རྒོད་ཚང་པ་མགོན་པོ་རྡོ་རྗེའི་རྣམ་ཐར་མདོར་བསྡུས།

རྒོད་ཚང་པ་མགོན་པོ་རྡོ་རྗེའི་རྣམ་ཐར་མདོར་བསྡུས།

དེ་ཡང་རྒྱལ་བ་རྒོད་ཚང་པ་མགོན་པོ་རྡོ་རྗེ་མཆོག་ནི། འབྲུག་རྭ་ལུང་དགོན་གསར་དུ་ཕྱག་འདེབས་པ་པོ་འགྲོ་མགོན་གཙང་པ་རྒྱ་རས་ཡེ་ཤེས་རྡོ་རྗེ་ཞེས་མཁས་གྲུབ་ཀྱི་སྙན་པ་ས་སྟེང་ན་ཁྱབ་པ་དེར་རང་དང་རྟོགས་པ་མཉམ་པའི་བུ་ཆེན་དྲུག་ཡོད་པའི་ནང་ནས་མཁྱེན་པ་ཐོགས་པ་མེད་ཅིང་ཉམས་རྟོགས་མཐའ་རུ་ཕྱིན་པ་སྟེ། ལྷོ་བྲག་དོལ་པོ་ཆུང་གི་ཡུལ་དུ་རབ་བྱུང་གསུམ་པའི་ས་བྱ་ལོ་སྟེ་ཕྱི་ལོ་ ༡༡༨༩ ལོར་སྐུ་འཁྲུངས།

གཙང་ལ་སྟོད་རྒོད་ཚང་རི་ཁྲོད་དུ་ཡུན་རིང་སྐུ་མཚམས་སུ་བཞུགས་པས་རྒོད་ཚང་པ་ཞེས་པའི་མཚན་རྒྱུན་ཆགས་སུ་གྱུར། དགུང་ལོ་གཞོན་ནུའི་དུས་ནས་བླ་མར་མོས་གུས་ཆེ་བས་བླ་མས་ཅི་གསུང་བཀའ་སྒྲུབ་བྱེད་པའི་གོམས་གཤིས་ཆགས། བླ་མའི་མདུན་བཀའ་བརྒྱུད་པའི་ཟབ་ཆོས་ཀུན་བུམ་པ་གང་བྱོའི་ཚུལ་གྱིས་ཞུས། རྗེས་སུ་བླ་མའི་བཀའ་ལྟར་སྒྲུབ་གནས་ཁྱད་པར་ཅན་ལྷོ་བྲག་མཁར་ཆུ་དང་། གངས་ཏི་སེ། རྩྭ་རི་ཁྱུང་དཀར། སྟེང་འབྲོའི་རི་ཁྲོད། རྒྱ་གར་ནུབ་ཕྱོགས་ཀྱི་ཛ་ལན་ངྷ་ར་སོགས་སུ་རྗེ་མི་ལ་རས་པ་ཇི་བཞིན་དཀའ་སྤྱད་སྙིང་རུས་ཀྱིས་སྒོམ་སྒྲུབ་མཛད།

དཔེར་ན། སྟེང་འབྲོའི་རི་ཁྲོད་དུ་འདག་སྦྱར་ལོ་གསུམ་བཞུགས་རིང་འཚོ་བ་ཤིན་ཏུ་ངན་ངོན་ལ་བརྟེན་པས་སྐུ་ལུས་རིད་ཅིང་ཉམས་ཞན་དུ་གྱུར་ཀྱང་རྒྱུན་འཁྱོངས་མཛད། ཚོགས་པ་ཡང་དྲུག་ཅུ་ལྷག་ཙམ་འདུས་ཏེ་ཟབ་ཆོས་ཞུས། དོལ་དང་རྩྭ་རི་སོགས་ལ་འདག་སྦྱར་བྱས་ནས་བཞུགས་དུས། ས་ནད་དང་ཤིག་ནད་ཐེངས་མང་གིས་མནར་ཡང་ཅི་མི་སྙམ་པར་ཉམས་ལེན་ཁོ་ནར་འབད་པས། ནད་རེ་རེ་བཞིན་ལྷག་མེད་དུ་ཡལ།

ཁོང་ནི་འཚོ་བ་ཞན་ལ་སྐུ་གཟུགས་ཅི་ཙམ་གཅོང་དུ་གྱུར་ཀྱང་། ཐུགས་དགྱེས་སྤྲོ་ཁོ་ནའི་ངང་ལ་བཞུགས་ཤིང་། སློབ་མར་ཆོས་གསུངས་པ་ན་ཡང་མགུར་ཁོ་ནས་གསུངས་པ་དང་། འཕྲིན་ཡིག་རྣམས་ཀྱང་མགུར་མ་ཁོ་ན་གནང་། སྟོད་རྒོད་ཚང་དང་། སྟེང་འབྲོ། གཉའ་ནམ། བདེ་ཆེན་སྟེང་། བར་འབྲོག་རྡོ་རྗེ་གླིང་། ཛ་ལན་ངྷ་རའི་གླིང་ཕྲན་བཅས་སུ་དགོན་གནས་བཏབ་ཅིང་། སྒྲུབ་པ་ཕོ་མོའི་ཚོགས་པ་མང་པོ་བཙུགས།


དབང་ལུང་མན་ངག་ཐོབ་པའི་སློབ་མ་མཐའ་ཡས་པ་སྤེལ་བའི་ནང་ནས། རང་དང་མཉམ་པའི་བུ་ཆེན་བརྒྱད་དེ། དཔལ་ལྡན་ཡང་དགོན་པ་དང་། ནེ་རིངས་པ། བ་རི་བ། ཕུ་རི་བ། མ་བདུན་པ། མོད་པོ་ཆེ་བ། གངས་པ། སྤྱི་དཀར་པོའོ། །རང་ལས་མཁས་པའི་བུ་ཆེན་གཅིག་ཅེས་པ་འདི། ལ་ལས་ཡང་དགོན་པ་ལ་ངོས་འཛིན་པ་དང་། ལ་ལས་ཨུ་རྒྱན་པ་ལ་ངོས་འཛིན་ཀྱང་། ཡིན་ངེས་པ་ནི་ཨུ་རྒྱན་པ་ཡིན་པར་ངེས་སོ། །
དེ་ནས་བཟུང་སློབ་ཡང་སློབ་རྣམས་ཀྱིས་དགོན་སྡེ་གསར་འདེབས་དང་། ཆོས་འཆད་ཉན་མཛད་དེ་དཔལ་ལྡན་འབྲུག་པ་བཀའ་བརྒྱུད་ཀྱི་བསྟན་པ་ཉི་མ་ཤར་བ་ལྟར་གྱུར་ཅིང་། སྟོད་འབྲུག་དང་སྨད་འབྲུག་ཅེས་ཁག་གཉིས་སུ་གྱུར་ཏོ། །དགུང་ལོ་བདུན་ཅུར་ཕེབས་པ་བོད་རབ་བྱུང་བཞི་པའི་ས་རྟ་ལོ་སྟེ་ཕྱི་ལོ་ ༡༢༥༨ ལོའི་དབྱར་ཁ་གཤེགས་པ་བཅས་སོ།།

 

བརྒྱུད་སྐུལ།

མཆན་སྤེལ།