Author: ཆུ་དབར་བུ།

ལྷ་ཡུལ་ས་ལ་འཕོས་འདྲའི་གངས་ལྗོངས་ཀྱི་གཙུག་རྒྱན་ལྷ་ལྡན་གྲོང་ཁྱེར་ནི་ལོ་ངོ་ ༡༤༠༠ ལ་ཉེ་བའི་ལོ་རྒྱུས་ལྡན་པའི་རིག་གནས་ཀྱི་གནའ་གྲོང་ཞིག་ཡིན་ཞིང༌། སྤྱི་ལོ་ ༦༣༣ ལོར་ཆོས་རྒྱལ་སྲོང་བཙན་སྒམ་པོས་བོད་བཙན་པོའི་རྒྱལ་རབས་ཀྱི་རྒྱལ་ས་དེ་ཡར་ཀླུང་ནས་ལྷ་སར་སྤོས་པ་མ་ཟད། རི་བོ་གྲུ་འཛིན་གཉིས་པ་ཕོ་བྲང་པོ་ཏཱ་ལ་བཞེངས་འགོ་བརྩམས་པ་དང་ཆབས་ཅིག ལྷ་ལྡན་གཙུག་ལག་ཁང་དང༌། རྒྱ་སྟག་ར་མོ་ཆེ་ལ་སོགས་པ་བཞེངས་པས། ལྷ་ལྡན་འདི་ཉིད་སྐབས་དེར་བོད་ལྗོངས་ས་མཐོའི་མི་འབོར་མང་ཤོས་ཀྱི་གྲོང་ཁྱེར་ཞིག་ཏུ་གྱུར་པ་དང༌། ལྷ་ས་གྲོང་ཁྱེར་སྒྲུབ་རྒྱུར་རྨང་གཞི་བརྟན་པོ་ཞིག་བཏིང་གནང་མཛད་ཡོད།

འཛམ་གླིང་ས་ཡི་གོ་ལའི་ཡང་རྩེར་གནས་པའི་ཉི་འོད་གྲོང་ཁྱེར་ལྷ་ས་ཞེས་པ་ནི། མི་ལོ་ཆིག་སྟོང་སུམ་བརྒྱ་ལྷག་གི་ལོ་རྒྱུས་ལྡན་པའི་གནའ་རབས་ཀྱི་གྲོང་ཁྱེར་གྲགས་ཅན་ཞིག་ཡིན་པ་དང༌། གྲོང་ཁྱེར་དེ་མ་ཆགས་པའི་སྔ་རོལ་དུ། ཡུལ་འདིའི་མིང་ལ་སྐྱིད་ཤོད་ཅེས་དང༌། ཤར་ནས་ནུབ་ཕྱོགས་སུ་ཁ་གཏད་དེ་རྒྱུག་པའི་གཙང་ཆུ་ལ་སྐྱིད་ཆུ་ཟེར་ཞིང༌། སྐྱིད་ཆུའི་བྱང་འགྲམ་དུ་འོ་ཐང་གི་མཚོ་ཞེས་ད་ལྟ་ལྷ་ལྡན་ར་ས་འཁྲུལ་སྣང་གི་གཙུག་ལག་ཁང་ཆགས་ཡུལ་དེ་ཡིན་པ་དང༌། གཙུག་ལག་ཁང་མ་བཞེངས་གོང༌། འོ་ཐང་གི་མཚོ་འགྲམ་དུ་ནེའུ་གསིང་དང༌། གླང་མའི་སྐྱེས་ཚལ། སྟར་ཁའི་སྡོང་པོ། བྱེ་མའི་གླིང་ཚོམ་ལ་སོགས་པའི་རང་བྱུང་གདོད་མའི་དབེན་གནས་ཤིག་ཡིན།

འཛམ་གླིང་གི་ཡང་རྩེར་གནས་པའི་ལྷ་ས་གྲོང་ཁྱེར་ནི། ལོ་ངོ་ཆིག་སྟོང་སུམ་བརྒྱ་ལྷག་གི་ལོ་རྒྱུས་ཡོད་པའི་སྤུར་རྒྱལ་བཙན་པོའི་དུས་ཀྱི་གནའ་བོའི་གྲོང་ཁྱེར་རྙིང་ཁུངས་གྲགས་ཅན་ཞིག་ཡིན་ལ། ད་ལྟའང་བོད་རང་སྐྱོང་ལྗོངས་ཀྱི་ལྟེ་བའི་གྲོང་ཁྱེར་ཞིག་ཡིན། དེ་ཡང་ཆོས་རྒྱལ་སྲོང་བཙན་སྒམ་པོ་མལ་གྲོ་རྒྱ་མ་མི་འགྱུར་བྱམས་པ་གླིང་དུ་སྐུ་བལྟམས་ནས་བོད་ཀྱི་ཡུལ་ཁམས་གཅིག་གྱུར་དང་བདེ་བར་སྐྱོང་སླད།

དེ་ཡང་ལྷ་ས་ནི་ཐུ་བྷོད་བཙན་པོའི་དུས་རབས་ནས་འགོ་ཚུགས་ཏེ་རིམ་བཞིན་བོད་ཀྱི་ལྟེ་གནས་དང༌། ས་ཚིགས་དང་ཆོས་ཚིགས་ཀྱི་ཡུལ་དབུས་ཆགས་པའི་བར་གྱི་དུས་རིམ་ཧ་ཅང་རིང་མོ་ཞིག་བརྒྱུད་ཡོད། དེ་ཡང་ཐོག་མར་མིང་གི་ཆ་ནས་འོམ་ཤོད་དང༌། སྐྱིད་ཤོད། ར་ས་དང༌། ལྷ་ས། ལྷ་ལྡན་དང༌། ཡུལ་དབུས་ལྷ་ལྡན། ཉི་འོད་གྲོང་ཁྱེར་སོགས་ནི་དོན་གཅིག་མིང་གི་རྣམ་གྲངས་ཡིན་ལ། བོད་ཀྱི་ལོ་རྒྱུས་འཕེལ་བའི་དུས་ཡུན་རིང་པོའི་ནང་ས་ཆ་དེར་ཐ་སྙད་མི་འདྲ་བའི་འབོད་སྲོལ་རིམ་པར་བྱུང་ཡོད་པ་འདི་དག་ནི་ལོ་རྒྱུས་རྣལ་མ་ཞིག་ཡིན།

ལེའུ་དང་པོ།  ལྷ་སའི་ས་ཁམས་ཆགས་དབྱིབས་དང༌། དུས་རབས་གསུམ་གྱི་ལྷ་སའི་ལོ་རྒྱུས།          འཛམ་གླིང་ས་ཡི་གོ་ལའི་ཡང་རྩེར་གནས་པའི་ཡིད་འོང་ལྟ་ན་སྡུག་པའི་ཡུལ་མཆོག་ཁ་བ་གངས་ཅན་གྱི་ལྗོངས་འདིར་སྟོད་ལ་མངའ་རིས་སྐོར་གསུམ་དང༌། བར་ལ་དབུས་གཙང་རུ་བཞི། སྨད་ལ་མདོ་ཁམས་སྒང་གསུམ་དུ་ཕྱེ་བའི་ནང་ཚན་དབུས་གཙང་དམ་པ་ཆོས་ཀྱི་ཆོལ་ཁའི་ཡ་གྱལ། ཐུ་བྷོད་དུས་སུ་བྱོན་པའི་གསུམ་གཉིས་ས་ལ་མངའ་དབང་བསྒྱུར་བའི་ཆོས་རྒྱལ་མེས་དབོན་རྣམ་གསུམ་སོགས་བཙན་པོ་བཀའ་དྲིན་ཅན་རྣམས་ཞབས་ཀྱིས་བཅགས་ཤིང་འཕྲིན་ལས་རྫོགས་པའི་བསྟི་གནས།

ཁྲི་སྲོང་ལྡེ་བཙན་གྱི་བང་སོའི་མདུན་ན་ཁོང་གི་མཁས་ཤིང་མཛངས་པའི་མཛད་རྗེས་ལ་བསྔགས་པའི་རྡོ་རིང་ཞིག་བཞེངས་ཡོད་པ་དེའི་མདུན་ངོས་སུ་གནའ་བོའི་བོད་ཡིག་ཡིག་ཕྲེང་ ༣༤ བརྐོས་ཡོད། ཁྲི་ལྡེ་གཙུག་བཙན་གྱི་བང་སོའི་གཟུགས་བཀོད་སྟབས་བདེ་ལ་བབ་ཆགས་ཤིང༌། བཟོ་དབྱིབས་གསོན་ཉམས་ལྡན་པའི་ཐང་རྒྱལ་རབས་ཀྱི་ངོ་མཚར་དང་འདྲ་བའི་རྡོའི་སེངྒེ་ཆ་གཅིག་བརྐོས་ཡོད་ཀྱང་སེངྒེ་གཅིག་ལ་རིག་གསར་གྱི་རྡོ་ཆར་ཕོག་ཏེ་སེངྒེ་མགོ་བོ་ད་ལྟ་བསྡད་མེད།