བོད་ཡུལ་གྱི་ས་ཁམས་ཆགས་ཚུལ།
བོད་བཙན་པོའི་ཡིག་ཚང་《ཏུན་ཧོང་ཡིག་རྙིང་》ལས། གནམ་གྱྀ་ནྀ་དབུས། སའྀ་ནྀ་དཀྱིལ། གླྀང་གི་ནི་སྙིང་པོ། གངས་ཀྱྀ་ནི་ར་བ། ཆུ་བོ་ཀུན་ཀྱྀ་ནི་མགོ་བོ། རྀ་མཐོ། ས་གཙང་། ཡུལ་བཟང་། མྱྀ་མཛངས་ཤིང་དཔའ་རུ་སྐྱེས། ཆོས་བཟང་དུ་བྱེད། རྟ་མགྱོགས་སུ་འཕེལ་བའི་གནས། ཞེས་འབྱུང་ངོ་། ། གོ་ལ་ཆེན་མོའི་ངོས་ཀྱི་བོད་ཡུལ་མཐོ་སྒང་། དེའི་དོན་གསལ་བར་བཤད་ན། བོད་གངས་ཅན་གྱི་ལྗོངས་ཆེན་མོ་འདི་ནི། གནམ་འཁོར་ལོ་རྩིབ་བརྒྱད་ཀྱི་དབུས། ས་པདྨ་འདབ་བརྒྱད་ཀྱི་དཀྱིལ། གླིང་དཔལ་བེའུ་གྲུ་བཞིའི་སྙིང་པོ། ཤར་ཕྱོགས་ཀྱི་མདོ་ལ་རི་རྒྱུད་དང་། ལོང་ཤན་རི་རྒྱུད། ལྷོ་ཕྱོགས་ནས་ཁ་བ་དཀར་པོའི་རི་རྒྱུད། ནུབ་ཕྱོགས་ནས་ཧི་མ་ལ་ཡའི་རྒྱུད། བྱང་ཕྱོགས་ནས་ཁུ་ནུ་རི་རྒྱུད་དང་། ཨ་ཨིར་ཅིན་རི་རྒྱུད་སོགས་མཐའ་བཞིར་གངས་ཀྱི་ར་བས་བསྐོར་བ། རྒྱ་ནག་པོའི་ཡུལ་གྱི་ཆུ་ཆེན་རྨ་ཆུ་དང་འབྲི་ཆུ། བོད་ཡུལ་གྱི་ཆུ་ཆེན་རྗ་ཆུ་དང་། རྒྱ་མོ་རྔུལ་ཆུ། ཡར་ཀླུང་གཙང་པོ། རྒྱ་དཀར་པོའི་ཡུལ་གྱི་ཆུ་ཆེན་གངྒཱ་དང་། ཡ་མུ་ན། སིན་དྷུ་གཙང་པོ་ལ་སོགས་པ་གཙང་ཆེན་གྱི་ཆུ་བོ་ཀུན་གྱི་མགོ་བོ།
