སྤེལ་ཞིབ་ཕྲ།
རྭ་ཁ་བྲག་དང་། གནས་སྒོ་གདོང་། ཕུར་བུ་ལྕོག དགོན་པ་གསར་རི་ཁྲོད། ནོར་བུ་གླིང་ག་བཅས་ངོ་སྤྲོད།
རྭ་ཁ་བྲག རྭ་ཁ་བྲག་ནི། ཀེའུ་ཚང་ནུབ་ནས་ཆུ་ཚོད་སྐར་བཅུ་གྲངས་ཙམ་གྱེན་དུ་འཛེགས་ན་རི་ཁྲོད་དེར་སླེབས། རི་ཁྲོད་དེ་ནི། སྤྱི་ལོའི་དུས་རབས་14པར་རྗེ་ཙོང་ཁ་པས་ཕྱག་བཏབ་གནང་མཛད་《དྲང་ངེས་ལེགས་བཤད་སྙིང་པོ》དག་གནས་མཛད། གཡས་གཡོན་དུ་མཁས་གྲུབ་རྗེ་དང། རྒྱལ་ཚབ་རྗེའི་སྒྲུབ་ཕུག་ཀྱང་ཡོད། རྭ་ཁ་བྲག་ཅེས་པ་ནི། རྗེ་ཙོང་ཁ་པར་གོང་མ་ཏཱ་མིང་གི་གདན་ཞུ་འབྱོར་བར། རྗེ་ཙོང་ཁ་པས་གོང་མའི་ཕོ་ཉ་གཡོལ་བའི་ཆེད་དུ་རི་ཁྲོད་དེའི་ནུབ་ངོས་རི་སྟེང་དུ་བྲག་རི་གཡང་གཟར་ཅན་ཞིག་ཡོད་པ་དེའི་ནང་དུ་སྐུ་མཚམས་སུ་བཞུགས། དམ་ཅན་ཆོས་རྒྱལ་གྱི་རྗེ་ཙོང་ཁ་པའི་རྗེས་སྙེགས་ཏེ་འོང་བས་གནས་དེར་སླེབས་སྐབས་བྲག་རི་སྒོ་མེད་དེཡི་ནང་བཞུགས་ཡོད་པ་ཤེས་ཏེ་བྲག་རི་དེའི་གཤམ་དུ་དབུ་རྭ་བརྡར་ཤུལ་དང ། དེ་ནས་བྲག་བཤགས་ཏེ་རྗེ་ཙོང་ཁ་པ་མཇལ་སྟབས་རྭ་ཁ་བྲག་ཅེས་པའི་མཚན་དེ་ལྟར་བྱུང་གསུངས། དེ་ནས་རྗེ་ཙོང་ཁ་པ་སྐུ་གཤེགས་པའི་ཕྱི་ལོ་སྟེ་1420ལོར་བྱམས་ཆེན་ཆོས་རྗེས་དགའ་ལྡན་ལྔ་མཆོད་དང་པོ་སྟེ་རྗེའི་དགོངས་རྫོགས་དང་པོ་དེ་གནས་དེར་གཏར་གནང་མཛད། ལྔ་མཆོད་ཁང་ཞེས་པའི་ལྷ་ཁང་དེའང་དེ་ལྟར་བྱུང། དེ་རྗེས་སྒྲུབ་ཁང་དགེ་ལེགས་རྒྱ་མཚོ་ནས་ཨ་དགའ་བསོད་ནམས་བཟང་པོ་སོགས་ཀྱིས་བསྐྱངས། སྔོན་དགེ་འདུན་ཞལ་གྲངས་བཅུ་དགུ་ཙམ་ཡོད། སེ་ར་སྒྲུབ་ཁང་རྩེའི་ཁོངས་ཡིན། ད་ལྟ་གསར་བཞེངས་གནང་བའི་སྒྲུབ་ཁང་ནང་ཡེ་གེ་ཨའི་རང་བྱོན་དང། སྔོན་གྱི་སྒྲུབ་ཕུག་ཁག་དང་སྐུ་བརྙན་གསར་བཞེངས་གནང་བ་སོགས་མཇལ་རྒྱུ་ཡོད།
བཀའ་བརྒྱུད་པའི་གདན་ས་སྤར་ཕུ་རིན་ཆེན་གླིང་།
བཀའ་བརྒྱུད་པའི་གདན་ས་སྤར་ཕུ་རིན་ཆེན་གླིང་ནི། སྟོད་ལུང་བདེ་ཆེན་རྫོང་ནས་ནུབ་ངོས་སྣུམ་ནག་འཁོར་ལམ་བརྒྱུད་དེ་སྤྱི་ལེ་བཞི་ཙམ་བསྐྱོད་ན་འཁོར་ལམ་དང་ཅུང་ཉེ་བའི་ལྷོ་ངོས་ན་༸རྒྱལ་དབང་སྐུ་ཕྲེང་གསུམ་པ་བསོད་ནམས་རྒྱ་མཚོ་མཆོག་འཁྲུངས་ཁང་ཆོས་ཁང་དམར་པོ་ཞེས་པ་དང་། དེ་ནས་མུ་མཐུད་སྤྱི་ལེ་བཅུ་གཅིག་ཙམ་སོང་ན་སྣང་རྩེ་སྐུ་འབུམ་མམ་དབུ་མགུལ་མཆོད་རྟེན་ཞེས་མི་དབང་སྡེ་སྲིད་སངས་རྒྱས་རྒྱ་མཚོ་མཆོག་གི་དབུ་ཤོར་སའི་མཆོད་རྟེན་གསར་བཞེངས་གནང་བ་དང་། དེ་དང་ཉེ་བའི་ནུབ་ངོས་སུ་སྣང་རྩེ་རྒྱལ་ཁང་ཞེས་པའང་ཡོད་པ་དེ་ནས་མུ་མཐུད་སྤྱི་ལེ་ལྔ་ཙམ་སོང་ན་ལུམ་པ་ཟམ་པར་འབྱོར།
བཙན་པོ་ཁྲི་ལྡེ་སྲོང་བཙན་གྱི་ཐུགས་དམ་བླ་འབུམ་ངོ་སྤྲོད།
བཙན་པོ་ཁྲི་ལྡེ་སྲོང་བཙན་གྱི་ཐུགས་དམ་བླ་འབུམ་སྐོར་ངོ་སྤྲོད་ཞུ་བ། རྩོམ་པ་པོ། སྐ་བ་ཤེས་རབ་བཟང་པོ། དང་པོ། སྤྱི་བཤད། གཅིག བླ་འབུམ་གྱི་གོ་དོན། དེ་ཡང་བཙན་པོའི་དུས་ཀྱི་ཆོས་རྒྱལ་སྲོང་བཙན་སྒམ་པོ་ནས་བཙན་པོ་དར་མ་འུ་དུམ་བཙན་བར་སངས་རྒྱས་ཆོས་ལུགས་དར་བའི་ལོ་བརྒྱ་ཙམ་ནང་། ད་ཆ་མཇལ་རྒྱུ་ཡོད་པའི་བཀའ་དང་བསྟན་བཅོས་རྒྱ་ཁྱབ་ངང་ཡོངས་སུ་བསྒྱུར་བའི་དུས་ཚོད་ནི་མངའ་བདག་ཁྲི་སྲོང་ལྡེ་བཙན་གྱི་སྤྱི་ལོའི་དུས་རབས་དགུ་པའི་དུས་དཀྱིལ་ནས་མངའ་བདག་ཁྲི་གཙུག་ལྡེ་བཙན་གྱི་སྤྱི་ལོའི་དུས་རབས་བཅུ་པའི་དུས་དཀྱིལ་བར་གྱི་ལོ་བརྒྱ་བར་གྱི་དུས་ཚོད་ནང་ཡིན་པ་དང་། སངས་རྒྱས་ཆོས་ལུགས་ཀྱི་བཀའ་དང་བསྟན་བཅོས་དུ་མ་བསྒྱུར་བ་ལས་བཙན་པོས་ཐུགས་སྣང་དང་དོ་འཁུར་ཆེ་བཞེས་ཀྱིས་གནད་དམ་པར་བཟུང་ནས་བསྒྱུར་བཅོས་ལན་མང་གནང་ཞིང་གླེགས་བམ་ཐུགས་དམ་དུ་བཞེངས་པ་མང་ཤོས་ནི་ཤེར་ཕྱིན་སྟོང་ཕྲག་བརྒྱ་པའམ་ཡུམ་རྒྱས་པ་འདི་ཡིན་གཤིས། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའམ་ཕྱིས་སུ་ཤེར་ཕྱིན་ཡུམ་དུ་གྲགས་པ་འདི་ནི་སྟོན་པ་བཅོམ་ལྡན་འདས་ཀྱིས་གསུངས་པའི་ཆོས་ལས་བཀའ་བར་བ་མཚན་ཉིད་མེད་པའི་ཆོས་འཁོར་སྐབས་གསུངས་པའི་ཆོས་རྒྱལ་བའི་ཡུམ་དུ་གྲགས་པ་དེ་ཡིན།
བླ་མ་ཡེ་ཤེས་འོད་ཡབ་སྲས་ཀྱི་སྐུ་དུས་སུ་བཞེངས་པའི་རྡོ་རིང་།
བླ་མ་ཡེ་ཤེས་འོད་ཡབ་སྲས་སྐུ་དུས་སུ་བཞེངས་པའི་སྤུའམ་དཀོར་གྱི་རྡོ་རིང་རགས་ཙམ་གླེང་བ། རྡོ་རྡོ། [ནང་དོན་གནད་བསྡུས] དཔྱད་རྩོམ་འདིར་མིག་སྔར་གསར་དུ་རྙེད་པའི་ལྷ་བླ་མ་ཡེ་ཤེས་འོད་ཡབ་སྲས་སྐུ་དུས་སུ་བཞེངས་པའི་སྤུའམ་དཀོར་གྱི་རྡོ་རིང་ངོ་སྤྲོད་དང་རྡོ་རིང་ངོས་ཀྱི་ལོ་ཚིགས། རྡོ་རིང་བཞེངས་མཁན་དང་བཞེངས་སྟངས། བཞེངས་པའི་དམིགས་ཡུལ་བཅས་གླེང་ཡོད། [བརྡ་ཆད་གཙོ་བོ] ལྷ་བླ་མ་ཡེ་ཤེས་འོད་ཡབ་སྲས། སྤུའམ་དཀོར། རྡོ་རིང་། ལྷ་བླ་མ་ཡབ་སྲས་དུས་ཀྱི་རྡོ་རིང་འདི་ནི་རྒན་ཤ་བོ་མཁའ་བྱམས་ལགས་ཀྱིས་2015ལོའི་བོད་ལྗོངས་སློབ་གྲྭ་ཆེན་མོའི་རིག་གཞུང་དུས་དེབ་གསུམ་པའི་འགོ་ཤོག་སྟེང་འདྲ་པར་དང་བཅས་ངོ་སྤྲོད་ཐུང་ངུ་ཙམ་བཀོད་ཡོད། རྡོ་རིང་ངོས་སུ་ལྷ་བླ་མ་ཡེ་ཤེས་འོད་ཀྱི་མཚན་དང་ལོ་ཚིགས། ས་མིང་བཅས་ཐོན་ཡོད་ལ། རྡོ་རིང་བཟོ་བཀོད་ཀྱི་ཁྱད་ཆོས་དང་ཡེ་གེའི་འབྲི་སྟངས། ནང་དོན་སོགས་ཕྱོགས་འགས་སྐབས་དེའི་རྡོ་རིང་གི་ཁྱད་ཆོས་དང་སྤྱི་ཚོགས་ཀྱི་རྣམ་པ། དེ་མིན་བོད་ཀྱི་ཆོས་འབྱུང་ལོ་རྒྱུས་མང་པོའི་ཁྲོད་ན་ག་ར་ཛ་དང་དེ་བ་ར་ཛ་གཉིས་ལྷ་བླ་མ་ཡེ་འོད་ཀྱི་སྲས་མིན་པར་ཁོ་རེའི་སྲས་ཡིན་ཚུལ་བརྗོད་པའི་ལྟ་ཚུལ་དེའང་ཡོ་བསྲང་བྱེད་ཐུབ་པ་དང་། རྡོ་རིང་འདིར་བོད་ཡིག་ངོས་ནས་དཔྱད་བརྗོད་གནངས་པ་མེད་ཚོས་འདུག་པས། དེར་ཅུང་ཟད་དཔྱད་པར་བྱ་བ་ལ།
བོད་རྒྱལ་གྱི་བང་སོ་ཐོག་མ་དང་། ཀོང་ཡུལ་བྲེ་སྣ། ཀོང་པོ་ཀླུ་ནང་བཅས་ངོ་སྤྲོད།
བོད་རྒྱལ་གྱི་བང་སོ་ཐོག་མ། དམུ་ཡུལ་སྐྱིད་ཐང་ངམ་མི་ཡུལ་སྐྱིད་མཐིང་ཟེར་བ་ནི་བྲག་ཡིབ་གྲོང་ཁྱེར་གྱི་ཤར་ལྷོའི་མཚམས་སྤྱི་ལེ18ཙམ་གྱི་སར་ཡོད། དེ་ནི་ལྷ་རི་གྱང་ཐོའི་རི་གཤམ་དུ་གནས་ཡོད། དེང་གི་ལོ་རྒྱུས་མཁས་པ་མང་པོ་ཞིག་གིས་བོད་རྒྱལ་གྲི་གུམ་བཙན་པོའི་བང་སོ་ཡིན་པར་ངོས་འཛིན་གནང་ཡོད་ལ། ལོ་རྒྱུས་ཐོག་བོད་རྒྱལ་གྱི་བང་སོ་ཐོག་མ་དེ་ཡིན་པར་གྲགས། གཞན་ཡང་《བོན་རིའི་དཀར་ཆག》ལས། མི་འགྱུར་བཀའ་རྟགས་གསལ་བ་རེ་རེ་ཡོད། །གསང་བའི་བོན་གཏེར་ཆ་གཅིག་དེ་རུ་བཞག །མིང་ཡང་མུ་ཡུལ་སྐྱིད་ཐང་ཞེས་སུ་གྲགས། །ཞེས་བྱུང་བ་ལྟར། གནས་མཆོག་ཐུགས་སྤྲུལ་བོན་རི་ཆེན་པོའི་ཕྱོགས་བཞིར་གསང་བའི་དུར་ཁྲོད་དམ་དཀྱིལ་འཁོར་ཆེན་པོ་བཞི་ཡོད་པ་ལ། དེ་ནི་བོན་རིའི་ལྷོ་ཡི་ཕྱོགས་ཀྱི་དུར་ཁྲོད་དེ་ཡིན།
བསམ་ཡས་ཅོང་གི་ངོ་སྤྲོད།
གནའ་བོའི་ལོ་རྒྱུས་ཞིབ་འཇུག་ལ་མེད་ཐབས་མེད་པའི་རྒྱུ་ཆ་ནི་ད་ཡོད་ཀྱི་རིག་དངོས་ཁག་སྟེ། དེ་ལས་ཀྱང་བཙན་པོའི་སྐབས་སུ་བཞེངས་པའི་རྡོ་རིང་དང་། ཅོང་ངམ་དྲིལ་བུའི་ཁ་བྱང་སོགས་ནི་མི་ལོ་སྟོང་ལྷག་ལ་བཅོས་སླད་མཁན་གྱི་ལག་པས་མ་རེག་པའི་སྐབས་དེའི་བོད་ཀྱི་སྤྱི་ཚོགས་དང་། རིག་གནས། ལོ་རྒྱུས་སོགས་གནས་ཚུལ་ཁག་མཐོང་བྱེད་ཀྱི་མེ་ལོང་ཞིག་ཡིན། བོད་ཡུལ་དུ་ལོ་ངོ་སྟོང་ལྷག་གི་ལོ་རྒྱུས་ལྡན་པའི་རྡོ་རིང་དང་།ཡིག་རྙིང་། ཅོང་རྙིང་སོགས་མང་ཙམ་ཉམ་ཉེས་མ་ཤོར་བར་ཡོད་ཅིང་། དེ་དག་ལ་སྒྱུ་རྩལ་དང་།རྩོམ་རིག བརྡ་སྤྲོད། ལོ་རྒྱུས་སོགས་ཀྱི་རིན་ཐང་བླ་ན་མེད་པ་ལྡན། བོད་ཀྱི་ལོ་རྒྱུས་སྨྲ་བ་དཔའ་བོ་གཙུག་ལག་ཕྲེང་བ་དང་། ཀ་ཐོག་རིག་འཛིན་ཚེ་དབང་ནོར་བུ། ཨ་མདོའི་མཁས་པ་དགེ་འདུན་ཆོས་འཕེལ་སོགས་ཀྱིས་ཀྱང་བཀའ་གཙིགས་ཀྱི་རྡོ་རིང་སོགས་གནའ་བོའི་ཡིག་རྙིང་ཞིབ་དཔྱད་རྒྱུས་ལོན་དང་། སྲུང་སྐྱོབ་དཔེ་བཤུ། བདག་ཉར་དགོངས་སྐོར་སོགས་ཤིན་ཏུ་གལ་ཆེན་ཡིན་སྐོར་གྱི་དགོངས་པ་ཟབ་མོ་བཞེས་ཡོད་ལ། དེ་བཞིན་དུ་དུས་རབས་ཉི་ཤུ་པའི་སྟོད་དུ་ཕྱི་གླིང་བའི་མཁས་པ་རི་ཆར་སེན་སོགས་ཀྱིས་ཀྱང་ཡུལ་ངོས་སུ་བསྐྱོད་དེ་དཔེ་བཤུ་དང་། པར་དུ་བསྒྲོན་པ་སོགས་བྱས་ཏེ་མཐར་ཞིབ་འཇུག་དཔྱད་རྩོམ་སྤེལ་བས་ནུབ་གླིང་བོད་རིག་པའི་ཁྱབ་ཁོངས་སུ་བོད་ཀྱི་རྡོ་རིང་དང་། ཅོང་གི་ཁ་བྱང་སོགས་ནི་ཞིབ་འཇུག་གི་ལས་ཚན་གལ་ཆེན་ཞིག་ཏུ་གྱུར།