ཀ་བཤད་ཡིད་ཀྱི་མཆོད་པ།
ཀ་བ་ལྟ་བུར་དྲང་ཞིང་བརྟན་པ་དང༌། །
ཁ་བའི་འདབ་མ་ལས་དཀར་ལྷག་བསམ་ཅན། །
ག་པར་ཕེབས་ཀྱང་བོད་ཀྱི་བདེན་པའི་དོན། །
ང་རྒྱལ་གཞན་ཕམ་མེད་པར་སྒྲུབ་ལ་འདུད། །
ཅ་ཅོ་དཀྲུག་ཤིང་གོམས་པའི་ཁྱི་སྤྱང་གིས། །
ཆ་འཇོག་བྲལ་བའི་ངུ་སྒྲ་ཆེ་ན་ཡང་། །
ཇ་རོ་དང་འདྲའི་ཆོས་བརྒྱད་སྤངས་པས་ན། །
ཉ་གང་ཟླ་བར་ཉིད་ཀྱི་གཟི་འོད་འདྲེས། །
ཏཱ་ལའི་བླ་མའི་ཐུགས་བཞེད་གང་དང་ཅི། །
ཐ་སྙད་ལོག་བཤད་སྤངས་ཏེ་དང་བས་བསྒྲུབས། །
ད་ཆ་དྲིན་ཅན་ཁྱེད་འདྲ་རྙེད་དཀའ་བས། །
ན་གཞོན་རྗེས་མའི་བློ་གཏད་སུ་ལ་བཅོལ། །
པ་ལོ་བྲེགས་ནས་ཆོས་ཀྱི་གྲྭར་ཞུགས་པས། །
ཕ་མཐའ་ཡས་པའི་བསྟན་པའི་གནད་ལ་མཁས། །
བ་སྤུ་ཙམ་གྱི་མི་དགེའི་ལས་དོར་མོད། །
མ་གྱུར་འགྲོ་བའི་དོན་ལ་རྟག་ཏུ་བརྩོན། །
ཙ་རིའི་གནས་བཟང་བསྐོར་མིན་མི་ཤེས་ཀྱང་། །
ཚ་བའི་ཡུལ་དུ་བོད་ཀྱི་རིག་གཞུང་རྣམས། །
ཛ་དྲག་ཆེན་པོས་ཉིན་མཚན་སྤེལ་མཛད་པ། །
ཝ་ལེར་གསལ་འདི་ད་དུང་མ་མཐོང་ངམ། །
ཞ་ཞོར་ཙམ་མིན་སྐུ་ཚེ་ཧྲིལ་པོའི་ནང་། །
ཟ་འདོད་རྒྱུ་རྔམ་མེད་པར་ཆོག་ཤེས་ཅན། །
འ་ཆད་འུ་ཐུག་སྐབས་ཀྱི་ལམ་སྟོན་པ། །
ཡ་གི་ཉི་མ་ལས་ཀྱང་བཀའ་དྲིན་ཆེ། །
ར་བ་གངས་རི་དཀར་པོས་བརྒྱན་པའི་ཡུལ། །
ལ་ཀླུང་ཀུན་ནས་ཆུ་མོ་འབབ་པའི་གནས། །
ཤ་ཚ་ལར་ཞེན་མངའ་བའི་གངས་ཅན་པས། །
ས་ཕྱོགས་ཀུན་ནས་ཉིད་ཀྱི་འཁྲུངས་སྐར་བསུ། །
ཧ་ལས་ངོ་མཚར་ཆེ་བའི་མཛད་འཕྲིན་རྒྱ་མཚོ་ལས། །
ཧ་ལམ་ཟིལ་པ་ཙམ་ཡང་བདག་གིས་རྟོགས་དཀའ་མོད། །
ཨ་ཧོ་དྲིན་ཅན་དྲིན་དུ་ཤེས་པའི་དད་གུས་ཀྱིས། །
ཨ་རིའི་ཡུལ་ནས་ཀ་བཤད་ཡིད་ཀྱི་མཆོད་པ་ཕུལ། །
གཞིས་རྩེ་བུ་ཆུང་ཚེ་རིང་གིས།
