དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོའི་སྐབས་ཀྱི་བོད་ཀྱི་སློབ་དཔོན་ཐོག་མ་ཐོན་མི་སམ་བྷོ་ཊའི་ཕྱག་རྒྱུན་དུ་གྲགས་པའི་སྦལ་ནག་ན་ལ་བགྲད་འདྲའི་ཡི་གེ། དུས་རབས་བདུན་པའི་ནང་བཙན་པོ་མང་སྲོང་མང་བཙན་སྐབས་ཀྱི་ཡིག་མཁན་ཆ་ངར་རིན་ཆེན་འབར་གྱི་ཕྱག་རྒྱུན་སོ་ཕག་གཤིབ་འདྲའི་ཡི་གེ། དུས་རབས་བདུན་པའི་ནང་བཙན་པོ་འདུས་སྲོང་མང་པོ་རྗེའི་སྐབས་ཀྱི་ཡིག་མཁན་ཆབ་དཀར་བེའུ་ཚེའི་ཕྱག་རྒྱུན་བྱ་ཕོ་འཇོལ་འདྲའི་ཡི་གེ། དུས་རབས་བརྒྱད་པའི་ནང་བཙན་པོ་ཁྲི་སྲོང་ལྡེའུ་བཙན་སྐབས་ཀྱི་ཡིག་མཁན་དགེ་བརྙེན་དཀོན་ཅོག་ངག་དབང་གི་ཕྱག་རྒྱུན་ནས་སྔོན་ཕྱིང་དཀར་སྟེང་དུ་བཀྲམས་འདྲའི་ཡི་གེ། དུས་རབས་བརྒྱད་པའི་ནང་བཙན་པོ་ཁྲི་སྲོང་་ལྡེའུ་བཙན་གྱི་སྐབས་ཀྱི་ཡིག་མཁན་འབྲེའུ་ཁྲོམ་གྱི་ཕྱག་རྒྱུན་མུ་ཏིག་ལྟར་ལ་བརྒྱུས་འདྲའི་ཡི་གེ། དུས་རབས་བརྒྱད་པའི་ནང་བཙན་པོ་མི་ནེ་བཙན་པོའི་སྐབས་ཀྱི་ཡིག་མཁན་ཚེ་སྤོང་བྱང་ཆུབ་ཀྱི་ཕྱག་རྒྱུན་སྦུར་ནག་ན་ལ་བགྲད་འདྲའི་ཡི་གེ། དུས་རབས་དགུ་བའི་ནང་བཙན་པོ་མི་ཏིག་བཙན་པོའི་སྐབས་ཀྱི་ཡིག་མཁན་ཐེ་ཡོན་ཏན་གྱི་ཕྱག་རྒྱུན་ཉ་མོ་ཆུ་ནས་ཕྱུང་འདྲའི་ཡི་གེ། དུས་རབས་དགུ་པའི་ནང་བཙན་པོ་ཁྲི་རལ་བ་ཅན་གྱི་སྐབས་ཀྱི་ཡིག་མཁན་ཌ་ཤོད་འབུམ་་མའི་ཕྱག་རྒྱུན་སེང་གེ་གནམ་ལ་འཕྱོངས་འདྲའི་ཡི་གེ།  གངས་སྨྱུག་གིས། ཡོང་ཁུངས། བོད་ཀྱི་ཡིག་གཟུགས་སྒྱུ་རྩལ་འཕྲིན་སྟེགས།

ཚོན་མདངས་རྣམ་པར་བཀྲ་བའི་ཁང་ཚོན་རི་མོ། བོད་ཀྱི་དམངས་ཁྲོད་དུ་དར་ཁྱབ་ཆེ་བའི་སྡོད་ཁང་གི་གྱང་ལྡེབས་དང་བར་ཁྱམས་སོགས་ཀྱི་ངོས་སུ་འོས་ཤིང་འཚམ་པའི་སྒོ་ནས་ཚོན་མདངས་རྣམ་པར་བཀྲ་བའི་རི་མོ་འབྲི་སྲོལ་ཡོད། དེ་ནི་མཛེས་མཚོན་ཙམ་མ་ཟད། དེ་ལས་གལ་ཆེ་བ་ཞིག་ནི་རི་མོ་དེ་དག་བྲིས་ནས་འགལ་རྐྱེན་ཐམས་ཅད་ཞི་ཞིང་མཐུན་རྐྱེན་མཐའ་དག་བདེ་བླག་ཏུ་འགྲུབ་པའི་རྟགས་དང་རྟེན་འབྲེལ་དུ་མ་མཚོན་པར་བྱས་ཡོད། དེ་ཡང་སྤྱི་ལོའི་དུས་རབས་དགུ་པའི་ནང་ནང་པ་སངས་རྒྱས་པའི་ཆོས་ལ་དད་པ་ཡོད་མཁན་ཚོས་སྡོམ་བརྩོན་དམ་པའི་རི་མོ་འདི་བརྩམས་ཏེ་འདིའི་ཐོག་ནས་མཁན་སློབ་ཆོས་གསུམ་མཚོན་པར་བྱས་ཤིང་། དབུས་ཀྱི་མེ་ཏོག་པད་མ་དེ་གསང་སྔགས་རྙིང་མ་བའི་སྲོལ་གཏོད་སློབ་དཔོན་པདྨ་འབྱུང་གནས་མཚོན་པ་དང་། པད་མའི་སྟེང་རལ་གྲི་བསླངས་པ་ནི་འཇམ་དཔལ་དབྱངས་ཀྱི་སྤྲུལ་པ་ཆོས་རྒྱལ་ཁྲི་སྲོང་ལྡེ་བཙན། གཡས་སུ་ངང་སེར་མགོ་གཉིས་ཅན་ནི་སྐད་གཉིས་སྨྲ་བའི་དབང་ཕྱུག་ངུར་སྨྲིག་འཛིན་པ་དང་མཁན་ཆེན་ཞི་བ་འཚོ། གཡོན་དུ་ནེ་ཙོ་མགོ་གཉིས་ཅན་ནི་སྒྲ་བསྒྱུར་གྱི་ལོ་ཙཱ་བ་བཅས་མཚོན་གྱི་ཡོད། དེ་བཞིན་མཐུན་པ་སྤུན་བཞི་དང་ཚེ་རིང་རྣམ་དྲུག་སོགས་འབྲི་སྲོལ་ཡང་ཡོད།