སྤེལ་ཞིབ་ཕྲ།
རྣལ་འབྱོར་དབང་ཕྱུག་དཔལ་ལྡན་དགོན་པ་བའི་རྣམ་ཐར།
མཛད་པ་པོ། ཡོངས་འཛིན་ཡེ་ཤེས་རྒྱལ་མཚན། ༈ ཇོ་བོ་རྗེས་བྱང་ཆུབ་ལམ་གྱི་རིམ་པའི་མན་ངག་གསན་བརྒྱུད་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་གཉིས་བྱུང་ཞིང་། ཇོ་བོ་རྗེས་འབྲོམ་རིན་པོ་ཆེ་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་ཀྱི་མན་ངག་གཉིས་གཅིག་ཏུ་བསྲེས་ནས་བཤེས་གཉེན་བསྟེན་ཚུལ་ནས་ཞི་ལྷག་གི་བར་བྱང་ཆུབ་ལམ་གྱི་རིམ་པའི་ལུས་གཅིག་ཏུ་དྲིལ་ནས་གནང་བས་དེ་ཕྱིན་ལ་རྒྱུད་པ་གཉིས་སོ་སོར་མེད་ཀྱི་ཇོ་བོ་ཡབ་སྲས་ལ་སློབ་མ་བསམ་གྱིས་མི་ཁྱབ་པ་བྱུང་བས་བརྒྱུད་ཚུལ་མཐའ་ཡས་པ་ཡོད་མོད་ཀྱང་གཙོ་བོ་ཡོངས་སུ་གྲགས་པ་ནི་ཇོ་བོ་ཡབ་སྲས་ནས་དགེ་བཤེས་དགོན་པ་བ། དེ་ནས་སྣེའུ་ཟུར་པ་སོགས་ལ་རིམ་གྱིས་བརྒྱུད་པ་དང་། འབྲོམ་རིན་པོ་ཆེ་ནས་དགེ་བཤེས་སྤྱན་སྔ་བ། དེ་ནས་བྱ་ཡུལ་བ་སོགས་ལ་བརྒྱུད་པ་དང་། འབྲོམ་རིན་པོ་ཆེ་ནས་དགེ་བཤེས་པོ་ཏོ་བ། དེ་ནས་ཤ་ར་བ་སོགས་ལ་བརྒྱུད་པ་གསུམ་བྱུང་ངོ་། །དགེ་བཤེས་སྤྱན་སྔ་བ་ནས་བརྒྱུད་པ་ལ་བཀའ་གདམས་གདམས་ངག་པ་དང་། དགེ་བཤེས་པོ་ཏོ་བ་ནས་བརྒྱུད་པ་ལ་བཀའ་གདམས་གཞུང་པ་ཞེས་ཐ་སྙད་མཛད་དོ།།
འབྲོམ་གྱི་སློབ་མ་ཁམས་ལུང་པའི་རྣམ་ཐར།
མཛད་པ་པོ། ཡོངས་འཛིན་ཡེ་ཤེས་རྒྱལ་མཚན། ཁམས་པ་ལུང་པ་ཆེན་པོ་ནི། འཕན་ཡུལ་ཡུང་བར་ 1025 ཤིང་མོ་གླང་མ་འཁྲུངས། རུས་སྒང་། རྟེན་དགེ་བསྙེན་ཡིན་མཚན་ཤཱཀྱ་ཡོན་ཏན། གཞོན་པའི་དུས་སྡེ་སྣོད་ལ་ཡང་སྦྱངས་པ་མཛད་དེ། ཉིད་ཀྱི་ཞལ་ནས། ངས་ལྷ་ས་སྙེ་ཐང་དུ་བ་མ་ཡིན་པ་དང་རྟ་མ་ཡིན་པ་ལ་མི་ཚེ་བསྐྱལ་ཞེས་གྲགས། སྙེ་ཐང་དུ་ཇོ་བོ་ཉིད་དང་མཇལ་ཞིང་ཕྱིས་ར་སྒྲེང་དུ་དགེ་བཤེས་སྟོན་པ་ཡུན་རིང་དུ་བསྟེན་ཅིང་སྐུ་མཆེད་གསུམ་མམ་བཞི་ཞེས་གྲགས།
འདུལ་འཛིན་གྲགས་པ་རྒྱལ་མཚན་གྱི་རྣམ་ཐར་སྙིང་བསྡུས།
འདུལ་འཛིན་གྲགས་པ་རྒྱལ་མཚན་ནི། མལ་གྲོ་གུང་དཀར་རྫོང་ཉི་མ་ལྕང་རྭ་ཤང་སྦྲང་མདའ་ཞེས་པར་རབ་བྱུང་དྲུག་པའི་ཤིང་སྟག་ལོ་སྟེ་སྤྱི་ལོ་ ༡༣༧༤ ལོར་སྐུ་འཁྲུངས། ཆུང་ངུ་ནས་གདན་ས་ཐེལ་དུ་སྤྱན་སྔ་ཆོས་ཀྱི་རྒྱལ་པོའི་གཟིམ་དཔོན་མཛད། དེ་རྗེས་རྗེ་ཙོང་ཁ་པ་ཆེན་པོ་ལ་མི་ཕྱེད་པའི་དད་པ་བརྙེས་ནས་མདོ་སྔགས་ཀྱི་ཆོས་སྐོར་རྒྱ་ཆེན་གསན་བསམས་གནང་སྟེ་རྗེ་བདག་ཉིད་ཆེན་པོའི་སྲས་ཀྱི་ཐུ་བོར་གྱུར།
འབྲོམ་སྟོན་པ་རྒྱལ་བའི་འབྱུང་གནས་ཀྱི་རྣམ་ཐར།
མཛད་པ་པོ། ཡོངས་འཛིན་ཡེ་ཤས་རྒྱལ་མཚན། ༈ ལམ་བཟང་གསལ་མཛད་སྟོན་པ་རིན་པོ་ཆེ། །ཞེས་བསྔགས་པ། འབྲོམ་སྟོན་པ་རྒྱལ་བའི་འབྱུང་གནས་ཞེས་མཚན་ཡོངས་སུ་གྲགས་པ་དེ་ནི། སྔོན་བསྐལ་པ་དཔག་ཏུ་མེད་པའི་སྔ་རོལ་ནས་ཐུགས་བསྐྱེད་དེ་རྫོགས་སྨིན་སྦྱང་གསུམ་མཐར་ཕྱིན་ནས་འཕགས་པ་ཐུགས་རྗེ་ཆེན་པོ་ཞེས་སངས་རྒྱས་ཀྱི་ཞིང་ཐམས་ཅད་དུ་གྲགས་ཤིང་སྤྲུལ་པའི་བཀོད་པས་སངས་རྒྱས་ཀྱི་ཞིང་ཐམས་ཅད་དང་མ་དག་པའི་འཇིག་རྟེན་གྱི་ཁམས་ཐམས་ཅད་ཁྱབ་ཅིང་། བདེ་བ་ཅན་དུ་མགོན་པོ་འོད་དཔག་ཏུ་མེད་པའི་སྲས་ཀྱི་ཐུ་བོའི་ཚུལ་བཟུང་བ་སོགས་ཕྱོགས་བཅུའི་སངས་རྒྱས་ཐམས་ཅད་ཀྱི་དྲུང་ན་སྲས་ཀྱི་ཐུ་བོའི་ཚུལ་འཛིན་པ་དང་། ཞིང་ཁམས་ལ་ལར་འཚང་རྒྱ་བའི་ཚུལ་སྟོན་པ་དང་།
དགའ་ལྡན་ཁྲི་ཐོག་གྱ་དྲུག་པ་གཙང་ཐོབ་རྒྱལ་བློ་བཟང་རྒྱལ་མཚན་གྱི་རྣམ་ཐར།
དགའ་ལྡན་ཁྲི་ཐོག་གྱ་དྲུག་པ་གཙང་ཐོབ་རྒྱལ་བློ་བཟང་རྒྱལ་མཚན་མཆོག་ནི། ཡོངས་གྲགས་སུ་སྲིད་སྐྱོང་ལ་མོ་ཤར་ཞེས་ཞུ་སྲོལ་ཡོད་པ་དེ་ཡིན། གཙང་ཐོབ་རྒྱལ་དུ་སྐུ་འཁྲུངས། སེར་བྱེས་གྲྭ་ཚང་གཙང་པ་ཁང་ཚན་དུ་ཆོས་ཞུགས་མཛད། གཞུང་ཆེན་པོའི་སློབ་གཉེར་མཐར་ཕྱིན་པ་གནང་སྟེ་དགེ་བཤེས་ལྷ་རམས་པའི་མཚན་བཏགས་བཞེས། དེ་ནས་རྒྱུད་སྨད་དུ་ཞུགས་ནས་གསང་སྔགས་ཀྱི་སློབ་གཉེར་དང་། མདོ་སྔགས་ཀྱི་ཆོས་རྒྱུན་གསན་བཞེས་བཅས་ཆབས་ཅིག་ཏུ་མཛད། རིམ་བཞིན་བླ་མ་དབུ་མཛད་དང༌། མཁན་པོ། བྱང་རྩེ་ཆོས་རྗེ་བཅས་ཀྱི་ཁྲི་ལ་ཕེབས།
སྔ་འགྱུར་རྙིང་མའི་ཕྱོགས་ཀྱི་རྣམ་ཐར་སྐོར་པོད་དྲུག་དཔར་འགྲེམས།
གཡས་རུ་གཙང་ཧའོ་དགོན་སྔ་འགྱུར་རིག་མཛོད་བསྡུ་སྒྲིག་ཁང་གིས་བསྒྲིགས་ཤིང་། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་གིས་དཔར་བའི་སྔ་འགྱུར་རྙིང་མའི་ཕྱོགས་ཀྱི་རྣམ་ཐར་སྐོར་པོད་དྲུག་པོ་འདིའི། པོད་དང་པོ་རིག་འཛིན་རྒོད་ལྡེམ་དང་། མངའ་རིས་པཎ་ཆེན། བྱང་པ་རིག་འཛིན་ངག་གི་དབང་པོ་སོགས་བྱང་གཏེར་བླ་མ་གོང་མའི་རྣམ་ཐར་ཁག་གཅིག་དང་། པོད་གཉིས་པ་དང་གསུམ་པ་གཉིས། རྡོར་བྲག་རིག་འཛིན་པདྨ་འཕྲིན་ལས་ཀྱི་རང་རྣམ་སྟོད་སྨད་གཉིས། པོད་བཞི་པར་རྡོར་བྲག་རིག་འཛིན་སྐལ་བཟང་པདྨ་དབང་ཕྱུག་གི་རང་རྣམ། པོད་ལྔ་པ་འདུས་པ་མདོའི་དབང་གི་བླ་མ་བརྒྱུད་པའི་རྣམ་ཐར་༼སྔ་འགྱུར་བཀའ་མའི་ཆོས་འབྱུང་༽ པོད་དྲུག་པ་གཏེར་བཏོན་ཆོས་འབྱུང་། བཅས་ཡིན།