རྭ་ཁ་བྲག་དང་། གནས་སྒོ་གདོང་། ཕུར་བུ་ལྕོག དགོན་པ་གསར་རི་ཁྲོད། ནོར་བུ་གླིང་ག་བཅས་ངོ་སྤྲོད།

རྭ་ཁ་བྲག་དང་། གནས་སྒོ་གདོང་། ཕུར་བུ་ལྕོག དགོན་པ་གསར་རི་ཁྲོད། ནོར་བུ་གླིང་ག་བཅས་ངོ་སྤྲོད།

རྭ་ཁ་བྲག

རྭ་ཁ་བྲག་སོགས་རི་ཁྲོད་འགའ།

རྭ་ཁ་བྲག་ནི། ཀེའུ་ཚང་ནུབ་ནས་ཆུ་ཚོད་སྐར་བཅུ་གྲངས་ཙམ་གྱེན་དུ་འཛེགས་ན་རི་ཁྲོད་དེར་སླེབས། རི་ཁྲོད་དེ་ནི། སྤྱི་ལོའི་དུས་རབས་14པར་རྗེ་ཙོང་ཁ་པས་ཕྱག་བཏབ་གནང་མཛད་《དྲང་ངེས་ལེགས་བཤད་སྙིང་པོ》དག་གནས་མཛད། གཡས་གཡོན་དུ་མཁས་གྲུབ་རྗེ་དང། རྒྱལ་ཚབ་རྗེའི་སྒྲུབ་ཕུག་ཀྱང་ཡོད། རྭ་ཁ་བྲག་ཅེས་པ་ནི། རྗེ་ཙོང་ཁ་པར་གོང་མ་ཏཱ་མིང་གི་གདན་ཞུ་འབྱོར་བར། རྗེ་ཙོང་ཁ་པས་གོང་མའི་ཕོ་ཉ་གཡོལ་བའི་ཆེད་དུ་རི་ཁྲོད་དེའི་ནུབ་ངོས་རི་སྟེང་དུ་བྲག་རི་གཡང་གཟར་ཅན་ཞིག་ཡོད་པ་དེའི་ནང་དུ་སྐུ་མཚམས་སུ་བཞུགས།

རྭ་ཁ་བྲག་སོགས་རི་ཁྲོད་འགའ།

དམ་ཅན་ཆོས་རྒྱལ་གྱི་རྗེ་ཙོང་ཁ་པའི་རྗེས་སྙེགས་ཏེ་འོང་བས་གནས་དེར་སླེབས་སྐབས་བྲག་རི་སྒོ་མེད་དེཡི་ནང་བཞུགས་ཡོད་པ་ཤེས་ཏེ་བྲག་རི་དེའི་གཤམ་དུ་དབུ་རྭ་བརྡར་ཤུལ་དང ། དེ་ནས་བྲག་བཤགས་ཏེ་རྗེ་ཙོང་ཁ་པ་མཇལ་སྟབས་རྭ་ཁ་བྲག་ཅེས་པའི་མཚན་དེ་ལྟར་བྱུང་གསུངས། དེ་ནས་རྗེ་ཙོང་ཁ་པ་སྐུ་གཤེགས་པའི་ཕྱི་ལོ་སྟེ་1420ལོར་བྱམས་ཆེན་ཆོས་རྗེས་དགའ་ལྡན་ལྔ་མཆོད་དང་པོ་སྟེ་རྗེའི་དགོངས་རྫོགས་དང་པོ་དེ་གནས་དེར་གཏར་གནང་མཛད། ལྔ་མཆོད་ཁང་ཞེས་པའི་ལྷ་ཁང་དེའང་དེ་ལྟར་བྱུང། དེ་རྗེས་སྒྲུབ་ཁང་དགེ་ལེགས་རྒྱ་མཚོ་ནས་ཨ་དགའ་བསོད་ནམས་བཟང་པོ་སོགས་ཀྱིས་བསྐྱངས། སྔོན་དགེ་འདུན་ཞལ་གྲངས་བཅུ་དགུ་ཙམ་ཡོད། སེ་ར་སྒྲུབ་ཁང་རྩེའི་ཁོངས་ཡིན། ད་ལྟ་གསར་བཞེངས་གནང་བའི་སྒྲུབ་ཁང་ནང་ཡེ་གེ་ཨའི་རང་བྱོན་དང། སྔོན་གྱི་སྒྲུབ་ཕུག་ཁག་དང་སྐུ་བརྙན་གསར་བཞེངས་གནང་བ་སོགས་མཇལ་རྒྱུ་ཡོད།

 

གནས་སྒོ་གདོང་།

 

གནས་སྒོ་གདོང།    མཚན་རྒྱས་པར་གནས་གདོང་བྱམས་གླིང་དགོན་ཞེས་ཞུ། དོག་བདེ་ཤར་ནས་གནས་ནང་ཞེས་པར་སོང་ན་ནག་སྒང་གྲོང་ཚོའི་བྱང་ངོས་རི་ལྡེབས་སུ་དགོན་དེ་མཇལ་རྒྱུ་ཡོད། རི་ཁྲོད་ནི། དུས་རབས་བཅོ་བརྒྱད་པའི་དུས་མཇུག་ཏུ་མཁར་རྡོ་སྐུ་ཕྲེང་གསུམ་པ་རིག་འཛིན་ཆོས་རྡོར་གྱིས་བཏབ། རི་ཁྲོད་དེ་ཐོག་མར་ཡུལ་དེའི་ཕུ་ལ་ཟངས་མདོག་དཔལ་རི་ཞེས་རི་སྐོར་རྒྱག་ས་དང་། གུ་རུའི་སྒྲུབ་ཕུག་སོགས་ཡོད་སར་མཁར་རྡོའི་གཏེར་ཆོས་ཐུན་མོངས་མ་ཡིན་པ་ཉམས་བཞེད་མཛད་ས་ཞིག་ཡིན་པ་ལ་རྗེས་སུ་རྐུན་ཇག་གིས་རྐྱེན་གནས་ནང་གི་བཙུན་དགོན་དང་གནས་སྒོ་གདོང་གི་གྲྭ་པ་རྣམས་བཞུགས་གནས་བརྗེས་པ་ཡིན་ཞེས་གསུངས། དགོན་བདག་མཁར་རྡོ་བླ་བྲང་ཡིན།

ད་ལྟ་གསར་བཞེངས་གནང་བའི་གནས་སྒོ་གདོང་བཙུན་མའི་དགོན་དུ་འཕགས་པ་ལོ་ཀེ་ཤཱ་རི་སོགས་སྔོན་གྱི་སྐུ་བརྙན་རྣམས་གྱི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད།

 

ཕུར་བུ་ལྕོག

ཕུར་བུ་ལྕོག  མཚན་རྒྱས་པར་ཕུར་ལྕོག་རིགས་གསུམ་བྱང་ཆུབ་གླིང་ཞེས་ཞུ། རྭ་ཁ་བྲག་ནས་ཕྲེད་ལམ་བརྒྱུད་སྤྱི་ལེ་གཉིས་གསུམ་ཙམ་རི་རྒྱབ་ཏུ་སོང་ན་རི་ཁྲོད་དེར་སླེབས། ཕུར་ལྕོག་ཅེས་པ་ནི། ཞང་འགྲོ་དགོན་གཡུ་བྲག་གིས་བྲག་ཕུར་བུའི་དབྱིབས་ཅན་གྱི་སྟེང་དུ་ཕོ་བྲང་ཟུར་ལྕོག་བཏབ་པས་མཚན་དེ་ལྟར་ཐོགས། དེ་ནས་སྤྱི་ལོ་1706ཙམ་ལ་སྒྲུབ་ཁང་དགེ་ལེགས་རྒྱ་མཚོར་མ་ཅིག་ལབ་སྒྲོན་གྱི་སྲས་ཐོས་སྨོན་བསམ་གྲུབ་ཀྱིས་ཕུ་དོག་ཅིང་མདའ་བདེ་བའི་ཡུལ་དོག་བདེ་ཅེས་པར་མཁར་བཏབ་ན་བཟང་ཞེས་ལུང་བསྟན་པ་ལྟར་གནས་དེར་ཕེབས་སྐབས་དེར་མཆོད་རྟེན་དཀར་ཆུང་གིས་གཙོས་མཆོད་རྟེན་ཁ་ཤས་དང། རིགས་གསུམ་ལྷ་ཁང་གི་ཤུལ་ཙམ་ལ་སྒྲུབ་གནས་བཏབ། སྒྲུབ་ཁང་དགེ་ལེགས་རྒྱ་མཚོས་སེ་ར་རྩེ་དང། རྭ་ཁ་བྲག  ཕུར་བུ་ལྕོག་བཅས་བསྐྱངས་གནང་བ་ལ། རྗེས་སུ་ཕུར་བུ་ལྕོག་ངག་དབང་བྱམས་པ་ལ་གཏད་པས་གནས་མིང་བླ་མར་ཐོགས་ཏེ་ཕུར་ལྕོག་ངག་དབང་བྱམས་པ་ཞེས་པ་དེ་ལྟར་བྱུང། གནས་དེར་ལོ་ལྟར་ལམ་རིམ་གསུངས། ཐོག་མར་འདུ་ཁང་ཀ་བ་བཞི་ནས་རིམ་བཞིན་རྒྱ་སྐྱེད་གནང་བ་དང། ཕོ་ལྷ་མི་དབང་དུས་ཆོས་རྭའི་འདུ་ཁང་ཆེན་མོ་སོགས་རྒྱས་བསྐྲུན་གནང། ཐོག་མར་དགེ་འདུན་བརྒྱད་གྲྭ་གཅིག་ནས་རིམ་བཞིན་བརྒྱད་བཅུ་ཙམ་བར་འཕེལ། སྔོན་འདུ་ཁང་ཀ་བ་བཞིའི་ནང་རྟེན་གཙོ་སྒྲུབ་ཁང་དུས་བཞེངས་གནང་བའི་འཇིགས་བྱེད་དང་། སྒྲོལ་དཀར་སོགས་ཀྱི་སྐུ་བརྙན། རིགས་གསུམ་ལྷ་ཁང་ནང་རིགས་གསུམ་མགོན་པོའི་སྐུ་བརྙན་བཞེངས་གནང་ནས་རབ་གནས་མཛད་སྐབས་ཡིག་དྲུག་གི་རང་བྱོན་དུ་གཟིགས་སྣང་བྱུང་བ་སོགས་རྟེན་དང་བརྟེན་པར་བཅས་པ་བཞུགས་སུ་གསོལ།

རྭ་ཁ་བྲག་སོགས་རི་ཁྲོད་འགའ།

ད་ལྟ་གསར་བཞེངས་གནང་བའི་རི་ཁྲོད་ནང་སྔོན་གྱི་སྐུ་བརྙན་ཁག་གི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད། ཡང་དེ་དང་ཉེར་བར་དུས་རབས་བཅུ་བདུན་ཙམ་དུ་སེར་སྨད་མཁན་པོ་སྤང་ལུང་བློ་བཟང་ཐུགས་རྗེས་ཕྱག་བཏབ་གནང་བའི་སྤང་ལུང་རི་ཁྲོད་ཀྱི་རྗེས་ཤུལ་ཡང་མཇལ་རྒྱུ་ཡོད།

མཚན་རྒྱས་པར་ཕུར་ལྕོག་རིགས་གསུམ་བྱང་ཆུབ་གླིང་ཞེས་ཞུ། རྭ་ཁ་བྲག་ནས་ཕྲེད་ལམ་བརྒྱུད་སྤྱི་ལེ་གཉིས་གསུམ་ཙམ་རི་རྒྱབ་ཏུ་སོང་ན་རི་ཁྲོད་དེར་སླེབས། ཕུར་ལྕོག་ཅེས་པ་ནི། ཞང་འགྲོ་དགོན་གཡུ་བྲག་གིས་བྲག་ཕུར་བུའི་དབྱིབས་ཅན་གྱི་སྟེང་དུ་ཕོ་བྲང་ཟུར་ལྕོག་བཏབ་པས་མཚན་དེ་ལྟར་ཐོགས།

དེ་ནས་སྤྱི་ལོ་1706ཙམ་ལ་སྒྲུབ་ཁང་དགེ་ལེགས་རྒྱ་མཚོར་མ་ཅིག་ལབ་སྒྲོན་གྱི་སྲས་ཐོས་སྨོན་བསམ་གྲུབ་ཀྱིས་ཕུ་དོག་ཅིང་མདའ་བདེ་བའི་ཡུལ་དོག་བདེ་ཅེས་པར་མཁར་བཏབ་ན་བཟང་ཞེས་ལུང་བསྟན་པ་ལྟར་གནས་དེར་ཕེབས་སྐབས་དེར་མཆོད་རྟེན་དཀར་ཆུང་གིས་གཙོས་མཆོད་རྟེན་ཁ་ཤས་དང། རིགས་གསུམ་ལྷ་ཁང་གི་ཤུལ་ཙམ་ལ་སྒྲུབ་གནས་བཏབ། སྒྲུབ་ཁང་དགེ་ལེགས་རྒྱ་མཚོས་སེ་ར་རྩེ་དང། རྭ་ཁ་བྲག  ཕུར་བུ་ལྕོག་བཅས་བསྐྱངས་གནང་བ་ལ། རྗེས་སུ་ཕུར་བུ་ལྕོག་ངག་དབང་བྱམས་པ་ལ་གཏད་པས་གནས་མིང་བླ་མར་ཐོགས་ཏེ་ཕུར་ལྕོག་ངག་དབང་བྱམས་པ་ཞེས་པ་དེ་ལྟར་བྱུང། གནས་དེར་ལོ་ལྟར་ལམ་རིམ་གསུངས། ཐོག་མར་འདུ་ཁང་ཀ་བ་བཞི་ནས་རིམ་བཞིན་རྒྱ་སྐྱེད་གནང་བ་དང། ཕོ་ལྷ་མི་དབང་དུས་ཆོས་རྭའི་འདུ་ཁང་ཆེན་མོ་སོགས་རྒྱས་བསྐྲུན་གནང། ཐོག་མར་དགེ་འདུན་བརྒྱད་གྲྭ་གཅིག་ནས་རིམ་བཞིན་བརྒྱད་བཅུ་ཙམ་བར་འཕེལ། སྔོན་འདུ་ཁང་ཀ་བ་བཞིའི་ནང་རྟེན་གཙོ་སྒྲུབ་ཁང་དུས་བཞེངས་གནང་བའི་འཇིགས་བྱེད་དང་། སྒྲོལ་དཀར་སོགས་ཀྱི་སྐུ་བརྙན། རིགས་གསུམ་ལྷ་ཁང་ནང་རིགས་གསུམ་མགོན་པོའི་སྐུ་བརྙན་བཞེངས་གནང་ནས་རབ་གནས་མཛད་སྐབས་ཡིག་དྲུག་གི་རང་བྱོན་དུ་གཟིགས་སྣང་བྱུང་བ་སོགས་རྟེན་དང་བརྟེན་པར་བཅས་པ་བཞུགས་སུ་གསོལ།

ད་ལྟ་གསར་བཞེངས་གནང་བའི་རི་ཁྲོད་ནང་སྔོན་གྱི་སྐུ་བརྙན་ཁག་གི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད། ཡང་དེ་དང་ཉེར་བར་དུས་རབས་བཅུ་བདུན་ཙམ་དུ་སེར་སྨད་མཁན་པོ་སྤང་ལུང་བློ་བཟང་ཐུགས་རྗེས་ཕྱག་བཏབ་གནང་བའི་སྤང་ལུང་རི་ཁྲོད་ཀྱི་རྗེས་ཤུལ་ཡང་མཇལ་རྒྱུ་ཡོད།

 

དགོན་པ་གསར་རི་ཁྲོད།

 

དགོན་པ་གསར་རི་ཁྲོད་ནི། ལྷ་ལུང་རི་ཁྲོད་ནས་སྤྱི་ལེ་བཞི་ཙམ་ཤར་དུ་སོང་ན་རི་ཁྲོད་དེར་སླེབས། རི་ཁྲོད་དེ་ནི། པཎ་ཆེན་སྐུ་ཕྲེང་བདུན་པའི་ཡུམ་བློ་བཟང་ཆོས་ཀྱི་སྒྲོལ་མ་ཞུ་བར་དེ་ཐོག་མར་གྲིབ་ཚོ་མཆོག་གླིང་དུ་ཡོངས་འཛིན་ཡེ་ཤེས་རྒྱལ་མཚན་རྩ་བའི་བླ་མར་བསྟེན་ནས་རྒན་ཆོས་མཛད། དེ་ནས་བླ་མའི་བཀའ་བཞིན་གང་གི་སློབ་མ་ཞིག་གནས་དེར་བཞུགས་ཡོད་པ་དེའི་དྲུང་དུ་བཏང་གནང་བ་བཞིན་གནས་དེར་ཕེབས་ཏེ་བླ་མ་དེའི་ཞབས་ལ་གཏུགས། ཐོག་མར་མཚམས་ཁང་ཆུང་ངུ་ཞིག་ནས་རྗེས་སུ་འདུ་ཁང་ཀ་བ་བཞི་ཡི་རྒྱ་ཁྱོན་བསྐྲུན་གནང་མཛད། དེ་རྗེས་གཙང་བཀྲ་ཤིས་ལྷུན་པོར་ཆོས་བཞུགས་གནང་བཞིན་ཡོད་པའི་གནས་ཀྱི་བླ་མ་སྐུ་ཕྲེང་དང་པོ་ཡེ་ཤེས་སྙན་གྲགས་གནས་དེར་གདན་དྲངས་པ་ནས་བཟུང་ཐོག་མར་དགེ་འདུན་བཞི་གྲྭ་གཅིག་ནས་རིམ་བཞིན་བཅུ་གསུམ་བར་འཕེལ། གནས་ཀྱི་བླ་མ་སྐུ་ཕྲེང་གཉིས་པ་དཔལ་ལྡན་ཆོས་འཕེལ་ཡང་མདོ་སྔགས་གཞུང་ལུགས་ཀུན་ལ་མངའ་བསྙེས། སོག་ཡུལ་དུ་ཕེབས་ཏེ་ཁས་ཀ་རྗེ་བཙུན་གྱི་ཡོངས་འཛིན་གནང་། དེར་བཅད་པ་བླ་བྲང་ཞེས་པ་ཞིག་ཀྱང་འཛུགས་གནང་མཛད། ད་ལྟ་དགོན་པ་གསར་ཐུབ་བསྟན་འཇིགས་བྲལ་བར་སྐུ་ཕྲེང་བཞི་ཙམ་བྱུང་། སྔོན་འབྲས་སྤུངས་སྔགས་པའི་ཁོངས་ཡིན། ད་ལྟ་ཉམས་གསོ་ཞུ་ཐུབ་མེད།

ཡང་དེ་ནས་རྐང་ཐང་མར་ཆུ་ཚོད་སྐར་བཅོ་ལྔ་ཙམ་འཛེགས་ན་སེ་ར་བྱ་བྲལ་ཁང་ཚན་གྱི་ཁོངས་དགོན་གསར་རྩེའི་རི་ཁྲོད་ཀྱི་རྗེས་ཤུལ་མཇལ་རྒྱུ་ཡོད།

 

ནོར་བུ་གླིང་ག

ནོར་བུ་གླིང་ག  ཕོ་བྲང་པོ་ཏ་ལ་ནས་སྤྱི་ལེ་གསུམ་བཞི་ཙམ་ནུབ་ངོས་སུ་ཕེབས་ན་ནོར་བུ་གླིང་གར་འབྱོན་གྱི་རེད། དེའང་ཐོག་མར་གནས་དེ་ལྗོན་ཤིང་གླང་ཚེར་སོགས་རང་བྱུང་ཤིང་སྣ་སྐྱེས་པའི་སྐྱེས་ཚལ་ལྟ་བུ་ཞིག་ཡིན་པ་ལ་ཐེངས་ཤིག་ནམ་མཁར་འབྲུག་གྲགས་པ་དང་། འཇའ་དབྱིབས་ནོར་བུ་འདྲ་བ་ཞིག་དགུང་དབྱིངས་སུ་ཤར་བས་ནོར་བུ་གླིང་ག་ཞེས་དང་། ཡང་གསུངས་སྲོལ་གཞན་ཞིག་ལ་སྤྱི་ལོའི་དུས་རབས་བཅོ་བརྒྱད་པའི་དུས་དཀྱིལ་ཙམ་ན་གླིང་ག་དེའི་ས་འོག་ཏུ་ནོར་བུ་རྩ་ཆེན་ཡོད་པ་ཁ་ཆེས་ཤེས་ནས་གླིང་ག་རེ་སྤུས་ཚོང་ཡོང་རེ་གཞུང་ས་མཆོག་ལ་ཞུས་པར། ཁ་ཆེས་གླིང་ག་ཉོ་བའི་དོན་རྟོགས་ཏེ་དེ་མར་གནས་དེར་རྒྱལ་བ་སྐུ་ཕྲེང་བདུན་པའི་དབྱར་ཁའི་བཞུགས་གནས་ཤིག་བསྐྲུན། གླིང་གའི་མིང་ལའང་ནོར་བུ་གླིང་ག་གསོལ་བ་ཡིན་ཞེས་གསུངས། དེའང་ཐོག་མར་དབུ་གཡབ་ཕོ་བྲང་ཞེས་ལྷ་མོ་གཟིགས་སའི་ཕོ་བྲང་བསྐྲུན། དེ་རྗེས་སྐལ་བཟང་ཕོ་བྲང་ཞེས་རྒྱལ་བའི་མཚན་གྱི་ཟུར་ཆགས་པའི་ཕོ་བྲང་བསྐྲུན་གནང་མཛད། ཕོ་བྲང་དེར་ཐོག་སོ་ཉིས་ཐོག་ལ་ཚོམ་ཆེན་དང་། མཆད་ཁང་། སྲུང་མ་ཁང་། གཟིམས་ཆུང་། ཕྱག་དཔེ་སོགས་ལ་རྟེན་དང་བརྟེན་པར་བཅས་བཞུགས་སུ་གསོལ་བའི་ནང་ཏཱ་ལའི་བླ་མ་སྐུ་ཕྲེང་རིམ་བྱོན་གྱི་དབྱར་ཁའི་བཞུགས་གནས་དེར་གཞུང་སྲོལ་དྲུང་བྱ་དང་མཛད་སྒོ་ཁག་ཚོགས་ཡུལ་ཡིན་ལ་སྐུ་ཕྲེང་རིམ་བྱོན་གྱི་བཞུགས་གནས་གཙོ་བོ་གནས་དེར་ཡིན། དེ་རྗེས་དེ་མོ་རྒྱལ་ཚབ་ནས་ཐུགས་འགན་བཞེས་ཏེ་ཆབ་རྫིང་རྒྱ་སྐྱེད་གནང་བ་དང་འབྲེལ་སྤྲོ་ཁང་ལྷུན་གྲུབ་དགའ་ཚལ་ཡང་བསྐྲུན་གནང་མཛད། ཆབ་རྫིང་ཕོ་བྲང་གི་ནུབ་ངོས་སུ་གྲུ་འཛིན་ཕོ་བྲང་ཡོད། དེའི་ནང་དབུས་སུ་ཐུགས་རྗེ་ཆེན་པོ་ཕྱག་སྟོང་དང་། མཐའ་འཁོར་དུ་བོད་ཀྱི་ཆོས་ལུགས་གྲུབ་མཐའ་སོ་སོའི་ཆོ་ག་ཕྱག་ལེན་གྱི་ཕྱག་དཔེ་དང་། སྟེང་དུ་རྒྱལ་བའི་གཟིམས་ཆུང་ཡོད་པ་བཅས་སོགས་ནི་ལྕགས་རི་སེར་པོའི་ནང་དུ་ཡོད། དེ་ནས་སྤྱི་ལོའི་དུས་རབས་ཉི་ཤུ་པའི་དུས་འགར་རྒྱལ་བ་སྐུ་ཕྲེང་བཅུ་གསུམ་པའི་དུས་ལྕགས་རི་སེར་པོའི་ནུབ་ངོས་སུ་སྤྱན་བསལ་ཕོ་བྲང་ཞེས་ཐོག་བརྩེག་གསུམ་ལྡན་རྟེན་དང་བརྟེན་པར་བཅས་པ་བསྐྲུན་གནང་མཛད། ཨར་ལས་དབུ་འཛིན་སྐུ་བཅར་ཐུབ་བསྟན་ཀུན་འཕེལ་ནས་གནང་སྟབས། ཐུབ་བསྟན་ཀུན་འཕེལ་མཆོག་ལ་དམངས་ཁྲོད་དུ་སྤྱན་བསལ་ཀུན་འཕེལ་ལགས་ཞེས་འབོད་སྟབས་ཕོ་བྲང་གི་མཚན་ལའང་། སྤྱན་བསལ་ཕོ་བྲང་། ཞེས་ཐོགས་པ་ནི་དམངས་ཁྲོད་ནས་བྱུང་བ་ལྟར་དུ་གྱུར། ཕོ་བྲང་དེ་ནི་བཟོ་བཀོད་དང་རྒྱན་སྤྲོས་གོང་ལས་ལྷག་པ་ཡོད།  ཕོ་བྲང་ཐོག་སོ་ཉིས་ཐོག་ཅན་འདིའི་ནང་ལའང་ཚོམ་ཆེན་དང་། གཟིམས་ཆུང་། རབ་གསལ་སོགས་ཁང་མིག་བཞི་བཅུ་ཙམ་དང་གཟིམས་ཆུང་དེ་དག་གི་ལྡེབས་རིས་སུ་སྟོན་པ་ཤཱཀྱ་ཐུབ་པའི་མཛད་རྣམ་དང་། རྒྱན་དྲུག་མཆོག་གཉིས་ཀྱི་མཛད་རྣམ། པུར་རྒྱལ་བོད་ཀྱི་རྒྱལ་རབས་དང་། བོད་ལ་ནང་བསྟན་དར་ཚུལ་དང་། གྲུབ་མཐའ་ཁག་འབྱུང་ཚུལ། རྒྱལ་བ་སྐུ་ཕྲེང་རིམ་བྱོན་གྱི་མཛད་རྣམ་སོགས་བོད་རིས་ཀྱི་ཐོག་ནས་བྲིས་ཡོད་ལ་ཚོམ་ཆེན་དབུས་སུ་1955ལོར་བསྐྲུན་པའི་གསེར་ཁྲི་དང་།  ལྷག་པར་དུ་ཕོ་བྲང་འདིའི་བཟོ་བཀོད་ནི་གོང་གསལ་རྣམས་ལས་ཀྱང་ལྷག་པ་ནི། ཕོ་བྲང་ནང་ཆབ་གནང་ས་དང་། ལུགས་གསར་གྱི་འཛིན་ཆས། ཁྲོ་ལྕགས་ཀྱི་གདུང་མ་སོགས་ནི་བོད་ཕྱི་ཟུང་དུ་སྦྲེལ་ནས་བསྐྲུན་ཀྱང། ཕྱིའི་བཀོད་པ་བོད་ལུགས་ཁ་གཙང་ཡིན་པ། གཞན་ཡང་ལྕགས་རི་སེར་པོའི་ཕྱིར་ལས་ཁུངས་ཁག་དང་། སྐུ་འཁོར་ཞབས་ཕྱི་ཁང་། རྒྱལ་སྒོ་ལྷོ་མར་སྐུ་སྲུང་དམག་སྒར་སོགས་ཡོད། གཞན་ཡང་གླིང་ག་འདིའི་ནང་ལྷ་སའི་ཉེ་འཁོར་དུ་མེད་པའི་ཤིང་སྣ་ཚོགས་དང་། སྟག་གཟིག་དོམ་དྲེད་སོགས་གཅན་གཟན་གྱི་རིགས། ཤྭ་བ། གླ་བ།  སོགས་རི་དྭགས་སྣ་ཚོགས། རྨ་བྱ་ཁྲུངཁྲུང་སོགས་འདབ་བྱའི་རིགས་སོགས་ཀྱང་གསོ་ཚགས་གནང་ཡོད།

ད་ལྟ་སྔར་གྱི་ཕོ་བྲང་ཁག་ཉམས་གསོ་བདག་སྐྱོང་གནང་ཡོད་པ་དང་། ཕེབས་ལམ་དུ་རྡོ་བཅལ་བཏིང་བ། གཅན་གཟན་རྭ་བ་རྒྱས་བསྐྲུན་གནང་བ་སོགས་མཇལ་རྒྱུ་ཡོད།

 

ཆོས་འཕེལ་ཀྱིས་བརྩམས།

 

 

 

 

 

བརྒྱུད་སྐུལ།

མཆན་སྤེལ།