དོན་སྙིང་། ངེད་ཚོའི་མི་ཚེའི་ནང་དུ། དོན་སྙིང་ཆེ་ཤོས་ཀྱི་བྱ་བ་དེ་དག རྒྱུན་དུ་ཁ་ཁུ་སིམ་ཞིང་མངོན་གསལ་མེད་ཀྱང་། གཟུགས་དང་གྲིབ་མ་ཇི་བཞིན། དུས་རྟག་ཏུ་ང་ཚོ་དང་ལྷན་དུ་གནས་ཡོད། དེ་དག་ནི། རྒྱུན་དུ་ཕན་ཐོགས་ཆེ་བའི་ལག་པ་གཉིས་དང་། གཡོ་ཟོལ་མེད་པའི་སེམས་བཟང་དེ་ཡིན་ལ། ཁྱེད་ཀྱིས་གནང་བའི་མཛའ་བརྩེ་དང་། རང་ཉིད་ཀྱིས་བདམས་པའི་འཚོ་བ། སེམས་ཀྱི་རྨ་ཁ་གསོ་བའི་ཚིག་འབྲུ་རེ་རེ་སྟེ། བཟོད་སྒོམ་ལས་འཁྲུངས་པའི་བྱམས་བརྩེའི་ས་བོན་དེ་དག་རེད།

ཤོག་བྱ། གཡའ་དག་གི་གནམ་མཐའ་རུ། ཚོན་མདངས་བཀྲ་བའི་ཤོག་བྱ་ཞིག བསིལ་པོའི་རླུང་པོ་དང་འགྲོགས་ནས། བར་སྣང་ལ་འཕུར་ལྡིང་རྩེན། མཆོང་ལྡིང་ལ་དགའ་བའི་སེམས་པ་འདི་ཡང་། ཤོག་བྱའི་ཐག་སྐུད་དེར་འཁྱུད་ནས། མཚམས་རེ་མཐོ་ལ། སྐབས་རེ་དམའ་ཞིང་། ལ་ལར་དམ་ལ། རེས་འགར་ལྷོད་པའི་སྟངས་སྟབས་ཀྱིས། རྒྱང་རིང་གི་ཕ་མཐའ་ཉུལ་བར་བྲེལ།

རྣམ་དཔྱོད། ཅི་ཞིག་ལ་རྣམ་དཔྱོད་ཟེར། དེ་ནི་མུན་པ་སེལ་བའི་གསེར་གྱི་ཉི་མའམ། འོད་མདངས་འཚེར་བའི་མིག་ཟུང་དང་འདྲ། རྣམ་དཔྱོད་ཀྱི་མིག་ཟུང་ལ་བརྟེན་ནས། བདེན་དོན་གྱི་རྩ་བ་རྙེད་ནུས་ཏེ། དེའི་མྱུར་ཚད་ལ་འགྲན་ཟླ་མེད་ཅིང་། ཟབ་ཚད་ལ་མུ་མཐའ་བྲལ་བས། མཐོང་རྒྱ་ནི་ཀུན་ལས་ཀྱང་ལྷག

རང་བྱུང་ཁམས།    མཛེས་སྡུག་གིས་རབ་ཏུ་ཕྱུག་ཅིང་།  གཏོང་ཕོད་ཀྱི་སྦར་མོ་ཡངས་པའི་རང་བྱུང་ཁམས། ཁྱེད་ཀྱི་དྭངས་ཤིང་གཙང་བའི་ཆུ་མོ་དང་། བསིལ་ཞིང་འཇམ་པའི་རླུང་བུ།  དམར་ཞིང་དྲོ་བའི་ཉི་འོད་ཀྱིས།  གོ་ལའི་ཁྱིམ་གཞིས་འདི་སྐྱོང་བར་མཛད་ཅིང་། ལྗང་ཞིང་མཉེན་པའི་ལྗོན་ཤིང་དང་།  དཀར་ཞིང་ཡངས་པའི་སྤྲིན་པ།  མཐོ་ཞིང་ཡངས་པའི་རི་ཀླུང་དེ་དག་གིས། མི་རྣམས་དེ་བས་ཀྱང་ངོ་མཚར་སྐྱེ་རུ་བཅུག རང་བྱུང་ཁམས་ཀྱི་དངོས་པོ་ཡོད་ཚད་ནི། ཅི་འདྲའི་ཡིད་དུ་འོང་ཞིང་།  དེ་འདྲའི་རིན་ཐང་བྲལ་བ་ཞིག་རེད་ཨང་། 

ཕྱིར་དྲན། ང་རང་ཕྱིར་དྲན་གྱི་དྲྭ་བར་ཚུད་དེ། བསམ་གཞིག་གི་ཀློང་དུ་འཁྱམས་ནས། མི་ལོ་ལྔ་བཅུ་ལྷག་གི་ལ་ཀླུང་བརྒལ། ལོ་ངོ་དེ་དག་གི་རིང་ལ། བདག་ལ་དྲིན་ཆེ་བའི་ཕ་མ། ཤ་ཚ་བའི་སྤུན་མཆེད། སྙིང་ཉེ་བའི་གྲོགས་པོ་སྟེ། འདྲིས་ཟབ་པའི་མི་སྣ་ཡོད་ཚད་ སླར་ཡང་ཐེངས་གཅིག་མཇལ།

༄༅། །སློབ་དཔོན་ཕྱྭ་པ་ལ་བསྟོད་པ་བཞུགས་སོ། །   ༄༅། །ཨོཾ་སྭཱ་སྟི་སིདྡྷི། བརྩེ་ཆེན་སྤྲོས་བྲལ་གཉིས་སུ་མེད་པའི་སྐུ་ལྡན་པ། །སྟོན་པ་འཇིག་རྟེན་འདྲེན་ལ་གུས་པས་ཕྱག་འཚལ་ཏེ། །གང་གི་དྲིན་གྱིས་བདག་བློའི་པདྨ་འབྱེད་མཛད་པ། །བླ་མ་དམ་པ་དེ་ལ་དང་བས་བསྟོད་པར་བགྱི། །དཔག་མེད་དུས་ནས་སྦྱིན་སྡོམ་ཐོས་ལ་སོགས། །དགེ་ཆོས་བསམ་གྱིས་མི་ཁྱབ་རབ་ཏུ་བསྐྲུན་མཛད་རྒྱུས། །རིགས་གཟུགས་བློ་གྲོས་བརྩོན་སོགས་མཆོག་གིས་རབ་བརྒྱན་པ། །དལ་ཞིང་འབྱོར་པ་ཕུན་སུམ་ཚོགས་པ་བཟང་པོའི་གཞིར། །རང་བཞིན་གྱིས་གནས་རིགས་གྱུར་ཐར་པའི་ས་བོན་ལ། །