟང་བོང་བུའི་རིགས་ལ་སྨུག་ཆུང་དྲེལ། །
གླང་རྒན་རོག་པོའི་རྒྱུད་ལ་ཁྱུང་དཀར་མཛོ། །
བདག་ཅག་ཕ་མ་རྒན་རྒོན་གཉིས་པོ་ལ། །
ལྷ་མོ་ཁྱོད་འདྲ་འཁྲུངས་པ་ངོ་མཚར་ཆེ། །
ཞེས་ཞུས་པ་ན་སྣང་སས་ལན་གསུངས་པ།
དུས་གསུམ་རྒྱལ་ཀུན་སྐྱེས་པའི་འཕྲིན་ལས་མ། །
བཅོམ་ལྡན་འཕགས་མ་སྒྲོལ་མ་ལ་ཕྱག་འཚལ། །
ཚུར་ལ་གསོན་དང་བུ་མོའི་ཡབ་ཡུམ་གཉིས། །
བུ་མོ་སྣང་ས་བདག་ལ་གསན་པར་ཞུ། །
བུ་མོ་བདག་ལ་ཕ་མ་ལོས་ཀྱང་ཡོད། །
ཡོད་པས་མི་ཆོག་ཕྱི་ནང་གསང་གསུམ་ཡོད། །
ཕྱི་ཡི་ཡབ་ནི་ཀུན་བཟང་བདེ་ཆེན་ཡིན། །
ཡུམ་ནི་དྲིན་ཅན་མྱང་ཚ་གསལ་སྒྲོན་ཡིན། །

ནང་གི་ཡབ་ནི་སྤྱན་རས་གཟིགས་དབང་ཡིན། །
ཡུམ་ནི་རྗེ་བཙུན་སྒྲོལ་མ་དཀར་སྔོན་ཡིན། །
གསང་བའི་ཡབ་ནི་ཐེག་མཆོག་བདེ་ཆེན་ཡིན། །
ཡུམ་ནི་ཤེས་རབ་གསལ་ཞིང་སྟོང་པ་ཡིན། །
ཕྱི་ནང་གསང་བའི་ཡབ་ཡུམ་ཐམས་ཅད་ལ། །
བདེ་སྟོང་ཟུང་འཇུག་ཡོངས་ནས་གུས་ཕྱག་འཚལ། །

ཞེས་ཡབ་ཡུམ་ལ་བསྟོད་ཕྱག་འབུལ་བ་དང་ལྷན་ཅིག་ཉིན་མཚན་ཀུན་ཏུ་སྤྱན་རས་གཟིགས་ཀྱི་སྙིང་པོ་ཡི་གེ་དྲུག་པ་དང་སྒྲོལ་མ་དཀར་སྔོན་གྱི་བསྟོད་པ་ཆགས་མེད་མཛད་ཅིང་། སྙིང་རྗེ་ཤེས་རབ་བརྩོན་འགྲུས་གསུམ་ཆེ་ལ། སྒྲིབ་པ་ཁེངས་པ་རྟོག་པ་གསུམ་ཆུང་བས་ལྷ་ཆོས་མདོ་རྒྱུད་ཀྱི་དགོངས་དོན་མཐའ་དག་ཀྱང་རྟོགས་ཤིང་། དེ་མཚུངས་འཇིག་རྟེན་གྱི་བྱ་བ་ལའང་སྔ་དྲོ་ལངས་པའི་སྔ་མ། དགོང་མོ་ཉལ་བའི་རྟིང་མ་བྱས་ནས་ཟས་ཀྱི་གཡོས་སྦྱོར་དང་། སྣམ་ལས། ཞིང་ལས་ལ་སོགས་པར་བརྩོན་ཞིང་མཁས་པར་གྱུར་པསལྗང་ཕད་ཁུད་ཀྱི་ཁྱིམ་དེ་ནི་ལོངས་སྤྱོད་ཀྱི་འབྱོར་པ་ཕུན་སུམ་ཚོགས་པ་དང་ལྡན་པ་བྱུང་ངོ་།།

དེ་ནས་བུ་མོ་སྣང་ས་དེ་དགུང་ལོ་ལྔ་གསུམ་བཅོ་ལྔ་ཙམ་ལོན་པའི་ཚེ་དབུས་གཙང་དྭགས་ཀོང་ཚང་མར་བུ་མོའི་སྙན་གྲགས་ཀྱིས་ཁྱབ་པ་ལ་བརྟེན་ནས་སྣང་ས་སློང་མི་མང་པོ་བྱུང་ཡང་། གཙོ་བོར་བུ་མོ་སྣང་ས་རང་ཡང་དམ་པའི་ལྷ་ཆོས་ཤིག་རང་བྱེད་རྒྱུ་བྱུང་ན་བསམས་པ་མ་གཏོགས་འཇིག་རྟེན་གྱི་འདུན་མར་འགྲོ་འདོད་གཏན་ནས་མེད་པའི་ཁར་ཡབ་ཡུམ་གཉིས་ལའང་སྲས་སྲོས་གཞན་གཅིག་ཀྱང་མེད་པའི་ཐོག་ཏུ་བུ་མོ་སྣང་ས་འདི་བུ་བརྒྱ་ཡོད་པ་ལས་ལྷག་པས་ཆོས་དང་འཇིག་རྟེན་གཉིས་ཀ་མཁྱེན་ཡོངས་ཆེ་སྟབས་སློང་མི་བྱུང་ཚད་ཚང་མར་མ་བྱིན་པར་ཡབ་ཡུམ་གཉིས་རང་གི་རྒས་གཡོག་ཏུ་ཡོད་ཙ་ན། དུས་ནམ་ཞིག་ན་རྒྱལ་རྩེ་རི་ནང་མཚོ་ཆེན་དུ་དཔོན་པོ་སྒྲ་ཆེན་པ་བྱ་བ་མེ་ལས་དབལ་ཚ་བ། ཆུ་ལས་རྦ་དྲག་པ། རྔ་མ་ལས་ཉག་ཕྲ་བ། རྒྱ་གཡེར་ལའ་ཁ་ཚ་བ། སྲན་མ་ལས་རྡོག་འགྲིལ་བ། བག་ཕྱེ་ལས་རྩི་ཞིབ་པ་གཅིག་ཡོད་པ་དེ་ལ་ཇོ་མོ་བསོད་ནམས་རྒྱལ་མོ་བྱ་བ་ཞིག་ཡོད་པར་བུ་གཅིག་འཁྲུངས་པ། དཔོན་པོ་གྲགས་པ་བསམ་གྲུབ་ཅེས་འབོད་ཅིང་། བུ་མོ་གཅིག་ཡོད་པ་དེ་ལ་སྙིད་མོ་ནེ་ཙོ་ཞེས་མིང་འབོད་པ་གཉིས་ཡོད་ཀྱང་། དེ་ནས་མི་འགྱངས་པར་ཡུམ་དེ་ཚེ་ཡི་དུས་བྱས་པས་ཡབ་སྲས་གཉིས་ཀར་བཙུན་མོ་མེད་པར་བརྟེན། ཡབ་ཀྱི་ཐུགས་དགོངས་ལ་ངའི་བུ་འདི་ལ་ཕ་བཟང་གི་བུ་མོ་བཞིན་བཟང་མ་གཅིག་ལེན་དགོས་དགོངས་ནས་ཐུགས་ལ་ཡོད་དུས། གནས་སྙིང་གཟུངས་སྒྲུབ་ཀྱི་ལོ་དུས་ཀྱི་ལྟད་མོ་ལྟ་བ་དང་ཁྲོམ་ལ་བྱིན་རླབས་ཞུ་བར་རྒན་སྐྲ་དཀར་མན་ནས་གཞོན་སོ་དཀར་ཡན་གྱི་ཕོ་མོ་སེར་སྐྱ་ཕལ་ཆེར་འགྲོ་སྲོལ་བཅས། དཔོན་སྒྲ་ཆེན་པ་དང་དཔོན་གཡོག་མང་པོ་ཡང་རྒྱན་གོས་གཟབ་མཆོར་ཕུན་སུམ་ཚོགས་པ་བྱས་ནས་གནས་སྙིང་གཟུངས་སྒྲུབ་ཀྱི་ལོ་དུས་ལྟད་མོ་བལྟ་བ་དང་། ཁྲོམ་དབང་གི་བྱིན་རླབས་ཞུ་བར་བྱོན་ནོ། དེའི་དུས་སུ་བུ་མོ་སྣང་ས་འོད་འབུམ་ཡང་། དེ་སྔོན་ནས་གནས་སྙིང་གཟུངས་སྒྲུབ་ཀྱི་ལྟད་མོ་བལྟ་བ་དང་། ཁྲོམ་དབང་གི་བྱིན་རླབས་ཞུ་བར་འགྲོ་མི་མྱོང་བའི་ཁར། བུ་མོ་རང་ཡང་འགྲོ་འདོད་ཡོད་པའི་ཐོག་སྐྱེ་འབྲས་དྭངས་ལ། རྒྱན་གོས་འཛོམས་པ་བཅས་ཡབ་ཡུམ་གཉིས་ནས་ཀྱང་བུ་མོ་སྣང་ས་ཁྲོམ་ཐོག་གཅོད་ཕྱིར་གཏོང་འདོད་མཛད་དེ། ཞལ་རས་ཟླ་བའི་དཀྱིལ་འཁོར་ཉ་གང་བ་དེ་དང་། དབུ་སྐྲ་སེ་ལིང་ལྗང་པ་འདྲ་བ་དེ་དག་འཁྲུད་བརྡར་བྱེད་བཅུག་ཐོག  རྒྱན་གོས་ཕུན་སུམ་ཚོགས་པས་སྐུ་ལ་མཛེས་པར་བརྒྱན་ཏེ།  གནས་སྙིང་གི་སྐུ་གསུང་ཐུགས་རྟེན་རྣམས་ལ་མཆོད་འབུལ་གྱི་དགོས་ཆ་དང་སྙན་དར། བླ་མར་དབང་གི་འབུལ་བ། བུ་མོ་དཔོན་གཡོག་གི་བཟའ་ཆས་སོགས་སྣེ་འཛོམས་པར་གཡོག་མོ་འཛོམས་པ་སྐྱིད་ལ་བསྐུར་ཏེ་སྣང་ས་དཔོན་གཡོག་གཉིས་ཀྱིས་ཀྱང་གནས་སྙིང་གཟུགས་སྒྲུབ་ཀྱི་ལྟད་མོ་དང་། ཁྲོམ་དབང་ལ་བྱོན་ནས་བླ་མར་འབུལ་བ་ཕུལ་ཏེ་དབང་ཞུས། རྟེན་རྣམས་ལ་ཕྱག་བསྐོར་དང་མཆོད་འབུལ་བྱས་མཇུག་དུས་སྟོན་གར་འཆམ་ལྟད་མོ་བལྟ་བར་བྱོན་ནས་བུ་མོ་རྣམས་དང་ལྷན་ཅིག་ཁྲོམ་མི་མང་གི་དབུས་ན་བཞུགས་པ་དང་། རི་ནང་དཔོན་པོ་སྒྲ་ཆེན་དཔོན་གཡོག་རྣམས་ཀྱང་གནས་སྙིང་བླ་བྲང་རབ་གསལ་ནང་ནས་གཟིགས་མོ་མཛད་དུས། དཔོན་པོ་སྒྲ་ཆེན་པ་ནི་གར་འཆམ་སོགས་གཞན་གང་ཡང་མ་གཟིགས་པར་བུ་མོ་སྣང་ས་རང་གར་སོང་གར་ཡོད་ཀྱི་རྗེས་ལ་སྤྱན་མ་ཡེངས་པར་གཟིགས་ནས་ཐུགས་སེམས་དབང་མེད་དུ་ཤོར་ཏེ། དེ་མ་ཐག་བློན་པོ་བསོད་ནམས་དཔལ་བསྐྱེད་ཟེར་བ་དེ་ལ་བཀའ་བསྒོས་པ་བཞིན་དུ་བློན་པོས་ཀྱང་དེ་འཕྲལ་ལ་ཁྲོམ་མི་མང་ཚོགས་པའི་དབུས་ནས་སྣང་ས་འོད་འབུམ་དེ་བྱེའུ་ཁྲས་བཟུང་བའམ། རི་བོང་བྱ་གླག་གིས་ཁྱེར་བ་བཞིན་དུ་འཁྲིད་ཡོང་སྟེ་དཔོན་སྒྲ་ཆེན་པས་ལག་པ་གཡོན་གྱིས་སྣང་སའི་ཐུ་གཤམ་ནས་བཟུང་། ལག་གཡས་ཀྱིས་ཆང་འཐུང་འཕྲོ་ཕོར་པ་གང་པོ་དེ་སྣང་ས་ལ་སྤྲོད་པ་དང་ལྷན་ཅིག་འདི་སྐད་ཅེས་གསུངས་སོ།།

གཟུགས་མཛེས་སྒྲ་སྙན་དྲི་ཞིམ་རོ་མ་མཆོག་མངར། །
རེག་བྱ་འཇམ་པ་འདོད་ཡོན་ལྔ་ལྡན་ཁྱོད། །
ལྷ་ཀླུ་དྲི་ཟ་མི་སོགས་སུའི་བུ་མོ། །
མ་གསང་དྲང་པོའི་གཏམ་གཅིག་ང་ལ་ཤོད། །
བུ་མོའི་ཕ་ཡི་མིང་ལ་ཇི་སྐད་ཟེར། །
བུ་མོའི་མ་ཡི་མིང་ལ་ཇི་སྐད་ཟེར། །
བུ་མོ་ཁྱོད་རེའི་མིང་ལ་ཇི་སྐད་ཟེར། །
ཡུལ་དང་ཁྱིམ་གྱི་མིང་ལ་ཇི་སྐད་ཟེར། །

ང་ནི་མྱང་སྟོད་རི་ནང་ས་སྐྱོང་རྗེ། །
དཔོན་པོ་སྒྲ་ཆེན་འབྲུག་ལྟར་གྲགས་པ་ངའི། །

ང་ཡི་རིགས་རྒྱུད་གྲགས་པ་བསམ་གྲུབ་དེ། །
ཕྱི་ཡི་ལྕགས་རི་ནང་གི་ནོར་བུ་ཡིན། །
ཕོ་ལོ་དྲུག་གསུམ་བཅོ་བརྒྱད་སླེབས་ནས་ཡོད། །
ཁྱོད་ཀྱིས་དེ་ཡི་ཁྱིམ་ཐབ་མི་བྱེད་དམ། །
ཞེས་སྨྲས་མ་ཐག་ཏུ་བུ་མོ་སྣང་སའི་ཐུགས་ལ་ངའི་ཁ་སྒོ་སྐྱེ་འབྲས་འདི་དགྲ་ལ་ལངས་ཏེ་འདོད་པ་དམ་པའི་ལྷ་ཆོས་འདོད་ཀྱང་།

ཡོང་བ་འཇིག་རྟེན་ཁྱིམ་ཐབ་གཅིག་ཡོང་བ་འདྲ།

ད་ནི་ཅི་དྲག་དགོངས་ཏེ་གླུ་འདི་གསུངས་སོ། །

རྒྱལ་བའི་ཡུམ་མཆོག་རྗེ་བཙུན་སྒྲོལ་མ་ཡིས། །
བུ་མོ་ཆོས་མེད་མ་ལ་ཐུགས་རྗེས་གཟིགས། །
ཚུར་ལ་གསོན་དང་དཔོན་པོ་སྒྲ་ཆེན་ལགས། །
ང་ཡི་ཡུལ་ནི་མྱང་སྟོད་རྒྱལ་རྩེ་ཡིན། །
ཁྱིམ་གྱི་མིང་ལ་ལྗང་གི་ཕད་ཁུད་ཟེར། །
ཕ་ཡི་མིང་ལ་ཀུན་བཟང་བདེ་ཆེན་ཟེར། །
ཨ་མའི་མིང་ལ་མྱང་ཚ་གསལ་སྒྲོན་ཟེར། །
ང་རེའི་མིང་ལ་སྣང་ས་འོད་འབུམ་ཟེར། །
མི་ཁྱིམ་ཕལ་བ་གཅིག་གི་བུ་མོ་ཡིན། །
དུག་ཤིང་སྟག་མ་ཁ་དོག་མཚར་ན་ཡང་། །
མཆོད་གཤོམ་མཛེས་པའི་བུམ་རྒྱན་གང་ནས་ཡོང་། །
དོ་ལོ་སྔོན་མོ་ཁ་དོག་མཚར་ན་ཡང་། །

གྲུ་དམར་གཡུ་དང་མཐུན་སྡེབས་ཅི་ལ་ཡོང་། །
བྱེའུ་ལྕོག་མོ་གཤོག་འགྱུར་མཁས་ན་ཡང་། །
ཐང་དཀར་རྒོད་འདྲའི་ནམ་འཕང་ཆོད་དོགས་མེད། །
བུ་མོ་སྣང་ས་སྐྱེ་འབྲས་ལེགས་ན་ཡང་། །
མི་ཆེན་དཔོན་པོའི་བཙུན་མོ་གང་ནས་ཡོང་། །
བུ་མོ་སྣང་ས་ཅིས་ཀྱང་གཏོང་གྲོགས་མཛོད། །
འོད་དེ་འབུམ་པ་མི་སྡོད་ཆོས་ལ་འགྲོ། །

ཞེས་ཞུས་པས།  བློན་པོ་བསོད་ནམས་དཔལ་བསྐྱེད་དེས་རྒྱལ་པོའི་བླ་གཡུ་མཐིང་འོད་འཁྱིལ་བ་དེ་ལ་དར་དམར་པའི་འདོགས་ལུང་བརྒྱུས་པ་དེ་དང་། མདའ་དར་ཚོས་སྣ་ལྔ་པ་ཞིག་དཔོན་པོ་སྒྲ་ཆེན་པའི་ཕྱག་ཏུ་ཕུལ་བ་དང་ལྷན་ཅིག་འཇིག་རྟེན་གྱི་གཏམ་དཔེར། མི་དགའ་དགའ་མདོག་བྱེད་པ་དེ།ཕོ་གསར་དམག་ལ་འགྲོ་བའི་རྟགས།མི་སྡུག་སྡུག་མདོག་བྱེད་པ་དེ། མོ་གསར་བག་མར་འགྲོ་བའི་རྟགས།  ཞེས་ཟེར་བ་ཡིན་པས་བུ་མོ་འདི་ལ་ཁྱིམ་ཐབ་འཇིག་རྟེན་ལ་ཨེ་འགྲོ་ཞེས་དཔོན་པོས་བཀའ་འདྲི་གནང་ན་སེམས་ཀྱི་གཏིང་ནས་འགྲོ་འདོད་ཡོད་ཀྱང་མི་མང་ཚོགས་སར་འགྲོ་འདོད་མེད་པའི་སྤམ་ཛུ་ལོས་བྱེད། དེ་ལས་གཡུ་བརྒྱབ་མདའ་དར་བཙུགས་ནས་འཕྲལ་དུ་ཐག་གཅོད་པ་གནང་ན་མི་འཐད་དམ་ཞུས་པ་དང་། ཡང་དཔོན་པོ་སྒྲ་ཆེན་པས་ཀྱང་གཏམ་དེ་བདེན་པར་མངོན་ཏེ་སྣང་ས་ལ་སླར་ཡང་འདི་སྐད་གསུངས་སོ། །

ལྟ་བས་མི་ངོམས་ལྷ་ཡི་བུ་མོ་འདྲ།།

གཟུགས་མཛེས་སྣང་ས་འོད་འབུམ་ང་ལ་ཉོན། །

དཔོན་པོ་སྒྲ་ཆེན་འབྲུག་ལྟར་གྲགས་པ་ང་། །
འཇིག་རྟེན་འདི་ན་དབང་ཆེན་དཔོན་པོ་ཡིན། །
དབང་ཆེན་དཔོན་པོའི་བཀའ་ལ་མི་ཉན་ན། །
བུ་མོ་སྤྱང་གྲུང་འཛོམས་ཀྱང་གླེན་མ་རེད། །
བུ་མོ་ཆོས་འདོད་ཆོས་ལ་གཏོང་རྒྱུ་མིན། །
བུ་མོ་གཞིས་སྡོད་གཞིས་ལ་འཇོག་རྒྱུ་མིན། །
མཐོ་བ་ནམ་མཁའི་ལམ་གྱི་ཉི་མ་དང་། །
དམའ་བ་ས་ཡི་སྟེང་གི་པད་མ་གཉིས། །
མཐོ་དམན་ཐུག་པའི་ཁྱད་པར་ཡོད་ན་ཡང་། །

དེའི་དུས་དཔོན་པོ་སྒྲ་ཆེན་དཔོན་གཡོག་རྣམས་ཀྱང་མྱང་སྟོད་རི་ནང་དུ་ལོག་སྟེ། སླར་ཡང་སྣང་ས་བག་མར་ལེན་པའི་སློང་ཆང་དང་། རྒྱན་འདོགས་པ། ནུ་རིན་སྤྲོད་པ་བཅས་ལ་དཔོན་སྒྲ་ཆེན་པ་དཔོན་གཡོག་གཉིས་པོས་ལྗང་ཕད་ཁུད་ཀྱི་ཁྱིམ་དུ་སྟབས་བདེར་བྱོན། བློན་པོ་བསོད་ནམས་དཔལ་བསྐྱེད་ཀྱིས་སྒོ་བརྡུངས་པ་ནི། ཡུམ་མྱང་ཚ་གསལ་སྒྲོན་གྱིས་གཟིམ་ཆུང་ནང་ནས་གཟིགས་པས། རི་ནང་དཔོན་པོ་སྒྲ་ཆེན་དཔོན་གཡོག་གཉིས་ཡིན་པ་མཁྱེན་ཏེ། དེ་མ་ཐག་ཏུ་ཡུམ་གྱིས་ཡབ་ཀུན་བཟང་བདེ་ཆེན་ལ་འདི་སྐད་ཞུས་སོ།།

ཚུར་ལ་གསོན་དང་ཀུན་བཟང་བདེ་ཆེན་ལགས།།
མྱང་ཚ་གསལ་སྒྲོན་ཕྱོགས་ལ་སྙན་གསོན་དང་།།
རང་རེའི་ཁྱིམ་གྱི་སྒོ་དྲུང་མ་གི་ན།།
དཔོན་པོ་སྒྲ་ཆེན་དཔོན་གཡོག་ཕེབས་ནས་འདུག།
ཆིབས་ཁ་བླངས་ཏེ་ནང་དུ་སྤྱན་དྲངས་ནས།།
བསྙེན་བཀུར་ཞབས་ཏོག་ཞུས་ན་མི་ལེགས་སམ།།
ཞེས་ཞུས་པས་ཡབ་ནས་འདི་སྐད་གསུངས་སོ།།
ཚུར་ལ་ཉོན་དང་མྱང་ཚ་གསལ་སྒྲོན་མ།།
ཀུན་བཟང་བདེ་ཆེན་ཕྱོགས་ལ་རྣ་བ་ཉོན།།
དཔོན་པོ་སྒྲ་ཆེན་སྒོ་རྩར་འབྱོར་པ་དང་།།
སྲིན་བྱ་ཐོག་ཁར་བབས་པ་ཁྱད་ཅི་མེད།།
ཁ་ཡ་གཏམ་ལན་ཡ་བོ་ངས་མི་ཡོང་།།
ད་ནི་བསྡད་མེད་གྱིས་ལ་ཕར་ལ་སློག།
གལ་ཏེ་སྐུ་དབང་བཙན་པས་མི་འགྲོ་ན།།
སྐུ་དོན་གང་ཡིན་ཁྱོད་ཀྱིས་ལེགས་པར་དྲིས།།

ཞེས་གསུངས་པས་ཡུམ་མྱང་ཚ་གསལ་སྒྲོན་ནས་ཆང་དམ་བི་གང་དང་ཁ་བཏགས་ཤིག་ཁྱེར་ནས་སྒོ་དྲུང་དུ་ཕེབས་པ་ན། དཔོན་པོ་སྒྲ་ཆེན་པ་དཔོན་གཡོག་གཉིས་ནས་སྔོན་གྱི་ལོ་རྒྱུས་རྣམས་ཞིབ་པར་གསུངས་པས། ཡུམ་དགའ་དྲགས་ཏེ་དེ་མ་ཐག་ཡབ་ཀྱི་དྲུང་དུ་ཕྱིན་ནས་ལོ་རྒྱུས་རྣམས་བཤད་པས་ཡབ་ཤིན་ཏུ་དགའ་སྟེ་རི་ནང་དཔོན་གཡོག་གཉིས་དོན་གཞན་གང་ཡང་མེད་པར་སྣང་ས་སློང་བ་ལ་ཡིན་འདུག་ན་བུ་མོ་སྟེར་ས་ཡག་འདུག ཡུལ་འདི་ན་མྱང་སྟོད་རི་ནང་པ་ལས་ལྷག་པ་ནི་སུ་ཡང་མེད་པས་ཅིས་ཀྱང་ཁས་ལེན་བྱེད་དགོས་པས་དཔོན་གཡོག་གཉིས་ནང་དུ་སྤྱན་དྲངས་པ་དགའ་ཞེས་གསུངས། རི་ནང་དཔོན་པོ་སྒྲ་ཆེན་དཔོན་གཡོག་ནང་དུ་སྤྱན་དྲངས་དེ། སྣེ་ལེན་ཞབས་ཏོག་ཕུན་སུམ་ཚོགས་པ་ཞུས་ཤིང་། དཔོན་པོ་སྒྲ་ཆེན་དཔོན་གཡོག་ནས་ཀྱང་སྣང་སའི་ཡབ་ཡུམ་ལ་སློང་ཆང་དང་། ནུ་རིན། བུ་མོ་སྣང་ས་རང་ལ་ཡང་རྒྱན་འདོགས་བསམ་གྱིས་མི་ཁྱབ་པ་མཛད་དེ་འདི་ལྟར་གསུངས་སོ།།

བུ་མོ་སྣང་ས་འོད་དེ་འབུམ་པ་དང་།།
སྣང་སའི་ཡབ་ཡུམ་གཉིས་པོ་ཚུར་ལ་གསོན།།
ཡབ་ཡུམ་གཉིས་ཀྱི་བུ་མོ་སྣང་ས་འདི།།
ད་ལྟ་ཉི་མ་དེ་རིང་ནས་བཟུང་སྟེ།།
རི་ནང་དཔོན་པོ་སྒྲ་ཆེན་རིགས་ཀྱི་བུ།།
གྲགས་པ་བསམ་གྲུབ་ཀྱི་བག་མར་སློང་ཚར་བས།།
མཐོ་བ་ནམ་མཁར་འཕུར་སོང་ཟེར་ས་མེད།།
དམའ་བ་ས་ལ་འཛུལ་སོང་ཟེར་ས་མེད།།
དབང་ཆེན་དཔོན་པོས་འཕྲོག་སོང་ཟེར་ས་མེད།།
དབང་ཆུང་འཁྱམ་པོས་བརྐུས་སོང་ཟེར་ས་མེད།།
ཡབ་ཡུམ་གཉིས་པོས་མི་གཏོང་ཟེར་ས་མེད།།
བུ་མོ་སྣང་སས་མི་འགྲོ་ཟེར་ས་མེད།།
ད་ནི་རི་ནང་རྒྱལ་པོའི་བཙུན་མོ་ཡིན།།
ཉི་མ་སང་དང་གཅིག་བྱས་གནངས་དང་གཉིས།།
གཞེས་ལྷ་ཉིན་དཀར་པོའི་དུས་ཚོད་ལ།།
བསུ་མི་རྟ་པ་ལྔ་བརྒྱ་གཏོང་རྒྱུ་ཡིན།།
བུ་མོའི་ནོར་སྐལ་རྣམས་ཚོ་རྫོང་གྲབས་ཀྱིས།།
ཡང་གཅིག་གསོན་དང་སྣང་ས་འོད་འབུམ་མ།།
ཁྱོད་ནི་གནས་སྙིང་ལྟད་མོར་ཡོང་བའི་དུས།།
རྒྱུ་སྐར་དབུས་ནས་ཟླ་བ་ཤར་བ་དང་།།
ཁྲོམ་ཆེན་ཚོགས་ནང་ནས་མཛེས་མ་ཁྱོད་མཐོང་སྟེ།།
གཙུག་གཡུ་མདའ་དར་བཙུགས་པ་མི་དྲན་ནམ།།
དེ་ཚོ་གར་ཡོད་ད་ལྟ་ཁྱེར་ནས་ཤོག།

ཅེས་གསུངས་པས། སྣང་སས་ཞུས་པ། ཁྱོད་དཔོན་གཡོག་ནས་དབང་ཡོད་མཛད་པ་ཐུགས་ཀྱིས་མི་དགོངས་པར་ཡབ་ཡུམ་གྱི་ཐུགས་ལ་བདག་གིས་མགོ་ཡང་བྱས་འདུག་དགོངས་ཏེ་བཀའ་བཀྱོན་དགོངས་ཚོམ་བྱུང་དོགས་སྦས་ནས་བཞག་ཡོད་ཞུས་པས། འོ་ན་ད་ལྟ་རང་ཁྱེར་ཤོག་གསུངས་པ་དང་། གཙུག་གཡུ་མདའ་དར་སྣང་ས་རང་གིས་བླངས་ཏེ་དཔོན་པོའི་ཕྱག་ཏུ་ཕུལ་མ་ཐག་སླར་ཡང་སྣང་སའི་གཙུག་ཏུ་བཀོད་དེ་རི་ནང་པའི་དཔོན་གཡོག་གཉིས་ཕྱིར་ལོག་གོ། དེའི་ཚེ་བུ་མོ་སྣང་ས་འཇིག་རྟེན་གྱི་བག་མར་འགྲོ་འདོད་མེད་ཅིང་ཆོས་ལ་འགྲོ་འདོད་པས་ཡབ་ཡུམ་གཉིས་ལ་ཞུ་བ་འདི་ལྟར་ཕུལ་ལོ།།

དྲིན་ཅན་རང་ལུས་སྐྱེས་པའི་ཡབ་ཡུམ་གཉིས།།
བུ་མོ་སྣང་སའི་ཕྱོགས་ལ་ཚུར་གསོན་དང་།།
འདུས་མཐའ་བྲལ་བའི་གྲོགས་པོ་མཐོང་ཙ་ན།།
གྲགས་པ་བསམ་གྲུབ་གཏན་གྲོགས་ང་མི་འདོད།།
འདུ་བྲལ་མེད་པའི་དཀོན་མཆོག་རྣམ་གསུམ་ལ།།
བུ་མོས་གཏན་གྲོགས་བཅོལ་ནས་ལྷ་ཆོས་བྱེད།།
བསགས་མཐའ་ཟད་པའི་ནོར་རྫས་མཐོང་ཙ་ན།།
རི་ནང་དཔོན་པོའི་ནོར་བདག་ང་མི་འདོད།།
འཕེལ་འགྲིབ་མེད་པའི་འཕགས་ནོར་བདུན་པོ་ལ།།
བུ་མོས་ནོར་བདག་བཅོལ་ནས་ལྷ་ཆོས་བྱེད།།
བརྩིགས་མཐའ་ཞིག་པའི་ཁང་པ་མཐོང་ཙ་ན།།
རི་ནང་དཔོན་པོའི་ཁྱིམ་འཛིན་ང་མི་འདོད།།
ཞིག་རལ་མེད་ལའི་དབེན་པའི་བྲག་ཕུག་ལ།།
བུ་མོའི་ཁང་ཁྱིམ་བྱས་ནས་ལྷ་ཆོས་བྱེད།།
དྲིན་ཅན་རང་ལུས་སྐྱེས་པའི་ཡབ་ཡུམ་གཉིས།།
ཅིས་ཀྱང་བུ་མོ་ཆོས་ལ་གཏོང་བ་ཞུ།།
ཞེས་ཞུས་པས། ཡབ་ཡུམ་གཉིས་ཀྱིས་ལན་གསུངས་པ།

མི་ཡི་བུ་མོ་ལྷ་ཡི་མཚར་སྡུག་ཅན།།
གཟུགས་མཛེས་སྣང་ས་འོད་འབུམ་ཚུར་ལ་གསོན།།
རི་ནང་དཔོན་པོ་གྲགས་པ་བསམ་གྲུབ་དེ།།
མེ་ལས་དབང་ཚ་ཆུ་ལས་རྦ་ཡང་དྲག།
ས་སྟེང་འདི་ན་གྲགས་པའི་དབང་ཆེན་ཡིན།།
བུ་མོ་བག་མར་མི་འགྲོ་མ་ཟེར་ཅིག།
ཅིས་ཀྱང་བུ་མོ་ལྷ་ཆོས་བྱེད་ངེས་ན།།
རི་ནང་དཔོན་པོས་ཕ་མ་གཉིས་པོ་གསོད།།
ཕ་མ་བསད་ནས་བུ་མོས་ཆོས་བྱས་ཀྱང་།།
ཐར་པའི་ལམ་སྣ་ཟིན་པ་ག་ནས་ཡོང་།།
བུ་མོ་ཆོས་ལ་འགྲོ་འོ་མ་ཟེར་བར།།
རི་ནང་དཔོན་པོའི་ཇོ་མོར་འགྲོ་རོགས་མཛོད།།

ཅེས་ཡབ་ཡུམ་གཉིས་ནས་བཀའ་ནན་ཆེ་བར་མཛད་སྟབས་རེ་ཞིག་ཡབ་ཡུམ་གཉིས་ཀྱི་གསུངས་ནན་མ་ལྡོག་པར་མྱང་སྟོད་རི་ནང་པའི་ཁྱིམ་ཐབ་བྱེད་པ་ཞལ་གྱིས་བཞེས་པ་ན། མྱང་སྟོད་རི་ནང་པའི་ཁྱིམ་ནས་སྣང་ས་བག་མར་བསུ་མི་རྣམས་ཀྱང་འབྱོར་ཞིང་། ཡབ་ཡུམ་གཉིས་ནས་སྣང་ས་ལ་ནོར་སྐལ་དང་། རྫོང་བ་རྒྱ་ཆེན་པོ་དང་བཅས་ཞལ་སློབ་འདི་ལྟར་མཛད་དོ།།

བུ་བརྒྱ་ལས་ལྷག་པའི་བུ་མོ་སྣང་ས་མ།།

འོད་དེ་འབུམ་པ་ཡབ་ཡུམ་གཉིས་ལ་གསོན།།
སྣང་ས་རི་ནང་བག་མར་འགྲོ་བའི་དུས།།
ཁྱོད་ལ་ནོར་སྐལ་རྫོང་བ་འདི་ལྟར་ཡོད།།
གཡུ་ཡི་སྒྲོལ་མ་གསུང་འབྱོན་གཙོ་བྱས་པའི།།
སྐུ་གསུང་ཐུགས་རྟེན་བུ་མོ་ཁྱོད་ལ་སྟེར།།
གསེར་དངུལ་གཡུ་བྱུར་མུ་ཏིག་ལ་སོགས་པའི།།
རིན་ཆེན་རིན་ཐང་གཞལ་མེད་རྫོང་བ་ཡོད།།
དར་དང་གོས་ཆེན་སྣམ་བུ་ལ་སོགས་པའི།།
གོས་ཀྱི་རིགས་རྣམས་བུ་མོའི་ནོར་སྐལ་ཡིན།།
གྲོ་ནས་སྲན་མ་ལ་སོགས་འབྲུ་སྣའི་རིགས།།
བུ་མོ་བག་མར་འགྲོ་བའི་སྐལ་རྫོང་ཡིན།།
འཛོམས་པ་སྐྱིད་སོགས་གཡོག་མོ་འདི་དག་ཀྱང་།།
སྣང་ས་མི་སྒོ་འགྲིམ་པའི་གཡོག་མོར་གཏོང་།།
གདང་གི་བྱ་ཕོ་འདི་ལ་དཔེ་ལོང་ལ།།
ཞོགས་པ་ལངས་པའི་སྔ་མ་བུ་མོས་མཛོད།།
སྒོ་རྒྱབ་ཁྱི་མོ་འདི་ལ་དཔེ་ལོང་ལ།།
དགོང་མོ་ཉལ་བའི་རྗེས་མ་བུ་མོས་མཛོད།།
ཡབ་སྲས་གཉིས་ལ་གུས་ཞབས་སྤྱི་བསམ་ཆེ།།
གསར་འགྲོགས་ཆུང་ལ་ཁྲེལ་གཞུང་ཆེ་བ་མཛོད།།
ལས་ཀྱིས་བསྐོས་པའི་ཚེ་གང་གཏན་གྲོགས་ལ།།
བསྙེན་བཀུར་ཞབས་ཏོག་གུས་ཞེན་ཆེ་བར་མཛོད།།
འཁོར་དུ་བསྡུས་པའི་ཕྱག་ཕྱི་ཕོ་མོ་ལ།།
ཉེ་རིང་མེད་པའི་བྱམས་སྐྱོང་ཆེ་བར་མཛོད།།
ཕ་མ་རྒན་རྒོན་བུ་མོ་སྣང་ས་བཅས།།
ཡང་ཡང་མཇལ་བའི་བཀྲ་ཤིས་སྨོན་ལམ་འདེབས།།

ཞེས་གསུངས་ནས་ནོར་སྐལ་དང་རྫོང་བ་རྣམས་མ་ཚང་བ་མེད་པ་བྱིན་ཏེ་བསུ་མི་རྣམས་དང་ལྷན་ཅིག་མྱང་སྟོད་རི་ནང་ཕྱོགས་སུ་སྣང་ས་དཔོན་གཡོག་རྣམས་ཆས་པ་ན་བྲོ་གཞས་གླུ་གར་ལ་སོགས་པ་དགའ་སྤྲོ་བསམ་གྱིས་མི་ཁྱབ་པས་བསུས་ཏེ་བག་མའི་དགའ་སྟོན་རྒྱ་ཆེར་བྱས་སོ།།

དེ་ནས་དཔོན་མོ་སྣང་ས་འོད་འབུམ་དེ་མྱང་སྟོད་རི་ནང་པའི་ཁྱིམ་དུ་འབྱོར་ནས་ལོ་ངོ་བདུན་ཙམ་སོང་བ་ན།  དཔོན་མོ་སྣང་ས་དེ་ལ་མིའི་བུ་མི་འདྲ་བ་ལྷའི་སྲས་འདྲ་བ་ཞིག་སྐུ་འཁྲུངས་ནས་མཚན་ལའང་བུ་ཆུང་ལྷའུ་དར་པོ་ཞེས་གསོལ་ཏེ་བུ་སྐྱེས་ཀྱིསྟོན་མོ་ཡང་རྒྱ་ཆེ་བར་མཛད་དོ།  །ལྷག་པར་དཔོན་མོ་སྣང་ས་དེ་ནི་བུད་མེད་ཀྱི་སྐྱོན་ལྔ་སྤངས་ཤིང་། མཛངས་མའི་ཡོན་ཏན་རྣམ་པ་བརྒྱད་དང་ལྡན་པའི་དབང་གིས་མྱང་སྟོད་རི་ནང་པའི་དཔོན་པོ་ཡབ་སྲས་གཉིས་ཀྱི་ཕྱག་ཕྱི་ཞབས་ཏོག་སྒྲུབ་ལ་བརྩོན་པ།  གུས་ཞེན་སྐུ་བསོད་ཆེ་བ།   ནང་འཁོར་གྱི་གཡོག་ཕོ་མོ་དང་། མངའ་འབངས་མི་སེར་ཐམས་ཅད་ལའང་ཉེ་རིང་མེད་པའི་བྱམས་གཟིགས་སྐྱོང་བརྡར་མཛད་མཁས་པ།  ཞིང་ལས་དང་སྣམ་ལས་བཟའ་བཏུང་གི་གཡོས་སྦྱོར་སོགས་ལའང་ལག་འབྲས་གཙང་ཞིང་། ལས་ཆོད་ཆེ་བ་བཅས་ལ་བརྟེན་ཏེ་རི་ནང་གི་དཔོན་གཡོག་བྱིངས་ཚང་མ་ནི་མཆོག་ཏུ་མོས་ཤིང་ལྷག་དོན་དཔོན་མོ་སྣང་ས་བུ་སྐྱེས་ཀྱི་ཨ་མ་ཡིན་པ་ཙམ་མ་ཟད། བྱ་བྱེད་རྣམ་འགྱུར་ཐམས་ཅད་ཡིད་དུ་འོང་ཞིང་།   སྐུའི་སྐྱེ་འབྲས་མཚར་བ་ལ་བརྟེན་ནས་དཔོན་པོསྒྲ་ཆེན་པ་ཡབ་སྲས་གཉིས་ནི་དཔོན་མོ་སྣང་ས་དང་ཆུ་ཚོད་ཙམ་ཡང་འབྲལ་མི་ཕོད་པ་ལྟ་བུའི་བརྩེ་གདུང་ཆེ་བ་མཛད་ནས་བང་མཛོད་ཀྱི་ལྡེ་མིག་ཐམས་ཅད་སྣང་ས་ལ་སྤྲད་དེ་ཐུགས་བློས་་འགེལ་རྩིས་མཛད་ཀྱང་། དེ་ཕན་ཆད་ཨ་ནེ་སྙིད་མོ་ནེ་ཙོ་ལེགས་རང་ནས་བང་མཛོད་ཀྱི་ལྡེ་མིག་བདག་པོ་བྱས་ཏེ་ཕྱི་ནང་ཚང་མའི་གཏོང་ཚོད་ཁ་བཀོད་བྱེད་བཞིན་པ་ཡིན་པའི་བབ་ཀྱིས་མོ་རང་གི་དབང་འདི་སྣང་ས་ལ་ཤོར་དོགས་དང་།   ལྷག་དོན་སྣང་སས་ཨ་ནེ་སྙིད་མོ་རང་ལ་དཔོན་པོ་ཡབ་སྲས་དང་ཁྱད་མེད་གུས་ཞབས་ཆེ་བར་མཛད་ཀྱང་ཨ་ནེ་སྙིད་མོ་རང་བྱེད་མ་མཁས་པའི་དབང་གིས་རི་ནང་དཔོན་གཡོག་ཚང་མས་ལྐོག་ལབ་དི་རི་བ་དང་། སྣང་ས་ལ་ཚང་མས་མི་ཁ་བྱམས་པར་བྱས་གཤིས་འཇིག་རྟེན་གྱི་གཏམ་དཔེར་ཆགས་སྡང་འདྲ་མཉམ་བུ་མོས་བྱེད། ཅེས་ཟེར་བའི་དཔེ་ལྟར་དཔོན་པོ་སྒྲ་ཆེན་པ་ཡབ་སྲས་དང་། དཔོན་མོ་སྣང་སའི་བར་དུ་སེལ་འཇུག་དཀྲུག་ཤིང་གིས་ཞུ་ལོག་སྣ་ཚོགས་དང་། གཡོག་མོ་ཚང་མའི་ཐད་དུའང་སྣང་ས་ལ་ངན་ཁག་འགེལ་གང་ཐུབ་བྱེད་པ་སོགས་ཨ་ནེ་སྙིད་མོས་མའི་ཐད་དུའང་སྣང་ས་ལ་ངན་ཁག་འགེལ་གང་ཐུབ་བྱེད་པ་སོགས་ཨ་ནེ་སྙིད་མོས་སྣང་ས་ལ་སྡོད་བཟོད་མི་བདེ་བའི་སྡང་ཟུག་མང་པོ་བྱེད་ཅིང་བང་མཛོད་ཀྱི་ལྡེ་མིག་ཀྱང་སྣང་ས་ལ་མ་སྤྲད་པར་མོ་རང་གིས་ཉར་ཚགས་བྱས་ཏེ་ལྟོ་ཞིམ་པ་དང་གོས་དྲོ་བ་རྣམས་ཨ་ནེ་རང་གིས་ཟོས་བཞིན་གྱོན། ལྟོ་ངན་གོས་ངན་རྣམས་སྣང་ས་ལ་སྦྱིན་པའི་དབང་གིས་དཔོན་མོ་སྣང་ས་ཡང་འཇིག་རྟེན་གྱི་བྱ་བ་ལ་ཡིད་མུག་ཅིང་། དམ་པའི་ལྷ་ཆོས་སྙིང་ནས་དྲན་ཀྱང་དཔོན་པོ་ཡབ་སྲས་ལ་ནི་ཞུ་མི་ནུས་པར་སྣང་ས་རང་གི་གཟིམ་ཆུང་ནང་དུ་ལྷའུ་དར་པོ་སྐུ་པང་དུ་བསྣམས་ནས་ཞལ་སྦྱར་ཏེ་སྤྱན་ཆབ་བསིལ་བ་དང་ལྷན་ཅིག་བུ་ལ་ནུ་ཞོ་སྟེར་བཞིན་དུ་དཔོན་མོ་སྣང་སས་སྐྱོ་གླུ་འདི་ལྟར་ཞིག་བཞེས་སོ།།

སྐྱབས་སུ་མཆིའོ་བླ་མ་དཀོན་མཆོག་གསུམ།།

བྱིན་གྱིས་རློབས་ཤིག་ཡི་དམ་མཁའ་འགྲོའི་ཚོགས།།

བར་ཆད་སེལ་ཞིག་ཆོས་སྐྱོང་སྲུང་མ་རྣམས།།

བུ་མོའི་བསམ་པ་ཆོས་བཞིན་འགྲུབ་པར་ཤོག།

འཁོར་བའི་འཐེན་ཐག་བུ་ཁྱོད་མ་སྐྱེས་ན།།

སྣང་ས་དམ་པའི་ལྷ་ཆོས་བྱེད་ངེས་ཀྱང་།།
ལྷའུ་དར་པོ་བཞག་ནས་འགྲོ་མ་ཕོད།།

མཉམ་དུ་ཁྲིད་ན་ཆོས་ལ་བར་ཆད་བྱེད།།

ལྷ་ཆོས་བྱེད་པར་བདག་པོས་གཙུག་གཡུ་བརྒྱབ།།

མི་ཆོས་བྱེད་པར་ཨ་ནེས་ཕྲག་དོག་བྱེད།།

ཕ་མའི་དྲུང་དུ་བུ་མོ་སྡོད་དབང་མེད།།

ཀྱེ་མ་ཀྱེ་ཧུད་བུ་མོ་སེམས་པ་སྐྱོ།།

མཛེས་པའི་གཟུགས་དང་བརྩེ་བའི་བུ་ཁྱོད་དང་།།

ཉེ་བའི་གཉེན་རྣམས་ཆོས་ཀྱི་དགྲ་ཡིན་ཀྱང་།།

ཨ་ནེ་སྙིད་མོ་ནེ་ཙོ་གཅིག་པུ་ནི།།

སྣང་ས་ཆོས་ལ་བསྐུལ་བའི་བླ་མ་ཡིན།།

ལྷའུ་དར་པོ་རང་མགོ་མ་ཐོན་བར།།

སྣང་་སར་མི་རྟག་འཆི་བ་མ་བྱུང་ན།།

བུ་མོ་སྣང་ས་མི་སྡོད་རི་ཁྲོད་འགྲིམས།།

 

ཞེས་གསུངས་ཤིང་བུ་ཆུང་ལྷའུ་དར་པོ་སྐུ་རྒྱབ་ཏུ་བསྣམས་ནས་སྣང་ས་ཡུམ་སྲས་གཉིས་མེ་ཏོག་ལྡུམ་རའི་ནང་དུ་སྐྱོ་བསང་ལ་ཕེབས་པ་ན། དཔོན་གྲགས་པ་བསམ་གྲུབ་ཀྱང་མེ་ཏོག་ལྡུམ་རར་བྱོན་ཏེ་དབུ་སྐྲ་བཀྲུས་ནས་སྣང་སའི་སྐུ་པང་དུ་དཔོན་པོའི་དབུ་བཞག་སྟེ་ཤིག་དང་སྲོ་མ་རྣམས་སྒྲུག་གི་ཡོད་པའི་དུས་སུ་ནམ་ཟླ་སྟོན་ཁར་སླེབས་པས་མེ་ཏོག་རྙིང་པ་རྣམས་བ་མོས་བརྡུངས། གསར་པ་རེ་གཉིས་ཡོད་པ་རྣམས་ལ་གསེར་སྦྲང་དང་གཡུ་སྦྲང་ཟིར་དིར་དིར་འཁོར་གྱི་འདུག་པའི་རྐྱེན་བྱས་སྣང་སའི་ཐུགས་ལ་ཚེ་འདིར་དགོས་པའི་ཕ་མ་གཉིས་དང་ནི་མ་ཤི་གསོན་བྲལ་བྱུང་། ཕྱི་མ་དགོས་པའི་ཆོས་ནི་བདག་ལ་མེད། ད་དུང་དེའི་ཐོག་ཏུ་འཇིག་རྟེན་གྱི་ཁྱིམ་ཐབ་བྱས་པ་ལའང་ཨ་ནེ་སྙིད་མོས་སྡང་སེམས་ཀྱི་སྡུག་པ་འདི་འདྲ་གཏོང་བར་དགོངས་ཏེ་ཐུགས་སེམས་སྐྱོ་བ་ལ་ཚད་མེད་པ་བྱུང་ནས་རང་དབང་མེད་པར་སྤྱན་ཆབ་བསིལ་བ་དཔོན་པོ་གྲགས་པ་བསམ་གྲུབ་ཀྱི་སྙན་ཁུང་ནང་དུ་འཛུལ་བའི་རྐྱེན་བྱས་དཔོན་པོ་མནལ་སད་དེ་དཔོན་མོ་ལ་གཟིགས་པས་སྣང་ས་བཤུམས་པ་གཟིགས་ཏེ་འདི་ལྟར་གསུངས་སོ།།

གཟུགས་མཛེས་ལྟ་བས་མི་ངོམས་ཡིད་འཕྲོག་མ།།

དཔོན་མོ་སྣང་ས་ལན་གཅིག་བདག་ལ་གསོན།།

ཁ་སྒོ་སྐྱེ་གཟུགས་རྒྱན་གོས་གཡུ་ནོར་འཛོམས།།

ཆོས་དང་འཇིག་རྟེན་བྱ་བ་ཀུན་ལ་མཁས།།

པང་དུ་བུ་ཆུང་བརྒྱབ་པའི་གཡུ་ལེགས་ཡོད།།

རི་ནང་དཔོན་པོའི་ཇོ་མོ་བྱེད་བཞིན་དུ།།

སྣང་ས་ཐུགས་སེམས་སྐྱོ་དོན་མ་མཆིས་པས།།

མིག་ཆུ་གཏོང་བའི་རྒྱུ་མཚན་ཅི་ཡིན་པ།།

མ་གསང་དྲང་པོའི་གཏམ་ཞིག་ཤོད་རོགས་མཛོད།།

སྣང་སའི་འདོད་པ་བདག་གིས་བསྒྲུབ་པར་བྱ།།

ཞེས་གསུངས་པས་སྣང་སའི་ཐུགས་ལ་སྔར་ཕན་ཆད་དཔོན་པོ་ཡབ་སྲས་ལ་ཨ་ནེ་སྙིད་མོས་བསམ་ངན་བྱེད་ལུགས་རྣམས་ཞུས་ན་ཁོང་རང་སྐུ་མཆེད་ཀྱི་བར་དུ་དཀྲུག་ཤིང་བྱས་འདྲར་གྱུར་དོགས་ཞུ་མ་ནུས་ཀྱང་། ད་རེས་ཚུར་བཀའ་འདྲི་ཕེབས་དུས་ཟུར་ཙམ་ཞིག་ཞུ་ཐུབ་ན་རབ་ཏུ་ང་རང་གི་འདོད་པ་ལྟར་དམ་པའི་ལྷ་ཆོས་ལ་འགྲོ་བའི་དགོངས་པ་དགའ་མོ་གནང་ཨེ་ཡོང་། གལ་ཏེ་མ་བྱུང་ཡང་ཨ་ནེ་སྙིད་མོ་སྐུ་མཆེད་ནང་ཚགས་སུ་ལྕགས་དམར་སྐམ་བཅུན་གྱི་ཞལ་ཏ་ཁ་བཀོད་མཛད་དེ་སླད་ཆར་སྡུག་པོ་མི་གཏོང་ཞིང་སྡོད་བཟོད་བདེ་བ་ཞིག་དགའ་མོ་ཨེ་ཡོང་བསམ་ནས་སྣང་སས་དཔོན་པོ་ལ་ཞུ་ལན་གྱི་གླུ་འདི་ལྟར་ཕུལ་ལོ།། ཕ་གཅིག་བླ་མ་རྣམས་ལ་ཕྱག་འཚལ་ལོ།། མ་དང་མཁའ་འགྲོའི་ཚོགས་ལ་གསོལ་བ་འདེབས།། ལས་ཀྱིས་བཀོད་པའི་ཚེ་གང་གཏན་གྱི་གྲོགས།། དཔོན་པོ་གྲགས་པ་བསམ་གྲུབ་བདག་ལ་གསོན།། བུ་མོ་ཕ་མའི་དྲུང་དུ་སྡོད་པའི་སྐབས།། ཁ་སྒོ་སྐྱེ་གཟུགས་དགྲ་ལ་ལངས་ནས་ནི།།

བུ་མོ་ཆོས་མེད་མི་སྒོ་འགྲིམས་དགོས་བྱུང་།།

རི་ནང་དཔོན་པོའི་ཇོ་མོར་སླེབས་ནས་ཀྱང་།།

དཔོན་ལ་གུས་ཤིང་གཡོག་ལ་བྱམས་པར་བྱས།།

ལྷག་པར་ཨ་ནེ་སྙིད་མོའི་དགོངས་པ་དང་།།

མ་བསྟུན་བསམ་པའི་གནོང་འགྱོད་བདག་ལ་མེད།།

འོན་ཀྱང་ཆང་ལན་ཆུ་ཡིས་འཇལ་བ་ལྟར།།

བཟང་བྱས་ངན་ལན་སྡུག་པོ་སྣ་ཚོགས་བཏང་།།

ཁ་རོག་བསྡད་ན་བུ་མོ་གླེན་མ་ཟེར།།

གཏམ་ལན་བྱས་ན་བུ་མོའི་ཕེར་ཤ་ཟེར།།

ཕྱི་ལ་ཕྱིན་ན་མགོ་ཡངས་འཆལ་མོ་ཟེར།།

ནང་དུ་བསྡད་ན་ལྷ་ཁང་ལོགས་རིས་ཟེར།།

དཔོན་པོ་སྒྲ་ཆེན་བཀའ་དྲིན་དྲན་ཙ་ན།།

རི་ནང་དཔོན་པོའི་ཇོ་མོ་བྱས་ན་བསམ།།

ཨ་ནེ་སྙིད་མོའི་ངོ་ལ་བལྟས་ཙ་ན།།

ཁ་སྨྲས་གླེང་གཞིའི་འཐབ་རྩོད་བྱས་ན་བསམ།།

མི་རྟག་འཆི་བ་འདི་ཚོ་བསམ་ཙ་ན།།

དམ་པའི་ལྷ་ཆོས་གཅིག་རང་བྱས་ན་བསམ།།

ཕྱི་མ་དགོས་པའི་ཆོས་ནི་བདག་ལ་མེད།།

ཚེ་འདིར་དགོས་པའི་ཕ་མ་གཉིས་དང་བྲལ།།

བུ་མོ་ཕ་མ་དྲན་པའི་སྐྱོ་གླུ་འདི།།

ཡབ་ཡུམ་གཉིས་ཀྱིས་གསན་ན་དགའ་བ་ལ།།

 

ཞེས་ཞུས་པས། དཔོན་པོ་གྲགས་པ་བསམ་གྲུབ་ཀྱི་ཞལ་ནས། སྣང་ས་ཡབ་ཡུམ་དྲན་པ་ཤིན་ཏུ་བདེན། མ་མཇལ་ཡུན་རིང་སོང་སྟབས་གང་མགྱོགས་གཉེན་འཕྲད་ལ་ཕེབས་ཆོག་པས་སྡུག་བསྔལ་མ་མཛད་ཅིག སྙིད་མོ་ནེ་ཙོས་སྡང་ཟུག་བྱས་པ་ཨེ་བདེན་མི་ཤེས་བདེན་ངེས་ཡིན་ན་ངས་ཁ་ཏ་བསླབ་བྱ་བྱས་པས་ཆོག ད་རང་རེའི་ཞིང་གི་བཙས་མ་རྔ་རན་འདུག་པས་ཉི་མ་སང་དང་གཅིག གནངས་དང་གཉིས། གཞེས་ཀྱི་ལྷ་ཉིན་དཀར་པོའི་དུས་ཚོད་ལ། བཙས་མ་རྔ་བར་ལས་མི་རྣམས་དང་མཉམ་དུ་འགྲོ་དགོས་པས་ཡོ་བྱད་རྣམས་ཨ་ནེ་སྙིད་མོའི་ལག་ནས་ལོན་ཞེས་གསུངས་པ་ན། ཨ་ནེ་སྙིད་མོ་རང་ཡང་དཔོན་མོ་སྣང་ས་དང་ལས་མི་ཕོ་མོ་རྣམས་ལ་ལྟོ་ཆས་སྟེར་བ་དང་། ལས་རྒྱབ་བྱེད་པར་ཡོང་སྟེ་ཚང་མ་བཙས་མ་རྔ་བའི་དུས་སུ་ལ་སྟོད་དིང་རིའི་ཕྱོགས་ནས་ཕེབས་པའི་རས་པ་བླ་སློབ་གཉིས་བཙས་མ་བརྔ་སར་བྱོན་ཏེ་སྣང་སའི་ཕྱོགས་ལ་ཞལ་གཟིགས་ནས་མགུར་འདི་གསུངས་སོ།།

ཕ་བླ་མ་རྣམས་ལ་ཕྱག་འཚལ་ལོ།།

མ་རེགས་དྲུག་ཐར་པའི་ལམ་སྣ་དྲོངས།།
ཚུལ་ཟས་ནོར་གོས་ཀྱི་འབྲེལ་བ་ཞུ།།
ཕར་དམ་པའི་ཆོས་ཀྱི་འབྲེལ་བ་འབུས།།
ཁྱེད་སྣ་སའི་དལ་འབྱོར་མི་ལུས་འདི།།
ཤར་སྤང་རིའི་ལོགས་ཀྱི་འཇའ་ཚོན་འདྲ།།
འཇའ་ཁ་དོག་མཚར་ཡང་སྙིང་པོ་མེད།།
ད་སྙིང་པོའི་ལྷ་ཆོས་བྱེད་རེ་རན།།
ཁྱེད་སྣང་སའི་དལ་འབྱོར་མི་ལུས་འདི།།
ལྷོ་ནགས་མའི་ལྗོངས་ཀྱི་ཁུ་བྱུག་འདྲ།།
གསུང་སྙན་འགྱུར་འཛོམས་ཀྱང་སྙིང་པོ་མེད།།
དེ་སྙིང་པོའི་ལྷ་ཆོས་བྱེད་རེ་རན།།
ཁྱེད་སྣང་སའི་དལ་འབྱོར་མི་ལུས་འདི།།
ནུབ་རྒྱ་མཚོའི་ནང་གི་ཀླུ་མོ་འདྲ།།
ནོར་ལོངས་སྤྱོད་འཛོམས་ཀྱང་སྙིང་པོ་མེད།།
ད་སྙིང་པའི་ལྷ་ཆོས་བྱེད་རེ་རན།།
ཁྱེད་སྣང་སའི་དལ་འབྱོར་མི་ལུས་འདི།།
བྱང་གཡུ་འབྲུག་སྔོན་མོའི་སྐད་དང་འདྲ།།
གཏམ་སྙན་གྲགས་ཆེ་ཡང་སྙིང་པོ་མེད།།
ད་སྙིང་པོའི་ལྷ་ཆོས་བྱེད་རེ་རན།།
ཁྱེད་སྣང་སའི་དལ་འབྱོར་མི་ལུས་འདི།།
དབུས་ལྷ་ཁང་ལོགས་ཀྱི་ལོགས་རིས་འདྲ།།
གཟུགས་མཚར་སྡུག་འཛོམས་ཀྱང་སྙིང་པོ་མེད།།
ད་སྙིང་པོའི་ལྷ་ཆོས་བྱེད་རེ་རན།།
དགྲ་མི་རྟག་འཆི་བ་བྱུང་ཙ་ན།།
ཕོ་དཔའ་པོའི་བློ་ཤེད་འགྲོ་ས་མེད།།
བློ་ཆུང་བས་ཕྱེ་གྲོས་བྱེད་ས་མེད།།
དམན་མཛེས་མའི་བསླུ་་བྱེད་ས་མེད།།
མི་ཕྱུག་པོའི་ནོར་གྱི་བསླུ་ས་མེད།།
དཔོན་བཟང་པོའི་དབང་ཡོད་འགྲོ་ས་མེད།།
དབང་ཆུང་བའི་ཞུ་བ་འགྲོ་ས་མེད།།
རྐང་མགྱོགས་པོས་བྲོས་ཀྱང་ཐར་ས་མེད།།
དུས་ལན་གཅིག་ཐོབ་པའི་དལ་འབྱོར་རྟེན།།
ད་སྟོང་ལོག་མ་མཛད་ལྷ་ཆོས་མཛོད།།

ཅེས་མགུར་དུ་བཞེས་པ་ན། དཔོན་མོན་སྣང་སའི་ཐུགས་ལ་མགུར་དེ་རྣམས་བུ་མོ་ང་རང་ལ་དགོངས་ནས་གསུངས་པ་ཡིན་འདུག་ཤིང་ཏུ་ཐུགས་བདེན་སྙམ་དད་པ་ལྷག་པར་སྐྱེས་ཏེ་ཡོན་འབུལ་འདོད་ཆེ་ཡང་ཨ་ནེ་སྙིད་མོ་ནེ་ཙོ་ལེགས་ཞིང་ལས་བྱེད་མི་རྣམས་ཀྱི་ལས་རྒྱབ་ཏུ་ཡོད་སྟབས་འབུལ་མི་ནུས་པར་རྣལ་འབྱོར་དཔོན་གཡོག་གཉིས་ལ་འཚོབ་དང་ཡོན་འབུལ་དབང་ཆ་བདག་ལ་མེད། ཕར་ཚད་ཕར་ན་བཞུགས་པའི་ཨ་ལྕེ་ན་བཟའ་སྨྱུག་འཁྲིག་འཁྲིག་ཞལ་རས་སྣུམ་འཚིེ་འཚིར་ཕ་གི་ལ་ཞུས་ཤོག་ཅེས་སྣང་སས་ཕྱག་མཛུབ་བཙུགས་ནས་བསྟན་པ་དང་རས་པ་དཔོན་གཡོག་གཉིས་ནས་ཀྱང་ཨ་ནེ་སྙིད་མོའི་འགྲམ་དུ་ཕེབས་ཏེ་བསོད་སྙོམས་སློང་བས། ཨ་ནེས་ལས་ཀ་བྱེད་འཕྲོ་ཅམ་སྟེ་བཞག་ནས་སྤྲང་པོ་ཁྱོད་ཚོས་ངེད་ཀྱི་རྩར་ཡོང་སྟེ་ཅི་བྱེད། དབྱར་གྱི་དུས་སུ་དཀར་སྤྲང་དང་། དགུན་གྱི་དུས་སུ་སྐྱུར་སྤྲང་བྱེད། རི་ལ་བཞག་ན་ཆོས་མི་ནུས། ཀླུང་ལ་བཞག་ན་ལས་མི་ནུས། ཐོབ་ན་ཇག་པ་བྱེད། མ་ཐོབ་རྐུ་མ་བྱེད། ནམ་ཞག་རྒྱུན་དུ་རྫུན་དང་ཁྲམ་དང་གཡོ་སྒྱུ་ཁོ་ན་ལ་མི་ཚེ་སྐྱེལ་བའི་ཟོག་སྟོང་རས་པ་ཁྱོད་ཚོའི་སྣེ་ལེན་ངས་མི་ཤེས། བསོད་སྙོམས་དགོས་ན།སྐུ་གཟུགས་རྨ་བྱ་ལས་མཛེས་པ།གསུང་ངག་འཇོལ་མོ་ལས་སྙན་པ།ཐུགས་རིག་འཇའ་ཚོན་ལས་བཀྲ་བ། སྐུ་དབང་རི་རབ་ལས་ཆེ་བ། ང་ཚོ་མྱང་སྟོད་རི་ནང་པའི་དཔོན་མོ་སྣང་ས་འོད་འབུམ་བྱ་བ་དེ་ཕ་གི་ཡིན་པས་ལ་ཞུས། ང་ནི་ཁོང་གི་གཡོག་མོ་ཡིན་པས་སྟེར་དབང་མེད་ཟེར་བ་ན། ཡང་རས་པ་དཔོན་གཡོག་གཉིས་པོས་སྣང་སའི་དྲུང་དུ་ཡོང་ནས་གོང་གི་ལོ་རྒྱུས་རྣམས་ཞུས་པས་སྣང་སས་ཐུགས་སེམས་ཀྱིས་མི་བཟོད་པར་ཚར་ཕོན་བདུན་ཕུལ་ནས་ཁྱེད་རས་པ་དཔོན་གཡོག་གཉིས་གང་ནས་བྱོན། ད་གང་དུ་ཕེབས། ང་བུ་མོ་སྣང་ད་ཚེ་མཇུག་ལ་དམ་པའི་ལྷོ་ཆོས་དང་མཇལ་བའི་སྐྱབས་འཇུག་དང་བསྔོ་སྨོན་ཐུགས་རྗེས་གཟིགས་པ་ཞུ་ལགས་ཞུས་པས། རས་པ་དཔོན་སློབ་གཉིས་ཀྱིས་སླར་ཡང་སྣང་སའི་གསུངས་ལན་དུ་མགུར་འདི་བཞེས་སོ།།

ཕ་བླ་མ་རྣམས་ལ་ཕྱག་འཚལ་ལོ།།
མ་རིགས་དྲུག་ཐར་པའི་ལམ་སྣ་དྲོངས།།
ཡང་གཅིག་གསོན་དང་དཔོན་མོ་སྣང་ས་ལགས།།
བསོད་སྙོམས་སྦྱིན་པ་སྩལ་བ་བཀའ་དྲིན་ཆེ།།
བདག་ནི་ཡོང་བ་ལ་སྟོད་ཕྱོགས་ནས་ཡོང་།།
སྟོད་གངས་རི་ལ་ཕྱི་སྒང་ནས་ཡོང་།།
ང་མི་ལ་རས་པའི་སློབ་མ་ཡིན།།
ངའི་མིང་ལ་རས་ཆུང་རྡོར་གྲགས་ཟེར།།
གྲོགས་བྱེད་པའི་རས་པ་གཅིག་པུ་འདི།།
མིང་ལ་ཉེ་གནས་རིན་ཆེན་གྲགས་པ་ཟེར།།
ད་འགྲོ་བ་དབུས་ཀྱི་ཕྱོགས་ལ་འགྲོ།།
དབུས་ཡར་ཀླུང་སྐྱོར་པོའི་གྲོང་དུ་འགྲོ།།
ཕུ་ན་སྒྲུབ་པ་རྒྱག་པའི་སྒོམ་འཆེན་དང་།།
མདའ་ན་འཚོ་བ་སྦྱོར་བའི་ཡོན་བདག་གཉིས།།
སངས་མཉམ་པོར་རྒྱ་བའི་རྟེན་འབྲེལ་ཡིན།།

རྟེན་འབྲེལ་གྱི་སྙིང་པོ་བརྔོ་བ་ཡིན།།
ཚུར་ཟས་འབྲེལ་ཐོབ་པའི་སྣང་ས་དང་།།
ཕར་ཆོས་འབྲེལ་འཐད་པའི་རས་པ་གཉིས།།
རྟེན་འབྲེལ་གྱི་སྙིང་པོ་སྐྱབས་འཇུག་བྱེད།།

ཅེས་གསུངས་པ་ན། སླར་ཡང་དད་པ་ལྷག་པར་སྐྱེས་ཏེ་ཡང་བསྐྱར་ཚར་ཕོན་གསུམ་་ཞིང་། རས་པ་དཔོན་སློབ་གཉིས་ཀྱང་ཐུགས་མཉེས་ནས་བསྔོ་ཧ་སྨོན་ཡང་དག་མཛད་དེ་ཕྱིར་བཞུད་དོ།། དེའི་ཚེ་སྣང་སས་རས་པ་གཉིས་ལ་བསོད་སྙོམས་བྱིན་ཕྱག་འཚལ། བྱིན་རླབས་ཞུས་པ་ཨ་ནེ་སྙིད་མོས་མཐོང་སྟེ་ཞེ་སྡང་དྲག་པོ་སྐྱེས་ནས་ཐུ་བ་གཡས་རྫེས་གཡོན་བརྫེས་བྱས། ལག་ཏུ་དབྱུག་པ་ཞིག་ཁྱེར་ནས་དཔོན་མོ་སྣང་སའི་མདུན་དུ་ཡོང་སྟེ་མིག་འབུར་ཚུགས་སུ་བལྟ་བ་དང་ལྷན་ཅིག་གླུ་འདི་བླངས་སོ།།

ཕྱི་རུ་གཟུགས་མཛེས་ཁ་དོག་མཚར་ན་ཡང་།།

ནང་དུ་བསམ་ངན་དུག་གིས་ཟས་ལ་སྤྱོད།།

རྨ་བྱ་འདྲ་བའི་བདུད་མོ་སྣང་ས་ཁྱོད།།

ཨ་ནེ་སྙིད་མོ་ང་ལ་ཚུར་ཉོན་དང་།།

ལ་སྟོད་དིང་རི་གླང་འཁོར་དགོན་པ་ན།།

རྒྱ་གར་གྲུབ་ཆེན་དམ་པ་སངས་རྒྱས་དང་།།

སྟོད་ཀྱི་ལ་ཕྱི་གངས་ཀྱི་ར་བ་ན།།

བོད་ཀྱི་རྣལ་འབྱོར་མི་ལ་རས་པ་བཞུགས།།

དེ་ལ་བརྟེན་ནས་མྱང་སྟོད་རི་ནང་འདིར།།

རས་པ་ཕར་འགྲོ་ཚུར་འགྲོ་རྒྱུན་མི་ཆད།།

སློང་མི་ཀུན་ལ་གང་འདོད་སྟེར་ན་ནི།།

བུ་སྐྱེས་ཨ་མ་བྱས་ནས་དགོང་པ་ཆུང་།།

མྱང་སྟོད་རི་ནང་ཤོང་ཞིང་རིང་མོ་འདི།།

འབྲུ་སྲན་གཉིས་པོའི་ཐོན་ཁུངས་དྲག་ཤོས་ཡིན།།

ཚར་ཕོན་གང་ཡོད་སྤྲང་པོ་ལ་སྟེར་ན།།

སྤྲང་མོ་ཁྱོད་ཀྱང་མ་སྡོད་མཉམ་དུ་སོང་། ཞེས་ཟེར་བ་ན། སྣང་སས་དེ་ལན་གླུ་འདི་གསུངས་སོ།།

སྐྱབས་གནས་དཀོན་མཆོག་གསུམ་ལ་ཕྱག་འཚལ་ལོ།།

བུ་མོ་ཆོས་མེད་མ་ལ་ཐུགས་རྗེས་གཟིགས།།

ཚུར་ལ་གསོན་དང་ཨ་ནེ་སྙིད་མོ་ལགས།།

ང་ཡིས་བསོད་སྙོམས་སྟེར་ཐག་མ་ཆོད་པར།།

ཨ་ནེ་རང་གིས་རས་པ་བླ་སློབ་ལ།།

ང་ནི་གཡོག་ཡིན་སྟེར་ཐག་ན་ནས་ཆོད།།

ཁོང་ནི་དཔོན་མོ་ཡིན་པས་ཞུས་ཤོག་ཅིག།

སླར་ཡང་ང་ཡི་དྲུང་དུ་རྫོང་བའི་དུས།།
བསོད་སྙོམས་མ་བྱིན་སྟོང་སློག་བྱས་གྱུར་ན།།
སྤྲང་པོ་གཏམ་ཁྱེར་ལུང་པའི་མདའ་དང་ནི།།
ཕོ་རོག་ཤ་ཁྱེར་ལུང་པའི་ཕུ་བཞིན་དུ།།
མྱང་སྟོད་རི་ནང་དཔོན་པོའི་གཏམ་དོན་ལ།།
གནོད་དོགས་ཚར་ཕོན་ཁ་ཤས་བྱིན་པ་ཡིན།།
དཀོན་མཆོག་མཆོད་དང་ངན་སློང་སྦྱིན་གཏོང་གི།
ནོར་ལ་སྤྱོད་ཤེས་ཕྱུག་པོའི་མཚན་ཉིད་ཡིན།།
སྦྲང་མས་སྦྲང་རྩི་བསགས་པ་ཇི་བཞིན་དུ།།
སེར་སྣས་བསགས་པའི་ནོར་གྱིས་ཕན་མི་ཐོགས།།
དབང་ཕྱུག་མི་ལའི་བུ་སློབ་རས་པ་ལ།།
སྤྲང་པོ་མ་གསུངས་དད་ཅིང་གུས་པར་མཛོད།།
བུ་མོས་མཆོད་སྦྱིན་དགེ་བ་བྱེད་པ་ལ།།
བདུད་མོ་མ་གསུངས་རྗེས་སུ་ཡི་རང་མཛོད།།

ཅེས་གསུངས་པ་ན། ཨ་ནེ་སྙིད་མོ་དེ་ནི་ད་དུང་སྔར་ལས་ཀྱང་ལྷག་པར་ཁོང་ཁྲོ་དྲག་པོ་ལངས་ཏེ་དཔོན་མོ་སྣང་ས་ཟེར་བའི་བདུད་མོ་ཕུང་འདྲེ་མ་ཁྱོད་རས་པ་དཔོན་སློབ་གཉིས་གཟུགས་མཛེས་པ་དང་།   སྐད་སྙན་པ་ལ་ཆགས་ནས་ཚར་ཕོན་དེ་རྣམས་སྦྱིན་པ་མ་གཏོགས་དད་གུས་ཤ་ཚ་བྱས་པ་ག་མ་ཡིན།  ཁྱོད་པང་དུ་བུ་དང་རྒྱབ་ཏུ་ཕ་མིང་ཡོད་བསམ་པའི་ལྟག་ཤེད་ཀྱིས་ཕར་ལ་གཅིག་ལབ་ན་ཚུར་ལ་གཉིས་ལན་སློག་གི་འདུག་སྟེ།  ཁྱེད་མྱང་སྟོད་རི་ནང་པའི་གནའ་མ་ཡིན་པ་ལས་ལྷག་པ་ང་མྱང་སྟོད་རི་ནང་པའི་བུ་མི་ངོ་མ་ཡིན་པས་མ་ཆོག་ཕྱི་ནང་ལས་ཀའི་འགན་ཚང་མ་འཁུར་གྱི་ཡོད་པ་ཁྱེད་ཀྱིས་ད་དུང་མ་ཤེས་སམ།  སྔར་ཕན་ཆད་ཚིག་བརྡ་སྤྲད་པ་ལ་མི་ཉན་ན་ད་ངའི་ལག་བརྡ་སྤཽད་དགོས་པའི་དིས་ལ་བབས་པ་ཡིན་འདུག་ཅེས་དཔོན་མོ་སྣང་ས་ནལ་རྐྱལ་ལ་ནམ་ལངས་པ་འདྲ་བ་གཅིག་དང་།  ཁ་བུབ་ལ་ས་རུབ་པ་འདྲ་བ་གཅིག་བརྡབས་ནས་བརྒྱེལ་ཐོག་རྒྱུག་པ་ལན་མང་དུ་བརགྱབ།  དབུ་སྐྲ་སེ་ལིང་ལྗང་པ་འདྲ་བ་དེ་ནས་སྐྲ་རྐང་བདུན་བཏོགས་ནས་ཏེ་མོ་རང་གི་ཨམ་ཕྲག་ནང་དུ་བཅུག་ནས། ད་དུང་མོ་རང་གི་ཇོ་ཇོ་གྲགས་པ་བསམ་གྲུབ་ལ་ཕུང་སྦྱོར་ཞིག་འཕྲལ་དུ་བྱེད་མ་ཐུབ་ན་དཔོན་པོ་ཁོང་སྣང་ས་ལ་ཐུགས་བརྩེ་བ་ཆེན་བའི་སྟབས་ཀྱིས་མོ་རང་ལ་བཀའ་བཀྱོན་དགོངས་ཚོམ་མཛད་ཡོང་སྙམ་ཇོ་ལགས་གྲགས་པ་བསམ་གྲུབ་ཀྱི་དྲུང་དུ་ཨ་ནེ་སྙིད་མོ་ནེ་ཙོ་རང་གི་སྐྲ་ཡིན་ཁུལ་བྱས་ཏེ། སྣང་སའི་དབུ་སྐྲ་བཏོགས་པ་རྣམས་མོ་རང་གི་ལག་ཏུ་ཁྱེར་ནས་ངུ་བཞིངལན་དཀྲུག་ཤིང་གི་གླུ་འདི་བཏང་ངོ་།།

ཇོ་ལགས་དཔོན་པོ་གྲགས་པ་བསམ་གྲུབ་ལགས།།
སྙིད་མོ་ནེ་ཙོ་ང་ལ་ཚུར་གསོན་དང་།།
རང་རེའི་དཔོན་མོ་སྣང་སའོད་འབུམ་ནི།།
བཅོལ་བའི་ལས་ཀ་བཙས་མི་རྔ་བར།།
མ་བཅོལ་བ་ཡི་བྱ་ཧ་སྣ་ཚོགས་བྱེད།།
ད་ནང་ཞོགས་པ་ཉི་མའི་སྔ་ཆ་ལ།།
གཟུགས་མཛེས་སྐད་སྙན་རས་པ་ཟོག་སྟོང་གཉིས།།
རང་རེའི་ཤོང་ཞིང་རིང་མོའི་སྟེང་དུ་འབྱོར།།
སྣང་ས་སེམས་ཤོར་ཚར་ཕོན་ཕལ་ཆེར་སྦྱིན།།
ངོ་ཚ་མེད་པའི་ལུས་འབྲེལ་འདོད་རྩིས་བྱེད།།
དེ་ཚོ་མཐོང་ནས་སེམས་ཀྱིས་མ་བཟོད་པར།།
ཁ་ཏ་བྱེད་དུ་ཕྱིན་ཀྱང་མི་ཉན་པར།།
ད་དུང་བྱེད་ངན་ངོ་སོར་ཁྱེར་ནས་ནི།།
སྐྲ་བཏོགས་བརྡུང་ཐག་མང་པོ་བཏང་བྱུང་བས།།
ཤ་རུས་གཅིག་པའི་སྤུན་དང་མནའ་མ་གཉིས།།
གདམ་ཁ་མ་ནོར་བ་ཞིག་ཇོ་ཇོས་མཛོད།།

ཅེས་ཞུས་པ་ན། དཔོན་གྲགས་པ་བསམ་གྲུབ་ཀྱི་ཐུགས་ལ་སྙིད་མོ་ནེ་ཙོ་ལེགས་ཀྱིས་ར་སྤྲོད་རྒྱུ་མེད་པར་སྨྱོ་ཧམ་དེ་འདྲ་རས་ཟེར་མདོག་མི་ཁ།  དཔོན་མོ་སྣང་ས་ཟེར་བ་ཁ་སྒོ་སྐྱེ་འབྲས་ལེགས་པའི་ཐོག་ཏུ་བུ་སྐྱེས་ཀྱི་ཨ་མ་ཡིན་པ་ལ་བསམས་ནས་ངེད་རི་ནང་དཔོན་གཡོག་ཚང་མས་དགའ་བའི་འཛུམ་གྱིས་བསུས།  བརྩེ བའི་ཡིད་ཀྱིས་བསྐྱངས་པར་བརྟེན་ད་སྐྱག་ལང་ལ་ཤོར་བ་ཡིན་འདུག་པས་ཕྱུ་གུ་དང་བུད་མེད་ཀྱིི་རིགས་འདི་ཐོག་མ་ནས་སྐྱག་ལང་དུ་མ་བཏང་བར་བཅུན་གང་ཐུབ་མ་བྱས་ན་ཡོང་རྒྱུ་མི་འདུག་དགོངས་ཏེ་དཔོན་སྣང་ས་གར་བཞུགས་ཀྱི་དྲུང་དུ་བྱོན་པར་དཔོན་མོ་སྣང་ས་དེ་ནི་ཨ་ནེ་སྙིད་མོས་བརྡུང་ཐག་བཏང་བའི་རྐྱེན་གྱིས་ཞིང་ཁའི་ཚིགས་ཀྱི་ཁུག་ཀྱོག་གཅིག་ན་སྦྱན་ཆབ་བསིལ་ཞིང་བཞུགས་འདུག་པ་དཔོན་པོས་གཟིགས་ནས་གླུ་འདི་བཞེས་སོ།།

 

མཇུག་ཚང་མེད།

བརྒྱུད་སྐུལ།

མཆན་སྤེལ།