Author: ཆུ་དབར་བུ།

དངུལ་ཆུ་དབྱངས་ཅན་གྲུབ་པའི་རྡོ་རྗེ།(༡༨༠༩-༡༨༨༧)   ཐུབ་དབང་ཆོས་ཀྱི་རྗེ་ལ་ཕྱག་འཚལ་ལོ། །གསར་རྙིང་བརྡ་ཡི་བྱེ་བྲག་ལས། །ཅུང་ཟད་ཚིག་ཏུ་བསྒྲིགས་པ་འདི། །ཤེས་ཀྱང་གསུང་རབ་དགོངས་པའི་དོན། །འབྱེད་ལ་བློ་གྲོས་ཡངས་པར་འགྱུར། །སྙམ་ནས་ཕན་པའི་བསམ་པ་ཡིས། །བཀོད་ཀྱི་གཟིགས་དང་འདི་ལྟ་སྟེ། །   བར་དུ་དགེ་བ་གཞུང་གི་དོན།   ཀྭ་ཡེ་ཀྱེ་ཧོ་བོད་པའི་བརྡ། །སྨྲོན་འདྲིན་གྲོགས་ལ་ཕུ་ནུ་སྤུན། །སྡུམ་པ་ཁྱིམ་ལ་བདོག་པ་ནོར། །ཚང་མང་ནག་ཚང་མེ་ཁང་སྟེ། །བྱ་ན་སྐྱུ་རུམ་ཚོད་མའི་མིང༌། །གཞོངས་ནི་ལྗོངས་ལ་ལྗོངས་ནི་ཡུལ། །འདོང་ནི་འགྲོ་ལ་དོང་ནི་སོང༌། །ནང་ནུབ་སྔ་དྲོ་ཕྱི་དྲོ་སྟེ། །ཕྱེམ་རེད་ཕྱི་དྲོའམ་དགོངས་མོའི་མིང༌། །དོག་མ་ས་ལ་གོར་མ་རྡོ། །བསེར་བུ་རླུང་ལ་ཆབ་ནི་ཆུ། །ཞུགས་ནི་མེ་ལ་གཞེས་ནི་བཞུགས། །སྐྱེན་ནི་མགྱོགས་དང་སླ་བའི་མིང༌། །ཉོད་པ་ཟས་ལ་རོད་པ་གོས། །བྱ་དགའ་རྔན་པ་ཕྱུག་རིས་གྲལ། །རིད་ནི་སྐེམ་དང་དངོས་ངན་ཏེ། །སྦྲེབ་ནི་གྲང་བའམ་སྐེམ་པའི་མིང༌། །ཡོལ་གོ་སྣོད་ལ་གཏུར་བུ་ཤུབས། །མ་མཆིས་མེད་ལ་མཆིས་ནི་ཡོད། །

ས་པཎ་ཀུན་དགའ་རྒྱལ་མཚན། (༡༡༨༢-༡༢༥༡) ༄༅། །ཨོཾ་སྭསྟི་སིདྡྷཾ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྒྱ་ཆེན་བློ་ཡི་སྣང་བ་སྐྱེད། །བསམ་ལས་འདས་པའི་ཡོན་ཏན་ཅན། །གསེར་ཞུན་ཉི་མ་འཆར་ཀའི་སྐུ། །འཇམ་དཔལ་མགོན་ལ་ཕྱག་འཚལ་ལོ། །གང་ཞིག་གསུང་རབ་རྣམས་ཀྱི་དོན། །གཏན་ལ་འབེབས་པར་སྨོས་ཅི་འཚལ། །འཇིག་རྟེན་ཕལ་པའི་རྣམ་གཞག་དག །བྱེད་ཀྱང་ཚིག་གི་སྦྱོར་བ་གཅེས། །དེ་སླད་སྔོན་གྱི་མཁས་པ་ཡི། །ལེགས་བཤད་འཐོར་བ་རྣམས་བསྡུས་ཤིང༌། །སྦས་པ་རྣམས་ཀྱང་ཕྱིར་ཕྱུང་ནས། །ཀུན་གྱིས་གོ་བར་བྱ་ཕྱིར་བརྩམས། །འཕྲུལ་ཡིག་སུམ་ཅུ་ཐམ་པ་ལ། །བུ་དང་འདོགས་རྣམས་བཏགས་ནས་ཀྱང༌། །འཕུལ་ཡིག་མཐའ་རྟེན་སྦྱར་བ་ཡིས། །བརྗོད་པ་ཀུན་གྱི་རྟེན་དུ་འགྱུར། །