ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར།

            དེ་ཡང་རྡོ་རྗེ་བྲག་གི་མཚན་རྒྱས་པར་“ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར་”ཞེས་ཞུ། སྐྱིད་གཤོངས་རྭ་སྨད་ནས་ཤར་དུ་སྣུམ་ནག་འཁོར་ལམ་དེད་དེ་སྤྱི་ལེ་ལྔ་ཙམ་ཕྱིན་ན་རྡོར་བྲག་གྲུ་ཁར་འབྱོར། དེ་ནས་འཕྲུལ་གྲུར་བསྡད་དེ་ཆུ་ཚོད་གཅིག་མིན་ཙམ་སོང་ན་གྲུ་ལས་ཐོན་མ་ཐག་དགོན་དེར་འབྱོར། རྡོར་བྲག་ཅེས་པ་ནི་དགོན་དེའི་རྒྱབ་རིར་གཡུ་ཡི་རྡོ་རྗེའི་རང་བྱོན་ཡོད་པས་རྡོ་རྗེ་བྲག་དང་། ཨེ་ཝཾ་ལྕོག་སྒར་ཞེས་པ་ནི་ཐོག་མར་ལྕོག་གུར་ཕུབ་པའི་འདུས་སྡེ་ཡིན་པས་མཚན་དེ་ལྟར་ཐོགས། དེའང་ཐོག་མར་མངའ་རིས་པཎྜི་ཏ་པདྨ་དབང་གི་རྒྱལ་པོས་གུར་བཀྱོན་པའི་གསང་ཆེན་གྱི་འདུས་སྡེ་ཆུང་ངུ་ཞིག་འཛུགས་གནང་མཛད་པ་ལ། དེ་ནས་སྐུ་ཕྲེང་གསུམ་པ་རིག་འཛིན་ངག་གི་དབང་པོས་དུས་རབས་བཅུ་བདུན་ཙམ་ལ་དགོན་དེ་བརྩིགས་པར་མཛད། རིག་འཛིན་སྐུ་ཕྲེང་བཞི་པ་ཀུན་བཟང་པད་མ་འཕྲིན་ལས་གདན་ཁྲིར་འཁོད་རྗེས། རྒྱལ་མཆོག་ལྔ་པ་ཆེན་པོ་དང་ཆོས་ཡོན་གྱི་ཐུགས་རྗེའི་བདག་རྐྱེན་དང་བཅས་སྟོབས་རྒྱས་པར་གྱུར། བདེ་ཡངས་ཤར་ནུབ་གཉིས་ཞེས་མདོ་སྔགས་གྲྭ་ཚང་ཤར་ནུབ་གཉིས་ཆཁོས། དགེ་འདུན་ཞལ་གྲངས་ལྔ་སྟོང་ཙམ་བྱུང་གསུངས། སྔ་འགྱུར་རྙིང་མའི་བྱང་གཏེར་ གྱི་གདན་ས་ཆེན་པོར་གྲགས།
ལོ་ཙཱའི་རྣམ་དཔྱོད་དང་། སྒྲ་བསྒྱུར་གྱི་ཁྱད་ཆོས། (9)

ཏ༽ ལོ་ཙཱའི་རྣམ་དཔྱོད་དང་། སྒྲ་བསྒྱུར་གྱི་ཁྱད་ཆོས།   ལོ་ཙཱ་སློབ་གཉེར་བའི་ཆ་རྐྱེན་ལྔ་དང་། བརྟག་ཐབས་རྣམ་པ་ལྔའི་ཚད་གཞི་ཚང་བའི་ལོ་ཙཱ་བ་རྣམས་ཀྱིས་བསྒྱུར་བའི་བཀའ་དང་བསྟན་བཅོས་ཀྱི་གཞུང་ལུགས་རྣམས་བརྗོད་བྱའི་དོན་གྱི་གོ་རིམ་མ་ནོར་ཞིང་། ཆ་ལག་ཚང་བ་དང་། རྗོད་བྱེད་ཀྱི་ཚིག་གསལ་ཞིང་གོ་བརྡ་འཕྲོད་པའི་ནུས་པ་ཆེ་བ་མ་ཟད། བསྒྱུར་ཡིག་འགའ་ཞིག་ནི་བོད་མི་རང་གིས་རྩོམ་འབྲི་བྱས་པ་ལྟ་བུའི་ཆུ་ཚད་ཧ་ཅང་མཐོན་པོ་ཡོད་སྟབས། གནའ་རབས་རྒྱ་གར་གྱི་རིག་གནས་དང་། ནང་དོན་རིག་པའི་གསུང་རབ་གླེགས་བམ་མང་པོའི་མ་དཔེ་རྣམས་གཏོར་བཤིག་ཐེངས་གསུམ་བྱུང་བའི་རྐྱེན་གྱིས་མཐོང་རྒྱུ་མེད་པར་གྱུར་ཀྱང་། དེང་སྐབས་བོད་ཡིག་གི་ནང་ཡོད་པའི་བཀའ་བསྟན་རྣམས་བོད་ཡིག་ནས་ལེགས་སྦྱར་དང་པཱ་ལིའི་ཡི་གེར་ཕར་བསྒྱུར་བའི་ཐོག་ལ་རྒྱ་གར་ཡི་གེའི་མ་དཔེ་ངོ་མ་དང་ཁྱད་མེད་པའི་ཕན་ཐོགས་ཆེན་པོ་ཡོང་གི་ཡོད་པ་རྒྱལ་ཁབ་ཕྱི་ནང་གི་མཁས་པ་མང་པོས་གཅིག་གྱུར་གྱིས་ངོས་འཛིན་གནང་བཞིན་ཡོད་པ་མ་ཟད། རྒྱ་གར་སྐད་ཀྱི་དཔེ་ཆ་རྒྱ་ཡིག་དང་བོད་ཡིག་གཉིས་ཀར་ཡོད་པ་མང་པོ་ཞིག་རྒྱ་ཡིག་ཐོག་ནས་གོ་བ་ལོན་དཀའ་བ་རྣམས་བོད་ཡིག་ནང་གོ་བདེ་བ་དང་། བརྗོད་དོན་ཆ་ཚང་བ་ཡོད་པ་ཡང་རྒྱ་བོད་གཉིས་ཀའི་སྐད་ཡིག་ལ་མཁས་པའི་མཁས་དབང་མང་པོས་གསུངས་དང་གསུང་མུས་རེད། ནང་པའི་ཆོས་དང་རིག་གནས་ལ་ཞིབ་འཇུག་གནང་མཁན་ཕྱི་རྒྱལ་གྱི་མཁས་པ་མང་པོས་བོད་ཡིག་དང་བོད་སྐད་སློབ་སྦྱོང་བྱེད་པའི་རྒྱུ་མཚན་གཙོ་བོ་ཡང་དེར་ཐུག་ཡོད། དེར་མ་ཟད་ནང་པའི་ཆོས་དང་རིག་གནས་ལྔ་ལ་སོགས་པའི་དཔེ་ཆ་མང་པོ་ཞིག་ཡོད་པའི་ནང་ནས་འགའ་ཞིག་རྒྱ་ཡིག་དང་། འགའ་ཞིག་རྒྱ་གར་སྐད་དུ་ཡོད་པ་རྣམས་སྔོན་བྱོན་བོད་ཀྱི་ལོ་ཙཱ་བ་རྣམས་ཀྱིས་བོད་སྐད་དུ་བསྒྱུར་ནས་ང་ཚོས་སོ་སོའི་མི་རིགས་རང་གི་སྐད་ཀྱི་ཐོག་ནས་ལྟ་ཀློག་བྱས་ཏེ་གོ་དོན་རྟོགས་ཐུབ་པ་བྱུང་བ་ཡང་ལོ་ཙཱ་བ་ཁོང་རྣམས་ཀྱི་བོད་ཀྱི་སྐད་ཡིག་གི་ཡིག་སྒྱུར་ཐད་ལ་སྟབས་བདེའི་སླ་བཅོས་དང་འོལ་ཚོད་ཙམ་མ་ཡིན་པའི་མི་རིགས་གཞན་དག་གི་སྐད་ཡིག་གཉིས་ཀའི་ཚིག་དོན་ཆ་ཚང་བར་མཁྱེན་རྟོགས་གནང་རྗེས་བསྒྱུར་བ་ཞིག་ཡིན་པའི་རྟགས་མཚན་གསལ་པོ་ཞིག་རེད། དཔེར་ན། སྔོན་བྱོན་རྒྱའི་ལོ་ཙཱ་བ་རྣམས་ཀྱིས། བུདྡྷཱ་དང་། དྷརྨ། སངྒ་སོགས་བརྗོད་དོན་ཕལ་མོ་ཆེ་སྒྲ་བསྒྱུར་གཙོ་བོར་མཛད་ཡོད་པ་དང་། བོད་ཀྱི་ལོ་ཙཱ་བ་རྣམས་ཀྱིས་ཐོག་མ་ནས་བུདྡྷཱ་ལ་སངས་རྒྱས་དང་། དྷརྨ་ལ་ཆོས། སངྒ་དགེ་འདུན་སོགས་དོན་བསྒྱུར་གཙོ་བཟུང་མཛད་དེ་བོད་མི་རང་ཉིད་ཀྱི་སྐད་ཡིག་གི་ཐོག་ནས་ནང་དོན་གོ་རྒྱུ་ཡོད་པ་ཞིག་བསྒྱུར་ཡོད། ལྷག་པར་བོད་ཡིག་ཏུ་བསྒྱུར་བའི་བཀའ་བསྟན་རྣམས་ནི་སྤུས་ཚད་དང་། གྲངས་འབོར་གང་གི་ཆ་ནས་འགྲན་ཟླ་དང་བྲལ་བ་ཞིག་ཆགས་ཡོད་པར་བརྟེན་བོད་ཀྱི་ཡིག་སྒྱུར་དེ་ཡང་ཡུན་རིང་གི་ལོ་རྒྱུས་ལྡན་པ་དང་། སྒྲ་སྒྱུར་ལོ་པཎ་གླིང་དང་སྒྲ་སྒྱུར་རིགས་པའི་གཞུང་ལུགས་བྱུང་སྔ་ཞིང་། སྐད་གཉིས་སྨྲ་བའི་ལོ་ཙཱ་བ་བྱོན་མང་བ། བསྒྱུར་བྱའི་ནང་དོན་ཕུན་སུམ་ཚོགས་ཤིང་ཆ་ལག་ཚང་བ། བཀའ་བསྟན་དང་བཅུ་ཕྲག་རིག་གནས་གཞུང་གི་སྒྱུར་ཡིག་མང་བ། བསྒྱུར་ཆོས་ཀྱི་གྲངས་འབོར་ཆེ་བ། སྒྲ་བསྒྱུར་གྱི་ཆུ་ཚད་མཐོ་ལ་སྒྱུར་བའི་སྤུས་ལ་ལེགས་པ་བོད་ཀྱི་ས་ཁྱོན་དང་། དུས་ཡུན། མི་འབོར་སོགས་ཕྱོགས་གང་ས་ནས་གཤིབ་བསྡུར་གྱིས་དཔྱད་ཞིབ་བྱས་ཀྱང་ཐུན་མིན་གྱི་ཁྱད་ཆོས་དུ་མ་ལྡན་ཡོད་པས། བསྟན་པ་སྔ་དར་གྱི་སྐབས་སུ་བོད་ཀྱི་ཡིག་སྒྱུར་བྱ་གཞག་དར་སྤེལ་གྱི་རྩེ་མོར་སོན་ཞིང་། དོ་ཟླ་བྲལ་བའི་ལག་རྗེས་ངོམ་ཆོག་པ་ཞིག་བྱུང་བ་ནི། སྔོན་བྱོན་མེས་པོ་གོང་མ་རྣམས་ཀྱི་གཞན་དྲིང་མི་འཇོག་པའི་སྐུ་དྲིན་ཡིན་པ་གོར་མ་ཆག འོ་ན་སྐབས་དེའི་ཡིག་སྒྱུར་བྱ་བར་ཁྱད་ཆོས་གང་དག་ལྡན་ཡོད་ཅེ་ན། སྲོང་བཙན་སྒམ་པོ་ནས་ཁྲི་རལ་བར་བཙན་པོ་རིམ་བྱོན་གྱིས་ཡིག་སྒྱུར་རྩ་བར་ཐུགས་སྣང་མཐོང་ཆེན་མཛད་པས།…
ལོ་ཙཱ་བའི་དབྱེ་བ་དང་། སོ་སོའི་མཛད་འགན། (8)

ཉ༽ ལོ་ཙཱ་བའི་དབྱེ་བ་དང་། སོ་སོའི་མཛད་འགན།   ལོ་ཙཱ་བ་ལ་དབྱེ་ན། ཞུས་ཆེན་གྱི་ལོ་ཙཱ་བ་དང་། བར་ཞུས་ཀྱི་ལོ་ཙཱ་བ། མཆན་བུའི་ལོ་ཙཱ་བ་སྟེ་ལོ་ཆུང་དང་གསུམ་ཡོད་ཅིང་། དུང་དཀར་ཚིག་མཛོད་ཆེན་མོ་[1]ལས། ལོ་ཙཱ་བ་ཆེན་པོ་དང་། མཆན་བུའི་ལོ་ཙཱ་བ་སྟེ་ལོ་ཆུང་གཉིས་ཡོད། ལོ་ཙཱ་བ་ཆེན་པོ་ནི་མི་རིགས་གཞན་གྱི་སྐད་ཡིག་ནས་རང་མི་རིགས་ཀྱི་སྐད་ཡིག་ཐོག་བསྒྱུར་ཐུབ་པ་མ་ཟད། གཞན་གྱིས་བསྒྱུར་བའི་ཡི་གེར་འགྱུར་བཅོས་དང་ཞུས་དག་མཛད་ཐུབ་པ་ཞིག་ཡིན། ཞེས་གསུངས། བོད་ཀྱི་ལོ་པཎ་གྱི་ཐོག་མ་ནི་སློབ་དཔོན་ཐོན་མི་སམ་བྷོ་ཊ་ཡིན་ཅིང་། དེ་ནས་དུས་རབས་བརྒྱད་པའི་འགོར་ཆོས་རྒྱལ་ཁྲི་སྲོང་ལྡེའུ་བཙན་གྱིས་སྲིད་དབང་བཟུང་རིང་བསམ་ཡས་གཙུག་ལག་ཁང་གསར་བཞེངས་ལེགས་གྲུབ་ཟིན་རྗེས་གླིང་བཅུ་གཉིས་ཀྱི་ནང་ཚན་སྒྲ་བསྒྱུར་རྒྱ་གར་གླིང་དུ་ཡིག་བསྒྱུར་ཁང་གསར་འཛུགས་གནང་ཐོག ཤེས་རིག་གསལ་ཞིང་སྨྲ་བརྗོད་བདེ་བའི་བོད་ཕྲུག་ ༡༠༨ བསྡུས་ནས་ལོ་ཙཱ་བ་གསོ་སྐྱོང་གནང་སྟེ། དེ་ནས་ཐོན་པ་རྣམས་ལ་མཁྱེན་ཡོན་གྱི་གནས་ཚད་རིམ་པ་གསུམ་དུ་ཕྱེ་ནས་བསྒྱུར་ཞུས་ཀྱི་ལས་བགོས་མཛད་པ་སྟེ། ༡༽ ཞུས་ཆེན་གྱི་ལོ་ཙཱ་བ། ༢༽ བར་ཞུས་ཀྱི་ལོ་ཙཱ་བ། ༣༽ མཆན་བུའི་ལོ་ཙཱ་བ་བཅས་ཡིན། དང་པོ། ཞུས་ཆེན་གྱི་ལོ་ཙཱ་བ་ནི། ལོ་ཙཱ་བ་གཞན་དག་གིས་ཡིག་བསྒྱུར་བྱས་ཟིན་པའི་མ་ཡིག་ལ་ཚིག་དང་དོན་གཉིས་ཀའི་ཐད་ནས་ཞུས་དག་མཐའ་མ་དེ་གནང་ནས་འགྲེམས་སྤེལ་བྱེད་ཆོག་པའི་གཏན་འབེབས་མཛད་མཁན་ཡིན། ཁྲི་སྲོང་སྐབས་ལོ་ཙཱ་བ་ ༡༠༨ གསོ་སྐྱོང་གནང་བའི་ནང་ནས་ཞུས་ཆེན་གྱི་ལོ་ཙཱ་བའི་མཚན་གནས་ཡོད་པ། ༡ ལྕེ་ཛྙ་ན་སི་དྷི་དང་། ༢ བྲང་ཏི་ཛ་ཡ་རཀྵི་ཏ། ༣ པ་གོར་བཻ་རོ་ཙ་ཎ། ༤ གཉགས་ཛྙ་ན་ཀུ་མ་ར།…
བཙན་པོའི་གཟིགས་སྐྱོང་དང་། ལོ་ཙཱ་བའི་གསོལ་ཕོགས། (7)

ཇ༽ བཙན་པོའི་གཟིགས་སྐྱོང་དང་། ལོ་ཙཱ་བའི་གསོལ་ཕོགས།   བཙན་པོ་ཁྲི་སྲོང་ལྡེའུ་བཙན་གྱི་སྐུ་དུས་སུ་ལོ་ཙཱ་བ་རྣམས་ཀྱི་འཚོ་བའི་ཐད་དམིགས་བསལ་གཟིགས་སྐྱོང་ཇི་ལྟར་གནང་ཡོད་ཅེ་ན། སྐབས་དེར་ལོ་ཙཱ་བའི་གསོལ་ཐང་ (ཕོགས་) ཞེས་འཚོ་བའི་ཐོབ་ཐང་བློན་ཆེན་དང་མཉམ་པ་ཡོད། དེ་ཡང་ཉང་ཉི་མ་འོད་ཟེར་གྱི་ཆོས་འབྱུང་ལས[1]། སྒྲ་སྒྱུར་གྱི་ལོ་ཙཱ་བ་དེ་ལ་གསོལ་ཐང་ནི། བློན་ཆེན་པོ་ཀུན་དང་མཉམ་མོ། །བློན་ཆེན་པོའི་ཟ་ཐང་ནི། རྒྱལ་པོས་གསོལ་བའི་གསུམ་ཆ་གཅིག་ཡིན་ནོ། །རྒྱལ་པོ་ཆེན་པོའི་གསོལ་ཐང་ནི། སྐུ་སྲུང་བརྒྱ་བརྒྱའི་ཆས་དང་བཅས་ན་མ་རེ་རེ་ལ་ཡོད་དོ། །ཞེས་གསལ་བ་ལྟར། སྐུ་སྲུང་དམག་མི་ ༡༠༠ ཐམ་པའི་ཕོགས་ཐོབ་དང་། རྒྱལ་པོའི་གསོལ་ཐང་མཉམ་པ་དང་། བློན་ཆེན་དང་། སྒྲ་སྒྱུར་ལོ་ཙཱ་བའི་གསོལ་ཐང་མཉམ་པས། དེའི་སུམ་ཆ་གཅིག་སྟེ་བརྒྱ་ཆ་ ༣༣༌༣༣ ཙམ་ཡིན་པས། མདོར་ན་སྐུ་སྲུང་དམག་མི་ ༣༣ ཙམ་གྱི་ཕོགས་ཐོབ་ལོ་ཙཱ་བར་གསོལ་སྩལ་གནང་བཞིན་ཡོད་ལ། མདོར་ན་རྒྱལ་པོའི་ཉིན་རེའི་གསོལ་ཟས་ཀྱི་འབྲུ་རིགས་དང་། གསོལ་མར། གསོལ་ཇ། བཞེས་སྣུམ། གསོལ་དཀྲུམ། ཤིང་ཏོག་སོགས་བསྡོམས་འབོར་གྱི་གསུམ་ཆ་གཅིག་གི་ཐོབ་ཐང་དང་མཉམ་པ་རྒྱལ་པོའི་བང་མཛོད་ནས་གནང་སྲོལ་ཡོད་པ་མ་ཟད། ལོ་ཙཱ་བ་སློབ་སྦྱོང་དུ་འགྲོ་མཁན་བོད་ཕྲུག་ཚང་མའི་འགྲོ་གྲོན་སློབ་ཡོན་དང་། ལམ་ཆས་སོགས་དང་། གསེར་ཕོན་ཆེན་དང་། ཚ་བའི་སྨན་སོགས་བཙན་པོ་རང་ཉིད་ཀྱི་མཛོད་ནས་སྩལ་ཏེ་རྒྱ་གར་འཕགས་ཡུལ་དང་། བལ་པོའི་རྒྱལ་པོར་ངོ་སྤྲོད་བཀའ་ཡིག་དང་། ཕྱག་རྟགས་བཅས་བསྐུར་ནས་བརྫངས་པ་གནང་ཡོད་ཚུལ་དུང་དཀར་རིན་པོ་ཆེའི་གསུང་འབུམ་དུ་གསལ་བ་ལྟར་རོ།།…
ཀུན་བཟང་རྡོ་རྗེ་གྲགས་པ།

སྟོད་མངའ་རིས་གུང་ཐང་གི་རྒྱལ་བརྒྱུད་ཅིག་སྟེ་རྒྱལ་པོ་ཁྲི་ཀུན་དགའ་བློ་གྲོས་དང་ཡུམ་གུ་གེ་མ་གཉིས་ཀྱི་སྲས་སུ་རབ་བྱུང་དགུ་པའི་ས་བྱི་ (༡༥༢༨) ལོར་འཁྲུངས། ཐོག་མར་ཆོས་སྒོར་ཞུགས་ཏེ་བཀྲ་ཤིས་ནམ་གླིང་དགོན་གྱི་སྤྱི་གཉེར་དང་། ཆོས་དཔོན། མཁན་པོ་བཅས་རིམ་པར་མཛད་ཀྱང་། མངའ་རིས་གུང་ཐང་རྒྱལ་པོའི་གདུང་རྒྱུད་དཀོན་ཐོག་རྐྱེན་གཞན་དུ་མའི་དབང་གིས་རྒྱལ་པོ་རྣམ་འཕྲུལ་གྱི་ཕྱག་རོགས་དང་སྦྲགས་ཁྱིམ་པའི་ཚུལ་དུ་བཞུགས་དགོས་བྱུང་། དེ་ཡང་རབ་བྱུང་དགུ་པའི་ཤིང་སྟག་ (༡༥༥༤) ལོར་བདག་མོ་ཡར་འབྲོག་མ་དང་མི་ངན་གཞན་གྲོས་མཐུན་གྱིས་བདག་མོ་གུ་གེ་མ་བཀྲོངས་ཤིང་། ཁྲི་ཀུན་བཟང་ཉི་ཟླ་གྲགས་པ་དང་། ཀུན་བཟང་རྡོ་རྗེ་གྲགས་པ་གཉིས་ཀྱང་བཀྲོངས་རྩིས་བྱས་ཏེ་གཤེད་མ་བཏང་ཡང་སྒོ་མང་། ནམ་ལིང་། ཕུ་ལག་གསུམ་གྱི་རམ་མདའ་སླེབས་སྟེ་བཀྲོངས་མ་ཐུབ། བདག་མོ་གུ་གེ་མ་བཀྲོངས་མཁན་རྣམས་ལ་སྲོག་ཐོག་གི་ཁྲིམས་གཅོད་དང་། བདག་མོ་ཡར་འབྲོག་མ་རང་ཡུལ་དུ་ཕྱིར་སློག་བཏང་། དེའི་ཕྱི་ལོ་སླར་ཡང་བདག་མོ་ཡར་འབྲོག་མའི་རྒྱབ་སྐྱོར་དུ་རིན་སྤུངས་ཀྱི་དམག་དཔུང་གིས་དཔལ་ཁུད་དང་ལ་སྟོད་ལྷོ་ཡང་བཅོམ་སྟེ་དབང་དུ་བསྡུས་པར་བརྟེན་ཀུན་བཟང་རྡོ་རྗེ་གྲགས་པ་རང་ཉིད་ངོ་མ་དམག་དཔོན་དུ་ཕེབས་ནས་རིན་སྤུངས་པའི་དམག་དང་འཐབ་སྤྲད་པས་རིན་སྤུངས་པའི་དམག་ཕམ་ནས་ལྷོ་ཤེལ་དཀར་རྫོང་བླངས་ཐོག ལྷོ་བདག་པོའི་རྒྱལ་བུ་རྒན་གཞོན་གཉིས་རིན་སྤུངས་པས་མི་གཏེར་འཛིན་བཟུང་བྱས་པ་ཡང་རིན་སྤུངས་པའི་ལག་ནས་བླངས་ཏེ་རྒྱལ་ཁ་ཐོབ། དགུང་ལོ་སོ་བརྒྱད་པ་རབ་བྱུང་དགུ་པའི་ཤིང་གླང་ (༡༥༦༥) ལོར་འདས། ཞིབ་པར་《བོད་ཀྱི་ལོ་རྒྱུས་དེབ་ཐེར་ཁག་ལྔ་》ལྕགས་དཔར་མའི་ཤོག་གྲངས་ ༡༣༩ ནས་ ༡༤༡ བར་གསལ། (དུང་དཀར་ཚིག་མཛོད་ཆེན་མོ་) ལས་ནས་བཏུས།
ཀུན་བདེ་གླིང་།

ཀུན་བདེ་གླིང་། མིང་གཞན་བརྟན་བཞུགས་ཆོས་འཁོར་གླིང་ཡང་ཟེར་ཞིང་། དེ་ནི་རྟ་ཚག་ཧོ་ཐོག་ཐུ་བསྟན་པའི་མགོན་པོས་བཏགས་གནང་མཛད་པ་ཞིག་ཡིན། དབུས་གཙང་ཀུན་བདེ་གླིང་དགོན་པ་ཞེས་གྲགས་པ་དེ་ནི། གོང་མ་ཆན་ལུང་ཁྲི་ལོ་དྲུག་ཅུའི་སྐབས་གོར་ཁ་བཙན་འཛུལ་དམག་བོད་དུ་འབྱོར་བ་རྣམས་མཐར་སྐྲོད་བཏང་ནས། དབུས་གཙང་གཉིས་ཀྱི་ས་ཆ་བདེ་འཇགས་སུ་བཀོད་པར་དྲན་གསོ་ཞུ་བའི་ཆེད་དུ་གོང་མས་དགོན་མིང་ལ་དབུས་གཙང་ཀུན་བདེ་གླིང་ཞེས་བཏགས་ཏེ་རྒྱ་སོག་བོད་མན་གྱི་ཡིག་འབྲུ་བཞིའི་སྒོ་བྱང་གནང་བ་དེ་ནས་མིང་དེ་ཐོགས་པ་ཡིན། དགོན་པ་འདི་བར་མ་རིའི་ལྷོ་ངོས་སུ་བསྐྲུན་ཡོད་པ་དང་ཚན་ཙན་ཀུང་ཧའོ་ལན་ཁྲ་པ་ཐུ་སོགས་མན་ཇུའི་དཔོན་རིགས་མང་པོས་ཞལ་འདེབས་ཕུལ་ནས་བསྐྲུན་ཐོག་རྗེ་དྲུང་ཧོ་ཐོག་ཐུའི་བཞུགས་གནས་སུ་ཕུལ་བ་ཡིན་ཅིང་། ཆན་ལུང་ལོ་ལྔ་བཅུ་ང་དགུར་ (༡༧༩༤) ལོར་བསྐྲུན་ཟིན་ནས་བོད་བཞུགས་ཨམ་བན་ནང་བློན་ཞུའོ་ཧྲི་དང་ལིའུ་ཕྲེ་ལང་གཉིས་ཀྱི་རྩོམ་ཡིག་འབྲི་ས་ཡང་བྱེད་ཀྱི་ཡོད་པ་རེད། (དེང་སང་རང་སྐྱོང་ལྗོངས་འགྲིམ་འགྲུལ་ཐིང་གི་སྣེ་ལེན་ཁང་ཡོད་ས་དེ་ཡིན།) རྗེ་དྲུང་ཧོ་ཐོག་ཐུ་ནི་བོད་དུ་མཚན་སྙན་ཧ་ཅང་ཆེན་པོ་ཡོད་པའི་བླ་སྤྲུལ་གྱི་གྲས་ཤིག་ཡིན་ཅིང་། དེར་ཆོས་ལུགས་ཀྱི་ཁྱབ་ཁོངས་ནས་གནས་བབ་ཤིན་ཏུ་མཐོན་པོ་ཡོད་པ་མ་ཟད། སྐུ་ཕྲེང་དྲུག་པའི་རྗེས་ནས་བོད་ཀྱི་ཆབ་སྲིད་ཁྱབ་ཁོངས་སུའང་གལ་ཆེའི་ཤུགས་རྐྱེན་ཡོད་ལ་དབང་ཆའང་ཧ་ཅང་ཆེན་པོ་ཡོད་པ་རེད། གོང་མ་ཆན་ལུང་ཁྲི་ལོ་ལྔ་བཅུ་ང་བདུན་སྐབས་གོར་ཁའི་བཙན་འཛུལ་དམག་མཐར་སྐྲོད་བཏང་རྗེས་ཧྥུ་ཁང་ཨན་གྱི་གཙོ་སྐྱོང་འོག་བོད་ཀྱི་ལས་དོན་བྱེད་ཕྱོགས་བཅོས་བསྒྲིགས་བྱས་པའི་རྩ་འཛིན་དོན་ཚན་ཉེར་དགུའི་ནང་གི་དོན་ཚན་བཅོ་བརྒྱད་པར་སླད་ཕྱིན་དགོན་སྡེ་ཁག་གི་མཁན་པོ་སྤྲུལ་སྐུ་འདེམས་བསྐོ་བྱེད་སྐབས་ཏཱ་ལའི་བླ་མ་དང་། བོད་བཞུགས་ཨམ་བན། རྗེ་དྲུང་ཧོ་ཐོག་ཐུ་སོགས་གྲོས་མོལ་གྱིས་གཏན་འབེབས་བྱེད་པ་དང་སྦྲགས་གསུམ་པོའི་ཐམ་ག་བརྒྱབ་པའི་བཀའ་ཡིག་སྤྲོད་དགོས་པའི་གཏན་འབེབས་བྱས་ཡོད་པ་རེད། རྗེ་དྲུང་ཧོ་ཐོག་ཐུ་ཁྱོན་བསྡོམས་སྐུ་ཕྲེང་བཅུ་གཅིག་བྱུང་བའི་ནང་སྐུ་ཕྲེང་བརྒྱད་པ་བློ་བཟང་ཡེ་ཤེས་བསྟན་པའི་མགོན་པོ་ (ཁོང་གི་ལོ་རྒྱུས་ཟུར་དུ་གསལ།) བོད་ཀྱི་ཆོས་སྲིད་གཉིས་ཀའི་ཐོག་ཤུགས་རྐྱེན་ཆེ་ཤོས་ཡིན་པ་དང་ཀུན་བདེ་གླིང་ནི་ཁོང་གིས་སྲིད་སྐྱོང་གནང་སྐབས་སྐྲུན་རྒྱུའི་འགན་བཞེས་གནང་བ་རེད། ཁོང་སྐུ་ན་གཞོན་ནུའི་སྐབས་མཁས་ཆེན་དཔལ་ལྡན་གྲགས་པ་དགེ་རྒན་དུ་བརྟེན་ཐོག་ ༡༧༧༡ ལོ་ནས་ ༡༧༨༡ ལོ་བར་བཀའ་ལྟར་རྒྱ་ནག་ཏུ་སློབ་སྦྱོང་ལ་ཕེབས་ཤིང་ཕྱིར་ལོག་ཕེབས་རྗེས་སླར་ཡང་འབྲས་སྤུངས་དགོན་གྱི་སྒོ་མང་གྲྭ་ཚང་དུ་སློབ་གཉེར་གནང་། ༡༧༨༩ ལོར་སླར་ཡང་བཀའ་ལྟར་རྒྱ་ནག་ཏུ་ཕེབས་ནས་པེ་ཅིན་གྱི་ཐམ་ག་བླ་མའི་མཚན་སྙན་ཐོབ་པ་དང་བཀའ་དང་ལེན་གྱིས་བོད་དུ་ཕེབས་ནས་ཏཱ་ལའི་བླ་མའི་སྲིད་དོན་ཕྱག་ལས་ལ་རམ་འདེགས་གནང་སྟབས་སྦི་ལིག་ཐུ་ནོ་མིན་ཧན་གྱི་གོ་གནས་ཐོབ། རྟ་ཚག་རྗེ་དྲུང་ནས་སྲིད་སྐྱོང་རྒྱལ་ཚབ་འགན་བཞེས་གནང་རིང་རྒྱ་བོད་མི་རིགས་དབར་གྱི་མཐུན་སྒྲིལ་ལ་ཕན་པའི་བྱ་བ་མང་པོ་གནང་ཡོད་ཅིང་། ལྷག་པར་དུ་ཆིང་རྒྱལ་རབས་སྲིད་གཞུང་ལ་གཞོགས་འདེགས་ཀྱིས་གོར་ཁའི་བཙན་འཛུལ་ལ་རྒོལ་ལན་སློག་པའི་ལས་དོན་ནང་ཆིང་སྲིད་གཞུང་གི་མཐོང་ཆེན་ཐོབ་པ་དང་། ༡༧༩༢ ལོར་གོར་ཁའི་དམག་ཐག་ཆོད་རྗེས་ཆིང་རྒྱལ་རབས་ཀྱི་ནང་བློན་ཧྥུ་ཁང་ཨན་གྱིས་སྲིད་ཚབ་རྟ་ཚག་བསྟན་པའི་མགོན་པོ་དང་མཉམ་གྲོས་ཀྱིས་ཀུན་བདེ་གླིང་དགོན་པ་གསར་བསྐྲུན་བྱས་ཐོག་ཧྥུ་ཁང་ཨན་ངོ་མས་དངུལ་སྲང་བདུན་བརྒྱ་ཞལ་འདེབས་བརྒྱབ་པ་དང་། ཧའོ་ལན་ཁྲ་སོགས་དཔོན་དམག་གིས་ཀྱང་གཅིག་མཇུག་གཉིས་མཐུད་ངང་ཞལ་འདེབས་བརྒྱབ་པ། རྟ་ཚག་བསྟན་པའི་མགོན་པོ་མཆོག་ནས་ཀྱང་དངོས་ཤུགས་འབོར་ཆེན་གཅིག་བཏོན་པ་བཅས་བྱས་ནས་རི་སྟེང་གི་འོད་འཕྲོ་ལྷ་ཁང་དང་། རི་སྐེད་ཀྱི་ཀོན་ཏིས་ལྷ་ཁང་། རི་གཤམ་གྱི་ཀུན་བདེ་གླིང་དགོན་པ་བཅས་ཕྱག་བཏབ་གནང་བ་རེད། ཀུན་བདེ་གླིང་གཞི་ཁྱོན་ཧ་ཅང་ཆེ་ཞིང་དགོན་པའི་མཐའ་བསྐོར་དུ་སྔོ་ལྗང་ཅན་གྱི་ལྗོན་ཤིང་གིས་ཁེངས་པ་དང་ཁང་པ་ཕན་ཚུན་སྦྲེལ་ནས་ཡོད་པ་དེ་དག་མཛེས་སྡུག་ལྟ་བས་མི་ངོམས་པ་ཞིག་ཡོད། ཀུན་བདེ་གླིང་གི་ཐོག་བརྩེགས་ཁང་པ་གཙོ་བོར་ཐོག་སོ་བའི་ཡོད་པ་དང་ཚང་མ་རྡོ་བརྩིགས་ཡིན་ཁར་རྩིག་པའི་སྟེང་དུ་སྤེན་བད་ཡོད་པ་དང་དེའི་སྟེང་དུ་གསེར་འོད་འཕྲོ་བའི་རྒྱལ་མཚན། གན་ཇི་ར་བཅས་ཡོད། ཁང་པ་གཙོ་བོའི་དཀྱིལ་དབུས་སུ་མཐོ་ཞིང་ཆེ་བའི་མཆོད་ཁང་ཁང་མིག་ལྔ་ཡོད་ཅིང་། དེའི་དབུས་ནི་མཐོ་ཚད་ཐོག་སོ་གསུམ་ཙམ་ཡོད་པ།…
ཀུན་དགའ་རིན་ཆེན།

ཀུན་དགའ་རིན་ཆེན། ས་སྐྱའི་ཁྲི་པ་བཅོ་ལྔ་པ་འདི་ཉིད་རབ་བྱུང་བཅུ་དྲུག་པའི་ས་ཡོས་ (༡༣༣༩) ལོར་ཡབ་མཁས་བཙུན་ནམ་མཁའ་ལེགས་པ་དང་། ཡུམ་དགེ་འདུན་འབུམ་གཉིས་ཀྱི་སྲས་སུ་འཁྲུངས། གཅེན་པོ་བླ་མ་དམ་པ་དང་བླ་མ་མཉམ་མེད་པ་ཆེན་པོ་གཉིས་ལས་རབ་ཏུ་བྱུང་། ལུག་ལོ་ཞིག་ལ་ཏཱའི་སི་ཏུ་བྱང་ཆུབ་རྒྱལ་མཚན་གྱི་ཕྱག་ཕྱི་མཛད་ནས་ཆུ་མིག་ཏུ་ཕེབས། དེ་ནས་བཟུང་བཞི་ཐོག་པའི་གདུང་རྒྱུད་རྣམས་ཀྱིས་ཆུ་མིག་ཏུ་ཆོས་འཁོར་མང་དུ་བསྐོར། འགའ་ཞིག་གནས་དེར་གདན་ཆགས་པས་ཕྱིས་སུ་བཞི་ཐོག་པ་རྣམས་ལ་ཆུ་མིག་བླ་བྲང་པ་ཞེས་གྲགས། གོང་མ་མཆོད་ཡོན་གྱིས་ཀུན་ཏིང་གུ་ཤྲིའི་མཚན་དང་ཤེལ་དམ་ཆེ་བ། དངུལ་དམ་ཆེ་བ་སོགས་གནང་། དགུང་ལོ་སོ་དྲུག་བཞེས་པ་རབ་བྱུང་དྲུག་པའི་ཤིང་སྟག་ (༡༣༧༤) ལོར་བཞི་ཐོག་གི་ཁྲིར་ཕེབས། གོང་ཐི་ལིང་ཀྱ་ཧོ་སི་ཏཱ་དབེན་གུ་ཤྲིའི་མཚན་གསོལ། དམ་ག་ཆེན་མོ་ཐོ་ཤུ་དང་བཅས་པ་ཕུལ། དགུང་ལོ་རེ་གཅིག་པ་རབ་བྱུང་བདུན་པའི་ས་ཡོས་ (༡༣༩༩) ལོར་སྐུ་གཤེགས། (དུང་དཀར་ཚིག་མཛོད་ཆེན་མོ་) ནས་བཏུས།