སྤེལ་ཞིབ་ཕྲ།
འོ་བརྒྱལ་ཐང་ཞེས་པའི་ས་མིང་དང་ཇོ་བོ་འོ་བརྒྱལ་བྱུང་ཚུལ་ལ་དཔྱད་པ།
སྐྱུ་རའི་རླུང་བུས། སྔར་འོ་མའི་ཐང་ཞེས་བརྗོད་ལ་ད་ལྟ་འོ་བརྒྱལ་ཐང་ཞེས་བརྗོད་པའི་ས་ཡུལ་དེ་ནི། སྔར་མེས་སྲོང་བཙན་སྐབས་ནས་འགྲུལ་བཞུད་ཀྱི་གདོང་ཁ་གཏོད་སའི་ལྟེ་བའི་གནས་གཞིས་ཤིག་ཡིན་པ་མ་ཟད་རྒྱལ་རབས་ཆོས་འབྱུང་ཁག་ལས་ཀྱང་ལྟེ་བའི་ས་གནས་ཤིག་ལ་ངོས་བཟུང་ཡོད། གནས་དེར་འོ་བརྒྱལ་ཐང་ཞེས་ཐོགས་ཚུལ་ལའང་། ཆོས་འབྱུང་འགའ་ཞིག་ལས་རྒྱལ་པོ་སྲོང་བཙན་འདས་ཤིང་མང་སྲོང་མང་བཙན་སྐབས་བོད་ལ་རྒྱའི་དམག་དྲངས་ནས་ཡུལ་གཞིས་ཅི་དྲག་བཅོམ་སྟེ་སྟོན་པ་དགུང་ལོ་བཅུ་གཉིས་པའི་ཚད་ཇོ་བོ་ཤཱཀྱ་མུ་ནི་དེ་ཉིད་རྒྱ་ནག་ཏུ་གདན་དྲངས་པའི་སྐབས་སུ་དང་པོ་རྟ་པ་མི་གཅིག་གིས་པང་དུ་ཐེག་པ་དང་རྗེས་སུ་མ་ཐེག་པར་དྲ་བར་བཅུག་སྟེ་མི་སུམ་བརྒྱས་སྒོར་ཕྱུང་བ་དང་། དེ་ནས་མི་སྟོང་གིས་མ་ཐེག་པར་ད་ལྟའི་འོ་བརྒྱལ་ཐང་འདིར་བྱེ་མའི་གཏིང་རུམ་དུ་སྦས་པས་ཇོ་བོ་འོ་བརྒྱལ་བྱུང་ནས་འོ་བརྒྱལ་ཐང་ཞེས་གྲགས་པ་རེད་ཟེར་བ་དང་། ཡང་ཇོ་བོ་གདན་དྲངས་པའི་སྐབས་སུ་དོ་མོའི་ཐང་ལ་ཟླ་ཤས་འོ་བརྒྱལ་བྱུང་ནས་འོ་བརྒྱལ་ཐང་ཞེས་གྲགས་པ་རེད་ཟེར་བ། གཞན་ཡང་། ཇོ་བོ་རྣམ་གཉིས་ཀྱི་རྟེན་ཁང་བརྗེ་སྲོོལ་བྱུང་བའི་ཆ་གཞི་ཐོག་མ་ཡང་དེ་སྐབས་ནས་བྱུང་བ་སོགས་བཞེད་ཚུལ་མང་མོད། ཅིའི་ཆ་ནས་དཔྱད་གཞི་ལས་ཐག་གཅོད་མི་རུང་ཡང་། དེ་དག་ཁུངས་དག་པར་མི་སྣང་སྙམ་སྟེ། …
ཆོས་རྒྱལ་སྲོང་བཙན་སྒམ་པོས་བཞེངས་པའི་གཙུག་ལག་ཁང་བཅུ་གཉིས།
དེ་ཡང་ཆོས་རྒྱལ་སྲོང་བཙན་སྒམ་པས་ལྷ་ལྡན་ས་ར་འཁྲུལ་སྣང་གི་གཙུག་ལག་མ་བཞེངས་པའི་སྔོན་དུ་གཙུག་ལག་ཁང་བཅུ་གཉིས་བཞེངས་པ་རྣམས་ནི། མཐའ་འདུལ་གྱི་གཙུག་ལག་ཁང་བཞི་དང་། ཡང་འདུལ་གྱི་གཙུག་ལག་ཁང་བཞི། རུ་གནོན་གྱི་གཙུག་ལག་ཁང་བཞི་བཅས་ཡིན་ལ། གཙུག་ལག་ཁང་འདི་དག་བཞེངས་དགོས་པའི་རྒྱུ་རྐྱེན་ནི། བཀའ་ཆེམས་ལས། དེ་ནས་བལ་མོ་བཟའི་ལྷ་ཁང་བརྩིག་ཏུ་བཏུབ་པར་མཁྱེན་ནས། སྐྱེ་བོ་ཐ་མལ་པ་ཐམས་ཅད་ཀྱིས་མི་མཐོང་བར་བྱ་བའི་ཕྱིར། ཆར་ཟམ་ཟིམ་ཕབ་སྟེ་ན་བུན་དུ་གཏིབས་ནས། རྒྱལ་པོ་ལ་ཁྲི་བཙུན་གྱིས་ཞུས་པ། ཆད་བཙན་པར་བྱ་བའི་ཕྱིར་དང༌། བལ་རྗེ་ལ་ཆད་པའི་བཀའ་བཙན་པར་བྱ་བའི་དང༌། བོད་ཡུལ་ཁ་བ་ཅན་དུ་ཉེས་པ་ཐམས་ཅད་ནུབ་པར་བྱ་བ་དང༌། ལེགས་པ་ཐམས་ཅད་དར་ཞིང་རྒྱས་པར་འབྱུང་བ་དང༌། བོད་ཡུལ་ཁ་བ་ཅན་གྱི་སེམས་ཅན་རྣམས་ཀྱི་བསོད་ནམས་བསོག་པའི་ཕྱིར་དུ། དམ་པའི་ཆོས་ལ་སོགས་པ་དགེ་བ་བཅུའི་ལས་ཐམས་ཅད་འབྱུང་བར་བྱ་བའི་དོན་ཆེད་དུ་ལྷ་ཁང་རྩིག་པ་ལ། རྒྱལ་པོས་སྐུ་ལུས་ཀྱི་བཀོད་པ་ལྔ་སྟོང་དུ་སྤྲུལ་ནས་ལ་ལས་ས་བསྐྱས། ལ་ལས་རྡོ་བསྐྱས། ལ་ལས་ཤིང་བཅད་དེ་བསྐྱས། ལ་ལས་སྤང་ལེབ་བཞོགས། ལ་ལས་རྡོ་བཏང༌། ལ་ལས་འདམ་པ་བཏང༌། ལ་ལས་རྩིག་པ་རྩིགས། ལ་ལས་གླུ་ལེན་གར་བྱེད་ཀྱི་གྱང་བཅགས་ནས། ལ་ལས་ཤར་རྩིགས། ལ་ལས་ལྷོ་རྩིགས། ལ་ལས་ནུབ་རྩིགས། ལ་ལས་བྱང་རྩིགས། སྤྲིན་དང་ན་བུན་འཁྲིགས་པ་དེའི་གསེབ་ན་ཀུ་དི་རི་ཅོ་དི་རི་རྩིགས་སོ། །
སྙེ་མོ་རྫོང་ཁོངས་ཀྱི་དགོན་སྡེ་ཁག་གི་གནས་ཡིག
སྙེ་མོ་རྫོང་། སྙེ་མོ་ཞེས་པ་ནི། ཡུལ་དེའི་སོ་ནམ་བྱེད་སྟངས་ལེགས་ཤིང་ལོ་ཏོག་གི་སྙེ་མའང་ཕོ་མོར་དབྱེར་ཏེ་ཕོ་ཞན་ཞིང་མོ་ལེགས་པར་རྩིས་ནས་སྙེ་མོ་ཞེས་པའི་མིང་དེ་ལྟར་བྱུང་། ད་ལྟའི་རྫོང་ཆགས་ཡུལ་ནི་སྔོན་གྱི་སྙེ་མོ་རྫོང་ཤུལ་གྱི་ཤར་ངོས་དར་གྲོང་ཞེས་པར་ཡོད། རྫོང་དེའི་སྤྱིའི་རྒྱ་ཁྱོན་སྤྱི་ལེ་གྲུ་བཞི་མ་༣༢༧༥དང་ས་ཞིང་མུའུ་ཁྲི་༤.༣ནགས་ཚལ་མུའུ་ཁྲི་༢༥.༦མི་འབོར་ཁྲི་༢.༨སྤྱིར་ཤར་ངོས་དམའ་ལ་ནུབ་ངོས་མཐོ་བའི་ས་བབས་དང་། རི་བོ་མཐོ་ཤོས་ཇོ་མོ་གངས་དཀར་ནི་རྒྱ་མཚོའི་ངོས་ལས་སྤྱི་ཁྲེ་༧༠༤༨ཀྱི་མཐོ་བ་དང་། ས་བབས་དམའ་ཤོས་ཡར་ཀླུངས་གཙང་འགྲམ་དུ་རྒྱ་མཚོའི་ངོས་ལས་སྤྱི་ཁྲེ་༣༧༠༠ཙམ་ཆ་སྙོམ་རྒྱ་མཚོའི་ངོས་ལས་སྤྱི་ཁྲེ་༤༠༠༠གིས་མཐོ་བའི་ཞིང་ལས་གཙོ་རྒྱུར་འབྲོག་ལས་ཀྱང་གཉེར་བའི་རྫོང་ཞིག་ཡིན།
འཕན་པོ་ལྷུན་གྲུབ་རྫོང་ཁོངས་ཀྱི་དགོན་སྡེ་ཁག་གི་གནས་ཡིག
ལྷུན་གྲུབ་རྫོང་། ལྷུན་གྲུབ་ཅེས་པ་ནི། མ་བསྒྲུབ་ལྷུན་གྱིས་གྲུབ་པའི་དོན་དུ་གོ་ཞིང་སྔོན་མིང་ལྷུན་གྲུབ་རྫོང་གི་མིང་རང་སོར་བཞག་པ་དང་། སྔོན་གྱི་ལྷུན་གྲུབ་རྫོང་ནི་ད་ལྟའི་རྫོང་གནས་ཡུལ་ནས་བྱང་ངོས་ཆག་ལའི་ཕྱོགས་སུ་སོང་ན་སྤྱི་ལེ་བཞི་ལྔ་ཙམ་གྱི་ས་ན་རྫོང་ཞོལ་ཞེས་པར་ཡོད། ད་ལྟའི་རྫོང་གནས་ཡུལ་ནི་ལྷ་ས་ནས་སྤྱི་ལེ་༦༥ཙམ་སོང་ན་འཕན་པོ་དགའ་ལྡན་ཆོས་འཁོར་དུ་གནས་ཡོད། རྫོང་དེའི་རྒྱ་ཁྱོན་སྤྱི་ལེ་གྲུ་བཞི་༤༥༡༧དང་ས་ཞིང་མུའུ་ཁྲི༡༨རྩྭ་ཐང་མུའུ་༣༧༡༨ཤིང་ནགས་རྒྱ་ཁྱོན་མུའུ་༡༣༢མི་འབོར་ཁྲི་༥.༢ལ་ཉེ་བ་ཆ་སྙོམ་རྒྱ་མཚོའི་ངོས་ལས་སྤྱི་ཁྲེ་༣༩༠༠ཙམ་མཐོ་བའི་ས་བབས་ཅན་གྱི་ཞིང་ལས་གཙོ་བོར་བྱེད་ལ་ས་མ་འབྲོག་གི་རྫོང་ཞིག་ཡིན།
འདམ་གཞུང་རྫོང་དང་། ཡངས་པ་ཅན། སྒ་ལོ་དགོན། ལ་ཐོག་སྒར་པ། གནམ་མཚོ། རྐྱང་རག་དགོན་བཅས་ཀྱི་གནས་ཡིག
འདམ་གཞུང་རྫོང་། འདམ་གཞུང་ཞེས་པ་ནི། ན་འདམ་གྱི་གཤོངས་སམ་གཞུང་རྒྱ་ཆེན་པོ་ཞིག་ཡིན་སྟབས་འདམ་གཞུང་དང་། ཡང་ས་དེ་སོག་པོས་བདམས་པའི་ལུང་གཞུང་ཞིག་ཡིན་སྟབས་འདམ་གཞུང་ཞེས་སོགས་བཤད་སྲོལ་མི་འདྲ། རྫོང་དེའི་སྤྱིའི་རྒྱ་ཁྱོན་ནི་སྤྱི་ལེ་ངོས་སྙོམ་གྲུ་བཞི་མ་10036དང་། བེད་སྤྱོད་ཆོག་པའི་རྩྭ་རྭ་མུའུ་ཁྱི་1050མི་འབོར་ཁྲི་3.6ས་བབས་མཐོ་ཤོས་ལ་རྒྱ་མཚོའི་ངོས་ལས་སྤྱི་ཁྲི་7200དང་ཆ་སྙོམས་རྒྱ་མཚོའི་ངོས་ལས་སྤྱི་ཁྲེ་4200མཐོ་བ། ས་ཁྱད་ནི་བྱང་ཤར་མཐོ་ལ། ལྷོ་ནུབ་དམའ་བ་བཅས་གཉེན་ཆེན་ཐང་ལྷའི་རི་འདབས་དང། མཚོ་བོད་རླངས་འཁོར་འགྲོ་ལམ་གྱི་བརྒྱུད་དུ་ཆགས་པའི་འབྲོག་ལས་ཀྱི་རྫོང་ཞིག་ཡིན།
སྙེ་ཐང་ལྷ་ཆེན་མོ་ཞེས་པའི་བྲག་བརྐོས་ཀྱི་ལོ་རྒྱུས་རགས་བསྡུས།
སྙེ་ཐང་ལྷ་ཆེན་མོའི་བྱུང་བ་ངེས་པ་གསལ་བྱེད།དེ་ལ་བོད་ཡུལ་གྱི་གཞི་འདིར་དུས་ཀྱི་འཁོར་ལོའི་འགྲོས་དང་རིག་གནས་ཀྱི་རྒྱུན་དང་འགྲོགས་ཏེ། བྲག་བརྐོས་ཀྱི་སྒྱུ་རྩལ་ཕུན་སུམ་ཚོགས་པ་ཤིག་བྱུང་ཡོད་ལ། དེ་ལ་ལྷ་སའི་ནུབ་འདབས་སུ་གནས་པའི་སྙེ་ཐང་ལྷ་ཆེ་མོ་ཞེས་པ། གཉན་མཁར་ནག་གི་བྲག་ལ་བརྐོས་པ་འདི་ཉིད་ལ། ད་བར་ལོ་རྒྱུས་སྨྲ་བ་དང་དད་ལྡན་པ། ལྷ་རིས་པ་སོགས་ཀྱིས་བཙན་པོའི་དུས་རབས་དང་། སིལ་བུའི་དུས་དང་བལ་རིས་ལུགས་དང་། ཤུན་པས་བཞེངས་རབས་དང་། རང་བྱོན་ཡིན་རབས་སོགས་སྣ་ཚོགས་པ་ཅིག་གསུང་གི་ཡོད་ལུགས་ལ་ལྷ་ས་གྲོང་ཁྱེར་སྲིད་གྲོས་ཀྱི་རིག་གནས་ལོ་རྒྱུ་ཆ་རྩོམ་སྒྲིག་ཁང་གིས་ཆུ་ཤུར་རྫོང་གི་ལོ་རྒྱུས་སུ་བཀོད་འདུག དེར་བརྟགས་ན་ཚོད་དཔགས་དང་། ཤོད་སྲོལ་ཙམ་མ་གཏོགས་ལོ་རྒྱུས་ཀྱི་རང་བཞིན་ཅན་ངེས་པ་སྟེར་བའི་ཁུངས་ཁ་གསལ་ནི་མེད་པར་མངོན། དེས་ན་འདིར་དེ་དག་རེ་རེ་ནས་ཞུ་བའི་ངལ་བ་མི་བསྟེན་པར་ལོ་རྒྱུས་དངོས་གང་ཡིན་པ་ངོ་སྤྲོད་ལ་འཇུག་པར་བྱའོ།།