དགའ་ལྡན་ཁྲི་པ།   དགའ་ལྡན་ཁྲི་པ་ནི་རི་བོ་དགེ་ལུགས་པའི་བསྟན་འཛིན་ཀུན་གྱི་གཙོ་བོ་ཡིན་ཞིང༌། སྐྱབས་ཞུ་སོགས་ཀྱི་འགོ་བརྗོད་དུ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཞེས་འགོད་སྲོལ་ཡོད་ལ། ཏཱ་ལའི་བླ་མས་དགའ་ལྡན་གསེར་ཁྲིའི་སྟེང་བཞུགས་ནས་མཛད་སྒོ་གནང་དགོས་ཚེ་མགྲོན་གཉེར་ཆེ་མོ་བས་དགའ་ལྡན་ཁྲི་པར་གནང་བ་ཞུ་དགོས་པ་ཡིན། ཏཱ་ལའི་བླ་མའི་མཛད་སྒོ་ཆེ་ཁག་ལ་དགའ་ལྡན་ཁྲི་པས་མཎྜལ་བཤད་པ་གནང་ཚེ་ཁྲི་སྟེང་དུ་བཞུགས་ནས་གསུངས་པ་ལས་བཞེངས་སྲོལ་མེད་ཐོག ལྷ་སར་ཡང་དགའ་ལྡན་ཁྲི་པའི་མཛད་སྒོ་ཁག་དང༌། ཆིབས་ཧྲག་དང་བཅས་ཕེབས་ཐོན་སྐབས་དབུ་གདུགས་ཕུབ་ནས་ཕེབས་ཀྱི་ཡོད། དགའ་ལྡན་ཁྲི་པ་ཞེས་ཐོག་མར་འབྱུང་སྟངས་ནི་རྗེ་ཙོང་ཁ་པས་དགའ་ལྡན་དགོན་པ་ཕྱག་བཏབ་སྟེ་གསེར་ཁྲིར་བཞུགས་པ་ནས་བཟུང་ཁྲི་སྟེང་དེར་བཞུགས་ནས་རྗེ་ཙོང་ཁ་པའི་རྒྱལ་ཚབ་གནང་མཁན་རིམ་པར་དགའ་ལྡན་ཁྲི་པ་ཞེས་འབོད། རྗེ་ཙོང་ཁ་པ་ནས་ཁྲི་ཆེན་ཐུབ་བསྟན་ཀུན་དགའ་བར་ཁྲི་ཐོག་དགུ་བཅུ་གོ་དྲུག་བྱུང་འདུག ཁྲི་ཐོག་ཏུ་བཞུགས་རིང་ལྷ་ལྡན་སྨོན་ལམ་ཆེན་མོ་དང༌། ཚོགས་མཆོད་སྨོན་ལམ་གྱི་ཚོགས་དབུ་མཛད་རྒྱུ་དང༌། གཙོ་ཆེར་དགའ་ལྡན་དུ་བཞུགས་ནས་མདོ་སྔགས་ཀྱི་ཆོས་འཆད་ཉན་མཛད་རྒྱུ་དེ་ཡིན་ལ། ཁྲི་ཐོག་ཁང་གི་མཆོད་གཞིས་ཐོག་ནས་དགའ་ལྡན་དུ་གཏོང་སྒོ་གནང་དགོས་པ་ཡིན། ༢༽ དགའ་ལྡན་དགོན། ༡༩༤༨ པར་པ་སུ་ཡིན་མི་གསལ། 2) Gaden monastery in Tibet. 1948.

༄༅། །རྫོང་སར་བཤད་གྲྭའི་མཁན་པོ་འཇམ་དབྱངས་ཆོས་འཕེལ་མཆོག་ནི། བོད་ལྗོངས་གཞིས་རྩེ་ས་ཁུལ་ལྷ་རྩེ་རྫོང་ཆུ་ཤར་གྲོང་རྡལ་ཡུལ་གསར་གྲོང་ཚོར་ཡབ་བློ་གསལ་དང་། ཡུམ་ཚེ་རིང་གཉིས་ཀྱི་སྲས་སུ་སྤྱི་ལོ་ ༡༩༧༩ ལོར་འཁྲུངས། དགུང་ལོ་བརྒྱད་ནས་བཅུ་གཅིག་བར་བོད་ཡིག་དང་། ཨང་རྩིས། རྒྱ་ཡིག་བཅས་ལ་སློབ་གཉེར་གནང་། སྤྱི་ལོ་ ༡༩༩༢ ལོར་ལྷ་རྩེ་མང་མཁར་བསམ་གྲུབ་དགོན་གསར་དུ་ཆོས་ཞུགས་དང་། རབ་ཏུ་བྱུང་ནས་འདོན་རྟ་དབྱངས་སོགས་ལ་སྦྱངས་པ་གནང་། སྤྱི་ལོ་ ༡༩༩༨ ལོར་རྫོང་སར་བཤད་གྲྭར་འཛུལ་ཞུགས་ཀྱིས་གྲགས་ཆེན་བཅོ་བརྒྱད་ཆ་ལག་དང་བཅས་པར་སློབ་གཉེར་མཛད། སྤྱི་ལོ་ ༢༠༠༢ ལོར་དབུ་མ་དང་། ༢༠༠༥ ལོར་བསྟན་བཅོས། ༢༠༠༧ ལོར་སློབ་དཔོན་འཛིན་གྲྭ་བཅས་ལེགས་པར་ཐོན་པའི་ཕྱག་འཁྱེར་བཞེས།

ལྷ་སའི་ར་ས་འཕྲུལ་སྣང་གཙུག་ལག་ཁང་དུ་བཞུགས་པའི་ཇོ་བོ་རིན་པོ་ཆེ། སྤྱིར་བོད་ཀྱི་ལོ་རྒྱུས་སྟེང་ཇོ་བོ་ཆེན་པོ་བཞི་ཡོད་དེ། དེ་དག་གི་ལོ་རྒྱུས་ཉུང་བསྡུས་གཤམ་གསལ། དང་པོ་ནི། ལྷ་སའི་ར་ས་འཕྲུལ་སྣང་གཙུག་ལག་ཁང་དུ་བཞུགས་པའི་ཇོ་བོ་རིན་པོ་ཆེ་སྟེ། སངས་རྒྱས་ཞལ་དངོས་སུ་བཞུགས་པའི་སྐབས་སུ་བཞེངས་པའི་དགུང་ལོ་བཅུ་གཉིས་ཀྱི་སྐུ་ཚད་ཅན་དེ་ཡིན་ཞིང་། དེ་ལ་དུས་ད་ལྟའི་བར་དུ་ལོ་ངོ་ཉིས་སྟོང་དྲུག་བརྒྱ་ལྷག་གི་ལོ་རྒྱུས་ལྡན་པ་དང་། འདི་ལས་རང་རེའི་བོད་བརྒྱུད་ནང་བསྟན་ཆོས་ལུགས་ཀྱི་ངོ་བོ་དང་ལོ་རྒྱུས་མཚོན་ཡོད་པར་མ་ཟད། འཛམ་གླིང་སངས་རྒྱས་ཆོས་ལུགས་ཀྱི་ལོ་རྒྱུས་དང་རྩ་ཆེ་བའི་རང་བཞིན་ཡང་མཚོན་ཡོད། གཉིས་པ་ནི། ར་མོ་ཆེ་གཙུག་ལག་ཁང་དུ་བཞུགས་པའི་སྐུ་ཚད་དགུང་ལོ་བརྒྱད་ཅན་གྱི་ཇོ་བོ་མི་བསྐྱོད་རྡོ་རྗེ་ཡིན་པ་དང་། གོང་གི་ཇོ་བོ་འདི་རྣམ་གཉིས་ནི་རྒྱ་བཟའ་ཀོང་ཇོ་དང་བལ་བཟའ་ཁྲི་བཙུན་རྣམ་གཉིས་ཀྱིས་བོད་དུ་གདན་དྲངས་པའི་རྟེན་མཆོག་ཏུ་གྱུར་བ་ཞིག་ཡིན་པར་མ་ཟད། དེང་སྐབས་འཛམ་གླིང་སྟེང་གི་རྟེན་གཙོ་བོའི་གྲས་ཡིན།

ཤེས་རབ་བསྟན་དར།   ༄༅། ། མིའི་མིང་རྒྱ་ཡིག་ཏུ་སྒྱུར་དུས་དེའི་སྐད་སོར་བཞག་གིས་བསྒྱུར་ན་ལེགས་ཏེ།མི་མིང་ས་མིང་ཡུལ་དེར་བསྟུན་དགོས་ལ་ཡུལ་སྲོལ་གོམས་འདྲིས་ཀྱང་ཇི་བཞིན་དུ་བསྒྱུར་བ་ལས་རང་ཡུལ་དང་བསྟུན་ནས་བསྒྱུར་མི་རུང་།དཔེར་ན满拉ཆང་འཐུང་མི་རུང་ཞེས་པ་དེ་གྲྭ་བས་ཆང་འཐུང་མི་རུང་ཞེས་པར་བསྒྱུར་མི་རུང་ལ། 张秀ཞེས་པ་བཀྲ་ཤིས་སུ་བསྒྱུར་མི་རུང་།ལྷག་པར་ཡུལ་དེ་དང་ས་གནས་དེའི་མིང་བསྒྱུར་དུས་དེ་བཟང་ངན་གང་ཞིག་ཡིན་རུང་མཐོང་ཆུང་དང་དམའ་འབེབ་ཀྱིས་བསྒྱུར་ན་མི་རིགས་དེར་དམའ་འབེབ་བྱས་པ་ཡིན་པས་མི་རིགས་མཐུན་སྒྲིལ་ལ་གནོད་ཅིང་།རིག་གཞུང་གི་བརྩེ་དུང་ལ་གནོད།མི་མིང་སྒྱུར་དུས་སྒྲ་སོར་བཞག་དགོས་པ་སྨོས་མེད་ཡིན་རུང་།鲁迅 ཞེས་པ་ལོའུ་རྐུན་དང་།孔子ཞེས་པ་རྐུན་ཙི། 老子ཞེས་པ་གླེན་ཙི་ཞེས་བསྒྱུར་ན་ལོ་ཙ་བ་དེ་ཉིད་ཡ་རབས་སྤྱོད་བཟང་མིན་པའི་རྟགས་དང་།ཕྲག་དོག་དང་ཕྱོགས་ཞེན་གྱི་གདོན་གྱིས་བསླུས་པའི་རྟགས་ལས་གཞན་ཅི་ཡང་མིན།

༅། །དཔལ་ལྡན་ཚར་པའི་གདན་ས་ཐུབ་བསྟན་དགེ་འཕེལ་དགོན་ནི་བོད་ཀྱི་རྡོ་རྗེ་གདན་དཔལ་ལྡན་ས་སྐྱ་ནས་ནུབ་ཕྱོགས་སུ་ཞག་གཅིག་བགྲོད་པའི་ས་ན་དཔལ་ས་སྐྱའི་གསུང་ངག་ལམ་འབྲས་འཆད་སྤེལ་གནང་སའི་གནས་མུ་གུ་ལུང་དང་ཉེ་བ། སློབ་དཔོན་པདྨ་འབྱུང་གནས་ཞབས་ཀྱིས། ལུང་ལྔ་གླིང་གཅིག་ལྗོངས་གསུམ་གངས་ཉི་ཤུ༔ ཅེས་པ་སློབ་དཔོན་པདྨས་བྱིན་གྱིས་རླབས་པའི་གནས་གངས་ཉི་ཤུའི་ཡ་གྱལ་ལྷ་རྒོད་གངས་རིའི་འདབས་གཞོལ་རི་བོའི་སྤོར་ཆགས་ཡོད། དབེན་གནས་དམ་པ་འདི་ནི་ཐོག་མར་རྗེ་བཙུན་གོང་མ་རྣམ་ལྔའི་ཡ་གྱལ་ས་པཎ་ཀུན་དགའ་རྒྱལ་མཚན་དཔལ་བཟང་པོའི་ཡུམ་མ་གཅིག་གར་ཕུ་མ་ཉི་ཁྲི་ལྕམ་གྱི་གཟིམས་ཁང་ཡིན་ཅིང་། དེའི་རྗེས་སུ་ཀུན་མཁྱེན་གོ་རམ་པ་བསོད་ནམས་སེངྒེའི་ཞལ་སློབ་ཆོས་རྗེ་བསོད་ནམས་དཔལ་འབྱོར་གྱིས་རྒྱ་འགྱེད་གནང་བ་དང་ཚར་ཆེན་ཆོས་ཀྱི་རྒྱལ་པོས་ཆོས་འཁོར་རྒྱ་ཆེར་སྤེལ་ནས་འདུས་ཚོགས་ཡང་རྒྱ་ཆེར་སྤེལ་ད་བར་ལོ་ངོ་༨༠༠ལྷགས་ཙམ་གྱི་ལོ་རྒྱུས་ལྡན་ཡོད་ལ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ལ་སོགས་པ་རྣམས་ཀྱི་ཚར་ཆེན་གྱི་གདན་ས་ཡིན་པར་ངོས་འཛིན་གནང་ཡོད།