སངས་རྒྱས་དང་རྒྱན་དྲུག་མཆོག་གཉིས་ཀྱི་རྣམ་ཐར།

སངས་རྒྱས་དང་རྒྱན་དྲུག་མཆོག་གཉིས་ཀྱི་རྣམ་ཐར།
 

སངས་རྒྱས་ཤཱཀྱ་ཐུབ་པ། 

སངས་རྒྱས་བཅོམ་ལྡན་འདས་ལ་ཕྱགས་འཚལ་ལོ། ད་ལྟ་ནས་བརྩིས་པའི་ལོ་ཉིས་སྟོང་དྲུག་བརྒྱ་ལྷག་ཙམ་གྱི་གོང་དུ་རྒྱ་གར་བྱང་ཕྱོགས་སུ་ཤཱཀྱའི་རིགས་རྒྱུད་ཀྱི་རྒྱལ་པོ་ཟས་གཙང་ཞུ་བ་ཞིག་བྱུང༌། ཁོང་གིས་རྒྱ་གར་བྱང་ཕྱོགས་རྣམས་ལ་དབང་བསྒྱུར་བ་དང༌། རྒྱལ་པོ་ཟས་གཙང་ལ་བརྩུན་མོ་གཉིས་ཡོད། བརྩུན་མོ་ཆེ་བའི་མཚན་ལ་སྒྱུ་མ་ལྷ་མཛེས་དང༌། ཆུང་བའི་མཚན་ལ་སྐྱེ་དགུའི་བདག་མོ་ཞེས་ཟེར། ཡིན་ནའང་བཙུན་མོ་དེ་གཉིས་ལ་ཡུན་རིང་སྲས་མ་བྱུང༌། རྒྱལ་སྲིད་སྐྱོང་བར་སྲས་ངེས་པར་དུ་དགོས་པར་བརྟེན་རྒྱལ་པོ་ཟས་གཙང་གིས་ཡར་དཀོན་མཆོག་མཆོད་པ་འབུལ། མར་དབུལ་ཕོངས་ལ་སྦྱིན་པ་བཏང་པས། དེའི་རྗེས་མཚན་གཅིག་བཙུན་མོ་སྒྱུ་མ་ལྷ་མཛེས་ཀྱི་རྨི་ལམ་དུ། གླང་པོ་ཆེའི་ཕྲུ་གུ་ཁ་དོག་ཐལ་དཀར་མཆེ་བ་དྲུག་ཡོད་པ་གཅིག་དང༌།

 

        བཀྲག་མདངས་ཆེ་བའི་སྐར་ཆེན་ཟུར་དྲུག་ཡོད་པ་ཞིག་རང་གིས་ལུས་ལ་ཐིམ་པའི་རྨི་ལམ་བྱུང༌། དེ་ནས་བཟུང་ཡུམ་སྒྱུ་མ་ལྷ་མཛེས་སྦྲུམ་མ་དང་ལྡན་པར་གྱུར། དེ་རྗེས་སྲས་འཁྲུངས་པའི་དུས་སུ་ཉེ་བ་ན། རང་གི་ཡབ་ཀྱི་རྒྱལ་གཞིས་སུ་ཕེབས་པའི་ལམ་དུ་ལུམ་བྷི་ནི་ལྡུམ་རའི་ནང་བཙུན་མོ་སྒྱུ་མ་ལྷ་མཛེས་ལ་སྲས་ཤིག་འཁྲུངས་སོ། སྲས་དེ་འཁྲུངས་མ་ཐག་ཕྱོགས་བཞིའི་ས་སྟེང་དུ་གོམ་པ་བདུན་རེ་སྤོས་པ་དང༌། གོམ་པ་རེ་ལ་མེ་ཏོག་རེ་སྐྱེས་པས། མི་ཚང་མར་ཡ་མཚན་ཆེན་པོ་སྐྱེས་སོ། དེ་ནས་ཡབ་རྒྱལ་པོས་ད་ནི་བསམ་པའི་དོན་ཐམས་ཅད་གྲུབ་སོང་ཞེས་གསུངས་ཏེ་མཚན་ཡང་གཞོན་ནུ་དོན་གྲུབ་ཅེས་བཏགས། དེ་ནས་ཉིན་བདུན་གྱི་རྗེས་ཕོ་བྲང་དུ་གདན་དྲངས་ཏེ་བྲམ་ཟེ་མཚན་མཁན་ལ་བསྟན་པས་ཁྱིམ་དུ་བཞུགས་ན་འཁོར་ལོས་སྒྱུར་བའི་རྒྱལ་པོ་དང༌། རབ་ཏུ་བྱུང་ན་སངས་རྒྱས་སུ་འགྱུར་ཞེས་ལུང་བསྟན། སྲས་འཁྲུངས་ནས་ཉི་མ་ཁ་ཤས་ཀྱི་རྗེས་སུ༌། ཡུམ་སྒྱུ་མ་ལྷ་མཛེས་གྲོངས། བཙུན་མོ་ཆུང་བ་སྐྱེ་དགུའི་བདག་མོས་རྒྱལ་སྲས་དོན་གྲུབ་གསོ་སྐྱོང་མཛད། རྒྱལ་སྲས་དོན་གྲུབ་ལ་ཆུང་ངུའི་དུས་ནས་བྱིས་པ་གཞན་དང་མི་འདྲ་བའི་ཁྱད་ཆོས་མང་པོ་ཡོད། རྒྱལ་སྲས་ཀྱིསརྩེད་ཆས་དང༌། རྩེད་གྲོགས་སོགས་ལ་དོ་སྣང་མི་གནང་བར་རྟག་ཏུ་སྒོམ་རྒྱག་ཚུལ་དང༌། ཏིང་ངེ་འཛིན་ལ་མཉམ་པར་བཞག་ཚུལ་སོགས་ཁོ་ན་མཛད་པས། དེ་ལ་ཡབ་རྒྱལ་པོ་དང་བཙུན་མོ་གཉིས་ཀ་ཐུགས་མ་བདེ་བ་བྱུང༌།

རྒྱལ་སྲས་དེ་གཞོན་ནུའི་ན་ཚོད་ལ་ཕེབས་པ་དང༌། ནགས་ཚལ་དུ་སྐྱོ་སངས་ལ་ཕེབས་པའི་ཚེ་རང་གི་ཉེ་འགྲམ་ནས་རི་དྭགས་དང༌། གཅན་གཟན་སོགས་ཕར་འགྲོ་ཚུར་འོང་བྱེད་པ་གཟིགས་ཀྱང་གནོད་འཚེ་མི་མཛད་པ་དང༌། བྱམས་པ་དང༌། བརྩེ་བ་ཆེན་པོས་རང་འདོད་ལྟར་འགྲོར་བཅུག་པ་སོགས་མི་རྣམས་ཀྱིས་ཁྱད་ཆོས་དང༌། ཡོན་ཏན་མང་པོ་བཐོང༌། རང་གི་ཆིབས་རྟ་ཐང་ཆད་དེ་དབུགས་ཧལ་བ་གཟིགས་ཚེ་ཆིབས་རྟ་ལས་བབས་ཏེ་དེ་ལ་བྱམས་བརྩེ་ཆེན་པོས་བྱུག་བྱུག་མཛད་པ་དང༌། རྡུལ་དང་རྔུལ་ནག་ཕྱིས་པ་སོགས་སེམས་ཅན་ཚང་མར་བྱམས་བརྩེ་ཆེན་པོས་སྐྱོང་བར་མཛད་པ་ལས། གདུག་རྩུབ་དང་འཚེ་བ་ནམ་ཡང་མ་མཛད། ཉིན་གཅིག་རང་གི་ཕུ་བོ་ལྷས་བྱིན་གྱིས་ངང་པ་ལ་མདའ་བརྒྱབས་ཏེ་ཕོ་བྲང་གི་ལྡུམ་རའི་ནང་ལྷུང་བ་གཟིགས། གཞོན་ནུ་དོན་གྲུབ་ཀྱིས་ངང་པ་རྨས་མ་དེའི་ལུས་ནས་མདའ་ཕྱིར་འཐེན་ཏེ་རྨ་རྣམས་ཆུས་འཁྲུས་པ་དང༌། བྱམས་བརྩེ་ཆེན་པོས་རང་གི་པང་དུ་ཉར་བར་མཛད༌། ལྷས་བྱིན་ཡོང་ནས་འདི་ངའི་ངང་པ་ཡིན་པས། དེ་ང་ལ་དགོས་ལབ་པར། ངང་པའི་བདག་པོ་ནི་ངང་པ་རང་ཉིད་ཡིན་པ་ལས། དེ་ལ་གནོད་པ་བྱེད་མཁན་ནི་དེའི་བདག་པོ་ཡིན་མི་སྲིད། ཅེས་གསུངས་ཏེ། ངང་པ་ལྷས་བྱིན་ལ་མ་གནང་བར་གསོ་སྐྱོང་མཛད། རྗེས་སུ་རྨ་གསོས་པ་དང་ངང་པ་དེ་ནམ་མཁའ་ལ་གློད་དེ་རང་གི་ཁྱུ་དང་མཉམ་དུ་འཕུར་རོ། རྒྱལ་སྲས་དོན་གྲུབ་དགུང་ལོ་དར་མ་ཆགས་པ་དང༌།        ཡབ་རྒྱལ་པོ་ཟས་གཙང་མས་གཞོན་ནུ་དོན་གྲུབ་ལ་བཙུན་མོ་འདམ་པའི་ཆེད་དུ་ཉེ་འཁོར་གྱི་རྒྱལ་ཁབ་རྣམས་ཀྱི་མཛེས་སྡུག་ལྡན་པའི་རྒྱལ་པོའི་སྲས་མོ་རྣམས་འཛོམས་པའི་དགའ་སྟོན་གྱི་སྟོན་མོ་བཤམས། དེའི་སར་རྒྱལ་སྲས་དོན་གྲུབ་ཀྱིས་སྲས་མོ་གྲགས་འཛིན་མ་ལ་རང་གི་སྐེ་རྒྱན་ནོར་བུའི་ཕྲེང་བ་གཡོགས་ཏེ་བཙུན་མོར་བདམས། སྲས་མོ་གྲགས་འཛིན་མ་བཙུན་མོར་ཐོབ་ཆེད་ད་དུང་རྒྱལ་སྲས་གཞན་རྣམས་དང་མདའ་རྩལ་འགྲན་པ་དང༌། རྟ་རྒྱུག་པ་སོགས་སྟོབས་ཀྱི་སྒྱུ་རྩལ་ཚང་མ་ལས་རྒྱལ་བ་དང༌། རྒྱལ་སྲས་དོན་གྲུབ་ཀྱིས་གཞན་གྱིས་བཀུག་མ་ཐུབ་པའི་གཞུ་མོ་ཆེ་བཀུག་སྟེ། མདས་ལྕགས་ཀྱི་སླ་ང་བདུན་དང༌། སྡོང་པོ་བདུན་དུས་གཅིག་ལ་ཕུག་པར་མཛད་པ་སོགས་རྒྱལ་སྲས་དོན་གྲུབ་ལ་འགྲན་ཐུབ་མཁན་གཞན་སུ་ཡང་མ་བྱུང༌།        དེ་ནས་ཕོ་རྩལ་སྣ་དགུ་སྟེ། ལུས་ཀྱི་རྩལ་ནི། འཐེབ་ཀྱི་ཤ་ནོན་པ༌། རྐྱལ་གྱིས་ཆུ་ཆེན་ཆོད་པ། ཡང་རྩལ་བྱ་ལྟ་བུ་དང༌། ངག་གི་རྩལ་ནི། ལོ་རྒྱུས་གྱི་དགེ་ཐོན་པ། གཏམ་གྱིས་བཞད་གད་ཐོན་པ། གཤགས་ཀྱིས་ཕ་རོལ་ནོན་པ་བཅས་དང༌། ཡིད་ཀྱི་རྩལ་ནི། མཛངས་ལ་བློ་འགྱུ་བ། དཔའ་ལ་བསྲན་ཚུགས་པ། ཁ་གསལ་ཞིང་གཏིང་མི་དཔོག་པ་བཅས་སྒྱུ་རྩལ་ཐམས་ཅད་ལས་རྒྱལ་ཁ་ཐོབ་པར་བརྟེན་གཞོན་ནུ་དོན་གྲུབ་ཀྱི་མགུལ་ལ་སྲས་མོ་གྲགས་འཛིན་མས་རྒྱལ་ཁའི་མེ་ཏོག་གི་ཕྲེང་བ་བསྒྲོན། དེ་རྗེས་བག་སྟོན་གྱི་རྟེན་འབྲེལ་རྒྱ་ཆེན་པོ་མཛད་དེ། བཙུན་མོའི་འཁོར་ལ་དགྱེས་པར་རོལ་བར་མཛད་དོ། རྒྱལ་སྲས་དོན་གྲུབ་འཁྲུངས་པའི་སྐབས་རྩིས་མཁན་གྱི་ལུང་བསྟན་དུ། རྒྱལ་སྲས་འདི་ཆེར་ལོངས་པ་ན། ཡང་ན་འཁོར་ལོས་སྒྱུར་བའི་རྒྱལ་པོ་ཞིག་ཏུ་འགྱུར་རམ། ཡང་ན་འཁོར་བ་ལ་ཆགས་ཞེན་བྲལ་བའི་སེམས་དཔའ་ཆེན་པོ་ཞིག་ཏུ་འགྱུར་རོ། ཞེས་ལུང་བསྟན་པ་ལྟར། རྒྱལ་སྲས་དོན་གྲུབ་ཀྱིས་འཁོར་བའི་སྡུག་བསྔལ་ལ་ཡིད་འབྱུང་སྐྱེས་ཏེ་ཆོས་ལ་ཤོརདྭོགས་ནས། ཡབ་རྒྱལ་པོ་ཟས་གཙང་གིས་རྒྱལ་སྲས་དོན་གྲུབ་ཕོ་བྲང་གི་ཕྱི་རོལ་དུ་ཕེབས་མ་བཅུག་པ་དང༌། རྒས་འཁོགས་དང༌། ནད་གཅོང་སོགས་ཕོ་བྲང་གི་ར་བའི་ནང་དང༌། ཉེ་འཁོར་དུ་ཡོང་མི་ཆོག་པའི་ཁྲིམས་བཟོས། ཐེངས་གཅིག་རྒྱལ་སྲས་དོན་གྲུབ་གྲོང་ཁྱེར་ལ་གཟིགས་སྐོར་དུ་ཕེབས་འདོད་ཡོད་ཚུལ་གསྲུངས་པ་དང༌། ཡབ་རྒྱལ་པོས་གྲོང་ཁྱེར་ཡོང་རྫོགས་ལ་གཟབ་མཆོར་རྒྱ་ཆེན་པོ་བཤམ་དུ་བཅུག་ནས་རྒྱལ་སྲས་ཤིང་རྟའི་ནང་དུ་བཞུགས་ཏེ་གྲོང་ཁྱེར་ལ་ཕེབས། དེའི་སྐབས་གྲོང་ཀྱེར་གྱི་ཕྱོགས་གཅིག་ན་ལུས་འཁར་བ་ལ་བརྟེན་པའི་མི་རྒས་འཁོགས་ཤིག་གཟིགས་ཏེ་རྒ་བའི་སྡུག་བསྔལ་གྱི་གནས་ལུགས་རྣམས་གཟིགས།        ཡང་ཐེངས་གཅིག་ཚོང་པའི་ཆས་སུ་བརྫུས་ནས་གྲོང་ཁྱེར་ལ་ཕེབས་སྐབས། གཟུགས་པོ་ཡོངས་རྫོགས་རྨ་ཡིས་ཁྱབ་པའི་མི་ནད་པ་ཞིག་གཟིགས་ཏེ་ན་བའི་སྡུག་བསྔལ་རྣམས་གཟིགས། དེ་གཟིགས་པ་དངརྒྱལ་སྲས་ཀྱི་ཐུགས་ལ་སྙིང་རྗེ་ཚད་མེད་འཁྲུངས་ཤིང༌། ནད་པ་དེའི་ལུས་བརྐྱོར་ནས་རོགས་པ་དང་བྱམས་སྐྱོང་ཚད་མེད་མཛད། ཐེངས་གསུམ་པར༌། སླར་ཡང་ཤིང་རྟའི་ནང་གྲོང་ཁྱེར་ལ་ཕེབས་པ་དང༌། མི་ཤི་བའི་རོ་ཞིག་འཁྱེར་འགྲོ་བ་གཟིགས་པས་འཆི་བའི་སྡུག་བསྔལ་དང༌། སྐྱེ་བའི་རྡུག་བསྔལ་གཟིགས༌། ཐེངས་བཞི་པར་དགེ་སློང་གི་ཆ་བྱད་ཅན་ཞིག་གཟིགས་པས་ཐུགས་ལ་སྤྲོ་བ་ཚད་མེད་སྐྱེས་ནས་འཁོར་བའི་སྡུག་བསྔལ་ལ་སྐྱོ་ཤས་ཚད་མེད་འཁྲུངས། འགྲོ་བ་སེམས་ཅན་ཚང་མ་སྐྱེ་རྒ་ན་འཆིའི་སྡུ་བསྔལ་ལས་ཐར་བའི་ཐབས་ནི་ཆོས་ཡང་དག་པ་ཞིགས་སྒྲུབ་པ་ལས་གཞན་མེད་པ་དང༌། མདོར་ན༌། ལུས་ཀྱི་སྟོབས་ཤུགས་དང༌། མཛེས་སྡུག་ལང་ཚོ་བཅས་ཀྱང་རིམ་པས་ཉམས་ཏེ༌། ཉིན་གཅིག་མི་འདོད་ཞིན་དུ་འཆི་བདག་གཤིན་རྗེའི་ཞགས་པའི་འཆིང་བ་ལས་ཐར་ས་མེད་པའི་གནས་ལུགས་རྣམས་མཁྱེན། དེ་ནས་རྒྱལ་སྲས་དོན་གྲུབ་ཀྱིས་ཚེ་འདིའི་བདེ་བ་ལ་ཆགས་ཞེན་སྤོང་བ་དང༌། འཁོར་བའི་སྡུག་བསྔལ་ལས་ཐར་བའི་ཐབས་ལམ་ཞིག་རྙེད་པའི་ཐབས་ཤེས་ཁོ་ན་ཐུགས་ལ་འཁོར༌། མཐར་འཁོར་བ་ནི་དུག་སྦྲུལ་གྱི་ཚང་ལྟ་བུར་གཟིགས་ཏེ། ཡང་དག་པའི་ལམ་དང༌། ཡང་དག་པའི་བདེན་པ་འཚོལ་བའི་ཕྱིར་རང་གི་རྒྱལ་སྲིད་སྤོང་རྒྱུའི་དམ་བཅའ་བརྟེན་པོ་ཐུགས་ལ་བཀོད། ཉིན་ཞག་བདུན་རིང་ཉིན་མཚན་མེད་པར་རྒྱལ་སྲས་བསྲུངས་ཀྱང༌། ཞག་བདུན་གྱི་མཐའ་མར་སྲུང་མཁན་རྣམས་མ་རྣམས་མཚན་མོ་ཡུད་ཙམ་གཉིད་ལ་སོང་བའི་སྐབས་རང་གི་བཙུན་མོ་གྲགས་འཛིན་མ་དང༌།        སྲས་སྒྲ་ཅན་འཛིན་གཉིས་ཀྱིས་ཀྱང་མ་མཁྱེན་པར་རྒྱལ་སྲིད་སྤངས་ནས་ཕོ་བྲང་གི་ཕྱིར་གཤེགས་སོ། རྒྱལ་སྲས་གཞོན་ནུ་དོན་གྲུབ་ཀྱིས་རང་གི་ཆིབས་རྟ་ལ་ཆིབས་ཏེ་མཆོད་རྟེན་རྣམ་དག་གི་ཕྱོགས་སུ་ཕེབས། རྒྱལ་སྲས་དང་ལྷན་དུ་རང་གི་ཤིང་རྟའི་ཁ་ལོ་པ་འདུན་པ་ཟེར་བ་ལས་གཞན་སུ་ཡང་མེད། ཆུ་བོ་ཨ་ན་མ་ཞེས་པ་བརྒལ་ཏེ་ཕེབས་པའི་དུས་སུ་ཤིང་རྟའི་ཁ་ལོ་པས་རྒྱལ་སྲས་ཀྱི་ཆིབས་རྟའི་མཇུག་མ་ལ་འཇུས་ནས་ཁོ་ཡང་ཆུ་བོའི་ཕ་རོལ་དུ་སླེབས་ཐུབ་པ་བྱུང༌། ཆུ་བོ་ཨ་ན་མ་བརྒལ་ཏེ་མཆོད་རྟེན་རྣམ་དག་དྲུང་དུ་ཕེབས་པ་དང༌།        རང་གི་རལ་གྲི་ཤུབས་ནས་བཏོན་ཏེ་རང་ཉིད་ཀྱི་དབུ་སྐྲ་བཅད། དཔྲོག་ཞུ་དང༌། ན་བཟའ། རིན་པོ་ཆེའི་མགུལ་རྒྱན། ཆིབས་རྟ་བཅས་ཤིང་རྟའི་ཁ་ལོ་པར་གནང་སྟེ་རྒྱལ་གཞིས་སུ་ཕྱིར་སློག་གནང༌། ཡང་དག་པའི་ལམ་དང༌། ཡང་དག་པའི་ལྟ་བ། ཡང་དག་པའི་ཆོས་འཚོལ་བའི་ཆེད་དུ། རྒྱལ་སྲས་དོན་གྲུབ་ཀྱིས་དབེན་པའི་གནས་དང༌། ནག་ཚལ། གྲོང་དང་གྲོང་ཁྱེར་སོགས་ས་གནས་མང་པོར་ཕེབས་ནས་བྲམ་ཟེ་དང༌། སློབ་དཔོན་མང་པོའི་དྲུང་དུ་ཕེབས་ཏེ་སློབ་སྦྱོང་དང༌།       ཐོས་བསམ་མཛད། ས་ཕྱོགས་དེ་དག་ན་བཞུགས་པའི་བྲམ་ཟེ་དང་སློབ་དཔོན་མང་པོས་གཞོན་ནུ་དོན་གྲུབ་ལ་གུས་བསུ་དང༌། སྣེ་ལེན༌། ཞབས་ཏོག་རྒྱ་ཆེན་པོ་ཞུས། གཞོན་ནུ་དོན་གྲུབ་ཀྱིས་བྲམ་ཟེ་དང༌། སློབ་དཔོན་མང་པོ་བསྟེན་ཡང་སུས་ཀྱང་ཡང་དག་པའི་ལམ་དང༌། ཡང་དག་པའི་ལྟ་བ་སྟོན་མ་ཐུབ་པར་བརྟེན་ཡང་དག་པའི་བདེན་པ་འཚོལ་བའི་ཆེད་རྒྱ་གར་རྡོ་རྗེ་གདན་དང་ཉེ་བར་ཡོད་པའི་ཆུ་བོ་ནཻརཉ྄ཛན་ཞེས་པའི་འགྲམ་དུ་ཉིན་རེར་འབྲུ་རྡོག་རེ་དང༌། ཆུ་ཐིག་པ་རེ་བཞེས་ཏེ་ལོ་དྲུག་གི་རིང་དཀའ་བ་དྲག་པོ་སྤྱད། རང་གི་སྐུ་ལུས་ཡོངས་རྗོགས་ཀེང་རུས་ལྟ་བུར་གྱུར་ཀྱང་ཡང་དག་པའི་ལམ་དང༌། ལྟ་བ། བདེན་པ་བཅས་ཀྱི་གནས་ལུགས་གང་ཡང་མཁྱེན་མ་ཐུབ། ཉིན་གཅིག་ཤིང་ནགས་ཀྱི་ནང་ནས་སྤྲུལ་པའི་བུད་མེད་གར་མཁན་མ་ཁག་གཅིག་སླེབས་ཏེ་གཞས་དང༌། ཞབས་བྲོ་འཁྲབ། གཞས་ཚིག་ཏུ་སྒྲ་སྙན་གྱི་རྒྱུད་སྐྱུད་ཧ་ཅང་དམ་དྲགས་ན་ཆད་པར་འགྱུར་ལ། ཧ་ཅང་ལྷུག་དྲགས་ན་གདངས་མི་འབྱིན༌། ཟེར་བས་ངལ་ཞིང་དུབ་པའི་མཐའ་དང༌། འདོད་པ་བསོད་ཉམས་ཀྱི་མཐའ་གཉིས་སྤོངས་ཞེས་བསྐུལ་བ་ཡིན་པར་མཁྱེན་ཏེ། མཐའ་གཉིས་སུ་མ་ལྷུང་པའི་སྤྱོད་པ་བསྟེན་དགོས་པ་མཁྱེན། ལོ་དྲུག་གི་དཀའ་ཐུབ་ལས་བཞེངས་ཏེཤིང་ན྄ཡ་གྲོ་དེའི་སྡོང་པོའི་འོག་ཏུ་བཞུགས༌། དེར་སྔོན་ལེགས་སྐྱེས་མ་ཟེར་བའི་བུ་མེད་གཅིག་གིས་ཤིང་གི་ལྷ་ལ་སྨོན་ལམ་བརྒྱབས་ཏེ༌། རང་ལ་བུ་ཞིག་གི་དངོས་གྲུབ་གནང་ན་ཤིང་གི་ལྷ་ལ་འོ་བྲས་ཀྱི་མཆོད་པ་འབུལ་རྒྱུའི་ཁས་ལེན་བྱས་ཡོད་པ་དེས། ཉིན་གཅིག་ཤིང་དེའི་འོག་ཏུ་སྔར་མཐོང་མ་མྱོང་བའི་མི་ཞིག་ཡོད་པ་མཐོང་བ་དང༌།        ད་ནི་ཤིང་གི་ལྷས་རང་ཉིད་ལ་དོངས་སུ་ཞལ་གཟིགས་གནང་བར་བསམས་ཏེ། གུས་པ་ཆེན་པོས་བ་མཆོག་སྟོང་གི་འོ་མ་ཉིང་ཁུར་བྱས་པའི་འོ་བྲས་ཀྱི་མཆོད་པ་འཕུལ། ལེགས་སྐྱེས་མས་ཕུལ་བའི་འོ་འབྲས་མཆོད་རྗེས་སྐུ་གཟུགས་སྔར་ལྟར་གསོས། ཉིན་གཅིག་བྲམ་ཟེ་རྩཱ་ཚོང་གི་ཁྱེའུ་བཀྲིས་ཟེར་བས་རྩཱ་ཀུ་ཤའི་ཁྲེས་པོ་འཁྱེར་ཏེ་འགྲོ་བ་གཟིགས་པ་དང༌། རྒྱལ་སྲས་དོན་གྲུབ་ཀྱིས་བཀའ་བསྩལ་བ་ལྟར། རྩཱ་ཀུ་ཤའི་ཆག་པ་ཕུལ་བ་བཞུགས་གདན་མཛད་ཅིང༌། གདན་ཐོག་གཅིག་ལ་འཚང་རྒྱ་བའི་རྟེན་འབྲེལ་ལེགས་པར་འགྲིགས། དེ་ནས་ཀུ་ཤའི་ཆག་པ་གདན་ལ་བཏིང་ནས་རྡོ་རྗེ་གདན་གྱི་བྱང་ཆུབ་ཤིང་ལ་སྐུ་རྒྱབ་མཛད། སངས་རྒྱས་ཀྱི་གོ་འཕང་རིན་པོ་ཆེ་མ་ཐོབ་བར་གདན་དེ་ལས་མི་བཞེངས་པའི་དམ་བཅའ་བརྟན་པོ་མཛད། གཞོན་ནུ་དོན་གྲུབ་ཀྱིས་དམ་བཅའ་བརྟན་པོ་བཞག་པ་དེ་བདུད་རྡིག་ཏོ་ཅན་རྣམས་ཀྱིས་ཤེས་ཏེ་ཆོས་ལ་བར་ཆད་གཏོང་ཆེད་ལ་ལས་མེ་སྤོར་བ་དང༌། ལ་ལས་རྡོ་ཆར་འབེབས་པ། ལ་ལས་མཚོན་ཆ་རྣ་ཆོགས་ཀྱི་ཆར་འབེབས་པ། ལ་ལས་གར་མཁན་མར་སྤྲུུལ་ཏེ་རྣམ་འགྱུར་སྣ་ཚོགས་བསྟན་ཡང༌། རྒྱལ་སྲས་དོན་གྲུབ་ཀྱི་ཐུགས་ལ་འཇིགས་པ་དང༌། གཡོ་བ་སྤུ་ཙམ་མེད་པར་ཏིང་ངེ་འཛིང་ལ་མཉམ་པར་བཞག །ཐུགས་ལ་ཁྲོ་བ་ཙམ་ཡང་མེད་པར་སྙིང་རྗེ་ཆེན་པོ་འཁྲུངས་པས༌། བདུད་ཀྱི་རྡོ་ཆར་དང༌། མཚོན་ཆ་རྣམས་མེ་ཏོག་གི་ཆར་པར་གྱུར་ཏེ་སྐུ་ལུས་ལ་གནོད་པ་ཕྲ་མོ་ཙམ་ཡང་མ་བྱུང༌། དེ་ལྟར་རྒྱལ་སྲས་དོན་གྲུབ་ཀྱིས་རྡོ་རྗེ་གདན་གྱི་བྱང་ཆུབ་ཤིང་ལ་སྐུ་རྒྱབ་བརྟེན་པར་མཛད་ནས་མཉམ་པར་བཞག །མཐར་ས་ག་ཟླ་བའི་ཚེས་བཅོ་ལྔའི་སྲོད་ལ་བདུད་བཏུལ། གུང་ལ་མཉམ་པར་བཞག །ཐོ་རངས་ལ་མངོན་པར་རྫོགས་པ་ སངས་རྒྱས་ནས་བདེན་པ་བཞི་སྟེ། སྡུག་བསྔལ་བདེན་པ༌། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་བཅས་བདེན་པ་བཞིའི་གནས་ལུགས་རྣམས་ཡང་དག་པར་ཐུགས་ལ་རྟོགས་ནས་སངས་རྒྱས་ཀྱི་གོ་འཕང་རིན་པོ་ཆེ་དངོས་སུ་ཐོབ་བོ། སངས་རྒྱས་ཀྱི་གོ་འཕང་ཐོབ་པའི་རྗེས་སུ་ཡུལ་རྦཱ་རཱ་ཎ་སིར་ཕེབས། དེར་དྲང་སྲོང་ལྷུང་བ་རི་དྭགས་ཀྱི་ཚལ་༼ དལྟའི་སཱར་ནཱཐ་༽ ཞེས་པར་སློབ་མའི་ཐོག་མ་འཁོར་ལྔ་སྡེ་བཟང་པོ་ལ་བཀའ་དང་པོ་བདེན་བཞིའི་ཆོས་ཀྱྀ་འཁོར་ལོ་བསྐོར་བར་མཛད། འཁོར་ལྔ་སྡེ་རྣམས་ནི་སངས་རྒྱས་རང་ཉིད་སྔར་ཡང་དག་པའི་ལམ་འཚོལ་བའི་སྐབས་ཀྱི་ཆོས་གྲོགས་བྲམ་ཟེ་ལྔ་ཡོད་པ་དེ་རྣམས་ཡིན།       ཁོང་རྣམས་ལ་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའིཆེད་ཡང་དག་པའི་ལམ་བཟང་བསྟན་པར་མཛད། དེ་ནས་རིམ་བཞིན་སློབ་མའི་ཚོགས་ཇེ་མང་དུ་ཕྱིན། ཡུལ་ལྦཱ་རཱ་ཎ་སིར་བཀའ་དང་པོ་བདེན་པ་བཞི་ལས་བརྩམས་པའི་ཆོས་འཁོར་མང་དུ་བསྐོར་བར་མཛད། བདེན་པ་བཞི་ནི་ ༡ སྡུག་བསྔལ་བདེན་པ། ༢ ཀུན་འབྱུང་བདེན་པ། ༣ འགོག་པའི་བདེན་པ། ༤ ལམ་གྱི་བདེན་པ་བཅས་སོ།

བདེན་པ་བཞིའི་གནས་ལུགས་ཡང་དག་རྟོགས་པའི་འཕགས་པའི་ལམ་ཡན་ལག་བརྒྱད་ནི། ༡ ཡང་དག་པའི་ལྟ་བ། ༢ ཡང་དག་པའི་རྟོག་པ། ༣ ཡང་དག་པའི་ངག ༤ ཡང་དག་པའི་ལས་ཀྱི་མཐའ༌། ༥ ཡང་དག་པའི་འཚོ་བ། ༦ ཡང་དག་པའི་རྩོལ་བ། ༧ ཡང་དག་པའི་དྲན་པ། ༨ ཡང་དག་པའི་ཏིང་ངེ་འཛིན་བཅས་སོ། སངས་རྒྱས་བཅོམ་ལྡན་འདས་གང་དུ་ཕེབས་པའི་གནས་དེར་སངས་རྒྱས་ཀྱིས་ཆོས་ལུགས་ཀྱང་དར་ཁྱབ་བྱུང༌། སྐབས་དེར་བྲམ་ཟེ་ཀ་ཤབ་པ་རྣམས་ཀྱིས་མེའི་མཆོད་པ་བྱེད་སར་དུག་སྦྲུལ་ཤིན་ཏུ་གནོད་འཚེ་ཆེ་བ་ཞིག་ཡོད། ཉིན་གཅིག་སངས་རྒྱས་དེར་ཕེབས་ཏེ་བཞུགས་པ་དང༌། སངས་རྒྱས་ཀྱིས་རང་གི་ཕྱོགས་སུ་དུག་སྦྲུལ་ཆེན་པོ་ཞིག་ཤུགས་དྲག་ཆེན་པོས་ཡོང་བ་གཟིགས། དེ་ལ་སངས་རྒྱས་ཀྱིས་སྤྱན་གཟིགས་པ་ཙམ་གྱིས་དུག་སྦྲུལ་དེ་ཞི་ཞིང་དུལ་བར་གྱུར་ཏེ། སངས་རྒྱས་ཀྱི་ལྷུང་བཟེད་ནང་དུ་དགའ་བདེར་ཉལ། ཡང་སྐབས་འགའ་ཞིག་གྲོང་ཁྱེར་ག་ཡའི་འཁྲིས་སུ་ཡོད་པའི་ག་ཡ་མགོ་རི་ཞེས་པའི་སྟེང་དུ་རྒྱུན་མི་ཆད་པའི་མེ་ཆེན་པོ་ཞིག་འབར། དེ་ལ་མི་རྣམས་ཀྱིས་འཇིགས་སྣང་ཆེན་པོ་བྱས་པ་དང༌། སངས་རྒྱས་ཀྱིས་རང་གི་སློབ་མ་རྣམས་དེར་འཁྲིད་པར་མཛད་དེ། མི་རྣམས་ཀྱི་རྒུད་ལ་ཉོན་མོངས་དུག་གསུམ་གྱི་མེ་ཕུང་འདི་ལས་འཇིགས་སྣང་ཆེ་བ་ཞིག་འབར་བཞིན་དུ་ཡོད། མི་སུ་ཞིག་གིས་རང་རྒྱུད་ལ་ཡོད་པའི་ཉོན་མོངས་དུག་གསུམ་གྱི་མེ་ཆེན་དེ་འཇོམས་པའི་ཐབས་སུ་ཡང་དག་པའི་གཉེན་པོ་བསྟེན་པ་དེ་ནི་བློ་གྲོས་དང་ལྡན་པ་ཡིན་ཞེས་གསུངས་སོ། ག་ཡ་མགོ་རི་ནས་རིམ་བཞིན་རྒྱལ་པོའི་ཁབ་ཏུ་ཕེབས། སངས་རྒྱས་བཅོམ་ལྡན་འདས་ཡུལ་དེར་ཕེབས་པའི་གནས་ཚུལ་ཐོས་པ་དང༌། ཡུལ་དེའི་རྒྱལ་པོ་གཟུགས་ཅན་སྙིང་པོ་དང༌།        དེ་ཉིད་ཀྱི་བཙུན་མོ༌། རྒྱལ་སྲས། བློན་པོ་འཁོར་དང་བཅས་པ་སངས་རྒྱས་མཇལ་བར་ཕེབས། རྒྱལ་པོ་འཁོར་དང་བཅས་པར་ཆོས་ཀྱི་གནས་ལུགས་མང་པོ་གསུངས། རྒྱལ་པོ་དེ་སངས་རྒྱས་ལ་དད་པ་ཆེན་པོ་སྐྱེས་ཏེ་ནང་པའི་བསྟན་པ་ལ་ཞུགས་སོ། དེ་ནས་རྒྱལ་སྲས་དོན་གྲུབ་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བའི་རྐབས། རབ་ཏུ་བྱུང་དང༌། བྲམ་ཟེ་དང༌། རྒྱལ་པོ་ལ་སོགས་པའི་འཁོར་དཔག་ཏུ་མེད་པར་ཆོས་འཁོར་སྐོར་བ་སོགས་ཡབ་རྒྱལ་པོས་གསན་པས། དགའ་བ་དང་དད་པ་ཤུགས་དྲག་པོ་སྐྱེས་ཏེ་གདན་ཞུ་ཐེངས་མང་བཏང་བའི་མཐར་བཅོམ་ལྡན་འདས་འཁོར་དང་བཅས་པ་ཡབ་ཀྱི་རྒྱལ་ས་གྲོང་ཁྱེར་སེར་སྐྱར་ཕེབས་ནས། རང་གི་ལ་གཞིས་སུ་བསོད་སྙོམ་བཞེས་པར་ཕེབས། ཡབ་རྒྱལ་པོ་ཟས་གཙང་མས་རེ་འདུན་ཞུས་པ་ལྟར། སངས་རྒྱས་ཀྱིས་རང་གི་རྒྱལ་གཞིས་ལབསོད་སྙོམས་བཞེས་པར་ཕེབས། དེར་བཙུན་མོ་གྲགས་འཛིན་མའི་སར་སངས་རྒྱས་སྐུ་དངོས་སུ་ཕབེས་པ་དང༌། བཙུན་མོ་གྲགས་འཛིན་མས་རང་གི་ལུས་ས་ལ་ཕབ་སྟེ་སངས་རྒྱས་ཀྱི་ཞབས་ལ་མགོ་བོས་ཕྱག་འཚལ། སངས་རྒྱས་ཀྱིས་ཡབ་དང༌། བཙུན་མོ་གྲགས་འཛིན་མ་འཁོར་དང་བཅས་པར་ཆོས་ཀྱི་བསླབ་བྱ་མང་པོ་གསུངས་སོ། དེ་རྗེས་བཙུན་མོ་གྲགས་འཛིན་མས་རང་གི་སྲས་སྒྲ་ཅན་འཛིན་སངས་རྒྱས་ཀྱི་དྲུང་དུ་ཕ་མེས་ཀྱི་ནོར་སྐལ་ཞུ་བར་བཏང༌། སངས་རྒྱས་བཅོམ་ལྡན་འདས་ཀྱིས་སྲས་སྒྲ་ཅན་འཛིན་ལ་རབ་བྱུང་གི་སྡོམ་པ་བསྩལ་ཏེ། ནོར་ཀུན་གྱི་གཙོ་བོ་འཕགས་པའི་ནོར་བདུན་གྱིས་ཚིམས་པར་མཛད་ནས་དགེ་འདུན་གྱི་སྡེར་འཇུག་པར་མཛད། འཕགས་པའི་ནོར་བདུན་ནི༌། ༡ དད་པ། ༢ ཚུལ་ཁྲིམས། ༣ ཐོས་པ། ༤ གཏོང་བ། ༥ ངོ་ཚ་ཤེས་པ། ༦ ཁྲེལ་ཡོད་པ། ༧ ཤེས་རབ་དང་བཅས་བདུན་ནོ།

སྐབས་གཅིག་ལ་མི་འགའ་ཞིག་གིས་སངས་རྒྱས་ལ་ཕྲག་དོག་ལངས་ཏེ། གཽའ་ཏ་མ་ལ་རྫུ་འཕྲུལ་སྟོན་པའི་མཐུ་རྩལ་མེད་ཅེས་སྐུར་བ་མང་པོ་བཏབ་པ་དང༌། སློབ་མ་རྣམས་ཀྱིས་གསོལ་བ་བཏབ་པ་བཞིན། སྡིག་ཅན་རྣམས་ཡིད་ཆེས་པ་དང༌། དད་པ་སྐྱེ་བའི་ཕྱིར་སངས་རྒྱས་ཀྱིས་ཤིང་ཨ་མྲའི་འབྲས་བུ་ཞིག་བཞེས་པའི་ཚི་གུ་ས་ལ་སྦས༌། དེའི་སྟེང་ཕྱག་བསིལ་གྱི་ཆུ་གཏོར་བར་མཛད་པས། དེ་ལ་ལམ་སེང་འབྲས་བུ་ཡང་སྐྱེས་ཏེ། དེར་ཡོད་ཀུན་གྱིས་དངོས་སུ་ཟ་རྒྱུ་བྱུང་བ་སོགས་རྫུ་འཕྲུལ་མང་པོ་བསྟན་པས་ཚང་མ་དད་པའི་ས་ལ་བཀོད་པར་མཛད་དོ། སངསརྒྱས་བཅོམ་ལྡན་འདས་ཀྱིས་དུས་རྟག་ཏུ་སེམས་ཅན་ཚང་མ་ལ་དབྱེ་བ་མེད་པར་བྱམས་པ་དང༌།        སྙིང་རྗེ་ཚད་མེད་མཛད། སངས་རྒྱས་བཅོམ་ལྡན་འདས་གཅིག་པུར་ནགས་སུ་བཞུགས་པའི་ཚེ། གླང་པོ་ཆེ་དང༌། སྤྲེའུ་སོགས་རི་དྭགས་དང་གཅན་གཟན་རྣམས་ཀྱིས་སངས་རྒྱས་ལ་རྐོར་བ་རྒྱག་པ་དང༌། ཆུ་དང༌། ཤིང་ཏོག སྦྲང་རྩི་སོགས་ཀྱི་མཆོད་པ་ཕུལ། སངས་རྒྱས་བཅོམ་ལྡན་འདས་ཞལ་བཞུགས་པའི་དུས་སུ། གཉན་ཡོད་དུ་བྲམ་ཟེ་སོར་མོའི་ཕྲེང་བ་ཟེར་བ་ཞིག་བྱུང༌། དེས་མི་སྟོང་ཕྲག་གཅིག་བསད་པའི་སོར་མོའི་ཕྲེང་བ་ཞིག་བཟོ་ཆེད། མི་མང་པོ་བསད་ནས་མི་རེའི་སོར་མོ་རེ་བཅད་དེ་རང་གི་སྐེ་ལ་བཏགས། མི་དགུ་བརྒྱ་དང་དགུ་བཅུ་གོ་དགུ་བསད་ཟིན་ནས་མི་གཅིག་མ་ལོངས་བར་བཙལ་བ་ན། ཉིན་གཅིག་སངས་རྒྱས་བཅོམ་ལྡན་འདས་ལམ་དེར་ཕེབས་པ་དང༌། སོར་མོའི་ཕྲེང་བས་མཐོང་སྟེ་སངས་རྒྱས་ཀྱི་རྗེས་སུ་བརྒྱུགས་ཀྱང་རྗེས་མ་ཟིན། སངས་རྒྱས་ཀྱིས་དལ་བུར་ཕེབས་ནའང་རྗེས་མ་ཟིན། དེ་ནས་སངས་རྒྱས་ཀྱིས་འཇིགས་ཞུམ་མེད་པར་སོར་མོའི་ཕྲེང་བ་སྒུག་པ་གནང་སྟེ། བྱམས་བརྩེ་ཆེན་པོ་མཛད་པས། ཁོ་ཧ་ལས། དད་པ་སྐྱེས་ནས་སངས་རྒྱས་ཀྱི་ཞབས་ལ་ཕྱག་འཚལ། སངས་རྒྱས་ཀྱིས་སོར་མོའི་ཕྲེང་བ་རབ་ཏུ་བྱུང་བར་མཛད་པ་དང༌། དེས་ཀྱང་ཆོས་ཀྱི་སློབ་སྦྱོང་དང༌། ལག་ལེན་ལ་ཧུར་བཙོན་ཆེན་པོ་བྱས་པས་མཐར་དགྲ་བཅོམ་པའི་གོ་འཕང་ཐོབ་བོ། སྐབས་དེར་གྲོང་ཁྱེར་གཉན་ཡོད་འགྲམ་ན་གྲོང་གསེབ་ཞིག་ཡོད་པ་དེར་ཤིང་ན་གྲོ་ད་ཞིག་གི་འོག་ཏུ་བདུད་གཅིག་སྡོད་ཀྱི་ཡོད།        ཁོའི་ཟས་སྐལ་དུ་ཉིན་རེར་མི་རེ་འགྲོ་དགོས་ཀྱི་ཡོད། ཉིན་གཅིག་སངས་རྒྱས་ཡུལ་དེར་ཕེབས་ཏེ་ཤིང་སྡོང་དེའི་འོག་ཏུ་བཞུགས་པ་དང༌།        བདུད་དེས་སངས་རྒྱས་ལ་གནོད་པ་སྐྱེལ་ཐབས་བྱས་ཀྱང༌། གནོད་འཚེ་གང་ཡང་བྱེད་མ་ཐུབ་སྟབས་སངས་རྒྱས་ལ་དད་པ་སྐྱེས་ནས་སྐྱབས་སུ་བཟུང༌། དེ་ནས་བཟུང་སེམས་ཅན་གཞན་ལ་གནོད་འཚེ་མི་བྱེད་པའི་དམ་བཅའ་ཕུལ་ལོ། ཡང་ཉིན་གཅིག་མཆོད་སྦྱིན་ལ་བརྩོན་པའི་བྲམ་ཟེ་བྷ་ར་དྭཱའ་ཛ་ལ་བཀའ་བརྩལ་པ། མིའི་ནང་ནས་མཆོག་ཏུ་གྱུར་པ་ནི་དགེ་བའི་ལས་བྱེད་མཁན་དེ་ཡིན། རང་གི་བྱ་སྤྱོད་ངན་ཞིང་མི་དགེ་བའི་ལས་བྱས་ཀྱང༌། རིགས་མཐོན་པོར་སྐྱེས་པ་ཙམ་ལ་མཆོག་ཏུ་འཛིན་པ་དེ་ནི་རྫུན་པའི་ལས་ཡིན་ཞེས་གསལ་སྟོན་མཛད་དོ། སངས་རྒྱས་ལ་ཕྲག་དོག་བྱེད་མཁན་མང་པོ་ཡོད་ཀྱང་སྡང་དགྲར་འཛིན་ཞིང༌། ཕྲག་དོག་བྱེད་མཁན་གཙོ་བོ་རང་གི་ཕུ་བོ་ལྷས་བྱིན་ཡིན།        ཉིན་གཅིག་སངས་རྒྱས་ཀྱི་སྐུ་ལ་གནོད་འཚེ་བྱེད་དགོས་བསམས་ནས་རྒྱལ་པོ་མ་སྐྱེས་དགྲ་ལ་ངན་བསླབས་བརྒྱབས་ཏེ་སངས་རྒྱས་ཕེབས་པ་དང༌། གླང་པོ་ཆེ་སྨྱོན་པ་རི་བོ་སྔོ་སངས་ཞེས་པ་གློད་དུ་བཅུག འོན་ཀྱང་གླང་ཆེན་སྨྱོན་པ་དེས་སངས་རྒྱས་ཀྱི་ཞལ་མཐོང་བ་དང་ལམ་སེང་ས་ལ་ཉལ་ནས། ཞབས་འོག་གི་རྡུལ་རང་གི་མགོ་དང་གཟུགས་པོའི་སྟེང་ལ་གཏོར་ཏེ་ཞི་ཞིེང་དུལ་བར་གྱུར།        དེ་ནས་བཟུང་གླང་པོ་ཆེ་དེས་གཞན་ལ་གནོད་པ་མ་བྱས་སོ། རྒྱལ་པོ་རྒྱལ་བྱེད་ཀྱི་མཛོད་བློན་གྱི་ཆུང་མ་ལྦེཤཱཀཱ་ཟེར་བ་ཞིག་ཡོད།དེས་སངས་རྒྱས་དང༌། ཆོས་དང༌། དགེ་འདུན་ལ་ཧ་ཅང་དད་པ་ཆེ་བས་སངས་རྒྱས་དང༌། དགེ་འདུན་རྣམས་ལ་ན་བཟའ་དང༌། འབྲས། ཤིང་ཏོག སྨན།གསོལ་བ་བཅས་བསོད་སྙོམ་འབུལ་རྒྱུར་ཁས་ལེན་ཞུས། ལྦེ་ཤཱཀཱའི་དད་པ་ནི་རྟག་ཏུ་ཡང་དག་པའི་དད་པ་ཡིན། ཉིན་གཅིག་བྲམ་ཟེ་མོ་གཱཽ་ཏཱ་མི་ཞེས་པའི་བུ་ཤི་བ་དང༌། མོས་རང་གི་བུ་ཤི་བའི་རོ་འཁྱེར་ཏེ་སངས་རྒྱས་ཀྱི་དྲུང་དུ་བཅར་ཏེ་སླར་ཡང་གསན་པོར་འགྱུར་བའི་སྐྱབས་འཇུག་ཞུས། སངས་རྒྱས་ཀྱིས་གཱཽ་ཏཱ་མི་ལ་བཀའ་བསྩལ་པ། མི་གཅིག་ཀྱང་འཆི་མ་མྱོང་བའི་ཁྱིམ་ཚང་ཞིག་ནས་ཏིལ་སྙིམ་པ་གང་བྱུང་ན་བུ་ཤི་བ་ལས་གསོ་ཐུབ་ཅེས་གསུངས། མོས་ས་ཕྱོགས་གང་ས་ག་ལ་སོང་ཡང་མི་ཤི་མ་མྱོང་བའི་ཁྱིམ་ཚང་ནི་གཅིག་ཀྱང་མ་རྙེད། དེས་ཚང་མ་འཆི་བའི་འཇིགས་པ་ལས་ཐར་ཐབས་མེད་པ་དང༌། རང་གི་བུ་ཡང་ཤི་བ་ལས་སླར་གསོ་ཡོང་ཐབས་མེད་པ་ཤེས་ཐུབ་པ་བྱུང༌། འདི་ནི་སངས་རྒྱས་ཀྱི་ཆོས་སྟོན་པའི་ཐབས་ཚུལ་ཐོང་མ་ཡིན་པ་ཞིག་ཡིན། སངས་རྒྱས་ཀྱིས་གར་མཁན་རྣམས་ཀྱང་ཐུགས་རྗེ་ཆེན་པོས་རྗེས་སུ་བཟུང་བར་མཛད། སྐབས་ཤིག་གར་མཁན་མ་ཨ་མར་པཱ་ལི་ཞེས་པས་སངས་རྒྱས་གདན་དྲངས་པ་ལྟར་སངས་རྒྱས་ཀྱིས་རང་གི་སློབ་མའི་ཚོགས་དང་བཅས་དེའི་ཁྱིམ་དུ་ཕེབས། མོ་ཡང་སངས་རྒྱས་དང༌།ཆོས་དང༌། དགེ་འདུན་ལ་དད་པ་སྐྱེས་ནས་དགེ་བའི་སེམས་དང་ལྡན་པར་གྱུར། སངས་རྒྱས་གང་དུ་གདན་དྲངས་པའི་ཤིང་ཨ་མྲའི་སྡོང་པོའི་སྐྱེད་མོས་ཚལ་དེ་ཡང་དགེ་འདུན་གྱི་ཀུན་དགའ་ར་བའི་ཆེད་དུ་ཕུལ། ཉིན་གཅིག་སངས་རྒྱས་ཀྱིས་བྲམ་ཟེ་བེ་ཤ་སེ་གལ་གྱིས་ཕྱོགས་བཞི་ལ་ཕྱག་འཚལ་བ་གཟིགས་པ་དང༌། སངས་རྒྱས་ཀྱིས་གཞན་ལ་གནོད་པ་སྤོང་བ་དང༌། གཞན་གྱི་ནོར་མི་རྐུ་བ། རྫུན་མི་ཤོད་པ་དང༌། ལོག་གཡེམ་སྤོང་བ་བཅས་ནི་ཆོས་ཀྱི་སྲུང་སྡོམ་ཡིན་པས་ཕྱོགས་བཞི་ལ་ཕྱག་འཚལ་བའི་སྐབས་སྡིག་པའི་ལས་དེ་དག་སྤོང་བའི་དམ་བཅའ་བྱེད་དགོས་པ་ཡིན། ཞེས་གསུངས། གཞན་ཡང་དེ་དང་འདྲ་བའི་ཆོས་ཀྱི་གནས་ལུགས་དང་སྦྱར་བའི་ཐབས་མཁས་ཤིང་ཐུགས་རྗེ་ཆེན་པོས་ལམ་མང་པོ་བསྟན་པར་མཛད་དོ། ཉིན་གཅིག་རྒྱལ་པོ་རྒྱལ་བྱེད་སངས་རྒྱས་ཀྱི་སྐུ་གམ་དུ་བཅར་ནས། དགེ་སློང་རྣམས་ཀྱིས་རིགས་དམན་གྱི་ལག་ནས་ཆུ་འཐུང་བ་འདི་ནི་ཡང་དག་པ་མ་ཡིན་ཞེས་ཞུས་པར། སངས་རྒྱས་ཀྱིས། དགེ་སློང་རྣམས་ནི་རིགས་རུས་བཟང་ངན་གང་ལའང་གཏོགས་མེད། དགེ་སློང་རྣམས་ཀྱི་ཟས་དང༌། ཆུ་ཕྱོགས་གང་ས་ནས་ལེན་པ་མི་ལེགས་ཀྱང༌། ཡང་དག་པའི་སྤྱོད་པ་དང༌། དད་བརྩོན། ལྟ་བ་བཅས་ལ་བརྩི་བཀུར་དགོས་པ་ཡིན་ཞེས་གསྲུངས། འདི་ལྟར་སངས་རྒྱས་བཅོམ་ལྡན་འདས་ཀྱིས་དགེ་སློང་དང༌། རྒྱལ་པོ་དང༌། བྲམ་ཟེ་དང༌། ཆོམ་རྐུན་དང༌། གར་མཁན་མ་ལ་སོགས་པའི་རྐྱེ་བོའི་ཚོགས་མང་པོར་ཐབས་མཁས་ལ་ཐུགས་རྗེ་ཆེན་པོའི་སྒོ་ནས་ཡང་དག་པའི་ཆོས་ཀྱི་བསླས་བྱ་མང་པོ་བསྟན་པར་མཛད་པ་དང༌། སངས་རྒྱས་མྱ་ངན་ལས་མ་འདས་གོང་གི་ཆོས་མཐའ་མ་དེ་ཡུལ་རྩ་མཆོག་གྲོང་དུ་ཀུན་དགའ་བོ་དང༌། དགེ་སློང་གི་སློབ་མའི་ཚོགས་ལ་གསུངས་སོ། དེ་ནས་ཀུན་དགའ་བོ་སོགས་སློབ་མའི་ཚོགས་རྣམས་ཕྱོགས་གཞན་དུ་ཕེབས་པའི་ཚེ། བདུད་ཀྱི་ཕོ་ཉ་དགའ་རབ་དབང་ཕྱུག་སངས་རྒྱས་ཀྱི་དྲུང་དུ་བཅར་ནས། ད་ནི་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཁྱེད་ཀྱིས་འཛམ་བུའི་གླིང་འདིར་གདུལ་བྱ་སྐྱོང་བའི་དུས་ཚོད་རྫོགས་པ་ཡིན་པས། ད་ནི་མྱ་ངན་ལས་འདའ་བའི་དུས་ལ་བབས་སོ། ཞེས་གསོལ་བ་བཏབ་པ་ལྟར་མི་རྣམས་ལ་ཆོས་ཀྱི་འཁོར་ལོ་སྐོར་བའི་མཛད་པ་རྫོགས་པར་མཁྱེན་ནས་སངས་རྒྱས་བཅོམ་ལྡན་འདས་ཀྱིས་དེ་ལྟར་ཞལ་གྱིས་བཞེས་སོ། དེ་ནས་ཀུན་དགའ་བོ་སངས་རྒྱས་ཀྱི་དྲུང་དུ་ཕེབས་ནས། བདུད་ཀྱི་ཕོ་ཉ་དགའ་རབ་དབང་ཕྱུག་གིས་གསོལ་བ་བཏབ་པར་ལྟར་སངས་རྒྱས་བཅོམ་ལྡན་འདས་ཀྱིས་མྱ་ངན་ལས་འདའ་བར་ཞལ་གྱིས་བཞེས་སོ་ཟེར་བ་ཤེས་པ་དང༌། སྡུག་བསྔལ་གྱིས་ཡོང་སུ་ནོན་པར་གྱུར། སངས་རྒྱས་ཀྱིས་ཀུན་དགའ་བོ་མྱ་ངན་གྱིས་ནོན་པ་མཁྱེན་ནས་བྱམས་བརྩེའི་ཐུགས་ཀྱིས་ཀུན་དགའ་བོ་ལ་ཆོས་ཀྱི་གནས་ལུགས་དང་སྦྱར་ནས་སེམས་གསོ་དང༌། སྡུག་བསྔལ་ཞི་ཐབས་མཛད། ཡུལ་ཙྭྭ་མཆོག་གྲོང་དུ་ཕེབས་པའི་ལམ་དུ། སངས་རྒྱས་ཞལ་སྐྱེམས་ནས་ཀུན་དགའ་བོ་ལ་སྐྱེམས་གསོ་བའི་ཆེད་ཆུ་འཁྱེར་ཡོང་དགོས་པའི་བཀའ་བསྩལ་བ་དང༌། ཀུན་དགའ་བོས་མ་ཤེས་པར་ཤིང་རྟ་ལྔ་བརྒྱ་ཐམ་པ་ཕྱིན་མ་ཐག་པའི་ཆུ་ཀླུང་གི་ཆུ་ལྷུང་བཟེད་ནང་ཕུལ་བ་སངས་རྒྱས་ཀྱིས་བཞེས་པས། དེས་རྐྱེན་བྱས་ཏེ་སྐུ་ལ་བསྙུན་གཞི་ཕོག་པའི་ཚུལ་བསྟན་པར་མཛད་དོ། དེ་ནས་རྩྭ་མཆོག་གྲོང་དུ་ཤིང་ས་ལའི་ནགས་ཚལ་གྱི་ནང༌། ས་ལའི་སྡོང་པོ་གཉིས་ཀྱི་དབར་ཀུན་དགའ་བོས་བཤམས་པའི་གཟིམ་ཁྲིའི་སྟེང་ཡོང་སུ་མྱ་ངན་ལས་འདའ་བའི་ཚུལ་བསྟན་པར་མཛད་དོ། སངས་རྒྱས་མྱ་ངན་ལས་འདས་པའི་ཚེ། གནས་དང་ཕྱོགས་ཀུན་ཏུ་དགེ་འདུན་གྱི་ཚོགས་དང༌། ཡུལ་གྱི་མི་རྣམས་ཚང་མ་ཚད་མེད་པའི་མྱ་ངན་གྱིས་ཡོང་སུ་ནོན་པར་གྱུར། དེ་ནས་ས་ཕྱོགས་ཚང་མར་སངས་རྒྱས་ཀྱི་འདས་མཆོད་དང༌། ཞུགས་འབུལ་གྱི་ཆོ་ག་ཡང་རྒྱ་ཆེན་པོ་བྱས་སོ། མ་འོངས་པ་ན་མི་རྣམས་ཀྱི་དད་པའི་རྟེན་དུ་གནས་མི་འདྲ་བ་བརྒྱད་དུ་མཆོད་རྟེན་ཆེན་པོ་བརྒྱད་བཞེངས་ཏེ༌། དེ་དག་གི་ནང་དུ་སངས་རྒྱས་ཀྱི་ཚེམས་དང༌། རིང་བསྲེལ༌། སྐུ་རུས་སོགས་བཞུགས་སུ་གསོལ་བའི་གནས་རྣམས་ད་ལྟ་ཡང་མཇལ་རྒྱུ་ཡོད་པ་བཅས་སོ༌།།

དཔལ་མགོན་འཕགས་པ་ཀླུ་སྒྲུབ།

ཤིང་རྟ་ཆེན་པོ་དཔལ་མགོན་པོ་འཕགས་པ་ཀླུ་སྒྲུབ་ནི། སྟོན་པ་མྱ་ངན་ལས་འདས་ནས་ལོ་བཞི་བརྒྱ་ཙམ་སོང་རྗེས། རྒྱ་གར་ལྷོ་ཕྱོགས་བེ་དེའི་ཡུལ་དུ་བྲམ་ཟེའི་རིགས་སུ་འཁྲུངས། ཡུམ་གྱིས་མཚན་མཁན་ལ་བསྟན་པས། དེས་མཚན་བཟང་མོད། ཞག་བདུན་གྱི་ཚེ་ལས་མི་འདུག་ཟེར་བས། ཐབས་ཅི་ཡོད་ཅེས་དྲིས་པ་ན། ཕལ་པ་དང་བྲམ་ཟེ། དགེ་སློང་ལྔ་བརྒྱ་ལ་གསོལ་སྟོན་དྲངས་ན་རིམ་བཞིན་ཞག་བདུན་དང། ཟླ་བ་བདུན། ལོ་བདུན་འཚོ་ཐུབ། དེ་ནས་ཐབས་མེད་ཟེར་བས། དེ་ལྟར་བྱས་ཏེ་དགུང་ལོ་བདུན་དུ་ཉེ་བ་ན། ཕ་མས་རང་གི་བུ་འཆི་བར་བལྟ་མ་ནུས་པར་གཡོག་དང་བཅས་ནགས་སུ་འཁྱམ་དུ་བཏང༌། རིམ་བཞིན་བྲམ་ཟེ་ས་ར་ཧའམ་སྒྲ་གཅན་འཛིན་བཟང་པོ་དང་མཇལ་ནས། སྐུ་ཚེ་བསྲིངས་ཤིང་རབ་ཏུ་བྱུང༌། ཕྱིས་སུ་བསྙེན་པར་རྫོགས་ནས་མཚན་ལ་དགེ་སློང་དཔལ་ལྡན་ཞེས་གསོལ། གཞན་ཡང་བྱང་སེམས་བློ་གྲོས་རིན་ཆེན་སོགས་ལས་ཀྱང་མདོ་སྔགས་ཀྱི་ཟབ་ཆོས་མང་དུ་གསན་ཏེ་མཁས་པའི་ཡུལ་དུ་གྱུར། བར་སྐབས་ཤིག་ལ་ཡུལ་དེར་མུ་གེ་ཆེན་པོ་བྱུང་བས། མཁན་པོས་བསྐུལ་བ་ལྟར་ནྭ་ལེན་ཌའི་དགེ་འདུན་གྱི་ཞལ་ཏ་པ་མཛད། རྒྱ་མཚོའི་གླིང་ཞིག་ནས་གསེར་གྱི་རྩི་བཞེས་ཤིང༌། ཕྱོགས་གཞན་ནས་འཚོ་བའི་ཡོ་བྱད་རྣམས་དྲངས་ཏེ་ལོ་བཅུ་གཉིས་བར་དུ་དགེ་བདུན་རྣམས་ལ་འཚོ་བ་ཕོངས་པ་མེད་པར་སྦྱོར་བར་མཛད། སྐབས་དེ་དག་ཏུ་བསླབ་ཁྲིམས་འཆལ་བའི་དགེ་འདུན་སྟོང་ཕྲག་མང་པོ་གནས་ནས་ཕྱུངས། སྐལ་ལྡན་རྣམས་ལ་སྡེ་སྣོད་གསུམ་དང། ལྷག་པར་དུ་དམ་པའི་ཆོས་འདུལ་བ་རྒྱ་ཆེར་སྤེལ་བར་མཛད་དེ། སྔོན་སྟོན་པས་ཆོས་འཁོར་དང་པོ་བསྐོར་བ་དང་མཚུངས་པ་ཆོས་ཀྱི་སྒྲ་ཆེན་ལན་དང་པོ་བསྒྲགས། དེའི་ཚེ་བདེ་བྱེད་ཅེས་བྱ་བས་ཐེག་ཆེན་གྱི་ལྟ་སྤྱོད་གཉིས་ཀར་རྨ་འབྱིན་པའི་གཞུང་མང་པོ་བརྩམས་པ་དང། ཐེག་ཆེན་ལ་ལོག་པར་མྲ་བ་མཐའ་དག་རིགས་པས་སུན་ཕྱུངས། སྐབས་ཤིག་ན་སྐལ་ལྡན་རྣམས་ལ་ཆོས་རྒྱ་ཆེར་བསྟན་པའི་དུས་བྱིས་པ་གཉིས་ཆོས་ཉན་དུ་འོངས་པ་ན། དྲི་ཞིམ་ཕྱོགས་ཀུན་ཁྱབ། དེ་གཉིས་སོང་བའི་རྗེས་དྲི་ངད་ཡལ་བས། དེའི་རྒྱུ་མཚན་དྲིས་པར་ངེད་གཉིས་ཀླུའི་རྒྱལ་པོ་འཇོག་པོའི་བུ་ཡིན། མིའི་དྲི་མ་སྲུང་ཕྱིར་ཙན་དན་གོཤིརྵ་བྱུགས་པ་ཡིན་ཞུས། འོ་ན་དེ་ལྟ་བུའི་ཙན་དན་གང་དུ་ཡོད་དམ་དྲིས་པས། ཡབ་ལ་འདྲིའོ། ཟེར་བ་བཞིན་དྲིས་པས། ཡབ་ཀྱིས་སློབ་དཔོན་ཀླུ་ཡུལ་དུ་བྱོན་ན་འབུལ་ཞུས་པས། སློབ་དཔོན་ཀྱི་ཀླུ་མང་པའི་རྒྱུད་ལ་དགེ་རྩ་བསྐྱེད་པ་དང། ཤེར་ཕྱིན་སྟོང་ཕྲག་བརྒྱ་པ་ཀླུ་ཡུལ་ནས་གདན་འདྲེང་འདྲེན་རྒྱུ་སོགས་དགོས་པ་དུ་མར་གཟིགས་ཏེ་ཀླུ་ཡུལ་དུ་བྱོན། ཀླུ་རྣམས་ཀླིས་མཆོད་པ་རྒྱ་ཆེ་དང་བཅས་ཆོས་སྟོན་པར་གསོལ་བ་བཏབ་པ་ན། དེར་ཆོས་མང་པོ་བརྟན་པས་ཀླུ་རྣམས་ཡིད་མགུ་སྟེ་ཀླུ་ཡུལ་དུ་བཞུགས་པར་ཞུས་ཀྱང༌། ད་ལྟ་མཆོད་རྟེན་བྱེ་བ་བཞེངས་དགོས་པ་སོགས་ཀྱིས་ཁོམ་པ་མེད། ཕྱིས་སུ་འོང་སྲིད་ཅེས་གསྲུངས་ཏེ་ཀླུའི་འདམ་མང་པོ་དང༌། ཤེར་ཕྱིན་སྟོང་ཕྲག་བརྒྱ་པ། གཟུངས་རྣམས་གདན་ད྄ཡངས་ཏེ་འཛམ་བུའི་གླིང་དུ་བྱོན། ཀླུ་རྣམས་ཀྱིས་སློབ་དཔོན་སླར་ཀླུ་ཡུལ་དུ་འབྱོན་རྒྱུའི་གཏའ་མ་ལྟ་བུར་འབུམ་གྱི་གཤམ་ནས་ཅུང་ཟད་མ་བསྐུར་བས། བརྒྱད་སྟོང་པའི་རྟག་ཏུ་ངུ་དང༌། ཆོས་འཕགས་ལེའུ་གཉིས་རྗེས་སུ་འབུམ་རྒྱས་པའི་གཤམ་དུ་སྦྱར་བར་གྲགས་སོ། དེ་ནས་ལི་ཁ་ར་ཞེས་པའི་ཡུལ་དུ་ཕེབས། གསེར་འགྱུར་གྱི་སྒོ་ནས་སྦྱིན་པ་རྒྱ་ཆེར་མཛད། མཉན་ཡོད། གནས་བཅས། ཙམ་པ་ཀ། ལྦྭ་རྭ་ཎ་སིྭ། རྒྱལ་པོའི་ཁབ། ཡངས་པ་ཅན་ཏེ་རྒྱ་གར་དབུས་ཀྱི་གྲོང་ཁྱེར་ཆེན་པོ་དྲུག་གིས་གཙོས་ཕྱོགས་ཐམས་ཅད་དུ་གཙུག་ལག་ཁང་དང༌། མཆོད་རྟེན་མང་པོ་བཞེངས། ཆོས་སྨྲ་བ་རྣམས་ལ་ཆོས་གཞིས་གཞིའང་བཙུགས། ཤེར་ཕྱིན་གདན་དྲངས་ནས་ཐེག་ཆེན་གྱི་སྲོལནུབ་པ་དེ་སླར་གསོ་མཛད་དེ་ཆོས་སྟོན་པའི་སྐབས་ཀླུ་རྣམས་ཀྱིས་སྦྲུལ་གྱི་གདེངས་ཀ་ཕུལ་བ་སོགས་གྲོགས་བྱས་པས་ཀླུ་སྒྲུབ་ཅེས་མཚན་ཆགས། ཁྱད་པར་དུ་ཤེར་ཕྱིན་གྱི་མདོ་སྡེ་རིན་པོ་ཆེའི་ཟབ་དོན་དབུ་མར་འགྲེལ་བའི་བསྟན་བཅོས་རྩ་བ་ཤེས་རབ་ཅེས་བྱ་བ་སོགས་མཛད་དེ། སྔོན་སྟོན་པས་ཆོས་འཁོར་བར་པ་བསྐོར་བ་དང་མཚུངས་པའི་དམ་པའི་ཆོས་ཀྱི་སྒྲ་དབྱངས་གཉིས་པ་བསྒྲགས། སྐུ་ཚེའི་སྨད་ལ་གཙོ་ཆེར་ལྷོ་ཕྱོགས་དཔལ་གྱི་རིར་བཟུགས་ཏེ་མདོ་སྔགས་གཉིས་ཀའི་ཆོས་འཁོར་རྒྱ་ཆེར་བསྐོར། ལྷག་པར་ཆོས་དབྱིངས་བསྟོད་པ་སོགས་མཛད་དེ། སྔོན་སྟོན་པས་ཆོས་འཁོར་ཐ་མ་བསྐོར་བ་དང་མཚུངས་པའི་ཆོས་ཀྱི་སྒྲ་ཆེན་པོ་གསུམ་པ་བསྒྲགས་སོ། མདོར་ན་གདུལ་བྱ་བགྲང་ལས་འདས་པ་ཐེག་པ་ཆེན་པོའི་ལམ་ལ་འཁྲིད་པ་དང༌། སྡེ་སྣོད་གསུམ་དང༌། རྒྱུད་སྡེ་བཞིའི་དགོངས་འགྲེལ་བསྟན་བཅོས་ཀྱང་མང་དུམ་ཛད། དེ་ལྟར་བསྟན་པའི་བྱ་བ་རྒྱ་ཆེར་མཛད་པ་ན། བདུད་སྡིག་ཏོ་ཅན་མ་བཟོད་པར། སྒྱལ་པོ་བདེ་སྤྱོད་ཀྱི་བུར་སྐྱེ་བ་བླངས་ཏེ། རྒྱལ་སྲིད་ཐོབ་ཕྱིར་ཡབ་དང་སྐུ་ཚེ་གཅིག་པའི་སློབ་དཔོན་གྱི་དབུ་བསླངས། ཁོང་བྱང་སེམས་ཀྱི་སྤྱོད་པ་རླབས་པོ་ཆེར་གནས་སྟབས་གནང་བ་ཞལ་གྱིས་བཞེས། རྩ་ཀུ་ཤས་དབུ་བཅད་དེ་སྐུ་ཁྲག་འོ་མའི་རང་བཟིན་དུ་བྱུང༌། དབུ་དེའི་ཞལ་ནས། ང་ནི་འདི་ནས་བདེ་བ་ཅན་དུ་འགྲོ། ཕྱིས་ནས་ལུས་འདི་ལ་ནི་འཇུག་པར་འགྱུར། ཞེས་ཚིག་བྱུང་བས། དབུ་སླར་ཡང་སྐུ་ལུས་ལ་འབྱར་དོགས་ཀྱིས་དཔག་ཚད་ཙམ་དུ་དཔར་ཡང༌། རིམ་གྱིས་ཇེ་ཉེར་སོང་སྟེ་མཐར་དབུ་སྐུ་ལུས་ལ་འབྱར་ནས་སླར་ཡང་བསྟན་འགྲོའི་དོན་རྒྱ་ཆེར་མཛད་པར་འགྱུར་རོ་ཞེས་གསུངས་སོ། འཕགས་པ་ཀླུ་སྒྲུབ་ལ་སློབ་མ་བ།ཏན་འཛིན་གྱི་སྐྱེས་ཆེན་དམ་པ་མང་ཡང༌། གཙོ་བོ་ཐུགས་སྲས་བཞི་དང། ཉེ་བའི་སྲས་གསུམ་སྟེ་བདུན་ཡོད། དང་པོ་བཞི་ནི། ཤྭཀྱ་མིཏྲ། ནྭ་ག་བོདྷི། ཨྭརྱ་དེ་ལྦ། མིཏ་གང་པ་དང་བཞི། གཉིས་པ་ཉེ་བའི་སྲས་གསུམ་ནི། སངས་རྒྱས་བསྐྱངས། ལེགས་ལྡན་འབྱེད། སློབ་དཔོན་དཔའ་བོ་རྣམས་སོ།།

སློབ་དཔོན་འཕགས་པ་ཐོག་མེད།

ཤིང་རྟ་ཆེན་པོ་འཕགས་པ་ཐོག་མེད་ནི། ཡུམ་བྲམ་ཟེ་མོ་གསལ་བའི་ཚུལ་ཁྲིམས། པྲཀྭས་ཤི་ལ། ལས་རྒྱལ་པོའི་རིགས་སུ་སྐུ་འཁྲུངས། ཡུམ་གྱིས་ཁོང་ལ་རིག་པ་རྣོ་བའི་ཆོ་ག་དང། རིག་གནས་མང་དུ་བསླབས། ཁོང་གི་ཡུམ་ལ། བདག་གི་རིགས་དང༌། ཕའི་ལས་གང་ཡིན་ཞུས་པས། ཡུམ་གྱིས་ཁྱོད་རིག་དང་ཁྱིམ་སྐྱོང་བའི་ཕྱིར་བསྐྱེད་པ་མ་ཡིན་གྱི། རྒྱལ་བའི་བསྟན་པ་ཉམས་པར་མ་བཟོེད་ནས་བསྐྱེད་པ་ཡིན་པས། ད་ཁྱོད་རབ་ཏུ་བྱུང་ལ་རྒྱལ་བའི་བསྟན་པ་དར་བར་གྱིས་ཤིག། ཅེས་བསྐུལ་བ་ལྟར་རབ་ཏུ་བྱུང་ནས་བསྙེན་པར་རྫོགས། སྡེ་སྣོད་གསུམ་ལ་སྦྱངས་པས་ལོའི་རིང་ལོ་རེར་ཚིགས་བཅད་འབུམ་ཕྲག་རེའི་ཚིག་དོན་མཐའ་དག་བྱང་ཆུབ་པར་མཛད། འོན་ཀྱང་ཤེར་ཕྱིན་གྱི་སྦས་དོན་མངོན་རྟོགས་ཀྱི་རིམ་པ་ཤིན་ཏུ་རྟོགས་དཀར་བར་བརྟེན། རི་བོ་བྱང་རྐང༌། ཀུཀ་ཀུཊཔྭདཔརྦཏ། ཅན་གྱི་བྲག་ཕུག་ཏུ་ལྷག་པའི་ལྷ་རྗེ་བརྩུནབྱམས་པ་མགོན་པོ་ལོ་གསུམ་གྱི་རིང་བསྒྲུབས་ཀྱང་འགྲུབ་པའི་྄ལཏགས་མཚན་ཅི་ཡང་མ་བྱུང་སྟབས་ཕྱིར་ཐོན་པས། བྲག་ངོས་སུ་བྱ་སྒྲོས་བྲག་ཟད་པར་གཟིགས་ཏེ་བརྩོན་འགྲུས་དགོས་པར་དགོངས་ནས་སླར་ཡང་བྲག་ཕུག་ཏུ་ལོ་གསུམ་བསྒྲུབས། དེས་ཀྱང་ལྟས་བཟང་བ་ཙམ་ཡང་མ་བྱུང་སྟབས་ཕྱིར་ཐོན་པ་ན། ཕུག་པའི་སྒོར་ཆུ་ཐིགས་ཀྱིས་བྲག་ཀོང་ཀོང་བཟོས་པར་གཟིགས་ནས་ད་དུང་བརྩོན་འགྲུས་དགོས་པར་དགོངས་ཏེ་སླར་ཡང་ཕུག་པར་ལོ་གསུམ་བགྲུབས།ད་དུང་ལྟས་དང་ཡང་མ་བྱུང་སྟབས་བྲག་ཕུག་ནས་ཕྱིར་ཐོན་པས། མི་རྒན་ཟིག་གིས་རས་བལ་འཇམ་པོས་ལྕགས་གདུང་བརྡར་བཞིན་སྔར་ཡང་ཁབ་འདི་ཙམ་བཟོས་ཟིན། ད་དུང་འདིས་ཁབ་བཟོ་བ་ཡིན་བྱས་པས། བྱ་བ་ཕལ་པར་བརྩོན་འགྲུས་འདི་ཙམ་དགོས་ན། དོན་ཆེན་པོ་ལ་བརྩོན་འགྲུས་ཅི་མི་བྱེད་དགོངས་ཏེ། སླར་བྲག་ཕུག་ཏུ་བཟུགས་ནས་ལོ་གསུམ་བཅས་ཁྱོན་མི་ལོ་བཅུ་གཉིས་བར་བསྒྲུབས་ཀྱང་རྟགས་མཚན་བཟང་བ་ཙམ་ཡང་མ་བྱུང་སྟབས། ཐུགས་ཤིན་ཏུ་སྐྱོ་ཞིང་སྒྲུབ་ཕུག་གི་ཕྱིར་ཐོན་པའི་ལམ་དུ་ཁྱི་མོ་ལུས་སྨད་འབུས་འཇོམས་པ་ཞིག་གཟིགས་པར་སྙིང་རྗེ་ལྷག་པར་སྐྱེས་ནས་རང་གི་ལུས་ཀྱི་ཤ་བཀོག་ཏེ་དེའི་སྟེང་ལྗགས་ཀྱིས་འབུ་རྣམས་བླངས་པར་བརྩམས་པས་ལས་སྒྲིབ་དག་ནས་རྗེ་བཙུན་བྱམས་པ་མགོན་པོ་དངོས་སུ་ཞལ་གཟིགས། དེ་ནས་རྗེ་བཙུན་གྱིས་རྗེས་སུ་བཟུང་སྟེ་དགའ་ལྡན་ཡིད་དགའ་ཆོས་འཛིན་དུ་ཁྲིད་ནས་ལོ་ཉེར་ལྔའིརིང་ཐེག་པ་ཆེན་པོའི་ཆོས་གསུངས་པས། ཤེར་ཕྱིར་གྱི་དངོས་བསྟན་དང༌། སྦས་དོན་ལམ་གྱི་རིམ་པ་ཆ་ཚང་རྟོགས་ནས་འཕགས་པའི་ས་ཐོབ། རྗེ་བཙུན་ལས་མངོན་རྟོག་རྒྱན། མདོ་སྡེ་རྒྱན། དབུས་མཐའ་རྣམ་འབྱེད། ཆོས་ཉིད་རྣམ་འབྱེད། རྒྱུད་བླ་མ་སྟེ་བྱམས་ཆོས་སྡེ་ལྔ་གསན་ནས་མི་ཡུལ་དུ་ཕེབས། མ་ག་དྷའི་ཡུལ་པི་ལུ་བ་ནར་ཆོས་ཀྱི་མྱུ་གུ་དགོན་ཞེས་པའི་གཙུག་ལག་ཁང་བཞེངས། གནས་དེར་མངོན་ཤེས་དང་རྫུ་འཕྲུལ་ལ་མངའ་བརྙེས་ཤིང༌། མདོ་སྡེའི་དོན་ལ་མཁས་པའི་སློབ་མ་མང་པོ་བྱུང༌། སློབ་དཔོན་འདིས་མངོན་པ་ཀུན་བཏུས་དང། ཐེག་བསྡུས་ཏེ་སྡོམ་རྣམ་གཉིས་དང༌། ས་སྡེ་ལྔ་སོགས་མཛད་དེ་སེམས་ཙམ་པའི་ལྟ་བའི་སྲོལ་ཕྱེས་པས་ཤིང་རྟའི་སྲོལ་འབྱེད་ཅེས་ཞུ་བ་ཡིན། དེ་ནས་ནུབ་ཕྱོགས་དང་ཉེ་བའི་གྲོང་ཁྱེར་ས་ག་རིར་ཕེབས། དེར་ཕྱོགས་བཞི་ནས་དགེ་སློང་ཐམས་ཅད་སློབ་མར་འདུས་པར་ཆོས་མང་དུ་བསྟན་པས་དེ་དག་ཐེག་པ་ཆེན་པོའི་རིགས་སད་ཅིང༌། ཤེར་ཕྱིན་གྱི་དོན་ལ་མཁས་པ་སྟོང་ཕྲག་བརྒལ་བ་བྱུང། རྒྱལ་པོ་ཟབ་མོའི་ཕྱོགས་ཀྱིས་སློབ་དཔོན་ལ་མངོན་ཤེས་ཡོད་མེད་བརྟག་ཕྱིར། མ་ཧེ་ནག་པོ་ས་དཀར་བྱུག་པ་ཞིག་ཁྱིམ་དུ་སྦས། གསེར་བུམ་དུ་མི་གཙང་བ་བླུགས་ནས་ཁ་སྦྲང་རྩིས་བཀང་སྟེ་རས་ཀྱིས་བཏུམས་པ་ཞིག་ལག་ཏུ་བཟུང་སྟེ། ཁྱིམ་འདི་ན་ཅི་ཡོད། ལག་ཏུ་བཟུང་བ་འདི་གང་ཡིན་ཞུས་པར་ལན་མ་ནོར་བར་གསུངས། ད་དུང་ཤེར་ཕྱིན་གྱི་ཚིག་གི་དྲི་བ་གསུམ་དང༌། དོན་གྱི་དྲི་བ་གསུམ་ཡིད་ཀྱིས་དྲིས་པར་ལན་མ་ནོར་བར་གསུངས་པས། རྒྱལ་པོ་དང་སྐྱེ་བོའི་ཚོགས་ཐམས་ཅད་ཧ་ལས་ཤིང་དད་གུས་ལྷག་པར་འཕེལ་ཏེ། ཐེག་པ་ཆེན་པོའི་ཆོས་གཞི་ཉེར་ལྔ་བསྐྲུན་པར་མཛད། གནས་དེར་རང་གི་གཅུང་དབྱིག་གཉེན་ཐེག་པ་ཆེན་པོའི་བསྟན་པའི་སྒོར་བཅུག། ལྷོ་ཕྱོགས་ཀྲིཥ་ཎ་ར་རྗ་ར་ཟླ་བ་གསུམ་གྱི་ལམ་དུ་རྫུ་འཕྲུལ་གྱིས་དྲོ་ཡུན་གཅིག་ལ་སླེབས་པར་མཛད། གནས་དེར་བྲམ་ཟེ་བྭ་སུ་ནྭ་འཁོར་ལྔ་བརྒྱས་མཆོད། གནས་དེ་དང་ནུབ་ཕྱོགས་ཨོ་རྒྱན་གྱི་ཡུལ་གཉིས་སུ་མཆོད་རྟེན་བརྒྱ་ཕྲག་རེ་དང༌། ལྷ་ཁང་ཉི་ཤུ་རྩ་ལྔ་རེ་བཞེངས། མ་ག་དྷར་མཆོད་རྟེན་བརྒྱད་དང། ཆོས་གཞི་ཉེར་ལྔ་བཙུགས། གྲོང་ཁྱེར་ཨ་ཡོ་ད་ཧྱ་དང་ཉེ་བར་ཆོས་སྟོན་ཅིང་བཞུགས་པའི་སྐབས། གར་ལོག་པའི། ཁ་ཆེ། དམག་བྱུང་བར། སློབ་དཔོན་དང་སློབ་མའི་ཚོགས་ཀྱིས་བྱམས་པའི་ཏིང་ངེ་འཛིན་བསྒོམས་པས་མདའ་དང༌། རལ་གྲི་སོགས་མཚོན་ཆ་ཙམ་འཕངས་ཀྱང་གནོད་མ་ཐུབ། སྐུ་ཚེའི་མཇུག་ཏུ་ནྭ་ལེན་དྲའི་མཁན་པོལོ་བཅུ་གཉིས་མཛད་དེ་བསྟན་པའི་བདག་པོར་གྱུར། མཐར་རྒྱལ་པོའི་ཁབ་ཏུ་སྐུ་ཡི་བཀོད་པ་བསྡུས་ནས་དགའ་ལྡན་དུ་གཤེགས་སོ།།

སློབ་དཔོན་ཨྭརྱ་དེ་ལྦའམ་འཕགས་པ་ལྷ།

སློབ་དཔོན་ཨྭརྱ་དེ་ལྦའམ་འཕགས་པ་ལྷ་ནི་སློབ་དཔོན་ཀླུ་སྒྲུབ་ཀྱི་སློབ་མའི་གཙོ་བོ་ཡིན། ཁོང་གིས་ལྷོ་ཕྱོགས་དཔལ་གྱི་རིར་འཕགས་པ་ཀླུ་གྲུབ་ཀྱི་ཞབས་ལ་ཡུན་རིང་དུ་བསྟེན་པའི་མཐུ་ལས་སའི་སྟེང་ན་འགྲན་ཟླ་དང་བྲལ་བའི་མཁས་གྲུབ་ཆེན་པོར་གྱུར། སྐབས་དེར་མུ་སྟེག་ས་རྟ་དབྱངས་ཀྱིས་ནྭ་ལེན་དྲའི་དགེ་འདུན་རྣམས་ལ། ང་མུ་སྟེགས་རྟ་དབྱངས་བྱ་བ་ཡིན། ང་རྒྱལ་ན་ཁྱེད་རྣམས་ངའི་གྲུབ་མཐའ་ལ་ཞུགས་ཏེ་གཙུག་ལག་ཁང་དང་ཆོས་རྣམས་བསྒྲེག་དགོས། དེའི་དཔང་པོ་རྒྱལ་པོ་ལ་བཅོལ་བ་ཡིན་པས་དུས་ཐོབས་ཤིག་ཅེས་བསྒྲགས་པ་ན། ནང་པའི་མཁས་པ་སུས་ཀྱང་ལན་ལྡོག་མ་ནུས། སྐབས་དེར་པཎ་ཌི་ཏ་ཞིག་གི་རྨི་ལམ་དུ་མུ་སྟེགས་ཀྱི་རྩོད་པ་བཟློག་པའི་ཐབས་སུ་ཆོས་སྐྱོང་མགོན་པོ་ལ་འཕྲིན་ལས་བཅོལ་ན། ཆོས་སྐྱོང་གི་སྤྲུལ་པས་ལྷོ་ཕྱོགས་དཔལ་གྱི་རི་ནས་སློབ་དཔོན་ཀླུ་སྒྲུབ་ཡབ་སྲས་གདན་འདྲེན་པའི་ཕོ་ཉ་བྱེད་པར་འགྱཱུར་ཞེས་ལུང་བསྟན་བྱུང་བ་ལྟར། འཕྲིན་ཡིག་བྲིས་ཏེ་གཏོར་མའི་སྟེང་དུ་བཞག་ནས་མགོན་པོ་ལ་ཆོས་གཏོར་རྒྱ་ཆེན་པོ་ཕུལ་བ་ན། མགོན་པོའི་རྣམ་སྤྲུལ་བྱ་རོག་ཅིག་གིས་འཕྲིན་ཡིག་དེ་ཁྱེར་ནས་ལྷོ་ཕྱོགས་དཔལ་གྱཔ་རིར་སྲབ་དཔོན་ཀླུ་སྒྲུབ་ལ་ཕུལ། ནྭ་ལེན་དྲར་མུ་སྟེགས་རྟ་དབྱངས་གདུལ་བའི་དོན་སློབ་དཔོན་ཀླུ་སྒྲུབཕེབས་པར་བ།྄རཙམས་པ་ན། སློབ་དཔོན་ཨྭརྱ་དེ་བས། སློབ་དོན་ཕེབས་མི་དགོས། རྟ་དབྱངས་བདག་གིས་གདུལ་ནུས་ཟེས་ཟུས་ཏེ་སློབ་དཔོན་ཨྭརྱ་དེ་ལྦ་ནྭ་ལེན་དྲར་ཕེབས། སྐབས་དེར་ཕྱི་ནང་གི་པཎདྲི་ཏ་འབུམ་ཕྲག་དུ་མ་ནྭ་ལེན་དྲར་འདུས། སློབ་དཔོན་གྱིས་ནྭ་ལེན་དྲའི་ཆུ་ལེན་མཁན་ཞིག་ལ། ང་འོངས་སོ་གྱིས་གསུངས་པ་ལྟར། དེས་ཀྱང་དགེ་འདུན་རྣམས་ལ་ང་འོངས་སོ་ཟེར་མཁན་ཞིག་ཆུ་ཁར་འདུག་ཞུས་པས། འཕགས་པ་ཡབ་སྲས་གང་རུང་ཞིག་ཕེབས་པར་བསམས་ཏེ་མཆོད་པའི་བྱེ་བྲག་རྣམ་པ་མང་པོ་ཐོག་ཏེ་ཕེབས་བསུ་རྒྱ་ཆེ་ཞུས། དེ་ནས་སློབ་དཔོན་གྱིས་རྟ་དབྱངས་ཆུ་གཏོར་གཏོང་སར་བྱོན་ཏེ་ཅི་བྱེད་དྲིས་པས། སྔར་ཤི་བའི་ཕ་མེས་རྣམས་ལ་སྟེར་བ་ཡིན་ཟེར། སློབ་དཔོན་གྱིས་ངས་ཀྱང་ལྷོ་ཕྱོགས་དཔལ་གྱི་རེར་ཤིང་སྐམ་པོ་ཞིག་ཡོད་པ་དེ་ལ་གཏོར་བ་ཡིན་གསུངས་ནས་ཆུ་གཏོར་བས། རྟ་དབྱངས་ཀྱིས་དཔལ་གྱི་རི་ལ་འདི་ནས་ཆུ་གཏོར་བྱས་པས་ཅི་ལ་ཕན་ཟེར་བས། སློབ་དཔོན་གྱིས་འོ་ན་ཕ་མེས་སྔར་ཤི་བ་ལ་ད་ལྟར་ཆུ་གཏོར་བྱས་པས་ཅི་ལ་ཕན་གསུངས། ཡང་རྟ་དབྱངས་འབབ་སྟེགས་སུ་ཁྲུས་བྱེད་པའི་སྐབས་སློབ་དཔོན་གྱིས་ཅི་བྱེད་གསུངས་པས། སྡིག་པ་སྦྱོང་བ་ཡིན་ཟེར། སློབ་དཔོན་གྱིས་གསེར་བུམ་མི་གཙང་བས་བཀང་བ་ཞིག་གི་ཕི་བཀྲུས་པས་རྟ་དབྱངས་ཀྱིས། མི་གཙང་བ་ནང་ན་ཡོད་པ་ལ་ཕྱི་བཀྲུས་པས་ཅི་ལ་ཕན་ཟེར་བར། སློབ་དཔོན་གྱིས་འཔ་ན་སྡིག་པ་སེམས་ལ་ཡོད་པར་ལུས་བཀྲུས་པས་ཅི་ཕན་གསུངས། དེ་ནས་སློབ་དཔོན་ཚོགས་སུ་དགེ་འདུན་གྱི་གྲལ་སྨད་དུ་བཞུགས་པའི་སྐབས་རྟ་དབྱངས་ཀྱིས་ཚོགས་སུ་སྔར་བཞིན་བགྲངས་པས་གྲངས་གཅིག་ལྷག་པ་ན། སྔོན་མེད་པའི་མགོ་ཟླུམ་གང་ན་ཡོད་ཟེར་བ་ལ་སློབ་དཔོན་གྱིས། མགོ་ཟླུམ་སྐེའི་སྟེང་ན་ཡོད་གསུངས་པས་རྩོད་པ་བྱེད་པར་ཤེས་ཏེ། རྟ་དབྱངས་ཀྱིས་བྱིའུ་སྦར་མོར་བཅུག་སྟེ་འདི་འཆིའམ་གསོན་ཟེར་བས། དེ་ཁྱོད་ཀྱི་སྙིང་རྗེ་ལ་རག་ལས་སོ་ཞེས་གསུངས། ང་ཕྱི་ནང་གང་དུ་འགྲོ་བ་འདུག་དྲིས་པར། སློབ་དཔོན་གྱིས་དེ་ཁྱོད་ཀྱི་འདོད་དོན་གང་ན་ཡོད་པ་དེར་རག་ལས་སསོ་གསུངས། དེ་བས་རྟ་དབྱངས་ཀྱིས། ད་རང་རེ་གཉིས་རྩོད་པ་བྱའོ་ཟེར་བ་ལ་སློབ་དཔོན་གྱིས་ཞལ་གྱིས་བཞེས། རྒྱལ་པོ་དཔང་དུ་བཞག་རྟེ་སུ་ཕམ་པ་དེ་གང་རྒྱལ་བའི་ཕྱོགས་ཀྱི་བསྟན་པ་ལ་འཇུག་དགོས་པ་བྱས། རྒྱལ་ཕམ་ཤན་འབྱེད་ཀྱི་ཕྱི་ནང་གི་པཎ་དྲིཏ་རྩོད་པ་མཐར་དབྱུང་གི་དཔང་པོ་དུ་མའི་ཁྲི་ཡང་བཤམས། ནངས་པར་ཁྲི་སོ་སོར་འཁོར་དང་བཅས་པ་འཁོད་པའི་དབུས་སུ་རྟ་དབྱངས་ན་རེ། མིག་གཅིག་པ་འདི་ཅི་སྨྲ་ཟེར་བ་ལ་སློབ་དཔོན་གྱིས། བརྒྱ་བྱིན་མིག་སྟོང་ལྡན་ཡང་དེ་ཉིད་མཐོང་བ་མེད། དྲག་པོར་མིག་གསུམ་ལྡན་ཡང་དེ་ཉིད་མཐོང་བ་མེད། ཨྭརྱ་དེ་ལྦ་མིག་གཅིག་པ་ནི་གང་ཡིན་པས། སྲིད་པ་གསུམ་པོ་མ་ལུས་པ་ཡིད་དེ་ཉིད་མཐོང༌། ཞེས་གསུངས་པས། རྟ་དབྱངས་ན་རེ། ཁྱོད་ཀྱིས་ངའི་རྩོད་ཟླ་མི་ཡོང་བས། ངའི་སྲིང་མོ་འདི་དང་རྩོད་ཅིག་ཟེར་བ་ལྟར། སྲིད་མོ་ལྷ་མོ་ཨུ་མ་རྩོད་དུ་བྱུང་བས། དགེ་བསྙེན་ངོ་ཚ་མེད་པ་ལུས་གཅེར་བུར་ཕྱུང་བ་མཚན་མ་གྱེན་དུ་བསྒྲེངས་པ་ཞིག་ཏུ་སྤྲུལ་པས་ལྷ་མོ་ཨུ་མ་ངོ་ཚ་ནས་བྲོས་སོ། དེ་ནས་རྟ་དབྱངས་ཀྱིས་ངའི་ནེ་ཙོ་འདི་དང་རྩོད་ཅིག་ཟེར་བ་ན། ཚངས་པའི་སྲུལ་པ་ནེ་ཙོ་རྩོད་དུ་བྱུང་བ་ལ༌། བྱི་ལ་བཏང་ནས་ནེ་ཙོའི་རྐེ་བཅད་པས། རྟ་དབྱངས་ན་རེ། ནང་པ་སངས་རྒྱས་པར་ཁས་འཆེ་བ་དང་སྲོག་གཅོད་པ་འགལ། ཁྱོད་ལ་སྡིག་པ་འོང་ཟེར་བ་ལ་སློབ་དཔོན་ཨྭརྱ་དེ་ལྦས། ལྷོ་ཕྱོགས་དཔལ་གྱི་རིར་སྡིག་སྦྱོང་བྱེད་པའི་སློབ་དཔོན་བཞུགས་ཡོད་གསུངས། དེས་སྡིག་སྦྱོང་བྱས་པས་ཁྱོད་ཀྱི་སྡིག་པ་བྱང་ངམ་ཟེར་བ་ལ། འོ་ན་བྱི་ལས་ནེ་ཙོ་བསད་པའི་སྡིག་པ་ང་ལ་འོང་ངམ་གསྲུང༌། དེ་ནས་རྟ་དབྱངས་ཀྱིས། ངའི་ཐོད་ལེ་ཀོར་དང་རྩོད་ཅིག་ཟེར་ནས། ཁྱབ་འཇུག་གི་སྤྲུལ་པ་ཐོད་ལེ་ཀོར་སོ་ཕག་གི་སྟེང་དུ་བསྐྱུར་བྱུང་བས། སློབ་དཔོན་གྱིས་མར་ནག་བསྐུས་ནས་རི་མོ་མ་བྱུང་བས་རྟ་དབྱངས་ངོ་གནོང་ཞིང་སྐྱེངས་པར་གྱུར། འོན་ཀྱང་སྔར་དབང་ཕྱུག་གིས་མཆོག་བྱིན་པར་རློམ་སྟེ་སློབ་དཔོན་དང་ལྷན་ཅིག་སྩོད་པ་ལ་ཞུགས་པ་ན། རྟ་དབྱངས་ཀྱི་འདོད་ཚུལ་རྣམས་སློབ་དཔོན་གྱིསདྲི་མ་མེད་པའི་རིགས་པ་སྟོང་ཕྲག་གིས་སུན་ཕྱུངས་ཏེ། རྟ་དབྱངས་རྣམ་པ་ཀུན་ཏུ་ཕམ་པར་མཛད། དེ་ནས་རྟ་དབྱངས་ཀྱིས། ད་རྫུ་འཕྲུལ་འགྲན་ཟཝར་ནས་བརྒྱ་བྱིན་མིག་སྟོང་ཡོད་པ་ཞིག་ཏུ་སྤྲུལ་བར་རློབ་དཔོན་གྱིས་ཕྱག་སྟོང་སྤྱན་སྟོང་དུ་སྤྲུལ་ཏེ་ཟིལ་གྱིས་མནན། རྟ་དབྱངས་ཀྱི་ཁ་ནས་མེ་ཕྱུང་བ་སློབ་དཔོན་གྱིས་ཞལ་ནས་ཆུ་ཕྱུང་སྟེ་བསད། རྟ་དབྱངས་ཀྱིས་ནམ་མཁར་དཀྱིལ་འཁོར་བྲིས་པ་སློབ་དཔོན་གྱིས་རྫུ་འཕྲུལ་གྱི་རླུང་གིས་བསུབས་པས། རྩོད་པ་དང༌། ནུས་པ། རྫུལ་འཕྲུལ་སོགས་སྒོ་དུ་མས་རྟ་དབྱངས་ཕམ་སྟེ། ཆུ་བོ་གང་གྭར་ལྕེབས་པར་བརྩམས་པ་ན། རྒྱལ་པོས་རྟ་དབྱངས་བཀའ་སྟེ་སྣོད་མང་པོ་བཞུགས་པའི་གཙུག་ལག་ཁང་ཞིག་ཏུ་བཅུག། དེར་རྟ་དབྱངས་ཀྱིས་མདོ་རྒྱུད་བསྟན་བཅོས་རྣམས་ལ་བལྟས་པས། ཕྱོགས་འཛིན་གྱི་འཆིང་བ་གྲོལ་ཞིང། ལྷག་པར་འཇམ་དཔལ་རྩ་རྒྱུད་ཀྱི་གླེགས་བམ་བཀླགས་པས། སློབ་དཔོན་ཀླུ་སྒྲུབ་ཡབ་སྲས་ལུང་གིས་ཟིན་ཚུལ་དང། རང་ཉིད་ཀྱང་ལུང་གིས་ཟིན་པའི་ཚུལ་རྣམས་མཐོང་བས། རྒྱལ་བའི་བཀའ་ལ་སྙིང་ཐག་པ་ནས་ཡིད་ཆེས་ཏེ། སངས་རྒྱས་བཅོམ་ལྡན་འདས་ལ་བསླུ་བ་མེད་པའི་ངེས་པ་རྙེད་ནས་སློབ་དཔོན་ལ་རབ་ཏུ་བྱུང་བར་ཞུས་པ་བཞིན། སློབ་དོན་ཨྭརྱ་དེ་ལྦས་རྟ་དབྱངས་སློབ་དཔོན་ཀླུ་སྒྲུབ་ཀྱི་སྤྱན་སྔར་ཁྲིད་དེ། རབ་ཏུ་བྱུང་ནས་མདོ་རྒྱུད་ཀྱི་བསྟན་བཅོས་མཐའ་དག་ལ་མཁས་པའི་ཕུལ་དུ་གྱུར། དེ་ནས་སློབ་དཔོན་འཕགས་པལྷ་དཔལ་ནྭ་ལེན་དྲར་ཡུན་རིང་བཞུགས་མཐར་སྐུ་མྱང་ངན་ལས་འདས་པའི་ཚུལ་བསྟན་ཏོ།

སློབ་དཔོན་ཕྱོགས་ཀྱི་གླང་པོ། 

མཁས་མཆོག་དབྱིག་གཉེན་ལ་སློབ་མ་རང་ལས་མཁས་པ་བཞི་བྱུང་བའི་ནང་ནས་ཚད་མ་རང་ལས་མཁས་པ་སློབ་དཔོན་ཕྱོགས་ཀྱི་གླང་པོ་ནི༑རྒྱ་གར་ལྷོ་ཕྱོགས་ཀྱི་གྲོང་ཁྱེར་སིངྒ་བཀྟ་ཞེས་བྱ་བ་ཀཙཉའི་ཡུལ་དང་ཉེ་བར་བྲམ་ཟེའི་རིགས་སུ་སྐུ་འཁྲུངས། ཆུང་ངུའི་དུས་ནས་མུ་སྟེགས་པའི་རིག་བྱེད་ཀྱི་གཞུང་དང༌། གྲུབ་མཐའི་གནད་ཐམས་ཅད་ལ་མཆོག་ཏུ་མཁས་ཤིང༌། མང་བཀུར་སྡེ་ལྔའི་ནང་ཚན་གནས་མ་བུ་བའི་སྡེ་པའི་གྲུབ་མཐའ་འཛིན་པ་མཁན་པོ་གླང་པོ་བྱིན་པ་ལས་རབ་ཏུ་བྱུང་བས་མཁན་པོའི་མཚན་ཟུར་ལས་ཕྱོགས་ཀྱི་གླང་པོ་ཞེས་གྲགས། མཁན་པོ་དེ་ཉིད་ལས་གནས་མ་བུ་བའི་ལུགས་ཀྱི་སྡེ་སྣོད་གསུམ་ལ་མཁས་པར་སྦྱངས། མཐར་སློབ་དཔོན་དབྱིག་གཉེན་གྱི་དྲུང་དུ་བྱོན་ནས་ཐེག་པ་ཆེན་ཆུང་གི་སྡེ་སྣོད་མཐའ་དག་བུམ་པ་གང་བྱོའི་ཚུལ་དུ་གསན། ཐེག་པ་ཆེན་པོའི་མདོ་སྡེ་ལྔ་བརྒྱ་ཙམ་བཟུང་ཞིང་ཞལ་འདོན་དུ་མཛད་པར་གྲགས། སྔགས་ཀྱི་སློབ་དཔོན་ཞིག་གི་དྲུང་ནས་འཇམ་དབྱངས་ཀྱི་ཆོས་བསྐོར་གསན་ཏེ་སྒྲུབ་པ་ཉམས་ལེན་མཛད་པས་འཇམ་དབྱངས་ཀྱི་ཞལ་དངོས་སུ་གཟིགས་ཤིང༌།དེ་ནས་བཟུང་སྐུ་དང་གསུང་གི་སྣང་བ་ནམ་འདོད་དུ་སྕོལ་བ་ཞིག་བྱུང༌། ཨོ་ཌི་བི་ཤའི་ནགས་ཚལ་དུ་དབེན་པའི་བྲག་ཕུག་ཏུ་བཞུགས་ནས་བསམ་གཏན་ལ་བརྩོན་པར་མཛད་མུར་ལོ་འགའ་འདས་པ་ན། ཤྲིའ་ནཱ་ལེདྲནར་མུ་སྟེགས་ཀྱི་རྩོད་པ་ཆེར་བྱུང་བས་དེར་བྱོན་ཏེ་རྟོག་གེའི་རིགས་པ་ཤིན་ཏུ་བྱང་ཞིང་ཐུབ་པར་དཀའ་བ་བྲམ་ཟེ་སུ་དུར་ཛ་ཡ་ཞེས་པ་དེས་གཙོས་མུ་སྟེགས་ཀྱི་རྒོལ་བ་ངན་པ་ཐམས་ཅད་དྲི་མ་མེད་པའི་རིགས་པ་བརྒྱ་ཕྲག་གིས་ཚར་བཅད་དེ་སངས་རྒྱས་ཀྱི་བསྟན་པ་ལ་བཀོད། དེར་དགེ་འདུན་རྣམས་ལ་མདོ་སྡེ་དུ་མ་གསུངས་ཤིང༌། དམིགས་བརྟག་སོགས་ཚད་མའི་བསྟན་བཅོས་བརྒྱ་རྩ་གཅིག་མཛད་པར་གྲགས།སླར་ཡང་ཨོ་ཌི་བི་ཤའི་ཚལ་དུ་ཕེབས་ནས་སྤོང་བ་བསམ་གཏན་ལ་རྩེ་གཅིག་ཏུ་གཞོལ་བར་མཛད་པའི་སྐབས་ཤིག་ཏུ་སྔར་རང་ཉིད་ཀྱིས་བརྩམས་པའི་ཚད་མའི་བསྟན་བཅོས་རྣམས་འཐོར་བ་བཞིན་དུ་གྱུར་པས། འཐོར་བ་བསྡེབས་པའི་བསྟན་བཅོས་ཚད་མ་ཀུན་ལས་བཏུས་པ་བརྩམ་པར་དགོངས་ཏེ་མཆོད་བརྗོད་དང་རྩོམ་པར་དམ་བཅའི་ཚིགས་བཅད་དུ། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ནས། །ཚད་མ་བསྒྲུབ་ཕྱིར་རང་གི་གཞུང་ཀུན་ལས། །བཏུས་ཏེ་སྣ་ཚོགས་འཐོར་རྣམས་འདིར་གཅིག་བྱ། །ཞེས་ཐོད་ལེ་ཀོར་ལ་བྲིས་པ་ཙམ་གྱིས་ས་གཡོས་ཤིང༌། སྒྲ་གྲགས་པ་དང༌། འོད་ཀྱི་སྣང་བས་ཕྱོགས་ཀུན་ཏུ་ཁྱབ་པར་གྱུར་པས་མུ་སྟེགས་ཐུབ་རྒྱལ་ནག་པོས་དེ་གང་གི་ལྟས་ཡིན་སྙམ་དུ་ཟག་བཅས་མངོན་ཤེས་ཀྱིས་བརྟགས་པས་ཤེས་ཏེ། ཕྲག་དོག་གིས་སློབ་དཔོན་བསོད་སྙོམས་ལ་ཕེབས་ཤུལ་དུ་འོངས་ནས་ལན་གཉིས་བསུབས་པ་དང༌། སློབ་དཔོན་གྱིས་ཐེངས་གསུམ་པ་བྲིས་ཏེ། འདི་ཀུ་རེ་དང་ཀྱལ་ཀའི་ཕྱིར་བསུབ་པ་ཡིན་ན་དགོས་པ་ཆེན་པོས་ཡོད་པས་མ་བསུབ་ཅིགཕྲག་དོག་གིས་ཡིན་ན་ནི་བློ་ལ་ཡོད་པས་བསུབ་པའི་ངལ་བ་འབྲས་མེད་ཡིན། གལ་ཏེ་ཚིག་དོན་ནོར་ཏེ་རྩོད་པར་འདོད་ན་ལུས་སྣང་བར་གྱིས་དང༌།བརྩད་པར་བྱའོ་ཞེས་བྲིས་ཏེ་བཞག བསོད་སྙོམས་ལ་གཤེགས་ཤུལ་དུ་མུ་སྟེགས་པས་སླར་བསུབ་ཏུ་འོངས་པས་ཡི་གེ་དེ་མཐོང་ནས་བསྡད་དོ།།སློབ་དཔོན་ཕྱིར་བྱོན་པ་དང་བསྟན་པ་རྒྱན་དུ་བཙུགས་ཏེ་དངོས་སུ་བརྩད་པས་ཁོ་པ་ལན་མང་ཕམ་པས། ད་ཁྱོད་སངས་རྒྱས་ཀྱི་བསྟན་པ་ལ་ཞུགས་ཤིག་ཅེས་གསུངས་པར་ཁོས་ད་དུང་རྫུ་འཕྲུལ་འགྲན་དགོས་ཞེས་ཁ་ནས་མེ་སྤར་ཏེ་སློབ་དཔོན་གྱི་ན་བཟའ་དང༌། ཡོ་བྱད་བསྲེགས་ཤིང་སློབ་དཔོན་ཡང་ཚིག་ལ་ཁད་བྱུང་སྟེ།སློབ་དཔོན་ཐུགས་ཤིན་ཏུ་སྐྱོ་ནས་སེམས་ཅན་ཐམས་ཅད་ཀྱི་དོན་ལྟ་ཅི། འདི་གཅིག་པུའི་དོན་ཡང་མི་ནུས་ན། འདི་འདྲའི་སེམས་ཅན་མ་རུང་པ་མཐའ་ཡས་པའི་ཕྱིར་གཞན་དོན་བྱ་ནུས་པ་མི་འདུག་སྙམ་པ་དང་བཅས་བྱང་ཆུབ་ཀྱི་སེམས་འདོར་བར་བརྩམས་ཏེ་ཐོད་ལོ་ཀོར་ནམ་མཁར་འཕངས་པས་མར་མ་བབས་པས་ཅི་ཡིན་སྙམ་ནས་ནམམཁར་གཟིགས་པས་རྗེ་བཙུན་འཇམ་དཔལ་དབྱངས་དངོས་སུ་བྱོན་ནས། བུ་མ་བྱེད་མ་བྱེད་ཐེག་པ་དམན་པ་དང་ཕྲད་པ་ལས་བློ་གྲོས་ངན་པ་སྐྱེས་ཏེ། ཁྱོད་ཀྱི་བསྟན་བཅོས་འདི་ལ་མུ་སྟེགས་ཚོགས་ཀྱི་གནོད་མི་ནུས་པར་ཤེས། ཁྱོད་ཀྱི་སངས་རྒྱས་མ་ཐོབ་ཀྱི་བར་དུ་དགེ་བའི་བཤེས་སུ་ང་འགྱུར་གྱི། ཕྱི་མའི་དུས་ན་བསྟན་བཅོས་ཀུན་གྱི་མིག་ཏུ་འདི་འགྱུར་རོ།། ཞེས་གསུང་སྟེ་གནང་བ་སྩལ་བ་ལྟར་ཚད་མ་ཀུན་ལས་བཏུས་པ་གཞུང་རྫོགས་པར་བརྩམས་སོ།། དེ་ནས་བསམ་གཏན་ལ་རྩེ་གཅིག་ཏུ་གཞོལ་བས་སངས་རྒྱས་མང་པོའི་ཞལ་གཟིགས་ཤིང་ཏིང་ངེ་འཛིན་གྱི་སྒོ་མང་པོ་ཐོབ། ཕྱི་རོལ་དུ་ལྷ་རྣམས་ཀྱིས་མེ་ཏོག་གི་ཆར་ཕབ། ནགས་ཚལ་འདིའི་ལྗོན་ཤིང་དང་མེ་ཏོག་རྣམས་ཀྱང་ངང་གིས་སློབ་དཔོན་གྱི་ཕྱོགས་སུ་མགོ་དུད་པར་གྱུར། གླང་པོ་ཆེ་སོགས་རི་དྭགས་རྣམས་ཀྱང་སློབ་དཔོན་གྱི་ཞབས་ལ་འདུད་པའི་ཚུལ་བྱེད་པ་ཡུལ་དེའི་རྒྱལ་པོ་འཁོར་བཅས་ཀྱི་མཐོང་ནས་ངོ་མཚར་སྐྱེས་ཏེ་ཞབས་ལ་ཕྱག་བྱས་སོ།།དེ་རྗེས་ལྷོ་ཕྱོགས་ཀྱི་རྒྱུད་ཡུལ་ཐ་དད་པའི་མུ་སྟེགས་པའི་རྒོལ་ངན་ཚད་བཅད་ཅིང༌། སྔར་གྱི་སློབ་དཔོན་རྣམས་ཀྱིས་བཙུགས་པའི་ཆོས་གཞི་ཉམས་པ་ཕལ་ཆེར་སོར་ཆུད་པར་མཛད། སླང་ཡང་ཨོ་ཌི་བི་ཤའི་ཡུལ་དུ་ཕེབས་ནས་བློན་པོ་བྷ་དྲ་པཱ་ལི་ར་སོགས་རྒྱལ་བའི་བསྟན་པ་ལ་བཙུད། བྲམ་ཟེ་དེས་གཙུག་ལག་ཁང་བཅུ་དྲུག་བཞེངས་ཤིང༌། དེ་རེ་རེར་དགེ་འདུན་གྱི་སྡེ་ཆེན་པོ་རེ་བཙུགས། གཙུག་ལག་ཁང་རེ་རེར་ཡང་ཆོས་གཞི་དུ་མ་ཡོད་པ་བྱས། སྐྱེ་བོ་རྣམས་སངས་རྒྱས་ཀྱི་ཆོས་ལ་ཡིད་ཆེས་པའི་སླད་དུ་ཨ་རུ་རའི་སྡོང་པོ་སྐམ་པོ་ཞིག་ལ་བདེན་ཚིག་བརྗོད་དེ་སོར་ཆུད་པར་མཛད། དེ་ལྟར་སློབ་དཔོན་འདིས་མུ་སྟེགས་ཀྱི་རྒོལ་ངན་ཐམས་ཅད་ཡང་དག་རིགས་པས་ཚར་བཅད་པར་བརྟེན། རྩོད་པའི་ཁྱུ་མཆོག་ཏུ་གྲགས་ཤིང༌། ཆོས་ཀྱིས་སྦྲེལ་བའི་སློབ་མས་ནི་ཕྱོགས་ཐམས་ཅད་དུ་ཁྱབ་པར་ཡོད། ཕྱི་བཞིན་འབྲང་བའི་དགེ་སློང་ནི་གཅིག་ཀྱང་ཡོངས་སུ་མ་བཟུང༌། འདོད་པ་ཆུང་ཞིང་ཆོག་ཤེས་པས་ཇི་སྲིད་འཚོ་བའི་བར་སྦྱངས་པའི་ཡོན་ཏན་བཅུ་གཉིས་ལ་གནས་པའི་ངང་རྒྱལ་བསྟན་སྤེལ་བའི་མཛད་པ་རྒྱ་ཆེར་བསྐྱངས་ཏེ་མཐར་ཨོ་ཌི་བི་ཤའི་ནགས་ཚལ་དབེན་པ་ཞིག་ཏུ་དམ་པའི་རང་རྟགས་ངོམ་བཞིན་པར་སྐུ་མྱ་ངན་ལས་འདས་སོ།།

སློབ་དཔོན་དབྱིག་གཉེན།

འཕགས་པ་ཐོགས་མེད་དང་ཡུམ་གཅིག་པ་བྲམ་ཟེའི་རིགས་སུ་སྐུ་འཁྲུངས། ནར་སོན་པ་ན་ཡུམ་གྱིས་བསྐུལ་ཏེ་ནཱ་ལེདྲནར་ཕེབས་ནས་རབ་ཏུ་བྱུང༌། བློ་རྣོ་བའི་ཆོ་ག་བྱས་པ་ནས་མང་དུ་ཐོས་པ་དང་ཏིང་ངེ་འཛིན་ཐོབ་པའི་བར་གཅེན་ཐོགས་མེད་ཀྱི་སྐབས་དང་མཚུངས་ཞིང༌། སྡེ་སྣོད་གསུམ་སོགས་བསྟན་བཅོས་དུ་མ་ལ་མཁས་པར་སྦྱངས། ད་དུང་ཆོས་མངོན་པའི་སྡེ་སྣོད་ཀྱི་དགོངས་དོན་ངེས་པའི་ཕྱིར་དུ། ཁ་ཆེའི་ཡུལ་དུ་བྱོན་ནས་ཁ་ཆེའི་མཁས་པ་ཆེན་པོ་དགེ་འདུན་བཟང་པོ་ལས་བསྟན་བཅོས་བྱེ་བྲག་བཤད་མཛོད་ཆེན་མོ་དང༌། སྡེ་པ་བཅོ་བརྒྱད་ཀྱི་བསྟན་བཅོས་སོ་སོ་དང༌། སྡེ་པ་སོ་སོའི་མདོ་སྡེ་དང་འདུལ་བ་མི་འདྲ་བའི་ཁྱད་པར་རྣམས་དང༌། མུ་སྟེགས་ཅན་ལྟ་བ་དྲུག་པོ་རྣམས་ཀྱི་གཞུང་ལུགས་མཐའ་དག་དང༌། རྟོག་གེའི་ཚུལ་མཐའ་དག་ལེགས་པར་གསན་ཏེ་དོན་གྱི་གནད་མཐའ་དག་ཐུགས་སུ་ཆུད་པར་མཛད་དེ་མཁས་པའི་གོ་འཕང་བརྙེས། ཁ་ཆེའི་ཡུལ་དུ་གདུལ་བྱ་གྲངས་ལས་འདས་པར་ཆོས་མང་དུ་སྟོན་པར་མཛད། དེ་ནས་ནཱ་ལེདྲནར་བྱོན་ཏེ་སྡེ་སྣོད་འཛིན་པ་མང་པོ་ལ་ཆོས་རྒྱ་ཆེར་སྟོན་ཅིང་བཞུགས་པ་ན།] གཅེན་ཐོགས་མེད་ཀྱིས་ས་སྡེ་ལྔ་སོགས་ཐེག་པ་ཆེན་པོའི་བསྟན་བཅོས་མང་དུ་བརྩམས་པ་གསན་ཅིང་གླེགས་བམ་གཟིགས་པས་ཐེག་ཆེན་ཐུགས་སུ་མ་ཆུད་ཅིང༌། ལྷག་པའི་ལྷ་ལ་གསན་པ་ཐུགས་ཡིད་མ་ཆེས་ནས། ཀྱེ་མ་ཐོགས་མེད་ནགས་སུ་ལོ། །བཅུ་གཉིས་བར་དུ་ཏིང་འཛིན་བསྒྲུབས། །ཏིང་འཛིན་མ་འགྲུབ་གླང་ཆེན་གྱི། །རྒྱབ་ཁལ་ལོངས་པའི་གྲུབ་མཐའ་བརྩམས། །ཞེས་སོགས་ཐེག་ཆེན་གྱི་ཆོས་དང་གང་ཟག་ལ་སྐུར་བ་བཏབ་པས། འཕགས་པ་ཐོགས་མེད་ཀྱིས་གསན་པ་ན། གཅུང་དབྱིག་གཉེན་ཐེག་ཆེན་གྱི་ཆོས་ལ་མ་དད་པ་བཟློག་པའི་ཕྱིར། སློབ་མ་གཉིས་ལ་མདོ་སྡེ་ས་བཅུ་པ་དང༌། བློ་གྲོས་མི་ཟད་པའི་མདོ་གཉིས་འཛིན་དུ་བཅུག་སྟེ། ཁྱོད་གཉིས་དབྱིག་གཉེན་གྱི་སར་སོང་ལ་སྲོད་དང་ཐོ་རངས་ལ་ཐོན་ཅིག་ཅེས་གསུངས་པ་ལྟར། དེ་གཉིས་ཀྱིས་མདོ་བཏོན་པ་དབྱིག་གཉེན་གྱིས་གསན་པ་དང༌། སྲོད་ལ་ཐེག་ཆེན་འདི་རྒྱུ་བཟང་ཡང་འབྲས་བུ་ཁ་གཡེར་བ་འདྲ་སྙམ། ཐོ་རངས་སུ་རྒྱུ་འབྲས་གཉིས་ཀ་བཟང་བ་འདུག་པ་ལ། ངས་སྐུར་བ་བཏབ་པ་ལྕེ་འདིས་ལན་པས་གཅོད་སྙམ་ནས་སྤུ་གྲི་འཚོལ་བའི་ཚེ། ཁོང་གཉིས་ཀྱིས་ལྗགས་བཅད་པར་མི་འཚལ། སྐུར་བ་བཏབ་པའི་སྒྲིབ་པ་སྦྱོང་ཐབས་གཅེན་ལ་མངའ་བས་དེར་གཤེགས་པར་ཞུ་ཞུས་པ་ལྟར། གཅེན་ཐོགས་མེད་ཀྱི་དྲུང་དུ་ཕྱིན་ཏེ་སྔོན་གྱི་ཉེས་པ་རྣམས་བཤགས་ཤིང༌། ཐེག་པ་ཆེན་པོའི་ཆོས་རྣམས་རིམ་གྱིས་གསན་ཏོ། །སྐབས་འདིར་འཕགས་པ་ཐོགས་མེད་ཀྱིས་བྱ་བ་ཐམས་ཅད་རྗེ་བཙུན་ལ་ཞུའོ་གསུངས་ནས་ཞུས་བར་མཛད་པ་དེ། གཅུང་གིས་མཁྱེན་ནས་ལྷག་པའི་ལྷ་དེ་བདག་ལ་བསྟན་པར་ཞུ་ཞེས་ཞུས་པ་ན། ངས་རྗེ་བཙུན་ལ་ཞུའོ་གསུངས་ནས་ཞུས་པ་ན། རྗེ་བཙུན་གྱིས་ཁོང་སོ་སོའི་སྐྱེ་བོ་ཡིན་ཞིང༌། དང་པོར་ཐེག་ཆེན་ལ་སྐུར་བ་བཏབ་པས། ཚེ་འདིར་ང་མཐོང་བའི་སྐལ་བ་མེད། ལས་ཀྱི་སྒྲིབ་པ་སྦྱང་བའི་ཕྱིར་དུ་ཐེག་ཆེན་གྱི་མདོའི་འགྲེལ་པ་མང་དུ་རྩོམས། གཙུག་གཏོར་རྣམ་རྒྱལ་མའི་གཟུངས་ཟློས། སྐྱེ་བ་ཕྱི་མར་མཇལ་ཞེས་གསུངས། དེ་ལྟ་བུའི་ཚུལ་གསན་ནས་སློབ་དཔོན་དབྱིག་གཉེན་ལྷག་པར་དད་དེ། ང་ཡི་ཕུ་བོ་ཀླུ་དང་འདྲ།།

ང་ནི་ཆར་འདོད་བྱ་དང་འདྲ། །ཀླུ་ཡིས་རྒྱལ་པོས་ཆར་ཕབ་ཀྱང༌། །བྱ་ཡི་གྲེ་བར་སོང་བ་མེད། །ཅེས་གསུངས་པར་གྲགས། སློབ་དཔོན་འདིས་རྒྱལ་བའི་བཀའ་འཛམ་གླིང་ནང་བཞུགས་པ་མཐའ་དག་ཐུགས་སུ་ཆུད་ཅིང༌། ལོ་རེའི་ནང་དུ་ལྕགས་ཀྱི་གཞོང་རིང་ཏིལ་མར་གྱིས་བཀང་བའི་ནང་དུ་བཞུགས་ནས་ཉིན་མཚན་སྦྲེལ་མ་བཅོ་ལྔའི་རིང་ལ་འབུམ་སྡེ་དགུ་བཅུ་གོ་དགུ་ལན་རེ་ཞལ་འདོན་དུ་མཛད། རྒྱལ་བ་མྱ་ངན་ལས་འདས་པའི་འོག་ཏུ་སློབ་དཔོན་འདི་ལས་ཐོས་པ་རྒྱ་ཆེ་བ་མ་བྱུང་བས་ཀུན་མཁྱེན་གཉིས་པ་ཞེས་འཕགས་ཡུལ་མཁས་པ་ལ་ཡོངས་སུ་གྲགས། སློབ་དཔོན་འདི་ཐེག་པ་ཆེན་པོ་ལ་ཞུགས་པའི་ཚེ་ཉན་ཐོས་ཀྱི་སྡེ་སྣོད་འཛིན་པ་སོགས་མཁས་པ་ལྔ་བརྒྱ་ཙམ་ཡང་ཐེག་ཆེན་ལ་ཞུགས་ཤིང༌། སྔ་ཕྱིར་མུ་སྟེགས་ཀྱི་རྒོལ་བ་ལྔ་བརྒྱ་ཙམ་སུན་ཕྱུང༌། སྤྱིར་བྲམ་ཟེ་དང་མུ་སྟེགས་ཅན་སྟོང་ཕྲག་ལྔ་བརྒྱ་ཙམ་སངས་རྒྱས་ཀྱི་བསྟན་པ་ལ་བཅུག ཐོགས་མེད་འདས་པའི་རྗེས་ནཱ་ལེདྲནའི་མཁན་པོ་མཛད་དེ་ཉིན་རེར་ཆོས་ཐུན་ཉི་ཤུ་རེ་ཆགས་མེད་གནང༌། ཆོས་མངོན་པ་མཛོད་སོགས་གསུང་རབ་ཀྱང་མང་དུ་བརྩམས། སྣོད་ལྡན་གྱི་སློབ་མ་དྲུག་ཁྲི་ལོངས་པ་བྱུང་ཞིང༌། དེ་དག་གི་ནང་ནས་མཆོག་ཏུ་གྱུར་པ་བཞི་སྟེ། འདུལ་བ་ལ་མཁས་པ་སློབ་དཔོན་ཡོན་ཏན་འོད། མངོན་པ་ལ་མཁས་པ་སློབ་དཔོན་བློ་གྲོས་བརྟན་པ། ཚད་མ་ལ་མཁས་པ་སློབ་དཔོན་ཕྱོགས་ཀྱི་གླང་པོ། ཕར་ཕྱིན་ལ་མཁས་པ་འཕགས་པ་གྲོལ་སྡེ་བཅས་སྐྱེས་ཆེན་དམ་པ་མང་དུ་བསྐྱངས། དེ་ལྟར་དགུང་ལོ་བརྒྱ་ལ་ཉེ་བའི་བར་དུ་བསྟན་པ་ལ་བྱ་བ་རྒྱ་ཆེར་མཛད། མཐར་དགོས་པ་མང་པོ་ཞིག་ལ་གཟིགས་ནས་སློབ་མ་སྟོང་གི་བསྐོར་ནས་བལ་ཡུལ་དུ་བྱོན་ཏེ། དེར་ཆོས་གཞི་བཙུགས་ཏེ་དགེ་འདུན་མང་པོ་ཐུག་མེད་དུ་འཕེལ་བར་མཛད་ཅིང་དགེ་འདུན་ཐམས་ཅད་ལ་ཐེག་པ་ཆེན་པོའི་ཆོས་རྒྱ་ཆེར་བསྟན། ཁྱིམ་བཙུན་ཆོས་གོས་གྱོན་ཏེ་ཞིང་རྨོ་བ་གཟིགས་ནས། སྟོན་པའི་བསྟན་པ་ཉམས་སོ་ཞེས་ཐུགས་འབྱུང་ནས། དགེ་འདུན་གྱི་དབུས་སུ་ཆོས་བསྟན་ཏེ། གཙུག་གཏོར་རྣམ་རྒྱལ་གྱི་གཟུངས་མགོ་ཞབས་བཟློག་པ་ལན་གསུམ་ཟློས་པས་དེ་ཉིད་དུ་མྱང་ངན་ལས་འདས་ཏེ་རེ་ཞིག་ཆོས་ཀྱི་ཉི་མ་ནུབ་བོ་ཞེས་གྲགས། དེར་སློབ་མ་རྣམས་ཀྱི་མཆོད་རྟེན་ཡང་བྱས་སོ།།

སློབ་དཔོན་ཆོས་གྲགས།

དཔལ་ལྡན་ཆོས་གྲགས་ནི། རྒྱ་གར་ལྷོ་ཕྱོགས་ཀྱི་ཡུལ་ཏྲི་མ་ལ་ཡར་བྲམ་ཟེའི་རིགས་སུ་སྐུ་འཁྲུངས། དགུང་ལོ་བཅོ་བརྒྱད་ཚུན་ལ་མུ་སྟེགས་ཀྱི་གྲུབ་མཐའ་ལ་ཤིན་ཏུ་མཁས་པར་སྦྱངས། སྐབས་ཤིག་ན་ནང་པའི་གསུང་རབ་འགས་རེ་གཟིགས་པས། ཤིན་ཏུ་དད་དེ་རང་གི་སྟོན་པ་སྐྱོན་ཅན་དུ་གཟིགས་ནས། ནང་པའི་བསྟན་པ་རྣམ་པར་དག་པར་གཟིགས་ཏེ་དགེ་བསྙེན་གྱི་ཆས་སུ་བསྒྱུར་བས། བྲམ་ཟེ་རྣམས་ཀྱིས་གནས་ནས་བསྐྲད། དེ་ནས་ཡུལ་དབུས་སུ་བྱོན་ཏེ་སློབ་དཔོན་ཆོས་སྐྱོང་ལས་རབ་ཏུ་བྱུང་། སྡེ་སྣོད་གསུམ་སོགས་བསྟོན་བཅོས་དུ་མར་མཁས་པར་བྱངས། སློབ་དཔོན་དབང་ཕྱུགས་སྡེ་ལས་ཚད་མ་ཀུན་བཏུས་ལན་གསུམ་དུ་གསན་པ་ལས། དང་པོའི་སྐབས་དབང་ཕྱུག་སྡེ་དེ་ཉིད་དང་མཉམ་པར་གྱུར། གཉིས་པའི་སྐབས་སུ་ཕྱོགས་གླང་མཉམ་པར་གྱུར།གསུམ་པའི་སྐབས་དབང་ཕྱུག་སྡེས་ཀྱང་ཕྱོགས་གླང་གི་དགོངས་པ་ཇི་བཞིན་མ་ལོན་པར་མཁྱེན་ནས་སློབ་དཔོན་དབང་ཕྱུག་སྡེ་ལ་ཞུས་པས་ཤིན་ཏུ་དགྱེས་ཏེ། ཁྱོན་ནི་ཕྱོགས་གླང་དང་མཉམ་སྟེ། ངའི་ནོར་བ་ཐམས་ཅད་སུན་ཕྱུངས་ལ། ཚད་མ་ཀུན་བཏུས་ཀྱི་འགྲེལ་པ་ཡང་སྩོམས་ཤིག་ཅེས་སློབ་དཔོན་ལས་གནང་བ་ཐོབ། དེ་ནས་སྔགས་ཀྱི་རྡོ་རྗེ་སློབ་དཔོན་གྱི་དྲུང་དུ་དབང་མནོས་ཏེ་ལྷག་པའི་ལྷ་བསྒྲུབས་པས་ཧེ་རུ་ཀས་ཞལ་མངོན་སུམ་དུ་བསྟན་ཏེ་ཁྱོད་ཅི་འདོད་གསུངས་པ་ལ། ཕྱོགས་ཐམས་ཅད་ལས་རྣམ་པར་རྒྱལ་བར་འཚལ་ལོ། ཞུས་པས་ཧ་ཧ་ཧཱུཾ། ཞེས་གསུངས་ནས་དེ་ཉིད་དུ་མི་སྣང་བར་གྱུར། དེ་ནས་མུ་སྟེགས་པའི་གྲུབ་མཐའ་ལ་མཁས་པ་འགྲན་གྱི་དོ་ཟླ་མེད་པ་བྲམ་ཟེ་གཞོན་ནུ་རོལ་པའི་དྲུང་དུ་གཡོག་པོར་བརྫུས་ཏེ་ཐབས་མཁས་ཀྱི་ཕྱི་རོལ་པའི་གསང་ཚིག་ཐམས་ཅད་མཁྱེན་པར་མཛད་དེ་བྲོས། རྗེས་སུ་གཞོན་ནུ་རོལ་པ་སོགས་ཕྱི་རོལ་གྲགས་ཅན་ལྔ་བརྒྱ་ཙམ་དང་བསྟན་པ་རྒྱན་བཙུགས་ནས་བརྩད་པས་གཞོན་ནུ་རོལ་པའི་ཐུན་མོང་མ་ཡིན་པའི་དམ་བཅའ་ལྔ་བརྒྱ་ཡོད་པ་ཐམས་ཅད་རེ་རེ་ནས་དྲི་མ་མེད་པའི་རིགས་པས་སུན་ཕྱུང་སྟེ་ཚར་བཅད། མཐར་གཞོན་ནུ་རོལ་པས་ཀྱང་ནང་པ་མཆོད་པར་བྱས་ཤིང་། བྲམ་ཟེ་ལྔ་བརྒྱ་བོ་དེ་རྣམས་ཀྱང་སངས་རྒྱས་ཀྱི་བསྟན་པ་ལ་རབ་ཏུ་བྱུང་ངོ་། བར་སྐབས་ཤིག་ལ་ཝྭ་རྭ་ཎ་སྭིར་ཕེབས་ཏེ། ཡུལ་དེའི་རྒྱལ་པོས་གཙོས་དཔང་པའི་ཚོགས་དུ་མ་དང་བཅས་པའི་དབུས་སུ་མུ་སྟེགས་པ་ཤཾ་ཀ་རྭཙརྱ་ཞེས་བྱ་བ་དང་བརྩད་པས་དེ་ཉིད་ཕམ། དེའི་སློབ་མ་བྷ་ཊྭ་ཙརྱ་ཡང་རིགས་པས་སུན་ཕྱུང་སྟེ་བྲམ་ཟེ་བློ་ཅན་སྟོང་ཕྲག་ཙམ་ནང་པའི་བསྟན་པ་ལ་བཅུག།གཞན་ཡང་བྲམ་ཟེ་བཟང་པོ་ཞེས་བྱ་བ་ལ་སོགས་པའི་རྟོག་གེ་ལ་ཤིན་ཏུ་མཁས་པ་མང་པོ་ཚར་བཅད་པའི་སྙན་གྲགས་ཀྱིས་ས་སྟེང་ཡོང་ལ་ཁྱབ། དེ་ནས་འབིགས་བྱེད་ཀྱི་རི་བོའི་ཁོངས་ན་རྒྱལ་པོ་མེ་ཏོག་ཀུན་ཏུ་རྒྱས་པ་ཞེས་བྱ་བ་ལོངས་སྤྱོད་ཤིན་ཏུ་ཆེ་བ་ཞིག་ཡོད་པ་དེའི་ཕོ་བྲང་དུ་བྱོན་པ་ན། རྒྱས་པོས་སུ་ཡིན་དྲིས་པས། ཤེས་རབ་ཅན་གྱི་ཕྱོགས་ཀྱི་གླང་པོ་སྟེ། ཙན་དྲ་གོ་མྭི་བརྗོད་པ་རྣམ་པར་དག །སྙན་དངགས་དཔའ་བོ་ལས་བྱུང་སྡེབ་སྦྱོར་མཁས། མེ་ཏོག་ཀུན་ཏུ་རྒྱས་པ་ལོངས་སྤྱོད་ལྡན། ཕྱོགས་ལས་རྣམ་པར་རྒྱལ་བ་ང་མིན་སུ། ཞེས་གསུངས་པ་ན། ཆོས་ཀྱི་གྲགས་པ་ཡིན་ནམ་ཞེས་ཞུས་པས། འཇིགས་རྟེན་ན་དེ་ལྟར་གྲགས་སོ་ཞེས་གསུངས་སོ། རྒྱལ་པོ་དེས་ཇི་ལྟར་གསོལ་བ་བཏབ་པ་ལྟར། སློབ་དཔོན་དེར་བཞུགས་ནས་ཚད་མ་སྡེ་བདུན་གྱི་བསྟན་བཅོས་ཀྱང་མཛད་དེ། གལ་ཏེ་ཆོས་ཀྱི་གྲགས་པ་ཡི། སྨྲ་བ་ཉི་མ་ནུབ་པ་ན། ཆོས་རྣམས་གཉིད་ལོག་ཡང་ན་ཤི། ཆོས་མ་ཡིན་རྣམས་ད་གཟོད་ལོངས། ཞེས་པའི་ཡི་གེ་ཞིག་རྒྱལ་པོའི་སྒོ་ཁང་དུ་བྲིས་པར་མཛད་དེ། ཕྱོགས་ལས་རྣམ་པར་རྒྱལ་བའི་རྔ་ཆེན་ཀུན་ཏུ་བསྒྲགས་པས་ཡུལ་དེར་སངས་རྒྱས་ཀྱི་བསྟན་པ་ཆེས་ཆེར་དར་བར་གྲགས་སོ། མདོར་ན་སློབ་དཔོན་འདིས་སྐུ་ཚེ་གང་བོར་བསྟན་པའི་བྱ་བ་ཁོ་ན་རྒྱ་ཆེར་མཛད་དེ། སངས་རྒྱས་ཀྱི་བསྟན་པར་བཅུག་པའི་གདུལ་བྱ་འབུམ་དུ་ཉེ་བ་ཙམ་བྱུང་། མཐར་ཡུལ་ཀ་ལིང་ཀར་གཙུག་ལག་ཁང་བཞེངས་ཤིང་སྐྱེ་བོའི་ཚོགས་ལ་ཐ་མའི་མང་དུ་གསུངས་ཏེ་སྐུ་མྱ་ངན་ལས་འདས་སོ།

སློབ་དཔོན་ཤྭཀྱ་འོད།

སློབ་དཔོན་ཤཱཀྱ་འོད་ནི།རྒྱ་གར་འཕགས་པའི་ཡུལ་གྱི་ནུབ་ཕྱོགས་སུ་སྐུ་འཁྲུངས། ཁ་ཆེའི་༼དེང་སང་རྒྱ་གར་གྱི་ཀ་ཤི་མིར།༽ ཡུལ་དུ་འགྲོ་དོན་རྒྱ་ཆེན་པོ་མཛད་ཅིང་འདུལ་བ་ཤིན་ཏུ་མཁས་པར་གྲགས། དུས་སྐབས་གང་དུ་བྱུང་མིན་གཞུང་གཞན་དུ་མི་གསལ་ཞིང༌། ལོ་རྒྱུས་གསལ་བར་འཁོད་པ་ཞིག་དེ་སྔ་མ་མཐོང༌། ཇོ་ནང་རྗེ་བཙུན་ཏཱ་ར་ནཱ་ཐས་མཛད་པའི་རྒྱ་གར་ཆོས་འབྱུང་ནང༌། རྒྱལ་པོ་གཽ་པཱ་ལས་རྒྱལ་སྲིད་ལོ་བཞི་བཅུ་ཞེ་ལྔ་བྱས་ཤིང༌། རྒྱལ་པོ་འདིའི་སྐུ་ཚེའི་རིང་ལ་ཞི་བ་འོད་དང༌། བསོད་ནམས་གྲགས་ཀྱི་སློབ་མ། སློབ་དཔོན་ཤཱཀྱ་འོད་ནུབ་ཕྱོགས་སུ་འཁྲུངས་ནས་ཁ་ཆེའི་ཡུལ་དུ་འགྲོ་དོན་མཛད་ཅེས་གསལ།བུ་སྟོན་ཆོས་འབྱུང་ལས། ཡོན་ཏན་འོད་ཀྱི་སློབ་མ་ཤཱཀྱ་འོད་ཡིན་ཟེར་ཏེ་མི་བདེན་ཏེ། འོད་ལྡན་ལས། བདག་གི་མཁན་པོ་མ་གྷ་དྷར་གནས་རྒྱན་དུ་གྱུར་པ་གྲགས་ཐོབ་པ། །བསོད་ནམས་གྲགས་པ་ལས་ནི་བདག་གིས་ཉན་ནས་རང་གི་འདུལ་བའི་ཆོ་ག་ཡི། །རྣམ་པར་བཤད་འདི་གསུམ་རིག་རྣམས་ཀྱིས་བཤད་པའི་ཕྱོགས་ཀྱི་གཞི་མཛད་བསྟན་པ་ཡིན། ཞེས་པ་དང༌། གཞན་ཡང༌། བླ་མ་དག་ནི་རིང་ན་བཞུགས་པ་གྲགས་པས་རྣམ་པར་བྱང་བ་ཞི་བའི་འོད་ཀྱིས་བདག །དྲན་པས་དགོངས་པ་མཛད་པར་གྱུར་ཅིག་སྙམ་ནས་བདག་གིས་འགྲེལ་པ་དོན་གསལ་བྱས་པ་ཡིན། །ཞེས་བསོད་ནམས་གྲགས་དང་ཞི་བ་འོད་ཀྱི་སློབ་མར་བཤད་དོ། །དེའི་སློབ་མར་ཤཱཀྱ་བཤེས་གཉེན་ཡིན་པ་སུམ་བརྒྱ་པར་བཤད་དོ། །ཤཱཀྱ་འོད་ཀྱིས་སུམ་བརྒྱ་པ་དང་དེའི་འགྲེལ་པ་འོད་ལྡན་མཛད་དོ། །འདུལ་བའི་མདོ་ལ་ཆོས་ཀྱི་བཤེས་གཉེན་གྱིས་རྒྱ་ཆེར་འགྲེལ་ཅིང༌། དེ་ཡོན་ཏན་འོད་ཀྱི་སློབ་མར་ཁ་ཅིག་འདོད་དོ། །ཤཱཀྱ་འོད་ཀྱི་སློབ་མ་སེང་གེའི་གདོང་ཅན། དེའི་སློབ་མ་ཛི་ན་མི་ཏྲ་ཡིན་ཟེར་བའང་བརྟག་པར་བྱ་དགོས་པར་སྣང༌། སློབ་དཔོན་ཤཱཀྱ་འོད་རང་ཉིད་ཀྱིས་མཛད་པའི་འདུལ་བ་འོད་ལྡན་ལས་ཀྱང་སློབ་དཔོན་བསོད་ནམས་གྲགས་པ་དང༌། ཞི་བ་འོད་གཉིས་ཀྱི་སློབ་མ་ཡིན་པར་གསུངས། སློབ་དཔོན་འདིས་མཛད་པའི་བསྟན་བཅོས་ལས་བོད་དུ་བསྒྱུར་ཞིང་གྲགས་ཆེ་བ་ནི། འདུལ་བ་སུམ་བརྒྱ་དང༌། དེའི་རང་འགྲེལ་འོད་ལྡན་གཉིས་དུས་རབས་བརྒྱད་པའི་མཇུག་ཏུ་རྒྱལ་པོ་ཁྲི་སྲོང་ལྡེའུ་བཙན་གྱི་དུས་སུ་ལོ་ཙཱ་བ་རྩངས་དེ་ཝདྲན་ར་ཀྵི་ཏས་བོད་སྐད་དུ་བསྒྱུར་བ། བསྟན་འགྱུར་མདོ་ཕྱོགས་པོད་ ༼ཧུ་པ།༽ ར་ཡོད་པ་སོགས་ཡིན་ཞེས་གྲགས་སོ།།

སློབ་དཔོན་ཡོན་ཏན་འོད།

སློབ་དཔོན་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་སློབ་དཔོན་ཡོན་ཏན་འོད་ནི། ཡུལ་བཅོམ་བརླག་ཏུ་བྲམ་ཟེའི་རིགས་སུ་སྐུ་འཁྲུངས། རིག་བྱེད་དང་བསྟན་བཅོས་མཐའ་དག་ལ་ལེགས་པར་སྦྱངས། ཕྱིས་སུ་རབ་ཏུ་བྱུང་ཞིང་བརྙེན་པར་རྫོགས་ནས་སློབ་དཔོན་དབྱིག་གཉེན་གྱི་དྲུང་དུ་ཐེག་དམན་གྱི་སྡེ་སྣོད་གསུམ་དང་ཐེག་པ་ཆེན་པོའི་མདོ་སྡེ་དུ་མ་ལ་ཡང་མཁས་པར་སྦྱངས། སྡེ་པ་ཐ་དད་པའི་འདུལ་བ་མཐའ་དག་ལ་མཁས་པར་མཁྱེན་ནས། འདུལ་བ་འབུམ་སྡེ་རྟག་ཏུ་ཐུགས་ནས་འདོན་པར་མཛད། ཡུལ་བཅོམ་བརླག་གི་གཙུག་ལག་ཁང་ཨ་གྲ་པུ་རི་ཞེས་པར་བཞུགས། ལྷན་གཅིག་ཏུ་གནས་པའི་དགེ་སློང་སྟོང་ཕྲག་ལྔ་རེ་ཡོད་ཅིང་། ཐམས་ཅད་བསྡམ་བྱའི་ཉེས་བྱས་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་ཡོད་ལ། མདོ་སྡེ་འཛིན་པ་དང་། མ་མོ་འཛིན་པའང་མང་པོ་ཡོད། འདུལ་བ་འབུམ་སྡེ་ཐེག་པ་ནི་ལྔ་བརྒྱ་ཙམ་མོ། ཚུལ་ཁྲིམས་རྣམ་པར་དག་པའི་སྟོབས་ཀྱིས་རྒྱལ་པོ་ཤྲི་ཧར་ཤའི་བློན་པོ་མང་ཏང་གར་ཛ་བྱ་བ་ལན་ཅིག་རྒྱལ་པོའི་ཆད་པས་མིག་ཕྱུང་བ་ཡང་སློབ་དཔོན་འདིས་སྨོན་ལམ་གྱི་སྟོབས་ཀྱིས་སོར་ཆུད། རྒྱལ་པོའི་བླ་མར་གྱུར་པས་ཉིན་ར་བཞིན་ཡོ་བྱད་དཔག་ཏུ་མེད་པའི་འདུ་བ་བྱུང་ཡང་དེ་མ་ཐག་ཐམས་ཅད་དགེ་བའི་རྒྱུར་བསྔོས་ཏེ། རང་ཉིད་སྦྱངས་པའི་ཡོན་ཏན་ལས་ཉམས་པ་མི་མངའ་ཞིང་། བསྟན་བཅོས་ནི་མདོ་རྩ་བ་དང་། འདུལ་བ་ལས་བརྒྱ་པ། ཀརྨ་ཤཏཀམ་སོགས་མཛད་དོ།།

 

ཡོང་ཁུངས། རྗེ་ཙོང་ཁ་པའི་དྲ་བ།

 

བརྒྱུད་སྐུལ།

མཆན་སྤེལ།