༄༅། །བོད་གངས་ཅན་གྱི་ལྗོངས་སུ་གནས་པའི་རྡོ་རིང་ཁག་གི་ལོ་རྒྱུས། །   བོད་ཀྱི་རྡོ་རིང་ཁག་གི་ཡི་གེ་ནི། བོད་ཀྱི་ལོ་རྒྱུས་དང༌། སྤྱི་ཚོགས་ཀྱི་འཕེལ་རྒྱས། བོད་དུ་ནང་ཆོས་དར་འཕེལ་བྱུང་ཚུལ། ཆབ་སྲིད་དང་དཔལ་འབྱོར། དམག་དོན་དང་ཁྲིམས་ལུགས། ཐོན་སྐྱེད་ནུས་ཤུགས་དང་རིག་གནས་དར་ཚུལ། དེ་བཞིན་བོད་ཀྱི་ཡུལ་གོམས་གཤིས་ལུགས་སོགས་ཕྱོགས་གང་ཅིར་ཞིབ་འཇུག་བྱེད་རྒྱུར་ཉེ་ཞིང་མཁོ་བའི་གལ་ཆེའི་རིན་བྲལ་གྱི་དཔྱད་གཞིའི་ཡིག་ཆ་ཞིག་ཡིན་ལ། ལོ་རྒྱུས་ཡིག་ཆ་གཞན་དང་མི་འདྲ་བའི་ཁྱད་ཆོས་ལྡན་ཡོད།

ཀ༽ ཁང་སེར་རྡོ་རིང་གཉིས་ནི། གོར་བོད་སྡེ་གཟར་སྐབས་མན་ཇུ་གོང་མས་བོད་ལ་དམག་རོགས་བཏང་བའི་སྐོར་དང༌། སོག་པོ་ཇུན་གར་བ་གོང་མའི་དམག་དཔུང་གིས་མཐར་བསྐྲད་པའི་སྐོར་འཁོད་པའི་རྡོ་རིང་ཞིག་ཡིན་ཞིང༌། དེ་ཡང༌། ལྷ་ལྡན་ཞོལ་གྱི་ལྕགས་རིའི་ཕྱི་ལོགས་རྒྱལ་སྒོའི་མདུན་ངོས་ཤར་ནུབ་གཉིས་སུ་ཁང་སེར་རྫ་གཡམ་གཡུ་རྩིའི་ཐོག་ལྡན་གཉིས་ཀྱི་ནང་བཟོ་དབྱིབས་རྒྱ་ལུགས་དང་མཚུངས་པའི་རྡོ་རིང་རེ་ཡོད་པའི་ཤར་གྱི་རྡོ་རིང་དེར་རྒྱལ་པོས་བྲིས།

སྐར་ཆུང་གི་རྡོ་རིང་ནི། ལྷ་སའི་ལྷོ་ནུབ་ངོས་སྐྱིད་ཆུའི་ཕ་རོལ་ར་མ་སྒང་གྲོང་དབུས་༼དེང་སྟོད་ལུང་བདེ་ཆེན་རྫོང་ཁོངས་སྣེའུ་ཤང་ར་མ་སྒང་གྲོང་ཚོ་སྟེ་ལྷ་སའི་མེ་འཁོར་འབབ་ཚུགས་ཀྱི་ཉེ་འཁྲིས།༽སངས་རྒྱས་དགོན་གྱི་ལྷོ་ངོས་བྱེ་ཐང་དུ་བཙུགས་ཤིང༌། བཙན་པོ་ཁྲི་ལྡེ་སྲོང་བཙན་སྐབས་སྐར་ཆུང་རྡོ་རྗེ་དབྱིངས་ཀྱི་ཕོ་བྲང་ངམ་སྐར་ཆུང་གཙུག་ལག་ཁང་གསར་བཞེངས་སྐབས་༼སྤྱི་ལོ་ ༨༠༠ ཡས་མས་ནང་༽བཙུགས་པའི་རྡོ་རིང་ཞིག་ཡིན་ཅིང༌། རྡོ་རིང་གང་དུ་བསླངས་པའི་ལྷ་ཁང་དེ་ཉིད་ཀྱི་མིང་རྡོ་རིང་ལ་ཐོགས་ནས་སྐར་ཆུང་རྡོ་རིང་ཞེས་གྲགས།

ཞྭ་ལྷ་ཁང་གི་རྡོ་རིང་ནི་ ༼ཞྭ་ལྷ་ཁང་ནི་མལ་གྲོ་གུང་དཀར་རྫོང་ཉི་མ་ལྕང་རྭ་ཤང་ངམ་རྫོང་ཞོལ་ཤང་ཞྭ་གྲོང་ཚོའི་ཁོངས་སུ་གནས་ཤིང༌།༽ བཙན་པོ་ཁྲི་སྲོང་ལྡེ་བཙན་གྱི་སྲས་མུ་ནེ་བཙན་པོའམ་ཁྲི་ལྡེ་སྲོང་བཙན་སད་ན་ལེགས་མཇིང་ཡོན་གྱིས་སྔ་རྗེས་ཆོས་བློན་མྱང་ཏིང་འཛིན་བཟང་པོ་ལ་བཀའ་གཙིགས་གཉིས་གནང་སྟེ། རྡོ་རིང་དང་པོ་ཡིག་ཕྲེང་ ༦༢ ཡོད་པ་ནི་ཕལ་ཆེར་སྤྱི་ལོ་ ༧༩༨ ནས་ ༨༡༢ ལོའི་བར་གྱི་ལོ་ལ་བཙུགས་པ་དང༌།

མཚུར་ཕུའི་རྡོ་རིང་ནི། བོད་ལྗོངས་ལྷ་ས་ས་ཁུལ་སྟོད་ལུང་བདེ་ཆེན་རྫོང་ཁོངས་ཀྱི་ཀརྨ་པའི་གདན་ས་མཚུར་ཕུ་དགོན་དུ་མཆིས་ཤིང༌། དེ་ཡང༌། མཚུར་ཕུའི་རྡོ་རིང་ནི་སྤྱི་ལོའི་དུས་རབས་དགུ་པའི་དུས་འགོ་སྟེ་སྤྱི་ལོ་ ༨༡༥ ལོ་ནས་ ༨༨༨ བར་མངའ་བདག་ཁྲི་རལ་གྱིས་སྲིད་དབང་བཟུང་བའི་ལོ་ག་གེ་མོ་ཞིག་ལ་བཙུགས་ཡོད་པ་འདྲ་ཞིང༌།

བསམ་ཡས་དགོན་ནི་ལྷོ་ཁ་ས་ཁུལ་གྲ་ནང་རྫོང་ཁོངས་ཡར་ཀླུང་གཙང་པོའི་བྱང་ངོས་བསམ་ཡས་ཤང་ཧས་པོ་རིའི་འདབས་སུ་གནས་ཤིང༌། བོད་ཤིང་ཡོས་སྤྱི་ལོ་ ༧༧༥ ལོར་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྨང་གཞི་བཏིང་ནས་མེ་ཡོས་སྤྱི་ལོ་ ༧༨༧ ལོར་ཡོངས་སུ་ལེགས་བསྒྲུབས་ཟིན་ཅིང༌། གཙུག་ལག་ཁང་གི་དབུས་སུ་རིའི་རྒྱལ་པོ་རི་རབ་ལ་དཔེ་བླངས་ཏེ་དབུ་རྩེ་ལྷ་ཁང་ཆེན་མོ་བཞེངས། སྟེང་གི་གཡས་གཡོན་དུ་ཉི་མ་ལྷ་ཁང་དང༌། ཟླ་བ་ལྷ་ཁང་བཞེངས། གླིང་བཞི་གླིང་ཕྲན་བརྒྱད་མཚོན་པའི་ཆེད་དུ་ཕྱོགས་བཞི་མཚམས་བརྒྱད་དུ་ལྷ་ཁང་བཅུ་གཉིས་བཞེངས། ཕྱོགས་བཞིར་མཆོད་རྟེན་བཞི་དང་ལྕགས་རིའི་སྟེང་དུ་མཆོད་རྟེན་ཆུང་ངུ་བརྒྱ་དང་བཅུ་མེད་བརྒྱད་བཞེངས། སྒོ་བཞིར་རྡོ་རིང་བཞི་བཙུགས་ཚུལ་ལོ་རྒྱུས་སུ་འཁོད་ཀྱང་དེང་སྒོ་བཞིའི་རྡོ་རིང་མིང་གི་ལྷག་མར་གྱུར་ཟིན་ལ། རྡོ་རིང་འདི་ནི་བསམ་ཡས་གཙུག་ལག་ཁང་གི་དབུ་རྩེའི་མདུན་ངོས་སུ་བཙུགས་པའི་གནའ་བོའི་རྡོ་རིང་དེ་ཉིད་ཡིན།