ཤོག་བུའི་རྒྱུ་ཆ་ཟར་མ་དང༌། རེ་ལྕགས་ལ་སོགས་དུག་རིགས་དང་དུག་རིགས་མིན་པའི་རྩི་ཤིང་རིགས་བསྐོལ་བའི་ཁུ་བ་རས་གཞིའི་སྟེང་དུ་བཀྲམ་པ་ལ་བརྟེན་ནས་ཤོག་བུ་བཟོ་བའི་ལག་རྩལ་ལ་ཟེར། ད་ཡོད་ཀྱི་དཔྱད་གཞིའི་ཡིག་ཆ་ཁག་ཅིག་ནང༌། བོད་ཀྱི་ཤོག་བུ་བཟོ་བའི་ལག་རྩལ་ནི། ཆོས་རྒྱལ་སྲོང་བཙན་སྒམ་པོའི་སྐབས་རྒྱ་བལ་གྱི་བཙུན་མོ་རྣམ་གཉིས་བཙན་པོའི་བཙུན་མོར་སློང་སྐབས་བཀའ་ཤོག་གི་ཡི་གེ་རྒྱལ་ཁབ་སོ་སོའི་ཡི་གེའི་ཐོག་བྲིས་ནས་བསྐུར་ཡོད་ཚུལ་ལོ་རྒྱུས་ཁག་ཏུ་གསལ་བར་བརྟག་ན་སྐབས་དེར་བོད་དུ་ཤོག་བུ་བཟོ་བའི་ལག་རྩལ་དར་ཟིན་ཡོད་ཚོད་འདུག
ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་དུས་སུ་བོད་ཀྱི་ཤོག་བཟོའི་ལག་རྩལ་དར་ཁྱབ་ཆེ་ཙམ་བྱུང་ཡོད། དེ་ཡང་སྐབས་དེར་རྒྱ་གར་ནས་བོད་དུ་བསྒྱུར་བའི་བོད་ཡིག་གི་གསུང་རབ་ཚང་མ་ཤོག་དྲིལ་བྱས་ཏེ་ཡིག་འབྲུ་དགུ་སྟོང་དྲུག་བརྒྱ་ལ་བམ་པོ་གཅིག་སྟེ། པོད་གཅིག་གི་ཚད་དུ་བརྩིས་པ་མ་ཟད། དེ་ཡང་ཡི་གེ་ཆེན་པོ་མ་གཏོགས་ཆུང་ཆུང་བྲིས་མི་ཆོག་པའི་བཀའ་ཕབ་ཡོད་པ་དང༌། ཆོས་བཤད་མཁན་སློབ་དཔོན་དང་མཁན་པོ། དགེ་རྒན་བཅུ་གསུམ། སློབ་ཕྲུག་ཉི་ཤུ་རྩ་ལྔ། སྒོམ་ཆེན་ཉི་ཤུ་རྩ་ལྔ་བཅས་ལ་ཟླ་རེར་ཤོག་བུ་བཅུ་དེབ་བཞི་ནས་གཉིས་བར་ཕོགས་རིམ་ཆེ་ཆུང་གཞིར་བཟུང་སྤྲོད་ཀྱི་ཡོད་པ་དང༌། རྒྱལ་པོའི་ལས་དོན་གལ་ཆེའི་རིགས་བཀའ་བརྩིགས་ཤོག་བུའི་ཐོག་བྲིས་ནས་བང་མཛོད་དུ་བཞག་པའི་ལོ་རྒྱུས་ཡོད།
དུས་རབས་བཅུ་བཞི་པའི་དཀྱིལ་དུ་བོད་ལ་པར་སྐྲུན་ལག་རྩལ་དར་འགོ་ཚུགས་པ་དང་དུས་མཚུངས། ཤོག་བུ་བཟོ་བའི་ལག་རྩལ་དར་ཁྱབ་ཆེ་ཞིང༌། ལག་རྩལ་གྱི་ཆུ་ཚད་ཇེ་མཐོར་ཕྱིན་ཡོད་པ་སྐབས་དེར་རྗེ་བཙུན་ཙོང་ཁ་པའི་གསུང་འབུམ་དགའ་ལྡན་དཔར་རྙིང་ཆ་ཚང་པར་བརྒྱབ་པ་དང༌། དཔེ་ཆ་སྣ་ཁ་རེ་རེ་རྐྱང་པ་པར་བརྒྱབ་པ་ཁག་གཅིག་དེ་སྔོན་དགའ་ལྡན་དགོན་པར་མཇལ་རྒྱུ་ཡོད་པ་དེ་དག་གི་ཤོག་བུ་ཚང་མ་བོད་ཤོག་ཤ་སྟག་ཡིན་པ་དང༌། ལོ་མང་སོང་བའི་དབང་གིས་མདོག་སེར་པོ་ལྟ་བུ་ཆགས་པ་ལས་འབུ་སྐྱོན་མེད་པ་དང༌། འཇམ་ཤ་དོད་པོ་ཡོད་འདུག པོ་ཏ་ལའི་ཕོ་བྲང་དམར་པོ་གསར་བཞེངས་གནང་སྐབས་བོད་དུ་ཤོག་བུའི་རིགས་མང་པོ་ཡོད་པ་རྒྱ་ནག་ནས་ཐོན་པའི་རྒྱ་ཤོག་དང༌། གན་ཤོག་ཇུ་ཙེ་གསུམ་ཕུད། གཙང་སྙེ་མོ་ཁུལ་ནས་ཐོན་པའི་གཙང་ཤོག མཚོ་སྣ་ནས་ཐོན་པའི་མཚོ་ཤོག དྭགས་པོ་སྟོད་ནས་ཐོན་པའི་དྭགས་ཤོག དྭགས་པོ་སྨད་ནས་ཐོན་པའི་སྐྱེམས་ཤོག སྟོད་གཉའ་ནང་ནས་ཐོན་པའི་གཉའ་ཤོག ཆབ་མདོ་བྲག་གཡབ་ནས་ཐོན་པའི་ཁམས་ཤོག་བཅས་ཡོད་ཐོག ད་དུང་འབྲུག་ཡུལ་ནས་ཐོན་པའི་ལྷོ་ཤོག མོན་ཡུལ་ནས་ཐོན་པའི་མོན་ཤོག་བཅས་བེད་སྤྱོད་གནང་ཡོད་ཚུལ་གསེར་གདུང་འཛམ་གླིང་རྒྱན་གཅིག་གི་དཀར་ཆག་ནང་གསལ། སྐབས་དེར་བེད་སྤྱོད་བྱ་རྒྱུའི་བོད་ཤོག་རྣམས་ས་གནས་སོ་སོར་བཟོ་ཁྲལ་བཀལ་ཏེ་བཟོ་རུ་བཅུག་པ་ལས། ལྷ་སར་ཤོག་བུའི་བཟོ་གྲྭ་བཙུགས་པའི་ལོ་རྒྱུས་མཐོང་ཐོས་མ་བྱུང་ཞིང༌། བོད་ཀྱི་ཤོག་བུ་སྣ་ཚོགས་ཀྱི་བཟོ་སྟངས་ལག་རྩལ་སྐོར་དེའུ་དམར་དགེ་བཤེས་བསྟན་འཛིན་ཕུན་ཚོགས་ཀྱིས་མཛད་པའི་བཟོ་ཡིག་པ་ཊ་ཞེས་པའི་གནང་གསལ་བ་བཅས་སོ།། །།
ཕོ་བྲང་པོ་ཏ་ལའི་དཀར་ཆག་རྒྱས་པ་བོད་ཡུལ་རྒྱན་གཅིག་ལས་བཏུས།
