འདོད་ཡོན་སྣ་ལྔའི་མཚོན་དོན་འགྲེལ་བཤད།
དེ་ཡང་འདོད་ཡོན་ལྔ་སྟེ། ལེགས་སྦྱར་གྱི་སྐད་དུ་ཀཱ་མ་གུ་ཎ་ཞེས་སུ་འབོད་ཅིང༌། འདོད་པའི་ཡོན་ཏན་འདི་དག་ཁམས་གསུམ་ལས་ཆ་ཚང་ཡོད་པའི་ཁམས་ནི་འདོད་ཁམས་ཁོ་ན་ཡིན་ཏེ། དེ་དག་ཡིད་དུ་འོང་བའི་ཡོན་ཏན་གྱི་ཡུལ་ཡིན་པས་འདོད་ཡོན་དང༌། དབང་ཤེས་ལྔའི་སྤྱོད་ཡུལ་ཡིན་པས་ན་གྲངས་ལྔ་རུ་ངེས་པས་འདོད་ཡོན་ལྔ་ཞེས་གྲགས། དེ་ལྟར་འདོད་ཡོན་ལྔ་ནི་ཡུལ་ཅན་དབང་ཤེས་ལྔའི་ཡུལ་དུ་གྱུར་ཅིང་དེ་དག་གི་སྤྱོད་ཡུལ་དུ་གྱུར་པའི་ཚེ། དང་པོ་འཕྲད་པའི་སྐབས་ཡིད་ཀྱི་དང་བ་འདྲེན་པ་དང༌། བར་དུ་མྱོང་བའི་སྐབས་དབང་པོ་ཚིམ་པར་བྱེད་པ། ཐ་མ་སྤྱོད་ཡུལ་དུ་གྱུར་རྗེས་ལུས་སེམས་བརྟས་པར་བྱེད་པས་འདོད་པའི་ཡོན་ཏན་དུ་གྲགས་པ་ཡིན། འདོད་ཡོན་ལྔ་ནི་གཟུགས་སྒྲ་དྲི་རོ་རེག་བྱ་ལྔའམ། གཟུགས་ཀྱི་ཡོན་ཏན་དང༌། སྒྲའི་ཡོན་ཏན། དྲིའི་ཡོན་ཏན། རོའི་ཡོན་ཏན། རེག་བྱའི་ཡོན་ཏན་ནམ་ནུས་པ་ལ་འདོད་པའི་ཡོན་ཏན་ལྔ་ཞེས་བྱ་ལ། གཟུགས་མེ་ལོང༌། སྒྲ་པི་ཝང༌། དྲི་བདུག་སྤོས། རོ་ལྷ་བཤོས། རེག་བྱ་དར་དཀར་བཅས་མཆོད་རྫས་ཀྱི་བྱེ་བྲག་མེ་ལོང་དང༌། པི་ཝང༌། དུང་ཆུ། ཤིང་འབྲས། དར་དཀར་ལྔ་པོས་རིམ་བཞིན་གཟུགས་སྒྲ་དྲི་རོ་རེག་བྱ་སོ་སོར་མཚོན་པ་ལ་འདོད་ཡོན་སྣ་ལྔ་ཞེས་བྱའོ།།