Featured on མི་སྣ་ངོ་སྤྲོད།

མཛད་པ་པོ། ཡོངས་འཛིན་ཡེ་ཤེས་རྒྱལ་མཚན།   ༈ ཇོ་བོ་རྗེས་བྱང་ཆུབ་ལམ་གྱི་རིམ་པའི་མན་ངག་གསན་བརྒྱུད་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་གཉིས་བྱུང་ཞིང་། ཇོ་བོ་རྗེས་འབྲོམ་རིན་པོ་ཆེ་ལ་རྒྱ་ཆེན་སྤྱོད་རྒྱུད་དང་། ཟབ་མོ་ལྟ་རྒྱུད་ཀྱི་མན་ངག་གཉིས་གཅིག་ཏུ་བསྲེས་ནས་བཤེས་གཉེན་བསྟེན་ཚུལ་ནས་ཞི་ལྷག་གི་བར་བྱང་ཆུབ་ལམ་གྱི་རིམ་པའི་ལུས་གཅིག་ཏུ་དྲིལ་ནས་གནང་བས་དེ་ཕྱིན་ལ་རྒྱུད་པ་གཉིས་སོ་སོར་མེད་ཀྱི་ཇོ་བོ་ཡབ་སྲས་ལ་སློབ་མ་བསམ་གྱིས་མི་ཁྱབ་པ་བྱུང་བས་བརྒྱུད་ཚུལ་མཐའ་ཡས་པ་ཡོད་མོད་ཀྱང་གཙོ་བོ་ཡོངས་སུ་གྲགས་པ་ནི་ཇོ་བོ་ཡབ་སྲས་ནས་དགེ་བཤེས་དགོན་པ་བ། དེ་ནས་སྣེའུ་ཟུར་པ་སོགས་ལ་རིམ་གྱིས་བརྒྱུད་པ་དང་། འབྲོམ་རིན་པོ་ཆེ་ནས་དགེ་བཤེས་སྤྱན་སྔ་བ། དེ་ནས་བྱ་ཡུལ་བ་སོགས་ལ་བརྒྱུད་པ་དང་། འབྲོམ་རིན་པོ་ཆེ་ནས་དགེ་བཤེས་པོ་ཏོ་བ། དེ་ནས་ཤ་ར་བ་སོགས་ལ་བརྒྱུད་པ་གསུམ་བྱུང་ངོ་། །དགེ་བཤེས་སྤྱན་སྔ་བ་ནས་བརྒྱུད་པ་ལ་བཀའ་གདམས་གདམས་ངག་པ་དང་། དགེ་བཤེས་པོ་ཏོ་བ་ནས་བརྒྱུད་པ་ལ་བཀའ་གདམས་གཞུང་པ་ཞེས་ཐ་སྙད་མཛད་དོ།།

མཛད་པ་པོ། ཡོངས་འཛིན་ཡེ་ཤེས་རྒྱལ་མཚན། ཁམས་པ་ལུང་པ་ཆེན་པོ་ནི། འཕན་ཡུལ་ཡུང་བར་ 1025 ཤིང་མོ་གླང་མ་འཁྲུངས། རུས་སྒང་། རྟེན་དགེ་བསྙེན་ཡིན་མཚན་ཤཱཀྱ་ཡོན་ཏན། གཞོན་པའི་དུས་སྡེ་སྣོད་ལ་ཡང་སྦྱངས་པ་མཛད་དེ། ཉིད་ཀྱི་ཞལ་ནས། ངས་ལྷ་ས་སྙེ་ཐང་དུ་བ་མ་ཡིན་པ་དང་རྟ་མ་ཡིན་པ་ལ་མི་ཚེ་བསྐྱལ་ཞེས་གྲགས། སྙེ་ཐང་དུ་ཇོ་བོ་ཉིད་དང་མཇལ་ཞིང་ཕྱིས་ར་སྒྲེང་དུ་དགེ་བཤེས་སྟོན་པ་ཡུན་རིང་དུ་བསྟེན་ཅིང་སྐུ་མཆེད་གསུམ་མམ་བཞི་ཞེས་གྲགས།