བོད་ཡིག་གི་གསལ་བྱེད་སུམ་ཅུའི་སྨྱུག་རིམ་ཀུན་གསལ་དགེ་སློབ་དགྱེས་པའི་སྟོན་མོ།
འཇམ་མགོན་ས་སྐྱ་པཎྜི་ཏས། གང་དག་ཡི་གེ་འབྲི་བ་པོ། །སྙོམས་གཙང་འགྲིགས་གསུམ་ལྡན་པ་དང་། །ལེགས་མགྱོགས་དག་གསུམ་དྲུག་ཚང་ན། །མཁས་པའི་གོ་འཕང་ཐོབ་པ་ཡིན། །ཞེས་དང་། འཇམ་མགོན་བློ་གྲོས་མཐའ་ཡས་པའི་སྡེ་ཆེན་པོ་ཀོང་སྤྲུལ་རིན་པོ་ཆེས། ཆ་ཚད་འབྲི་གཞི་སྣག་སྙུག་མཁས་པར་བསླབ། །གཙང་སྒྲོས་དག་པ་ཆེ་ཕྲག་ཀུན་ལ་གཅེས། །ཞེས་དང་། རྗེ་བསྟན་དར་ལྷ་རམས་པའི་ཞལ་ནས། རྩོམ་པ་ལེགས་ཀྱང་སུག་བྲིས་མི་འབྱོར་བ། །དཔའ་རྩལ་ཆེ་བའི་དཔའ་བོ་ལག་རྡུམ་འདྲ། །ཞེས་དང་། གནའ་བོའི་ངག་རྒྱུན་ལས། སྣག་ཤོག་སྙུ་གུ་མི་གཟོབ་པར། །ཡི་གེ་གཟོབ་འདོད་ཡིག་མཁན་འཁྲུལ། །ཞེས་དང་། དོར་ཞི་གདོང་དྲུག་སྙེམས་བློས། རྩོམ་ལ་མཁས་ཀྱང་ཡིག་གཟུགས་མ་ཡག་ན། །ཁ་འཁྱོགས་སྣ་རྡིབ་བུ་མོ་ན་ཆུང་བཞིན། །དེ་ཕྱིར་རྩོམ་དང་ཡིག་གཟུགས་གཉིས་ཀ་ལ། །ཡན་ལག་ཚང་བར་སྦྱོང་བ་གནད་དུ་ཆེ། །ཞེས་གསུངས་པ་ལྟར་ཡིག་གཟུགས་གལ་གནད་ཆེ་བར་གསུངས་པ་ལྟར། འདིར་བོད་ཡིག་གི་གསལ་བྱེད་སུམ་ཅུའི་སྨྱུག་རིམ་ཀུན་གསལ་དགེ་སློབ་དགྱེས་པའི་སྟོན་མོ་གསལ་བར་བསྟན་པ་ལྟར་འབྲི་གལ་ཆེའོ།།
