མི་དང་ཁྱི། དམིགས་བུ། 1 ཕྱེད་ཙམ་ཕྱེ་བའི་སྦྲ་ནག་གི་ཁ་ཚུབ་ལས་ཁ་ཆར་འདྲེས་མ་ཞིག་ཐབ་ཀའི་མར་སྒྱེད་ན་དཀྱིལ་དཀྲུང་དུ་བསྡད་དེ་མ་ཎི་ཟློ་བཞིན་པའི་ཨ་ཁུ་བཟོད་པའི་ཞྭ་མོ་དང་ཕྲག་གོང་ལ་ལྷུང་གིན་འདུགཁོང་དང་ཁ་གཏད་དུ་སྡོད་པའི་ངའི་ལས་གྲོགས་ཀྱིས་ཅི་ཡང་མི་སྨྲ་བར་ཐ་མག་རྐང་ཞིག་རྔུབ་འཐེན་བྱེད་ཀྱིན་གདའ།ཨ་ཁུ་བཟོད་པའི་ཆུང་མས་ཨོང་བ་སྒྱེ་མོ་གང་ཁུར་ཡོང་ནས་ཁྱིམ་ལ་བཞག་རྗེས།སླར་ཡང་སྒྱེ་མོ་གཞན་ཞིག་མཆན་ལ་བཙིར་ནས་ཕྱིར་སྒོ་ལ་བུད་སོང་།སྐབས་དེར།སྦྲའི་གཡོན་ཁྱིམ་ན་བཞག་པའི་ལྕགས་རིགས་ཀྱི་སྣོད་ཅ་ཞིག་གི་སྟེང་དུ་ཆུ་ཐིགས་ཟགས་པའི་ཏིང་སྒྲ་ཞིག་བསྟུད་མར་གྲགས་ཡོང་། སྐབས་ཤིག་ལ།ཨ་ཁུ་བཟོད་པས་མདུན་གྱི་ཕོར་བའི་ནང་གི་ཇ་འཕྲོ་དེ་ཧུབ་གཅིག་གིས་འཐུངས་རྗེས།ལོགས་སུ་བཞག་ཡོད་པའི་ཕྲུག་ལྭ་རྙིང་བ་དེ་སློག་པའི་སྟེང་གཡང་ཤམ་བྱས་པ་དང་།ལག་གི་བགྲང་ཕྲེང་གཡོན་ལག་གི་མཁྲིག་མར་དཀྲི་ཞོར་དུ་ཡར་ལངས་ནས་ངེད་གཉིས“ཁྱོད་གཉིས་ཀས་ཇ་འཐུང་ཞོར་ལ་ཏོག་ཙམ་སྒུགས་དང་། ང་སོང་ནས་ལུག་རྣམས་ལྷས་ལ་བསྐྱིལ་ཏེ་འོང”ཟེར། “ཡ་ཡ།ཨ་ཁུ།”ངས་ཅི་ཡང་མ་བཤད་གོང་ལས་གྲོགས་ཀྱིས་དེ་ལྟར་ལན་བཏབ་སོང་། “ཝེ།འུ་གཉིས་འདི་རུ་ཞག་སྡོད་བྱ་རྒྱུ་ཡིན་ནམ།”ཨ་ཁུ་བཟོད་པ་སྒོར་བུད་རྗེས་ངས་ལས་གྲོགས་ལ་དེ་ལྟར་ཤུབ་བུར་དྲིས། “འོ་ལེ།”ལས་གྲོགས་ཀྱིས་ཅི་མི་སྙམ་པར་མགོ་ལྕོག་ལྡེམ་ཙམ་བྱས། “འདི་རུ་འུ་གཉིས་ལ་མལ་ས་ཞིག་ཡོད་དམ།”ངས་ཆུ་ཐིགས་ཀྱིས་བརླན་པའི་ཁྱིམ་ཕུགས་ལ་མིག་མྱུར་ཙམ་བྱེད་ཞོར་སླར་ཡང་སྐད་དམའ་མོས་ལས་གྲོགས་ལ་དེ་ལྟར་དྲིས། “གང་ལྟར།སྡོད་ཐབས་བྱེད་དགོས།”ལས་གྲོགས་སྔར་ལྟར་ཅི་མི་སྙམ་པར་འདུག “དོ་ནུབ་འུ་གཉིས་ཀ་འཁྱགས་ཤི་ཐེབས་ངེས།”ང་ལ་གློ་བུར་བའི་གྲང་འདར་ཞིག་བྱུང་། “དེ་འདྲ་ཡིན་ཚེ།ཁོ་ཚོ་སྔ་མོ་ནས་ཤི་ཚར་ཡོད་ངེས།”གྲོགས་པོ་ཅུང་མ་རངས་པ་འདྲ། “ཁོ་ཚོ་ཨེ། ཁོ་ཚོ་འཚོ་བ་འདིར་གོམས་ཡོད།” “ཧིན་ཧིན།རྗེས་སོར་ཁྱོད་ཀྱང་གོམས་ངེས།འདི་ཚད་ལ་གོམས་ངེས།” “་་་་་་” ངེད་གཉིས་ཀྱི་ཁ་བརྡ་རེ་ཞིག་མཇུག་གྲིལ་སོང་།ལས་གྲོགས་ཡུལ་ཚོ་འདིའི་སྲིད་གཞུང་གི་བྱ་བར་ཞུགས་ནས་ལོ་རེ་འགའ་འགོར་ཟིན་པས།ད་ནི་འཚོ་བ་འདིར་དངོས་གནས་གོམས་ཤིང་འདྲིས་ཡོད་ཚོད་རེད།ཁོ་དང་འདྲ་བར་ངའི་ལས་ཀའང་ཡུལ་ཚོའི་ཁོངས་གཏོགས་ཀྱི་རི་སྡེ་འདིའི་དཔྱ་ཁྲལ་བསྡུ་རྒྱུ་དེ་ཡིན།དེའི་སྟབས་ཀྱིས་ལས་གྲོགས་ཀྱིས་ཐེངས་འདིར་ཆེད་དུ་ང་ཁྲིད་ནས་“འཚོ་བར་རྒྱུས་ལོན”བྱེད་དུ་ཡོང་བ་ཡིན།ཁོས་ང་ལ“འུ་གཉིས་ཀྱི་དཔྱིད་ཀ་ཧྲིལ་བོའི་ལས་ཀ་ནི།འདི་ལྟར་སོ་སོར་ལས་བགོས་ཀྱི་རུ་སྡེ་ལ་སོང་ནས་དུད་ཁྱིམ་རེ་རེར་ལོ་རེའི་ཁྲལ་འགན་གྱི་བྱང་བ་ཕར་སྟེ་བ་དང་།དཔྱ་ཁྲལ་ཆད་ལྷག་མེད་པར་ཚུར་སྤྲོད་དགོས་ཚུལ་བརྒྱུད་སྒྲོག་བྱེད་རྒྱུ་དེ་ཡིན”ཟེར། ཁོས་ད་དུང་ཧ་ཅང་གཟབ་ནན་གྱི“འཇིག་རྟེན་འདིར་ཆེས་དོན་སྙིང་མེད་པའི་ལས་ཀ་ནི་ཏག་ཏག་ལ་དཔྱ་ཁྲལ་བསྡུ་རྒྱུ་འདི་ཡིན།དེ་བས།དཔོན་པོའི་རྒྱབ་རྫི་འདྲ་ཡོད་ན་ཅིས་ཀྱང་ལས་སྤོར་བྱེད་དགོས”ཞེས་ཡང་ཡང་ལབ།དེ་ནི་ཕལ་ཆེར་ང་ཁོ་དང་འདྲིས་ལོབས་བྱུང་བའི་རྒྱུ་རྐྱེན་གཞན་ཞིག་ཀྱང་ཡིན་ངེས། “ཨ་ཨ། འཁྱག་པ་ལ་ཨང་།”ང་ལ་སླར་ཡང་གྲང་འདར་གློ་བུར་བ་ཞིག་བྱུང་། “མེ་བྲུསདང་།”ལས་གྲོགས་ཀྱིས་གོ་འགྲམ་གྱི་མེ་ཡོག་ང་ལ་སྤྲད། “མེ་སྔར་ནས་བྲུས་ཚར་འདུག”ཅུང་མ་རངས་པར་དེ་ལྟར་བཤད་པས།ལས་གྲོགས་ཡར་ལངས་ནས་ཨོང་ལུས་འདྲེས་མ་ཞིག་ཐབ་ཀར་དེད།ཐབ་ཀའི་གོ་ཁུང་ལས་ཨོང་བ་རིལ་མོ་འགའ་གྲོལ་ཡོང་བ་དང་ཐབ་ཁ་ནས་དུ་བ་སྔོན་མོ་ཞིག་རིམ་གྱིས་འཕྱུར།ཇ་ཐུན་ཞིག་གི་ཡུན་ཙམ་འགོར་རྗེས།སྦྲ་ནང་ལ་དུ་བ་འཚུབ་པོར་འཐིབས་པས་ངའི་མིག་ཟུང་ལས་མཆི་མ་དབང་མེད་དུ་བཞུར་ཡོང་།ངས་མིག་ཟུང་དམ་དུ་བཙུམས་ནས་ཨམ་གཙིགས་བསྡམས་ཀྱང་སྡོད་མི་ཚུགས་པར་ཕྱི་རོལ་ཏུ་མི་འབྲོ་ཐབས་མེད་བྱུང་། 2 ས་རུབ་ལ་ཉེ།ཁ་བ་སྔར་བཞིན་འབབ་ཀྱིན་འདུགསྐབས་དང་སྐབས་སུ་ཐག་རིང་ནས་གསལ་ལ་མི་གསལ་བའི་ཁྱི་སྐད་རེ་གྲག་ཡོང་།ཨ་ཁུ་བཟོད་པ་ཚང་གི་སྦྲའི་མདུན་ཕྱོགས་ན་ནོར་རྣམས་ར་བའི་ཚུལ་དུ་མུ་ཁྱུད་ལྟར་བཏགས་ཤིང་དེའི་དབུས་སུ་ལུག་ཁྱུད་བསྐྱིལ་འདུགཁ་བའི་དབང་གིས་ནོར་ལུག་རེ་འགའ་མ་གཏོགས་གཞན་ཚང་མ་གནས་གཅིག་ཏུ་འགྲེང་ནས་སྐྱུག་ལྡད་བྱེད་ཀྱིན་གདའ། ངས་གཅིག་པ་ཞིག་བཏང་རྗེས་མིག་ཟུང་རླུང་བུ་ལ་གཏད་ནས་ཡུད་ཙམ་བསྡད།འཇིག་རྟེན་འདིའི་ཡོད་དོ་ཅོག་གཉིད་དུ་ཡུར་བ་ཇི་བཞིན་ཧ་ཅང་དབེན་འཇགས་སེ་གནས། སྐབས་དེར། ཨ་ཁུ་བཟོད་པས་ར་མ་འགའ་དེད་ནས་ངའི་མདུན་ཐད་ཀྱི་གྲོག་ཤུར་དེའི་ཁ་རྒྱུད་དུ་མངོན་བྱུང་། “ཨ་ཁུ། ཁྱེད་ཚང་ལ་ཁྱི་མེད་དམ།”ཨ་ཁུ་བཟོད་པ་གན་དུ་བསླེབས་པ་དང་ངས་དེ་སྐད་དྲིས། “ཁྱི་ཨེ།”རྒན་པོའི་གདོང་ལ་ཡ་མཚན་པའི་མདངས་ཤིག་ཕྱུང་ནས་ང་ལ་དེ་ལྟར་ལྡོག་འདྲི་ཞིག་བྱས། “འོ་ལེ།”ངས་ཡིན་པའི་བརྡ་ལ་མགོ་ལྕོག་ལྡེམ་ཙམ་བྱས། “མེད། ངེད་ཚང་ལ་ཤོག་སྦག་ལས་ཅི་ཡང་མེད”ཁོས་ང་ལ་ཀུ་རེ་རྩེ་བ་ལྟར་དེ་སྐད་ཟེར། “ཤོག་སྦག”ངས་ཧ་མ་གོ་བར་དྲིས། “འོ་ལེ།ཤོག་སྦག”ཨ་ཁུ་བཟོད་པས་དེ་ལྟར་འཆད་ཞོར་དུ་ང་ལ་འཛུམ་ཙམ་བྱས་རྗེས།སླར་ཡང་ངའི་གདོང་གི་རྣམ་འགྱུར་ལས་ཅི་ཞིག་ཚོར་སོང་བ་ལྟར“ཅི་རེད། ཡིད་མི་ཆེས་སམ”ཟེར། ངས་ཅི་ཡང་མ་བཤད། ཕྱིར་སྦྲ་ནང་དུ་འཛུལ་དུས།ཐབ་ཁ་རུ་མེ་ལྕེ་ལྷབ་ལྷུབ་མཆེད་ཀྱིན་འདུགལས་གྲོགས་སྔར་མལ་ན་ཙོག་པུར་སྡོད་ཅིང་གཡས་ལག་གི་མཛུབ་མོའི་བར་རྔུབ་འཕྲོར་ལུས་པའི་དུད་སྣེ་ཞིག་བཙིར་ནས་གདའ།ཨ་ཁུ་བཟོད་པའི་ཆུང་མ་སྦྲའི་གཡོན་ཁྱིམ་ན་ནུབ་ཟས་གཡོ་སྐོལ་གྱི་ལས་ལ་བྲེལ་བཞིན་འདུགམོས་ང་ཁྱིམ་དུ་འཛུལ་ཡོང་བ་ཚོར་འདྲ།སྦྲ་ངོར་དཔྱངས་པའི་འོད་སྣང་དཀར་པོ་ཞིག་སྦྲ་ནག་ཧྲིལ་བོར་འཕྲོས་ནས་འདུགསྐབས་དེར།ང་ལ་ཡང་བསྐྱར་དབང་མེད་དུ་གྲང་འདར་ཞིག་བྱུང་། ཡུད་ཙམ་འགོར་རྗེས།ཨ་ཁུ་བཟོད་པ་ཁྱིམ་དུ་འཛུལ་ཡོང་།ཁོས་རྒྱབ་ཀྱི་ཕྲུག་ལྭ་ཕུད་ནས་ཁྱིམ་གྱི་ཡ་ཕུག་ཏུ་བཞག་རྗེས།མ་ཕུད་ནས་སྲིད་ལ་མཐོ་གང་ལས་མེད་པའི་སྒྱེའུ་ཞིག་ཁྱེར་ཡོང་སྟེ་ངའི་མདུན་དུ་བཞག་པ་དང་།…

ཚུལ་ཁྲིམས་རྒྱ་མཚོ། དོན་གྲུབ་རྒྱལ། ཚེ་རིང་རྣམ་རྒྱལ། རྒྱུ་འབྲས་རྣམ་རྒྱལ། ཚུལ་ཁྲིམས་རྒྱ་མཚོ། དགེ་བཤེས་ལྷ་རམས་པ…… འོ། མིང་གི་རྣམ་གྲངས་མི་འདྲ་བ་མང་བོ་ཞིག་ཡོད་ན་ཡང༌། དོན་དམ་དུ་དེ་དག་ནི་མི་གཅིག་གི་མིང་རེད། མིང་དེ་དག་ནི་སྒྲ་ལེན་གྱི་འཁོར་ལོ་ དང་འདྲ་བར་དགེ་བཤེས་ཚུལ་ཁྲིམས་རྒྱ་མཚོའི་ཚེ་སྟོད་ཀྱི་ལོ་རྒྱུས་རྣམས་ཇི་མ་ཇི་བཞིན་དུ་སྒྲ་རུ་བླངས་ཡོད་པ་དང༌། གཟུགས་འཛིན་གྱི་མེ་ལོང་ཞིག་ དང་འདྲ་བར་དགེ་བཤེས་ཚུལ་ཁྲིམས་རྒྱ་མཚོའི་སྐྱིད་སྡུག་འདྲེས་མའི་རྣམ་ཐར་དག་ཁྲ་ལམ་མེ། གསལ་གྱིལ་ལེ། རྗེན་ལྷང་ངེར་རི་མོར་བཀོད་ཡོད། ཨ་ཙི། མིང་དེ་དག་གི་རྒྱབ་ཏུ་ངུ་ཤོར་ཞིང་རྒོད་བྲོ་བ་དང༌། ཡི་མུག་ཅིང་ཞེ་མེར་བ། བློ་བདེ་ ཞིང་སེམས་སྐྱིད་པ། ཡིད་དགའ་ཞིང་ཐུགས་སྤྲོ་ བའི་གསང་བའི་མཚན་མ་ཅི་འདྲ་མང་བོ་ཞིག་ སྦས་ཡོད་པ་རེད་ཨང༌། ཉིན་མཚན་ལོ་ཟླའི་གོམ་འགྲོས་དང་དབྱར་དགུན་སྟོན་དཔྱིད་ཀྱི་འཁོར་འགྲོས། ཡར་ངོ་དང་མར་ངོའི་འཕེལ་འགྲིབ་དུས་ཀྱི་ཕོ་ཉའི་བཤུལ་ལམ་དུ་རྣམ་དཔྱོད་ཀྱི་སྒོ་མོ་ ཆེས་ཆེར་ཕྱེས་ཏེ་ཞིབ་ཏུ་བཙལ་བ་ན། དཀའ་སྤྱད་ཀྱི་ལྦ་བ་ མཐུག་པོ་ཆགས་པའི་ཞབས་རྗེས་ གསལ་བོ་ཞིག་རྙེད་མི་ཐུབ་པ་ག་ལ་སྲིད། ངོ་མ། སྒོ་ངའི་ནང་གི་སེར་ཐིག་དང༌། ཁོག་པའི་ནང་གི་སྙིང་ཐིག མིག་གི་ནང་གི་ནག་ཐིག་ ལྟར་གཅེས་པར་སྐྱོང་བཞིན་པའི་ཕ་མའི་དྲུང་གི་ གཅེས་ཕྲུག་དེ་ནི་ཚེ་ རིང་རྣམ་རྒྱལ་རེད། ཚེ་ རིང་རྣམ་རྒྱལ་གྱི་ཡབ་ཡུམ་གཉིས་ནི་མཆོག་གསུམ་ལ་དད་པ་ཆེ་ཞིང༌། ལས་རྒྱུ་འབྲས་ལ་བརྩི་ མཐོང་བྱེད་…

མེས་པོ། ཚེ་རིང་དོན་གྲུབ། གཅིག 1 ཀྲུང་གོའི་མི་དམངས་བཅིངས་འགྲོལ་དམག་གིས་ལོ་ངོ་བཞི་བཅུའི་རིང་ལ་མདོ་དབུས་མཐོ་སྒང་དུ་ཁྲག་དང་མིག་ཆུ་སྐམ་དུ་མ་བཅུག་པའི་མྰ་ཇག་ཚང་ཇལ་བའི་རྡུལ་དུ་བརླགས་རྗེས་རྩེ་གཞུང་རྩྭ་ཐང་དུ་ཐེངས་དང་པོར་དངོས་འདྲུད་རླངས་འཁོར་བསྐོར་ཡོང་དུས་ས་འདིའི་མི་རྣམས་རང་རང་གི་སྤྲ་སྒོ་ནས་ཡུན་རིང་བར་དུ་ཧ་ལས་འདུག སྐབས་ཤིག་བྱིས་པ་པྲ་ཚག་ཅིག་གིས་ཟོག་ལ་འདྲོག་སློང་བའི་ཚུལ་གྱིས་སློག་པ་མགོ་ལ་འཕྱར་ཞོར་མགྲིན་སྒྲ་ཞིག་བསྒྲགས་པ་ན་རླངས་འཁོར་ཁ་ལོ་བས་ཀྱང་ཧ་ཅང་མཛའ་བརྩེའི་ཚུལ་གྱིས་ཕྱིར་དུང་སྒྲ་ཞིག་བཏང་བ་དེས་མི་རྣམས་སྐྲག་ཐག་ཆོད་དེ་སྦྲ་སྒོ་འཕྲོག་རྩོད་བྱེད་བཞིན་ཁྱིམ་དུ་བྲོས་པ་དང་།ནོར་གནག་གིས་རྔ་མ་དྲུག་སྟེང་དུ་བཟུང་ནས་སྲོག་བསྡོས་ཀྱིས་ཕྱོགས་བཞི་མཚམས་བརྒྱད་དུ་བྲོས་པ་དེས་ལོ་མང་པོའི་སྔོན་དུ་ཁོ་ཚོ་ཐོག་མར་ས་རྩེ་གཞུང་ལ་སླེབས་དུས་ཀྱི་སྣང་ཚུལ་དེ་དབང་མེད་དུ་དྲན་པར་བྱེད་སྲིད་དེ།དེ་དུས་ཁོ་ཚོ་འབྲོག་ཁྱིམ་བརྒྱ་ལྷག་གིས་ཆུ་ཕྲན་གྲངས་མེད་བཅད། ཡངས་པའི་དབེན་ཐང་བརྒྱུད།ལ་ལུང་མང་པོ་བརྒལ་ནས་ས་རྩེ་གཞུང་ལ་སླེབས་དུས་བོད་ཟླ་བཞི་བ་ཡིན་པ་དང་།སྔོ་རྩྭ་སོར་བཞི་ཙམ་སྐྱེས་ཡོད་ནའང་ལོ་སྔོན་མའི་རྩྭ་སྐྱའི་གསེབ་ནས་ད་རུང་ཕྱིར་བུད་མེད་པས་མུ་མཐའ་བྲལ་བའི་རྩེ་གཞུང་ཡོངས་རྫོགས་སྐྱ་ཐང་ངེར་འདུག རྩྭ་སྐྱའི་གསེབ་ན་གཞེས་ནིང་ངམ་ཡང་ན་ལོ་དུ་མའི་སྔོན་གྱི་རུལ་ནས་ནག་པོར་གྱུར་པའི་རྩྭ་རོའང་ཡོད་པས་འདི་རུ་མི་ཕྱུགས་གཅིག་ཀྱང་བསྡད་མ་མྱོང་བ་ཤེས་ཐུབ།དགོ་དང་ཁ་ཤྭ་སོགས་རི་དྭགས་སྣ་ཚོགས་སྐོར་ཁྱུ་སྐོར་ཁྱུ་བྱས་ནས་ཁ་ཤུ་འདེབས་བཞིན་ཕྱུགས་ཟོག་དང་ཁལ་མ་དེད་ནས་འགྲོ་བཞིན་པའི་མི་རྣམས་ལ་ཐག་མི་རིང་བའི་ས་ནས་མཛའ་བརྩེ་དང་ཡ་མཚར་བའི་མིག་མདངས་ཀྱིས་ལྟ་བ་དང་། འཕྱི་བ་རྣམས་རང་རང་གི་ཁུང་བུའི་སྒོ་ཁའི་ས་འབུར་སྟེང་ན་ལག་ཟུང་བྲང་ཁར་བཟུང་ཞིང་ཤིན་ཏུ་ཚོན་པོའི་ལུས་པོ་རྐང་པ་ཟུང་དང་ཨོང་ཤར་བརྟེན་ནས་ཡར་ལངས་ཏེ་ཧ་ལས་ནས་འདུག སྒོ་ཁྱི་ཚོས་ཁལ་དེད་ཀྱི་རྗེས་ན་ཕན་ཚུན་རྩེད་མོ་བྱེད་པ་དང་།ལམ་ཁའི་ས་འབུར་ཡོད་ཚད་ཀྱི་མགོ་ལ་རྐང་ཡ་ཡར་བཀྱགས་ཏེ་གཅིན་ཐིགས་རེ་གཏོར་ནས་འགྲོ་བཞིན་འདུག འདི་ནི་ཁོ་ཚོས་གཟས་ནས་འཇི་རྟེན་ཁམས་ལ་བསམ་གནག་བྱེད་པ་ཡིན་ནམ་ཡང་ན་རང་གཤིས་ཁོ་ན་ཡིན་པ་མི་ཤེས་མོད། གང་ལྟར་ས་ངོས་ལས་མཐོ་བའི་དངོས་པོ་ཡོད་ཚད་ལ“དཀར་ཐིགས”རེ་འབུལ་སྲིད་ལ།དེས་ན་ལོ་མང་པོའི་རྗེས་ཀྱི་མིང་གྲགས་ལྡན་པའི“ཁྱི་གསོད་འགུལ་སྐྱོད”དེའང་ཁོ་ཚོའི་གོམས་སྲོལ་འདི་དང་འབྲེལ་བ་ཉག་ཙམ་མེད་པ་ཞིག་ག་ལ་ཡིན།དེ་དུས་རྩེ་གཞུང་སྡེ་བའི་འཕྲིན་ལས་ཁ་ཤོའི་སྐྲ་ལོ་དུང་ལྟར་དཀར་བ་དང་མགོ་བོ་ཌྰ་རུ་གཡུག་གཡུག་བྱེད་ཀྱིན་ཡོད་ནའང་དཔུང་རྟགས་དམར་པོ་ཞིག་བཏགས་ནས་ཟླ་གཅིག་ལ་ཧུར་བརྩོན་ལྷོད་མེད་བྱས་མཐར་ཁོ་རང་དང་འདྲ་བར་རྒས་འཁོགས་སུ་གྱུར་འདུག་པའི་ཁྱི་མོ་ཞིག་བསད་པས་གོང་རིམ་གྱིས“ཁྱི་གསོད་དཔའ་བོ”ཞེས་པའི་མཚན་སྙན་གནང་མྱོང་། “ཁྱོད་ཚོ་བདེ་མོ”ཟེར་བ་ཡིན་ནམ་ཡང་ན་བྲེད་སྐད་ཤོར་བ་གང་ཡིན་མི་ཤེས་མོད། གང་ལྟར་འཕྱི་བ་ཞིག་གིས་གློ་བུར་དུ“ཅག་ཅག་ཅག……”ཅེས་སྐད་སྒྲ་ཞིག་སྒྲོག་པ་ན་འཕྱི་བ་གཞན་པ་ཡོད་ཚད་ཀྱིས་ཀྱང“ཅག་ཅག་ཅག…………”ཅེས་བསྒྲགས།རྩེ་གཞུང་ཡོངས་རྫོགས“ཅག་ཅག་ཅག…………”གིས་ཁྱབ་སོང་། “ཀི—”སུ་ཞིག་གིས་ཅི་བསམ་ཆ་མེད་ཀྱིས་ཀི་སྐད་ཅིག་ཤོར་བ་དང་མཉམ་དུ་ཁྱི་རྣམས་ཀྱིས་ཀྱང་མཆེ་བ་གཙིགས་ཤིང་ཟུག་སྐད་རྒྱག་ཞོར་ཕྱོགས་བཞིར་བརྒྱུགས་པ་ན་འཕྱི་བ་རྣམས་ཀྱིས་ད་གཟོད་མ་བོས་མགྲོན་པོ་འདི་ཚོའི་དམིགས་ཡུལ་མི་བཟང་བ་ཤེས་ན་དེ་མ་ཐག་འཇའ་ཡལ་བ་ལྟར་ཁུང་བུར་འཛུལ་བ་དང་།མཐའ་ཁོར་གྱི་རི་དྭགས་རྣམས་ཀྱིས་ཀྱང་དོགས་ཟོན་གྱི་ཕྱི་མིག་ལྟ་ཞོར་དབེན་པའི་རི་རྩེར་བྲོས། བཞོན་པ་དང་ཁལ་མའི་ཁ་ནང་ནས་ལྕེ་རིང་པོ་རེ་བསྣར་ཞིང་ཐང་ཆད་པའི་འཁུན་སྒྲ་སྒྲོག་པ་དང་།ཁལ་སྒའི་བར་ནས་གདངས་མཚམས་གསལ་བའི“ཙིར་ཙིར”གྱི་སྒྲ་གྲག་བཞིན་མུ་མཐུད་དུ་མདུན་སྐྱོད་བྱས།འདི་ནི་རང་གའི་རུ་སྤོར་བ་ཞིག་མིན་པས་ཁོ་ཚོའི་དམིགས་ཡུལ་དངོས་དེ་གང་ཡིན་རང་གིས་ཀྱང་མི་ཤེས་ལ་ཐོན་ས་དེ་ནས་ག་ཚོད་གནས་ཐུབ་པའང་མི་ཤེས། ཡིན་ནའང་ཁོ་ཚོ་མུ་མཐུད་ནས་མདུན་དུ་སྐྱོད། ཁོ་ཚོ་རྩེ་ཆུའི་འགྲམ་ལ་སླེབས་པ་ན་བཞོན་པའི་འཕོང་ལ་ཞོན་པའི་བྱིས་པ་ཞིག་གིས་གློ་བུར་དུ“ཨ་མ།ཨ་མ།ལྟོས་དང——ཁྱི་གུ་མང་པོ་ཞིག”ཟེར་ཞོར་ཆུའི་ཕ་རོལ་གྱི་གད་ངོས་ཤིག་ལ་མཛུབ་སྟོན་བྱས།བུད་མེད་འགའ་ཞིག་གིས་དེའི་ཕྱོགས་སུ་ལྟ་བཞིན་མགྲིན་གཅིག་ཏུ“སྲམ་། སྲམ། ཨ་རོགས་ཚོ།སྲམ།”ཞེས་སྐད་བརྒྱབ།ཤིན་ཏུ་ཆེ་བའི་ཆུ་སྲམ་བདུན་གཅིག་རྗེས་གཉིས་མཐུད་ཀྱིས་ཆུ་ནང་དུ་ལྡིང་།འབྲུག་ཐར་གཙོ་བྱས་པའི་སྐྱེས་པ་འགའ་དེ་མ་ཐག་མ་གྲོས་རང་མཐུན་གྱིས་གད་ཁ་དེར་འདུས་ནས་རེ་རེས་རང་ལག་གི་ནོར་བུ་མཚོ་ནང་ལ་ལྷུང་བ་ལྟར་མིག་ཅེར་ནས་ཆུ་ནང་ལ་བལྟས་འདུགཐ་ན་ཉིན་གང་བོར་མ་ཎི་འདོན་པ་ལས་ཁ་མི་གྲགས་པའི་གྲྭ་པ་འཇམ་དབྱངས་ཤེས་རབ་ཀྱིས་ཀྱང་བཙུན་ཉམས་བསྐྱུར་ནས“ཨ་ཙི་ཨ་ཙི”ཟེར་བཞིན་ཆུ་ནང་ལ་བལྟས་འདུག ཁོ་ཚོས་ཕྱུགས་ཟོག་དང་ཁལ་མ།ཞོན་པ་བཅས་ལ་ཆུ་ཡིད་ཚིམས་པ་རེ་འཐུང་དུ་བཅུག་རྩེ་ཆུར་བརྒལ་ཏེ་མུ་མཐུད་ནས་མདུན་སྐྱོད་རྩིས་བྱས། “ཨ་མྱེས་ཡི་དམ”འབྲུག་ཐར་ཡི་དམ་གྱི་གམ་ལ་ཡོང་ནས“འདི་རུ་རྩྭ་ཆུ་བཟང་བས་ཉིན་འགར་བསྡད་ན་མི་བཟང་ངམ——མ་མཐའ་ཡང་དེ་རིང”ཟེར་བཞིན་ཡི་དམ་གྱི་གདོང་ལ་བལྟས་ནས་འདུག “དེ་ཡང་མི་ཆོག་རྒྱུ་མེད”ཡི་དམ་གྱིས་རྐང་པ་གཉིས་ཡོབ་ཆེན་ལ་བརྟེན་ཏེ་ཨོང་ཤ་སྒ་སྟེང་ནས་ཡར་བཀྱགས་ཏེ་དམག་དཔུང་ཆེན་པོ་ཞིག་ལ་བཀོད་འདོམས་བྱེད་པ་ལྟར་སྐད་མཐོན་པོས“ཨ་རོགས་ཚོ།སྡོད།སྡོད། དེ་རིང་འདི་རུ་འདུག”ཟེར། འབྲུག་ཐར་གྱིས་ཁལ་མའི་རྒྱབ་ཀྱི་དངོས་པོ་ལེན་སྐབས་མིག་གིས་ལྟ་ས་ནི་སྲམ་ཡོད་ས་ཡིན་པ་དང་སྦྲ་འབུབ་སྐབས་ཀྱང་དེའི་ཕྱོགས་སུ་མིག་ཤོར་འདུགཇ་ཁོལ་ནས་ཆུམ་མ་འཚམས་སྐྱིད་ཀྱིས་ཇ་མཆོད་འཕེན་སྐབས་མིག་གིས་སྲམ་ཡོད་སར་བལྟས་ཡོད་པ་དང་།མེས་པོར་ཇ་འདྲེན་སྐབས་ཀྱི་ཞེའམ་མིག་ནི་སྲམ་ཡོད་སར་གཏད་འདུགགང་ལྟར་ཤིན་ཏུ་ཆེ་ཞིང་སྤུ་སྟེང་ལ་འོད་འཕྲོ་བའི་སྲམ་དེ་དག་ནི་འབྲུག་ཐར་གྱི་མིག་ལམ་ནས་ཡལ་ཐབས་བྲལ་བས་ཁོས་རྩམ་པ་ཞིག་ཟོས་ནས་ཇ་ཅ་ནེ་གང་ཙམ་འཐུང་རྗེས་རྩེ་ཆུའི་འགྲམ་ལ་བརྒྱུགས་ཏེ་ས་དཔྱད་མཁས་པ་ཞིག་དང་འདྲ་བར་དེ་གའི་གད་པ་དང་ཁུང་བུ།ཆུ་འགྲམ་སོགས་ལ་ཞིབ་ལྟ་ཡུན་རིང་བྱས་མཐར།གཞི་གནས་ནང་ལ་ཉ་རུས་འདྲེས་པའི་སྲམ་གྱི་སྐྱག་པ་འགའ་རྙེད་པས་སྲམ་དེ་དག་ནི་ལམ་འགྲོ་བ་ཞིག་མིན་པར་འདི་རུ་གཞི་སྡོད་བྱས་ཡོད་པ་ར་སྤྲོད་ཐོབ།ས་སྲོས་དུས་སུ་འབྲུག་ཐར་གྱིས་སླར་ཡང་སྲམ་ཞིག་ཆུ་འགྲམ་དུ་ཡོང་བ་དང་ཁོ་མཐོང་མ་ཐག་ཕྱིར་ཆུ་ནང་དུ་འཛུལ་བ་མཐོང་།ཕངས་པ་ཞིག་ལ་དེ་ནས་ཅང་མ་འགོར་བར་ས་ཡོངས་སུ་རུབ་སོང་བས་ཁོ་རང་ཕྱིར་ཁྱིམ་དུ་མི་ལོག་ཐབས་མེད་བྱུང་། ཕྱི་ཉིན་སྐྱ་རེངས་ཤར་དུས་འབྲུག་ཐར་གྱི་ལག་ལ་ལྕགས་ཁེམ་ཞིག་བཟུང་ནས་ཁ་སང་གི་སྲམ་ཡོད་སའི་གད་ཁ་དེ་ན་བསྡད་ཡོད།ཉི་རྩེ་ཤར་མ་ཐག་ཆུ་འགྲམ་གྱི་ཁུང་བུ་ཞིག་གི་ནང་ནས་སྲམ་གཉིས་སྔ་རྗེས་སུ་སྒོར་བུད་པ་དང་འབྲུག་ཐར་ཡར་ལངས་པ་ན་དེ་གཉིས་ཀྱིས་ཁོ་ལ་ཡ་མཚར་བའི་མིག་མདངས་ཀྱིས་ལྟ་ཞོར་ཕྱིར་ཁུང་བུར་འཛུལ་སོང་།དེ་ནི་ཁོ་ཚོར་བློ་རིག་བཀྲ་བའམ་ཡང་ན་ཉམས་མྱོང་ལྡན་པས་མིན་པར་ཏག་ཏག་ལྷན་སྐྱེས་ཀྱི་རང་བཞིན་ཡིན་པ་འདྲ།རྒྱུ་མཚན་ནི་ཁོ་ཚོ་སྐྱེས་པ་ནས་སམ་ཐ་ན་ཕ་མེས་ཡང་མེས་རིང་ནས་མིའི་རིགས་ཀྱི་གནོད་འཚེ་དང་འཇིགས་སྣང་ཁེལ་མྱོང་ལ།ཐ་ན་ཁོ་ཚོས་མི་ཞིག་མཐོང་བའང་ད་ལྟ་ཐེངས་གཉིས་པ་རེད།དེ་བས་ཁོ་ཚོས་མིའི་རིགས་ནི་འཇིག་རྟེན་འདིའི་དབང་སྒྱུར་མཁན་གཅིག་པུ་ཡིན་པའང་གཏན་ནས་མི་ཤེས། འབྲུག་ཐར་མྱུར་དུ་བརྒྱུགས་ནས་ཁུང་བུ་དེའི་ཁ་དམ་པོར་བཅད་རྗེས་ལྕགས་ཁེམ་སྒོ་ཁར་བཙུགས་པ་དང་ཕྱིར་ཁྱིམ་ལ་ལོག་ནས་ཨོང་པ་ཐུ་བ་གང་དང་ར་ལྤགས་ཀྱི་སྦུད་པ་ཞིག་བཟུང་སྟེ་སླར་ཡང་ཁུང་སྒོ་དེར་ཡོང་ནས་ཁུང་སྒོ་གཅོད་བྱེད་ཀྱི་རྡོ་དང་ས་རྡོག་རྣམས་ཕྱིར་འབྱིན་བྱས་ནས།རྡོ་བ་ཆེན་པོ་ཞིག་བཟུང་ནས་ཁུང་བུའི་ནང་དཔུང་བའི་བར་དུ་བསྲིངས་ནས་བཞགདེའི་འཕྲོར་ཨོང་བ་བླུགས་ཏེ་རུམ་ནས་མེ་ཆ་བླངས་ནས་མེ་རྡོ་སེན་མོ་འདྲ་བ་ཞིག་གི་སྟེང་ལ་སྤྲ་བ་སེན་མོ་འདྲ་བ་ཞིག་བཞག་སྟེ་གཡོན་ལག་གི་གོང་མཛུབ་དང་མཐེ་བོང་བར་ལ་བཟུང་རྗེས་གཡས་ལག་གིས་མེ་ཆ་བཟུང་ནས་མེ་རྡོའི་ཟུར་ལ་འབྱིད་ཙམ་བྱས་པ་ན་དུ་བ་ཕྲ་མོ་ཞིག་སྔོ་ལོག་གེར་ལངས་བྱུང་།དེར་ཕུ་རྒྱག་ཞོར་ཨོང་བའི་དཀྱིལ་ལ་བཞག་ནས་སྦུད་པའི་ལྕགས་སྦུག་གི་ཁ་དེར་གཏུགས་ནས་དལ་མོས་བརྒྱབ་པ་ན་དུ་བ་རིམ་བཞིན་ཇེ་ཆེར་སོང་བ་དང་སྤུད་པ་རྒྱག་ཚད་ཀྱང་ཇེ་མྱུར་དུ་བཏང་། ཁོའི་ཡིད་སེམས་ཏེ་ལྟོས་ཀྱི་དགའ་སྤྲོས་ཁེངས་བཞིན་ཁུང་རྒྱུད་དེད་ནས་ལྕགས་ཁེམ་གྱིས་ས་བརྐོས།ཁོའི་མིག་ལམ་དུ་རང་གིས་བཞག་པའི་རྡོ་ལོག་དེའི་འཕྲོ་ན་སྲམ་རྒན་ཁྱི་རོ་འདྲ་བ་གཅིག་དང་ཡང་གཅིག་གིས་དེའི་རྐུབ་ལ་མཆུ་བཞག་ནས་ཤི་ཡོད་པ་མངོན་སུམ་བཞིན་དུ་ཤར།ཁོས་ངལ་བའང་མ་ཚོར་བར་དབུགས་ཐེངས་གཅིག་གིས་བརྐོས་ནས་རང་གིས་བཞག་པའི་རྡོ་རྒན་དེར་འཕྲད།ཡིན་ནའང་དེའི་འཕྲོ་ན་སྲམ་ཞིག་གི་གྲིབ་གཟུགས་ཙམ་ཡང་མི་མཐོང་ནའང་ཁོ་རང་དངོས་ཡོད་འདིར་གཏན་ནས་ཡིད་མ་ཆེས་པར་མུ་མཐུད་དུ་བརྐོས།ཁོ་རང་དངོས་གནས་ཐང་ཆད་དེ་མིག་ལམ་ལ་སྐར་མ་འཆར་བཞིན་ཡོད་ནའང་མུ་མཐུད་དུ་བརྐོས་ཏེ་གཞི་ནས་ཁུང་བུའི་ཕུགས་ལ་གཏུག་དུས་ཉ་རུས་འདྲེས་མའི་སྲམ་སྐྱག་ཅིག་ལས་གཞན་ཅི་ཡང་མེད་པ་མཐོང་། “ཁུང་བུ་འདིར་འཛུལ་བ་རང་གིས་དངོས་སུ་མིག་གིས་མཐོང་།ཁུང་བུ་བུ་ནོར་སོང་ཟེར་ན་འདིའི་མཐའ་འཁོར་ན་ཁུང་བུ་གཞན་པ་ཡང་མི་འདུགའདི་ཅི་ཞིག་ཡིན་ནམ”ཁོས་ཁེར་བཤད་རྒྱུག་ཞོར་ལག་གཡས་གཡོན་གྱིས་ལྕགས་ཁེམ་དང་སྦུད་པ་དྲུད་ནས་ཤིན་ཏུ་ལྗིད་པའི་གོམ་པ་སྤོ་བཞིན་ཕྱིར་ལོག་དུས་ཉི་མ་མཐོ་རུ་འཕགས་ཡོད་ནའང་མི་རྣམས་ད་རུང་ལམ་ཆས་རྩིས་བྱེད་ཀྱིན་མེད། 2 དེ་རིང་གནམ་གཤིས་ཧ་ཅང་ལེགས་པས་འབྲུག་ཐར་དང་འཚམས་སྐྱིད་གཉིས་ཀས་མེས་པོ་སྤྲ་སྒོར་ཁྱེར་ཡོང་ནས་ཉི་མར་ལྡེ་རུ་བཅུག་རྗེས་འབྲུག་ཐར་གྱིས་འཚམས་སྐྱིད་ལ་ཡ་མཚར་བའི་སྲམ་ཁུང་གི་དོན་དག་དེ་ཧ་ཅང་གཟབ་གནན་གྱིས་བཤད།འོན་ཀྱང་འཚམས་སྐྱིད་ཀྱིས“དེ་འདྲ་མིན་ནམ”ཟེར་བས་ལས་སྣང་དོགས་སྤུ་ཙམ་ཡང་མི་བྱེད། འབྲུག་ཐར་ཡར་ལངས་ནས་ཡི་དམ་གྱི་སར་སོང་བ་ན་བྱིས་པ་ཞིག་གིས་ཤིང་ཐོམ་ཞིག་བཟུང་ནས་ཡི་དམ་གྱི་ལག་པའི་སྟེང་ལ་ཆུ་ལྡུག་གིན་འདུགསྤྱིར་ཡི་དམ་གྱིས་ནམ་ཡང་ཁ་ངོ་བཀྲུ་བ་དང་ཐ་ན་སྐམ་ལུག་བཤས་རྗེས་ཀྱང་ལག་པ་མི་འཁྲུད་མོད།མེས་པོར་ཟ་མ་འདྲེན་པའམ་ཡང་ན་མེས་པོར་རེག་དགོས་བྱུང་ཚེ་ད་གཟོད་ལག་པ་གཙང་མར་འཁྲུད་སྲིད། ཡི་དམ་ཚང་གི་མེས་པོའང་འབྲུག་ཐར་ཚང་གི་མེས་པོ་དང་འདྲ་བར་ཧ་ཅང་རྒས་འཁོགས་སུ་གྱུར་ཡོད་པ་ལས་ཁོ་རང་དངོས་གནས་ལོ་ཅི་ཙམ་ཡིན་པ་སུས་ཀྱང་མི་ཤེས་ལ།ཐ་ན་ཕོ་མོ་གང་ཡིན་ཀྱང་མི་ཤེས།སྡེ་བའི་ནང་གི་ལོ་ན་ཆེས་མཐོ་བའི་བགྲེས་སོང་ཡི་དམ་ཁོ་རང་གིས་བཤད་ཚུལ་ལྟར་ན་ཁོ་རང་བྱིས་པའི་དུས་ནས་བཟུང་མེས་པོ་རྣམས་དེང་གི་འདི་ལྟར་འགུལ་སྐྱོད་མི་ནུས་པ་དང་བཟང་འཐུང་ནུས་པ།སྒྲ་མི་ཐོན་པའི་མ་ཎིའམ་ཅི་ཞིག་འདོན་པ།སུ་ཞིག་གིས་དེག་བ་བསྒྲུབ་ན་འཛུམ་རེ་སྟོན་པ་དང་སྡིག་པ་བྱས་ན་ཁྲོ་ཉམས་སྟོན་པ།གཞན་ཡོང་གི་མི་དང་དངོས་པོ་མཐོང་ནའང་ཁྲོ་ཉམས་སྟོན་པ།སུ་ཞིག་ལ་དངོས་རྫས་གསར་བ་ཞིག་ཐོབ་པའམ་ཡང་ན་ཕྱུག་པོར་གྱུར་ན་གཏན་ནས་མི་དགའ་བ་ཞིག་ཡིན་ཞིང་།མི་རྣམས་ཀྱིས་འདི་ནི་རང་གི་ཕ་འི་གཉེན་ཉེ་ཡིན་ནམ་མའི་གཉེན་ཉེ་ཡིན་པའང་མི་ཤེས་ན་ཡང་ཕ་མ་ལས་ཀྱང་བཀུར་བསྟི་བྱེད་པ།དཀའ་ངལ་གྱི་ལོ་ཟླ་གྲངས་མེད་ཀྱི་ཁྲོད་དུ་རང་ཉིད་མུ་གེར་ཤི་རུང་མེས་པོར་ལྟོགས་སྐོམ་མྱོང་དུ་མི་འཇུག་ཟེར། འབྲུག་ཐར་གྱིས་ཡི་དམ་ལ་མེས་པོ་སྒོར་ཁྱེར་རོགས་བྱས་རྗེས།ཁོང་གཉིས་ཀྱིས་ཀྱང་སྦྲ་གམ་ནས་ཉི་མར་ལྡེ་བཞིན་འདུག་པའི་ཚེ་འབྲུག་ཐར་གྱིས“དེ་རིང་མི་འགྲོའམ”ཟེར། སྲམ་གྱི་རྨི་ལམ་སྟོང་བར་གྱུར་པར་མ་ཟད་ཁོའི་སེམས་ལ་དོགས་པ་ཞིག་ཀྱང་བསླངས་བྱུང་བས་ད་ལྟ་ཁོ་རང་འདི་རུ་དེ་འདྲའི་འདུག་འདོད་མེད། “འདི་ངོ་མ་ས་ཆ་སྐྱིད་པོ་ཞིག་རེད།ཁྱོད་ཀྱིས་ལྟོས་དང”ཟེར་ནས་ཡི་དམ་གྱིས་མགོ་བོ་དལ་མོས་འཁོར་ཞོར་ཡིད་སྨོན་གྱི་མིག་ཟུང་གིས་ཕྱོགས་བཞིའི་རྒྱང་རིང་དུ་བལྟས། འབྲུག་ཐར་ཡི་དམ་གྱི་གམ་ལ་བཅར་ཙམ་བྱས་ནས་ཡ་མཚར་བའི་སྲམ་ཁུང་གི་གསང་བ་དེ་ཤིན་ཏུ་རྒྱས་པར་བཤད། འོན་ཀྱང་ཡི་དམ་གྱིས“ཅི་འདྲའི་ས་ཆ་སྐྱིད་པོ་ཞིག་རེད་ཨང། ད་རུང་ཉིན་འགར་བསྡད་ན་མི་བཟང་རྒྱུ་མེད”ཟེར་བ་ལས་འབྲུག་ཐར་གྱི་ཁ་བརྡར་གཏན་ནས་དོ་སྣང་མ་བྱས་པས།ཁོང་ཡང་བསྐྱར་སྲམ་ཁུང་གི་གཏམ་རྒྱུད་དེ་མགོ་ནས་མཇུག་བར་ཐེངས་གཅིག་བཤད་པ་ན་ཡི་དམ་གྱིས་གཞི་ནས“དེ་འདྲ་ཡིན་ནམ”ཟེར་བ་ཙམ་ལས་སྔར་ལྟར་སྣང་དོགས་སྤུ་ཙམ་ཡང་མ་བྱས་པས་འབྲུག་ཐར་ཡིད་ཆད་དེ་ཕྱིར་ལོགའཚམས་སྐྱིད་ཀྱིས་ཕུ་ཐུང་གཉིས་ཀ་སྐེད་པར་དཀྲིས་ནས<<སྒྲོལ་དཀར་གྱི་བསྟོད་པ>>འདོན་ཞོར་ཕྱག་འཚལ་གྱིན་ཡོད་ལ་འབྲུག་ཐར་མོའི་གམ་དུ་སླེབས་པ་ན་མོས་ཀྱང་ཕྱག་བརྒྱ་འཚལ་ཚར་ནས་ཙོར་པོར་བསྡད་བྱུང་།ཁོ་མོའི་མདུན་དུ་རྐང་མགོ་དང་པུ་མོ།ལག་ཟུང་ཁེལ་བའི་ཤུལ་ན་ལོ་འགའི་རིང་གི་རྩྭ་སྐྱ་གཡས་གཡོན་དུ་དེད་ནས་རྩྭ་སྔོན་ཆུན་པོ་རེ་ལྗང་ལྡེམ་མེར་མངོན་འདུག་པ་དང་།ཆེ་ཞིང་མཁྲེགས་པའི་ནུ་ཟུང་དང་ཐོད་པ་ཁེལ་ཤུལ་ན་རྩྭ་སྐྱ་མར་མནན་ནས་བྱེའུ་ཚང་དང་འདྲ་བའི་དོང་རེ་བཟོས་ཡོད། འབྲུག་ཐར་མར་བསྡད་ནས་སླར་ཡང་སྲམ་ཁུང་གི་གཏམ་རྒྱུད་དེ་ཐེངས་གཅིག་བཤད།…

༄༅།། མེ་ཏོག་གངས་ལྷ། ——– ཚེ་བརྟན་རྡོ་རྗེ། 　　རྒྱང་རིང་གི་གནམ་སའི་འབྲེལ་མཚམས་སུ། ཁ་ཆར་དང་འཐོར་རླུང་དྲག་ཏུ་འཚུབ་པས། རི་ལུང་དང༌། ནགས་ཚལ། ལམ་ཕྲན་རྣམས་མོག་པོར་སྣང་ལ། རི་ཁུལ་དུ་ཐར་ཐོར་དུ་ཆགས་པའི་གྲོང་ཚོ་འདིའི་བར་སྣང་ཡང་ནག་འཐིབ་བེར་གྱུར་ ཅིང༌། ཁང་མིག་ཆུང་ཆུང་འདིའི་ནང་གི་སྣུམ་སྒྲོན་གྱི་འོད་སྣང་དེ་རིམ་གྱིས་ཇེ་གསལ་དུ་གྱུར། ཞོགས་པའི་སྐྱ་རེངས་ཤར་མ་ཐག་ཁྱོད་རང་སེམས་ཆུང་གི་སྒོ་ནས་ཡར་ལངས་ཤིང༌། གམ་དུ་གཉིད་སྟུག་པོར་ཡུར་ འདུག་པའི་བུ་མོའི་སྟེང་ལ་ཡང་བསྐྱར་མལ་གོས་གཡོགས་རྗེས། ཕྱགས་མ་དང་ཤིང་ཁེམ་བཟུང་སྟེ་སྒོ་ཕྱིར་བུད། ཁྱོད་ཀྱིས་ ཚོད་དཔག་བྱས་པ་དངོས་གནས་འཆུགས་མི་འདུག་སྟེ། མདང་དགོང་ཁ་བ་བབས་བྱུང༌། ཁོ་ར་ཁོར་ཡུག་རྣམས་རབ་དཀར་ གྱི་ཁ་བའི་འདབ་མས་གཡོགས་ཤིང་ཁྱོད་རང་གངས་ཀྱི་འཇིག་རྟེན་དུ་གནས་འདུག ཡིན་ན་ཡང༌། ཁྱོད་ཀྱིས་ཁ་བ་ཉུང་ངུ་ ཙམ་ལས་མ་ཕྱགས་པར་ཤིང་ཁེམ་ལ་སྔས་ཏེ་མིག་ཧྲིག་གེར་གྱུར་སོང༌། ཁྱོད་རང་འདི་ལྟར་བསམ་གཞིག་གི་མཚོ་མོའི་འཇིངས་སུ་ལྷུང་བ་ཅི་ཡིན་ནམ། དཀར་ཞིང་གཙང་བའི་ཁ་བའི་ འདབ་མ་ཁྱོད་ཀྱི་བལ་སྐུད་ཀྱི་ཞྭ་མོའི་སྟེང་དང༌། ལྟེབ་གཉེར་ཆགས་ཤིང་ཐགས་ལ་བབ་པའི་རྒྱ་ལྭ་སྔོན་པོ། དེ་ཕོའི་རྔ་སྒྲོ་ ལྟ་བུའི་སྐྲའི་ལན་བུ། ད་དུང་རྒས་གཉེར་བབས་པའི་སྐེ་མཇིང༌། སྒོར་ཞིང་སྨུག་པའི་གདོང༌། རིད་ཅིང་ནག་པའི་ལག་ཟུང་ ལ་བབས་ཏེ་ཁྱོད་རང་ཁ་བའི་ཀློང་དུ་བཏུམས་ཀྱང་ཁྱོད་ཀྱིས་དེ་ལ་སྣང་དོགས་ཙམ་ཡང་མི་བྱེད། འདི་ལྟར་ཁ་བས་ལུས་ ཕུང་གཡོགས་པར་བྱས་ན། ད་གཟོད་རང་ཉིད་ཀྱི་སྐྱོ་གདུང་སངས་པར་འགྱུར་བ་ལྟར་སྔར་བཞིན་འགུལ་ཙམ་ཡང་མི་བྱེད། རས་ལྷམ་གྱི་སྣེ་མགོ་རིམ་གྱིས་ཁ་བས་བརྟོལ་ཏེ་རློན་པར་བྱས་པ་དང༌། དྲོད་རླངས་ཆུང་ངུ་ཞིག་ལྡང་གིན་འདུག ཁྱོད་རང་ཤིང་ཁེམ་ལ་སྔས་ཏེ།…

མྱི། བསྒྲལ་རྡོ། 　　 རྡོ་རྗེ་སྒོར་བུད་ནས་ནང་དུ་འཛུལ། ཨེ། ཁྱོད་ཀྱི་རྔ་མ་སྒོ་བར་དུ་བཙུར་འདུག ཧ་ཧ་ཧ་་་་ གདོང་འཛུམ་དམུལ་དམུལ་དང་སྐྲ་སྣུམ་ཤིག་ཤིག་གི་མི་དེ་ཚོ་མཉམ་དུ་བགད། ཁོས་ལྕེ་རིང་བོ་ཞིག་སྣར་ནས་སྒོ་དལ་མོར་མར་བརྒྱབ། དོ་ནུབ་ཀྱི་གསོལ་སྟོན་གྱི་སྟེང་དུ་རྡོ་རྗེ་རྫོང་འདིའི་ “མྱི་ངར་བ་ཚོ་” དང་ལྷན་དུ་ ཆང་རྩ་ཅན་དང་ཟས་བཅུད་ཅན་ལ་རོལ་བཞིན་ཡོད་པས་ཁོའི་སྣང་བར་མཚམས་དང་མཚམས་སུ་བདེ་སྐྱིད་དང་འཇོན་ཐང་གི་ཚོར་བ་ཞིག་སྐྱེ་ བཞིན་ཡོད་ལ་མཚམས་དང་མཚམས་སུ་ཁོའི་བྲང་གི་སྙིང་དེ་རྦབ་རྡོ་བཞིན་རྫོང་མཁར་འདིའི་བར་སྣང་དུ་ཤུགས་ཀྱིས་འདྲིལ་བཞིན་པའི་ཚོར་བ་ རེ་སྐྱེ་བཞིན་ཡོད། “འགོ་བ་ལགས། ཁྱི་ཤ་ཞིག་བཞེས་ན་ཅི་འདྲ་རེད།” “ཧུན། ཁྱོས་ཅི་ཟེར། ཁྱོས་ང་འབྲོག་རྐྱང་ཞིག་ལ་ཁྱི་ཤ་ཟོས་ཟེར་བ་འདི་ཟུར་ཟ་བྱེད་བཞིན་ཡོད་པ་ཨེ་ཡིན།” “མིན་་་་་མིན་ལགས།” “ཧ་ཧ་ཧ་་་་ཧ་ཧ་ཧ” མི་ཚང་མ་བགད་བྱུང་བ་ན་ཁོ་ཡང་ངུ་བ་བཞིན་བགད་བྱུང༌། གློག་སྒྲོན་འོག་གི་ཤ་ཚོན་པོ་དང་ཆང་བཙན་པོ། ད་རུང་ཟས་སྣ་མང་བོའི་འགྲམ་དུ་མི་ཚང་མས་ཕན་ཚུན་ལ་སོ་ཕྲེང་དཀར་པོའི་བར་ནས་སྐད་ཆ་སྙན་མོ་ལབ། རྡོ་རྗེ་ཅུང་ཙམ་བཟི་འདུག ཁོ་མི་མང་བོའི་བར་ནས་འགོ་བའི་གམ་དུ་བཙན་གྱིས་འཚང་ནས་འགོ་བའི་དུ་བ་ལ་མེ་བསྒོ་ཞིང་འགོ་བ་ལ་སྐད་ཆ་ བཤད་ཅིང་འགོ་བ་ལ་གཞན་གྱིས་དྲངས་བའི་ཆང་འཐུང་ཅི་ཐུབ་བྱེད་པས་ཡུན་གྱིས་ངོ་མ་འགོ་བ་ལ་འཐུང་སྐལ་གཅོད་པའི་ཚུལ་དུའང་སྣང་བས་ སྐབས་ཤིག་ཏུ་འགོ་བས་ “ཁྱོད་ཀྱིས་ངའི་ཆང་སྐལ་བཅད་ནས་ཅི་བསམ་པ་ཡིན་” ཞེས་སྨྲས་པ་ན་རྡོ་རྗེས་སྐད་གདངས་དམའ་ཞིང་ཉམ་ང་བའི་ ངང་ “ངས་ཁྱོད་བཟི་འགྲོ་གི་བསམ་པ་ཡིན་ལགས་” ཤེས་སྨྲས་བ་ན་འགོ་བས་ཁྲོ་ཉམས་དང་བཅས་ཏེ་ “སྟག་ཤ་ར་ཞིག་ཡིན་དུས་ཆང་འཐུང་ བའི་དམིགས་ཡུལ་ནི་བཟི་རྒྱུ་དེ་མ་ཡིན་པར་དྭངས་རྒྱུ་དེ་ཡིན་ན་ཡུལ་ནས་རྒད་མོ་རུམ་ནས་ཉལ་མི་འདུག་པར་ཅི་བྱེད་དུ་ཡོང་བ་རེད།་” ཞེས་ བཤད་དུས་ཁོས་དེ་མུར་ “རེད་རེད་་་རེད་ལགས་” ཞེས་ཆང་ཕོར་འགོ་བ་ལ་དྲངས་བ་ན་མི་ཚང་མ་སླར་ཡང་བགད་བྱུང་བས་རྡོ་རྗེ་ཡང་…

༄༅།། མཐའ་མཇུག་གི་རི་དྭགས་རྔོན་ཐེངས་གཅིག རྣམ་སྲས། མདོ་ལ་རིང་མོའི་རི་འདབས་སུ། ཨ་ཇོ་དགྲ་འདུལ་གྱིས་རི་དྭགས་སོད་སོད་ཅིག་སུས་ཀྱང་གསོད་མི་ཐུབ། ཡུལ་དེར་ མི་ལ་ལས་ཨ་ཇོ་དགྲ་འདུལ་གྱིས་ཨ་མྱེས་བྲག་དཀར་བསྟེན་ཡོད་པར་བཤད་ཅིང༌། སྐབས་འགར། རྫ་གསེང་ནགས་གསེབ་ ཏུ་ཁོ་རང་གཅིག་པུར་འགྲོ་སྐབས་རྟ་ར་རའི་སྟེང་དུ་ཞོན་པའི་ཕྱིང་ལྭ་དང་ཕྱིང་ཞྭ་གྱོན་མཁན་ཞིག་མཐོང་བའང་མང་ཟེར། གང་ལྟར་ཁོང་རི་དྭགས་རྔོན་དུ་འགྲོ་ཐེངས་རེར་ལག་སྟོང་ལ་ཕྱིར་མི་ལོག་པ་ཕལ་ཆེར་ཐག་ཆོད་ཡིན། བརྔོན་བྱའང་ཆེ་ཤ་ བ་དང་དྲེད་མོ། གླ་བ་དང་དགོ་བ་ནས་ཆུང་རི་བོང་དང་དེ་ཕོ་ཡན་ཆད་ཁོང་གི་ལག་ནས་ཐར་ཐབས་བྲལ་བ་རེད། མི་ལ་ ལས་ཡུལ་འདི་བསོད་ནམས་དམན་པའི་ལྟས་སུ་ཤན་པ་རྨེ་རུའི་ཡང་སྤྲུལ་མངོན་སུམ་དུ་བྱོན་པ་ཡིན་ནའང་ཐང་ཞེས་ཀྱང་ གླེང་ངོ༌། །ལོ་འདི་འགའི་རིང་ལ་ཨ་ཇོ་དགྲ་འདུལ་གྱིས་རི་བརྒལ་ལ་བརྟོལ་ཐུབ་པའི་ནུས་སྟོབས་ལ་བརྟེན་ནས་ཡོང་སྒོ་ཇེ་ མང་དང་འཚོ་བ་ཇེ་ལེགས་སུ་བཏང་བ་དང༌། སྡེ་བའི་ནང་ཁོང་ཚང་གི་ཆ་རྐྱེན་ཅུང་ལེགས་པའི་གྲས་སུ་བགྲང་ཆོག་ཉེ་ ཆར་གོང་རིམ་གྱིས་རི་དྭགས་རྔོན་མི་ཆོག་པའི་བསྡམ་ར་ཡང་དང་ཡང་དུ་བཞག་ན་ཡང “བཀག་རྒྱ”དེ་རིགས་ གསན་ཚེ། ཁོའི་སེམས་སུ་ད་དུང“མི་ཚང་མ་རི་དྭགས་རྔོན་པར་སྐུལ་ཀྱང་ལ་ལུང་བརྒལ་བའི་ཚེགས་སུ་ཞིག་གིས་མྱོང་ ཐུབ་བམ། ད་ལྟ་སྔོན་ཆད་དང་མི་མཚུངས་པ་རེད……”ངོ་མ་བཤད་ན་དེ་ཡང་གནས་ཚུལ་དངོས་རེད། ན་གཞོན་ འགའ་རེས་ཁོང་ལ་སློབ་སྦྱོང་བྱས་ཏེ། ལྐོག་ཏུ་རི་དྭགས་རྔོན་དུ་སོང་མོད། དེ་རྣམས་བཟེ་རེ་ཆེ་ལ་སྡུག་བསྲན་མེད་པས་རི་ དྭགས་གཅིག་ཀྱང་མ་སོད་པ་རེད། ཨ་ཇོ་དགྲ་འདུལ་ལ་མཚོན་ནའང་ལྕགས་ཀྱིས་བརྡུངས་པ་ཞིག་ག་ལ་ཡིན། ཁོང་གི་ལུས་ སྟེང་དུ་ན་སོས་ཐུབ་པའི་རྟགས་མཚན་ཡང་སྣ་ཚོགས་ཤིག་མཐོང་རྒྱུ་འདུག ལྷག་པར་དུ་ད་ལོ་ནས་བཟུང་རི་མགོར་སོང་ ན་དབུགས་འཚང་བ་དང་ཡུལ་དུ་སླེབས་ན་མཁལ་སྐེད་ན་ཞིང་རྐང་ལག་རེངས་ནས་བརྐྱངས་སྐུམ་དཀའ་བ་སོགས་ཁོ་ རང་གི་སེམས་སུའང་ཁྲིགས་ཁྲིགས་རེད། ཡིན་ན་ཡང༌། ཁོང་གིས་ཁྱིམ་ཚང་དང་ཕྱིན་ཆད་ཀྱི་འཚོ་བ་བསམས་ནས་བརྔོན་ མཚམས་མ་བཞག་གོང་ལ་བུ་ཆུང་བ་རྡོ་སྐྱབས་ལ“འཚོ་ཐབས”འདི་སློབ་ཏུ་འཇུག་བསམ་པའི་བློ་སྔ་མོ་ནས་ཤར་…

ནམ་མཁའི་དབྱིངས་སུ་འདར་འདར་རྒྱུ་བའི་སྐར་ཕྲན། བསྒྲལ་རྡོ། 　 “ཁྱིམ་མཚེས་ཡ་ཁྱིམ་མཚེས། ཁྱོད་ཀྱིས་ངའི་ཕྱོགས་སུ་དོང་རིམ་པ་ཅི་ཙམ་བསྐོས་ཡོད༌། ཁྱོད་ཀྱི་བསམ་པ། ཁྱོད་ཀྱི་གཡོ་སྒྱུ། ཁྱོད་ཚོས་ང་རང་ཧོན་ལོག་འདུག་མ་བསམ། ངས་དེ་དག་ཚང་མ་སྔ་མོ་ནས་གསལ་བོ་ཤེས་ཡོད” མོས་ཁེར་ལབ་ཅིག་བརྒྱབ། མོས་ཁེར་ལབ་ཅིག་བརྒྱབ་ནས་བསྡད་པ་ན་རྒས་གཉེར་ཆགས་པའི་ཀླད་པའི་ནང་གི་དུས་ཚོད་རེ་ཞིག་ཕྱི་ཕྱིར་ནུར། དེ་རིང་ཞོགས་པར་མོ་རང་ཁྱིམ་མཚེས་ཚང་ལ་སོང་ནས་སྒོ་བརྡུང་བ་ན་མི་ལོ་བཅུ་ལྷག་ལ་བར་དུ་གྱང་ར་ཞིག་བཞག་ནས་བསྡད་པའི་ཁྱིམ་མཚེས་རྒན་མོས་སྒོ་ཕྱེས་བྱུང༌། མོས་ཐོག་མར་མོ་མཐོང་མ་ཐག་ཧ་ཅང་ཆ་རྒྱུས་ཡོད་པའི་སྣང་བ་ཞིག་སྐྱེས་ནས་ཕན་ ཚུན་འཛུམ་དམུལ་དམུལ་བྱས་ཤིང་ལག་པར་འཇུ་རེས་བྱས་ནས་ཟེར་རྒྱུར༌། “ཁྱིམ་མཚེས་བདེ་མོ” “ཡ ནང་དུ་ཕེབས་ ནང་དུ་ཕེབས” ཁྱིམ་དུ་སོང་བ་དང་ཁོང་གཉིས་ལ་བློ་ཁོག་གཅིག་པའི་ཁ་བརྡ་ཅི་ཡང་མེད་པར་ལུས། ཡུད་ཙམ་འགོར་རྗེས་མོས་མོ་རང་ཁོང་ཚང་ལ་ཡོང་བའི་དོན་དག་བཤད་འདོད་ཅིག་སྐྱེས་མོད་གློ་བུར་དུ་མིག་མདུན་གྱི་མི་དེའི་གདོངགི་རྣམ་འགྱུར་ལ་བལྟ་ཙམ་བྱས་པ་དང་དེ་རང་ལ་ཞེ་སེམས་ དྲང་མིན་བསམ་བཞིན་བློ་ངོར་དོགས་པ་ཆེན་པོ་ཞིག་ལངས་ནས་ཧ་ཅང་མི་སྡུག་པའི་འདས་དོན་ཞིག་ཡིད་ཀྱི་མེ་ལོང་ངོས་སུ་ཤར། ལོ་ངོ་སུམ་ཅུ་ལྷག་གི་ཡར་སྔོན་དུ་རིག་གནས་གསར་བརྗེ་ཟེར་བའི་དུས་འགྱུར་ཞིག་བྱུང་ནས་ཡོད་ཚད་ལ་འགྱུར་ལྡོག་བྱུང་དུ་བཅུག་བྱུང༌། དུས་འགྱུར་དེའི་ངོ་བོས་མོ་ནི་སྤྱིར་བཏང་གི་མི་ཕལ་བ་ཞིག་ནས་ཉིན་གཅིག་ཞག་གཅིག་གི་རིང་ལ་སྤྱི་ཚོགས་དེའི་ཁྲོད་དུ་གོ་གནས་དང་ཐོབ་ ཐང་མི་དམན་པ་ཡོད་པའི་མི་ཞིག་ཏུ་གྱུར༌། དེ་བས་གོ་གནས་དེའི་ཆེད་དུ་མོས་ཀྱང་མི་མི་ཉུང་བ་ཞིག་ལ་བཤུ་གཞོག་དང་བརྙས་བཅོས་བཏང་ མྱོང༌། དེ་རིང་གློ་བུར་དུ་མོས་མིག་མདུན་གྱི་མི་དེ་སྔོན་ཆད་རང་གིས་ཉེས་བ་དང་ཕོག་ཐུག་བཟོས་མྱོང་བའི་མི་ཞིག་གམ་མི་དེ་ཚོར་འབྲེལ་བ་ཡོད་པ་ རེ་ཨེ་ཡིན་ནམ་སྙམ་ནས་དོན་དག་དེ་རེ་ཞིག་མོ་ལ་འདྲི་ཐག་མ་ཆོད་ལ་གློ་བུར་དུ་སྒོར་འབུད་ཐག་ཀྱང་མ་ཆོད། དོན་དངོས་སུ་ཁྱིམ་མཚེས་བྱས་ བའི་མི་ལོ་བཅུ་ཕྲག་གི་རིང་ཁྱིམ་མཚེས་དེ་ནི་མོའི་ངོ་ཤེས་སམ་གྲོགས་པོ་ཚང་མ་དང་འདྲ་བར་འཚོ་བར་ཆ་རྒྱུས་ཡོད་ཀྱང་ངོ་ཅུང་ཙམ་ཤེས་བ་ མ་གཏོགས་གློ་སེམས་གཏོད་ཆོག་པའི་གྲོགས་པོ་ཞིག་གཏན་ནས་མིན། སྙིང་བོ་དང་དོན་དག་ཅི་ཡང་མེད་པའི་ཁ་བརྡའི་བར་ནས་ཁྱིམ་མཚེས་རྒན་མོས་མོའི་དཀར་ཡོལ་ནང་དུ་ཇ་གསོས་རེ་འཐེན་ཞོར་མིག་ཟུར་ གྱིས་ཡང་ཡང་འཕེན་པ་ལས་སྐད་ཆ་མང་པོ་མི་བཤད༌། དེ་ཡིས་ལྷག་པར་མོ་ལ་རང་ཉིད་ནི་འཛུལ་མི་རུང་བའི་དྲེད་ཚང་ཞིག་ཏུ་ལྷུང་ཡོད་པའི་ སྣང་བ་ཞིག་སྐྱེས་ཤིང་མཚམས་མཚམས་སུ་ཁོང་གཉིས་ཀྱི་ཕན་ཚུན་གྱི་གདོང་གར་མཉམ་འཇོག་གིས་བལྟ་བའི་ མིག་ཟུར་འཕྲད་ཐེངས་རེར་ གཉིས་ཀའི་གདོང་དུ་དོགས་མི་བདེ་བའི་རྣམ་འགྱུར་རེ་མངོན། “ ཁྱིམ་མཚེས། ཁྱིམ་མཚེས།”…

༄༅།། ནད་བདག་གི་རང་གཟུགས་ཕྱིར་མངོན་པ། ནོར་སྡེ། 　　ཤེས་བྱའི་རླབས་ཕྲེང་རྫོགས་པ་མེད་པ་པདྨའི་མཚོར། །ངག་རིག་ངང་མོའི་རྗེས་སུ་འབྲངས་ནས་རྩེན་པ་ངས། ། ཤེས་རྒྱུད་རྨོངས་དད་མེ་ཡིས་ཚིག་པ་དག་གི་ཆེད། །ངག་གི་འདབ་མར་ཆགས་པའི་གཏམ་སྦྱོར་ཆུ་ཐིགས་སྦྲེང༌། ། དེ་ཡང་སྔོན་གྱི་ཚེ་འཕགས་བོད་གཉིས་ཀྱི་ས་མཚམས། གངས་ཅན་རི་ཡི་ཉེ་འདབས་སུ། ལྷ་ཆེན་ཐིག་ལེ་དྲུག་པ་ ལ་སྐྱབས་སུ་འགྲོ་བའི་གྲུབ་ཐོབ་ཟླ་བའི་སྙིང་པོ་ཞེས་བྱ་བ་ཡུམ་དཔལ་མོ་སྐྱིད་དང་ལྷན་ཅིག་ཏུ་གནས་པ་ཞིག་ཡོད་པ་དེས། སྐྱེ་བོ་རྣམས་ལ鉊ནད་བདག鉋དང鉊རྣམ་ཤེས鉋མངོན་སུམ་དུ་སྟོན་ནུས་པས། ཡུལ་མི་ཀུན་གྱིས་ངོ་མཚར་དང་དད་གུས་ ཚད་མེད་བྱེད་པར་མ་ཟད་དད་གཤིན་གྱི་ནོར་རྫས་ཡོད་ཚད་ཁོང་ལ་ཕུལ་ནས་གསོན་པོའི་སྐྱབས་གནས་དང་གཤིན་པོའི་ ལམ་སྟོན་གྱི་རེ་བ་བཅོལ། གྲུབ་ཐོབ་དེ་ཉིད་ཀྱི་ཁྱད་ཆོས་གཙོ་བོ་ནི། ནད་པ་ལ་ཆོ་ག་བྱེད་པའི་ཚེ། མདའ་ལྔའི་འཕུལ་མོ་ལ་ བརྟེན་ནས། ནད་བདག་དང་གདོན་བདག་དང་པོ་གང་ནས་བྱུང༌། བར་དུ་གང་ན་གནས། ཐ་མ་གང་དུ་འགྲོ་སོགས་སྟོན་ པར་མ་ཟད། ནད་སྣ་འདྲེན་བྱེད་ཀྱི་གདོན་རྫས་སྣ་ཚོགས་ངོས་བཟུང་སྟེ་གླུད་ཀྱི་གཏོར་མ་དང་ལྷན་ཅིག་ཕྱོགས་དང་ཕྱོགས་ མཚམས་སུ་བསྐྱལ་རྗེས་རོལ་མོ་སྣ་ཚོགས་དྲག་ཏུ་དཀྲོལ་ན། 鉊ནད་བདག་གིས་མངོན་སུམ་དུ་འཁྱེར་འགྲོ་བ་རེད། དེ་ཡང་ གདོན་རྫས་ཕྱིར་ཕུད་དུས་ངེས་པར་དུ་མུན་རུབ་ལ་ཉེ་བའི་དུས་སུ་ཁེལ་དགོས་ལ། དེ་ནི་ནད་བདག་མི་མ་ཡིན་རྣམས་རྒྱུ་ བའི་དུས་ཡིན་པས་རེད་ཅེས་གསུང་གི་ཡོད་པ་རེད། ཡང་གཤིན་པོ་ལ་ཆོ་ག་བྱེད་པའི་ཚེ། གསེར་དངུལ་དང་གཡུ་བྱུར་ སོགས་རིན་པོ་ཆེ་སྣ་ཚོགས་དང༌། གོས་དང་དར་ཟབ་སོགས་གྱོན་ཆས་སྣ་ཚོགས། མར་དང་འོ་མ་ཀ་ར་དང་སྦྲང་རྩི་སོགས་ དཀར་གསུམ་མངར་གསུམ་བཅས་ཚོགས་པར་བྱས་ནས་ཞག་བདུན་ནམ། ཉེར་གཅིག་གམ་ཞེ་དགུའི་རིང་ལ་བསྔོས་ཏེ་ གསུར་མེ་དང་ལྷན་ཅིག་རྒྱང་རིང་པོར་བསྐྱལ་རྗེས།…

༄༅།། ནག་ཞར་སྡེ་བའི་གཏམ་རྒྱུད། སྟག་འབུམ་རྒྱལ། （ཀོས་ནན） གཅིག ཡི་དམ་ནག་འདུས་ཀྱི“ནག鉋དང“འདུས鉋 ནག་འདུས། ཅི་ཞིག་ནག་པ་ཡིན་ནམ། ཁྱོད་ཀྱིས་ཅི་ཞིག་ཟེར། སྐྱི་མོ། སྐྱི་མོའི་ཁ་དོག་ནག་པོ་ཡིན་པས་རེད། འོ་ན་ ཅི་ཞིག་འདུས་པ་རེད། ཨེ—ལུས་པོ་ལ་ཟེར་བ་རེད། ཁྱོདཀྱིས་ལྟོས་དང༌། ཁོ་རང་གི་ལུས་པོ་ཧ་ཅང་བཙོག ཅི་ཞིག་གིས་ མནར་བ་ལྟར་ནམ་རྒྱུན་ནག་ཉེར་རེར་འདུག ཧེ་ཧེ་ཧེ—ཡི་དམ་ལ་ནག་འདུས་ཞེས་མཚང་མིང་འདོགས་མཁན་ཡང་ དེང་ཐོག་རྒད་པོ་ཆོ་ཡིན་ཞིང༌། དེའི་རྗེས་སུ་ལོ་ན་བཅུ་ཕྲག་ལ་སོན་པའི་བྱིས་པ་དག་ཡིན། དེ་ནས་རིམ་བཞིན་བུད་མེད་ ཚོའི་ཁྲོད་དུའང་ཁོ་རང་ལ་དེ་ལྟར་འབོད་མཁན་བྱུང༌། ཡི་དམ་ནག་འདུས་ཆུང་ངུའི་དུས་སུ་འདི་འདྲའི་ནག་ཅིང་འདུས་པ་ཞིག་གཏན་ནས་མིན་ལ། ཕྱིས་སུ་ཆུང་མ་ བཀྲ་བྷེ་ལེན་དུས་ཀྱང་འདི་འདྲ་ཞིག་ག་ལ་ཡིན། ཁོ་རང་ཕོ་ལོ་སོ་དགུར་སོན་པའི་སྟོན་ཁ་དེར་བཀྲ་བྷེ་ཆུང་མར་བླངས་པ་ རེད། དྲང་མོར་བཤད་ན་ཡི་དམ་ནག་འདུས་ནི་འབྱོར་མེད་གྲལ་རིམ་རྨ་མེད་པ་ཞིག་ཡིན་པས“གྲལ་རིམ་འཐབ་རྩོད “ཀྱི་རླུང་འཚུབ་དེས་ཁོ་རང་ལའང་རོགས་སྐྱོར་ཆེན་པོ་བྱས་ཡོད། དེ་དུས་མི་ཚང་མས་ཀྱང་ཁོ་རང་ལ་བསྟོད་པའི་ཚུལ་ གྱིས་ག་ནས་མཐོང་ཡང“ཡི་དམ་རྒྱ་དམར”ཞེས་འབོད་ཅིང༌། ཐོན་སྐྱེད་རུ་ཁག་གིས་ཀྱང་ཁོ་རང་འབྱོར་མེད་རེད་ ཟེར་ནས་ལུག་ཁྱུ་གཅིག་ཁོ་ལ་སྤྲད་ནས་འཚོ་སྐྱོང་བྱེད་དུ་བཅུག དེ་བས་བཀྲ་བྷེ་ཡང་ཁོ་དང་ལྷན་དུ་འདུག་འདོད་སྐྱེས། སྐབས་དེ་དག་ཏུ་ཡི་དམ་ནག་འདུས་ཀྱང་འགྱིང་ནས་འགྲོ་ཞིང༌། མི་སུ་ཞིག་ལ་ཁ་བརྡ་བྱེད་དུས་ཀྱང་ཁོས་ངའོ་ སྙམ་པའི་ཉམས་དང་བཅས། “ང་འབྱོར་མེད་གྲལ་རིམ་ཡི་དམ། ང་ཏང་ལ་བློ་དཀར་བ་ཞིག་ཡིན།…

༄༅།། དཔེ་ཚབ་སྤྲོད་པ། རིག་འཛིན། 　　སློབ་གྲྭའི་གཟིམ་བརྡ་བཏང་ནས་རེ་ཞིག་འགོར་སོང༌། ངས་སློབ་མའི་སྒྲུབ་ལས་ལ་ཞུས་དག་བྱས་ནས་དེབ་བཞི་ ལྔ་ཙམ་ལས་ལྷག་མེད་པས། དབུགས་དབྱུང་ཅུང་ཙམ་བྱས་རྗེས་ལྷག་མ་དེ་དག་ཀྱང་དབུགས་ཐེངས་གཅིག་གིས་ཞུས་ཏེ་ རྫོགས་པར་བྱ་བསམས་ནས་དེབ་གཅིག་བླངས་ཏེ་བལྟ་བར་རྩོམ་པའི་ཚེ། གློ་བུར་དུ་ཕྱི་རོལ་ནས“ཐག་ཐག་ཐག” ཅེས་སྒོ་རྡུང་བའི་སྒྲ་ཆུང་ངུ་ཞིག་གྲགས་བྱུང༌། ངས་རང་ཉིད་ཀྱི་སྒོའམ་གཞན་པའི་སྒོ་ཡིན་ཐེ་ཚོམ་པས་རྣ་བ་གླགས་ཏེ་ ཉན་པ་ན། སླར་ཡང“ཐག་ཐག་ཐག”ཅེས་རང་གི་སྒོ་རྡུང་བའི་སྒྲ་ཞིག་དང་ལྷན་ཅིག“དགེ་རྒན་གྲགས་པ”ཞེས་ སྐད་ཆུང་ངུས་ངའི་མིང་ནས་འབོད་པའི་སྒྲ་ཞིག་ཀྱང་རྣ་ལམ་དུ་འབྱོར་བྱུང༌། ངས་ཕྱི་ལ་ཨ་ལན་སྟེར་བཞིན་སོང་ནས་སྒོ་ ཕྱེས། མགྲོན་པོ་ནང་དུ་བསུས། གློག་འོད་ཀྱི་འོག་ནས་ཕར་ལ་བལྟས་པ་ན། ཨ་ཙི། ཆ་མེད་འདྲིས་མེད་ཀྱི་གཞོན་ནུ་ཞིག་ རེད། དེའི་གཟུགས་པོ་དེ་འདྲ་མི་ཆེ་ལ་ཤའང་དེ་འདྲ་རྒྱགས་པོ་མིན་ཞིང༌། སྟོད་ལ་ཡང་ཡང་བཀྲུས་ཏེ་མདོག་སྐྱ་བོར་སོང་ བའི་ལྭ་སྔོན་པོ་ཞིག་དང༌། སྨད་ལ་ཏིས་ཁ་སྨུག་པོའི་དོར་མ་ཐགས་བབས་ཤིག་གྱོན་ཡོད་པ་དེ་ཁོ་རང་གི་ལུས་དང་འཚམ་ ཞིང་རན་པོ་ཞིག་འདུག་པས། མཐོང་བ་ཙམ་གྱིས་གྲ་དག བག་ཡོད། གྲུང་པོ་བཅས་ཡིན་པའི་འདུ་ཤེས་ཤིག་བསྐྱེད་ལ། གདོང་སྒོར་ཞིང་སྨུག་པོའི་སྟེང་ན་ཆེ་ཞིང་གསལ་བའི་མིག་འབྲས་ཟུང་ཞིག་ཀེམ་ཀེམ་གཡོ་བའི་ངང་ཚུལ་དེ་ལས་གཞོན་ ནུ་འདིའི་ལང་ཚོ་དར་ལ་བབ་ཅིང་བློ་རིག་རྣམ་པར་བཀྲ་བའི་རང་བཞིན་མ་ཉམས་པར་ཤར་འདུག གཞོན་ནུ་དེས་ང་ལ་ གུས་བཀུར་གྱི་ཚུལ་དུ་མགོ་སྒུར་སྒུར་ཞིག་བྱེད་བཞིན“དགེ་རྒན་གྲགས་པ་ལགས། ཁྱེད་བདེ་མོ་ཡིན་ནམ”ཞེས་ འཚམས་འདྲི་བྱེད་པ་དང་ལྷན་ཅིག་བདག་གི་ལག་པ་ལ་དམ་པོར་འཇུས་བྱུང༌། ངས་ལན་འདེབས་བཞིན་ཁོ་ལ་སླར་ཡང་ མགོ་ནས་རྟིང་བར་དུ་ཞིབ་ལྟ་ཞིག་བྱས་ཏེ་ཕ་རོལ་གྱི་ལུས་སྟེང་ནས་ངའི་ཡིད་ལ་བཞག་པའི་གཟུགས་བརྙན་ག་གེ་མོའི་ཆ་ ཤས་སམ་ཡང་ཤས་ཀྱི་དོད་ཙམ་རྙེད་པར་བྱེད་པའི་ངལ་བ་ལྷུར་བླངས་ཀྱང་འབྲས་བུ་ཅི་ཡང་མ་ཐོབ་པས། ཁོས་སླར་ཡང་ ང་ལ“ཁྱེད་ཀྱིས་བརྗེད་སོང་ངམ།…