སྤེལ་ཞིབ་ཕྲ།
སྐྱབས་རྗེ་བྱ་བྲལ་རིན་པོ་ཆེའི་སྐུ་ཚེའི་མཛད་རྣམ་རེག་ཟིག་ཏུ་བཀོད་པ་ཀེ་ཏ་ཀའི་འབྲས་བུ་ཞེས་བྱ་བ་བཞུགས་སོ།།
དཀར་ཆག མཆོད་བརྗོད་དང་སྔོན་གླེང་། དང་པོ། སྐྱེས་བུ་དམ་པས་ཇི་ལྟར་ལུང་གིས་བསྟན་པའི་ཚུལ། གཉིས་པ། སྐུ་ཕྲེང་ཇི་ལྟར་བྱོན་པའི་ཚུལ་བརྗོད་པ། ༡༽ སྐུ་ཕྲེང་དང་པོ་བྱ་བྲལ་བློ་བཟང་ཆོས་འཕེལ་གྱི་རྣམ་ཐར་མདོར་བསྡུས། ༢༽ སྐུ་ཕྲེང་གཉིས་པ་བྱ་བྲལ་དམ་ཆོས་མཁས་བཙུན་གྱི་རྣམ་ཐར་མདོར་བསྡུས། གསུམ་པ། སྐུ་ཕྲེང་འདི་ཉིད་ཀྱི་སྐུ་ཚེའི་མཛད་པ་དངོས་བརྗོད་པ། ༡༽ སྐུ་ཕྲེང་གསུམ་པ་བྱ་བྲལ་འཇམ་དཔལ་འཕྲིན་ལས་རྒྱ་མཚོ་སྐུ་བལྟམས་པ། ༢༽ གདན་སའི་ཁྲི་ལ་ཕེབས་པ། ༣༽ གཙང་བཀྲ་ཤིས་ལྷུན་པོའི་སྤྲུལ་སྐུ་ཆེ་ཁག་ལ་གཏན་འཁེལ་མཛད་པ། ༤༽ རིག་གསར་གྱི་ཚ་རླབས་དྲག་ཏུ་འཕྱུར་བ།…
བོད་ཀྱི་དགོན་པ་ཐོག་མ་བསམ་ཡས་གཙུག་ལག་ཁང་གི་རྟེན་རྙིང་དང་ལོ་རྒྱུས།
བོད་ལྗོངས་ལྷོ་ཁ་གྲྭ་ནང་རྫོང་གི་ཁུལ་ཡར་ཀླུང་གཙང་པོའི་བྱང་འགྲམ་དུ་གནས་པའི་བསམ་ཡས་གཙུག་ལག་ཁང་ནི་སྤྱི་ལོའི་དུས་རབས་བརྒྱད་པའི་དུས་དཀྱིལ།༼སྤྱི་ལོ༧༤༠༽ལ་བོད་རྒྱལ་གདུང་རབས་སོ་བརྒྱད་པ་རྗེ་བཙུན་འཇམ་དཔལ་དབྱངས་ཀྱི་རྣམ་འཕྲུལ་ཆོས་རྒྱལ་ཁྲི་སྲོང་ལྡེའུ་བཙན་གྱིས་ཡོན་སྦྱར་ནས་ཟ་ཧོར༼ བྷངྒ་ལ་སྡེ་བཞི༽རྒྱལ་བོ་གོ་མ་དེ་བྱིའི་སྲས་འདུལ་བ་འཛིན་པ་མཁན་ཆེན་ཞི་བ་འཚོ་དང་། སློབ་དཔོན་པདྨ་འབྱུང་གནས་གཉིས་གདན་དྲངས་ཏེ་མཁན་སློབ་ཆོས་གསུམ་གྱི་མཛད་ཐབས་ལ་བརྟེན་ནས་རྒྱ་གར་ཨོ་ཏནྟ་པཱུ་རའི་གཙུག་ལག་ཁང་པ་དཔེ་མཛད་དེ་འདུལ་བའི་ལུགས་སུ་གཙུག་ལག་ཁང་དང་།མདོ་སྡེའི་ལུགས་སུ་དཀྱིལ་འཁོར་ཆེན་པོའི་ཚུལ། མངོན་པའི་ལུགས་སུ་རི་རབ་གླིང་བཞི་ཉི་ཟླས་བརྒྱད་པ་དང་བཅས་བཞེངས་པར་མཛད་ཅིང་། གནའ་རབས་ཀྱི་འཛུགས་སྐྲུན་དང་ཐུན་མོང་མ་ཡིན་པའི་ཁྱད་ཆོས་ངོ་མཚར་ལྡན་ཞིང་རྒྱ་གར་རྡོ་རྗེ་གདན་དང་ཆོས་མཚུངས་པའི་བོད་ཀྱི་དགོན་པ་དང་པོ་ཡིན་ལ་ད་བར་ལོ་ངོ་ ༡༢༥༠ ལྷག་ཙམ་ཕྱིན་པའི་བསིལ་ལྡན་ཁ་བའི་ལྗོངས་ཀྱི་སངས་རྒྱས་ཀྱི་བསྟན་པའི་ཆུ་མགོ་དགེ་འདུན་གྱི་སྡེ་ཡི་ཐོག་མ། རྒྱ་གར་འཕགས་པའི་ཡུལ་གྱི་བཀའ་བསྟན་བོད་ལ་བསྒྱུར་ས། འཕགས་བོད་མཁས་གྲུབ་དུ་མས་ཞབས་ཀྱིས་བཅགས་པའི་གདན་ས་། བསྟན་པ་ཕྱི་དར་དུས་ལའང་བྷོ་ཌའི་ལྗོངས་ཀྱི་དཔལ་ལྡན་ས་སྐྱ་པ་དང་།བཀའ་བརྒྱུད་། དགེ་ལུགས་བཅས་ཀྱི་ཆོས་སྲིད་གཉིས་ལྡན་བསྟན་བདག་རྣམས་ཀྱིས་ཉམས་གསོ་དང་། འཛུགས་སྐྲུན་གནང་ནས་ནང་པའི་གྲུབ་མཐའ་ཁག་གི་གཞི་རྟེན་བཙུགས་པ་སོགས་གྲུབ་མཐའ་རིས་མེད་ཀྱི་གདན་ས་ཁྱད་པར་ཅན་ཡིན་པར་མ་ཟད།མདོ་སྔགས་ཐུན་མོང་མ་ཡིན་པའི་ནང་པའི་ཆོས་ལུགས་དང་སྒྲ་དང་ཚད་མ། བཟོ་དང་གསོ་བ་དང་། ན་དང་རྩིས།སྙན་ངག་དང་སྡེབ་སྦྱོར། མངོན་བརྗོད་སོགས་ཐུན་མོང་གི་རིག་གནས་ལ་སོགས་པ་མདོར་ན་ཐུན་མོང་དང་ཐུན་མོང་མ་ཡིན་པའི་བོད་ཀྱི་རིག་གནས་ཀུན་གྱི་འབྱུང་ཁུངས་གནས་ཆེན་ཁྱད་པར་ཅན་འདི་ཡིན་ཞིང་། བཟོ་བཀོད་ཡང་གཙུག་ལག་ཁང་གི་དབུ་རྩེ་རིགས་གསུམ་སྟེ་འོག་ཁང་ལྷ་དང་བཅས་པའི་བཟོ་དབྱིབས་བོད་ལུགས་དང་། བར་ཁང་བཟོ་དབྱིབས་རྒྱ་ནག་ལུགས། སྟེང་ཁང་བཟོ་དབྱིབས་རྒྱ་གར་ལུགས་དང་བཅས་རྒྱ་བོད་འཕགས་ཡུལ་གྱི་འཛུགས་སྐྲུན་ངོ་མཚར་ཁྱད་ཆོས་ལྡན་ཡོད་ཅིང་དེའི་གཡས་གཡོན་དུ་གླིང་བཞི་གླིང་ཕྲན་ཉི་ཟླ་སོགས་ཀྱི་ལྷ་ཁང་ཡོད་ལ།ཕྱོགས་བཞིར་ངོ་མཚར་མཆོད་རྟེན་ཆུང་བ་ ༡༠༢༨ ཕྱི་རོལ་དུ་བཙུན་མོས་བཞེངས་པའི་ཁམས་གསུམ་ཟངས་ཁང་གླིང་༼ཞིག་རྭའི་འབྲུ་ཁང་དང་༽…
གནུབས་སངས་རྒྱས་ཡེ་ཤེས་དང་དེའི་དཔེ་རྙིང་སྐོར།
གནུབས་སངས་རྒྱས་ཡེ་ཤེས་ཀྱིས་ཁེང་ལོག་བར་པ་ཚར་བཅད་པའི་གནས་སྙེ་མོ་བྱེ་མཁར་དང་དེའི་དཔེ་རྙིང་སྐོར་ངོ་སྤྲོད་མདོར་བསྡུས། ཀརྨ་བདེ་ལེགས། དང་པོ་བྱེ་མཁར་དགོན་དང་དེའི་དཔེ་རྙིང་སྐོར། དེ་ཡང་སྤྱི་ལོ་༢༠༠༥ལོའི་ཟླ་༣་ཚེས་༨ལ་སེ་ར་དགོན་པའི་སྐུ་ཞབས་ཆུང་ལྟག་ལགས་དང་། རྒན་ཟླ་བ་བསྟན་འཛིན་ལགས་ངེད་གསུམ་ལྷ་ས་ནས་ཐོན་ཏེ་སྙེ་མོ་བྱེ་མཁར་དུ་དཔེ་རྙིང་སྲུང་སྐྱོབས་ཀྱི་ཆེད་དུ་བསྐྱོད་པ་ཡིན། དགོན་པ་དེའི་མིང་ཆ་ཚང་ལ་བྱེ་མཁར་ཆོས་སྡེ་དགོན་ཞེས་འབོད་ཀྱི་འདུག་ལ། ད་ལྟ་བོ་དོང་ཕྱོགས་ལས་རྣམ་རྒྱལ་གྱི་ཆོས་རྒྱུད་འཛིན་པ་ཞིག་རེད་འདུག་ལ། དགོན་པ་དེའི་གནའ་བོའི་ལོ་རྒྱུས་ཡིག་ཆ་དང་ངག་རྒྱུན་བཤད་རྒྱུ་ཡོད་པ་ནི་གང་ཡང་མི་འདུག [དུས་རབས་བཅུ་དྲུག་པའི་སྟོད་ཙམ་ལ་དགོན་པ་འདིར་བོ་དོང་ཆོས་བརྒྱུད་ཀྱི་བསྟན་པ་བསྐྱངས་ཚུལ་ནི་རྒན་ཟླ་ལགས་ཀྱིས་བྲིས་པ་ལས་གསལ་བས་འདིར་ཡི་གེ་མང་བར་དོགས་ནས་མ་བཀོད]གནུབས་ཀྱི་བཀའ་ཤོག་རྒྱ་བོ་ཆེ་ལས། དེར་ཡང་མ་ཆགས་སྙེ་མོ་བྱེ་མཁར་བཟུང་། ཡུལ་ཁྱིམ་རྫས་ཆ་རོག་བན་སྐྱབས་པས་བསྡུས། །ཉེ་ནས་ཕྱག་ཚང་མྱང་སྨན་འཇམ་དཔལ་བྱས། །དེ་ནས་བོད་བན་བྱེ་མཁར་ནང་ན་མཆིས་པ་ལ། །ཁེང་པོ་དམག་མིའི་རྩ་སྒོར་ཆུ་སྒོར་བཅུག །དེ་ནས་སྙེ་མོ་བྱེ་མཁར་རི་ལོགས་ལ། །ཁེང་པོའི་དམག་མི་གྲོས་བྱེད་མང་པོ་རྣམས། །བོད་བན་གསོད་པའི་མདུན་གྲོས་བྱེད་པ་མཐོང་། ཅེས་པ་སོགས་ནས་མཐར་བདེན་པ་བརྡར་ཏེ་ཆོས་སྐྱོང་བསྐུལ་བས་རི་ལོགས་སུ་མེ་འབར་ནས་ཁེང་པོའི་དམག་མི་རྣམས་བསྒྲལ་བར་གྲགས་པའི་གནས་དེ་ད་ལྟའི་བྱེ་མཁར་ཆོས་སྡེ་དགོན་ཞེས་པ་འདི་ཡིན་འདུག །
ལྷ་སའི་གནའ་ཤུལ་ལོ་རྒྱུས་པདྨའི་དགའ་ཚལ་ཞེས་བྱ་བ་བཞུགས་སོ།།
ལྷ་སར་ཡོད་པའི་གནའ་ཤུལ་གྲགས་ཅན་དང་རིག་གནས་དངོས་རྫས་སོགས་ཚང་མ་ཆོས་དང་ཆབ་སྲིད། དཔལ་འབྱོར། རིག་གནས། ལོ་རྒྱུས། ཡུལ་སྲོལ་གོམས་གཤིས་དང་འབྲེལ་པ་ཆེན་པོ་ཡོད། དེས་ན་གནའ་བོའི་གྲོང་ཁྱེར་ལྷ་སའི་གནའ་ཤུལ་པད་མའི་དགའ་ཚལ་ཞེས་བྱ་བ་དེ་བྲིས་ནས་ལྷ་སའི་གནའ་ཤུལ་གྲགས་ཅན་ཁག་གི་ལོ་རྒྱུས་ཞིབ་པ་ནི་རང་ཉིད་རྣམ་དཔྱོད་ཀྱི་འཇུག་སྒོ་དམན་པས་འབྲི་ག་ལ་ནུས་ཀྱང་། རྒྱ་ཆེའི་ཀློག་པ་པོ་ཚོར་གོ་བདེ་བའི་ཆེད་དུ་གཅིག་བསྡུས་ཙམ་ཞིག་བྲིས། དེ་ཡི་ལོ་ཁམས། གནས་ཡུལ། ཕྱག་འདེབས་མཁན། སྐུ་གསུང་ཐུགས་རྟེན། དར་རྒྱས་མཛད་པ་པ་པོ་སོགས་ཚང་མ་མཁས་དབང་དག་གིས་མཛད་པའི་ཆོས་འབྱུང་དང་རྒྱལ་རབས་དེབ་ཐེར་ཁུངས་ལྡན་ཡིག་ཆ་དག་ལ་དཔང་པོ་བྱས་ཏེ་བྲིས་པས། ཚིག་སྦྱོར་བརྡ་དག་སོགས་ལ་ཞན་ཁ་ཡོད་ནའང་བརྗོད་བྱ་དོན་ལ་འཁྲུལ་བ་མེད་སྙམ་ཡིན་ནའང་རང་ལུགས་དག་པོའོ་ཞེས་ཁ་ཚོན་གཅོད་ག་ལ་ནུས་པས། ད་རེས་སྐལ་པ་བཟང་པོའི་གོ་སྐབས་དེ་ཐོབ་ནས་དེབ་ཆུང་འདི་རྒྱ་ཆེའི་ཀློག་པ་པོ་དང་མཁས་དབང་རྣམས་ལ་སྤྱན་ཞུས་ཕུལ་ནས། དགྱེས་ཚོར་ཆེན་པོས་གཟིགས་ཞིབ་དང་དམན་པ་བདག་ལ་སྨན་པའི་བཀའ་བཅོས་ལྷུག་པོར་བསྩལ་རྒྱུའི་རེ་བ་དང་བཅས་སོ།
པོ་ཏ་ལ་དང་། ར་མོ་ཆེ། ཚེ་དཔག་ལྷ་ཁང་། རྒྱུད་སྨད་བཅས་ཀྱི་གནས་ཡིག
པོ་ཏ་ལ། པོ་ཏ་ལ། མཚན་གཞན་ལ་རྩེ་པོ་ཏ་ལ། རྩེ་ཕོ་བྲང་། ཕོ་བྲང་པོ་ཏ་ལ།་ཕོ་བྲང་དམར་པོ། རི་བོ་གྲུ་འཛིན་སོགས་མཚན་གྱི་རྣམ་གྲངས་མང་། པོ་ཏ་ལ་ནི་ལེགས་སྦྱར་གྱི་སྐད་ཡིན་པས་འཕགས་པ་སྤྱན་རས་གཟིགས་ཀྱི་ཞིང་ཁམས་ལ་རི་བོ་པོ་ཏ་ལའམ་བོད་སྐད་དུ་རི་བོ་གྲུ་འཛིན་ཞེས་ཞུ་བས། ཆོས་རྒྱལ་སྲོང་བཙན་སྒམ་པོས་གནས་འདིར་སྒྲུབ་པ་མཛད་པའམ་ཆོས་རྒྱལ་ཉིད་སྤྱན་རས་གཟིགས་ཀྱི་རྣམ་སྤྲུལ་ཡིན་ཞེས་ཞུ་བས་ཕོ་བྲང་གི་མཚན་ལའང་སྤྱན་རས་གཟིགས་གྱི་ཕོ་བྲང་གི་མཚན་གསོལ་བ་ཡིན་། གང་ཉིད་ལྷ་སར་མ་འབྱོར་གོང་ནས་ཕོ་བྲང་འདི་རྒྱང་ནས་མཇལ་ཐུབ་ལ་གྲོང་ཁྱེར་ནང་ནས་ཀྱང་ཨར་ལས་འཛུགས་སྐྲུན་གང་གིས་ཀྱང་སྒྲིབ་མ་ཐུབ་པར་ཕྱོགས་གང་ས་ནས་མཇལ་ཐུབ་ལ་གང་ནས་མཇལ་ཀྱང་བཟོ་བཀོད་ཤིན་ཏུ་ལིགས་པ་ཡོད་ཕོ་བྲང་དེ་ནི་སྤྱི་ལོའི་དུས་རབས་བདུན་པར་བོད་རྒྱལ་སོ་གསུམ་པ་སྲོང་བཙན་སྒམ་པོས་འཐའ་བཞིའི་རྒྱལ་ཁག་དབང་བསྡུས་ནས་བོད་གོང་བུ་གཅིག་ཏུ་གྱུར་གནང་རྗེས་སྤྱི་ལོ་༦༣༡ལོར་ཕོ་བྲར་བྱམས་པ་མི་འགྱུར་གླིང་(མལ་གྲོ་གུང་དཀར་རྫོང་ཁོངས་བརྒྱ་མ་ཞེས་པར་རྒྱལ་པོའི་སྐུ་མཁར་ཞེས་པ་)ནས་དབུ་རུ་སྐྱིད་ཤོད་ལྷ་སར་ཕེབས་ཏེ་དམར་པོ་རིའི་སྟེད་དུ་ཕོ་བྲང་གཟིམས་ཁང་དཀར་པོ་བཞེངས་ཞེས་གསུངས།
ཀོང་པོ་གཡུང་དྲུང་འཛིན་གྱི་བཀའ་གཙིགས་རྡོ་བརྐོས། ཁག་གཉིས།
དང་པོ། བཀའ་གཙིགས་རྡོ་བརྐོས། ཀོང་པོ་ཉིང་ཁྲི་རྫོང་ངམ་དེང་གི་བྲག་ཡིབ་ཁུལ་སྨན་རི་ཡུལ་ཚོའི་གཡུང་དྲུང་འཛིན་གྲོང་ཚོའི་ཞིང་ཁར་བཙན་པོའི་དུས་ཀྱི་བཀའ་གཙིགས་རྡོ་བརྐོས་ཤིག་ཡོད། གྲོང་པ་དེར་གཡུང་དྲུང་འཛིན་ཟེར་བས་བྲག་བརྐོས་བཀའ་གཙིགས་དེར་ཡང་དེང་སྐབས་གཡུང་དྲུང་འཛིན་གྱི་བཀའ་གཙིགས་ཞེས་ཞིབ་འཇུག་སྡེ་ཁག་དག་གིས་འབོད། ང་ཚོ་ཞོགས་པ་དེར་ཀོང་པོ་སྨན་ལུང་དུ་སོང་ནས་ཕྱིར་སྨན་གླིང་རྫོང་བརྒྱུད་ཀོང་ཆུ་དང་། ཡར་ཀླུང་གཙང་བོ་འདྲེས་མཚམས་ནས་ཀོང་པོ་བོན་རི་དང་། ཀོང་པོ་ཆུ་ཇོ་བོ་སོགས་ཀྱི་ཕྱོགས་སུ་བསྐྱོད་པའི་ལམ་བར་ནས་བཀའ་གཙིགས་རྡོ་བརྐོས་དེ་གང་དུ་ཡོད་མེད་ལ་སྐད་ཆ་འདྲི་འགོ་ཚུགས། ད་སྔོན་ཞིབ་འཇུག་པ་མང་པོས་བཀའ་གཙིགས་དེར་”དེ་མོའི་བྲག་བརྐོས་”དང་། “དེ་མོའི་རྡོ་རིང་”སོགས་ཀྱི་མིང་གིས་བསྙད་པ་བཞིན་ང་ཚོས་ཀྱང་དེ་མོའི་རྡོ་རིང་ཡོད་ས་གང་ཡིན་དྲིས་པར། ཕོ་སར་ཞིག་གིས། “ཨ་ཅ་རྒྱ་བཟའི་རྡོ་རིང་ཨེ་རེད། དེ་ངེད་ཚང་གི་ཁང་རྒྱབ་ཏུ་ཡོད། དེ་མིན་གཞན་མི་ཤེས་”ཟེར། དེ་ནས་ཡང་བུད་མེད་ཅིག་ལ་དྲིས་པས། མོས་ཀྱང་”ང་ཚོའི་ཨ་ཅ་རྒྱ་བཟའི་རྡོ་རིང་ཟེར་བ་རེད། གཤམ་གྱི་གྲོང་པའི་ནང་དུ་ཡོད་པས་དེ་ཡིན་ན་སྐད་ཆ་དྲིས་དང་ཤེས་ཡོང་”ཟེར།