རྔོག་ལེགས་པའི་ཤེས་རབ།

རྔོག་ལེགས་པའི་ཤེས་རབ།

བཀའ་གདམས་ཀྱི་མེས་པོ་ཇོ་འབྲོམ་ཡབ་སྲས་གསུམ་གྱི་ཡ་གྱལ་ཡིན་ལ། ཇོ་བོ་རྗེའི་སློབ་མ་སྙན་གྲགས་ཅན་དབུས་ཀྱི་ཁུ་རྔོག་འབྲོམ་གསུང་གྱི་ཡ་གྱལ་ཡང་ཡིན། ཆོས་རྒྱལ་ཁྲི་སྲོང་ལྡེ་བཙན་གྱི་བློན་པོ་རྔོག་ཆེན་པའི་རྒྱུད་པ་ཡར་འབྲོག་དོའི་ཕྱི་རོལ་གྱི་མཚོ་ཆེན་པོའི་འགྲམ་དུ་གྲོང་ཆགས་པའི་སྔགས་རྙིང་མ་བའི་དགེ་བཤེས་རྡོ་རྗེ་གཞོན་ནུར་སྲས་ལྔ་ཡོད་པའི་ཆེ་བར་སྐུ་འཁྲུངས། འབྲིང་ཡེ་ཤེས་ཡོན་ཏན་ལས་རབ་ཏུ་བྱུང་། སྐུ་ན་ཆུང་ངུའི་དུས་མངའ་རིས་གུ་གེ་རྒྱལ་པོས་ཁ་ཆེའི་ཡུལ་དུ་མངགས་ཏེ་ནང་པ་སངས་རྒྱས་པའི་ཆོས་ལུགས་སློབ་གཉེར་མཛད་ནས་མཁས་པར་གྱུར། ཕྱིས་སུ་ལོ་ཆེན་རིན་ཆེན་བཟང་པོར་རོགས་མཛད་དེ་བཀའ་ཆོས་བསྒྱུར།

རབ་བྱུང་དང་པོའི་ཤིང་བྱ(༡༠༤༥)ལོར་དབུས་སུ་ཕེབས་སྐབས་རྔོག་གིས་ལྷ་སར་སྤྱན་དྲངས། སྤྱན་རས་གཟིགས་ཀྱིས་མི་དཀར་པོ་ཞིག་ཏུ་བྱས་ནས་བསུ་བ་མཛད། ནག་ཚོ་དང་ལྷན་དུ་ཇོ་བོ་དང་མཇལ་ཏེ་ཇོ་བོའི་ཐུགས་སྲས་སུ་གྱུར། རྔོག་གིས་ལོ་པཎ་ལ་ཞུས་ནས་རྟོག་གེ་འབར་བ་བསྒྱུར། དེ་ནས་ཁུ་སྟོན་བརྩོན་འགྲུས་གཡུང་དྲུང་དང་ལྷན་དུ་ཇོ་བོའི་དྲུང་ནས་བཀའ་གདམས་བུ་ཆོས་ཞུས། རབ་བྱུང་དང་པོའི་ཆུ་གླང(༡༠༧༣)ལོར་གསང་ཕུ་ནེའུ་ཐོག་དགོན་པ་བཏབ། རྔོག་ལོ་ཡབ་སྲས(ལེགས་པའི་ཤེས་རབ་དང་བློ་ལྡན་ཤེས་རབ་གཉིས་ལ་ཞུ)ཀྱིས་ཚད་མ་རྣམ་ངེས་དང་བྱམས་ཆོས་གཞིར་བཞག་གིས་གསང་ཕུར་རིགས་ལམ་ནས་དྲངས་པའི་འཆད་ཉན་ཤིན་ཏུ་དར་པོ་བྱུང་། སློབ་མ་མཁས་པ་ཉིད་ཀྱི་དབོན་རྔོག་བློ་ལྡན་ཤེས་རབ་སོགས་བྱུང་། དུང་དཀར་ཚིག་མཛོད་ཆེན་མོ་ལས་བཏུས།

 

རྔོག་ལེགས་པའི་ཤེས་རབ་ནི་འབྲིང་ཡེ་ཤེས་ཡོན་ཏན་ལས་རབ་ཏུ་བྱུང་། ཁམས་སུ་བྱོན་ནས་ཇོ་བོ་སེ་བཙུན་གྱི་སློབ་མ་མཛད་དེ་ཆོས་མང་དུ་གསན། ཁུ་སྟོན་དང་འགྲོགས་ཏེ་དབུས་སུ་བྱོན། མངའ་རིས་གུ་གེ་རྒྱལ་པོས་ཁ་ཆེའི་ཡུལ་དུ་མངགས་ཏེ་ནང་ཆོས་སློབ་གཉེར་མཛད་ནས་མཁས་པར་གྱུར། ཕྱིས་ལོ་ཆེན་རིན་ཆེན་བཟང་པོ་དང་མཉམ་དུ་བཀའ་བསྟན་མང་དུ་བསྒྱུར། ཇོ་བོ་རྗེ་དབུས་སུ་ཕེབས་སྐབས་ལྷ་སར་གདན་དྲངས། ཇོ་བོའི་ཐུགས་སྲས་སུ་གྱུར། རྔོག་གིས་ལོ་པཎ་ལ་ཞུས་ནས་རྟོག་གེ་འབར་བ་བསྒྱུར། བྲག་ནང་གི་རྩར་དགོན་པ་ཞིག་མཛད་པ་ལས་ཕྱིས་ཇོ་བོ་རྗེའི་ལུང་བསྟན་ལྟར་རབ་བྱུང་དང་པོའི་ཆུ་གླང་ (༡༠༧༣) ལོར་གསང་ཕུ་ནེའུ་ཐོག་དགོན་པ་ཕྱག་བཏབ། རྔོག་ལེགས་པའི་ཤེས་རབ་དང་རྔོག་བློ་ལྡན་ཤེས་རབ་ཀྱིས་ཚད་མ་རྣམ་ངེས་དང་བྱམས་ཆོས་སྡེ་ལྔ་གཞིར་བཞག་གིས་གསང་ཕུར་རིགས་ལམ་ནས་དྲངས་པའི་འཆད་ཉན་ཤིན་ཏུ་དར་བར་མཛད། རྔོག་ལེགས་པའི་ཤེས་རབ་ཀྱིས་ཇོ་བོའི་ཆོས་མང་དུ་མཁྱེན་པས། དབུ་མའི་ལྟ་བ་ལ་རྩལ་ཐོན་ཞིང་། སྒྲོལ་མས་ཞལ་གཟིགས། བཀའ་གདམས་ཀྱི་བསྟན་པ་པ་དར་ཞིང་རྒྱས་པར་མཛད་དོ། །

མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་པར་ཐར་པ་ཕྱོགས་བསྡུས་དད་པའི་འཇུག་ངོགས་ལས་བཏུས།

 

རྔོག་ལེགས་པའི་ཤེས་རབ་ཀྱིས་ཕྱག་བཏབ་པའི་གསང་ཕུ་དགོན་ནི། བདག་ཉིད་པོ་འདི་ཉིད་ལན་ཅིག་ཇོ་བོའི་ཕྱག་ཕྱིར་བྱོན་པས་གསང་ཕུ་ལ་ཕྱག་མཛུབ་བཙུགས་ཏེ་ལུང་པ་ཡ་གིའི་ནང་ན་དུང་གཡས་སུ་འཁྱིལ་བ་འདྲ་བ་ཡོད། ཁྱོད་ཀྱིས་དེར་གཙུག་ལག་ཁང་ཐོབ་ལ་བཤད་ཉན་གྱིས་དང་བསྟན་པ་ལ་ཕན་ཐོགས་རྒྱ་ཆེན་འབྱུང་ཞེས་ལུང་བསྟན་གནང་ཞིང་། དགོན་པ་མ་འདེབས་བར་གསང་བ་མཛད་པར་ཞུ་ཞེས་ཞུས་པར་བརྟེན་གསང་ཕུ་ཞེས་མིང་ཐོགས་པར་བཤད། རབ་བྱུང་དང་བོའི་ཆུ་གླང་སྤྱི་ལོ1073ལོར་གསང་ཕུ་ནེའུ་ཐོག་ཏུ་གཙུག་ལག་ཁང་བཏབ། བཤད་ཉན་མཛད་པས་ཚོགས་པ་ལྔ་བརྒྱ་ཙམ་འདུས། ཕྱྭ་བ་ཆོས་ཀྱི་སེང་གེས་མཚན་ཉིད་ཀྱི་སྲོལ་གཏོད་ནས་དར་རྒྱས་ཆེ་བ་བྱུང་། སེ་འབྲས་མ་ཆགས་གོང་དབུས་ཀྱི་གདན་ས་དྲུག་གི་གྲས་ཡིན། དུས་རབས་བཅུ་བཞི་བའི་ནང་རྗེ་ཙོང་ཁ་པས་དེ་གའི་མཁན་པོ་སེང་གེ་རི་བོང་ལས་རྣམ་འགྲེལ་གསན་པ་དང་། བཀའ་བཞིའི་གྲྭ་སྐོར་ཡང་མཛད། དེ་རྗེས་མཁན་པོ་གྲགས་པ་སེང་གེས་རྗེ་ཙོང་ཁ་པའི་ཞབས་ལ་གཏུགས། ཁོང་གི་བུ་སློབ་སོགས་བརྒྱུད་དེ་དགེ་ལུགས་དར་རྒྱས་ཆེ་སྟབས་གསང་ཕུར་ས་སྐྱ་དང་དགེ་ལུགས་ཀྱི་གྲྭ་ཚུང་བཅུ་གཅིག་ཏུ་གྱེས་པ་ཡིན་ནོ། །བདག་ཉིད་ཆེན་པོ་འདིས་སྤྱིར་བསྟན་པ་ལ་བྱ་བ་རྒྱ་ཆེན་པོ་མཛད་ཅིང༌། ལྷག་པར་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་གླེགས་བམ་རིན་པོ་ཆེ་དང་ཐིག་ལེ་བཅུ་དྲུག་གི་མན་ངག་རྣམས་བཤེས་གཉེན་ཆེན་པོ་འདིའི་བཀའ་དྲིན་ལས་བྱུང་བས་བཀའ་དྲིན་མཚུངས་པ་མེད་པ་ཞིག་གོ།

བརྒྱུད་སྐུལ།

མཆན་སྤེལ།