༄༅།།རོལ་མོའི་བསྟན་བཅོས་ཞེས་བྱ་བ་བཞུགས་སོ། །

མཛད་པ་པོ། ས་སྐྱ་པཎྜིཏ་ཀུན་དགའ་རྒྱལ་མཚན། ལེའུ་དང་པོ།   ༄༅།།བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །རྒྱལ་བ་རྣམས་ཀྱི་གསུང་གི་རྣམ་འཕྲུལ་ལས། །བྱུང་བའི་རྡོ་རྗེ་དབྱངས་ཅན་ལ་བཏུད་ནས། །རོལ་མོའི་སྦྱོར་བས་གཞན་ལ་ཕན་པ་ཡི། །དྲི་མེད་གཞུང་འདི་བདག་གིས་བཤད་པར་བྱ། །དད་ལྡན་རྣམས་ཀྱི་མཆོད་པ་དང་། །བཀྲེན་པ་རྣམས་ཀྱི་འཚོ་བ་དང་། །ཆགས་ཅན་རྣམས་ཀྱི་ཡིད་གཡོ་བ། །དེ་ཀུན་རོལ་མོ་མཁས་ལས་འབྱུང་། །བློ་ངན་གཟུགས་ཀྱིས་ཕོངས་པའང་རུང་། །རིགས་ངན་ནོར་དང་བྲལ་ཡང་བླ། །རོལ་མོའི་ཆ་ལ་མཁས་གྱུར་ན། །ཚོགས་ཀྱི་ནང་ན་རྒྱན་ལྟར་མཛེས། །གང་ན་ཐོད་དང་སྐྲ་གསར་དང་། །གར་དང་རོལ་མོའི་སྒྲ་ཡོད་པ། །དེ་ན་མྱ་ངན་ཡོད་མིན་པས། ། དེས་ན་རོལ་མོ་བསྔགས་པ་ཡིན། ། འགའ་ཞིག་འགའ་ལ་མི་མཛེས་ཤིང་། ། ལ་ལ་གཞན་ལ་མཛེས་མ་ཡིན། ། མཁས་རྨོངས་སྐྱེས་པ་བུད་མེད་སོགས། ། ཀུན་ལ་མཛེས་པ་རོལ་མོ་ཡིན། ། དཀོན་མཆོག་མཆོད་ཕྱིར་འདུས་པ་དང་། ། ཕན་ཚུན་བལྟ་ཕྱིར་འདུས་པ་དང་། ། ཕུན་སུམ་ཚོགས་པ་མཐོང་བའི་ཚེ། ། མཁས་པས་རོལ་མོ་བརྩམ་པར་བྱ། །