འདོད་ཡོན་སྣ་ལྔའི་མཚོན་དོན་འགྲེལ་བཤད།

དེ་ཡང་འདོད་ཡོན་ལྔ་སྟེ། ལེགས་སྦྱར་གྱི་སྐད་དུ་ཀཱ་མ་གུ་ཎ་ཞེས་སུ་འབོད་ཅིང༌། འདོད་པའི་ཡོན་ཏན་འདི་དག་ཁམས་གསུམ་ལས་ཆ་ཚང་ཡོད་པའི་ཁམས་ནི་འདོད་ཁམས་ཁོ་ན་ཡིན་ཏེ། དེ་དག་ཡིད་དུ་འོང་བའི་ཡོན་ཏན་གྱི་ཡུལ་ཡིན་པས་འདོད་ཡོན་དང༌། དབང་ཤེས་ལྔའི་སྤྱོད་ཡུལ་ཡིན་པས་ན་གྲངས་ལྔ་རུ་ངེས་པས་འདོད་ཡོན་ལྔ་ཞེས་གྲགས། དེ་ལྟར་འདོད་ཡོན་ལྔ་ནི་ཡུལ་ཅན་དབང་ཤེས་ལྔའི་ཡུལ་དུ་གྱུར་ཅིང་དེ་དག་གི་སྤྱོད་ཡུལ་དུ་གྱུར་པའི་ཚེ། དང་པོ་འཕྲད་པའི་སྐབས་ཡིད་ཀྱི་དང་བ་འདྲེན་པ་དང༌། བར་དུ་མྱོང་བའི་སྐབས་དབང་པོ་ཚིམ་པར་བྱེད་པ། ཐ་མ་སྤྱོད་ཡུལ་དུ་གྱུར་རྗེས་ལུས་སེམས་བརྟས་པར་བྱེད་པས་འདོད་པའི་ཡོན་ཏན་དུ་གྲགས་པ་ཡིན། འདོད་ཡོན་ལྔ་ནི་གཟུགས་སྒྲ་དྲི་རོ་རེག་བྱ་ལྔའམ། གཟུགས་ཀྱི་ཡོན་ཏན་དང༌། སྒྲའི་ཡོན་ཏན། དྲིའི་ཡོན་ཏན། རོའི་ཡོན་ཏན། རེག་བྱའི་ཡོན་ཏན་ནམ་ནུས་པ་ལ་འདོད་པའི་ཡོན་ཏན་ལྔ་ཞེས་བྱ་ལ། གཟུགས་མེ་ལོང༌། སྒྲ་པི་ཝང༌། དྲི་བདུག་སྤོས། རོ་ལྷ་བཤོས། རེག་བྱ་དར་དཀར་བཅས་མཆོད་རྫས་ཀྱི་བྱེ་བྲག་མེ་ལོང་དང༌། པི་ཝང༌། དུང་ཆུ། ཤིང་འབྲས། དར་དཀར་ལྔ་པོས་རིམ་བཞིན་གཟུགས་སྒྲ་དྲི་རོ་རེག་བྱ་སོ་སོར་མཚོན་པ་ལ་འདོད་ཡོན་སྣ་ལྔ་ཞེས་བྱའོ།།
ས་ག་ཟླ་བའི་དུས་ཆེན་གསུམ་འཛོམས་ངོ་སྤྲོད།

ས་ག་ཟླ་བ་ཞེས་པ་ནི། སྐར་རྩིས་པ་རྣམས་ཀྱི་བཤད་སྲོལ་ལ་ལོ་གཅིག་ཟླ་བ་བཅུ་གཉིས་ཀྱི་ཟླ་བ་སོ་སོའི་ཚེས་བཅོ་ལྔའི་ཉིན་ཟླ་བ་དང་མཉམ་དུ་འགྲོགས་པའི་སྐར་མ་གང་ཁེལ་བར་གཞིར་བཟུང་སྟེ་ཟླ་བ་དེར་མིང་དེ་ལྟར་བཏགས་པ་ཡིན་ཞིང༌། ཧོར་ཟླ་བཞི་པ་སྟེ་བོད་ལུགས་ཀྱི་ཟླ་བ་བཞི་པའི་ཚེས་༡༥ཉིན་ཟླ་བ་དང་མཉམ་དུ་འགྲོགས་པའི་སྐར་མ་ནི་ས་ག་ཡིན་པས་བོད་ཟླ་བཞི་པར་ས་གས་ཉ་བའི་ཟླ་བ་ཞེས་ཟེར། ལྷག་པར་ཚེས་༡༥ཉིན་བདག་ཅག་གི་སྟོན་པ་ཐུགས་རྗེ་ཅན་ཤཱཀྱའི་རྒྱལ་པོ་སྐུ་འཁྲུངས་པ་དང༌། མངོན་པར་སངས་རྒྱས་པ། ཡོངས་སུ་མྱ་ངན་ལས་འདས་པ་བཅས་དུས་ཆེན་ཁྱད་པར་ཅན་གསུམ་འཛོམས་ཏེ། བྱང་ཆུབ་སེམས་དཔའ་དམ་པ་ཏོག་དཀར་དགའ་ལྡན་ལྷའི་གནས་ན་ལྷའི་དཔལ་ཕུན་ཚོགས་ལ་བདེ་བར་རོལ་བཞིན། ལྷ་རྣམས་ལ་ཆོས་སྟོན་ཅིང་བཞུགས་པའི་ཚེ་སངས་རྒྱས་ཀྱི་བྱིན་རླབས་ཀྱིས་ལྷའི་སིལ་སྙན་གྱི་རོལ་མོའི་སྒྲ་ལས་འཛམ་བུའི་གླིང་དུ་འབྱོན་པའི་དུས་ལ་བབ་པར་བསྐུལ་བ་ལ་བརྟེན་ནས་འཇིག་རྟེན་ན་རིགས་དང༌། རུས་དང༌། ཡུལ་དང༌། དུས་དང༌། ཡུམ་བྱེད་པར་ནུས་པའི་བུད་མེད་བཅས་གཟིགས་པ་ལྔ་ལ་གཟིགས་ནས་དགའ་ལྡན་ནས་ཕེབས་ཏེ་གླང་པོ་ཆེ་ཐལ་དཀར་མཆེ་བ་དྲུག་ལྡན་གྱི་རྣམ་པར་བརྫུས་ཏེ་ས་ལུག་ཆུ་སྟོད་ཟླ་བའི་ཚེས་བཅོ་ལྔ་ཉིན་ལྷ་མོ་སྒྱུ་འཕྲུལ་མའི་ལྷུམས་སུ་ཞུགས་ཏེ་ལྕགས་སྤྲེལ་ས་ག་ཟླ་བའི་ཚེས་བདུན་ཉིན་ལུམྦི་ནིའི་ཚལ་དུ་སྐུ་བལྟམས་པའི་དུས་ཆེན་དང་གཅིག
སློབ་མ་སྣོད་རུང་དུ་བྱ་བའི་གདམས་ངག

དེ་ནི་སྐབས་འདིར་སློབ་མ་སྣོད་དུ་རུང་བར་བྱ་བའི་གདམས་ངག་ཟུར་ཙམ་གཅིག་བཤད་ན། སློབ་ཁྲིད་གང་ལ་ཉན་བཤད་བྱེད་པའི་སྔོན་དུ། ཉན་པ་པོའི་སྣོད་ཀྱི་སྐྱོན་གསུམ། དྲི་མ་དྲུག མི་འཛིན་པའི་སྐྱོན་ལྔ་སྤངས་ཏེ། བསམ་པ་དད་གུས་དང་ལྡན་པས། སྦྱོར་དངོས་རྗེས་གསུམ་གྱིས་ཟིན་པར་བྱས་ལ་ཉན་དགོས་གསུངས། དེ་ལ་དང་པོ་ཉན་པ་པོའི་སྣོད་ཀྱི་སྐྱོན་གསུམ་སྤང་བ་ནི། སྣོད་ཁ་སྦུབ་པ་ལྟ་བུ་དང༌། སྣོད་ཞབས་རྡོལ་བ་ལྟ་བུ་དང༌། སྣོད་དྲི་མ་ཅན་ལྟ་བུ་དང་གསུམ་ལས། དང་པོ་སྣོད་ཁ་སྦུབ་པ་ལྟ་བུའི་སྐྱོན་སྤང་བ་ནི། དཔེར་ན། སྣོད་ཁ་སྦུབ་ཀྱི་སྟེང་ན་མར་ཆུ་ལ་སོགས་པ་ཇི་སྙེད་བླུགས་ཀྱང་ནང་དུ་ཡེ་མི་ཡོང་བ་ལྟར། འོ་སྐོལ་དང་པོ་སློབ་ཁྲིད་ཉན་ཙ་ན། གཉིད་དང་རྨུགས་པར་སོང་བའི་ཤེས་པ་གཞན་དུ་ཡེངས་པས་སློབ་ཁྲིད་ཉན་ཡང༌། སེམས་ལ་གོ་བ་ཡེ་མི་ཡོང་བས། དེས་ན་སློབ་ཁྲིད་ཉན་པའི་ཚེ། དཔེར་ན། སྣོད་ཁ་སློག་ནས་ཆུ་ལ་སོགས་པ་བླུགས་པ་བཞིན་དུ། གཉིད་དང་རྨུགས་པ་ལ་སོགས་པའི་སྐྱོན་དེ་དག་སྤངས་ལ། ཤེས་པ་མ་ཡེངས་པར་སེང་ངེ་བྱས་ལ་ཉན་འཚལ།
དགེ་རྒན་ལ་གུས་པར་བྱ་བ་དང༌། བཀའ་དྲིན་རྗེས་སུ་དྲན་པ།

སློབ་ཁྲིད་ཉན་པའི་ཚེ་དགེ་རྒན་ལ་གུས་པར་བྱ་བ་ནི་གསུམ་སྟེ། ལུས་གུས་པ་དང༌། ངག་གུས་པ། ཡིད་གུས་པའོ། །དང་པོ་ལུས་མ་གུས་པ་སྤངས་ཤིང་གུས་པར་བྱ་བ་ནི། རང་དམའ་བར་འདུག་ལ་མཉན་དགོས་པ་ནི། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །ཚིག་གི་བདུད་རྩི་འཐུང་བཞིན་དུ། །རིམ་གྲོ་བསྐྱེད་དེ་རབ་ཉོན་ཅིག །ཅེས་པ་སྟེ་རྐང་པ་བརྐྱང་པ་དང༌། གཞོགས་མཉེས་བྱས་ཏེ་མཉན་དུ་མི་རུང༌། ཙོག་པུར་འདུག་སྟེ། མདུན་བསྟན་ལ་མཉན་པར་འཚལ། ངག་གི་མ་གུས་པ་སྤངས་ཤིང་གུས་པར་བྱ་བ་ནི། སློབ་ཁྲིད་ཉན་པའི་བར་ལ་ངག་གི་སྤྱི་གཏོལ་དང་གཏམ་ཤབ་ཤུབ་ཡེ་མི་བྱ་བར། སློབ་ཐུན་གྱི་འགོ་གཞུག་བར་དུ་རྩེ་གཅིག་གིས་མཉན་པར་བྱ། ཡིད་མ་གུས་པ་སྤངས་ཤིང་གུས་པར་བྱ་བ་ནི། སློབ་ཁྲིད་ཀྱི་ནང་དོན་ཟབ་དང་མི་ཟབ་ཅི་ཚོད་འདུག་བལྟའོ། །ངའི་བློ་ལ་ཡོད་པ་དང་མཐུན་ནམ་མི་མཐུན་བལྟའོ། །དགེ་རྒན་འདི་རང་ལ་ཤེས་ཚོད་དང་གོ་ཚོད་ཅི་ཚོད་འདུག་བལྟའོ་སྙམ་དུ་ཤེས་པ་བརྒྱང་ངེ་ཅོག་གེ་བས་སློབ་ཁྲིད་མཉན་དུ་མི་རུང་བས། ཡིད་མ་གུས་པའི་སྐྱོན་དེ་དག་སྤངས་ཏེ་ཚུལ་བཞིན་དུ་མཉན་པར་བྱའོ། །སྒོ་གསུམ་གུས་པ་དང་ལྡན་པའི་སློབ་ཁྲིད་མཉན་པར་བྱ་བ་ནི། ཕུ་ཆུ་རྫིང་དང་ས་རླན་དང༌། །
ཨ་ཙ་ར་གླང་འཁྲིད།

དེ་ཡང༌། ཇོ་བོ་རྗེ་དཔལ་ལྡན་ཨ་ཏི་ཤས། བོད་རིགས་ནི་རྣམ་རྟོག་དང་རྟེན་འབྲེལ་ལ་མངའ་བརྙེས་པའི་མི་རིགས་ཤིག་ཡིན་ཞེས་གསུངས་པ་ལྟར། གངས་ལྗོངས་འདིར་བཀྲ་ཤིས་པ་དང་རྟེན་འབྲེལ་མཚོན་བྱེད་ཀྱི་རི་མོ་དུ་མ་ཞིག་འབྲི་སྲོལ་ཡོད། དེའི་ནང་ནས་གཅིག་ནི་ཨ་ཙ་ར་གླང་འཁྲིད་ཀྱི་རི་མོ་འདི་ཉིད་ཡིན་ཞིང༌། དེ་ཡང་ཨ་ཙ་ར་ཞེས་པ་ནི་ལེགས་སྦྱར་ལྷ་ཡི་སྐད་དང༌། བོད་སྐད་དུ་སློབ་གཉེར་བ་ཞེས་པའི་དོན་ཡིན། དེ་ཡང་ཨ་ཙ་ར་གླང་འཁྲིད་ནི། དཔལ་འབྱོར་ཕུན་སུམ་ཚོགས་པ་ལས་བྱུང་བའི་རྟེན་འབྲེལ་དུ་ངོས་འཛིན་བྱས་ཏེ། རང་རེ་གངས་ལྗོངས་ཀྱི་དགོན་པ་ཁག་གི་སྒོ་མཆོར་དང༌། བླ་ཆེན་སྐུ་དྲག་ཚོའི་གཟིམས་ཤགགཞན་ཡང་ཚོམས་ཆེན་སོགས་ཀྱི་ལྡེབས་རིས་སུ་འབྲི་སྲོལ་ཡོད། ཨ་ཙ་རའི་རྣམ་པ་ཅན་གྱི་ནོར་ལྷས་གླང་པོ་ཆེ་ནོར་བུས་བརྒྱན་པ་ལ་ནོར་བུ་རིན་པོ་ཆེ་སྣ་ཚོགས་པས་བཀང་བའི་ནོར་གཞོང་བཀལ་བ་ཞིག་འཁྲིད་པའི་རི་མོ་འབྲི་སྲོལ་ཡོད།
སོག་པོ་སྟག་འཁྲིད།

བོད་ཀྱི་དམངས་ཁྲོད་དུ་དར་ཁྱབ་ཆེ་བའི་བོད་མིའི་སྡོད་ཁང་གི་གཟིམ་ཆུང་ལྡེབས་ངོས་དང༌། བར་ཁྱམ། སྒོ་བཀག་བཅས་ཀྱི་ངོས་སུ་འོས་ཤིང་འཚམས་པའི་སྒོ་ནས་ཚོན་མདངས་རྣམ་པར་བཀྲ་ཞིང༌། བཀྲ་ཤིས་དགེ་མཚན་འབར་བའི་རི་མོ་དུ་མ་ཞིག་འབྲི་སྲོལ་ཡོད་ཅིང༌། དེ་དག་ནི་མཛེས་མཚོན་ཙམ་མ་ཟད། དེ་ལས་གལ་ཆེ་བ་ཞིག་ནི་རི་མོ་དེ་དག་བྲིས་ནས་འགལ་རྐྱེན་ཐམས་ཅད་ཞི་ཞིང༌། མཐུན་རྐྱེན་མཐའ་དག་བདེ་བླག་ཏུ་འགྲུབ་པའི་རྟགས་དང༌། རྟེན་འབྲེལ་དུ་མ་མཚོན་པར་བྱས་ཡོད། དེ་དག་ལས་སོག་པོ་སྟག་འཁྲིད་ཅེས་པའི་རི་མོ་འདི་ཡང༌། བླ་བྲང་དང་རྒྱལ་བློན་སོགས་ཀྱི་གཟིམ་ཤག་ཁག་གི་ཁང་པའི་སྒོ་མཆོར་དང༌། རྩིག་ལྡེབས་སོགས་སུ་འབྲི་སྲོལ་ཡོད་ཅིང༌། རི་མོ་འདིའི་ལོ་རྒྱུས་ཁུངས་ལྡན་བློ་གཏད་རུང་བ་ཞིག་མཐོང་ཐོས་སུ་མ་གྱུར་ཀྱང༌། ཆོས་ཕྱོགས་ཀྱི་ནང་དོན་ལྡན་པའི་རྒན་རབས་རྣམས་ཀྱི་ངག་རྒྱུན་བཤད་སྲོལ་ཞིག་ལ། བསྟན་ལ་འཚེ་བའི་རྒྱལ་པོ་གླང་དར་གྱིས་སངས་རྒྱས་ཀྱི་བསྟན་པ་རིན་པོ་ཆེ་ཉི་མ་ལྟར་གསལ་བ་དེ་ཉིད་རེ་ཞིག་མིང་གི་ལྷག་མ་ཙམ་དུ་བསྣུབས་ཏེ། དད་རྟེན་དུ་སངས་རྒྱས་ཀྱི་སྐུ་གསུང་ཐུགས་རྟེན་བཞེངས་བསྐྲུན་སྒྲིག་གཤོམ་མི་ཆོག་པ་མུན་བསྐལ་ལྟ་བུར་གྱུར་བས་ན། རྒྱལ་བསྟན་ལ་དད་ཞེན་ཆེ་བའི་བོད་འབངས་རྣམས་ཀྱིས། རང་གི་སྐྱབས་གནས་རིགས་གསུམ་མགོན་པོའི་མཚོན་དོན་དུ་སོག་པོ་སྟག་འཁྲིད་འདི་ཉིད་བཞེངས་པར་གྲགས་སོ།།
དུས་འཁོར་རྩ་རྒྱུད་གསུངས་པའི་དུས་ཆེན།

༈ བཅོམ་ལྡན་འདས་མཉམ་མེད་ཤཱཀྱ་སེངྒེས། འཛམ་གླིང་འདིའི་ཡུལ་དབུས་རྡོ་རྗེ་གདན་ཀྱི་སྤོ་ལ་བྱང་ཆུབ་ཀྱི་ཤིང་དྲུང་དུ། ས་གའི་ཉ་ལ་མངོན་པར་རྫོགས་པར་སངས་རྒྱས་པའི་ཚུལ་བསྟན་པའི་དུས་ས་ག་ཟླ་ནས་བརྩིས་པའི་ཟླ་བ་བཅུ་གཉིས་ཀྱི་རྗེས་ཆུ་མོ་ལུག་གི་ནག་པ་ཟླ་བའི་ཉ་ལ། བྱ་རྒོད་ཕུང་པོའི་རིར་བྱང་ཆུབ་སེམས་དཔའི་འཁོར་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཐེག་པའི་ཆོས་ཀྱི་འཁོར་ལོ་བསྐོར་བ་དང་དུས་མཚུངས་རྒྱ་གར་ལྷོ་ཕྱོགས་དཔལ་གྱི་རི་དང་ཉེ་བ་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོ། ནང་སྟེང་འོག་དཔག་ཚད་དྲུག་དང་རྒྱང་གྲགས་གཅིག་ཡོད་པར། འོག་ཏུ་བསྡུས་རྒྱུད་ལས་བསྟན་པའི་ཆོས་དབྱིངས་གསུང་གི་དབང་ཕྱུག་གམ་དུས་ཀྱི་འཁོར་ལོ་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་ལྷ་བདུན་བརྒྱ་ཉེར་གཉིས་དང༌། སྟེང་དུ་རྩ་བརྒྱུད་ནས་བསྟན་པའི་དཔལ་ལྡན་རྒྱུ་སྐར་གྱི་དཀྱིལ་འཁོར་ལྷ་སྟོང་དང་དྲུག་བརྒྱ་ཉི་ཤུའི་བདག་ཉིད་ཅན་གྱི་དཀྱིལ་འཁོར་མངོན་པར་སྤྲུལ་ཞིང༌། དཀྱིལ་འཁོར་གྱི་བདག་པོའི་སྐུར་བཞེངས་ཏེ། ཤམ་བྷ་ལའི་ཡུལ་གྱི་རྒྱལ་པོ་ཆེན་པོ་ཟླ་བ་བཟང་པོ་དང་།ཡུལ་དགུ་བཅུ་རྩ་དྲུག་གི་སྤྲུལ་པའི་རྒྱལ་པོ་དགུ་བཅུ་རྩ་དྲུགགཞན་ཡང་བྱང་ཆུབ་སེམས་དཔའི་འཁོར། ལྷ་དང་ལྷ་མིན་ལ་སོགས་པའི་ཚོགས་དཔག་མེད་ནམ་མཁའི་ཁམས་མཐའ་ཡས་པའི་ཆོས་འབྱུང་གི་ནང་དུ་ཆུད་པའི་དཀྱིལ་འཁོར་དུ་བཅུག་སྟེ། འཇིག་རྟེན་དང་འཇིག་རྟེན་ལས་འདས་པའི་དབང་བསྐུར་བ་བྱིན་ནས། སངས་རྒྱས་ཉིད་དུ་ལུང་བསྟན་ཏེ་ལྕགས་སྦྲུལ་སྤྱི་ལོའི་སྔོན་ ༨༨༡ ལ་ནག་པའི་ཉ་ལ་དུས་ཀྱི་འཁོར་ལོའི་རྩ་བརྒྱུད་སྟོང་ཕྲག་བཅུ་གཉིས་པ་གསུངས། འོན་ཀྱང་བོད་དུ་དུམ་བུ་གཅིག་སྟེ་དབང་མདོར་བསྟན་མ་གཏོགས་མ་གྱུར། སྤྱི་ལོ་ ༡༠༢༧ རིགས་ལྡན་བཅུ་གཉིས་པ་ཉི་མའམ་བཅུ་གསུམ་པ་དཔལ་སྐྱོང་ཁྲིར་བཞུགས་ཤིང༌། གྱི་ཇོ་ལོ་ཙཱ་བས་དུས་འཁོར་བོད་ལ་བསྒྱུར་ཅིང་རྒྱ་གར་དུ་སྤྱན་དྲངས། དེའི་ཕྱི་ལོར་དུས་འཁོར་བོད་དུ་སྤྱན་དྲངས། དེ་ནས་རབ་བྱུང་དང་པོ་ཚུགས་ཤིང་ལོ་དེར་མེ་ཡོས་ལོ་ཡིན་པ་དང༌། ད་བར་དུས་འཁོར་བོད་ལ་བསྒྱུར་ནས་རབ་ལོ་ ༩༩༠ སོང་བ་དང༌། བོད་རྒྱལ་ཁབ་དབུ་བརྙེས་ནས་བརྩིས་པའི་བོད་རྒྱལ་ལོ་ ༢༡༤༤ སྟོན་པ་བདེ་བར་གཤེགས་ནས་ལོ་ ༢༡༦༢ ཡེ་ཤུ་འཁྲུངས་པ་ནས་བརྩིས་པའི་སྤྱི་ལོ་ ༢༠༡༧ བཅས་ཡིན་ལ། དུས་རབ་གཅིག་ལ་ལོ་ ༡༠༠ དང༌། ལོ་རབས་གཅིག་ལ་ལོ་ ༡༠ རབ་བྱུང་གཅིག་ལ་ལོ་ ༦༠ ཡིན་པ་ཡང་མཁྱེན་གལ་ཆེ་ཞིང༌།…
བརྒྱད་གཏོར་ཆེན་མོའི་མཛད་སྒོ་ངོ་སྤྲོད།

        ༈ སྔར་རང་ཡུལ་གངས་ཅན་ལྗོངས་འདི་ཁ་བ་གངས་ཅན་པ་རྣམས་ཀྱི་རང་ལག་ཏུ་ཡོད་པའི་སྐལ་བཟང་གི་དུས་སུ་བོད་ཟླ་ ༣ ཚེས་ ༨ ཉིན་གམ་བཅར་རྩེ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་ནས་རྩེ་ཕོ་བྲང་དུ་མགོན་པོ་ཞལ་དང༌། དཔལ་མགོན་སྟོབས་འཕྲོག་དབང་པོའི་ལོ་འཁོར་དུས་མཆོད་གཟབ་གསོལ་གནས་གཟིགས་དང་འབྲེལ་དེ་ཉིན་གཞུང་ཞབས་སེར་སྐྱ་རྣམས་དབྱར་ཁའི་ན་བཟའ་བརྗེ་བཞེས་དགོས་པས་སྔ་དྲོ་རྩེ་ཕོ་བྲང་དུ་བཅར་ཏེ་དྲུང་བཞེས་ཕེབས། ༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ཉི་འོད་ཀྱི་བཞུགས་ཁྲིར་༸ཞབས་སོར་འཁོད་འཕྲལ་སྲིད་བཀས་མཚོན་ནང་མ་མཁན་སྡེ་ཆེ་ཆུང་དང༌། རྩེ་ཤོད་ལས་ཚན། དྲུང་དཀྱུས་ཁོངས་གཏོགས་དང་བཅས་པས་མཇལ་ཁ་ཞུས། མུ་མཐུད་རྩེ་ཤོད་ཞབས་གསར་པ་རྣམས་གསར་མཇལ་ཞུ་རྒྱུར་དེ་སྐབས་རྟེན་གསུམ་བཏེགས་འབུལ་དང་འབྲེལ་གྲལ་ལ་འཁོད། གསོལ་ཇ་དང་བཞེས་འབྲས་ཕེབས། འབྱོར་ཐོན་སོགས་འཆར་མཇལ་གང་ཡོད་དང་དམངས་བཅས་ལ་ཕྱག་དབང་དང་སྲུང་མདུད་རེ་སྩལ་ཏེ་གཟིམ་ཆུང་དུ་ཕེབས། དྲུང་བཞེས་སར་གསོལ་ཚིགས་དཀར་སྐྱོང་དང༌། དཀར་སྤྲོ་སོགས་རིམ་བཞིན་ཕེབས། དེ་ནས་ཚོམས་ཆེན་དུ་རྣམ་གྲྭའི་གསོལ་ཚོགས་དབུས་སུ་༸གོང་ས་༸སྐྱབས་མགོན་ཆེན་པོ་མཆོག་དང་སྲིད་བཀའ་སོགས་གཞུང་ཞབས་རྣམས་ནས་མགོན་པོ་གུར་ཞལ་དང་ལྷ་མོ་ཆོས་རྒྱལ་སོགས་ཀྱི་ཞལ་འབག་བཀའ་རྒྱ་མ་རྣམས་ལ་སྙན་དར་འབུལ་གནང་མཛད་དེ་མཛད་སྒོ་གྲོལ། དེ་ཉིན་ནས་བཟུང་དགའ་ལྡན་ལྔ་མཆོད་བར་གཞུང་ཞབས་ཚང་མ་དབྱར་ཆས་བཞེས་དགོས་པ་བཅས་གནང་ལམ་ཡོད་པ་ལགས་སོ། །          ༸རྒྱལ་དབང་སྐུ་ཕྲེང་གསུམ་པ་ཐམས་ཅད་མཁྱེན་པ་བསོད་ནམས་རྒྱ་མཚོ་མཆོག་དཔལ་ལྡན་འབྲས་སྤུངས་སུ་བཞུགས་པའི་ནུབ་གཅིག་མནལ་ལམ་དུ་བསྟན་འགྲོའི་བདེ་སྐྱིད་ཀྱི་སླད་དུ་དཔལ་མགོན་ཞལ་བཞི་པ་བསྟེན་གནང་དགོས་པའི་ཐུན་མོང་སྣང་ངོར་མཚན་མ་བྱུང་བ་གསུང་རྣམ་ནང་གསལ་བ་བཞིན། དེའི་རྗེས་ནས་ལོ་ལྟར་བོད་ཟླ་༣ཚེས་༨ནམ་ཡིན་ལ་དཔལ་མགོན་གུར་དང༌། ཞལ། ལྕམ་སྲིང་བཅས་ཀྱི་དུས་གཏོར་འཛུགས་པར་མཛད། དེ་ནས་བཟུང་བརྒྱད་གཏོར་ཆེན་མོ་ཞེས་སྔར་སྲོལ་མ་ཉམས་པར་ལོ་ལྟར་ཚུགས་མུས་ཡིན།
མཐུན་པ་སྤུན་བཞི།

མཐུན་པ་སྤུན་བཞི་ནི་གོང་མོ་སྲེག་དང༌། རི་བོང༌། སྤྲེའུ། གླང་ཆེན་བཅས་བཞི་སྟེ། འདིའི་ཐོག་མའི་འབྱུང་ཁུངས་ནི། བཅོམ་ལྡན་འདས་ཀྱིས་འདུལ་བ་ལུང་གཞི་ལས་གསུངས་པ་གཞིར་བཟུང་ཏེ་ཆོས་རྒྱལ་དགེ་དབང་གིས་རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་གི་ཡལ་འདབ་གྱ་དྲུག་པ་བ་མེན་གྱི་རྟོགས་པ་བརྗོད་པའམ། འགྲེལ་པ་ཁག་ཏུ་བྱ་སྲེག་པའི་རྟོགས་པ་བརྗོད་པ་ཞེས་གསུངས་པ་དེ་ཡིན། འདི་བཞིའི་མཚོན་དོན་ནི་ཆེ་བཀུར་ཆུང་བྱམས་དང༌། ཡ་རབས་གུས་ཞབས་ཀྱི་རྣམ་པའི་ལམ་ནས་ཞི་བདེའི་འཚོ་བ་མཚོན་པ་དེ་ཉིད་ཡིན་ལ། སྲོག་ཆགས་འདི་བཞིས་ཞི་བདེ་མཚོན་པ་ནི། སངས་རྒྱས་ཤཱཀྱ་ཐུབ་པའི་སྐྱེས་རབས་རྣམ་ཐར་ལས་བྱུང་བ་ཞིག་སྟེ། དེ་ཡང༌། སྔོན་ཝ་རཱ་ཎ་སིའི་རྒྱལ་པོ་ཚངས་སྦྱིན་གྱི་དུས་སུ། སངས་རྒྱས་བཅོམ་ལྡན་འདས་དེ་ཉིད་བྱ་སྲེག་པ་ཞིག་གི་སྐྱེ་བ་བཞེས་ཏེ་ནགས་ཚལ་ཆེན་པོ་ཀ་ཤི་མཛེས་ཀ་ཞེས་པའི་མཐར་གནས་སོ།།
རྣམ་བཅུ་དབང་ལྡན་གྱི་འགྲེལ་བཤད།

སྤྱིར་རྣམ་བཅུ་དབང་ལྡན་ཞེས་པ་ནི། འཇམ་དཔལ་མཚན་བརྗོད་ལས། རྣམ་པ་བཅུ་པོ་དོན་བཅུའི་དོན། །ཐུབ་དབང་སྟོབས་བཅུ་ཁྱབ་པའི་བདག། སྣ་ཚོགས་དོན་ནི་མ་ལུས་བྱེད། །རྣམ་བཅུ་དབང་ལྡན་ཆེ་བ་པོ། ། ཞེས་གསུངས་པ་ལྟ། དོན་ནི་སངས་རྒྱས་ཀྱི་སྟོབས་བཅུ་སོགས་ཡིན་ན་ཡང༌། བྱེ་བྲག་ཏུ་གཉིས་མེད་དཔལ་དུས་ཀྱི་འཁོར་ལོའི་རྒྱུད་ལས་གསུངས་པའི་ཐུན་མོང་མ་ཡིན་པའི་ཕྱི་ནང་གཞན་གསུམ་དག་པ་མཉམ་པར་སྦྱོར་བའི་ཁྱད་ཆོས་དང་འབྲེལ་བའི་རང་ལུགས་སུ་གྲགས་པའི་རྣམ་བཅུ་དབང་ལྡན་ནི། དུས་འཁོར་ལས། ཕྱི་ནང་གཞན་གསུམ་དབྱེར་མེད་དུས་ཀྱི་འཁོར་ལོའི། ། ཞེས་པ་ལྟར་དཔལ་དུས་ཀྱི་འཁོར་ལོའི་སྣོད་བཅུད་ཕྱི་ནང་གཞན་གསུམ་གྱི་སྙིང་པོ་གཅིག་ཏུ་བསྡུས་པ་སྟེ། ལཛྙཱའི་ཡི་གེ་ཧཾ་ཀྵ་མ་ལ་ཝ་ར་ཡ་ཞེས་པའི་ཡིག་འབྲུ་བདུན་དང༌། ཡི་གེ་གཟུགས་འགྱུར་བའི་རྗེས་སུ་སྣ་ལྡན་ནམ་ཟླ་ཚེས། ཐིག་ལེ། སྲོག་གི་ཨ་ཡིག་མཚོན་བྱེད་ནཱ་ད་བཅས་ཡི་གེ་རྣམ་པ་བཅུ་བརྩེགས་མར་གནས་པར་བཀོད་པ་ནི་ལེགས་སྦྱར་སྐད་ཀྱི་ཡིག་གཟུགས་དབུ་ཅན་ལྟར་བྲིས་པ་ཞིག་ཡིན། ཡང་ན། འབྱུང་བ་རླུང་མེ་ཆུ་ས་རི་རབ་སྟེ་བརྟེན་པ་རྣམ་པ་ལྔ་དང༌། འདོད་པའི་གཟུགས། གཟུགས་མེད་ཉི་ཟླ་གཉིས་བཅས་གཡོ་བ་རྣམ་པ་བཞི། ཀུན་ཁྱབ་སྒྲ་གཅན་ནམ་མཁའ་དང་བཅས་པ་བཅུ་པོ་དེ་འཇིག་རྟེན་གྱི་སྣོད་དུ་གྲུབ་པས་དེ་ཁང་བཟང་གི་རྒྱན་དུ་སྤྲས་པ་དེས་ཕྱིའི་སྣོད་བཅུད་རང་བྱུང་ཁམས་དང༌། ནང་གི་འབྱུང་ཁམས་བཅས་རང་གི་དབང་དུ་བསྡུས་ཐུབ་པའི་རྟེན་འབྲེལ་གྱི་དགོས་པ་ཁྱད་པར་ཅན་ཡོད་པར་མཚོན་ཞིང༌། འདི་ནི་སྣ་ཚོགས་པདྨའི་གདན་བཞི་དང་བཅས་པ་སྟེ། དེའི་རིམ་པ་སྣ་ཚོགས་པདྨའི་སྟེང་དུ་ཟླ་བ་དཀར་པོ། ཉི་མ་དམར་པོ། སྒྲ་གཅན་སྔོན་པོ། དུས་མེ་སེར་པོ་བཅས་ཀྱི་གདན་བཞིར་འབྱུང་བ་རིམ་བརྩེགས་ཀྱི་རང་མདོག་ཡིན་ནོ།།          མཚོན་དོན་ནི་ཕྱི་ལ་སྦྱར་ན། ཕྱི་འཇིག་རྟེན་གྱི་སྣོད་བཅུད་མཚོན་ཞིང༌། གཞི་ནམ་མཁའ་འབྱུང་བཞི་རི་རབ་དང་བཅས་པའི་སྣོད་ཆགས་པ་དང་ཆོས་མཐུན་པའི་ཡ་རླུང་གི་ཁམས་ནག་པོ་དང༌། ༼འདི་ལ་ལྗང་གུ་ཞེས་ཀྱང་གསུངས།༽ར་མེའི་ཁམས་དམར་པོ། ཝ་ཆུའི་ཁམས་དཀར་པོ། ལ་སའི་ཁམས་སེར་པོ་སྟེ། ཕྱི་སྣོད་ཀྱི་འཇིག་རྟེན་འབྱུང་བ་རིམ་བརྩེགས་མཚོན་པའམ། མ་འདོད་ཁམས་འདོད་ཡོན་ལྔ་མཚོན་བྱེད་ཁ་དོག་ལྔ་ལྡན་ནམ་བརྟན་པ་རི་རྒྱལ་གྱི་ས་བོན་ཕྱོགས་མདོག་སྟེ་ཤར་ནགལྷོ་དམར། བྱང་དཀར། ནུབ་སེར།…