ཕྱི་ལོ་ 2000 ལོ་དང་། ཕྱི་ལོ་ 2002 ལོ་སོ་སོར་གནའ་རྫས་སྔོག་འདོན་ཞིབ་བཤེར་བྱས་པ་བརྒྱུད། ལྷོ་ཁ་སྣ་དཀར་རྩེའི་བང་སོ་གཉིས་ཀྱི་ནང་ནས་གསེར་དང་། ཟངས། ལྕགས། བྱུ་རུ། ཤེལ་སོགས་ལས་གྲུབ་པའི་དངོས་རྫས་མང་པོ་ཐོན་ཞིང་། དུར་ས་དེར་ད་བར་དུ་ཕལ་ཆེར་མི་ལོ་ཉིས་སྟོང་ལ་ཉེ་བའི་ལོ་རྒྱུས་ཡོད་པའི་བདེན་དཔང་བྱས་ཡོད། སྣ་དཀར་རྩེའི་དུར་ས་སྔ་ཕྱི་གཉིས་ཀའི་ནང་ཁྱོན་གསེར་གྱི་དངོས་རྫས་སུམ་ཅུ་ལྷག་རྙེད་ཅིང་། དེའི་ནང་མང་ཆེ་བ་བུད་མེད་ཀྱི་རྒྱན་ཆ་དང་འབྲེལ་བ་ཆེན་པོ་ཡོད་པ་ཞིག་རེད།
དེ་ཡང་གསེར་གྱི་སྐྲ་གཞུག་མདོང་གཟུགས་མ་དང་། གསེར་གྱི་མཛུབ་དཀྲིས། གསེར་གྱི་རྣ་ལོང་། གསེར་གྱི་མགོ་རྒྱན་སྒོར་མོ། གསེར་དང་བྱུ་རུ་ཤེལ་སོགས་ལས་གྲུབ་པའི་སྐེ་རྒྱན་སོགས་ཡོད་ལ། འདི་དག་ཚང་མ་ནི་གཤིན་པོའི་ནོར་སྐལ་དུ་དུར་སར་སྦས་པ་ཡིན་འདུག དེ་བས་མི་ལོ་ཉིས་སྟོང་ལ་ཉེ་བའི་སྔོན་ཞིག་ནས་རྒྱན་ཆ་གྱ་ནོམ་པ་འདི་ལྟ་བུ་དུར་སྦས་བྱེད་སྲོལ་ཡོད་ན། སྐབས་དེའི་དངོས་ཡོད་འཚོ་བའི་ཁྲོད་དུའང་རྒྱན་ཆ་དེ་དག་ཅི་ཙམ་དར་ཡོད་པ་ནི་སྨྲོས་མི་དགོས།”
ལྷོ་ཁ་སྣ་དཀར་རྩེའི་བྲག་རྒྱའུ་བང་སོའི་ནང་ནས་ཐོན་པའི་གསེར་གྱི་སྐྲ་གཞུང་དང་། མཛུབ་དཀྲིས། མགོ་རྒྱན་སོགས་ཀྱི་པར།
