Author: ཆུ་དབར་བུ།

རང་རེ་བོད་མིའི་ཡུལ་གོམས་གཤིས་ལུགས་ལྟར་ན། བོད་མིའི་ཁང་པའི་ཕྱི་སྒོའི་གཡས་གཡོན་ནམ། ཡང་ན་སྒོའི་མེ་ལོང་གི་དབུས་སུ་ཉི་ཟླ་དང༌། གཡུང་དྲུང་གི་རི་མོ་འབྲི་སྲོལ་ཡོད་པ་དེ་དག་ནི་མཛེས་རྒྱན་ཁོ་ནའི་ཆེད་དུ་བྲིས་པ་མ་ཡིན་པར་དགོས་པ་ཁྱད་པར་ཅན་ཡོད་ཅིང༌། དེ་ཡང་ཉི་མས་གཟི་བརྗིད་ཆེ་བ་དང༌། ཟླ་བས་ཚེ་དཔལ་ཡར་ངོའི་ཟླ་བ་ལྟར་འཕེལ་བ་དང༌། གཡུང་དྲུང་ནི་བརྟན་ཅིང་འགྱུར་བ་མེད་པའི་མཚོན་བྱེད་ཡིན་སྟེ། ཚེ་མི་འགྱུར་གཡུང་དྲུང་ལྟར་བརྟན་པ་ཞེས་བརྗོད་པ་སྟེ་ཚེ་རིང་ལོངས་སྤྱོད་རྒྱས་པའི་རྟེན་འབྲེལ་མཚོན་པར་བྱས་པ་སྟེ། གཡང་སྒྲུབ་ལས། ཚེ་ཡི་ཉི་མ་མི་ནུབ་རབ་ཏུ་གསལ། ། བསོད་ནམས་ཟླ་བ་ཡར་ངོའི་ཟླ་ལྟར་འཕེལ། ། རིགས་རྒྱུད་མི་འགྱུར་གཡུང་དྲུང་ལྟར་བརྟན་པ། ། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག།

བོད་ཟླ་ ༡༠ ཚེས་ ༢༥ ཉིན་ནི་དགའ་ལྡན་ལྔ་མཆོད་ཅེས་རི་བོ་དགེ་ལྡན་པའི་གྲུབ་མཐའི་སྲོལ་བཏོད་མཛད་པ་པོ། དགའ་ལྡན་ཁྲི་རབས་དང་པོ་རྗེ་ཙོང་ཁ་པ་བློ་བཟང་གྲགས་པ་མཆོག་དགའ་ལྡན་ཡིད་དགའ་ཆོས་འཛིན་དུ་གཤེགས་པའི་དགོངས་རྫོགས་ཀྱི་རྗེས་དྲན་མཆོད་འབུལ་བྱེད་པའི་ནང་ཆོས་ཀྱི་དུས་ཆེན་ཞིག་ཡིན་ལ། དེ་ཡང་ས་ཕག་སྤྱི་ལོ་ ༡༤༡༩ ལོའི་སྟོན་དུས་རྗེ་ཙོང་ཁ་པ་ཆེན་པོས་སྟོད་ལུང་དང༌། དཔལ་ལྡན་འབྲས་སྤུངས། ལྷ་ལྡན། སེ་ར་ཐེག་ཆེན་གླིང་སོགས་ཕེབས་ཏེ་ཆོས་མང་དུ་གསུངས་ཤིང༌། དེ་རྗེས་སླར་ཡང་འབྲོག་རི་བོ་དགེ་དགའ་ལྡན་རྣམ་པར་རྒྱལ་བའི་གླིང་དུ་ཕྱིར་ཕེབས་ཀྱིས་ཐུབ་དབང་ཚུལ་ཁྲིམས་མའི་སྐུ་མདུན་དུ་མཆོད་འབུལ་དང་བསྔོ་སྨོན་རྒྱ་ཆེར་མཛད། སྐུ་བེར་དང་དབུ་ཞྭ་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ་རྒྱལ་ཚབ་ཏུ་བསྐོ་གཞག་མཛད་ནས་ཟླ་བ་བཅུ་པའི་ཚེས་ཉེར་ལྔར་གཟིམ་ཆུང་ཉི་གསལ་སྦུག་ཏུ་སྐུ་གཤེགས།

  དེ་ཡང་མགོན་པོ་ཀླུ་སྒྲུབ་ (C.150-250) ཀྱིས་མཛད་པའི་བྱང་ཆུབ་སེམས་འགྲེལ་ལས། སྙིང་རྗེའི་དབང་དུ་གྱུར་པ་རྣམས། །གཤེགས་དང་བལྟམས་དང་རོལ་བ་དང༌། ། ཁབ་ནས་འབྱུང་དང་དཀའ་བ་སྤྱོད། །བྱང་ཆུབ་ཆེད་དང་བདུད་སྡེ་འཇོམས། ། ཆོས་ཀྱི་འཁོར་ལོ་བསྐོར་བ་དང༌། །ལྷ་རྣམས་ཀུན་ནས་ཞུགས་པ་དང༌། ། དེ་བཞིན་དུ་ནི་མྱ་ངན་ལས། །འདས་པ་སྟོན་པར་མཛད་པ་ཡིན། ། ཞེས་གསུངས་པ་ལྟར་བདག་ཅག་གི་སྟོན་པ་ཐུབ་པའི་དབང་པོས་འདུལ་བྱ་རྣམས་སྨིན་གྲོལ་གྱི་གནས་སུ་འགོད་པའི་ཆེད་དུ།  མཛད་པའི་རྣམ་གྲངས་ཇི་སྙེད་ཅིག་བཞེས་ཡོད་པ་རྣམས་སྟོན་པ་གང་གི་རྗེས་འཇུག་རང་ཅག་བོད་མི་ཚོས་ཀྱང་རྗེས་སུ་དྲན་པའི་སྒོ་ནས་ལོ་ལྟར་ཆོ་འཕྲུལ་དུས་ཆེན་དང༌།  ས་ཟླའི་དུས་ཆེན།  དྲུག་པ་ཚེས་བཞི།  ལྷ་བབས་དུས་ཆེན་བཅས་ཡོངས་གྲགས་སྟོན་པའི་དུས་ཆེན་རྣམ་བཞི་སྲུང་བརྩི་ཞུ་མུས་ཀྱི་ནང་ཚན།  རྒྱལ་བ་ལྷ་ལས་བབས་པའི་དུས་ཆེན་གྱི་ངོ་སྤྲོད་མདོར་བསྡུས་ཤིག་ཞུས་ན།

དེ་ཡང་ས་བཅུ་པའི་མདོ་ལས། ངས་ནི་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུ་རྩ་གཅིག་དྲན།  ། དེ་དག་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར།  ། ཞི་ཞིང་ཉེར་ཞི་བསམ་གཏན་མངོན་འགྱུར་རྟག་ཏུ་རི་དྭགས་རྣམས་ཀྱིས་བསྟེན།  ། དེ་ཕྱིར་དྲང་སྲོང་ཞེས་བྱ་ནགས་མཆོག་དེར་ནི་ཆོས་ཀྱི་འཁོར་ལོ་དམ་པ་བསྐོར།  ། ཞེས་གསུངས་པ་ལྟར།  དེ་ལ་འདིར་དཀྱིལ་འཁོར་གྱི་རྟ་བབས་ཀྱི་སྟེང་དང༌།  ཁྱད་པར་དུ་ཆོས་གྲྭ་དུ་མའི་གཙུག་ལག་ཁང་གི་ཡངས་སྟེང་སོགས་སུ་རི་དྭགས་ཆོས་འཁོར་འབུར་བཟོའི་ལམ་ནས་བཞེངས་བསྐྲུན་མཛད་སྲོལ་ཡོད་པའི་རྣམ་པ་ཅི་འདྲ་ཞིག་དགོས་པ་དང༌།  དེས་གང་ཞིག་མཚོན་མིན་སྐྱེ་བོ་མང་པོར་ལྐོག་ཏུ་འགྱུར་བས།  རི་དྭགས་ཆོས་འཁོར་གྱི་མཚོན་དོན་དང༌།  བྱུང་བའི་ལོ་རྒྱུས་ཇི་ལྟར་ཡིན་ཞེ་ན།  དེ་ཡང་མཉམ་མེད་སྟོན་པ་ཤཱཀྱ་ཐུབ་པ་དེ་ཉིད་མངོན་པར་རྫོགས་པའི་སངས་རྒྱས་པའི་རྗེས་སུ་དབེན་པའི་ནགས་ཚལ་དུ་ཐུགས་མཉམ་བཞག་གི་ངང་དུ་བཞུགས་པའི་སྐབས་ཤིག ལྷ་ཚངས་པས་གསེར་གྱི་འཁོར་ལོ་རྩིབས་མ་སྟོང་ལྡན་དང༌།  བརྒྱ་བྱིན་གྱིས་ཀྱང་དུང་དཀར་གཡས་འཁྱིལ་ཞིག་སྟོན་པའི་སྤྱན་སྔར་ཕུལ་ཏེ་དམ་པའི་ཆོས་ཀྱི་འཁོར་ལོ་བསྐོར་བར་བསྐུལ་བས།  སྟོན་པས་ཆོས་འཁོར་ལན་གསུམ་བསྐོར་བར་ཞལ་གྱིས་བཞེས།

འཁོར་ལོས་སྒྱུར་རྒྱལ་གྱི་ལོངས་སྤྱོད་གཞན་ཉེ་བའི་རིན་ཆེན་བདུན་ནི། མངོན་བྱང་གི་མདོ་ལས། འོད་ཟེར་གྱིས་སྔོ་རལ་གྲི་པགས་པ་འཇམ།  ། དགའ་བའི་ནགས་ཚལ་གོས་ནི་ཡིད་རྗེས་འགྲོ།  ། མཐུ་ལྡན་མཆིལ་ལྷམ་ཁང་ཁྱིམ་གཞལ་དུ་མེད།  ། རེག་འཇམ་གཟིམ་ཆས་ལྭ་གོས་རྣམ་པ་བདུན།  ། ཞེས་དང༌། སྒྲོལ་དཀར་བརྟན་བཞུགས་ལས། གཡུལ་ལས་རྒྱལ་བར་བྱེད་པའི་རལ་གྲི་དང༌།  ། ཚ་གྲང་གནོད་པ་སྐྱོབ་པའི་པགས་པ་དང༌།  ། ཡང་འཇམ་ཉོན་མོངས་སྤངས་པའི་མལ་ཆ་དང༌།  ། དགའ་མགུ་རྩེ་བར་བྱེད་པའི་ཡིད་འོང་ཚལ།  ། གང་འདོད་བལྟ་ནུས་བདེ་བར་ཉལ་བའི་ཁྱིམ།  ། ཐག་བཟང་བསྲེག་བཅད་མི་ནུས་འཇམ་པའི་གོས།  ། ཆུ་ལ་མི་བྱིང་ངལ་དུབ་མེད་པའི་ལྷམ།  ། ཉེ་བའི་རིན་ཆེན་སྣ་བདུན་འདི་དག་འབུལ།  ། ཞེས་གསུངས་པ་ལྟར་ཉེ་བའི་རིན་ཆེན་བདུན་ནམ་དམན་པའི་རིན་ཆེན་སྣ་བདུན་ནི། འཁོར་ལོ་རིན་པོ་ཆེ་སོགས་རྒྱལ་སྲིད་རིན་པོ་ཆེ་སྣ་བདུན་གྱི་རྗེས་སུ་འགྲོ་བའམ་དེ་དང་བར་ཐག་ཉེ་བའི་རིན་ཆེན་གྱི་རིགས་ཡིན་པས་ཉེ་བའི་རིན་ཆེན་སྣ་བདུན་ཞེས་གྲགས་སོ།  །

  ཞིང་ཁུལ་དུ་དབྱར་དུས་སུ་གཏོང་བའི་འོང་སྐོར་ནི་བོད་རྒྱལ་སྤུ་དེ་གུང་རྒྱལ་གྱི་དུས་སུ་མཛངས་བློན་རུ་ལས་སྐྱེས་ཀྱིས་ཞིང་ལས་ལ་མཐོང་ཆེན་ནང་ནས་ཞིང་ལས་ལག་རྩལ་གོང་འཕེལ་གཏོང་སྐབས།  བོན་པོ་བས་ཞིང་ཁར་སྐོར་བ་བརྒྱབ་ནས།  ལོ་ལེགས་ཡོང་བའི་གསོལ་བ་འདེབས་པའི་ཆོ་ག་སྤེལ་བ་ནས་བཟུང་།  རིམ་པས་དམངས་ཁྲོད་དུ་དར་བའི་དུས་ཆེན་ཞིག་རེད།  དེ་ལྟར་ན་སྲོལ་དེ་བྱུང་ནས་ད་བར་ལ་ལོ་ངོ་སྟོང་ལྷག་ཙམ་གྱི་ལོ་རྒྱུས་ཡོད།  དུས་ཆེན་དེ་གྲ་རྒྱས་གཏོང་དགོས་དོན་ནི་ངལ་རྩོལ་མི་དམངས་རྣམས་ཀྱིས་རང་བྱུང་གི་གནོད་འཚེ་ཡོངས་ལས་རྣམ་པར་རྒྱལ་ནས་ཞིང་ལས་ཐོན་སྐྱེད་ལ་ལོ་ལེགས་ཡོང་བར་སྐྱབས་བཅོལ་ཞུ་བའི་དུས་ཆེན་ཞིག་རེད།  འོང་སྐོར་ཟེར་བའི་ཐ་སྙད་དེའི་གོ་དོན་འདི་ལྟ་སྟེ།  འོང་ནི་འོང་ཁ་སྟེ་སྟོན་ཐོག་དང་ལྡན་པའི་ཞིང་ཁ་ལ་ཟེར་བ་དང་།  སྐོར་ནི་ཞིང་ཁ་ལ་སྐོར་བ་རྒྱག་པའི་དོན་ཡིན།