མིང་ཙམ་ཡང་རྙེད་དཀའ་བའི་རི་སྟེང་མཁར་རྫོང་གི་ཤུལ་ཅིག

མིང་ཙམ་ཡང་རྙེད་དཀའ་བའི་རི་སྟེང་མཁར་རྫོང་གི་ཤུལ་ཅིག
ང་ཙམ་ཡང་རྙེད་དཀའ་བའི་རི་སྟེང་མཁར་རྫོང་གི་ཤུལ་ཅིག
ར་སེ་དཀོན་རྒྱམ།
ཁ་བྱང་འདི་ལྟར་བྲི་དོན་ནི། རི་སྟེང་མཁར་རྫོང་ཉམས་དགའ་བའི་གནའ་ཤུལ་དེ་ཉིད་ནི། ལོ་རྒྱུས་ཡིག་ཚང་དང་དམངས་ཁྲོད་ངག་རྒྱུན་གཉིས་ཀར་བརྟགས་ན། རྫོང་མཁར་གྱི་བྱུང་བ་ཡོད་པ་ལྟ་ཞོག རི་སྟེང་དེར་སྔོན་དུས་བརྗིད་ཉམས་ཆེ་བའི་མཁར་རྫོང་ཅིག་བྱུང་མྱོང་བའང་གཏིང་བརྗེད་དུ་སོང་ནས་ཡུན་རིང་འདས་ཟིན་པ་མངོན་འདུག

ཐང་དཀྱིལ་དུ་འགྱིང་ངེར་གནས་ཤིང་རི་རྩེ་ནས་ཕྱོགས་ཚང་མར་མཐོང་རྒྱ་ཆེ་ལ་སྣང་གཡེལ་ཧ་ཅང་ཆེ་བའི་རི་ཆུང་ཟུར་གསུམ་ཅན་ཞིག་སྟེ། ཤར་ནུབ་གཉིས་ནི་བྱ་ཡི་གཤོག་པ་དང་འདྲ་ལ། བྱང་ངོས་ཀྱི་ཟུར་ནི་བྱ་ཡི་གཞུག་གུ་འདྲ་བ་དང་། བྱ་ཡི་མགོ་བོ་བཅད་པ་དང་ཧ་ཅང་འདྲ་ཆེ་བས་ན། རི་འདི་ཐོག་མར་ཁྱུང་ཡིན་པ་ལ་སྡིག་པས་སྐེ་བཅད་པས་རིར་གྱུར་སོང་བའི་གཏམ་རྒྱུད་ཅིག་ད་བར་ལྷག་མར་ལུས་ཡོད་དོ།།
རི་ཆུང་དེའི་ཟུར་སྣེའི་ཕྱོགས་གསུམ་གྱི་ངོས་ལ་ཞིབ་ཙམ་མ་བྱུང་ནའང་། ཅུང་ཟད་དོ་སྣང་མཛད་ན་ཕྱོགས་སོ་སོར་རྟ་ལམ་གྱི་ཤུལ་ལམ་མེར་གནས་ཡོད་པ་མ་ཟད། ལྷོ་ངོས་སམ་མདུན་ནས་ཡར་འཛེགས་ན་ལམ་ཤུལ་ལ་བརྟག་ན་ལམ་ཆེན་བཟོས་པའི་ཤུལ་དང་། བྲག་བརྐོས་ནས་ལམ་བཟོས་པ་དང་ལམ་བསྐྱོར་བརྩིག་པའི་ཤུལ་ཡང་ལམ་མེར་གནས་ཡོད་པ་དང་། རི་རྐེད་ཙམ་ལ་རྒྱབ་ངོས་ཤར་ནུབ་ལ་སྡིངས་ཆའི་བརྩིགས་ཤུལ་བང་རིམ་ཤིག་གེ་ཡོད་ཅིང་། རི་རྩེ་ལ་ཉེ་བའི་ལྷོ་ངོས་བྲག་ངོས་གཡང་གཟར་སྟེང་དུ་ཁང་པའི་ཤུལ་དང་། མདུན་ངོས་སུ་བརྩིགས་བསྐྱོར་ཧ་ཅང་ཆེན་པོ་ལམ་མེར་གནས་འདུག་ལ། རི་སྟེང་དུ་མཁར་ཤུལ་གཞི་ཁྱོན་ཧ་ཅང་མི་ཆུང་བ་གནས་འདུག་ལ། བྱང་གི་རི་སྣའི་སྟེང་དུ་རྟ་ལམ་ཕར་ཀྱོག་ཚུར་ཀྱོག་གི་ཤུལ་རྒྱ་ཆེ་བ་ལམ་མེར་མཐོང་རྒྱུ་འདུག་ཅིང་། ད་དུང་རིའི་ཁོག་གསེང་དུ་ས་འོག་སྦུག་ལམ་གྱི་ཤུལ་ཡང་ཡོད་པས། གནའ་བོའི་མཁར་རྫོང་གི་ཁྱད་ཆོས་ཀྱང་ཚང་བར་སྣང་ངོ་།།
མཁར་རྫོང་དེ་ནི་འབྲི་གུང་གི་ལོ་རྒྱུས་ལ་ལར་མཁར་བ་རི་ཞེས་པའི་རྫོང་ཞིག་དང་ཁྲི་ཁང་ལྷུན་གྲུབ་གླིང་ཞེས་པ་ཡོད་པར་བཤད་འདུག་པས། ཁྲི་ཁང་དེ་ནི་གྲོག་གི་ལུང་པའི་ནང་དུ་ཡོད་པར་སྣང་བས།འདི་ཉིད་མཁར་བ་རི་ཞེས་པ་དེ་ཨེ་ཡིན་སྙམ་ནའང་མཐའ་མ་ཆོད།ལ་ལས་གྲོག་རི་རིན་ཆེན་སྤུངས་པ་ཡིན་ཟེར་ཏེ། འཕྲེང་པོ་གཏེར་བཏོན་པའི་སྒྲུབ་གནས་གྲོག་རི་རིན་ཆེན་སྤུངས་པ་ནི་རི་ཆུང་འདིའི་རྒྱབ་ངོས་སུ་གནས་པའི་གྲོག་ཅེས་པའི་ལུང་པའི་ནང་གི་ཤར་ལུང་ངམ། ད་ལྟ་ཡུལ་མིས་གཡས་ལུང་ཟེར་བའི་ནང་དུ་ཡོད་ལ། ད་ལྟའང་གྲོག་རི་སྤུངས་པ་ཞེས་ས་མིང་མ་འགྱུར་བར་གསོན་པོར་གནས་ཡོད་ལ། མཚོ་བྲག་གི་ལུང་པའི་རྒྱབ་དང་ས་འབྲེལ་ཡིན་པའི་གྲོག་ལྷ་སྤུངས་པ་ཞེས་པ་གྲོག་ལུང་པའི་ཡུལ་ལྷའི་རི་དེ་དང་འདབས་འབྲེལ་བའི་རི་ཆུང་ཡིན་ཞིང་། རི་དེའི་བྲག་ངོས་ན་གཏེར་བཏོན་པའི་་སྒྲུབ་ཁང་གི་རྩིགས་ཤུལ་སོགས་ལམ་མེར་མཇལ་རྒྱུ་ཡོད། ཤེལ་བྲག་ཕུག་པ་ཡན་ཆད་ལ་གྲོག་རི་རིན་ཆེན་སྤུངས་པ་ཞེས་བོས་སྲོལ་ཡོད་ཚུལ་ཡུལ་མི་ལ་ལའི་ངག་ནའང་གནས་འདུག་ཅིང་། གཏེར་བཏོན་པའི་རྣམ་ཐར་ལ་བརྟགས་ནའང་། ལུང་པའི་ནང་གི་རི་ངོས་ཡིན་པར་གསལ་པོར་མངོན་འདུག་གོ།
ལ་ལས་རི་འདི་ཀུན་མཁྱེན་ཀློང་ཆེན་པའི་རྣམ་ཐར་ན་གསལ་བའི་ཨོ་རྒྱན་རྫོང་བྱ་བ་དེ་ཡིན་པར་འདོད་སྲིད་ནའང་། ལེགས་པར་བསམ་ན་དེ་ནི་གངས་རི་ཐོད་དཀར་ངོས་ཀྱི་ཀློང་ཆེན་པའི་སྒྲུབ་གནས་ཀྱི་མཚན་ཡིན་ཏེ། གངས་རི་ཐོད་དཀར་ཨོ་རྒྱན་རྫོང་ཞེས་ཡོངས་སུ་གྲགས་པས་སོ།། ལ་ལས་ཀློང་ཆེན་པའི་རྣམ་ཐར་ན་གསལ་བའི་ཨོ་རྒྱན་དགོན་པའི་ཤུལ་ཡིན་ནོ་ཟེར་ན། ཞེ་ཆེན་རྒྱལ་ཚབ་ཆོས་འབྱུང་ན་ཀློང་ཆེན་པའི་སྐབས། གྲོག་གི་ཨོ་རྒྱན་དགོན་པ་ཞེས་དང་དགོན་པ་དེ་དང་མི་རིང་བར་རྫ་འདབས་ཡོད་ཚུལ་གསལ་བས་ན། གྲོག་གི་ལུང་པའི་ནང་དུ་དེའི་ཤུལ་ཡོད་པར་ཐེ་ཚོམ་མི་འདུག
ལ་ལས་འདི་ན་བླ་མ་ལྷ་སྡིངས་པ་བྱ་བ་བཞུགས་ཀྱང་ཟེར་ཞིང་། གཤམ་དེར་ལྷ་སྡིང་པའི་སྤྲོ་ཁང་སུམ་ཐོག་གི་ཤུལ་ཡོད་འདུག་ལ། རི་རྩེར་ལྷ་སྡིང་པས་བཞག་པའི་སེར་སྲུང་སྔགས་ཁང་ཉིས་ཐོག་ཡོད་པར་གྲགས་ལ། ད་ལྟའང་ཤུལ་གྲུ་བཞི་ལམ་མེར་གནས་ཡོད་མོད། ལྷ་སྡིངས་པ་ནི་ཕག་མོ་ལྷ་སྡིངས་ཞེས་ཞུ་ཞིང་། སྔོན་དུས་ལོ་མདའི་ཕག་མོ་རྩེའི་བདག་པོ་ཡིན་ལ། འབྲི་གུང་སྐྱུ་རའི་གདུང་སྲས་དེར་མག་པར་ཕེབས་པས་ཕག་མོ་ནང་སོ་ཞེས་འབྲི་གུང་གི་ལོ་རྒྱུས་དང་འབྲེལ་བ་མ་ཟད།འདི་ནས་གདུང་སྲས་གསུམ་འབྲི་གུང་གི་གདན་སའི་ཁྲིར་ཕེབས་པ་ཡིན་ནོ།། དེས་ན་འདི་ནི་ལྷ་སྡིངས་པའི་སེར་སྲུང་སྔགས་ཁང་ཙམ་མ་ཡིན་པར་ཕག་མོ་ནང་སོའི་གཞིས་ཀར་གྱུར་པའི་མཁར་ཤུལ་ཡིན་པ་ལ། ཕྱིས་སུ་ཉམ་ནས་རིམ་པས་སེར་སྲུང་བའི་སྡོད་ཁང་ཙམ་དུ་གྱུར་པར་མངོན་ཏེ། སྔོན་དུས་མཁར་རྫོང་བཙན་པོ་ཅིག་ཡིན་པ་ནི་གནའ་ཤུལ་རང་གི་གྲུབ་ཚུལ་གྱི་ངོས་ནས་གསལ་པོར་ཤེས་ཐུབ་པ་མ་ཟད།མདུན་ངོས་ཀྱི་རི་གཤམ་ལ་གཞིས་ཀ་ཤོད་དམ་གཞིས་ཀ་ཞོལ་ཞེས་པའི་ཤུལ་དང་མིང་ཡང་མ་ཉམ་པར་གནས་འདུག་པའི་ཕྱིར།དེ་ལས་གཞིས་ཀ་སྟེང་ངམ་གཞིས་ཀ་གོང་ཞེས་པ་ཡོད་པར་གསལ་ཞིང་། དེ་ནི་རི་སྟེང་མཁར་རྫོང་དེ་ཉིད་ལས་གཞན་པ་གང་ཡང་མ་ཡིན་པ་སྟེ། གཞིས་ཀ་ཤོད་ཅེས་པ་དེར་སྔོན་དུས་གྱང་གི་ལྕགས་རི་རྒྱ་ཆེར་ཡོད་པ་ཉེ་དུས་རིམ་པས་བཤིགས་ཟིན་པས་ད་ལྟ་རི་གཤམ་དེར་གྱང་རོ་ཅུང་ཟད་ལྷག་མར་ལུས་པ་དེར་བརྟགས་ན། བོད་ཀྱི་གནའ་བོའི་མཁར་གྱི་ལྕགས་རི་སྤྱི་མཚུངས་ཀྱི་ཁྱད་ཆོས་ཏེ། སྐར་ཁུང་ཕྱག་རྒྱ་མའམ་མདའ་ཁུང་ཞེས་པ་དེ་ཉིད་བཅུ་གྲངས་ལྷག་འདུག་པས་ཤེས་ལ། དབུས་སྟོད་བྱེ་རི་སྟག་རྩེ་རྫོང་གི་ཞིག་རོའི་བྱང་ངོས་ལའང་དེ་བཞིན་སྣང་བས་ཀྱང་འགོག་སྲུང་གི་མ་ལག་ཡིན་པར་ཚད་མས་གྲུབ་ནས་འདུག་གོ།
མལ་གྲོ་གུང་དཀར་རྫོང་ཐང་སྐྱ་ཁུལ་གྱི་གཞིས་ཀ་ཤོད་ཟེར་བའི་གྲོང་ཚོའི་རྒྱབ་རིར་གྱུར་པའི་སྟེང་དུ་ཡོད་པའི་གནའ་བོའི་མེས་པོའི་རྣམ་དཔྱོད་ལས་བསྐྲུན་པའི་མཁར་རྫོང་གི་ཤུལ་འདི་ཙམ་མ་ཟད།བོད་ཀྱི་ས་ཕྱོགས་གང་སར་རི་སྣ་དང་བྲག་རྡོག་དང་དེའུ་འབུར། སླེའམ་ཚལ་གླིང་སོགས་ས་བཙན་ཅི་རིགས་སུ་གནའ་མིའི་རྣམ་དཔྱོད་ལས་བྱུང་བའི་མཁར་ཤུལ་མང་པོ་གནས་ཡོད་ལ། ལོ་རྒྱུས་དངོས་ཡོངས་སུ་ནུབ་ཟིན་ཏེ། མཁར་གོག རྫོང་གོག རྫོང་ཞིག རྫོང་རལ། རྫོང་རོ་སོགས་སུ་བོས་བཞིན་པའི་སྐབས་སུ་སོན་ཡོད་ན། ལོ་རྒྱུས་ལ་ཞེན་པ་ཅན་དག་གིས་ཆོས་ལུགས་དང་འབྲེལ་བ་ཁོ་ན་མ་ཡིན་པར་འདི་དག་ལ་དོ་འཁུར་གནང་ན། གནའ་བོའི་ཨར་བསྐྲུན་ལག་རྩལ་ཉམས་ཞིབ་སོགས་ལ་གལ་ཆེའི་གནས་བབས་ལྡན་ཡོད་དོ།།༢༠༢༡/༡/༡ལའོ།།

བརྒྱུད་སྐུལ།

མཆན་སྤེལ།