སྤེལ་ཞིབ་ཕྲ།

༄༅། །དག་ཡིག་གསལ་བའི་སྒྲོན་མེ། ༄༅། །ཨོཾ་སྭ་སྟི། བླ་མ་མཆོག་དང་འཇམ་དབྱངས་ལ། །མི་ཕྱེད་དད་པས་ཕྱག་བགྱིའོ། །གང་གི་བཀའ་དྲིན་བསམ་བཞིན་དྲན། །ཐུབ་པ་ལ་ཡང་ཕྱག་འཚལ་ལོ། །སྐྱེ་བོའི་བློ་དང་འཚམས་པ་ལ། །སྡེབ་སྦྱོར་ཉེར་མཁོ་བཤད་པར་བྱ། ། ༼ཀ༽ ཀུན་མཁྱེན་ཤཱཀྱ་ཐུབ་པ་ལ། །ཤིང་ཏོག་ཀ་ར་ཀུ་ཤུ་དང༌། །གུར་ཀུམ་སོགས་ཀྱི་མཆོད་པ་འབུལ། །འབོད་པའི་ཀྱེ་མ་ཀྱི་ཧུད་དང༌། །རུས་ཀྲང་ཀུ་ཅོ་བྱེད་པ་ཡི། །མགོ་བོ་ཀྱོག་ཀྱོག་སྣོད་ཀྱོང་ཀྱོང༌། །ཀེར་རེ་ལངས་ནས་ཀྲོང་ངེར་འདུག །ལྕགས་ཀྱུ་ཁྱེར་ནས་ཀླད་པ་འདགས།…

༄༅། །དག་ཡིག་གཅེས་བསྡུས་འཁྲུལ་སྤོང་ལེགས་པར་བཤད་པའི་སྐྱ་རེངས་གསར་པ་ཞེས་བྱ་བ་བཞུགས་སོ།། ཨ་ལག་ཤ་ངག་དབང་བསྟན་དར། (༡༧༥༩-?) ༄༅། །(ཤིས་བརྗོད་ཀྱི་རྒྱན)རྒྱལ་ཀུན་འཕྲིན་ལས་མཛེས་སྡུག་ལྷ་མོ་ཡི། །རྣམ་པའི་གར་བསྒྱུར་རྗེ་བཙུན་སྒྲོལ་མ་དང༌། །གཉིས་མེད་ཀློང་རྡོལ་ངག་དབང་བློ་བཟང་ལ། །སྐྱབས་སུ་མཆིའོ་ཀུན་ཏུ་ཤིས་གྱུར་ཅིག །(ངོ་བསྟོད་ཀྱི་དཔེ)དུས་གསུམ་རྒྱལ་བ་མཚན་དཔེ་ཡོངས་སུ་རྫོགས། །བདག་གི་བཤེས་གཉེན་མགྲིན་པའི་མདུད་བཀྲོལ་ཙམ། །དེ་ལྟ་ན་ཡང་རྒྱལ་བ་ཀུན་དངོས་དང༌། །གཉིས་སུ་མེད་པར་ཤེས་ནས་དད་པས་བསྟེན། །(ཡོངས་བརྗེས་ཀྱི་རྒྱན)ལུས་དང་ལོངས་སྤྱོད་དུས་གསུམ་དགེ་ཚོགས་སོགས། །བདག་ལ་ཅི་བདོག་མཁྱེན་པའི་གཏེར་ལ་དབུལ། །དེས་ཀྱང་སྐུ་གསུང་ཐུགས་ཀྱི་དངོས་གྲུབ་མཆོག །ལུས་པ་མེད་པར་འགྱངས་མིན་སྩོལད་ཅིག་གུ། །(དངོས་དཔེ)ཉིན་བྱེད་སྟོང་གིས་འཁྱུད་པའི་འོ་མཚོ་ཡིས། །ལན་བརྒྱར་བྱུགས་པའི་ཤེལ་གྱི་ས་འཛིན་ཀྱང༌། །གང་གི་དཀར་མཛེས་དཔལ་ལ་མི་བཟོད་པའི།…

༄༅། །དག་པར་བྱེད་པ་སྡེབ་སྦྱོར་རིན་ཆེན་རྒྱ་མཚོ་རྒྱས་པ་བཞུགས་སོ།། ས་པཎ་ཀུན་དགའ་རྒྱལ་མཚན། (༡༡༨༢-༡༢༥༡) ༄༅། །སྤྱིར་ནི་བོད་ཀྱི་ཡི་གེ་ལ། །དབྱངས་དང་གསལ་བྱེད་གཉིས་སུ་དབྱེ། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །གསལ་བྱེད་ཡི་གེ་སུམ་ཅུ་ལས། །རྗེས་འཇུག་ཡི་གེ་བཅུ་དབྱུང་ལ། །དེ་ལས་སྔོན་འཇུག་ལྔ་དབྱུང་བྱ། །ག་ད་བ་མ་འ་སྔོན་འཇུག །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་གོ །ད་ས་གཉིས་ནི་ཡང་འཇུག་སྟེ། །ད་ནི་ན་ར་ལ་གསུམ་དང༌། །ས་ནི་ག་ང་བ་མར་ཐོབ། །སུ་རུ་ར་དུ་ན་ལ་ཏུ། །ལ་དོན་རྣམ་པ་བདུན་དུ་འདོད།…

རྒྱ་གར་སྐད་དུ། བྱཱ་ཀ་ར་ཎ་མཱུ་ལ་ཏྲིཾ་ཤད་ནཱ་མ། བོད་སྐད་དུ། ལུང་སྟོན་པ་རྩ་བ་སུམ་ཅུ་པ་ཞེས་བྱ་བ། ངག་གི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ། །གང་ལ་ཡོན་ཏན་མཆོག་མངའ་བའི། །དཀོན་མཆོག་དེ་ལ་ཕྱག་འཚལ་ལོ། །གང་གིས་སྒྲ་དབྱངས་ཀུན་གསུང་བའི། །འཇམ་པའི་དབྱངས་ལ་ཕྱག་འཚལ་ལོ། །གང་གིས་མིང་གཞི་སྔོན་གསུངས་པ། །རྟག་ཞི་བ་ལ་ཕྱག་འཚལ་ལོ། །སྡེབ་སྦྱོར་ལེགས་མཛད་མཁས་རྣམས་དང་། །བླ་མ་ལ་ཡང་ཕྱག་འཚལ་ནས། །བསླབ་པ་ཀུན་གྱི་གཞི་འཛིན་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། །ཡི་གེ་ཨཱ་ལི་ཀཱ་ལི་གཉིས། །ཨཱ་ལི་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ།…

༄༅།།ཡི་གེའི་ཐོབ་ཐང་ཉེར་མཁོ་རབ་གསལ་མེ་ལོང་། དབྱངས་ཅན་དགའ་བའི་བློ་གྲོས་དང་ཡར་འབྲོག་པ་རིན་ཆེན་ཏོག ན་མོ་གུ་ར་ཝེ། རྒྱལ་ཀུན་ཡབ་གཅིག་མཁྱེན་པའི་གཏེར། །ངག་དབང་ལྷ་མོ་དབྱངས་ཅན་མ། །བདག་སྙིང་པདྨའི་དབུས་བཞུགས་ཏེ། །ཐོགས་མེད་སྨྲ་བའི་སྤོབས་པ་སྩོལ། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །ཀ་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ད་དང་ས་གཉིས་ཡང་འཇུག་གོ །ག་ད་བ་མ་འ་སྔོན་འཇུག །གོ་ངོ་དོ་ནོ་བོ་མོ་འོ། །རོ་ལོ་སོ་རྣམས་རྫོགས་ཚིག་སྟེ། །སླར་སྡུད་ཟླ་སྡུད་ཅེས་ཀྱང་བྱ། །རྗེས་འཇུག་རང་འདྲའི་མཐའ་ལ་སྦྱར། །ན་ར་ལ་གསུམ་རྗེས་སུ་ནི། །ད་དྲག་ཐོབ་ཚེ་ཏོ་ཞེས་སྦྱར། །སུ་རུ་ར་དང་དུ་ཏུ་ན།…
ལུང་དུ་སྟོན་པ་རྟགས་ཀྱི་འཇུག་པ།

༄༅། །རྒྱ་གར་སྐད་དུ། བྱཱ་ཀ་ར་ཎ་ལིངྒ་བ་ཏཱ་ར་ནཱ་མ། བོད་སྐད་དུ། ལུང་དུ་སྟོན་པ་རྟགས་ཀྱི་འཇུག་པ་ཞེས་བྱ་བ། ཕོ་ཡི་ཡི་གེ་འབའ་ཞིག་ལ། །སྡེ་པ་ཕྱེད་དང་བརྒྱད་གནས་པའང་། །སྡེ་ཚན་ལྔ་རུ་དྲིལ་བྱས་ནས། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་པ་བཞི་པ་ཡན་ཆད་དབྱེ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །

༄༅། །རྟགས་འཇུག་དགོངས་འགྲེལ་རབ་གསལ་སྣང་བ། དབྱངས་ཅན་དགའ་བའི་བློ་གྲོས་དང་ཡར་འབྲོག་པ་རིན་ཆེན་ཏོག པད་དཀར་ལྟར་བསྔགས་རྣམ་འདྲེན་ཤཱཀྱའི་ཏོག །རྒྱལ་ཀུན་མཁྱེན་པའི་རང་གཟུགས་འཇམ་དཔལ་དབྱངས། །གངས་ཅན་འགྲོ་བའི་མིག་གཅིག་སམྦྷོ་ཊ། །འཇམ་མགོན་རྒྱལ་བ་གཉིས་པ་རྣམས་ལ་འདུད། ། འདིར་བརྡ་སྤྲོད་པའི་བསྟན་བཅོས་རྟགས་ཀྱི་འཇུག་པའི་དོན་མདོར་བསྡུས་ཏེ་འཆད་པ་ལ། །རྟགས་ཀྱི་འཇུག་པ་ཞེས་པ་ནི། །ཡི་གེ་ཕོ་མོ་མ་ནིང་གི་རྟགས་ཀྱི་འཇུག་ཚུལ་རྒྱས་པར་སྟོན་པས་ན་བརྗོད་བྱའི་སྒོ་ནས་བཏགས་པ་སྟེ། སྤྱི་སྡོམ་ནི། སྤྱིར་ཡི་གེ་ལ་ཕོ་མི་གཉིས་སུ་དབྱེ་བ་དང་། བྱེ་བྲག་མིང་གཞིའི་ཡི་གེ་ལ་ནང་གསེས་ཀྱི་ཕོ་མོ་མ་ནིང་གི་འཇུག་པ་བཤད་པ། རྗེས་འཇུག་གི་ཕོ་མོ་མ་ནིང་གི་འཇུག་པ་བཤད་པ་སྟེ་བཞི་པོ་དེར་འདུས་སོ། །དབྱེ་ཚུལ་དང་པོ་གཉིས་འཆད་པ་ལ། ཕོ་ཡི་ཡི་གེ་འབའ་ཞིག་ལ། །ཞེས་པ་ནས། མ་ནིང་མཚན་མེད་ཅེས་ཀྱང་བྱ། །ཞེས་པའི་བར་ཚིགས་བཅད་ཕྱེད་དང་བཞི་གསུངས།…

༄༅།།རྟགས་འཇུག་དཀའ་གནད་གསལ་བའི་མེ་ལོང་གི་འགྲེལ་པ་རིགས་ལམ་གསེར་གྱི་ལྡེ་མིག་ཅེས་བྱ་བ་བཞུགས་སོ།། ༄༅།།ན་མོ་མཉྫུ་ཤྲཱི་ཡེ།མཁའ་ཁྱབ་ཤེས་བྱ་ཡོངས་ཀྱི་གཤིས་ལུགས་ཆོས།།བརྗོད་བྲལ་འགྱུར་མེད་དབྱིངས་སུ་མངོན་གཟིགས་པ།།རྒྱལ་བ་ཀུན་ལས་བཀའ་དྲིན་ལྷག་པའི་མགོན།།དཀའ་འགྱུར་ཆོས་ཀྱི་རྒྱལ་པོ་གཙུག་ན་རྒྱལ།།དུས་གསུམ་རྒྱལ་བའི་ཡེ་ཤེས་མ་ལུས་པ།།གཅིག་བསྡུས་རང་གཟུགས་སྨྲ་བ་ངག་གི་ལྷ།།བརྒྱད་གཉིས་ལང་ཚོའི་འཇོ་སྒེག་གར་རྩེན་པ།།འཇམ་དཔལ་རྡོ་རྗེ་རྣོན་པོས་དགེ་ལེགས་སྩོལ།།བརྒྱད་ཁྲི་བཞི་སྟོང་ཆོས་ཚུལ་ཏམ་བུ་རའི།།སྒྲ་ལས་དྲངས་པའི་དབྱངས་ཀྱི་དཀྱིལ་འཁོར་ཀུན།།སྐལ་བཟང་ཐོས་འཛིན་དཔྱིད་དུ་འཇོ་མཛད་མ།།སྒྲ་ལྡན་ལྷ་ཀྱེ་སྙིང་ལ་རོལ་པར་མཛོད།།དབྱངས་ཅན་ཐུགས་ལ་གྲུབ་པའི་རྡོ་རྗེ་ཡི།།ཟབ་ཡངས་བློ་གྲོས་མཐོ་རིས་སྐྱེད་ཚལ་ལས།།ལེགས་འོངས་རྟགས་འཇུག་པདྨ་འཛུམ་པའི་ཞལ།།རྣམ་དཔྱོད་ཉིན་བྱེད་སྣང་བས་དབྱེ་བར་བྱ།།ཀྭ་ཡེ་བློ་གསལ་རྐང་དྲུག་གཞོན་ནུ་རྣམས།།བརྡ་དག་སྦྲང་རྩིའི་དགའ་སྟོན་སྤྱོད་འདོད་ན།།ལེགས་བཤད་མེ་ཏོག་ཁ་སྒོ་ཕྱེ་བའི་དུས།།དགའ་བའི་གླུ་དབྱངས་དང་བཅས་ཞུགས་པར་རིགས།། དེ་ལ་འདིར་སྙིགས་དུས་ཀྱི་པཎྜི་ཏ་ཆེན་པོ་དངུལ་ཆུ་དབྱངས་ཅན་གྲུབ་པའི་རྡོ་རྗེ་དཔལ་བཟང་པོས་མཛད་པའི་ལེགས་བཤད་རྨད་དུ་བྱུང་བ་རྟགས་འཇུག་དཀའ་གནད་གསལ་བའི་མེ་ལོང་འདི་ཉིད་ས་བཅད་རྒྱས་པ་སོགས་དོར་ནས་མདོར་བསྡུས་སུ་འཆད་པ་ལ་གསུམ།མཆོད་བརྗོད།བརྩམ་པར་དམ་བཅའ།གཞུང་དོན་དངོས་སོ།། དང་པོ་མཆོད་བརྗོད་ལ་ཡང་རྒྱ་སྐད་དང་བོད་སྐད་གཉིས་ལས་དང་པོ་རྒྱ་སྐད་ཀྱི་སྒོ་ནས་མཆོད་བརྗོད་ནི།ན་མོ་མཉྫུ་ཤྲཱི་ཡེ།ཞེས་པ།བྱང་ཕྱོགས་ཁ་བ་ཅན་པ་སྟོད་མངའ་རིས་སྐོར་གསུམ་རྫིང་བུ་ལྟ་བུ།བར་དབུས་གཙང་རུ་བཞི་ཡུར་བ་ལྟ་བུ།སྨད་མདོ་ཁམས་སྒང་དྲུག་ཞིང་ས་དང་འདྲ་བར་ཡོད་ལ།དེ་ལ་ཡང་བོད་དང་བོད་ཆེན་པོ་གཉིས་ལས་བོད་དབུས་གཙང་གི་སྐད་དུ།ན་མོ་ཕྱག་འཚལ་ལོ།།མཉྫུ་འཇམ།ཤྲཱི་དཔལ།ཡེ་ལ་སྟེ།འཇམ་དཔལ་ལ་ཕྱག་འཚལ་ལོ།།ཞེས་པའོ།། གཉིས་པ་བོད་སྐད་ཀྱི་སྒོ་ནས་མཆོད་པར་བརྗོད་པ་ནི།རྒྱལ་ཀུན་མཁྱེན་པའི་ཡེ་ཤེས་དཔྱིད།།གཞོན་ནུའི་གཟུགས་ཀྱིས་རྣམ་རོལ་བ།།རྗེ་བཙུན་བརྟན་པའི་འཁོར་ལོ་དང་།།དབྱེར་མེད་བླ་མའི་ཞབས་བཏུད་ནས།།ཞེས་པ།རབ་འབྱམས་རྒྱལ་བ་ཀུན་གྱི་མཁྱེན་རབ་ཀྱི་ཡེ་ཤེས་གཅིག་ཏུ་བསྡུས་པའི་དཔྱིད་དེ་སྙིང་པོ།གཞོན་ནུ་ན་ཚོད་བཅུ་དྲུག་ལོན་པའི་གཟུགས་ཀྱིས་རྣམ་པར་རོལ་པ།རྗེ་བཙུན་བརྟན་པའི་འཁོར་ལོ་སྟེ་འཇམ་དཔལ་དབྱངས་དང་ངོ་བོ་དབྱེར་མེད་པ་རང་ལ་མངོན་མཐོ་དང་ངེས་ལེགས་ཀྱི་ལམ་མ་ནོར་བར་སྟོན་པའི་ཐམས་ཅད་མཁྱེན་པ་དྷརྨ་བྷ་དྲ་སོགས་དངོས་བརྒྱུད་བླ་མ་རྣམས་ཀྱི་ཞབས་ཀྱི་པདྨོ་ལ་སྒོ་གསུམ་གུས་པ་ཆེན་པོས་བཏུད་ནས།ཞེས་པའོ།། གཉིས་པ་བརྩམ་པར་དམ་བཅའ་ནི།མཁས་མཆོག་ཐོན་མིའི་ཐུགས་མཚོ་ལས།།བྱུང་བའི་བརྡ་སྤྲོད་ཕྱི་མོ་མཆོག།རྟགས་ཀྱི་འཇུག་པའི་སྙིང་པོའི་དོན།།མདོར་བསྡུས་ཚིག་གིས་གསལ་བར་བྱ།།ཞེས་པ།གངས་ཅན་སཱ་ལའི་སྨན་ལྗོངས་འདིར་མཁས་གྲུབ་ནམ་མཁའི་སྐར་ཚོགས་ལྟར་བྱོན་པ་རྣམས་ཀྱི་ནང་ནས་མཆོག་ཏུ་གྱུར་པ་ཐོན་མི་ཉིད་ཀྱི་ཐུགས་ཀྱི་རྒྱ་མཚོ་ཆེན་པོ་ལས་བྱུང་བའི་ཡུལ་གངས་ཅན་གྱི་སྐད་ཀྱི་བརྡ་སྤྲོད་པའི་བསྟན་བཅོས་ཀུན་གྱི་ཕྱི་མོའམ་མ་ཕྱིའམ་གཞིའམ་རྩ་བ་མཆོག་ཏུ་གྱུར་པ་སུམ་རྟགས་གཉིས་ལས་རྟགས་ཀྱི་འཇུག་པའི་སྙིང་པོའི་དོན་རྣམས་མ་ཚང་བ་མེད་པར་མདོར་བསྡུས་པའི་ཚིག་གི་སྒོ་ནས་གསལ་བར་བྱ།ཞེས་པའོ།། གསུམ་པ་གཞུང་དོན་དངོས་ནི།སྤྱིར་ན་དབྱངས་མོ་གསལ་བྱེད་ཕོ།།དེ་ཕྱིར་ཀཱ་ལི་སུམ་ཅུ་པོ།།ཞེས་པ།མིང་གཞིའི་ཡི་གེ་སྤྱིའི་རྟགས་ཀྱི་དབྱེ་བ་བཤད་པ་སྟེ།སྤྱིར་ཡི་གེ་ལ་དབྱེ་ན་དབྱངས་དང་གསལ་བྱེད་གཉིས་སུ་ཡོད།དེ་ལས་དབྱངས་ཀྱི་བྱ་བ་གསལ་བར་མཚོན་པར་བྱེད་པ།ཨི་སྟེ་གི་གུ།ཨུ་སྟེ་ཞབས་ཀྱུ།ཨེ་སྟེ་འགྲེང་བུ།ཨོ་སྟེ་རྣ་རུ་བཞི་ནི་མོ་དང་།ཀཱ་ལིའི་བྱ་བ་གསལ་བར་བྱེད་པའི་ཀ་ནས་ཨའི་བར་གྱི་ཡི་གེ་སུམ་ཅུ་པོ་རྣམས་ནི་ཕོར་ཤེས་པར་བྱའོ།།ཞེས་པའོ།། ཕོ་ཡི་ཡི་གེ་འབའ་ཞིག་ལ།།ནང་གསེས་སྡེ་ཚན་ལྔར་དབྱེ་སྟེ།།ཞེས་པ།ཕོ་ཡིག་སུམ་ཅུ་པོ་དེ་རྣམས་ནང་གསེས་སྡེ་ཚན་སོ་སོར་དབྱེ་ན་ལྔར་འགྱུར་ཏེ།ལྔ་གང་ཞེ་ན།ཕོ་དང་།མ་ནིང་དང་།མོ་དང་།ཤིན་ཏུ་མོ་དང་།མོ་གཤམ་སྟེ་ལྔར་འགྱུར་རོ།།འབའ་ཞིག་ནི་ཁོ་ན་ཞེས་པའི་དོན་ནོ།།དེ་ལྔའི་དང་པོ་ཕོ་ནི།ཀ་ཅ་ཏ་པ་ཙ་རྣམས་ཕོ།།ཞེས་པ།ཀ་དང་།ཅ་དང་།ཏ་དང་།པ་དང་།ཙ་བཅས་ལྔ་པོ་དེ་རྣམས་ཕོ་ཡིག་གོ།གཉིས་པ་མ་ནིང་ནི།ཁ་ཆ་ཐ་ཕ་ཚ་མ་ནིང་།།ཞེས་པ།ཁ་དང་།ཆ་དང་།ཐ་དང་།ཕ་དང་།ཚ་བཅས་ལྔ་ནི་མ་ནིང་གི་ཡི་གེ་འོ།།གསུམ་པ་མོ་ནི།ག་ཇ་ད་བ་ཛ་ཝ་ཞ།།ཟ་འ་ཡ་ཤ་ས་རྣམས་མོ།།ཞེས་པ།ག་དང་།ཇ་དང་།ད་དང་།བ་དང་།ཛ་དང་།ཝ་དང་།ཞ་དང་།ཟ་དང་།འ་དང་།ཡ་དང་།ཤ་དང་།ས་བཅས་བཅུ་གཉིས་པོ་འདི་རྣམས་མོ་ཡིག་གོ།བཞི་པ་ཤིན་ཏུ་མོ་ནི།ང་ཉ་ན་མ་ཤིན་ཏུ་མོ།།ཞེས་པ།ང་དང་།ཉ་དང་།ན་དང་།མ་བཅས་བཞི་པོ་ཤིན་ཏུ་མོའི་ཡི་གེའོ།།ལྔ་པ་མོ་གཤམ་གྱི་ཡི་གེ་ནི།ར་ལ་ཧ་ཨ་མོ་གཤམ་སྟེ།།ཞེས་པ།ར་དང་།ལ་དང་།ཧ་དང་།ཨ་དང་བཅས་བཞི་ནི་མོ་གཤམ་གྱི་ཡི་གེའོ།།ཨ་ནི་མཚན་མེད་ཅེས་ཀྱང་བྱ།།ཞེས་པ།ཨ་ནི་མོ་གཤམ་གྱི་ཡི་གེ་ཡིན་པར་མ་ཟད།སྒྲ་རྩོལ་ཤིན་ཏུ་ཞན་པས་མཚན་མེད་ཅེས་ཀྱང་བྱ་བ་སྟེ་ཟེར་བ་ཡིན་ནོ།།ཞེས་པའོ།། སྔོན་འཇུག་ལྔ་ཡི་བ་ཡིག་ཕོ།།ཞེས་པ།སྔོན་འཇུག་གི་རྟགས་ཀྱི་དབྱེ་བ་བཤད་པ་སྟེ།རང་གི་འཇུག་ཡུལ་དུ་གྱུར་པའི་མིང་གཞིའི་སྔོན་དུ་འཇུག་པའི་སྔོན་འཇུག་ལྔ་ནི།ལེགས་བཤད་ལྗོན་དབང་ལས།ག་ད་བ་མ་འ་སྔོན་འཇུག།ཅེས་པ་ལྟར་སྔོན་འཇུག་ལྔ་པོ་དེའི་ནང་ནས་བ་ཡིག་ནི་ཕོ་ཡིན་ནོ།།ག་ད་མ་ནིང་།ཞེས་པ།ག་ད་གཉིས་སྔོན་འཇུག་གི་མ་ནིང་དང་།འ་མོ་ཡིག།ཅེས་པ།འ་ནི་མོ་དང་།མ་ནི་ཤིན་ཏུ་མོ་ཡིན་ནོ།།ཞེས་པ།མ་ནི་ཤིན་ཏུ་མོར་འགྱུར་བ་ཡིན་ནོ།། དེ་རྣམས་གང་ལ་གང་འཇུག་ན།།ཞེས་པ།སྔོན་འཇུག་གི་རྟགས་ཀྱི་འཇུག་པ་བཤད་པ་སྟེ།གོང་དུ་བཤད་པའི་ཡི་གེ་དེ་རྣམས་མིང་གཞིའི་ཡི་གེ་གང་ལ་སྔོན་འཇུག་གང་འཇུག་ཅེ་ན།ཕོ་ཡིག་བ་ནི་ཀ་ཅ་ཏ།།ཙ་ག་ང་ཇ་ཉ་ད་ན།།ཛ་ཞ་ཟ་ར་ཤ་སར་འཇུག།ཅེས་པ།སྔོན་འཇུག་གི་ཕོ་ཡིག་བ་ནི།ཀ་དང་།ཅ་དང་།ཏ་དང་།ཙ་དང་།ག་དང་།ང་དང་།ཇ་དང་།ཉ་དང་།ད་དང་།ན་དང་།ཛ་དང་།ཞ་དང་།ཟ་དང་།ར་དང་།ཤ་དང་།ས་བཅས་ཡི་གེ་བཅུ་དྲུག་པོ་འདི་རྣམས་ལ་འཇུག་ཅིང་།ཀ་ལ་རྐྱང་བརྩེགས་འདོགས་གསུམ་གྱི་སྒོ་ནས་འཇུག་པ་ནི།དཔེར་ན།བཀའ།བསྐ།བཀྱེ།བཀྲ།བསྐྱངས།ཅ་ལ་རྐྱང་འཕུལ་ཁོ་ནས་འཇུག་པ་དཔེར་ན།བཅས།བཅོམ།བཅུག།ལྟ་བུ།ཏ་ལ་རྐྱང་བརྩེགས་གཉིས་ཀྱིས་འཇུག་སྟེ་དཔེར་ན།བཏབ།བཏུད།བཏགས།བརྟགས།བལྟ།བསྟར།ལྟ་བུ།ཙ་ལ་རྐྱང་བརྩེགས་ཀྱིས་འཇུག་པ་ནི།བཙལ།བཙོས།བཙུགས།བརྩེགས།ལྟ་བུ།ག་ལ་རྐྱང་འདོགས་བརྩེགས་གསུམ་གྱིས་འཇུག་པ་ནི།བགོ།བགྲད།བགྱིས།བརྒལ།བསྒོམས།ལྟ་བུ།ང་ལ་བརྩེགས་འཕུལ་ཁོ་ནས་འཇུག་པ་ནི།བརྔམས།བསྔགས།ལྟ་བུ།ཇ་ལ་བརྩེགས་འཕུལ་ཁོ་ནས་འཇུག་པ།བརྗེས།བརྗིད།ལྟ་བུ།ཉ་ལ་བརྩེགས་འཕུལ་ཁོ་ནས།བརྙན།བསྙེན།ལྟ་བུ།ད་ལ་རྐྱང་བརྩེགས་གཉིས་ཀྱིས་འཇུག་པ་ནི།བདེ།བརྡ།བལྡག།བསྡད།ལྟ་བུ།ན་ལ་བརྩེགས་འཕུལ་ཁོ་ནས།བརྣག།བསྣམས།ལྟ་བུ།ཛ་ལ་བརྩེགས་འཕུལ་ཁོ་ནས་འཇུག་པ་ནི།བརྫེས།བརྫིས།ལྟ་བུ།ཞ་ལ་རྐྱང་འཕུལ།བཞག།བཞི།བཞེས།ལྟ་བུ།ཟ་ལ་རྐྱང་འདོགས་གཉིས།དཔེར་ན།བཟང་།བཟི།བཟུང་།བཟེད།བཟོ།བཟླས།ལྟ་བུ།ར་ལ་འདོགས་འཕུལ་ཁོ་ནས་འཇུག་པ་ནི།བརླབས།ལྟ་བུ།ཤ་ལ་རྐྱང་འཕུལ་ཁོ་ནས་འཇུག་པ་ནི།དཔེར་ན།བཤད།བཤེས།ལྟ་བུ།ས་ལ་རྐྱང་འདོགས་གཉིས་ཀྱིས་འཇུག་པ།བསམ།བསུ།བསེ།བསོས།བསྲིས།བསྲུངས།བསྲེས།བསྲོས།བསླབ།ལྟ་བུ། མ་ནིང་ག་ནི་ཅ་ཏ་ཙ།།ཉ་ད་ན་ཞ་ཟ་ཡ་ཤ།སར་འཇུག།ཅེས་པ།སྔོན་འཇུག་གི་མ་ནིང་ག་ནི་མིང་གཞིའི།ཅ་དང་།ཏ་དང་།ཙ་དང་།ཉ་དང་།ད་དང་།ན་དང་།ཞ་དང་།ཟ་དང་།ཡ་དང་།ཤ་དང་།ས་བཅས་བཅུ་གཅིག་ལ་རྐྱང་འཕུལ་ཁོ་ནས་འཇུག་པ་ནི།གཅོད།གཏེར།གཙོ།གཉེན།གདོང།གནད།གཞལ།གཟིགས།གཡང་།གཤེགས།གསུང་།ལྟ་བུ།མ་ནིང་ད་ཡིག་ནི།།ཀ་པ་ག་བ་ང་མར་འཇུག།ཅེས་པ།སྔོན་འཇུག་གི་མ་ནིང་ད་ཡིག་ནི་མིང་གཞིའི།ཀ་དང་།པ་དང་།ག་དང་།བ་དང་།ང་དང་།མ་བཅས་དྲུག་པོ་འདི་རྣམས་ལ་འཇུག་ཅིང་།དེ་ཡང་ང་ལ་རྐྱང་འཕུལ་དང་གཞན་ལྔ་ལ་རྐྱང་འདོགས་གཉིས་ཏེ།དཔེར་ན།དཀར།དཀྱིལ།དཀྲིགས།དཔལ།དཔྲལ།དཔྱིད།དགའ།དགྲ།དགྱེས།དབང་།དབྲི།དབྱིབས།དངུལ།དམའ།དམིགས།དམྱལ།ལྟ་བུ། མོ་ཡིག་འ་ནི་ག་ཇ་ད།།བ་ཛ་ཁ་ཆ་ཐ་ཕ་ཚར།།ཞེས་པ།ག་དང་།ཇ་དང་།ད་དང་།བ་དང་།ཛ་དང་།ཁ་དང་།ཆ་དང་།ཐ་དང་།ཕ་དང་།ཚ་བཅས་བཅུ་པོ་ལ་མོ་ཡིག་འ་འཇུག་པ་ལས།ག་ལ་རྐྱང་འདོགས་གཉིས་ཀྱིས་འཇུག་པ་ནི།འགའ།འགྲོ།འགྱེལ།ཇ་ལ་རྐྱང་འཕུལ་ནི།འཇལ།ད་ལ་རྐྱང་འདོགས་ཀྱི་དཔེ་ནི།འདབ།འདི།འདྲ།བ་ལ་རྐྱང་འདོགས་དཔེར་ན།འབའ།འབྲོག།འབྱོར།ཛ་ལ་རྐྱང་འཕུལ་ནི།འཛེར།འཛུམ།འཛོལ།ཁ་ལ་རྐྱང་འདོགས།འཁོར།འཁྲུལ།འཁྲི།འཁྱིར།ཆ་ལ་རྐྱང་འཕུལ།འཆད།འཆང་།འཆར།ཐ་ལ་རྐྱང་འཕུལ།འཐོབ།ཕ་ལ་རྐྱང་འདོགས།འཕར།འཕྲེང་།འཕྱི།ཚ་ལ་རྐྱང་འཕུལ།འཚལ།ལྟ་བུ། ཤིན་ཏུ་མོ་ཡི་མ་ཡིག་ནི།།ཁ་ཆ་ཐ་ཚ་ག་ཇ་ད།།ཛ་ང་ཉ་ན་རྣམས་ལ་འཇུག།ཅེས་པ།སྔོན་འཇུག་གི་ཤིན་ཏུ་མོ་མ་ཡིག་ནི་མིང་གཞིའི།ཁ་དང་།ཆ་དང་།ཐ་དང་།ཚ་དང་།ག་དང་།ཇ་དང་།ད་དང་།ཛ་དང་།ང་དང་།ཉ་དང་།ན་བཅས་བཅུ་གཅིག་ལ་འཇུག་པའི་ཁ་ག་གཉིས་ལ་རྐྱང་འདོགས་དང་།གཞན་མ་རྐྱང་འཕུལ་དཔེར་ན།མཁའ།མཁྲིས།མཁྱེན།མཆིས།མཐོང་།མཚུངས།མགོན།མགྲིན།མགྱོགས།མཇལ།མདའ།མཛོད།མངའ།མཉམ།མནན།ལྟ་བུ། ཇི་ལྟར་འཇུག་པར་བྱེད་ཅེ་ན།།ཕོ་ནི་སྒྲ་རྩོལ་དྲག་པར་འཇུག།མ་ནིང་རན་པར་འཇུག་པ་ཡིན།།མོ་ནི་ཞན་པའི་ཚུལ་གྱིས་ཏེ།།ཤིན་ཏུ་མོ་ནི་མཉམ་པས་སོ།།ཞེས་པ།སྒྲ་རྩོལ་དང་མཐུན་པའི་སྒོ་ནས་ཇི་ལྟར་འཇུག་པར་བྱེད་པ་ཡིན་ནམ་ཟེར་ན།སྔོན་འཇུག་གི་ཕོ་བ་ནི་རང་གི་འཇུག་ཡུལ་མིང་གཞིའི་ཡེ་གེ་རྣམས་ལ་སྒྲ་སྟེ་སྐད་གདངས་ཆེ་བ་དང་།རྩོལ་བ་ཞེས་པ་དབུགས་ལ་སོགས་པའི་རྩོལ་བ་ཤིན་ཏུ་ཆེ་བས་སྒྲ་རྩོལ་དྲག་པར་འཇུག་པ་དང་།མ་ནིང་ག་ད་གཉིས་ནི་སྒྲ་རྩོལ་ཆ་སྙོམས་རན་པ་སྟེ་འཚམས་པར་འཇུག་པ་དང་།མོ་འ་ཡིག་ནི་སྒྲ་རྩོལ་ཞན་པ་སྟེ་ཆུང་བའི་ཚུལ་གྱིས་འཇུག་པ་དང་།ཤིན་ཏུ་མོ་མ་ཡིག་ནི་སྒྲ་རྩོལ་མོ་ལས་ཀྱང་ཤིན་ཏུ་ཞན་པས་ན་མཉམ་པས་སོ་ཞེས་པའོ།། ཅི་ཕྱིར་འཇུག་པར་བྱེད་ཅེ་ན།།ཞེས་པ།སྔོན་འཇུག་ལྔ་པོ་དེ་རྣམས་འཇུག་ཡུལ་མིང་གཞིའི་ཡེ་གེ་རྣམས་ལ་དགོས་པ་ཅི་ཕྱིར་འཇུག་པར་བྱེད་ཅེ་ན། ཐོག་མར་འདི་ལྟར་ཤེས་དགོས་ཏེ།།ལས་གང་ཞིག་ལ་བྱེད་པ་པོ།།གཞན་དང་དངོས་སུ་འབྲེལ་བ་ཡི།།དབང་དུ་བྱས་ནས་བྱེད་པོ་དང་།།དེ་ཡི་བྱེད་པ་གཉིས་པོ་ནི།།དངོས་པོ་བདག་ཡིན་བྱ་ཡུལ་དང་།།བྱ་བ་གཉིས་པོ་དངོས་པོ་གཞན།།ཞེས་པ།སྔོན་འཇུག་གི་ཅི་ཕྱིར་འཇུག་གི་གཞུང་དོན་ཞིབ་ཏུ་ཤེས་པ་ལ་ཐོག་མར་འདི་ལྟར་ཤེས་པར་བྱེད་དགོས་ཏེ།ལས་སམ་བྱ་ཡུལ་ལ་བྱ་བ་ཞིག་བྱེད་རྒྱུ་ཡོད་ན་བདག་གཞན་དུས་གསུམ་གྱི་དབྱེ་བ་འཇུག་ལ།ལས་སམ་བྱ་ཡུལ་ལ་བྱ་བ་བྱེད་རྒྱུ་མེད་ན་བདག་གཞན་དུས་གསུམ་གྱི་དབྱེ་བ་མི་འཇུག།དེ་ལ་བྱེད་པོ་གཞན་དང་དངོས་སུ་འབྲེལ་བའི་དབང་དུ་བྱས་ནས་བྱེད་པོ་གང་ཟག་དང་དེའི་བྱེད་པ་ནི་ཤིང་གཅོད་པ་ལྟ་བུར་མཚོན་ན་སྟ་རེ་ཡིན་པས་དེ་གཉིས་ནི།བདག་གཞན་གཉིས་ཀྱི་ནང་ནས་བདག་ཡིན།དེས་བསྒྲུབ་པར་བྱ་བའི་ཡུལ་གྱི་དངོས་པོ་དང་བྱ་བ་གཉིས་པོ་ནི་བདག་གཞན་གཉིས་ཀྱི་ནང་ནས་གཞན་ཡིན།དེ་ཡང་བྱ་བའི་ཡུལ་གྱི་དངོས་པོ་ནི་ཤིང་ཡིན།བྱ་བ་ནི་ཤིང་གཅོད་པའི་ལས་ཀ་སྟ་རེའི་འདེགས་འཇོག་དང་ཤིང་དུམ་བུར་བཏུབ་པ་སོགས་ཡིན།དཔེ་བརྗོད་ཀྱི་སྐབས་སུ།ཤིང་གཅོད་པ་པོ།ཤིང་གཅོད་པོ།ཞེས་པའི་སྒྲ་འདི་ལྟ་བུས་བྱེད་པོ་གང་ཟག་ཤིང་མཁན་གོ་བས་བདག་གཞན་གཉིས་ནས་བདག་ཡིན།གཅོད་པར་བྱེད།གཅོད་དོ།།ལྟ་བུ་བྱེད་ལས་གསལ་བྱེད་ཀྱི་སྒྲ་ཟེར་བ་ཡིན་ནོ།།དོན་དུ་བྱེད་པ་སྟ་རེ་དང་དེ་འདེགས་པའི་བྱ་བ་གོ་དགོས།བདག་གཞན་གཉིས་ནས་དེ་ཡང་བདག་ཡིན།གཅད་བྱ།གཅད་པར་བྱ་བ།གཅད་བྱའི་ཤིང་།ལྟ་བུ་འདི་རྣམས་ཚིག་བརྗོད་ཚུལ་མི་འདྲ་བ་བྱུང་ཡང་དོན་གཅིག་ཅིང་བྱ་ཡུལ་གསལ་བྱེད་ཀྱི་སྒྲ་ཟེར་བ་ཡིན།འདི་སྐབས་བྱ་ཡུལ་ཤིང་གོ་དགོས་ཤིང་བདག་གཞན་གཉིས་ནས་གཞན་ཡིན།གཅད་པར་བྱ།གཅད་དོ།།ལྟ་བུ་འདི་རྣམས་ལ་བྱ་བའི་ཡུལ་དང་འབྲེལ་བའི་བྱ་བ་གསལ་བྱེད་ཀྱི་སྒྲ་ཟེར་བ་ཡིན།འདི་སྐབས་སྟ་རེ་འདེགས་པའི་བྱ་བ་ཤིང་གི་སྟེང་དུ་བབས་ནས་ཤིང་བཀས་པ་དང་དུམ་བུར་འགྲོ་བ་སོགས་གོ་དགོས་ཤིང་བདག་གཞན་གཉིས་ནས་གཞན་ཡིན།བདག་གཞན་གཉིས་ཀྱི་དབྱེ་བ་དེ་ལྟར་བློ་ལ་བཞག་ནས། དུས་གསུམ་གྱི་དབྱེ་བ་ནི།དེ་བཞིན་བྱེད་པ་པོ་གཞན་དང་།།དངོས་སུ་འབྲེལ་མིན་ཇི་ལྟར་ཡང་།།བྱ་བ་བྱས་ཟིན་འདས་པ་དང་།།བྱ་བ་བྱེད་འགྱུར་མ་འོངས་དང་།།བྱེད་བཞིན་པ་ནི་ད་ལྟ་བ།།ཞེས་པ།གོང་དུ་བདག་གཞན་སོ་སོར་དབྱེ་བ་དེ་བཞིན་དུ་བྱེད་པ་པོ་གཞན་དང་དངོས་སུ་འབྲེལ་ཡང་རུང་།མ་འབྲེལ་ཡང་རུང་ཇི་ལྟར་ཡིན་ན་ཡང་།བྱ་བ་བྱས་ཟིན་པ་ནི་འདས་པ་དང་།དཔེར་ན།ལྷ་བསྒྲུབས།ཤིང་བཅད།ལྟ་བུ་དང་།བྱ་བ་བྱེད་འགྱུར་ནི་མ་འོངས་པ་དཔེར་ན།ལྷ་བསྒྲུབ།བསྒྲུབ་པར་བྱ།བསྒྲུབ་བྱ།བསྒྲུབ་པར་བྱ་བ།བསྒྲུབ་བྱའི་ལྷ།གཅད་བྱ།གཅད་པར་བྱ་བ།གཅད་པར་བྱ།གཅད་དོ།།གཅད་བྱའི་ཤིང་།འདི་རྣམས་དུས་གསུམ་ནས་དུས་མ་འོངས་པ་ཡིན།བྱ་བ་བྱེད་བཞིན་པ་ད་ལྟར་བ་ནི་དཔེར་ན།ལྷ་སྒྲུབ།སྒྲུབ་བོ།།སྒྲུབ་བཞིན་པ།སྒྲུབ་ཀྱིན་འདུག།སྒྲུབ་པར་བྱེད།སྒྲུབ་བྱེད།ཤིང་གཅོད་པར་བྱེད།གཅོད་དོ།།གཅོད་བྱེད།གཅོད་བཞིན་པ།གཅོད་ཀྱིན་འདུག།ལྟ་བུ་འདི་རྣམས་ད་ལྟ་བ་ཡིན། ཡང་བྱ་བྱེད་ལས་གསུམ་ཟེར་རྒྱུ་འདི་ངོས་འཛིན་ཡག་པོ་ཤེས་དགོས་པས།གཅོད་པོ་དང་།སྒྲུབ་པ་པོ།ལྟ་བུ་འདི་རྣམས་བྱ་བྱེད་ལས་གསུམ་གྱི་ནང་ནས་བྱེད་པ་ཡིན།གཅོད་པར་བྱེད།གཅད་པར་བྱ།གཅད་དོ།།སྒྲུབ་པར་བྱེད།བསྒྲུབ་པར་བྱ།བསྒྲུབ་བོ།།ལྟ་བུ་བྱ་བྱེད་ལས་གསུམ་གྱི་ནང་ནས་བྱ་བ་ཡིན།གཅད་བྱ།གཅད་པར་བྱ་བ།གཅད་བྱའི་ཤིང་།བསྒྲུབ་བྱ།བསྒྲུབ་པར་བྱ་བ།བསྒྲུབ་བྱའི་ལྷ།ལྟ་བུ་འདི་རྣམས་བྱ་བྱེད་ལས་གསུམ་གྱི་ནང་ནས་ལས་ཟེར་བ་དེ་ཡིན་ཏེ།བསྟན་བཅོས་འདི་ཡི་གཤམ་དུ།ལས་དང་བྱ་ཡུལ་དོན་གཅིག་སྟེ།།ཞེས་གསུངས་པའི་ཕྱིར། ཡང་བྱེད་པ་ལ་གཙོ་ཕལ་གཉིས་ཡོད་པས་གཅོད་པ་པོ་ཤིང་གཅོད་མཁན་གང་ཟག་དེ་གཙོ་བོ་ཡིན།གཅོད་བྱེད་སྟ་རེ་ཕལ་པ་ཡིན།ཤིང་གཅད་པ་བྱ་བ་ཡིན་ཅིང་དེ་ལ་བྱེད་པ་པོ་ལ་ཡོད་པའི་བྱ་བ་དང་།བྱ་བའི་ཡུལ་ལ་ཡོད་པའི་བྱ་བ་གཉིས་ཡོད་དེ།སྟ་རེས་ཤིང་གཅོད་པའི་རྩོལ་བ་ནི་བྱེད་པ་པོ་ཤིང་མཁན་ལ་ཡོད་ཅིང་དེ་གསལ་བྱེད་ཀྱི་སྒྲ་ནི།གཅོད་པར་བྱེད་ཟེར་བ་འདི་ཡིན།ཤིང་དུམ་བུར་བཅད་པའི་ཆ་ནི་བྱ་ཡུལ་ཤིང་གི་སྟེང་དུ་ཡོད་ཅིང་དེ་གསལ་བྱེད་ཀྱི་སྒྲ་ནི།གཅད་དོ།།གཅད་པར་བྱ།ཞེས་པ་འདི་ཡིན་ནོ།།འདི་སྐབས་མཁས་པ་སོ་སོའི་བཞེད་ཚུལ་མི་འདྲ་བ་མང་པོ་འདུག་ཀྱང་རང་ལུགས་འདི་ལྟར་འཐད་པར་སེམས་སོ།།ཡང་གོང་དུ་དངོས་པོ་བདག་ཡིན་ཞེས་པའི་དངོས་པོ་དེ་རྟགས་འཇུག་རྩ་བ་ན་དངོས་སུ་གསུངས་མེད་པས་གསར་བུ་བ་རྣམས་ལ་མ་སྦྱར་ན་རེ་ཞིག་གོ་བདེ་ཞིང་།དངོས་པོ་དང་དངོས་ཅན་གྱི་དངོས་པོ་དེ་ཡིན་ཟེར་བ་གུ་དོག་འབའ་ཞིག་གོ། དེ་ཕྱིར་དུས་གསུམ་དབྱེ་བས་ནི།།བྱེད་ལས་དང་འབྲེལ་ངག་གི་ནི།།སྦྱོར་བ་ཀུན་ལ་ཁྱབ་པ་ཡིན།།ཞེས་པ།རྒྱུ་མཚན་དེའི་ཕྱིར་དུས་གསུམ་གྱི་དབྱེ་བས་ནི་བྱེད་ལས་དང་འབྲེལ་བའི་ངག་གི་སྦྱོར་བ་ཐམས་ཅད་ལ་ཁྱབ་པ་ཡིན།ཞེས་པའོ།།དེ་ཡང་གོ་བདེ་བར་བརྗོད་ན་བྱེད་ལས་དང་འབྲེལ་བའི་ངག་ཡིན་ཚད་ཐམས་ཅད་ཡང་ན་དུས་འདས་པ་ཡིན་དགོས།ཡང་ན་དུས་མ་འོངས་པ་ཡིན་དགོས།ཡང་ན་ད་ལྟ་བ་ཡིན་དགོས།ཞེས་པའི་དོན་ནོ།།བདག་གཞན་དབྱེ་བས་དེ་ཙམ་དུ།།ཁྱབ་པ་མིན་ཡང་བྱེད་པོ་དང་།།བྱ་ཡུལ་བསྡུ་ཕྱིར་དབྱེ་བ་དེ།།མཛད་ནས་བདག་གཞན་དང་འབྲེལ་བའི།།བྱ་བྱེད་རྣམས་ཀྱང་དེ་ཁོངས་བསྡུས།།ཞེས་པ།བདག་གཞན་གྱི་དབྱེ་བས་བྱེད་ལས་དང་འབྲེལ་བའི་ངག་གི་སྦྱོར་བ་ཐམས་ཅད་ལ་དུས་གསུམ་གྱི་དབྱེ་བས་ཁྱབ་པ་དེ་ཙམ་དུ་མ་ཁྱབ་ཀྱང་།འོ་ན་གང་ལ་མ་ཁྱབ་ཅེ་ན།གདུགས་སུ་འཁྱིར།ཆུར་འཁྱིལ།ལྟ་བུ་འདི་རྣམས་ལ་དུས་གསུམ་གྱི་དབྱེ་བས་ཁྱབ་ཀྱང་བདག་གཞན་གྱི་དབྱེ་བས་མ་ཁྱབ་པ་སྟེ་བདག་གཞན་གྱི་དབྱེ་བའི་ཁོངས་སུ་མ་གཏོགས་སོ།།…