ཕྱིར་དྲན།
ང་རང་ཕྱིར་དྲན་གྱི་དྲྭ་བར་ཚུད་དེ།
བསམ་གཞིག་གི་ཀློང་དུ་འཁྱམས་ནས།
མི་ལོ་ལྔ་བཅུ་ལྷག་གི་ལ་ཀླུང་བརྒལ།
ལོ་ངོ་དེ་དག་གི་རིང་ལ།
བདག་ལ་དྲིན་ཆེ་བའི་ཕ་མ།
ཤ་ཚ་བའི་སྤུན་མཆེད།
སྙིང་ཉེ་བའི་གྲོགས་པོ་སྟེ།
འདྲིས་ཟབ་པའི་མི་སྣ་ཡོད་ཚད་
སླར་ཡང་ཐེངས་གཅིག་མཇལ།
ངས་ཕྱིར་འགྲོ་གིན་འགྲོ་གིན།
སོང་མྱོང་བའི་ས་ཆ་དང་།
འགྲོ་འདོད་པའི་གནས།
བྱས་ཚར་བའི་ལས་དང་།
བགྱིད་འདོད་པའི་བྱ་བ་ཡོད་ཚད་མིག་ལམ་དུ་འཆར།
རྒན་རབས་ཀྱིས་གསུངས་ན།
མི་ཚེ་ནི་ཀྱག་ཀྱོག་མང་བས།
མདུན་དུ་བལྟ་བ་ལས།
རྒྱབ་ཏུ་བལྟ་མི་འོས་ལ།
མཐོ་སར་བསྐྱོད་པ་ལས།
དམའ་སར་འགྲོ་མི་འོས་ཟེར།
འོན་ཀྱང་དོན་དངོས་སུ།
དམའ་སའི་སྐས་འཛེགས་དེ་བརྒྱུད་ནས་
མཐོ་སར་སླེབས་པ་དང་།
ད་ལྟའི་གོམ་གང་ལ་བརྟེན་ནས།
མ་འོངས་པའི་ལས་དབང་བསྐྲུན་པར་ངེས་ལ།
སྔར་སོང་ཉམས་མྱོང་གི་རྒྱང་ཤེལ་ལས།
འབྱུང་འགྱུར་གྱི་ལམ་བུ་གསལ་པོར་མཐོང་བས།
འདས་དོན་ལ་དྲན་གསོ་བྱ་རྒྱུ་ནི།
རིན་ཆེན་གྱི་གཏེར་མཛོད་ཅིག་དང་ཧ་ཅང་འདྲ།
དེ་ལྟར།
ངས་བསམ་ཤེས་ཀྱི་ཕྲེང་རྡོག་རེ་རེ་བརྒྱུད།
དྲིན་ཅན་གྱི་མི་སྣ་ཡོད་དོ་ཅོག
ཡིད་ལ་གསལ་པོར་མངོན་ཏེ།
ང་རང་གང་ནས་ཡོང་ཞིང་།
གང་དུ་ཆས་པ་དང་།
གང་གི་སླད་དུ་འཚོ་དགོས་པ་ཡང་།
གསལ་པོར་རྟོགས།
གཞིས་རྩེ་བུ་ཆུང་ཚེ་རིང་། ༢༠༢༦། ༨། ༡
