Author: ཆུ་དབར་བུ།

པོ་ཏ་ལ།   པོ་ཏ་ལ། མཚན་གཞན་ལ་རྩེ་པོ་ཏ་ལ། རྩེ་ཕོ་བྲང་། ཕོ་བྲང་པོ་ཏ་ལ།་ཕོ་བྲང་དམར་པོ། རི་བོ་གྲུ་འཛིན་སོགས་མཚན་གྱི་རྣམ་གྲངས་མང་།  པོ་ཏ་ལ་ནི་ལེགས་སྦྱར་གྱི་སྐད་ཡིན་པས་འཕགས་པ་སྤྱན་རས་གཟིགས་ཀྱི་ཞིང་ཁམས་ལ་རི་བོ་པོ་ཏ་ལའམ་བོད་སྐད་དུ་རི་བོ་གྲུ་འཛིན་ཞེས་ཞུ་བས། ཆོས་རྒྱལ་སྲོང་བཙན་སྒམ་པོས་གནས་འདིར་སྒྲུབ་པ་མཛད་པའམ་ཆོས་རྒྱལ་ཉིད་སྤྱན་རས་གཟིགས་ཀྱི་རྣམ་སྤྲུལ་ཡིན་ཞེས་ཞུ་བས་ཕོ་བྲང་གི་མཚན་ལའང་སྤྱན་རས་གཟིགས་གྱི་ཕོ་བྲང་གི་མཚན་གསོལ་བ་ཡིན་། གང་ཉིད་ལྷ་སར་མ་འབྱོར་གོང་ནས་ཕོ་བྲང་འདི་རྒྱང་ནས་མཇལ་ཐུབ་ལ་གྲོང་ཁྱེར་ནང་ནས་ཀྱང་ཨར་ལས་འཛུགས་སྐྲུན་གང་གིས་ཀྱང་སྒྲིབ་མ་ཐུབ་པར་ཕྱོགས་གང་ས་ནས་མཇལ་ཐུབ་ལ་གང་ནས་མཇལ་ཀྱང་བཟོ་བཀོད་ཤིན་ཏུ་ལིགས་པ་ཡོད་ཕོ་བྲང་དེ་ནི་སྤྱི་ལོའི་དུས་རབས་བདུན་པར་བོད་རྒྱལ་སོ་གསུམ་པ་སྲོང་བཙན་སྒམ་པོས་འཐའ་བཞིའི་རྒྱལ་ཁག་དབང་བསྡུས་ནས་བོད་གོང་བུ་གཅིག་ཏུ་གྱུར་གནང་རྗེས་སྤྱི་ལོ་༦༣༡ལོར་ཕོ་བྲར་བྱམས་པ་མི་འགྱུར་གླིང་(མལ་གྲོ་གུང་དཀར་རྫོང་ཁོངས་བརྒྱ་མ་ཞེས་པར་རྒྱལ་པོའི་སྐུ་མཁར་ཞེས་པ་)ནས་དབུ་རུ་སྐྱིད་ཤོད་ལྷ་སར་ཕེབས་ཏེ་དམར་པོ་རིའི་སྟེད་དུ་ཕོ་བྲང་གཟིམས་ཁང་དཀར་པོ་བཞེངས་ཞེས་གསུངས།

མེ་ཏོག་རྫོང་ནི་བོད་རང་སྐྱོང་ལྗོངས་ཟེར་བའི་ཤར་ལྷོའི་མཚམས་དང་།ཉིང་ཁྲི་གྲོང་ཁྱེར་གྱི་ཤར་ལྷོའི་རྒྱུད། ཡར་ཀླུང་གཙང་པོའི་སྨད་རྒྱུད། ཧི་མ་ལ་ཡའི་རི་རྒྱུད་ཤར་མ་དང་གངས་རི་དཀར་པོའི་ནུབ་ལའི་རི་རྒྱུད་དུ་གནས་ཡོད། ས་ཁོངས་ཧ་ལམ་སའི་གོ་ལའི་བྱང་གི་འཕྲེད་ཐིག27°34′ནས29°56′དང་ཤར་གྱི་གཞུང་ཐིག93°46′ནས96°05′ཐོག་ཏུ་གནས་ཡོད། རྫོང་སྲིད་གཞུང་གི་གནས་ཡུལ་མེ་ཏོག་གྲོང་རྡལ་ནི་ཧ་ལམ་སའི་གོ་ལའི་བྱང་གི་འཕྲེད་ཐིག29°19′དང་ཤར་གྱི་གཞུང་ཐིག95°19′ཐོག་ཏུ་གནས་ཡོད་ཅིང་། ས་ཁོངས་ཧྲིལ་པོའི་ཤར་ནུབ་ཀྱི་ཞེང་ཚད་ལ་སྤྱི་ལེ227དང་ལྷོ་བྱང་གི་རིང་ཚད་ལ་སྤྱི་ལེ262ཙམ་ཡོད།

གཙང་གི་གཞས་པ་ནོར་བུ་ལགས་ནི་སྤྱི་ལོ་1979ལོར་གཞིས་རྩེ་གྲོང་ཁྱེར་བཞད་མཐོང་སྨོན་རྫོང་ཁོངས་རྟ་ནག་མདའ་ཤང་གི་ཞིང་པ་དཀྱུས་མའི་ཁྱིམ་ཚང་ཞིག་ཏུ་སྐྱེས་ཤིང་། ནོར་བུ་ལགས་ལོ་ན་ལྔ་དྲུག་ཙམ་ལ་སོན་དུས་ནས་ཁོང་གི་པཱ་ལགས་ཀྱིས་གླིང་བུ་གཏོང་བ་དང་ཨ་མ་ལགས་ཀྱིས་ཞབས་བྲོ་བསྐྱོན་ཏེ་གྲོང་ཚོའི་ནང་དང་གྲོང་མི་ཁྱིམ་མཚེས་ཚོར་གཟིགས་མོ་འབུལ་གྱི་ཡོད་པས། མི་ཚང་མས་ཁོང་བཟའ་ཚོ་གཉིས་ནི་སྒྱུ་རྩལ་ལ་མཁས་ཤིང་སྣང་བ་སྤྲོ་པོ་ཡོད་པ་ཞིག་ཏུ་བརྩི་གི་ཡོད་ལ། ཁྱད་པར་དུ་དགུན་དུས་ལོ་གསར་དང་། དབྱར་དུས་འོང་སྐོར་སོགས་དུས་སྟོན་ཆེ་གྲས་ཀྱི་སྐབས། ནོར་བུ་ལགས་ཀྱི་ཕ་མ་གཉིས་ཀྱིས་རྒྱ་ཁྱོན་སྤྱི་ཁྲེ་ངོས་གྲུ་ཉིས་བརྒྱ་ལྷག་ཙམ་གྱི་སྒོ་རའི་གཡབ་འོག་ཏུ་ཞབས་གཞས་འཁྲབ་སྟོན་བྱེད་ཀྱི་ཡོད་སྟབས། གྲོང་ཚོའི་མི་ཚོགས་དེ་གར་འཛོམས་ས་ཞིག་ཏུ་གྱུར་མྱོང་། འདི་དག་གིས་ཁོང་གི་སེམས་ལ་སྒྱུ་རྩལ་གྱི་ཤུགས་རྐྱེན་བཟང་པོ་ཐེབས།

༄༅། །ཨྃསྭསྟི། དང་པོའི་སངས་རྒྱས་རྒྱལ་བ་རབས་བདུན་དང་། །རིགས་ལྡན་ཉེར་ལྔ་སྟོབས་ལྡན་འཁོར་ལོ་ཆེར། ། སྙིང་ནས་འདུད་དོ་འདི་ནས་འཕོས་མ་ཐག །ཞིང་མཆོག་ཤམྦྷ་ལ་རུ་དྲང་དུ་གསོལ།། ༈ ན་མོ་ལོ་ཀེ་ཤྭ་རཱ་ཡ། ཧྲི༔  འཇིག་རྟེན་མགོན་པོ་བླ་མ་སྤྱན་རས་གཟིགས། །བདག་སོགས་ལས་ངན་རིགས་དྲུག་སེམས་ཅན་རྣམས། །གཅིག་ལ་གཅིག་གནོད་བསམ་སྤྱོར་ཞི་བ་དང་། །ཕན་ཚུན་དག་སྣང་འབྱོངས་པར་བྱིན་གྱིས་རློབས། དེ་ཡང་། བདག་ཉིད་བྲག་སྐྱ་སེང་བདེ་ཕྲུག་ཅེས་བྱ་བའི་དབེན་གནས་ཤིག་ན། མཚན་དུས་དགེ་སྦྱོར་གྱི་རྒྱུན་ལ་ཅུང་ཟད་གནས་པའི་ཚེ། ནམ་སྲོད་ཙམ་ལ་སྤྱིལ་བུའི་ནང་དུ་སྔོན་མེད་ཚིག་ཚོབ་དང་། ཐོ་ཅོའི་སྒྲ་ཆེན་པོ་ཞིག་བྱུང་བས་ཅི་ཡིན། སྔར་ངའི་གནས་འདི་དབེན་ཞིང་སོས་བསོད་པ་ལ། ད་རེས་ནི་ཐུག་ཆོམ་དང་འ་འུར་གྱི་སྒྲ་ཆེན་པོ་དེ་ཅི་རང་ཡིན། སྒོམ་ཆེན་མཆོད་སྡོར་ཞན་པས་རླུང་ལངས་པ་ཡིན་ནམ། ཆོམ་རྐུན་དང་ལྷ་འདྲེའི་འཕྲུལ་ཞིག་ཡིན་ནམ། དགེ་སྦྱོར་གྱི་འཕྲོ་ཡང་སྟོར། ཅུང་ཞིག་ཧར་ཏེ་ལུས་བྱུང་།

རོང་སྟོན་སྨྲ་བའི་སེངྒེས་ (1367-1449) མཛད་པའི་བྱ་རྒོད་ཕུང་པོའི་རི་བོ་ལ་བསྟོད་པ་སྙན་པའི་སྒྲ་དབྱངས[1]། ངག་གི་དབང་ཕྱུག་ལ་ཕྱག་འཚལ་ལོ། །བཅོམ་ལྡན་གང་དུ་བཞུགས་པའི་གནས་མཆོག་ལ། །བསྟོད་པ་ཙམ་གྱིས་བསོད་ནམས་དཔག་མེད་དག །ཐོབ་པར་འགྱུར་ཞེས་བཤད་པའི་རྗེས་འབྲངས་ནས། །དམ་ཆོས་གསུངས་པའི་གནས་ལ་བསྟོད་པར་བགྱི། །རྒྱལ་བས་ལེགས་གསུངས་བཀའ་ཡི་བསྡུ་བའི་གནས། །ལག་མཐིལ་ལྟར་མཉམ་བཀྲ་ཤིས་ཕུན་ཚོགས་ལྡན། །རི་ཕྲན་དུ་མས་ཡོངས་སུ་བསྐོར་བའི་དབུས། །རྒྱལ་པོའི་ཁབ་ཅེས་བྱ་བའི་གྲོང་ཁྱེར་གྱི། །ཤར་གྱི་ཕྱོགས་སུ་མངོན་པར་མཐོ་བའི་རི། །ཉི་མ་བཞིན་དུ་གཟི་བརྗིད་ཕུན་ཚོགས་ལྡན། །ས་འཛིན་ངོགས་རྣམས་ནགས་ཚལ་སྟུག་པོས་འཁྲིགས། །ལྗོན་ཤིང་ཡིད་འོང་ལོ་འདབ་གསར་པ་ཅན། །ཁ་དོག་སྣ་ཚོགས་མེ་ཏོག་ཐོད་བཅིངས་ནས། །སྙན་པའི་སྒྲ་འབྱིན་བྱ་ཚོགས་མང་པོ་དག །ཡལ་གའི་ཕྱོགས་སུ་ཕན་ཚུན་འཕུར་ལྡིང་བྱེད། །འཛམ་གླིང་ངོ་མཚར་ཆེ་བའི་གནས་ལྔ་ལས། །མཆོག་ཏུ་གྱུར་པ་བྱ་རྒོད་ཕུང་པོའི་རི། །རྒྱལ་དང་རྒྱལ་སྲས་རྣམས་ཀྱིས་བསྟོད་བྱེད་པ། །བཅོམ་ལྡན་འདས་ཀྱི་ཆོས་འཁོར་བསྐོར་བའི་གནས། །དཔག་མེད་བྱིན་རླབས་གཟི་བརྗིད་འབར་བ་ཅན། །ལམ་ཕྲན་བསྟན་ཞེས་བྱ་བའི་གནས་བརྟན་ལ། །དགྲ་བཅོམ་སྟོང་དང་དྲུག་བརྒྱས་བསྐོར་བ་བཞུགས། །གང་གིས་འདི་ནི་མཐོང་བ་ཙམ་གྱིས་ཀྱང༌། །དང་བའི་དད་པ་ལྷུན་གྱིས་གྲུབ་པ་འབྱུང༌། །དཔག་ཡས་ལྷ་ཚོགས་དུ་མ་འདུས་པའི་གནས། །རྒྱལ་བས་ཤེར་ཕྱིན་འབྲུག་གི་སྒྲ་དབྱངས་བསྒྲགས། །གདུལ་བྱ་དུ་མ་བདེན་པ་མཐོང་བ་ལ། །བཀོད་པའི་གནས་མཆོག་ངོ་མཚར་རྨད་དུ་བྱུང༌། །ལེགས་གསུངས་ཉན་པའི་སླད་དུ་རྒྱལ་སྲས་རྣམས། །ཉེ་བར་ལྷགས་ནས་བྱིན་གྱིས་བརླབས་པའི་གནས། །གནས་མཆོག་འདི་ལ་བསྟོད་པའི་དགེ་ཚོགས་ཀྱིས། །སངས་རྒྱས་ཞིང་དུ་ཐོགས་མེད་བགྲོད་པར་ཤོག །ཅེས་བྱ་རྒོད་ཕུང་པོའི་རི་ལ་བསྟོད་པ་རོང་སྟོན་ཆེན་པོས་ནཱ་ལེནྡྲའི་དགོན་པར་སྦྱར་བའོ།།  །།   [1]…

རོང་སྟོན་སྨྲ་བའི་སེངྒེས་ (1367-1449) མཛད་པའི་རྒྱ་གར་རྡོ་རྗེ་གདན་ལ་བསྟོད་པ་ལས[1]། སངས་རྒྱས་ཀྱི་ཞིང་གི་ཡོན་ཏན་བརྗོད་པ་ཞེས་བྱ་བ། སངས་རྒྱས་ལ་ཕྱག་འཚལ་ལོ། །ཁོར་ཡུག་རྡོ་རྗེ་རྭ་བས་ལེགས་བསྐོར་ཞིང༌། །ཕྱོགས་སུ་རྣམ་པར་རྒྱལ་བའི་གླིང་གི་རྩིབས། །གཙུག་ལག་ཁང་བཟང་བཀོད་པས་རབ་ཏུ་མཛེས། །སོ་སོའི་ནང་དུ་བྱིན་རླབས་གཟི་བརྗིད་ཅན། །ལྷ་ཚོགས་བྱེ་བའི་རྒྱུ་སྐར་རབ་ཏུ་བཀྲམ། །ཡིད་འོང་གྱེན་དུ་འཕགས་པའི་གནྡྷོ་ལ། །དབུས་སུ་བྱིན་རླབས་རབ་འབར་བྱང་ཆུབ་ཤིང༌། །ཡལ་གི་ཁྱོན་ཡངས་ལོ་འདབ་རབ་ཏུ་རྒྱས། །ལྷ་ལྔའི་བདག་ཉིད་ཡལ་ག་ལྔ་པ་ཅན། །གྱེན་དུ་འཐོན་པ་མཐོང་བ་ཙམ་གྱིས་ཀྱང༌། །དང་བའི་དད་པ་སྔོན་མེད་སྐྱེ་བ་དང༌། །རྨད་བྱུང་དྲི་ཞིམ་ཕྱོགས་རྣམས་ཀུན་ལ་ཁྱབ། །བྱང་ཆུབ་ཆེན་པོ་ཡིད་འོང་འཇའ་ཚོན་སྐུ། །བྱང་ཆུབ་ཤིང་ལ་བརྟེན་པ་ཤར་ཕྱོགས་སུ། །རྣམ་པར་གཟིགས་པའི་གཟི་འོད་རབ་འབར་བས། །འགྲོ་བ་དཔག་མེད་བདེ་ལ་འགོད་པར་མཛད། །མངོན་པར་བྱང་ཆུབ་ཚུལ་བསྟན་བདུད་དཔུང་གིས། །འཕངས་པའི་མཚོན་ཆ་མེ་ཏོག་ཆར་པར་གྱུར། །མཁའ་ལ་སྐྱ་རེངས་འཆར་བའི་དུས་ཀྱི་ཚེ། །ཏིང་འཛིན་སྟོབས་ཀྱིས་སྒྲིབ་གཉིས་ཕམ་མཛད་ནས། །མངོན་པར་བྱང་ཆུབ་སྨིན་མཚམས་མཛོད་སྤུ་ལས། །འོད་ཟེར་སྤྲོས་པས་འཇིག་རྟེན་སྣང་མཛད་ཅིང༌། །བྱང་ཆུབ་ཚུལ་བསྟན་ངོ་མཚར་རྡོ་རྗེའི་གདན། །རྫོགས་སངས་གང་དུ་བལྟམས་དང་གནས་ལ་འདུད། །གང་གི་གནས་ལ་ཕྱག་འཚལ་བསོད་ནམས་དག །དཔག་མེད་བཤད་པའི་རྗེས་སུ་ལེགས་འབྲངས་ནས། །མངོན་པར་བྱང་ཆུབ་བསྟན་པའི་གནས་མཆོག་ལ། །བསྟོད་པའི་དགེ་བས་བྱང་ཆུབ་གནས་ཐོབ་ཤོག །ཅེས་རྡོ་རྗེ་གདན་ལ་བསྟོད་པ་རོང་སྟོན་ཆེན་པོས་དཔལ་ནཱ་ལེནྡྲའི་དགོན་པར་སྦྱར་བའོ།། །།   [1] རོང་སྟོན་གསུང་འབུམ་ཐོར་བུ། ༼ཁ༽ དཔེ་གཟུགས། ཤོག་གྲངས་ ༤༥བ༦