༄༅། །ཀུན་གཟིགས་༸རྒྱལ་དབང་ཡབ་སྲས་ཀྱི་འཁྲུངས་རབས་མདོར་བསྡུས་གསོལ་འདེབས་སྨོན་ཚིག་དང་བཅས་པ་བཞུགས་སོ།།   ༄༅། །ཨོཾ་སྭསྟི། བདེ་ལྡན་ཞིང་མགོན་སྣང་བ་མཐའ་ཡས་སྲས། །ས་བཅུའི་དབང་ཕྱུག་ལག་ན་པད་དཀར་འཆང་། །ཐུགས་རྗེའི་སྒྱུ་འཕྲུལ་དཀོན་མཆོག་འབངས་ལ་སོགས། །འཕགས་ཡུལ་རིམ་བྱོན་དམ་པར་གསོལ་བ་འདེབས། །གངས་ཅན་འཛིན་མར་དགེ་བཅུའི་སྣང་བ་དང་། །བསྟན་པའི་སྲོལ་གཏོད་སྲོང་བཙན་ཉིན་མོར་བྱེད། །ཁྲི་སྲོང་ཁྲི་རལ་འབྲོམ་སྟོན་ཆེན་པོ་སོགས། །རྒྱལ་བློན་པཎ་གྲུབ་རྣམས་ལ་གསོལ་བ་འདེབས། །འཇམ་མགོན་བསྟན་སྲོག་དགེ་འདུན་གྲུབ་རྒྱ་མཚོ། །བསོད་ནམས་ཡོན་ཏན་ངག་དབང་བློ་བཟང་དང་། །རིན་ཆེན་ཚངས་དབྱངས་བསྐལ་བཟང་རྒྱ་མཚོའི་མཚན། །ངུར་སྨྲིག་འཆང་བ་རྣམས་ལ་གསོལ་བ་འདེབས། །བློ་བཟང་རྒྱལ་བའི་མདོ་སྔགས་ཆོས་ཚུལ་སོགས། །ཡོངས་རྫོགས་བསྟན་པའི་བདག་པོར་དབང་ཕྱུག་པའི། །གངས་ཅན་མགོན་པོ་འཇམ་དཔལ་རྒྱ་མཚོའི་སྡེ། །མཁན་ཆེན་ཐམས་ཅད་མཁྱེན་པར་གསོལ་བ་འདེབས། །མཆོག་སྤྲུལ་ཉིན་མོར་བྱེད་པའི་སྣང་བ་ཡིས། །འགྲོ་བློའི་མུན་སེལ་རྟག་བརྟན་ཆོས་འཁོར་བསྐོར། །བདག་སོགས་འགྲོ་ཀུན་ཕྱག་ན་པདྨོ་ཡིས། །རྗེས་བཟུངས་བླ་མེད་བྱང་ཆུབ་མྱུར་ཐོབ་ཤོག །

༄༅། །བདག་དང་བདག་གི་ལས་སྐལ་དམན་པའི་མི་སྣ་དང་སྐད་ཡིག རྩོམ་པ་པོ། བཀྲ་ཤིས་དཔལ་ལྡན། གཅིག དོན་དངོས་ཐོག་མི་ཚང་མ་འགལ་བའི་ཕུང་བོ་ལས་གྲུབ་པ་ཡིན་པ་དང་འགལ་ཟླར་གྱུར་ཚུལ་མཚུངས་པ་ཧ་ཅང་དཀོན་པས་བདག་ལའང་བདག་གི་འགལ་དོན་ཡོད་པ་སྨོས་ཅི། ལ་ལས་ད་ཆ་བརྡ་འཕྲིན་གྱི་ནུས་པར་སྣང་ཆུང་བྱེད་རྒྱུ་མེད་ཅེས་དང་། ཡང་ལ་ལས་ཁྱོད་ཀྱིས་རྩོམ་ཡིག་རྒྱ་ཡིག་ཐོག་ནས་འབྲི་དགོས་པ་རེད། དེ་ལྟར་བྱུང་ན་ཀློག་པ་པོ་མང་ལ་སྙན་གྲགས་ཀྱང་འདྲ་གི་མ་རེད་ཟེར། ཁོང་ཚོས་བཤད་པ་ཚང་མར་ནོར་འཁྲུལ་མེད་ཅིང་། ད་ཆ་དབྱངས་བཞི་དང་གསལ་བྱེད་སུམ་ཅུའི་གྲུ་ཤན་ཇི་ལྟར་ལེགས་ཀྱང་རྒྱུ་དང་དབང་གི་མདུན་དུ་འཁྱོལ་ཐབས