སྐྱིད་ཚལ་དགོན་དང་། བྱང་ཆུབ་གླིང་། ར་སྟོད་དགོན། ཕྱིར་མིག་ལུང་བཅས་ཀྱི་གནས་ཡིག

སྐྱིད་ཚལ་དགོན་དང་། བྱང་ཆུབ་གླིང་། ར་སྟོད་དགོན། ཕྱིར་མིག་ལུང་བཅས་ཀྱི་གནས་ཡིག

དང་པོ། སྐྱིད་ཚལ་དགོན།

 

ཆོས་འཁོར་ཡང་རྩེ་དགོན་ནས་མུ་མཐུད་སྤྱི་ལེ་བཅུ་གཅིག་ཙམ་སྣུམ་ནག་འཁོར་ལམ་བརྒྱུད་སོང་ན་ཚ་རགས་ཞེས་པར་འབྱོར་ཞེང་དེ་ནས་བྱ་ངོས་སུ་སྤྱིར་བཏང་འཁོར་ལམ་བརྒྱུད་སྤྱི་ལེ་གསུམ་ཙམ་སོང་ན་ཞབས་རིས་གྲོང་ཚོའི་སྟེང་དུ་དགོན་དེ་མཇལ་རྒྱུ་ཡོད། ཞབས་རིག་ཅེས་པ་ནི་དགོན་དེའི་ཆགས་དབྱིབས་རྗེ་བཙུན་སྒྲོལ་མའི་སྐུ་པང་ནང་དུ་ཆགས་པའི་སྐྱིད་ཚལ་དང་། དེའི་འདབས་ཀྱི་གྲོང་ལ་ཞབས་རེག་ཅེས་སྒྲོལ་མའི་ཞབས་ལ་རེག་པས་ཞབས་རེག་ཅེས་པ་རིམ་བཞིན་ཞབས་རིག་ཅེས་པར་སྒྲ་འགྱུར། ཐོག་མར་ས་སྐྱའི་བླ་མ་པཎ་ཆེན་ལྷ་དབང་བློ་གྲོས་ས་སྐྱ་ནས་ཕེབས་ཏེ་གམ་པ་ལའི་རྩེ་ནས་གཟིགས་སྐབས་གནས་དེ་ཐུན་མོང་མ་ཡིན་པར་གཟིགས་ནས་དེར་དགོན་ཞིག་འདེབས་དགོས་ཐུགས་ལ་འཁྲུངས་ཏེ་དགོན་དེ་འདེབས་གནང་མཛད། དེ་རྗེས་པཎ་ཆེན་གྱི་སྐུ་སྐྱེ་རྒྱལ་བ་བློ་གྲོས་ཆོས་འཕགས་ལྷ་རྟོགས་གཞིས་ཀ་ཞེས་པར་འཁྲུངས་ཏེ་མཛེས་པ་བསྐྱངས། དགེ་འདུན་ཞལ་གྲངས་ལྔ་བརྒྱ་ཙམ་ཟིན་ཞེས་གསུངས།

ས་སྐྱ་ངོར་ལུགས་ཕྱག་བཞེད་གནང་གི་ཡོད་པ་ལ་རྗེས་སུ་རྙིང་ལུགས་བྱང་གཏེར་ཡང་ཟུང་འབྲེལ་གནང་ཡོད་འདུག  སྔོན་འདུ་ཁང་ཀ་བ་ཉེར་བཞིའི་ནང་རྟེན་གཙོ་གསེར་ཟངས་ཀྱི་ཐུབ་དབང་ཐོག་སོ་གསུམ་ལྡན་གྱི་མཐའ་འཁོར་དུ་སྨན་འདམ་གྱི་ཉེ་སྲས་སྒོ་སྲུང་དང་བཅས་པ་དང་། རིན་ཆེན་ལས་བྲིས་པའི་འབུམ་རྒྱས་འབྲིང་བསྡུས་གསུམ། བཀའ་འགྱུར་བྲིས་མ། ས་སྐྱ་བཀའ་འབུམ། རྙིང་མ་བརྒྱུད་འབུམ་ལ་སོགས་དང། དབུ་རྩེའི་ལྷ་ཁང་ནང་གདུང་རྟེན་མང་པོ། འདུ་ཁང་གི་རྒྱབ་ལམ་འབྲས་ལྷ་ཁང་ཀ་བ་བཞིའི་ནང་དུ་གསེར་ཟངས་ཀྱི་གདུང་རྟེན་དང་། ལི་མ་དང་གསེར་ཟངས་ཀྱི་བླ་བརྒྱུད་ཆ་ཚང་། གཞན་ཡང་གནས་བརྟན་ལྷ་ཁང་། མགོན་ཁང་ཤར་ནུབ་གཉིས་ལས་ཤར་མགོན་པོ་ཕྱག་དྲུག་སོགས་དགེ་ལུགས་དང་། ནུབ་ས་ལུགས་ཀྱི་གུར་ཞལ་སོགས་མཇལ་རྒྱུ་ཡོད།

ད་ལྟ་སྔོན་གྱི་འདུ་ཁང་ཤུལ་དུ་གསར་བཞེངས་གནང་བའི་འདུ་ཁང་ཀ་བ་བརྒྱད་ལྡན་ནང་རྟེན་གཙོ་ཐུབ་དབང་དང་། གཡས་སུ་སྤྱན་རས་གཟིགས། གཡོན་དུ་གུ་རུའི་སྐུ་བརྙན་སོགས་འཇིམ་སྐུ་ཐོག་སོ་གཅིག་ལྡན་གསར་བཞེངས་གནང་བ་དང་། གཙོ་བོ་བྱང་གཏེར་ཕྱག་ལེན་གནང་གི་ཡོད།

ཡང་དེ་ནས་བྱང་ཤར་གྱི་རི་ལྡེབས་སུ་གཏེར་སྟོན་པདྨ་གླིང་པས་ཕྱག་བཏབ་གནང་བའི་སྒོམ་ཆེན་ཞེས་པ་དང་། ཡང་རྐང་ཐང་མར་ཆུ་ཚོད་གཅིག་ཙམ་སོང་ན་འཁྲུལ་པོ་ཞེས་པར་བཙུན་མའི་དགོན་ཞིག་དང་། ཆུ་ཚོད་གཉིས་ཙམ་སོང་ན་གཡའ་སྔོན་ཞེས་པར་བཙུན་མའི་དགོན་ཞིག་དང་། ཡང་ཆུ་ཚོད་གཉིས་ཙམ་སོང་ན་རི་སྣེ་ཞེས་པའི་གྲྭ་དགོན་སོགས་གི་རྗེས་ཤུལ་མཇལ་རྒྱུ་ཡོད།།

 

གཉིས་པ། བྱང་ཆུབ་གླིང་།

བྱང་ཆུབ་གླིང་། མཚན་རྒྱས་པར་བྱང་ཆུབ་གླིང་ལྔ་ཕན་བདེ་ལེགས་བཤད་གླིང་ཞེས་ཞུ། འཇང་སྨད་ནས་ཆུ་ཤུར་ངོས་སུ་སྤྱི་ལེ་བཅུ་ཙམ་སྣུམ་ནག་འཁོར་ལམ་བརྒྱུད་སོང་ན་ཧར་སག་ཅེས་པར་གྲོང་དུ་འབྱོར་ཞིང། འདི་ནས་བྱང་ངོས་སུ་སྤྱིར་བཏང་འཁོར་ལམ་བརྒྱུད་སྤྱི་ལེ་བཞི་ཙམ་སོང་ན་དགོན་དེར་སླེབས། དགོན་དེའི་ཁ་སྤྲོད་ཆུ་ཕར་ནང་དུ་ལྗོན་ཞེས་པའི་ཡུལ་དང་ལྷ་སའི་སྐྱིད་ཆུ་དང། ཡར་ཀླུང་གཙང་པོའི་འདུས་སོའང་གནས་དེར་ཡིན། ཐོག་མར་གནས་དེར་བཀའ་རྒྱུད་པའི་དགོན་ཆུང་ཞིག་ཡོད་པ་ལ་བདེ་རྗེས་རྒྱལ་བ་སྐུ་ཕྲེང་ལྔ་པའི་སྙིང་ཐིག་སྐོར་གྱི་ལྔ་པའི་ཆོ་ག་བཅུ་གསུམ་ཞེས་པ་ཕྱག་བཞེས་གནང་ཆེད་དུ་སྙིང་དགོན་དུ་བསྒྱུར་གནང་མཛད་སྟབས་གཞུང་དགོན་དུ་འགྱུར། སྨོན་ལམ་ཚོགས་ཆོས་སོགས་སུ་ཕེབས་དགོས་པ་དང་གཞུང་གི་གླུད་འགོང་བརྫོང་བ་སོགས་གནང་དགོས། སྔོན་འདུ་ཁང་ཀ་བ་ཉི་ཤུ་ཙམ་ནང་རྟེན་གཙོ་སྨན་འདམ་གྱི་རྒྱལ་བ་བྱམས་པ་ཐོག་སོ་གཉིས་ལྡན་དང་། གུ་རུ་དང་རྒྱལ་བ་ལྔ་པ་སོགས་ཀྱི་སྐུ་བརྙན་དང་དངུལ་གདུང་སོགས་ཡོད། དགེ་འདུན་ཞལ་གྲངས་བརྒྱ་མ་ཟིན་ཙམ་གྱིས་ལྔ་པའི་ཆོ་ག་བཅུ་ཙམ་ཕྱག་བཞེད་གནང་གི་ཡོད་ལ། ལོ་ལྟར་བོད་ཟླ་5ཚེས་10གུ་རུ་མཚན་བརྒྱད་ཀྱི་སྒོ་ནས་གར་འཆམ་ཡང་གནང་སྲོལ་ཡོད།

ད་ལྟ་སྔོན་གྱི་བཀའ་བརྒྱུད་ཀྱི་འདུ་ཁང་རེད་ཅེས་པ་ཉམས་གསོ་གནང་བའི་ནང་གུ་རུའི་སྐུ་བརྙན་དང་། རྒྱལ་བ་ལྔ་པའི་སྐུ་བརྙན་སོགས་འཇིམ་སྐུ་གསར་བཞེངས་གནང་བ་མཇལ་རྒྱུ་ཡོད།

གསུམ་པ། ར་སྟོད་དགོན།

ར་སྟོད་དགོན། མཚན་རྒྱས་པར་སྙེ་ཐང་བདེ་བ་ཅན་སྟག་ཚང་གསེར་སྲང་རྣམ་འགྲེལ་གྲྭ་ཚང་ར་བ་སྟོད་ཐོས་བསམ་ནོར་བུའི་གླིང་ངམ། བྱ་བྲལ་ཀུན་སྤངས་གྲྭ་ཚང་ཞེས་སོགས་མཚན་གྱི་རྣམ་གྲངས་ཙམ་དང། སྙེ་ཐང་སྒྲོལ་མ་ལྷ་ཁང་ནས་ནུབ་ངོས་སུ་སྣུམ་ནག་འཁོར་ལམ་བརྒྱུད་སྤྱི་ལེ་གསུམ་ཙམ་དང་། དེ་ནས་བྱ་ངོས་སུ་སྤྱི་ལེ་བཞི་ཙམ་བསྐྱོད་ན་གྲོང་དབུས་སུ་དགོན་དེ་མཇལ་རྒྱུ་ཡོད། ཐོག་མར་གནས་དེར་སེར་ཁྱིམ་བདེ་བ་ཅན་ཞེས་དགོན་དེ་མཇལ་རྒྱུ་ཡོད། ཐོག་མར་གནས་དེར་སེར་ཁྱིམ་བདེ་བ་ཅན་ཞེས་དགོན་ཞིག་ཡོད་པ་ལ་ཇོ་བོ་རྗེ་སྙེ་ཐང་དུ་བཞུགས་སྐབས་སྐ་བ་ཤཱཀྱ་དབང་ཕྱུག་གིས་གཙང་དགོན་དུ་བསྒྱུར་གནང་མཛད། དེ་རྗེས་རིམ་བཞིན་རྒྱར་སྐྱེས་དེ་གྲྭ་ཛང་གཅིག་དང་ཁང་ཚན་དགུ་བར་འཕེལ། ཁང་ཚན་དགུ་པོ་ནི་ཉ་ར་ཁང་ཚན་དང་། རྩེས་ཐང་ཁང་ཚན། གཉེར་ཤར་ཁང་ཚན། གསང་སྔགས་ཁང་ཚན། འཕྱོངས་རྒྱས་ཁང་ཚན། སྤྱན་གཡས་ཁང་ཚན། ཇོ་གདན་ཁང་ཚན། བྱམས་གླིང་ཁང་ཚན། ཆོད་པ་ཁང་ཚན་བཅས་ཡིན།

དེ་དག་གི་གྲྭ་རྒྱུན་ཡུལ་ལུང་དེ་དག་ནས་ཕེབས་དགོས་པ་དང། སྔོན་གྲྭ་རྒྱུན་ལྔ་བརྒྱ་ལྷག་ཡོད། དབུས་གཙང་གི་གདན་ས་ཆེན་པོ་གསུམ་སྟེ་བདེ་བ་ཅན་དང། སྔོན་གྲྭ་རྒྱུན་ལྔ་བརྒྱ་ལྷག་ཡོད། དབུས་གཙང་གི་གདན་ས་ཆེན་པོ་གསུམ་སྟེ་བདེ་བ་ཅན་དང། གསང་ཕུ། གུང་ཐང་བཅས་ཀྱི་ཡ་གྱལ་ཡིན། སྔོན་གྲྭ་ཚང་འདུ་ཁང་ཀ་བ་བཞི་བཅུའི་གཙང་ཁང་སྦུགས་མར་རྟེན་གཙོ་སྨན་འདམ་གྱི་དུས་གསུམ་སངས་རྒྱས་ཀྱི་ཐུབ་དབང་སྐུ་ནི་རྒྱལ་བ་འཇམ་དཔལ་རྒྱ་མཚོའི་ཐུགས་དམ་གྱི་རྟེན་ཡིན་པ་ཐོག་སོ་གཉིས་ལྡན་ལ་ཉེ་སྲས་སྒོ་སྲུང་དང་བཅས་རྟེན་སྐུ་བརྙན་བཞུགས་པ། ཁང་ཚན་སོ་སོར་ཡང་རྟེན་དང་བརྟེན་པ་བཅས་བཞུགས་སུ་གསོལ་ཡོད།

ད་ལྟ་ཉམས་གསོ་གནང་བའི་གྲྭ་ཚང་འདུ་ཁང་ནང་སྔོན་གྱི་སྐུ་བརྙན་དེ་དག་གི་སྐུ་ཚབ་གསར་བཞེངས་གནང་བ་དང། བཀའ་འགྱུར། རྗེ་ཙོང་ཁ་པའི་གཟིམས་སྦུག་དང་བཞུགས་ཁྲི། ཀློང་རྡོལ་བླ་མ་རིན་པོ་ཆེའི་གསོལ་ལྕོག་གཞན་ཡང་ལྡེབས་རིས་རྙིང་མ་མང་པོ་བཅས་མཇལ་རྒྱུ་ཡོད།

ར་སྟོད་ཅེས་པ་ནི། སྔོན་གསང་ཕུར་ཁང་པ་མེད་སྟབས་ར་སྐྱོར་བསྐོངས་ནས་བཞུགས་གནང་མཛད་སྟབས་ར་སྟོད་ར་སྨད་ཅེས་པ་བྱུང་ཞེས་དང། ཡང་གསང་ཕུའི་གདན་ས་པ་དང་གླིང་སྨད་ཆོས་རྗེ་ཟུང་འབྲེལ་གནང་། དགེ་འདུན་ཕལ་ཆེ་བས་རྗེ་བླ་མར་དདཀྱང་ཉུང་ཤས་ཀྱིས་སུན་འབྱིན་བྱུང་བར་བརྟེན་གྲྭ་ཚང་གི་སྟོད་ཅེས་པ་དེ་ལྟར་བྱུང་ཞེས་གསུང།

གསེར་སྲས་ཞེས་པ་ནི། རྗེ་ཙོང་ཁ་པས་རྒྱལ་ཚབ་རྗེ་ལ་གསེར་སྲང་གང་གནང་ནས་ཁྱོད་ཀྱིས་རྣབ་འགྲེལ་གྲྭ་ཚང་ཞིག་ཐོབས་ཤིག་གསུངས་པར། རྒྱལ་ཚབ་རྗེས་གསེར་དེ་སྨར་ཁམས་པ་གྲགས་པ་རྒྱལ་མཚན་ལ་གནང་སྟེ་རྣམ་འགྲེལ་གྲྭ་ཚང་ཞིག་འདེབས་སུ་འཇུག་གནང་བས་གྲགས་པ་རྒྱལ་མཚན་གྱིས་གསེར་སྲང་གང་དེས་བདེ་བ་ཅན་ར་སྟོད་དགོན་དེ་རྣམ་འདྲེལ་གྱི་འཆད་ཉན་གནང་སར་བསྒྱུར་གནང་མཛད།

བྱ་བྲལ་ཞེས་པ་ནི། དགོན་དེའི་ཆོས་གཞིས་གཉེར་ཚང་དང་བཅས་བླ་བྲང་ལ་སྦྱར་ཏེ་བྱ་བ་ཀུན་སྤངས་པས་བྱ་བྲལ་ཀུན་སྤངས་གྲྭ་ཚང་ཞེས་པ་དེ་ནས་བྱུང་བ་བཅས་དང།

ཡང་དགོན་དེའི་ནུབ་ངོས་ནོར་བུ་རི་ཞེས་པའི་རི་ཞེས་པའི་རི་ལྡེབས་སུ་ཀློང་རྡོལ་བླ་མ་རིན་པོ་ཆེའི་རི་ཁྲོད་དང། དེའི་གཡས་སུ་སྒྲུབ་ཕུག་ཅིག་ཡོད་པ་ལ་རླུང་རྡོལ་སྒྲུབ་ཕུག་ཅེས་ཀློང་རྡོལ་བླ་མ་རིན་པོ་ཆེ་ལ་རྩ་རླུང་གི་རང་དབང་ཐོབ་ནས་སྒྲུབ་ཕུག་རྡོལ་བ་རེད་ཅེས་སྒྲུབ་ཕུག་དེར་ཐོག་མེད་པ་དང། ཀློང་རྡོལ། ཞེས་པའི་མཚན་ཡང་དེའི་ཟུར་ཆགས་གསུངས།

ཡང་དེའི་སྟེང་དུ་འགྲོ་མགོན་གཙང་པ་རྒྱ་རས་བཞུགས་མྱོང་བའི་སྒྲུབ་ཕུག་ཏུ་འབྲས་སྤུངས་ཀྱི་དགེ་ལམ་རིམ་པ་ངག་དབང་ཕུན་ཚོགས་ཀྱང་བཞུགས་མྱོང་བ། ཡང་དགོན་དེའི་ནུབ་བྱང་གི་རི་ལྡེབས་སུ་བསམ་གཏན་གླིང་ཞེས་ཞུ་བར་ཀློང་རྡོལ་བླ་མ་རིན་པོ་ཆེའི་དགུན་ཁའི་བཞུགས་གནས་དང་མཐར་དགོངས་པ་གཞན་དོན་དུ་ཕེབས་ས་དང་སྐུ་གདུང་བཞུར་འབུལ་ཞུ་སའང་གནས་དེར་ཡིན་ཅིང་དེར་གདུང་རྟེན་མཆོད་རྟེན་ཡང་བཞུགས། དེའི་གཡས་སུ་བྱ་རྒོད་སྒྲུབ་ཁང་དང། སྟེང་དུ་བྲག་ལྕོག་སྒྲུབ་ཁང་། ར་སྟོད་དགོན་པའི་རྒྱབ་རིར་མཁས་སྒྲུབ་ཕྱུང་པོ་རྣམ་རྒྱལ་གྱི་སྒྲུབ་ཕུག་ཡོད་པ་དེར་མགོན་པོ་ཕྱག་དྲུག་ཞལ་གཟིགས་པས་རི་དེ་ལའང་ར་སྟོད་མགོན་པོ་རི་ཞེས་ཞུ། མགོན་པོ་རིའི་ཤར་ངོས་སུ་རྨོག་ལྕོག་རིན་པོ་ཆེའི་བཞུགས་གནས་རྨོག་ལྕོག་རི་ཁྲོད། དགོན་དེའི་ཁ་སྤྲོད་ལྷོ་ངོས་སུ་ས་སྐྱའི་བླ་མ་དམ་པ་བསོད་ནམས་རྒྱལ་མཚན་གྱི་གདན་ས་ཆོས་རྫོང་ཞེས་པ་དང། དེའི་འོག་ཏུ་རྗེ་ཙོང་ཁ་པའི་སྒྲུབ་ཕུག་ཡོད་ལ་རྗེ་རིན་པོ་ཆེས་བདེ་མཆོག་གི་རྒྱུད་གསན་སའང་གནས་དེར་ཡིན། དེའི་འོག་ཏུ་ལག་ར་ཞེས་པར་མཐའ་འདུས་ཡང་འདུལ་གྱི་ཡ་རྒྱལ་སྲིན་པོ་གན་རྒྱལ་གྱི་ལག་སྟེང་དུ་འཁེལ་བའི་འཇམ་དགའ་ཆོས་ཁང་ཞེས་པ་ཁང་རྙིང་དེའང་མཇལ་རྒྱུ་ཡོད། ར་སྟོད་དགོན་ནས་མར་ཡོང་དུས་ལམ་འོག་ཏུ་ལྷ་རྒྱབ་སྤྲོད་ཅེས་པའི་ཕ་བོང་ཞིག་ལ་རྒྱབ་མདུན་གཉིས་གར་སྒྲོལ་མའི་སྐུ་བརྙན་རེ་ཡོད་པ་དེ་ནི་བླ་མ་རིན་པོ་ཆེས་དགོན་དེར་འདོད་ཡོན་རྒྱས་ན་སློབ་གཉེར་ལ་གནོད་པས་འདོད་ཡོན་བཀག་ཆེད་དུ་བཞེངས་པ་ཡིན་གསུངས། ཡང་དེ་དང་ཉེ་བར་མཆིང་མཛོད་རྩོམ་པ་པོ་རྒྱ་མཆིང་རུ་པའི་སྐུ་གདུང་མཆོད་རྟེན་ཞིག་ཡོད་པ་དང། མཆིང་རུ་པ་ར་སྟོད་དུ་ཡུན་རིང་བཞུགས་པའི་རྒྱུས་ཡོད།

བཞི་པ། ཕྱིར་མིག་ལུང།

ཕྱིར་མིག་ལུང། མཚན་གཞན་ལ་ཆོས་ལུང་མ་ཎི་དགོན་ཞེས་ཞུ། མགར་རོང་གྲོང་ནས་སྤྱི་ལེ་གཉིས་ཙམ་འཁོར་ལམ་བརྒྱུད་མར་བབས་ན་ཕྱིར་མིག་ལུང་གྲོང་སྟེང་དུ་ཇོ་དགོན་དེ་མཇལ་རྒྱུ་ཡོད། ཕྱིར་མིག་ལུང་ཞེས་པ་ནི། རྗེ་ཙོང་ཁ་པ་གནས་དེར་ཕེབས་ཏེ་ཕྱིར་ཕེབས་སྐབས་ཙི་ཙི་འབུམ་ཞེས་པ་ནས་ཕྱིར་གཟིགས་པས་ད་ལྟའི་དགོན་ཆགས་ཡུལ་དེའི་རི་སྣར་ཐོག་མར་སྟོད་ལུང་འབུམ་མོ་ཆེ་ཞེས་དགེ་བཤེས་སྤྱན་སྔ྄་བ་སོགས་བཀའ་གདམས་པའི་བླ་མ་གོང་མ་རྣམས་ཀྱི་བྱིན་རྟེན་བཞུགས་པའི་འབུམ་པ་ཡོད་ས་དེར་བདེ་མཆོག་གི་དཀྱིལ་འཁོར་དང་། དམ་ཅན་གྱིས་གར་འཁྲབ་པ་སོགས་གཟིགས་པས། མ་འོངས་པར་གནས་ཡ་ཀིར་དགོན་ཞིག་ཆགས་འོང་བས་ཕྱིར་མིག་ལུང་ཞེས་ཐོགས་ཞེས་གསུངས་པ་ལྟར་ཕྱིར་མིག་ལུང་ཞེས་དེ་ནས་བྱུང།

ད་ལྟའི་ཕྱིར་མིག་ལུང་ཞེས་པའི་བཙུན་དགོན་དེར་ཆོས་ལུང་མ་ཎི་རི་ཁྲོད་ཅེས་བཙུན་མ་བདུན་ཡོད་པ་དང་རྗེས་སུ་ཕྱིར་མིག་ལུང་རྒྱུད་སྨད་ཀྱི་ཁོངས་སུ་གཏོགས་ཤིང་དེར་གྲྭ་ཤག་34ཡོད་པའི་ཁང་གཉེར་དང་རྒྱུད་པ་རེར་འབྲུ་ཁལ་5རེ་ཕུལ་བའི་བརྔོ་འཐག་ལས་བཅས་བྱེད་དགོས། གནས་དེར་ལོ་ལྟར་བོད་ཟླ་7ཚེས་8ནས་བོད་ཟླ་9ཚེས་1བར་རྒྱུད་སྨད་གྲྭ་ཚང་གི་བླ་མ་རྒྱུད་པ་རྣམས་ཆོས་གོས་རྣམ་གསུམ་འབོག་དཀར་པོའི་ནང་སྒྲིལ་ཏེ་དེའི་སྟེང་དུ་ཤོ་ཀ་ལི་བཞག་གནང་སྟེ་སྔོན་སྟོན་པ་ཉན་ཐོས་ཀྱི་མཛད་ཚུལ་ལྟར་ཆོས་ཐོག་ཅེས་གནས་དེར་ཕེབས་ནས་ཉིན་ལྟར་ཚོགས་དུས་བདུན་རེ་དང། ཡར་ངོ་མར་གསོ་སྦྱོང་སོགས་འཚོགས་གནང་བ་དང་གར་ཐིག་དབྱངས་གསུམ་སོགས་གསན་སྦྱོང་གནང་དགོས། དེ་བརྒྱུད་དུ་ཡོད་པའི་བླ་མ་རྒྱུད་པའི་གཞིས་ཀ་ཁག་ནས་གསོལ་ཕོགས་འབྲུ་ཁུལ་ལྔ་རེ་འབུལ་བ་དང། དེར་གྲྭ་ཁང་སྟེ་ཚོགས་ཆེན་གཅིག་དང། ཚ་བ་ཁང་ཚན། རྒྱལ་རོང་ཁང་ཚན། ཨ་མདོ་ཁ་ཚན། སྤྲེའུ་ཁང་ཚན། སེར་ཀོང་ཁང་ཚན་བཅས་ཀྱི་འདུ་ཁང་དང། དེ་དག་གི་མི་ཚན་ནམ་ཤག་ཁང་ནི་ད་ལྟའི་མ་ཎི་དགོན་གྱི་འདབས་སུ་ཆགས་ཡོད། ད་ལྟ་དེ་ཁུལ་དུ་འབུམ་མོ་ཆེ་ལས་ཉམས་གསོ་གནང་ཐུབ་མེད་ཀྱང་མ་ཎི་དགོན་ནམ་ཕྱིར་མིག་ལུང་བཙུན་དགོན་གསར་བཞེངས་གནང་བའི་འདུ་ཁང་ཀ་བ་12ནང་ཐུགས་རྗེ་ཆེན་པོ་སྤྱི་ཁྲེ་གང་ལྷག་ཙམ་དང། རྣལ་འབྱོར་མ། རྗེ་ཡབ་སྲས་སོགས་གསར་བཞེངས་གནང་བ་མཇལ་རྒྱུ་ཡོད།

 

 

ཆོས་འཕེལ་གྱིས་བརྩམས།

 

 

 

 

 

 

 

བརྒྱུད་སྐུལ།

མཆན་སྤེལ།