ལེ་ཚན་གཉིས་པ། བྱང་སྤྱི།
དང་པོ། བྱང་སྤྱི་གསར་འཛུགས་བྱེད་དོན་དང་བཙུགས་པའི་དུས་ཚོད།
གཞུང་ས་དགའ་ལྡན་ཕོ་བྲང་པའི་སྲིད་དབང་དབུ་བརྙེས་པའི་ཐོག་མའི་དུས་རིམ་ནང་སྡེ་སྲིད་ཀྱི་ལམ་ལུགས་དང་། ཕྱི་ལོ་ ༡༧༥༡ ནས་བཀའ་ཤག་གི་ལམ་ལུགས་བྱུང་བའི་རིང་། གཞི་རིམ་འཛིན་སྐྱོང་ཐད་དབུས་གཞུང་ནས་རྫོང་གཞིས་ཁག་ཐད་སྐྱོང་གནང་ལམ་ལས་ས་གནས་སྤྱི་ཁྱབ་ཀྱི་ལམ་ལུགས་ཤིག་མེད་རྐྱེན། རྫོང་དང་རྫོང་བར་དང་གཞིས་ཀ་དང་གཞིས་ཀའི་བར་གཅུན་འདོམས་བྱེད་དཀའ་བར་འགྱུར་རྐྱེན་རྟག་པར་ཁ་མཆུ་དང་། རྒྱག་རེས། གྱོད་དོན་འཁྲུག་ཟིང་རྒྱུན་མི་ཆད་པ་ཡོང་གི་ཡོད་པར་བརྟེན།
༸གོང་ས་སྐུ་ཕྲེང་བཅུ་གསུམ་པ་ཆེན་པོས་ཕྱི་ལོ་ ༡༩༡༠ ཡས་མས་ནས་མི་མང་གི་བདེ་སྡུག་དྲང་སྙོམས་ཡོང་སླད། གཞུང་སྲིད་འཛིན་སྐྱོང་ལམ་ལུགས་ལ་ལེགས་བཅོས་གནང་ནས་སྔ་ཕྱིར་ལྷོ་སྤྱི་དང་། མདོ་སྤྱི། གཙང་སྤྱི་སོགས་དང་། ཕྱིས་བྱང་སྤྱི། དྭགས་ཀོང་སྤྱི་ཁྱབ་སོགས་བཙུགས་ཡོད་ཅིང་། སྤྱི་ཁྱབ་ངོ་མ་དེ་བཀའ་ཤག་ནས་༸གོང་ས་མཆོག་ལ་སྙན་སེང་ཐམ་ཞུ་བྱས་ནས་ཐད་བསྐོས་གནང་ལམ་ཡོད་འདུག
བྱང་སྤྱི་ནི་ཕྱི་ལོ་ ༡༩༤༢ ལོ་ནས་ཧོར་སྤྱིར་གཞུང་ཞབས་བསྐོ་གཏོང་མ་དགོས་པར་སྟག་བྲག་བླ་བྲང་ལ་སྲིད་སྐྱོང་གི་འཁྱོངས་ཐེབས་སུ་སྤྲད་ནས་ལོ་གཉིས་སོང་མཚམས། འབྲི་རུ་ཁུལ་སྟག་བྲག་བླ་བྲང་ནས་མུ་མཐུད་ཉར་བ་ཕུད་དེ་བྱིངས་ཧོར་སྤྱིའི་ཁྱབ་ཁོངས་ཤོག་ཁག་རྣམས་གཞུང་ལ་ཕྱིར་འབུལ་ཞུས་པས། བཀའ་ཤག་ནས་དེ་སྐོར་དྲུང་རྩིས་ལ་གོ་བསྡུར་དང་འབྲེལ་སྲིད་སྐྱོང་སྟག་བྲག་རིན་པོ་ཆེར་སྙན་ཞུས་ཆོག་མཆན་ཐོབ་དོན་ལྟར། སླར་ཧོར་སྤྱི་བསྐོ་གཏོང་མ་དགོས་པར་ཚོ་པ་སོ་དགུའི་སྡེ་ཤོག་རྣམས་རྫོང་འགོ་ཁག་དྲུག་[1] ཏུ་བགོས་ཏེ། རྫོང་སྡོད་སེར་སྐྱ་ཉིས་སྦྲེལ་རེ་བསྐོ་གཏོང་བྱ་རྒྱུའི་གཏན་འབེབས་གནང་བ་དང་སྦྲགས། ཕྱི་ལོ་ ༡༩༤༣ ལོར་དེ་སྔ་བྱང་རིགས་སྡེ་བཞིའི་ཁྲལ་བསྡུ་ཁྲིམས་གནོན་བྱེད་པོ་ནག་ཆུ་འགོ་པ་མཁན་ནང་(རྩེ་དྲུང་དེར་མཁན་པོ་དང་ཤོད་དྲུང་དེར་ནང་སོ་ཞེས་བརྗོད་སྲོལ་ཡོད།)སྦྲེལ་པོ། ཞེས་གནས་ལྔ་པའི་རྫོང་སྡོད་སེར་སྐྱ་གཉིས་རེ་འགྲོ་སྲོལ་ཡོད་པ་དེ་དག་གི་ཚབ་ཏུ་བྱང་ས་རྒྱབ་སྟོང་ས་གནས་འདུ་འགག་གལ་ཆེར་ཁྱབ་འདོམས་ཆེ་ཁྱད་ཡིན། ཞེས་བྱང་རྒྱུད་སྤྱི་ཁྱབ་གསར་འཛུགས་ཀྱིས་བསྐོ་གཏོང་བྱས་པ་དང་ཆབས་ཅིག་གོང་གསལ་རྫོང་ཁག་དྲུག་ཀྱང་བྱང་སྤྱིའི་བཀོད་འདོམས་བྱ་ཡུལ་གྱི་མངའ་ཁོངས་སུ་བཅུག་འདུག་གོ།
གཉིས་པ། དེ་སྔའི་བྱང་སྤྱིའི་ཁོངས་ཀྱི་རྫོང་གཞིས་ཁག་དེང་གང་དུ་གཏོགས་མིན།
ལོ་རྒྱུས་ཐོག་རྫོང་གཞིས་ཁག་ལ་འཕོ་འགྱུར་རིམ་པར་ཕྱིན་ཡོད་པས་ངེས་བརྟན་གྱི་དབྱེ་མཚམས་ཤིག་བརྗོད་དཀའ་ཡང་། ཕྱི་ལོ་ ༡༩༤༣ ལོར་བྱང་སྤྱི་ཐོག་མར་འཛུགས་སྐབས་བྱང་སྤྱིའི་མངའ་ཞབས་སུ་ཁྱོན་རྫོང་གཞིས་བཅུ་བཞི་ཡོད་པ་བཤད་ལ།[2] འགའ་རེས་བྱང་སྤྱིའི་འོག་ཏུ་རྫོང་གཞིས་བཅོ་བརྒྱད་དམ་བཅུ་དྲུག་ཡོད་པ་བཤད་མོད། འདིར་བྱང་རིགས་སྡེ་བཞིའི་ཁོངས་གཏོགས་ཀྱི་དེ་སྔའི་རྫོང་གཞིས་ཁག་དེང་གང་དུ་གཏོགས་མིན་བརྗོད་པར་འདོད་དོ།།
| ལོ་རྒྱུས་ཐོག་གི་རྫོང་དང་གཞིས་ཀ | ད་ལྟའི་རྫོང་། |
| ནག་ཆུ་རྫོང་། | ནག་ཆུ་རྫོང་དང་། ཨ་མདོ་རྫོང་། |
| གནམ་རུ་རྫོང་། འདམ་ཆོས་འཁོར། འདམ་ས་སྐྱ་རྫོང་། དོལ་པ། ཤིང་སྒེར། མཁཪ་ཐོག | དཔལ་མགོན་རྫོང་།1 |
| ཕོད་མདོ་གཞིས། | འཕན་པོ་ལྷུན་གྲུབ་རྫོང་། |
| འདམ་རྒྱ་ཤོག་བརྒྱད། དག་པོ་མཚོ་སྲིབ། སྦས་ཚང་གཞིས་(དེང་སྙིང་དྲུང་ཁོངས་ཡོད།) ཡངས་པ་ཅན། | འདམ་གཞུང་རྫོང་། |
| ནག་ཚང་། གཡག་པ། བར་གླིང་ཚོ་པ། ཤན་ཚ་རྫོང་།2 | ཉི་མ་རྫོང་། མཚེའུ་དོན་གཅོད་ཁྲུའུ། |
གསུམ་པ། བྱང་སྤྱིའི་སྲིད་འཛིན་སྒྲིག་གཞི་དང་བྱང་སྤྱི་རིམ་བྱུང་།
དེ་ཡང་བྱང་སྤྱིའི་སྒྲིག་གཞི་ནི་ཁྱབ་འདོམས་བྱ་ཡུལ་རི་བོ་ཆེ་བླ་གཉེར་ཡན་ནས་གནམ་རུ་ནག་ཚང་མན། རྒྱལ་སྟོན་ལྷ་རི་འགོ་ཚུན་གྱི་རྫོང་འགོ་ཁག་བཅུ་དྲུག་གི་མངའ་ཁོངས་རྣམས་ཡིན་པ་དང་། དེ་དག་གི་གཞུང་སྒེར་ཆོས་བཅས་ཚང་མས་བྱང་སྤྱིའི་བཀའ་བཀོད་དང་ལེན་བྱེད་དགོས་པའི་སྲིད་ཐམ་ལག་ཁྱེར་ཡོད། བྱང་སྤྱིའི་འགན་དབང་ནི་ཁྱབ་ཁོངས་རྫོང་འགོ་ཁག་དང་། བྱང་རིགས་སྡེ་བཞིའི་དཔོན་འགོ་ཁག་གི་ས་ནས་(སྤྱི་བསྒྲིགས་གན་རྒྱ།)ལེན་པ་དང་། བཀའ་ཤག་ནས་བཀོད་རྒྱ་ནམ་འབྱོར་གྱི་ནང་དོན་རྣམས་བརྒྱུད་བསྒྲགས་བྱ་རྒྱུ། རྫོང་འགོ་ཁག་གིས་ཐག་གཅོད་མ་ཐུབ་པའི་གྱོད་དོན་ཁག་བྱང་སྤྱིར་གཏུག་བཤེར་གྱིས་ཁྲིམས་གཅོད་བྱེད་སྒོ། ཁྲིམས་འགལ་རིགས་གཅུན་འདོམས་དང་གཞུང་ཁྲལ་དུས་འབུལ། ཚོང་དོན་ལ་རྟོག་ཞིབ་དང་རྩོད་གླེང་བྱུང་ན་ཐག་གཅོད། མཐའ་མཚམས་ཀྱི་བདག་དབང་སྲུང་སྐྱོབ། ཆབ་འབངས་ཀྱི་བདེ་སྡུག་ལ་བལྟ་སྐྱོང་། དགོན་སྡེའི་འདུལ་ཁྲིམས་སྤྱི་འདོམས། གཤམ་འོག་དཔོན་རིགས་བསྐོ་འཐེན་བྱ་རྒྱུ་སོགས་ཡིན་ཀྱང་། དོན་གནད་ཆེ་རིགས་ཐོན་ཚེ་འཕྲལ་མར་བཀའ་ཤག་ལ་སྙན་སེང་ཞུ་དགོས་པ་ལས་སྒེར་ཐག་བཅད་ཆོག་གི་མེད། ཕྱི་ལོ་ ༡༩༤༣ ནས་ ༡༩༥༩ བར་གྱི་བྱང་སྤྱི་རིམ་པའི་མཚན་གཞུང་གཤམ་གསལ།
| བྱང་སྤྱིའི་ཨང་རིམ། | གནས་རིམ། | བྱང་སྤྱིའི་མཚན། |
| དང་པོ། | རིམ་བཞི། སེར་མོ། | ཕ་ལྷ་མཁན་ཆུང་ཐུབ་བསྟན་འོད་ལྡན། |
| རིམ་བཞི། སྐྱ་བོ། | གསུམ་མདོ་བ་རྒྱལ་མཚན་ཡོད་ཏན། | |
| གཉིས་པ། | རིམ་བཞི། སེར་མོ། | ལྷའུ་རྟ་ར་ཐུབ་བསྟན་བསྟན་དར། |
| རིམ་བཞི། སྐྱ་བོ། | ཞ་སྒབ་པ་བློ་གསལ་དོན་གྲུབ། | |
| གསུམ་པ། | རིམ་བཞི། སེར་མོ། | ཐུབ་བསྟན་བཟང་པོ། |
| རིམ་བཞི། སྐྱ་བོ། | ར་ས་རྒྱ་རྒན་པ་ཕུན་ཚོགས་དབང་རྒྱལ། | |
| བཞི་པ། | རིམ་བཞི། སེར་མོ། | ཐུབ་བསྟན་བྱང་ཆུབ། |
| རིམ་བཞི། སྐྱ་བོ། | སྨན་སྐྱིད་གླིང་པ་འཇམ་དབྱངས་རྒྱལ་མཚན། | |
| ལྔ་པ། | རིམ་བཞི། སེར་མོ། | བློ་བཟང་བསྟན་འཛིན། |
| རིམ་བཞི། སྐྱ་བོ། | སྨན་སྟོད་བློ་བཟང་དབང་འདུས། |
ལུང་ཁུངས་དཔྱད་གཞིའི་ཡིག་ཆ།
[1]. རྫོང་དྲུག་ནི་གཉན་རྫོང། འབྲི་རུ་རྫོང་། ལྷོ་ནེམ་ཁྲི་རྡོ། སེར་ཚ་རྫོང་། སྟེང་ཆེན་རྫོང་། སྦྲ་ཆེན་རྫོང་བཅས་སོ།།
[2]. བོད་ལྗོངས་སྤྱི་བཤད། སྟོད་ཆ། བོད་ལྗོངས་མི་དམངས་དཔེ་སྐྲུན་ཁང་། ཕྱི་ལོ་ ༡༩༩༡། ཤོག ༧༡།
དབུས་གཙང་རིག་མཛོད་ཆེན་མོ་ལས་བཏུས་པའོ།།
