རྗེ་མར་པ་ལོ་ཙཱ་བ་ཆེན་པོའི་རྣམ་ཐར།
འཕྲིན་ལས་རྡོ་རྗེ། ༄ །རྗེ་མར་པ་ལོ་ཙཱ་བ་ཆེན་པོའི་རྣམ་ཐར་ནི། ལྷོ་བྲག་ཆུ་ཁྱེར་དུ། ཡབ་མར་པ་དབང་ཕྱུག་འོད་ཟེར་དང་། ཡུམ་སྐལ་ལྡན་སྐྱིད་གཉིས་ཀྱི་སྲས་སུ་ཆུ་བྱི་༼༡༠༡༢༽ལོར་འཁྲུངས། གཞོན་ནུ་ནས་བྲི་ཀློག་མཁས་པར་མཁྱེན། སྤྱོད་པ་ཤིན་ཏུ་གྱོང་བས་མི་ཆེ་ཆུང་མེད་པ་ལ་འཐབ། ཀློག་སློབ་པའི་སློབ་དཔོན་དང་གྲོགས་པོ་གཅིག་མིན་པ་སུའི་ཁྱིམ་དུ་ཡང་མི་ཚུད། གླང་ལ་རྡོ་བརྒྱབ་པས་སྣ་ཁྲིད་པའི་མགོ་ལ་ཕོག་ནས་བསད་པ་སོགས་ཤིན་ཏུ་གདུག་རྩུབ་ཆེ་བར་གྲགས། ཕ་མས་ཤེད་མ་བྱེ་བ་ནས་ཆོས་ལ་གཏང་བར་གྲོས་ནས་ཡབ་ཡུམ་གྱིས་ཀ་ཅ་མང་དུ་བསྐུར་ཏེ་དགུང་ལོ་བཅུ་གཉིས་ལོན་པ་ན་ཆོས་ལ་བརྫངས། ལོ་བཅུ་གཉིས་ལོན་ནས་ཆོས་དང་འཕྲད། །དེ་སྔོན་སྦྱངས་ཀྱི་བག་ཆགས་སད་པ་འདྲ། །ཞེས་གསུང་། དེར་བླ་མ་སུ་གྲགས་ཆེ་བ་རྩད་བཅད་པས། དེའི་དུས་འབྲོག་མི་ལོ་ཙཱ་བ་སྐད་ཆེ་བར་འདུག་ནས་མྱུ་གུ་ལུང་གི་དགོན་པར་མཇལ། ཕྱག་རྟེན་ཀྱང་ཆེ་བར་བྱས། ཆོས་སྒོར་ཞུགས། སྒྲ་སྐད་ལོ་ཙཱ་མཁས་པའི་ཚད་དུ་བསླབས་ཏེ་ལོ་གསུམ་ཙམ་བཞུགས། དེར་གསང་སྔགས་ཀྱི་ཆོས་འདོད་ཀྱང་ཡོན་ཆེ་ལ་བཀའ་དོག་པས་མ་ཐོབ་སྟེ། དཔལ་མྱུ་གུ་ལུང་གི་དགོན་པ་རུ། །གསང་སྔགས་ཆོས་ཀྱི་མུ་གེ་ལ། །སེམས་ཡི་དྭགས་བྱེད་ཅིང་ལོ་གསུམ་བསྡད། །ཅེས་གསུང་།
