ལྷོ་ཁའི་ལྗོངས་རྒྱུ། ཡར་ཀླུང་ཕུག་གསུམ་གྱི་ཡ་གྱལ་ཤེལ་བྲག་ཕུག་དང་བཻ་རོ་ཕུག

ལྷོ་ཁའི་ལྗོངས་རྒྱུ། ཡར་ཀླུང་ཕུག་གསུམ་གྱི་ཡ་གྱལ་ཤེལ་བྲག་ཕུག་དང་བཻ་རོ་ཕུག

ཤེལ་བྲག་ཕུག མཁས་གྲུབ་ཀྱིས་བརྩམས།

ཤེལ་བྲག་ཅེས་པའི་གནས་རི་ཁྱད་པར་ཅན་དེ་ནི་ཡར་ཀླུང་གི་རྒྱལ་སྒོ་ནུབ་མ་སྲུང་བའི་གྱད་མི་སྟོབས་ཆེན་ཞིག་དང་འདྲ་ལ་རྒྱལ་སྒོ་ཤར་མ་སྲུང་མཁན་ནི་མགོན་པོ་རི་ཡིན་ཞེས་གྲགས།
དེ་ཡང་ཤེལ་བྲག་ཕུག་ནི་ཤེལ་བྲག་རི་བོའི་རྩེ་མོར་མ་སླེབས་ཙམ་དུ་ཡོད་ཅིང་། བྲག་ཕུག་འདིའི་ནང་སྤྱི་ལོའི་དུས་རབས་བརྒྱད་པར་སློབ་དཔོན་པད་མ་འབྱུང་གནས་ཀྱི་སྒོམ་སྒྲུང་ཡུན་རིང་གནང་མྱོང་ཡོད་པས་བྱིན་རླབས་ཤིན་ཏུ་ཆེ། སློབ་དཔོན་ཆེན་པོས་འདི་གར་སྒྲུབ་པ་གནང་དུས་ཕྱི་ལ་མཁའ་འགྲོ་ཆོས་སྐྱོང་སྤྲིན་ལྟར་འཐིབས་པ་དང་། ནང་དུ་བཀའ་སྲུང་དམ་ཅན་བྲན་ལྟར་བཀོལ་ཞིང་། གནས་འདིར་ཡིད་ཀྱི་དངོས་གྲུབ་ཐོབ་པས་མངོན་ཤེས་དང་རྫུ་འཕྲུལ་ལ་ཐོགས་པ་མེད་པར་གྱུར།


ཤེལ་བྲག་ཕུག་གི་རྟེན་གཙོ་གུ་རུའི་སྐུ་མཐོང་གྲོལ་རིན་པོ་ཆེ་འདི་ཉིད་ནི་རྗེ་འབངས་ཉེར་ལྔའི་ནང་ཚན་གཡུ་སྒྲ་སྙིང་པོའི་སྐུ་སྐྱེ་ཆོས་རྗེ་དུར་ཁྲོད་རས་ཆེན་ནམ། འགྲོ་མགོན་གཙང་པ་རྒྱ་རས་ཡེ་ཤེས་རྡོ་རྗེ་ནས་ཤེལ་བྲག་གི་འདབ་ཞོལ་བཙན་ཐང་ཉང་སྟོད་སྒང་དུ་ལྷ་མིའི་རིན་ཆེན་སྣ་ཚོགས་བཞུ་བཏུལ་གྱིས་སྐུ་སྨད་ལུགས་སུ་བླུགས་པར་མཛད་པ་ན། སྐུ་སྟོད་རང་བྱུང་མཁའ་སྤྱོད་ནས་ཕེབས་པར་གྲགས་པ་དེར(ད་ལྟ་ཁྲ་འབྲུག་གཙུག་ལག་ཁང་གི་ཡང་སྟེང་དུ་བཞུགས)མི་ལོ་བདུན་བརྒྱ་ལྷག་ཙམ་གྱི་ལོ་རྒྱུས་ཡོད།
གཞན་ཡང་ཤེལ་བྲག་གྲྭ་ཚང་ནི་ཐོག་མར་ཆོས་རྗེ་དུར་ཁྲོད་རས་ཆེན་ནས་ཕྱག་བཏབ་ཅིང་། སྔར་གླིང་རས་བཀའ་བརྒྱད་སྔགས་དགོན་ཡིན་པ་ལ། རྒྱལ་མཆོག་ལྔ་པའི་དུས་རྡོ་རྗེ་བྲག་གི་དགོན་ལག་ཏུ་གྱུར་རྗེས་དེ་བས་རྒྱ་བསྐྱེད་དང་མཛད་འཕྲིན་རྒྱས་པོ་བྱུང་།
ནང་རྟེན་གཙོ་བོ་གུ་རུའི་ཆོས་གོས་ཉི་ཟེར་མར་གྲགས་པ་དང་། ཟ་ཧོར་རྒྱལ་པོས་ལྭ་བའི་གུ་རུའི་དབུ་ཞྭ་དང་། ཞབས་ལྷམ། བྲམ་ཟེ་སྐྱེ་བདུན། དུང་རྣ་ཅན་གྱི་ཕྱག་ངར་སློབ་དཔོན་ཆེན་པོས་ཆང་ཁལ་ལྔ་བརྒྱ་གསོལ་བའི་ཀ་པྭ་ལ་ཡིན་པར་གྲགས་པའི་ཨ་ཡིག་རང་བྱོན། ཨུ་རྒྱན་གྱིས་གཞོང་པ་ལྷ་ཆུར་ངན་འགྲོའི་རྒྱུ་བཟང་བཏོན་པའི་ཕྱག་འཁར་སོགས་རིན་ཐང་བྲལ་བ་མང་དུ་མཆིས།
ད་དུང་ཤེལ་བྲག་ཕུག་གཙོ་བོའི་གཡས་གཡོན་དང་སྟེང་འོག་ཏུ་ངོ་མཚར་ཅན་གྱི་བྲག་ཕུག་མང་པོ་ཡོད་པ་དེ་དག་ནང་དུའང་སྔོན་བྱོན་སྐྱེས་བུ་དམ་པ་མང་པོས་སྒོམ་སྒྲུབ་གནང་མྱོང་ཡོད་པ་དང་། ལྷག་པར་དུ་ཡར་ཀླུང་ཤེལ་བྲག་གི་དུར་ཁྲོད་དེ་ནི་སློབ་དཔོན་ཆེས་པོས་དངོས་སུ་བྱིན་གྱིས་བརླབས་ཞིག་ཡིན་པས་དེར་ཕུང་པོ་བསྐྱལ་ན་ངན་སོང་ལས་ཐར་ཏེ་མཐོ་རིས་གནས་སུ་འཕོས་པ་ནི་ལོ་རྒྱུས་ལས་བསམ་ཡས་མཆིམས་ཕུ་ཡར་ཀླུང་ཤེལ་གྱི་བྲག ཡེར་པ་ཟླ་བ་ཕུག་བཅས་དུར་ཁྲོད་གསུམ། རྒྱ་གར་བསིལ་བ་ཚལ་དང་གཉམ་པའི་ཕྱིར། ཕུང་པོ་བོར་ན་མཁའ་སྤྱོད་གནས་སུ་གཤེགས། ཞེས་གསལ་བ་ལྟར་རོ། །

 

 

ལྷོ་ཁའི་ལྗོངས་རྒྱུ། བེེ་རོ་ཕུག

བེེ་རོ་ཕུག་ནི་བོད་རྒྱལ་ཁྲི་སྲོང་ལྡེ་བཙན་གྱི་དུས་སུ་བོད་ཀྱི་ལོ་ཙྭ་བ་ཆེན་པོ་བེེ་རོ་ཙ་ནས་(རྣམ་པར་སྣང་མཛད)སྒོམ་སྒྲུབ་གནང་མྱོང་བའི་གནས་མཆོག་ཁྱད་པར་ཅན་ཞིག་ཡོད་པས་དེ་ནས་བཟུང་ཁོང་གི་མཚན་བྲག་ཕུག་ལ་ཐོགས་ནས་བེེ་རོ་ཕུག་ཅེས་བརྗོད། དེ་ཡང་ཁོང་འདི་གར་སྒོམ་སྒྲུབ་གནང་ནས་བཞུགས་པ་སློབ་དཔོན་པད་མ་འབྱུང་གནས་ཀྱིས་མཁྱེན་ནས་ཚོད་ལྟའི་ཚུལ་དུ་བྲག་ཕུག་ནང་གི་བྲག་ཐམས་ཅད་མར་འབེབས་གནང་བས། བེེ་རོས་ཕྱག་གཡས་པ་དང་ཞབས་གཡོན་མས་ཕར་ཕུད་ཅིང་། དབུས་ཡར་སྐྱོར་གནང་བ་བཅས་ཀྱི་རང་བྱོན་ཡོད་ཅིང་། སློབ་དཔོན་རིན་པོ་ཆེའང་བེེ་རོའི་མཐུ་རྩལ་ལ་ཡིད་འཕྲོག་ནས་བེེ་རོ་ཙ་ན་ཨོ་རྒྱན་དངོས་དང་མཉམ་ཞེས་གསུང་། ད་དུང་ཁོང་འདི་གར་སྒོམ་སྒྲུབ་གནང་སྐབས་རྗེ་བཙུན་འཇམ་དཔལ་དབྱངས་དངོས་སུ་ཞལ་གཟིགས་པས་ངག་དང་རིག་པའི་དངོས་གྲུབ་ཐོབ་ནས་བསམ་ཡས་སུ་ལོ་ཙཱ་བ་གནང་སྐབས་སུས་འགྲན་མི་ཐུབ་པ་རིག་པའི་ཀློང་རྡོལ་ཞིག་ཏུ་གྱུར། དེས་ན་དུས་ཕྱེས་བྲག་ཕུག་འདིའི་ནང་སྒོམ་སྒྲུབ་བྱེད་པའམ། ཡང་ན་མཆོད་མཇལ་དུ་རྟག་ཏུ་བསྐྱོད་ནང་ངག་དང་རིག་པའི་དངོས་གྲུབ་ཐོབ་ཀྱི་རེད་ཅེས་གྲགས།
དེར་མ་ཟད་ཕུག་འདིའི་ནང་བེེ་རོ་ཙ་ནར་རྒྱུ་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་གསང་སྔགས་རྡོ་རྗེ་ཐེག་པའི་ཉམས་ལེན་ལ་བརྟེན་ནས་གྲུབ་རྟགས་མངོན་སུམ་དུ་ཐོན་ཏེ་རྩ་རླུང་ཐིག་ལེ་རང་དབང་དུ་འདས། ཕྱིས་བློན་ཆེན་ངན་པ་ཚོས་རྒྱལ་པོར་ཕྲ་མ་གསོལ་བས་རྒྱལ་པོ་དབུ་འཐོམས་ཏེ་བེེ་རོ་ཙ་ན་རྒྱལ་མོ་ཚ་བ་རོང་དུ་རྒྱང་འབུད་དུ་བཏང་བའི་སྐབས་ལོ་བརྒྱད་ཅུར་སླེབས་པའི་སྤང་རྒྱན་སངས་རྒྱས་མགོན་པོར་བེེ་རོ་ཙ་ནས་གདམས་ངག་བསྟན་གནང་མཛད་པ་བཞིན་ཉམས་སུ་བླངས་པས་དངོས་གྲུབ་བརྙེས་ནས་ལོ་བརྒྱ་དང་བདུན་ཅུ་གཉིས་སོན་ཐུབ་པ་བྱུང་བ་མ་ཟད་དེ་ལོར་འཇའ་ལུས་སུའང་གཤེགས། གཞན་ཡང་བེེ་རོ་ཕུག་ནང་བཀའ་འགྱུར་གྱི་ཆ་ཤས་རང་བྱོན་དང་། དམ་ཅན་གྱི་ཞལ་འབག་རང་བྱོན་སོགས་ཀྱང་མཇལ་རྒྱུ་ཡོད།
དེ་ཡང་མ་གཞི་ཡར་ཀླུང་ཁུལ་དུ་བྲག་ཕུག་ཧ་ཅང་མང་པོ་ཡོད་ཀྱང་རས་ཆུང་ཕུག་དང་། བེེ་རོ་ཕུག ཤེལ་བྲག་ཕུག་བཅས་ལ་ཡར་ཀླུང་ཕུག་གསུམ་ཞེས་ཟེར་དོན་ནི། རས་ཆུང་ཕུག་ནང་རྣལ་འབྱོར་པ་རས་ཆུང་ལ་སྐུ་ཡི་དངོས་གྲུབ་ཐོབ་པ་དང་། བེེ་རོ་ཕུག་ནང་ལོ་ཆེན་བེེ་རོ་ཙ་ནར་ངག་གི་དངོས་གྲུབ་ཐོབ་པ། ཤེལ་བྲག་ཕུག་ནང་སློབ་དཔོན་པད་མ་འབྱུང་གནས་ལ་ཡིད་ཀྱི་དངོས་གྲུབ་ཐོབ་པ་བཅས་མདོར་ན་གོང་གསལ་ཕུག་གསུམ་ནང་སྐྱེས་ཆེན་དམ་པ་གསུམ་ལ་ལུས་ངག་ཡིད་གསུམ་གྱི་དངོས་གྲུབ་ཐོབ་པས་ཕུག་དེ་གསུམ་ལ་ཡར་ཀླུང་ཕུག་གསུམ་ཞེས་མཚན་གསོལ་ལོ། །

བརྒྱུད་སྐུལ།

མཆན་སྤེལ།