བོད་བཙན་པོའི་རྒྱལ་རབས་དང་ཨ་རབ་བར་གྱི་འཐབ་བརྩོད།
མངའ་བདག་ཁྲི་སྲོང་ལྡེ་བཙན་གྱི་སྐུ་ཚེའི་སྨད་ཙམ་ལ། བོད་ཀྱི་དྲག་པོའི་སྟོབས་ཤུགས་ནི་ཤར་ནུབ་གཉིས་ཀར་ཐག་རིང་པོའི་སར་སླེབས་ཀྱི་ཡོད་པ་སྟེ། ཆུ་འབྲུག་༦༩༢ལོར་རྒྱའི་རྒྱལ་སྲས་ཝའི་ཞེས་པས་དམག་དཔུང་ཆེན་པོ་ཞིག་འཁྲིད་དེ་རྔན་ཤིའི་(ཨན་ཤིའི་)ནང་བོད་པའི་དམག་ས་བཞི་འཕྲོགས་པ་དེ་རྣམས་ལྩགས་རྟ་༧༩༠ནང་སླར་ཡང་བོད་པས་ཚུར་བླངས་པ་དང་། དེ་བཞིན་བོད་པའི་དྲག་ཤུགས་ཁག་ཅིག་ནུབ་ཕྱོགས་སྤ་མིར་ངོས་ལ་ཕྱིན་ནས། ཨ་རབ་ཡུལ་གྱི་ཨོག་སོ་གཙང་བོ་ཡང་ཕར་བརྒལ་ཞིང་། བོད་དམག་འབྱོར་བའི་རྟགས་སུ་ཨོག་སོ་གཙང་བོའི་བྱང་ངོས་ཨ་རབ་པའི་སྐད་དུ་ཨལ་ཏུ་སྦག་(བོད་ཀྱི་མཚོ་ཆུང་)ཅེས་མིང་འཐོགས་[①]པའི་མཚོ་ཞིག་ཡོད། དེང་དུས་ཀྱང་མཚོ་ཆུང་དེའི་མིང་ལ་ཨལ་ཏུ་སྦག་ཅེས་འབོད་མུས་མ་ཟད། ས་བཀྲ་རྙིང་བ་ཚོའི་ནང་ལའང་གསལ་འདུག །
