སླར་ཡང །
འདི་རུ་སླར་ཡང །
སྟོན་མཇུག་གི་ལོ་མ་སེར་པོར་གྱུར་ཏེ།
གསེར་ཞུན་གྱི་རང་མདངས་ཤིག་ངོམ་བཞིན།
གཅིག་མཇུག་གཉིས་མཐུད་ཀྱིས།
ས་གཞིའི་སྟེང་དུ་ལྷུང་བས།
གསེར་ཤོག་གི་མལ་སྟན་མཐུག་པོ་ཞིག་དང་འདྲ་བར།
ས་སྟེང་ཡོངས་ལ་ཁྱབ།
རིམ་བཞིན།
བྱིའུ་ཆུང་གི་སྐད་སྒྲ་བརླགས་ཤིང་།
འབུ་སྲིན་གྱིས་འགྲོ་འོང་བཅད་པས།
སེར་མདོག་གི་འདབ་ལོ་རྣམས་ཀྱང་།
ཐལ་མདོག་ཅིག་གིས་བརྐུས་ཏེ།
གྲང་ངར་ཆེ་བའི་རླུང་བུས་འདེད་སྐབས།
སྐྱོ་ལྷང་ལྷང་གི་ངུ་སྒྲ་སྦྱིན།
དེ་ལྟར།
སྟོན་ཀའི་མཛེས་སྡུག་རྒུད་ཅིང་།
དགུན་དུས་ཀྱི་གྲང་ངར་ཆེ་ཡང་།
བདག་ལ་སུན་སྣང་སྟེར་མི་ཐུབ།
འོ་ན།
ང་རང་གང་དུ་སྐྱེས་ཤིང་།
གང་ལས་ཆས་པའི་ཚང་དེར།
སླར་ཡང་ལོག་འདོད་ཀྱི་རེ་བ།
ཁ་དོག་དེ་དང་ལྷན་ཅིག་ཏུ་ཡལ་ཏེ།
རྒྱང་རིང་ཞིག་ལ་འཁྱེར་སྐབས།
གྲང་ཤུར་དེ་སྐྱོ་སྣང་ལ་ཐིམ་པས།
སྟོན་དུས་ནི་དགྲ་བོ་ཞིག་དང་འདྲ་བར།
ནམ་ཡང་མཐོང་འདོད་མེད་པར་གྱུར།
གཞིས་རྩེ་བུ་ཆུང་ཚེ་རིང་གིས་ཕྱི་ལོ་ ༢༠༢༦ ཟླ་བ་ ༡༡ ཚེས་ ༡༡ ཉིན་ནིའུ་ཡོག་ཏུ་བྲིས།