ལྷོ་ཁའི་ལྗོངས་རྒྱུ། རྩ་ཐང་དཀར་མོ་གླིང་།

ལྷོ་ཁའི་ལྗོངས་རྒྱུ། རྩ་ཐང་དཀར་མོ་གླིང་།
བོད་ས་ཁུལ་ཡོངས་སུ་སྐད་གྲགས་ཡོད་པའི་རྩྭ་ཐང་དཀར་མོ་གླིང་ནི་ལྷོ་ཁ་སྣ་དཀར་རྩེ་རྫོང་ཁོངས་ཡར་འབྲོག་གཡུ་མཚོའི་ཉེ་འགྲམ་དུ་ཡོད་ཅིང་།  མཚོ་མོའི་ཁོར་ཡུག་ཏུ་ཆགས་པའི་རི་རྣམས་བཟོ་བོ་མཁས་པས་ཆེད་དུ་བཅོས་པ་ལྟ་བུའི་རི་དཔྱད་ལེགས་ཤིང་།  ས་མཐོའི་ཁྱད་ལྡན་གྱི་རྩི་ཤིང་སྤ་མ་རུམ་འཐག་མཁས་པས་ས་གདན་ཆེད་དུ་བཏགས་པ་བཞིན་རིང་ཐུང་སྤུ་ཙམ་མེད་པར་མགོ་གྲ་སྙོམས་པའི་རང་བྱུང་ལྷུན་གྱིས་གྲུབ་པའི་མཛེས་ཆོས་ལྟ་བས་མི་ངོམས་པས་བརྒྱན་པའི་རི་ཆུང་གཉིས་ཡོད་པ་གཅིག་གི་མིང་ལ་སྡེ་རྒྱ་ཟེ་བ་ཟེར་བའི་རི་གཤམ་དུ་དྭངས་ཤིང་གཙང་བའི་ཆུ་མིག་ཅིག་ཡོད་པ་དེའི་ལྷོ་ངོས་དཀར་གླིང་གཞུང་ཆུ་ཞེས་པའི་ཆུ་མདོག་གཞན་དང་མི་འདྲ་བ་ཆུ་མོ་ཞིག་ལྷུང་ལྷུང་རྒྱུ་བའི་ནང་།

སྣ་རིགས་མི་གཅིག་པའི་ཉ་མོ་མང་བའི་ཉ་མོ་མང་པོ་ཡར་རྒྱུགས་མར་རྒྱུགས་བྱེད་པའི་ངོ་མཚར་ལྟད་མོ་སྐྱེ་བོའི་མིག་ལམ་དུ་འཆར་བ་དང་།  ཆུ་འགྲམ་དུ་བསངས་ཤིང་འཁན་དཀར་མི་ཚད་ལོན་པ་མཐུག་པོར་སྐྱེ་བའི་ཁྲོད་སེམས་ཅན་སྤུ་ནག་གཡག་རྒན་ཡང་གཞན་གྱིས་མཐོང་བར་དཀའ་བ་དེ་ལྟ་བུ་ནི་བོད་ཡོངས་སུ་ཧ་ལམ་མེད་ཅེས་བཤད་ཆོག

གཞན་ཡང་རྩྭ་ཐང་དེ་ནི་ས་རྒྱ་ཡངས་ཤིང་ཁོད་སྙོམས་ལ་རྩྭ་བཅུད་རབ་ཏུ་ཆེ་བ་ཟད་རྩྭའི་སྐྱེ་ཁ་བཟང་བ་ཧ་ལས་དགོས་པ་ཞིག་ཡོད་པ་སྟེ།  དགོང་མོ་རྩྭ་ཐང་སྟེང་ཇ་ཕོར་ཁ་སྦུབས་སློག་ནས་བཞག་ན་གཞོགས་པ་ཇ་ཕོར་རྩྭ་ཡིས་བཀྱག་ནས་གན་རྒྱལ་ལོག་ནས་སྡོད་ཀྱི་ཡོད་པས་རྩྭ་ཐང་སྐྱེ་ཁ་བཟང་བ་དེ་འདྲ་བོད་ལྗོངས་ཡོངས་སུ་མེད་སྟབས་སྔར་བོད་ས་གནས་སྲིད་གཞུང་གི་གཞུང་རྟ་ཆེད་དུ་རྩ་ཐང་དེའི་སྟེང་འཇོག་གི་ཡོད་པ་ལས། སེམས་ཅན་གཞན་དག་ཕར་བཞག བྱ་དང་བྱིའུའང་བབས་མི་ཆོག་ཅེས་པའི་བཀའ་རྒྱ་ནན་པོ་གཏང་ཡོད།

ད་དུང་རྩ་ཐང་དེའི་མཛེས་སྡུག་རྣམ་པར་བཀྲ་བའི་མེ་ཏོག་སྣ་ཚོགས་དང་། བྱ་བྱིའུ་སྣ་ཚོགས། རི་དྭགས་དང་གཅན་གཟན་སྣ་ཚོགས་སོགས་ཡོད་པས་རྩ་ཐང་དེ་ནི་མ་བཅོས་རང་བྱུང་ལྷུན་གྱིས་གྲུབ་པའི་ཡུལ་སྐོར་མཛེས་ལྗོངས་ཆེས་ཕུལ་དུ་བྱུང་བ་ཞིག་ཡིན་ནོ། །

 རྩོམ་པ་པོ། མཁས་གྲུབ་ཀྱིས་བརྩམས།

བརྒྱུད་སྐུལ།

མཆན་སྤེལ།